გიორგი გახარია ვახტანგ გოძიაშვილს : სისტემამ მიიღო გადაწყვეტილება, რომ შენ უნდა გახვიდე ამ ბიზნესიდან …

რვა წლის წინ, ზუსტად ამ დროს, ხელისუფლებაში მოსული გამარჯვებული ძალა, ანუ „ქართული ოცნება“ ბიზნესს თავისუფალ სუნთქვას დაჰპირდა. მაშინდელი პრემიერ-მინისტრი ბიძინა ივანიშვილი პირადად შეხვდა ქართული ბიზნესის წარმომადგენლებს და მათ დახმარებაც აღუთქვა. მას მერე ბევრმა წყალმა ჩაიარა, ყველა მსხვილ ბიზნესს ქვეყანაში სერიოზული პრობლემები შეექმნა, არ დარჩენილა სფერო, რომელშიც სხვადასხვა დროს ხელისუფლების გავლენიანი წარმომადგენლები ან მათი ნათესავები არ ჩარეულიყვნენ. გვარები იმის მიხედვით იცვლებოდა, რომელი კლანი დაწინაურდებოდა ხოლმე ივანიშვილის კარზე.
„ქრონიკა+“ „ოცნების“ უსამართლობის ერთგვარ მემატიანედ იქცა. დღეს კიდევ ერთ ასეთ ისტორიას მოგიყვებით – უჩა მამაცაშვილმა და თამაზ თამაზაშვილმა ბიზნესომბუდსმენ გიორგი გახარიას დახმარებით როგორ აახიეს ბიზნესი ბიზნესმენ ვახტანგ გოძიაშვილს.

_ მე ვარ ვახტანგ გოძიაშვილი, კომპანია MN GEORGIA -ს ერთ-ერთი მფლობელი. კომპანია „ჯორჯიან ამერიკან ელოისთან“ კარგი ურთიერთობა გვქონდა. ვფლობდით ინფორმაციას, რა განუკითხაობა იყო მარგანეცის მოპოვების ბიზნესში ჭიათურაში. შავად მუშაობის გამო საკმაოდ დიდი თანხები იკარგებოდა, _ ეს ინფორმაცია გვქონდა თვითონ ჭიათურაში ბიზნესში ჩართული ადამიანებისგან. აქედან გამომდინარე, „ჯორჯიან ამერიკან ელოიზის“ ხელმძღვანელობას შევთავაზე, აუთსორსინგის თეთრი სქემა გაგვეკეთებინა, გავაკეთეთ მონახაზი. სანამ დავაფუძნებდით MN GEORGIA -ს კომპანიას, მანამდე ერთი წელი ვიმუშავეთ იმაზე, თუ როგორ უნდა გაგვეკეთებინა ეს, ზოგადად როგორ უნდა ემუშავა აუთსორსინგის თემას გარეთ და აქედან გამომდინარე, სადღაც, 8-9 თვის თანამშრომლობისა და სერიოზული მუშაობის 9 თვის თავზე დავაფუძნეთ კომპანია MN GEORGIA , რომელმაც ექსკლუზიური ხელშეკრულება-შეთანხმება გააფორმა „ჯორჯიან მანგანეზთან“ და მთლიანად ჩვენ უნდა გვეწარმოებინა გარემოპოვება, ანუ აუთსორსინგი…
_ რომელი წელია?
_ ოფიციალური ხელშეკრულება გაფორმდა 2014 წლის პირველ აპრილს…
_ ანუ „ოცნების“ ხელისუფლების პირობებში?
_ დიახ… ანუ, ზოგადად, აუთსორსინგი ჩვენი გაკეთებული, ჩვენი მოგონილი სისტემაა. როცა დავთვალეთ, აბსოლუტურად გულწრფელად გეტყვით, წმინდა მოგება კომპანიაში იყო 14 მილიონი დოლარი წელიწადში, შესაბამისად, ძალიან დიდი რაოდენობის თანხა იკარგებოდა ბიუჯეტში.
_ დაიწყეთ მუშაობა, შემდეგ?
_ ურთიერთობა მქონდა ბიძინა ივანიშვილის ოჯახთან ძალიან დაახლოებულ პირთან, პარლამენტის წევრ ირაკლი ტრიპოლსკისთან. მისი მეშვეობით დავუკავშირდით ხელისუფლების წარმომადგენლებს, რომ იქ, შავ ბიზნესში, თავიდან ბოლომდე ჩართული იყვნენ ხელისუფლების წარმომადგენლები. აქედან გამომდინარე ვთხოვეთ დახმარება.
_ დავაზუსტოთ, ვის გულისხმობთ ხელისუფლების წარმომადგენელში? ვის სთხოვეთ დახმარება?
_ უშუალოდ პრემიერ-მინისტრ ირაკლი ღარიბაშვილს. ჩემ თვალწინ ელაპარაკა ირაკლი ტრიპოლსკი ირაკლი ღარიბაშვილს ტელეფონზე/ ვისხედით „რედისონში“, შეხვედრა გვქონდა, ეს ლაპარაკი არ იყო ერთჯერადი, აესეთი საუბარი რამდენჯერმე შედგა და იმ პერიოდში ღარიბაშვილი აბსოლუტურად საქმის კურსში იყო. თუმცა, მოგვიანებით, როგორც გავარკვიე, სწორედ ღარიბაშვილის, კახელების ჯგუფისა და თამაზ თამაზაშვილის ინიციატივით ჩემზე დეზინფორმაცია მიუტანეს ბიძინა ივანიშვილს, თუმცა ამაზე ცოტა მოგვიანებით… მოკლედ, დავუკავშირდით ხელისუფლების წარმომადგენლებს, კონკრეტულად პრემიერ-მინისტრს, პირადად მე ვთხოვე ტრიპოლსკის ჩაეყენებინა ივანიშვილი საქმის კურსში და მან მითხრა, რომ ჩააყენა საქმის კურსში. ვიცი, რომ ყველა გადაწყვეტილება ბიძინა ივანიშვილის მიერ არის მიღებული. ჩემს სქემაში ჩაერთო მისი დეიდაშვილი უჩა მამაცაშვილი და იქიდან გამომდინარე, რომ მე მომიწია შეერთებულ შტატებში წასვლა, რომ საბოლოოდ დაგვეზუსტებინა ჩვენი მუშაობის პრინციპი, როგორც კი დავბრუნდი, გავიარე კონსულტაციები კიდევ ერთხელ ამ პარლამენტართან, მომცეს გიორგი გახარიას ტელეფონის ნომერი და გადმომცეს უჩა მამაცაშვილის დანაბარები, რომ შევხვედროდი გახარიას და ის დამეხმარებოდა ამ სქემის დალაგებაში.
