ქართულ პოლიტიკაში სიახლეა _ დამოუკიდებელი დეპუტატი ნატო ჩხეიძე „სახელმწიფო ხალხისთვის“ პოლიტსაბჭოს ხელმძღვანელი, ანუ პარტიის ლიდერი გახდა. ამ პარტიას, რომელიც 2016 წლის საპარლამენტო არჩევნების წინ, პაატა ბურჭულაძემ დააფუძნა, ბოლო წუთამდე ნიკა მაჭუტაძე ხელმძღვანელობდა. პარტიის ახალი ლიდერი საზოგადოებას სწორედ მაჭუტაძემ წარუდგინა.

ზემოხსენებული ცვლილება „ოცნებას“ უყურადღებოდ არ დარჩენია. ყოველ შემთხვევაში, პარლამენტის ყოფილმა თავმჯდომარე ირაკლი კობახიძემ ამ თემაზე კომენტირებისას ირონია მოიშველია და განაცხადა: „ეს გამოიწვევს რყევებს ქართულ პოლიტიკაში და ახლა ველოდებით, რა იქნება ზუსტი შედეგი ამ ყველაფრის“.
ისე, გულწრფელად რომ ვთქვათ, ნატო ჩხეიძემ და მისმა მეუღლე ზაზა ოქუაშვილმა „ოცნება“ ორი წლის წინ უკვე შეარყიეს, ანუ როგორც „სახელმწიფო ხალხისთვის“ ლიდერი ჩვენს გამოცემასთან ამბობს, ზაზა ოქუაშვილის მიერ ორი წლის წინ გაკეთებულმა განცხადებებმა „ოცნების“ უნიათობის იმიჯი დაამსხვრია და ხალხმა დაინახა, რომ მმართველი პარტია უნიათო კი არაა, კრიმინალურ საქმიანობას ეწევა.
სხვათა შორის, ვიდრე ნატო ჩხეიძე „სახელმწიფო ხალხისთვის“ ლიდერი გახდებოდა, შევიტყვეთ, რომ „ომეგას“ მიერ დაფუძნებული კომპანიები ტვ „მთავარის“ ლამის 40-პროცენტიანი წილის მფლობელები გახდნენ. ყველაფერი ეს კი იმაზე მიანიშნებს, რომ ნატო ჩხეიძე ქართულ პოლიტიკაში სერიოზული მოთამაშეა.

მიიყვანს თუ არა საკუთარ გუნდს პარტიაში და რა გეგმები აქვს როგორც პარტიის ლიდერს? _ „ქრონიკა+“ ნატო ჩხეიძეს ესაუბრა:

_ ქალბატონო ნატო, პარტიის ხელმძღვანელობას გილოცავთ. სხვათა შორის, ბოლო ინტერვიუებში ამ თემაზე გადაკვრით ვსაუბრობდით და ეს პროგნოზი ახდა, თუმცა მეგონა, რომ ახალ პარტიას დააფუძნებდით. „სახელმწიფო ხალხისთვის“ პოლიტსაბჭოს ხელმძღვანელობაზე რატომ დასთანხმდით?
_ პარტიის ხელმძღვანელობა, კი ბატონო, მოსალოციცაა და საპასუხისმგებლო საქმეც, მით უმეტეს, როცა ოთხ თვეში არჩევნებია.
რაც შეეხება იმას, ამ შემოთავაზებას რატომ დავთანხმდი, დიდი ხანია, ოპოზიციაში ვარ. გასული წლის ნოემბრიდან კი იმ ოპოზიციური ფორმატის წევრი გახლავართ, რომელიც ლეიბორისტების ოფისში იმართება. პარლამენტში მარტო, ანუ დამოუკიდებელი დეპუტატის სტატუსით ვიყავი, მაგრამ არჩევნებში დამოუკიდებლად მონაწილეობა ძალიან რთულია, მით უმეტეს, ამ პირობებში.
