მთავარი ინტერვიუ ჯონი გიგანი: „პოლიტიკაში აღვირახსნილობა და მექრთამეობა უნდა დამთავრდეს!“

ჯონი გიგანი: „პოლიტიკაში აღვირახსნილობა და მექრთამეობა უნდა დამთავრდეს!“

290
0
გაზიარება

„ქრონიკა+“-ის დღევანდელ რესპონდენტს განსაკუთრებული წარდგენა არ სჭირდება, თუმცა აქამდე ამ ადამიანს საზოგადოება ისე იცნობდა, როგორც წარმატებულ ბიზნესმენს. ახლა კი ჯონი გიგანს სხვა ამპლუაში გაიცნობთ, ანუ ეს პირველი შემთხვევაა, როცა პარტია „კანონი და სამართლის“ ლიდერის, საბურთალოს მაჟორიტარობის კანდიდატ თაკო ჩარკვიანის მეუღლე საჯარო პოლიტიკურ განცხადებებს აკეთებს და ასაბუთებს, თუ რატომ უნდა შეიცვალოს ხელისუფლება და მაგალითად, სიღარიბე კანონით და სამართლით როგორ უნდა დაიძლიოს!

„ქრონიკა+“ გთავაზობთ ექსკლუზიურ ინტერვიუს ჯონი გიგანთან:

_ ბატონო ჯონი, პოლიტიკაში აქტიურად შემოხვედით?
_ იმ წამიდან, რაც თაკო პოლიტიკაში გამოჩნდა, მეც პოლიტიკაში ვარ!
_ ანუ პარტია „კანონი და სამართლის“ ოფიციალური წევრი ხართ?
_ რა თქმა უნდა.
_ თაკო გასაგებია _ პოლიტიკაში ჩართვამდეც, პრაქტიკულად, სამოქალაქო აქტივისტი იყო და ქვეყანაში არსებულ პრობლემებზე მუდმივად ღიად საუბრობდა, მაგრამ თქვენ, რომელიც მთელი ცხოვრება ბიზნესით ხართ დაკავებული, პოლიტიკაში ჩართვა რატომ გადაწყვიტეთ?
_ ბოლო 30 წელია, იმის საშუალება არ მეძლევა, რომ საქმე, რომელიც მიყვარს, ვაკეთო!
ბიზნესში ყოველთვის ხელის შეშლას განვიცდი, ანუ მთელი ეს წლები, რაც ბიზნესთანაა დაკავშირებული, სახელმწიფოს მხრიდან მიკერძოებულია _ თაღლითი პოლიტიკანები ყველაფერს აკეთებენ, რომ საქართველო არ განვითარდეს.
_ ე. ი., რაკი ბიზნესის განვითარებაში ხელი გეშლებათ, პოლიტიკაში ჩართვა და ამ გზით ვითარების შეცვლა გადაწყვიტეთ?
_ წარმოიდგინეთ, მარტო ინფლაციის გამო 60-70 ათასი დოლარის დანაკლისი მაქვს. ეს კი იმას ნიშნავს, რომ ბიზნესს პერსპექტივა არ გააჩნია. ამას გარდა, დღეს საქართველოს, პრაქტიკულად, ბიზნესმენები აღარ ჰყავს!
_ ანუ?
_ ბიზნესების გამსხვილება მიდის.
_ ეს რას ნიშნავს?
_ შიდა ბრუნვიდან გამომდინარე, საქართველოში 35-40 მილიარდამდე მოგებაა, რომელიც ასი ათას მცირე, საშუალო და დიდ მეწარმეზე უნდა განაწილდეს, მაგრამ ბიზნესის ამონაგების 70% ერთ კაცს _ ივანიშვილს მიაქვს, ანუ თვითონ არ ჩანს, მაგრამ ოფშორულ ზონებში მასთან დაკავშირებულ ფირმებზე ირიცხება. საქართველოში წარმოება სწორედ ამიტომაც არ ვითარდება.