_ ამ დროს გახარია ბიზნესომბუდსმენია?
_ დიახ!.. მართლაც დავიწყეთ საკმაოდ ინტენსიური მუშაობა გახარიასთან. მომთხოვა ჩემი გენერალური შეთანხმება, რომელიც მერე, როცა ჩამანაცვლეს, პირდაპირ „კოპი ფეისთით“ გადაიტანეს სხვა კომპანიაზე, უბრალოდ, გენერალური შეთანხმება ამოიღეს, რადგან თვითონ ამერიკელებიც წავიდნენ ექსკლუზივზე წინააღმდეგი და იმ კომპანიას გაუფორმეს, რომელიც თავისი „ლოცვა-კურთხევით“ შეიყვანეს. დასაწყისში საკმაოდ პროდუქტიული და ნაყოფიერი შეხვედრები მქონდა (ყოველ შემთხვევაში, მე ასე ვფიქრობდი) იმდროინდელ გარემოს დაცვის მინისტრ ხათუნა გოგალაძესთან, ელგუჯა ხოკრიშვილთან მისივე ინიციატივით, თუმცა, ეტყობა, სქემას მიყვნენ და როცა ნახეს, გახარია და ივანიშვილი იდგნენ ამ საქმის სათავეში, იმწუთასვე, როგორც კი კაბინეტიდან გამოვედი, ზარი დამაწიეს, _ ამ საქმიდან არაფერი გამოვაო…
_ ვახო, როდესაც თქვენ და გახარია ერთმანეთს ხვდებოდით, რაზე საუბრობდით უჩა მამაცაშვილის დანაბარებით? რა იყო ამ შეხვედრების შინაარსი?
_ გულწრფელად მჯეროდა: იქიდან გამომდინარე, რომ ქვეყნის ხელისუფლებაში იყო ბიზნესმენი, ალალად გეტყვით, _ არ მქონდა ივანიშვილზე იმის წარმოდგენა, რომ ის იყო ხარბი კაცი და ასე დახურდავდებოდა, ასეთ წვრილმან დეტალებზე ჩამოვიდოდა. თუ ადამიანს პოლიტიკასთანაც გაქვს შეხება და ზოგადად იცი, ქვეყანაში რა ხდება, შეიძლება გარკვეული წარმოდგენები შეგექმნას, მაგრამ გულწრფელად გეუბნებით, ნამდვილად არ მეგონა ივანიშვილი თუ ასეთ თემებში დაიწყებდა საკუთარი ინტერესების ჩადებას, აქედან გამომდინარე, თეორიულად ძალიან ნაყოფიერად ვიმუშავეთ და თავიდან ბოლომდე გავიარეთ სქემა, თუ როგორ მოხდებოდა შემოსავლების ლეგალიზაცია. გიორგი გახარია თავიდან ბოლომდე ჩავახედე თემაში და დავანახე, რომ ძალიან დიდი რაოდენობის თანხა იკარგებოდა ყოველწლიურად ბიუჯეტში. ჩემი მთავარი მოთხოვნა ხელისუფლების მიმართ იყო ის, რომ უნდა ჩართულიყვნენ და განეხორციელებინათ ღონისძიებები, რომ ეს შეგვეწყვიტა და თეთრი სქემით გვემუშავა… მართლაც, დაიწყო ხელისუფლებამ მოქმედება. ეს შეგიძლიათ გადაამოწმოთ. ფინანსურმა პოლიციამ ბევრი კომპანიის წარმომადგენელი დააკავა, გადაკეტეს მთელი „ლევი“ წარმოება. მეგონა, ეს ჩვენ ხელშესაწყობად კეთდებოდა, თუმცა მერე როგორც გამოჩნდა, ამას იმიტომ აკეთებდნენ, რომ საკუთარ თავზე მოერგოთ ეს ბიზნესი. მარტივად რომ ვთქვათ, ჩემი იდეა მოიპარეს, პირდაპირ გადაიწერეს და ჩემ გარეშე გააგრძელეს მუშაობა.
_ თქვენ შორის უთანხმოება როგორ დაიწყო?
_ როცა იმდროინდელ გარემოს დაცვის მინისტრ ხათუნა გოგალაძეს შევხვდით და ავუხსენით, რა სიტუაცია იყო, რომ მოსაგვარებელი იყო ეკოლოგიის კუთხითაც, ბევრი პრობლემაა და ამაში გარემოს დაცვის სამინისტროც უნდა დაგვხმარებოდა… თავიდან ბოლომდე სქემა გავიარეთ. მეგონა, ყველაფერზე შევთანხმდით და როცა იქიდან გამოვდიოდით, ლიფტში გიორგი გახარიამ მითხრა, რომ შენ გარდა კიდევ ერთი კომპანია იმუშავებსო. უარი ვუთხარი, _ თუკი ჩემ გარდა შემოიყვანდნენ კიდევ სხვა კომპანიას, მაგ შემთხვევაში ვეღარ ვიქნებოდი პასუხისმგებელი, რომ ეს თემა გათეთრდებოდა… მარტივად გეტყვით, ბიზნესის ენაზე რომ ვილაპარაკოთ, აბსოლუტურად არამომგებიანი იქნებოდა.