_ „ამ პირობებში“ რას გულისხმობთ?
_ რამე უცაბედ სიურპრიზს ან ტრიუკს, რომელიც შესაძლოა, ხელისუფლებამ შემოგვთავაზოს.
მოკლედ, არჩევნებში მონაწილეობა გუნდური უნდა იყოს. ამიტომაც გუნდურ საქმიანობას და მუშაობას, რაღა თქმა უნდა, დავთანხმდი.
_ გუნდურ მუშაობას, გეთანხმებით, უპირატესობა აქვს, მაგრამ არ გერჩიათ, საკუთარი პარტია შეგექმნათ, მით უმეტეს, რომ „სახელმწიფო ხალხისთვის“, თავის დროზე, სერიოზულ სკანდალებში გაეხვია, ანუ ეს ამბები ხალხს, შესაძლოა, აღარ ახსოვს, მაგრამ თუ ხელისუფლებას დასჭირდება, წარსულს, ბუნებრივია, ამოქექავს.
_ დიახ, სწორად აღნიშნეთ _ პარტიებს, თუ ხელისუფლებას სჭირდება, სკანდალებში ხვევს ხოლმე, მაგრამ იმის იქით, რასაც ხელისუფლება ამოქექავს, რეალობა არსებობს.
_ ანუ?
_ რა და როგორიც უნდა ყოფილიყო, ის წარსულია. ჩვენ, ყველანი კი მომავლისთვის ვართ მოწოდებულნი. ასე რომ, „სახელმწიფო ხალხისთვის“ კვალიფიციური და შემდგარი პარტიაა.
ამასთან, იქიდან გამომდინარე, რომ დეპუტატი ვარ, უკვე საპარლამენტო პარტიაცაა. შესაბამისად, ამ პარტიაში მთელი რიგი ბენეფიტი არსებობს. როცა შემდგარი პარტია შენ მიმართ ნდობას გამოხატავს, ეს ნდობა არც ამ პარტიის წარმომადგენლებს უნდა გაუცრუო და არც _ მათ, რომლებიც, თავის დროზე, მისი მხარდამჭერები იყვნენ.
სხვათა შორის, 2016 წელს „სახელმწიფო ხალხისთვის“ არჩევნებში დამოუკიდებლად მონაწილეობდა და ამ პარტიის დამაარსებლის მიმართ ხელისუფლებიდან რაღაც ცუდი განწყობა რომ არ ყოფილიყო, ადვილი შესაძლებელი იქნებოდა, პარლამენტშიც მოხვედრილიყო.
_ მართალია, ამჯერად პოლიტიკაში აღარ ერევა, მაგრამ როცა შემოთავაზება მიიღეთ, პაატა ბურჭულაძესთან, როგორც „სახელმწიფო ხალხისთვის“ დამფუძნებელთან, გარკვეული კონსულტაციები თუ გქონდათ?
_ შემოთავაზება მიმდინარე წლის დასაწყისში მივიღე და საუბარი მხოლოდ პარტიის წევრებთან კი არა, ცხადია, პაატა ბურჭულაძესთანაც მქონდა, თუმცა პაატა ამ პარტიაში აღარ არის და თავის საქმიანობას დაუბრუნდა.
_ თუ პოლიტსაბჭოს ხელმძღვანელობაზე შემოთავაზება წლის დასაწყისში მიიღეთ, ამის შესახებ საზოგადოებას აქამდე რატომ არ ამცნეთ?
_ ჩვენი ურთიერთობის აფიშირება კორონაპანდემის გამო არ მოხდა. ახლა კი კორონას ერთმა ეტაპმა გადაიარა. მართალია, გვეუბნებიან, რომ შესაძლოა, მეორე ტალღაც იყოს, თუმცა მგონია, რომ ეს ხელისუფლების საჭიროებაზე იქნება დამოკიდებული. ერთი სიტყვით, ჩვენი ურთიერთობის გამომზეურება ამ კორონატალღებს შორის მოხდა.