_ ბატონო ჯონი, 2012 წელს, როგორც მახსოვს, „ოცნების“ მხარდამჭერი იყავით და ნუთუ, ვერ ხვდებოდით, რომ ივანიშვილი ისე მოიქცეოდა, როგორც იქცევა? სხვათა შორის, პოლიტიკანები იმდროინდელ ოპოზიციაშიც იყვნენ…
_ მაშინ სხვა უბედურება იყო, ანუ რეფორმები ტარდებოდა და ნებაც არსებობდა, რომ სახელმწიფო შემდგარიყო, მაგრამ აღმოჩნდა, რომ ეს მხოლოდ ერთი კაცის _ სააკაშვილის ნება იყო. დანარჩენ შემთხვევაში კი, რასაც ვუყურებდი, მთლიანი ტერორი ხორციელდებოდა. პენიტენციურ სისტემაში კატასტროფა ხდებოდა. კანონის უზენაესობა საქართველოს არა და არ ეღირსა! აქედან გამომდინარე, საბოტაჟური მოქმედების საშუალება ყველა „ჩინოვნიკს“ აქვს.
დიახ, საქართველოში კანონები მიკერძოებულია და შევარდნაძის დროს შევარდნაძის „ჩინოვნიკებისთვის“ იყო მიკერძოებული, სააკაშვილის დროს _ სააკაშვილის „ჩინოვნიკებისთვის“. სხვათა შორის, ის სისტემა, რომელიც სააკაშვილმა რეფორმების გზით შექმნა, „ოცნებამ“ შეინარჩუნა, მაგრამ ამ ხელისუფლების პოლიტიკური ნება სახელმწიფო ბიუჯეტის გაღლეტვაა!
_ ბატონო ჯონი, კონკრეტულად მიპასუხეთ: როდის მიხვდით, რომ „ოცნების“ პოლიტიკური ნება ქვეყნის გადარჩენა კი არა, სახელმწიფო ბიუჯეტის გაღლეტვა იყო?
_ „ოცნების“ ხელისუფლებაში მოსვლიდან, დაახლოებით, ერთი თვის შემდეგ, ანუ ერთ თვეში მივხვდი, რომ ივანიშვილს არ უნდოდა, საქართველოს პოლიტიკური ვექტორი ევროატლანტიკური ყოფილიყო!
_ ამას, მგონი, მანამდეც უნდა მივმხდარიყავით, რადგან კარგად იცით, რუსეთში ფულის, მით უმეტეს, მილიარდების შოვნა სპეცსამსახურების ჩარევის გარეშე შეუძლებელია.
მოკლედ, ვიდრე „ოცნება“ ხელისუფლებაში მოვიდოდა, მინიმუმ, საკუთარი თავისთვის არ დაგისვამთ კითხვა, რომ ივანიშვილი შესაძლოა, ევროატლანტიკური კურსის წინააღმდეგი ყოფილიყო?
_ ეს კაცი პროფესიონალი თაღლითია და ვერ მივხვდი, თან რუსეთიდან ძალიან ადრე გამოიქცა. საქართველოში, პრაქტიკულად, არავინ იცნობდა და ჭორვილაში იყო.
მოკლედ, ვიფიქრე, გამოქცეულია; რუსეთში ბიზნესიც, პროცენტულად, ცოტა აქვს, დანარჩენი კი _ ევროპაში და აქედან გამომდინარე, უნდა, რომ საქართველო ააშენოს-მეთქი.
ამასთან, ამ კაცმა ქველმოქმედების იმიტაცია შექმნა და რადგან საქართველოშიც არსად ჩანდა, ვიფიქრე, ალბათ, პუტინს ემალება-მეთქი.
…კი, ვიცი, ვინ ვინაა, მაგრამ აქამდე პოლიტიკაში არ ვიყავი. შეიძლება, ყველაზე ყველაფერი ვიცოდი, მაგრამ ის ბერკეტი არ მქონდა, რაც პოლიტიკას აქვს. პოლიტიკა ჩემი საქმე არ ყოფილა, მაგრამ პოლიტიკაში მოსვლა ახლა იმიტომ გადავწყვიტე, რომ კანონის უზენაესობა დამყარდეს და კანონები ხალხისთვის მივიღოთ, რათა ნებისმიერმა პიროვნებამ თვითგანვითარება ჰპოვოს. დღეს ამის საშუალება არაა, რადგან მიკერძოებული კანონები გვაქვს!