_ მონოპოლიას ითხოვდით, მარტო უნდა ყოფილიყავით?
_ არა, მონოპოლია ვერ იქნებოდა. მარტივად აგიხსნით: თქვენი სახლის ასაშენებლად მე რომ დამიქირავოთ, მონოპოლისტი ვიქნები? მე დამიქირავა ლიცენზიის მქონე კომპანიამ, რომელსაც მოპოვების 40-წლიანი ლიცენზია აქვს, უბრალოდ, მომსახურების გაწევაზე, მე მხოლოდ გარემოპოვება უნდა მეწარმოებინა და ისეთი კომპანიისთვის მიმეტანა, რომელიც ამ ლიცენზიას ფლობს. ასე რომ, აქ მონოპოლია არაფერ შუაშია. თუმცა, მოგვიანებით, გახარიამ გააკეთა ამაზე აქცენტი, რომ მე ვცდილობდი მონოპოლიის მოპოვებას. დღეს იგივე სქემით მუშაობს გიორგი კაპანაძის იგივე „რიჟას“ კომპანია.
_ სანამ „რიჟამდე“ მივიდოდეთ, დავაზუსტოთ: როდესაც უარი უთხარით გახარიას, რომ კიდევ ერთი კომპანია უნდა დამატებოდა ამ სფეროს, რა რეაქცია ჰქონდა მას და როგორ განვითარდა მოვლენები?
_ მეორე დღეს შეხვედრა მქონდა დანიშნული „გრატოს“ შენობაში უჩა მამაცაშვილთან და ამ თემის დაყენებას ვაპირებდი, რადგან მივხვდი, რომ წინააღმდეგობა უკვე საკმაოდ მაღლიდან მოდიოდა. გახარიამ ჩემი და უჩა მამაცაშვილის შეხვედრის შესახებ არ იცოდა. მეორე დღეს 3-ის ნახევარზე დამირეკა, რომ ეს შეხვედრა გადაიდოო. შესაბამისად, ამით მითხრეს, რომ ჩვენგან მოდის ეს ინიციატივა და ნუ იბრძვიო.
_ ანუ უჩა მამაცაშვილს უნდა შეხვედროდით და ვერ შეხვდით, თუ შეხვდით და მეორე დღეს უარი გითხრათ?
_ არა, უჩა მამაცაშვილს მაგ შეხვედრაზე ვეღარ შევხვდი… უჩა მამაცაშვილს შევხვდი ირაკლი ტრიპოლსკისთან ერთად „გრატოს“ შენობასთან, გარეთ. ძალიან მცირე დროით გვქონდა საუბარი. მაგრამ შეხვედრა, სადაც უკვე ძალიან პროდუქტიულად უნდა გაგვევლო ეს თემა და უკვე სიღრმეებში უნდა შევსულიყავით, ვეღარ შედგა. კიდევ ერთხელ ვუსვამ ხაზს: როცა მინისტრისგან გამოვედით და იმაზე ვისაუბრეთ, რომ კიდევ სხვა კომპანია იქნებოდა, რაზედაც ჩემგან უარი მიიღეს, გადაწყვეტილი მქონდა, ეს გამეპროტესტებინა. თვითონ გახარიამ დამირეკა მეორე დღეს 3-ის ნახევარზე, რომ ეს შეხვედრა გადაიდოო. მაქსიმუმ, 4-5 დღე იყო გასული, რომ ისევ დამიძახა გიორგი გახარიამ. ერთმანეთს „ქორთიარდ მერიოტში“ შევხვდით და იქ ზუსტად ამ სიტყვებით მითხრა: სისტემამ მიიღო გადაწყვეტილება, რომ შენ უნდა გახვიდე ამ ბიზნესიდან. პირდაპირი კონტექსტით ასეთი ნათქვამი იყო: შენი არჩევანით ან დაუპირისპირდები სისტემას, ან არაო… კიდევ ისიც გაახმოვანა, რომ გადაწყვეტილება მიიღეს, ამ სქემიდან ყველა კმაყოფილი გავიდესო და დამითქვეს შეხვედრა თამაზ სომხიშვილის ერთ-ერთ მენეჯერ ჯანი მიხაილოვთან…
_ ვინ არის თამაზ სომხიშვილი?
_ ზუსტად მეც არ ვიცი, ვინ არის. ვიცი, რომ მოსკოველი ბიზნესმენია. მისი კომპანია ჩემი კომპანიის ნაცვლად შევიდა. მისი მენეჯერი ჯანი მიხაილოვი ხელმძღვანელობდა, მაგრამ პიროვნულად თამაზ სომხიშვილს არ ვიცნობ…
ჭიათურაში სამი კომპანია შევიდა _ ჯანი მიხაილოვის, ძმები ჩხენკელების, რომლებიც კახელების კლანს წარმოადგენენ, კიდევ ერთი კომპანია იყო რომან ფიფიასი, ოღონდ პირველი ჩემ მერე გაუფორმეს ხელშეკრულება რომან ფიფიას კომპანიას, თუმცა მასთან არანაირი პიროვნული პრეტენზია არ მაქვს, ის ბიზნესმენია. უბრალოდ, სისტემამ დაუძახა და სთხოვა, შედიო და შევიდა. არც ვიცნობდი, ერთმანეთს არასდროს შევხვედრივართ.
_ ფიფია, კახელების დაჯგუფება და უჩა მამაცაშვილის მოსკოველი ბიზნესპარტნიორი _ ასე განაწილდა ჭიათურაში ბიზნესი. როცა სომხიშვილის კომპანიის წარმომადგენლებს შეხვდით, რა მოხდა ამ შეხვედრაზე?