_ „სახელმწიფო ხალხისთვის“ კი არის კვალიფიციური პოლიტსუბიექტი, მაგრამ ამ პარტიიდან საზოგადოება მხოლოდ ნიკა მაჭუტაძეს იცნობდა, ანუ პოლიტგაერთანების სახეები ვინ არიან ან პარტიაში თქვენს გუნდს თუ მიიყვანთ, ქალბატონო ნატო?
_ „გუნდს მივიყვან“ ასე არ ვიტყვი.
_ აბა, როგორ იტყვით?
_ ადამიანები, რომლებიც მე და ჩემს გარემოცვას ენდობიან, ალბათ, თავად მოვლენ. ყოველ შემთხვევაში, ასე მგონია და ამის შემდეგ ვნახავთ, ამ პარტიაში ჩვენი არსებობა საინტერესო რამდენისთვის იქნება.
_ რაც შეეხება ე. წ. ფეისებს, ანუ მაჭუტაძის გარდა, პარტიაში ვინ დაგხვდათ?
_ სახეები მათ ჰქვიათ, ვინც ტელევიზიით გამოდიან. სამწუხაროდ, სახე გაზეთში დაბეჭდილ ფოტოსაც აღარ ჰქვია.
_ დიახ, სამწუხაროდ, პოლიტელიტა მედიად მხოლოდ ტელევიზიას აღიქვამს, რაც, ჩემი აზრით, დიდი შეცდომაა!
_ მოკლედ, ესეც პიარის ნაწილია, რომ მხოლოდ საზოგადოებისთვის ცნობილი სახეები გამოჩნდნენ. საზრუნავი, ცხადია, ამ კუთხითაც გვექნება.
_ ასეა თუ ისე, თქვენმა ლიდერობამ „ოცნება“ ერთობ გააღიზიანა და ირაკლი კობახიძემ მძაფრი განცხადებებიც „მოგიძღვნათ“. ამის მიზეზი „ომეგას“ ორი წლის წინანდელი სკანდალია თუ იგივე კობახიძემ თქვენში, როგორც პარტიის ლიდერში, ის პოტენციალი დაინახა, რომელიც მმართველი გუნდისთვის საშიშია?
_ „ოცნებამ“ პოტენციალი, ჯერ კიდევ, ორი წლის წინათ, ზაზა ოქუაშვილში დაინახა. ისე, კობახიძეს სიტყვა „რყევა“ ტყუილად არ უხსენებია _ დიახ, „ოცნების“ იმიჯი, რომ თითქოს უნიათოა, შეარყია, ანუ უნიათობა „ოცნების“ ცუდი საქმიანობის განმსაზღვრელი იყო, მაგრამ ზაზა ოქუაშვილმა მიუთითა, რომ უნიათოები კი არ იყვნენ, არამედ სახელმწიფოსთვის საზიანო საქმიანობასა და კრიმინალური საქმიანობისკენ გადახრაში ამხილა! ეს „ოცნებისთვის“ ძალიან სერიოზული რყევა იყო და კობახიძემ სიტყვა „შერყევა“ სწორედ ამ განცდის გამო გამოიყენა.
ერთი სიტყვით, რყევებს მხოლოდ ჩემგან არ ელოდებიან, თუმცა ჩემგანაც იქნება! კობახიძე შეეცადა, თავის ფრაზებში ირონია გაერია, მაგრამ დღეს ისეთი ვითარებაა, რომ მისი ნათქვამი ირონიად კი არა, უფრო რეალობად აღიქმება!
_ იქიდან გამომდინარე, რომ „სახელმწიფო ხალხისთვის“ „ძალა ერთობაშიასთან“ ერთადაა, ამ ფორმატის წევრი ავტომატურად გახდით. ქალბატონო ნატო, „ძალა ერთობაშიას“ მუშაობაში უკვე ჩაერთეთ?