_ მიკერძოებული კანონები იმიტომ გვაქვს, რომ საკანონმდებლო ორგანოში არაპროფესიონალები არიან?
_ დიახ, ასე ვფიქრობდი, მაგრამ ჩვენ გარდა, ჯერჯერობით, ერთი პოლიტიკოსისთვისაც კი არ შემიმჩნევია, რომ ამ მიკერძოებული კანონების ხელიდან გაშვება უნდა!
_ „ჩვენში“ ვის გულისხმობთ?
_ „კანონსა და სამართალს“ და „ახალ საქართველოს“.
ჩვენი პლატფორმის _ „სტრატეგია აღმაშენებლის“ მთავარი მიზანია, რომ პროკურატურა და სასამართლო პოლიტიკური წნეხისგან გავათავისუფლოთ. ამის გარეშე შანსი არაა, რომ საქართველო წინ წავიდეს!..
ჩემი ოჯახი პოლიტიკაში მაშინ ჩაერთო, როცა ევროვექტორის ოპოზიციას გაძლიერება სჭირდებოდა. „ძალა ერთობაშია“ მიხეილ სააკაშვილის პროექტი იყო და ევროვექტორის გასაძლიერებლად ნაბიჯი გადავდგით. სხვათა შორის, სააკაშვილის „ნაცები“ დღესაც ევროვექტორად მიმაჩნია და შეუძლებელია, რომ ევროვექტორის გაძლიერების გარეშე პროკურატურა და სასამართლო პოლიტიკური წნეხისგან განთავისუფლდეს!
ამას გარდა, სახელმწიფო აუდიტსაც ხალხი უნდა ირჩევდეს, „საზოგადოებრივ მაუწყებელს“ კი იმის შესაძლებლობა უნდა ჰქონდეს, რომ მოსახლეობის გამღლეტველებს კი არა, სახელმწიფოსა და ხალხს ემსახუროს! ამასთან, აუცილებელია, რომ არჩევნები ელექტრონული სისტემით ჩატარდეს და ამით არჩევნებში, თუნდაც, ახალგაზრდების მონაწილეობა გაიზარდოს. სწორედ ეს გზა გაიარა ბალტიისპირეთმა.
ისე, მხოლოდ მე კი არა, მთელ საქართველოს შეეშალა!
_ რას გულისხმობთ?
_ ერთი რომ ძალაუფლებით გაღორდება და გასკდება, მერე მეორეს ვითხოვთ და ვფიქრობთ, იქნებ, ეს უკეთესი იყოსო, მაგრამ თუ პროკურატურასა და სასამართლოს პოლიტიკური წნეხისგან არ გავათავისუფლებთ, მუდმივად ამ ორ ფერში _ „იქნებ, ეს იყოს უკეთესი“ _ ვიქნებით და სამართლიანობა არ აღდგება!
ადამიანი პარლამენტში რომ შედის, არ უნდა ფიქრობდეს, რომ პროკურორი გახდება ან პროკურატურას რამეს სთხოვს.
2012-ში, როცა ივანიშვილი მოდიოდა, ამ მხრივ გაუსაძლისი მდგომარეობა იყო და ამიტომ ყველაფერი ის აუცილებლად უნდა შეცვლილიყო, მაგრამ მეორე უბედურებაში მოვყევით.
საერთოდ, ეს რუსული სპეცსამსახურების მიზანია.
_ ანუ?
_ საქართველოში პოლიტიკა მრავალმხრივი კი არა, ორ უკიდურესობას შორის იყოს.
_ ბატონო ჯონი, კონკრეტულ კითხვას დაგისვამთ და კონკრეტულად მიპასუხეთ: მიხეილ სააკაშვილმაც, თავის ერთ-ერთ ბოლო გამოსვლაში, ქართული პოლიტიკა ორ ფერად გაყო და პირდაპირ თქვა, რომ გიორგი ვაშაძე სიბნელის მხარეს დადგა. ეს რას ნიშნავს და როგორ უნდა გავიგოთ?