_ ჩემს კომპანიას მადნის მოსაპოვებლად წინასწარ აღებული ჰქონდა გარკვეული თანხა და მითხრეს, რომ ამ თანხას მაჩუქებდნენ, გადამიფარავდნენ და უნდა გავსულიყავი სქემიდან. ეს ჩემთვის აბსოლუტურად მიუღებელი წინადადება იყო, რაზედაც უარი ვუთხარი. მთხოვდნენ, MN GEORGIA გადამეცა, მათ უნდოდათ ექსკლუზიური შეთანხმება, ეს მიზანი ჰქონდათ. რა თქმა უნდა, ეს კომპანია არ გადავეცი, ოღონდ როცა იქიდან გამოვედი, ვალდებულად ჩავთვალე თავი, „ჯორჯიან მანგანეზის“ ამერიკელი ხელმძღვანელები საქმის კურსში ჩამეყენებინა და მაინტერესებდა მათი პოზიცია. მათთან მაინც გავიარე, ვუთხარი, ასეთი სიტუაციაა-მეთქი. მითხრეს, რომ არ დამეთმო ჩემი კომპანია, თუმცა ამის შემდეგ ისე მოხდა, რომ თავად „ჯორჯიან ამერიკან ელოიზი“ გახადეს იძულებული და პირდაპირ უთხრეს, რომ ჩემთან ხელშეკრულება გაეუქმებინა.
_ ვინ უთხრა?
_ ბიზნესომბუდსმენმა გიორგი გახარიამ… დაიბარა ლოზინსკი, ეს ჩანაწერებშიც ჩანს და უთხრა, რომ მე არ უნდა მემუშავა იქ, ხელშეკრულება უნდა გაეფორმებინა რომან ფიფიასთან და ჯანი მიხაილოვის კომპანიასთან. ასეც გააკეთეს. აპრილში ჩვენი ხელშეკრულება გაფორმდა და უკვე მაისში ჰქონდა რომან ფიფიას ხელშეკრულება გაფორმებული და თუ არ ვცდები, ივნისში _ ჯანი მიხაილოვს. როგორც კი ჩვენი ტვირთები დაიძრა, პირველი ორი მანქანა, გარემოს დაცვის სამსახურმა, უშიშროებასთან ერთად, გადაკეტა გზები და არ მოგვცეს საშუალება, პროდუქცია მიგვეწოდებინა. ჩვენ მოვახერხეთ მაქსიმუმ 20-30 ტონის მიწოდება, მეტის _ ვერა. გზები გადაკეტეს და აღარ გაგვიშვეს.
_ გზები ჩაგიკეტეს რას ნიშნავს?
_ როგორც კი ტრაილერები დაიძრა, გარემოს დაცვის მანქანები ჩაუდგნენ და ოფიციალურად გააჩერეს. აბსოლუტური განუკითხაობა იყო. დავუშვათ, მონოპოლისტი ვყოფილიყავი. სახელმწიფო როგორ მოქმედებს? _ პრინციპი ასეთია: მინიმუმ ერთი წერილი მაინც უნდა მოგწერონ, რომ შენ ამას და ამას აკეთებ ამა და ამ კანონს არღვევო.
_ მოლაპარაკებების მცდელობები თუ იყო, ვინმე შუამავლები თუ მოდიოდნენ და შემდგომ როგორ გაგრძელდა ეს ურთიერთობები ხელისუფლების წარმომადგენლებთან?
_ გახარიას და ჩემი ურთიერთობები აქ დამთავრდა. როცა გამოგვაგდო სქემიდან, ამის მერე რომ გავასაჯაროვე ეს თემა, ერთხელ ოფიციალური შეხვედრა გვქონდა, ეს საუბარი არაფრისმომტანი არ იყო, თვითონ სჭირდებოდათ პიარისთვის. ამის შემდეგ მომიწია ბრიუსელში წასვლა. ჩემი იქ ყოფნის პერიოდში უჩა მამაცაშვილი და ბიძინა ივანიშვილის ძმა შეხვდნენ ჩემს პარტნიორს. ბრიუსელიდან დაბრუნებული, ჩემმა კომპანიონმა ბიძინა ივანიშვილის კლასელი, მაჩაბელა მომიყვანა. მომთხოვეს, მისი შვილი შემეყვანა წილში. ეს შეხვედრა ძალიან უცნაურად მომეჩვენა. ამ კაცმა მითხრა, დაანებე თავი მტყუან-მართლის გარჩევას და სიმართლის ძებნას, ყველასთან ერთად იმუშავეო, რაც ჩემთვის პრინციპულად მიუღებელი იყო.
მერე უჩა მამაცაშვილმა ირაკლი ტრიპოლსკის პირით გადმომცა, რომ უნდა შევხვედროდი ბიზნესმენებს ლერი კაპანაძეს და ზურა იაშვილს, ფეროს გაკოტრების ყოფილ მმართველს და ისინი ბიზნესის 50%-ს ითხოვდნენ, უარის მერე საბოლოოდ გამიბრაზდა უჩა მამაცაშვილი.)))))
პირველ წელს, დაახლოებით, მადნის 80 პროცენტი გაიტანეს შავად და ამაში რას ვგულისხმობ: იმის მაგივრად, რომ მოეპოვებინათ, გადაემუშავებინათ და ჩაეტანათ, ფეროსთვის მიეწოდებინათ, ღამე იპარავდნენ. პოლიცია, ყველა იყო საქმის კურსში, ეს მანქანები დადიოდნენ ღამე ეშელონებად და უბრალოდ შეუძლებელია შეუმჩნეველი ყოფილიყო.
_ 100 დოლარი იყო ერთ მანქანაზე „სტავკა“…
_ დიახ, ეგრე იყო ზუსტად, ყველა ხეირობდა მაგ სქემით, პოლიცია თავისას ჭამდა, ზევით კიდევ უჩა, კახელები და ა.შ. თურმე, ღამე რომ იტვირთებოდა ჭიათურაში კონცენტრატით, ეშელონებით მიდიოდნენ, როცა ჩვენ ორი მანქანა ძლივს მოვახერხეთ გაგვეშვა და გადაგვიკეტეს გზები. ინტენსიურად მიდიოდა „რუსმეტალში“ რუსთავში. „რუსმეტალი“ ბოლოს შეიძინეს ჯანი მიხაილოვმა და თამაზ სომხიშვილმა. მთლიანად ამ მადანს, რასაც მოიპოვებდნენ, იპარავდნენ, პარავდნენ სახელმწიფოს, პარავდნენ „ჯორჯიან ამერიკან ელოისს“, ამუშავებდნენ და ყიდიდდნენ,შავად…
_ „რიჟა“ როდის გამოჩნდა?