_ ცალ-ცალკე ყველას შევხვდი _ მათ აქამდეც ვიცნობდი, მაგრამ ეს ინდივიდუალური შეხვედრა ჩვენს ოფისში შედგა. გაერთიანებულ ფორმატში კი უახლოეს დღეებში შევხვდებით.
_ „ძალა ერთობაშიას“ წევრი იმ დროს გახდით, როცა გიორგი ვაშაძის პრემიერის კანდიდატობად დასახელებას გარკვეული უთანხმოება მოყვა. ამ საკითხზე თქვენი პოზიცია როგორია?
_ მაშინ, როცა ამ თემაზე დაიწყო საუბარი, „ძალა ერთობაშიას“ წევრი არ ვიყავი და, ასე ვთქვათ, ხმის უფლებაც არ მქონდა, თუმცა როგორც გარედან დავინახე, ამას განხეთქილება არ მოჰყოლია. განხეთქილება რომ ყოფილიყო, მაშინ ეს ერთობა არ შენარჩუნდებოდა.
_ საქმე საქმეზე რომ მიდგეს, პრემეირად გიორგი ვაშაძის კანდიდატურას მხარს დაუჭერთ?
_ ვნახოთ. ასე საუბარი რთულია.
_ რთული რატომაა?
_ გააჩნია, რა ვითარება და არგუმენტები იქნება, ანუ ბევრი „თუ“ არსებობს და ეს „თუები“ ვისკენაც გადაწონის, ცხადია, მას დავუჭერ მხარს!
_ ისე, „სახელმწიფო ხალხისთვის“ წევრი თქვენი მეუღლე, ზაზა ოქუაშვილიც გახდა?
_ არა.
_ აპირებს, რომ აქტიურ პოლიტიკურ ცხოვრებას დაუბრუნდეს?
_ მის მაგივრად ვერ გიპასუხებთ…
_ ქალბატონო ნატო, რომელიმე ოლქში ოპოზიციის გაერთიანებული მაჟორიტარობის კანდიდატი ხომ არ იქნებით?
_ როცა შევიკრიბებით და თუ ამ საკითხმა წამოიწია, ანუ თუ მათ მოინდომეს, თუ მეც დავთანხმდი და თუ ეს საერთო საქმისთვის სასარგებლო იქნება, მაშინ ცხადია, ვიქნები. ასე რომ, ამ კუთხითაც ბევრი „თუა“ და ჯობია, ჯერ გადაწყვეტილება მივიღოთ და მერე ვისაუბროთ.
_ გასაგებია, მაგრამ არ მგონია, თქვენს მაჟორიტარობაზე ოპოზიციაში ვინმეს „თუ“ ჰქონდეს, რამეთუ თავად გაიხსენეთ, რომ სწორედ ზაზა ოქუაშვილმა ამხილა „ოცნება“ კრიმინალურ მიდრეკილებებში, ანუ მმართველი ელიტის საჯარო მხილება თქვენმა ოჯახმა გაბედა. ამიტომაც სრული უფლება გაქვთ, რომ მაჟორიტარის მანდატი მოითხოვოთ. ვცდები?
_ კი ბატონო, მართალი ბრძანდებით _ „ოცნების“, ასე ვთქვათ, მონოლითურობაში სერიოზული ბზარი სწორედ ზაზას განცხადებებმა გააჩინა. ამან საზოგადოების გრძნობებისა თუ ფიქრების ადვილად გამოხატვა გამოიწვია, ანუ რაღაცას ადამიანები თავადაც ფიქრობენ, მაგრამ ზოგჯერ ყოყმანობენ, ეს ასეა თუ არაო. ზაზას განცხადებები კი ხალხმა ადვილად მიიღო, რადგან თავადაც ასე ფიქრობდა.