_ ის ნაბიჯი, რომელიც ჩვენ გადავდგით, შექმნილმა მდგომარეობამ გამოიწვია.
_ ე. ი., „ძალა ერთობაშიაში“ რაღაც ისეთი ხდებოდა?
_ არა.
_ აბა?
_ ივანიშვილმა შეძლო, რომ პოლიტიკაში ორი ფერი _ თეთრი და შავი, ანუ „ნაცები“ და „ქოცები“ იყვნენ. სააკაშვილი კი ცდილობს, რომ საკუთარი პარტია გააძლიეროს და, აქედან გამომდინარე, თავის სტრატეგიას მიჰყვება.
2018 წლის საპრეზიდენტო არჩევნებში, მოგეხსენებათ, „ძალა ერთბაშიამ“ გამარჯვება შეძლო, ანუ გაგვიყალბეს, თორემ გრიგოლ ვაშაძის ხმები 51 პროცენტზე მეტი იყო და პირველსავე ტურში გავიმარჯვეთ, მაგრამ გაყალბებით მეორე ტური დანიშნეს, სადაც გამოჩნდა, რომ ივანიშვილთან ერთი ერთზე დარჩენა რთულია.
_ რატომ?
_ ჯერ ერთი, იმიტომ, რომ ბიუჯეტიდან მილიონებს იპარავს. მეორეც, იმ მოგების 70%, რაც ასამდე ბიზნესმენს ეკუთვნის, მხოლოდ მას და პუტინს მიაქვთ. მოკლედ, ივანიშვილს ძალიან დიდი ფული აქვს.
_ ეს გასაგებია, მაგრამ სხვა რამ გკითხეთ, ანუ სააკაშვილმა ქართული პოლიტიკა ორ ფერად რატომ გაყო და „სტრატეგია აღმაშენებლის“ შექმნას რატომ არ მიესალმა?
_ მოგეხსენებათ, სააკაშვილი აქ არ არის და სხვანაირ გათვლას აკეთებს. ჩვენ კი ჩვენი გათვლა გვაქვს.
_ საუბარი იქითკენ ხომ არ მიგყავთ, რომ გარემოცვის წევრები სააკაშვილს ქვეყანაში არსებულ ვითარებაზე არასწორ ინფორმაციას აწვდიან და სხვანაირ რეალობას ანახებენ?
_ ჩემი აზრით, სააკაშვილს იმ დონის ინფორმაციას აწვდიან, რა დონის ინფორმაციის გადამცემებიც ჰყავთ, ანუ ვინც სააკაშვილს ინფორმაციას აწვდის, მდგომარეობას ისე ვერ აღიქვამს, როგორც, მაგალითად, „კანონი და სამართალი“ აღიქვამს. ჩვენ კი პოლიტიკას სხვისი აღქმით ვერ ვაწარმოებთ და აქედან გამომდინარე, ის ნაბიჯი გადავდგით, რომელიც სწორად მივიჩნიეთ.
აი, დააკვირდით, 2019 წლის 20 ივნისის შემდეგ ლეიბორისტების ოფისში ოპოზიცია შეიკრიბა, საიდანაც ზოგს ფსევდოოპოზიციას ვეძახით. ყველაფერი ეს ჩემთვის, როგორც „კანონი და სამართლის“ წევრისთვის, „ძალა ერთობაშიას“ დანგრევის მცდელობა იყო.
_ ლეიბორისტების მაგიდის, ასე ვთქვათ, ლოკომოტივი „ევროპული საქართველო“ გახლდათ. ყოველ შემთხვევაში, გარედან ასე ჩანდა. ჰოდა, „ძალა ერთობაშიას“ დანგრევას ბოკერია ცდილობდა თუ ივანიშვილი?
_ ივანიშვილიც, ბოკერიაც და რუსეთუმე პარტიებიც.
_ ლეიბორისტების ოფისში გამოკვეთილი პრორუსული განწყობები ბურჯანაძეს აქვს. ამ მაგიდასთან სხვა რუსეთუმეებიც ისხდნენ?