_ „რიჟა“ გამოჩნდა, თუ არ ვცდები, დაახლოებით, 2016-17 წლებში.
_ მას შემდეგ, რაც კახელები ჩახსნეს…
_ კახელებიც ჩახსნეს, ჯანი მიხაილოვიც ჩაეხსნა, თუმცა ამ დეტალებში ვერ შევალ, რა მოხდა ჯანი მიხაილოვს, სომხიშვილსა და ბიძინა ივანიშვილს შორის, რადგან არ მაქვს ეს ინფორმაცია, შესაბამისად, ვერაფერს ვიტყვი. „რიჟა“ გამოჩნდა ზუსტად იგივე სქემით, რა სქემითაც მე უნდა შევსულიყავი. უბრალოდ, ის გააკეთეს, რომ სასამართლოთი შეიყვანეს მენეჯმენტი, მთლიანად გააგდეს „ჯორჯიან ამერიკან ელოიზიც“ მენეჯმენტიდან. ფორმალურად ჰქვიათ იმათ მფლობელები, თორემ ესენი სასამართლო დადგენილებით შევიდნენ…
_ თავის დროზე, ხელისუფლებას რომ არ დათანხმებულიყვნენ შეთავაზებულ პირობებზე და მათი მოთხოვნით რაღაცები არ გაეკეთებინათ, შეიძლება ბევრად უკეთეს მდგომარეობაში ყოფილიყვნენ, რადგან ეს იყო მათი ლიცენზია და მათი გენერალური ხელშეკრულება.
_ რა თქმა უნდა, ამაზე წინასწარ ვაფრთხილებდი, რომ თქვენც იგივე დღე მოგელით-მეთქი და მათ არ უნდოდათ სხვა კომპანიები ექსკლუზიური შეთანხმებით შემოსულიყვნენ, რადგან ისინი უკვე ხვდებოდნენ, რაც ამათ ჰქონდათ განზრახული. ზუსტად ეს სიტყვები მითხრეს, _ როცა ჩემს ქუჩაზე, სადაც ლუდის ქარხანა მაქვს, ვიღაცა ჩემნაირივე ლუდის ჯიხურს გამიხსნის, უკვე იმას ნიშნავს, რომ ის ჩემი ქარხნის მითვისებას ცდილობსო. ასეთი შედარება იმიტომ მოიყვანა, რომ ხვდებოდა უკვე, მარტო აუთსორსინგით არ იყო სახელმწიფო დაინტერესებული, მთლიანად ფეროსა და ჭიათურმანგანუმის წართმევით იყო დაინტერესებული.
_ მოახერხეს კიდეც და შეიყვანეს „რიჟა“, რადგან მას გარკვეული „დამსახურებები“ ჰქონდა ხელისუფლების წინაშე,
_ ასევე ჰქონდა ნაცნობობა კალამოისკისთან და გამოიყენეს ხიდად. კალამოისკისთან გააგზავნეს „რიჟა“ შეხვედრაზე, მოლაპარაკებებზე და ინფორმაცია მაქვს, რა მოხდა იმ შეხვედრაზე და რა დიალოგი ჰქონდათ მათ. პირველი ნაბიჯი, რაც სახელმწიფომ განახორციელა, მე ჩამხსნა ამ სქემიდან, შემდეგ უკვე ჩახსნეს „ჯორჯიან ამერიკან ელოიზი“, შეიყვანეს „რიჟა“ და თავიდან ბოლომდე დღეს ეს სქემა მათზე მუშაობს.
_ არავინ იცის ზუსტი ციფრი, რა თანხას კარგავს ბიუჯეტი და რა პროდუქცია მიდის რეალურად?
_ რა თქმა უნდა. მოდით, ასე ვთქვათ, დათვლადია ეს ციფრი, სადღაც, ალბათ, მინიმუმ, 20-დან 30 მილიონამდე კარგავს ბიუჯეტი ყოველ წელიწადს, რადგან კომპანია MN GEORGIA -ს გათვლებიდან გამომდინარე, ყოველწლიური მოგება უნდა ყოფილიყო 14 მილიონი დოლარი. შესაბამისად, მარტივად შეიძლება დავითვალოთ, თუმცა ამას მარტო ერთ სეგმენტში ვამბობ, ეს არის მარტო აუთსორსინგში, ეს არის მაღაროებში მოპოვებული და პლუს, ეს არის „ფერო“. შესაბამისად, რა თქმა უნდა, თანხა გაცილებით მეტია.
_ სასამართლო დავა დაიწყეთ, თუ მოლაპარაკებები გქონდათ კულუარებში? ტრიპოლსკი რას ამბობდა?