_ პოლიტიკა ისეთია, რომ ვერ, ასე ვთქვათ, მიასწრებ, ვინ ვინაა. ამ შემთხვევაში მხოლოდ ბურჯანაძე გყავს „მისწრებული“, რომელსაც ღიად აქვს გაცხადებული, რომ პუტინის პარტიაა და სახელიც „ედინნაია როსსიას“ ქართული შესატყვისი ჰქვია. მოკლედ, სხვებზე ასე პირდაპირ ვერ ვიტყვი, თუმცა ეჭვი მაქვს.
_ სხვა ოპოზიციური პარტიების პრორუსულობაზე რის გამო გაქვთ ეჭვი?
_ როცა იმ პოლიტიკას ასხამ წყალს, რომელიც პუტინს აწყობს, ეს რუსეთუმეობაა! შეიძლება, თვითონ დედა დაიფიცოს, რუსეთუმე არ ვარო, მაგრამ მასთან ერთად იმ საკითხებზე სამსჯელოდ დაჯდომა, რომელიც სახელმწიფოს განვითარებას არ აწყობს, არ ღირს.
სხვათა შორის, 2018 წლამდე „ნაცებისთვის“ ისეთი ცუდი პერიოდი იყო, რომ ტელევიზიებშიც კი ვერ სხდებოდნენ, თუმცა თაკო ჩარკვიანმა გახსნა და იმ მესიჯმა გაჭრა, რაც ხალხისთვის მნიშვნელოვანი იყო.
_ რომელ მესიჯს გულისხმობთ, ბატონო ჯონი?
_ იმ მესიჯს, რომ წინა ხელისუფლების დროს, შეცდომების მიუხედავად, რეფორმები ტარდებოდა და სახელმწიფო ინსტიტუტები შენდებოდა!
„ნაციონალების“ დროს არსებობდა პოლიტიკური ნება, რომ სახელმწიფო ჩამოყალიბებულიყო _ სააკაშვილი რომ მოვიდა, ბიუჯეტი 200 მილიონი იყო და 5 მილიარდზე აიყვანა, რაც იმას ნიშნავდა, რუსეთის სპეცსამსახურებსა და ქართველ გამყიდველ „ჩინოვნიკებს“ ძალიან დიდი ფული _ 4 მილიარდზე მეტი პირიდან გამოაცალა.
…სიმართლე გითხრათ, ცხოვრების ძალიან დიდი გამოცდილება მაქვს და ისიც ვიცი, ვინც დღეს პოლიტიკაშია, საიდან და როგორ მოვიდა! მე და თაკომ კი ყველაფერი ერთად გადავიტანეთ, თანაც თაკო ისეთ ოჯახშია გაზრდილი, რომ იგივე გამოცდილება აქეთ მომმატა _ იმ ბრწყინვალე გამოცდილებას, რომელიც ჯანსუღ ჩარკვიანის ოჯახს აქვს, სვანეთში ვერსაიდან მივიღებდი! მოკლედ, ის ადამიანი ვარ, რომელსაც სწორად მოაზროვნე პიროვნების მოსმენა სიამოვნებს!
გულწრფელად გეტყვით: თაკო ქართულ პოლიტიკაში ძალიან საინტერესო ახალი და სუფთა სახეა! ასევე განათლებული ადამიანიცაა, რომელიც თავის პრინციპებს არასოდეს ღალატობს!
_ შეიძლება, მაგრამ მავანი „ძალა ერთობაშიაში“ სიტუაციის აჭრას სწორედ თაკოს აბრალებს, ანუ ზოგი ამბობს, პრემიერობის კანდიდატად გიორგი ვაშაძის დასახელება ნაჩქარევი იყო და რაკი პარტნიორებისგან მხარდაჭერა ვერ იგრძნეს, „ახალმა საქართველომ“ და „კანონმა და სამართალმა“ „ძალა ერთობაშია“ ამიტომ დატოვესო.
_ არა, მე ასე არ ვფიქრობ.
_ აბა, როგორ ფიქრობთ?
_ დავრწმუნდი, რომ ჩვენ სხვა გამოსავალი არ გვქონდა.
_ რატომ?
_ „ნაცებმა“ თბილისში მაჟორიტარობის ორი ოლქი დაიტოვეს, ექვსი კი სხვებს მისცეს…
მე და თაკომ შევხედეთ მდგომარეობას: ივანიშვილმა იცის, რომ მთლიანად გავაშიშვლეთ და იმ დონის გაყალბებას თუ ფულის დარიგებას ვეღარ შეძლებს, როგორც საპრეზიდენტო არჩევნების დროს.
სწორედ ამიტომ ივანიშვილმა და ლეიბორისტების ოფისში შეკრებილმა მაგიდამ საზოგადოება დააბნია, ანუ ხალხი ვეღარ ხვდებოდა, ვინ არის ივანიშვილთან და ვინ _ ნამდვილი ოპოზიცია.
ამიტომ ხალხს ფსევდოოპოზიცია არანაკლებად ეზიზღება, ვიდრე ივანიშვილი! ეს მდგომარეობა კი ივანიშვილს, ურეიტინგო პარტიებსა და რუსეთუმეებს აწყობთ!
„ნაცებს“ თავიანთი ამომრჩეველი ჰყავთ, შუა ხმებისთვის კი ხაზარაძე, ელისაშვილი და ბოკერია შემოვიდნენ. ვფიქრობ, ყველა ეს „ივანიშვილი ორია“ და მას შემდეგ, რაც პარლამენტში შევალათ, ამას ხმამაღლა ვიტყვით!
ამასთან, თუ არჩევნები გაყალბდა, მაგრამ ის სცენარი გათამაშდება, რაც პუტინსა და ჟირინოვსკის შორის მოხდა, მაშინვე ფსევდოოპოზიციის მხილებას დავიწყებთ და როგორც კი თაღლითობას დავინახავთ, პარლამენტში შესვლის მიუხედავად, ქუჩაში გადავინაცვლებთ. თუმცა არ მინდა, ვინმემ ისე გაიგოს, რომ ამ შემთხვევაში სააკაშვილის პროექტზე ვლაპარაკობ!
ივანიშვილმა უნდა გაიგოს, რომ მისი წასვლა მხოლოდ სააკაშვილს კი არა, ჩვენც გვინდა, რადგან საქართველო კატასტროფაშია!
_ ბატონო ჯონი, ყველაფერი ეს გასაგებია, მაგრამ იგივე „ნაცები“ გიორგი ვაშაძეს იმას ახსენებენ, რომ ვანო ჩხარტიშვილი მისი ცოლის ბიძაა. „სტრატეგია აღმაშენებელი“ თუნდაც საარჩევნო კამპანიას რა სახსრებით ჩაატარებს?
_ ჩემი დღევანდელი მდგომარეობა იმას არ ნიშნავს, რომ ჩემი პარტიისა და იგივე „სტრატეგია აღმაშენებლის“ დაფინანსება გამიჭირდეს!
_ ანუ ახალი პლატფორმის დამფინანსებელი მხოლოდ თქვენ ხართ?
_ ჩემი წრეც _ ბიზნესში ძალიან ბევრი მხარდამჭერი და მეგობარი მყავს!
სხვათა შორის, ყველაფერი ნათელი იქნება და კითხვის ნიშნები არ დარჩება, ვინ საიდან ფინანსდება!
საერთოდ, ცოლის ბიძაზე საუბარი სისულელეა, თორემ ასე თუ მივუდგებით, დედის მხრიდან 150 ნათესავი მყავს, მამისგან _ ასი და აქედან ზოგი სად მუშაობს და ზოგიც _ სად, თუმცა ეს ჩემთან კავშირში არაა!
საქართველოში სწორედ ეს უნდა მოისპოს _ ისეთი პოლიტიკური რეფორმა უნდა გავატაროთ, რომ ცოლის ბიძას კი არა, შვილიც რომ იყოს, ვერავინ უშველოს! პოლიტიკური წნეხისგან თავისუფალი პროკურატურა ზუსტად იმას ნიშნავს, რომ ხალხის მიერ არჩეული პროკურორი ხალხის ინტერესებს დაიცავს და პრემიერიც რეფორმებს გაატარებს, რადგან პროკურორმა ფულის მოპარვა არ დააბრალოს!