_ ტრიპოლსკი ჩემს სახლთან მოვიდა, პირველ სართულზე იყო კაფე „პრეგო“, მხრები აიჩეჩა, ბიძინაზე გააკეთა მითითება და მითხრა, რომ რა ვქნა, გამომაგდეს მაგ სქემიდანო. უთქვამთ, რომ საერთოდ აღარ ჩაერიოო. თუმცა კიდევ ერთხელ მინდა ხაზი გავუსვა, რომ თავიდანვე მათი მიდგომა მაკვირვებდა და თან გაოცებას იწვევდა, რომ ესენი ამ სქემას უყურებდნენ, როგორც თავისას და თითქოს მე რაღაც შეღავათს მიკეთებდნენ, რომ მელაპარაკებოდნენ. ჩემი განზრახვა კი აბსოლუტურად სხვა იყო, რომ თავიდან ბოლომდე სახელმწიფოს მიეღო ზომები იმისთვის, რომ გადაკეტილიყო შავი ხვრელები, შეგვეწყვიტა არალეგალური მოპოვება, ადგილზე არსებული ყველა ქარხანა ჩართულიყო თეთრ სქემაში, შემოგვეყვანა ჩვენ, გაგვეფორმებინა ოფიციალური ხელშეკრულებები, რაც მოვახერხეთ კიდეც დაახლოებით 14 კომპანიასთან, ერთი კომპანია დაგვრჩა და ისიც ფიზიკურად ვერ მოვასწარით, მაგრამ აუცილებლად გააფორმებდა ისიც, რადგან სხვა გზა არ იყო, ყველა იძულებული იყო, ჩართულიყო ამ თეთრ სქემაში. რა თქმა უნდა, მათთვის, ვინც მოპარვასა და შავი სქემით მუშაობას არის მიჩვეული, ნაკლებად საინტერესო იყო თეთრ სქემაში მონაწილეობა, რადგან მოგება გაცილებით ნაკლებია, იყო ოფიციალური გადასახადები და ა. შ. მაგრამ ეს არის ნორმა. ცივილიზებული სახელმწიფოს ფუნქციონირებისთვის ასე უნდა კეთდებოდეს ბიზნესი. ამიტომ ვიყავი სწორედ წინააღმდეგი, რომ შემოეყვანათ კიდევ სხვა კომპანია. ეს თავიდან ბოლომდე ეწინააღმდეგებოდა იმას, რაზედაც წლები ვიმუშავეთ, რომ ეს შავი წარმოება ამოგვექოლა და გაგვეთეთრებინა. შესაბამისად, იქ უკვე იმაზე კი არ იყო ლაპარაკი, რომ მარტო მე მესარგებლა და მე მიმეღო თანხები. ყველაფერს რომ თავი დავანებოთ, თავიდან ბოლომდე გავისვრებოდი ამ სქემაში. ჩემთვის ეს მიუღებელი იყო და აქედან გამომდინარე ვთქვი უარი, თორემ მფლობელი და ლიცენზიანტი კომპანია სხვა გახლდათ და მათი ნება იყო, თუ უნდოდათ ათს შემოიყვანდნენ. თუმცა იმის შემდეგ, რაც ჩემი ხელშეკრულება არ მოეწონებოდა იმიტომ, რომ მე ექსკლუზიური შეთანხმება მქონდა და ისიც არ იყო ჩემი მოთხოვნა, ეს იყო ურთიერთშეთანხმების საფუძველზე.
_ სასამართლო დავა როდის დაიწყეთ და რაზე?
_ სასამართლო დავა დავიწყეთ 2015 წელს ზარალის ანაზღაურებაზე და, შესაბამისად, ყველა ინსტანცია გავიარეთ. მე არ მქონდა იმის ილუზია, რომ ამ სისტემაში, სადაც სასამართლო თავიდან ბოლომდე ჯიბეში ჰყავთ, ჩვენ მოვიგებდით. თითქოს გააჩინეს ილუზიები, რომ შეიძლებოდა სასამართლოთი რაღაცა, მაგრამ ეს იყო თავიდან ბოლომდე თამაში და აბსოლუტურად იკითხებოდა ყველა სასამართლო პროცესზე, რომ მოსამართლეები თავიდან ბოლომდე იყვნენ კონტროლის ქვეშ, ლამის სახეზე ეწერათ. სასამართლოზე რაც ვნახე, ეგ კიდევ ცალკე საუბრის თემაა, აბსოლუტური განუკითხაობაა და აბსოლუტური ტოტალური კონტროლია ამ ინსტიტუციაზე. არაკომპეტენციასა და გაუნათლებლობას აღარ ვეხები, თორემ ეგეც სასწაულია.
_ ახლა რას აპირებთ, რა ფორმით ფიქრობთ ბრძოლის გაგრძელებას? სისტემა რეალურად იგივეა, ერთმანეთში კარგად დალაგებული სქემებით ყველას აქვს თავისი წილი და რეალურად ყველა კარგად გრძნობს თავს სახელმწიფოს გარდა, რომელიც ძალიან ბევრ ფულს კარგავს.
_ ამდენი წელია, ამაზე ღიად ვსაუბრობ, ჩემი მთავარი მიზანი სწორედ ეს არის, რომ საზოგადოებამდე უნდა მივიტანოთ ერთი ძალიან მკაფიო გზავნილი. უკვე ვახსენე, რომ ხელისუფლებამ შემომთავაზა გარიგება, ასე ვთქვათ, მხარზე ხელი მომითათუნეს და მითხრეს, როგორი ნიჭიერი კაცი ვარ, რომ ამდენი მოვახერხე და ჩემნაირი ხალხი სჭირდებათ და ა. შ. ამით შეიძლებოდა, მე და ჩემს ოჯახს მიგვეღო მილიონები მაგათთან მეგობრობით. პრინციპულად წავედი უარზე, ასე მიცხოვრია, მაქვს ჩემი პოლიტიკური წარსული, ხედვები და, აქედან გამომდინარე, ჩემი პრინციპული პოზიციაა ეს, რომ ასეთი ტიპის უსამართლობებს არ უნდა შევეგუო. პრაქტიკულად, ჩემი ოჯახი ძალიან დიდი განსაცდელისთვის და გასაჭირისთვის გავიმეტე წლების განმავლობაში და ეს სიტყვა ვერც იტევს იმ სიმძიმეს, რაც მე და ჩემი ოჯახის წევრებს მოგვიწია გავლა ამდენი ხნის განმავლობაში. თუმცა შეგნებულად წავედი იმიტომ, რომ პირველ ხანებში მართლა სჯეროდა ხალხს, ბიზნესი თავისუფალი იქნებოდა. პირველი ბიზნესმენი ვიყავი, ვინც გამოვედი და ვთქვი, რომ ასე არ იყო და ბევრი ახლობელი მართლა არც მიჯერებდა, რომ ეს ასე იყო, სანამ თვითონ არ დარწმუნდა მოსახლეობის ალბათ 80 პროცენტი, როცა ყველა დიდ ბიზნესს შეეხნენ და ყველა დიდი ბიზნესი წაიღეს. მჯერა და ვხედავ, რომ ეს სისტემა დასასრულისკენ მიდის და ეს ლოგიკურია ასეთი უსამართლო სისტემისთვის. რა თქმა უნდა, ჩემსავით ყველა ადამიანი უნდა გამოვიდეს, ვინც უსამართლობას აწყდება, ეს ჩვენი ვალია ამ ქვეყნის წინაშე, ეს არის ჩვენი მემკვიდრეობა, რომელიც ჩვენს შვილებს უნდა დავუტოვოთ. ამიტომ ასეთ უსამართლობასთან შეგუება არ შეიძლება. რა თქმა უნდა, ბოლომდე ვიბრძოლებ, სანამ არ გავიმარჯვებ! რა თქმა უნდა, ივანიშვილს ვაიძულებ, რომ ბოლო ცენტამდე, რა ზარალიც მომადგა მე და ჩემს კომპანიას, აანაზღაუროს!.. რა თქმა უნდა, ყველა ის ადამიანი, ვინც ამ უკანონო სქემაში იყო ჩართული _ ივანიშვილიდან დაწყებული, გახარიამდე დამთავრებული, ღარიბაშვილი თუ თამაზაშვილი, ვინც არიან, ყველამ აგოს კანონის წინაშე პასუხი!
_ რა იყო თამაზაშვილის როლი ამ საქმეში? თქვენ თქვით, რომ ჩემი დისკრედიტაცია მოხდა თამაზაშვილის მხრიდანო.
_ შუალედში შემატყობინეს, რომ ამ სქემიდან ჩახსნილი ვარ იმიტომ, რომ წარსულში „ნაცმოძრაობის“ ერთ-ერთი დამფუძნებელი ვიყავი, ასევე გახლდით საკრებულოს წევრი 2002-2004 წლებში და მქონდა ძალიან ახლო მეგობრული ურთიერთობა მიხეილ სააკაშვილთან. ამის შემდეგ „კახელებმა“ თავისი გუნდის ერთ-ერთი წევრი გამომიგზავნეს და იმან მითხრა, _ ყველას სჯერა, რომ ეს შენი ბიზნესი წავიდოდა სააკაშვილთანო.
_ იმ პერიოდში გქონდათ სააკაშვილთან ურთიერთობა?
_ ჩემი ბოლო შეხვედრა სააკაშვილთან, ისიც ოფიციალური, როგორც საკრებულოს წევრის პრეზიდენტთან, შედგა 2004 წელს და მას შემდეგ, დაახლოებით, თუ არ ვცდები, 2017 თუ 2018 წლამდე, სააკაშვილთან ურთიერთობა საერთოდ არ მქონია,(ტელეფონით ვესაუბრე) _ არც მასთან და არც პოლიტიკასთან მქონია საერთოდ შეხება. პოლიტიკასთან შეხება იქიდან გამომდინარე მიწევს ახლაც, რომ თითონ შეეხო ჩემს ბიზნესს.2005 წელს გადავწყვიტე ჩამოვშორებოდი პოლიტიკას და წავსულიყავი ბიზნესში.
_ ვინ იყო კახელებისგან გამოგზავნილი ის პირი, რომელმაც ეს გაგიხმოვანათ?
_ მათი ძალიან ახლო მეგობარი და ბიზნესპარტნიორი, თუმცა ის ჩემი ოჯახის წევრის მეშვეობით მოვიდა და ამ ადამიანის ვინაობას ვერ ვიტყვი. ამაზე ღიად მქონდა საუბარი ძალიან ბევრ ადგილას, თუმცა ვერ გავასაჯაროვებ… ამ ადამიანს არაერთხელ შევხვდი და ასევე მითხრა, რომ თამაზ თამაზაშვილი იყო ის ადამიანი, ვინც ბიძინა ივანიშვილთან მივიდა და ზუსტად ამ სიტყვებით განმიმარტა: „დააჯერა ბიძინა ივანიშვილი, რომ ეს თანხები სააკაშვილთან და ოპოზიციის ყულაბაში მოხვდებოდაო. ალბათ იმის განმარტებას არ დავიწყებ, ასეც რომ ყოფილიყო, ნორმალურ სახელმწიფოში ასეთი რაღაცები არ უნდა ხდებოდეს და ბიზნესი პოლიტიკური გემოვნებით არ უნდა ისჯებოდეს, თუმცა მათივე სიტყვებს ვიმეორებ და არ დავიწყებ იმის მტკიცებას, ეს იყო მართალი თუ არა, მიმაჩნია, რომ საერთოდ არ მაქვს ამის ტვირთი… მითხრეს, რომ იციან, სააკაშვილთან არანაირი ურთიერთობა არ გაქვს, მაგრამ ასე აწყობდათ და ასე გააკეთესო. ახლა ბიძინა ივანიშვილთან შენს რეაბილიტაციას თვეები დასჭირდება და ამიტომ სხვა ბიზნესსქემების დალაგება მთხოვეს. 3-4 თვეში ამასაც დაგილაგებთ ბიძინა ივანიშვილთანო, რაზედაც ჩემგან უარი მიიღეს. ვუთხარი, ეს ბრძოლა უკვე დაწყებულია და, შესაბამისად, არანაირი დალაგება არ მჭირდება, ამ ბრძოლას ბოლომდე მივიყვან-მეთქი… აქედან გამომდინარე, ვიცოდი, რომ სწორედ ე. წ. კახელების დაჯგუფება იყო პირველი, ვინც შემეხო. ისიც მითხრეს, _ თამაზ თამაზაშვილს ეს ხელშეკრულება ცხვირწინ ააცალეო. გამოდის, რომ ის იყო დაინტერესებული ამ ბიზნესით და მე წამოვიღე. ასევე ახსენეს, რომ სანამ უშიშროება და შს სამინისტრო ერთმანეთში არკვევდნენ, ვისი კაცი იყავი, მანამდე მოახერხე შენ ამ ბიზნესის წაღებაო…
მართლა იყო შეხვედრა უშიშროების სამსახურში მალხაზ ჩიკვილაძესთან, მისი ტელეფონის ნომერი ირაკლი ტრიპოლსკის მეშვეობით გადმომცეს. სხვათა შორის, ეს მასალები გამოძიებას გადავეცი, უჩა მამაცაშვილთან სატელეფონო ზარებიც. ჩიკვილაძე ძალიან დაბნეული მელაპარაკებოდა და საერთო მესიჯი რაც გამოვიტანე, ჩვენი შეხვედრის მიზანი ის იყო, თუ დახმარება დაგჭირდა, აქ ვართო. შესაბამისად, გაუგებარია, როცა უშიშროებაში გიბარებენ და ბიზნესსქემებზე გელაპარაკებიან, რა თქმა უნდა, მე დეტალებში არ შევსულვარ და ბიზნესის განხილვა არ დამიწყია უშიშროებაში, თუმცა მათ გზავნილს მივხვდი, რაც იყო. შესაბამისად, იქიდან რომ გამოვდიოდი, მივხვდი, რა ბედი ელოდა ჩემს ბიზნესს.