ასეთი ჭორიკნობა და აღვირახსნილობა უნდა დამთავრდეს!
სააკაშვილმა ე. წ. ქურდული მენტალიტეტის წინააღმდეგ კანონი მიიღო, მაგრამ განა, ჯაშუშები ქურდული მენტალიტეტის ხალხზე ნაკლებად საშიშები არ არიან? ჰოდა, უსაფრთხოების კანონიც უნდა მიეღო, რომ ისეთი ნაძირალები, როგორიც, მაგალითად, ნუგზარ ფოფხაძე და კოკა ყანდიაშვილია, ასე წინ ვეღარ წამოწეულიყვნენ!
ასეთი კანონი რომ მიეღო, ფოფხაძე ან საქართველოს დატოვებდა, ან ციხეში წავიდოდა!
მოკლედ, ის გვინდა, რომ რეფორმები გატარდეს და პროკურორის მოვალეობა პრემიერმა თუ პრეზიდენტმა აღარ შეასრულოს!
_ ბატონო ჯონი, „სტრატეგია აღმაშენებლის“ საარჩევნო სიაში იქნებით?
_ თუ გუნდი საჭიროდ მიიჩნევს, ვიქნები, თუ არა _ არ ვიქნები. ამ საკითხზე ჯერ არ გვიმსჯელია.
ისე, მთელი ცხოვრება იმას ვამბობ, რომ პოლიტიკა არ მინდა, მაგრამ იმ იდეების განხორციელების საშუალება, რაც მაქვს, არასოდეს მომეცა.
საქართველოში ჩემნაირი ძალიან ბევრია და აქ არ ვიცხოვროთ? დიახ, მთელი ცოხვრება მხოლოდ ჩემი საქმე მაინტერესებს, მაგრამ ამ საქმის გაკეთება მხოლოდ კონკურენტულ გარემოში შეიძლება, სადაც ჯანმრთელი და დასავლური ბიზნესის წარმოება კანონითა და სამართლითაა შესაძლებელი. მარტო ასეთ დროს განვითარდება ქვეყანა. კორუფციული ბიზნესით ქვეყანა ვერ განვითარდება!
_ ბოლოს, ბატონო ჯონი, სახალხო პოეტი ჯანსუღ ჩარკვიანი დღეს ცოცხალი რომ იყოს, თაკოსა და თქვენს პოლიტიკაში ჩართვაზე რას იტყოდა?
_ ერთ რამეს გეტყვით: ჩემი შესაძლებლობებიდან გამომდინარე, 90-იანი წლებიდან შემეძლო, რომ პოლიტიკაში ვყოფილიყავი, მაგრამ იმის გამო, რომ ჯანუკი საზოგადო მოღვაწე იყო, მე და თაკო პოლიტიკაში ნაკლებად ვიყავით, თუმცა ყველა პრობლემურ საკითხზე ვაქტიურობდით.
სხვათა შორის, ჯანსუღს, ცოცხალი რომ იყოს, ჩვენი ნაბიჯი მოეწონებოდა!
_ ბატონო ჯონი, ივანიშვილსა და სააკაშვილთან რა კითხვები გაქვთ?
_ რადგან ბოლო 30 წლის განმავლობაში რეფორმების ნიჭი სააკაშვილს აღმოაჩნდა, ვკითხავ: ყველაფერი რატომ არ მიიყვანა ბოლომდე?
ივანიშვილთან კი ერთი კითხვა მაქვს: თუ პუტინის მონა არ ხართ, პოლიტიკაში რა გინდათ?!
საერთოდ, ივანიშვილი ქართული მენტალიტეტის აზრზე არაა და ისეთი პატივმოყვარეა, რომ შეგრძნება არ აქვს, ადამიანს რა შესაძლებლობები აქვს!

გიორგი აბაშიძე

დატოვეთ კომენტარი