_ გამოძიება ახსენეთ, რა გამოძიება, როდის დაიწყო ეს გამოძიება?
_ ჩემი განცხადების შემდეგ, როცა გახარიამ დაადასტურა, რომ მან მიიღო ეს გადაწყვეტილება ჩემი გადაწევის შესახებ იქიდან გამომდინარე, რომ მე მონოპოლიის აღებას ვცდილობდი. დაიწყო პროკურატურამ გამოძიება, დამიკავშირდნენ ანტიკორუფციული სამსახურიდანაც, თუმცა მერე პროკურატურიდანაც დამიკავშირდნენ და იქ აღიძრა საქმე უფლება-მოვალეობის გადამეტებასთან დაკავშირებით გახარიაზე. ესეც 2015 წლის ზაფხულში მოითხოვეს ყველა მასალა, სატელეფონო ამონაწერები, ვიდეომასალა, მტკიცებულებები, ასევე გახარიას არაერთი განცხადება, რომ იმიტომ გადამწია, მონოპოლიის აღება მინდოდა. თუმცა დღემდე მხარე არ არის ცნობილი, რადგან მასალებთან წვდომა არ იყოს. მე ვიცი ამ საქმის ირგვლივ უამრავი გამოკითხული ადამიანია, ასევე ჩემი პარტნიორიც, რომელიც 20%-იან წილში იყო და დღეს მანგანეზის თანამშრომელია, ისიც დაიკითხა, დაიკითხნენ „ჯორჯიან ამერიკან ელოიზიც“, თუმცა რამდენადაც ვიცი, იქ ისეთი ტონი იყო, რომ ჩემზე უნდოდათ სისხლის სამართლებრივი დევნის დაწყება, რომ გავეჩუმებინე. თუმცა საზოგადოებამ, ალბათ, კარგად დაინახა, რომ ეს საქმე ძალიან გახმაურდა. რამდენიმე წელია, მიმდინარეობს და აბსოლუტურად გაყუჩებულია ხელისუფლება და ამდენი წელი არანაირი რეაგირება არ მოუხდენია.
_ ეს საქმეც, ალბათ, თაროზე დევს…
_ რა თქმა უნდა, ასე არის და რა თქმა უნდა, 5 თუ 6 წლის თავზე ნებისმიერი ქმედებები, რაც არ უნდა განახორციელონ, პოლიტიკური იქნება.
_ ახლა ბრძოლას აპირებთ, სტრასბურგში მიდიხართ. დაკავებას ელოდებით?
_ 2018 წელს რომ გავაკეთე განცხადება, თუ არ ვცდები, საარჩევნო პერიოდი იყო. შემომითვალეს, თუ არ გავჩუმდებოდი, ფინანსურში იყო რაღაც საქმე აღძრული ჩემზე, თუმცა არ ვიცი, რა საქმეა აღძრული.
_ დაკითხვაზე არ ყოფილხართ?
_ არა, უბრალოდ, ისიც ჩემი ოჯახის წევრის მეშვეობით არაოფიციალურად შემომითვალეს, რომ არის რაღაცა საქმე ჩემზე ფინანსურში აღძრული, რომ გავჩუმებულიყავი. მაგრამ ბრძოლა გრძელდება, ამაზე ორი აზრი არ არსებობს! აბსოლუტურად გათვითცნობიერებული მაქვს, როცა უსამართლო სისტემის წინააღმდეგ მივდივარ, სადაც სასამართლო მაგათია, ყველა სადამსჯელო ინსტრუმენტი აქვთ და ამას იყენებენ უკანონოდ და არა კანონის ფარგლებში, როგორც უნდა მუშაობდეს სახელმწიფო ინსტიტუტები, ყველაფერი ერთი კაცის ნება-სურვილზეა მოწყობილი, რა თქმა უნდა,კარგად ვიცი , როცა ვუპირისპირდები ამ სისტემას, რა შედეგები შეიძლება მოყვეს. თუმცა მიმაჩნია და ეს ჩემი მოქალაქეობრივი პოზიციაა, სწორედ ეს არის ის მთავარი მემკვიდრეობა რასაც დაუტოვებთ მომავალ თაობებს.ყველა ადამიანი უნდა ებრძოლოს უსამართლობას.ეს ყველა ჩვენთაგანის ვალია.

„ქრონიკა +“აგრძელებს ამ თემაზე მუშაობას და მომდევნო ნომერში სკანდალურ ჩანაწერებს შემოგთავაზებთ !

ელისო კილაძე