ყველაფერს თავი რომ დავანებოთ, მხოლოდ ესემეს შეტყობინებებით თუ სოციალური ქსელით ძალიან ბევრი ჩვენი გულშემატკივარი, თანამგრძნობი და თანამებრძოლია, მაგრამ მაჟორიტარობის კანდიდატობაზე გადაწყვეტილების მიღება მაინც ბევრ რამეზეა დამოკიდებული და, მოდით, იმ შეკრებას დაველოდოთ, რომელზედაც საერთო გადაწყვეტილებას მიიღებენ.
_ ქალბატონო ნატო, როგორც „ძალა ერთობაშიას“ წევრს მიხეილ სააკაშვილთან კომუნიკაცია მოგიწევთ. 2004 წლის, ანუ „ომეგაზე“ განხორციელებული „ნაციონალური შტურმის“ შემდეგ საქართველოს მესამე პრეზიდენტთან ურთიერთობა გქონიათ?
_ არა, არ მქონია!
_ წარსულის გამო გარკვეული უხერხულობა ხომ არ შეგექმნებათ?
_ უხერხულობა რატომ უნდა მქონდეს? აი, მაგალითად, ირაკლი ოქრუაშვილი ე. წ. ლეიბორისტული მაგიდის წევრია და ერთ მაგიდასთან ვსხედვართ.
იცით, რა ხდება? _ არავისთვის არაფერი დამიშავებია და უხერხულობა რატომ უნდა მქონდეს? სხვათა შორის, მაკიაველმა თქვა, მიზანი ამართლებს საშუალებასო და ეს მაშინ ხდება, როცა სახელმწიფოებრივ ინტერესებზე ვსაუბრობთ.
დიახ, ახლა წინა პლანზე სახელმწიფო ინტერესებია და ეს ინტერესი ამ კრიმინალური ხელისუფლების შეცვლაა!
საამისოდ ყველა საშუალებაა გამოსაყენებელი და ესეც ერთ-ერთია, როცა ის ადამიანები კონსოლიდირდებიან, რომლებსაც იდენტური მიზანი აქვთ!
_ ქალბატონო ნატო, თქვენი, როგორც პარტიის ლიდერის მოსაზრება იმ ანგარიშზე, რომელსაც 13 ამერიკელი კონგრესმენი აწერს ხელს და სადაც ბიძინა ივანიშვილი საქართველოში რუსული ინტერესების ერთგვარ ხელშემწყობად მიიჩნევა, როგორია?
_ ეს კიდევ ერთი ძალიან მწვავე განცხადებაა, რომელიც მხოლოდ „ქართულ ოცნებას“ კი არა, ბიძინა ივანიშვილსაც ალბათ, აიძულებს, რომ თავის დესტრუქციულობას რაღაც კონსტრუქციულობის ელფერი მისცეს და შესაბამისად, ძალიან გამჭვირვალე და არაძალადობრივი არჩევნები ჩაატაროს! სხვა გზა, უბრალოდ, არ რჩება და ეს უნდა გააკეთოს!
_ ზოგს ეჭვი ეპარება, რომ „ოცნება“ გამჭვირვალე არჩევნებს ჩაატარებს.
_ მით უარესი მისთვის, თუ გამჭვირვალე და არაძალადობრივ არჩევნებს არ ჩაატარებს.
_ სხვათა შორის, მას შემდეგ, რაც „სახელმწიფო ხალხისთვის“ ლიდერი გახდით, ის პარტია გაიხსენეთ, რომელიც ორი წლის წინ დატოვეთ და ისიც თქვით, დარწმუნებული არ ვიყავი, მოსკოვში ჩვენი ვიზიტები შედეგს თუ მოიტანდაო. როდის მიხვდით, რომ „პატრიოტების“ მოსკოვური ვიზიტები უშედეგო იქნებოდა?
_ დეპუტატის დეპუტატთან საუბარი შედეგს რომ არ მოიტანდა, ამას მაშინვე მივხვდი, როცა ქართველი დეპუტატები რუს დეპუტატებს ვესაუბრებოდით. საერთოდ, ოპოზიციის წარმომადგენლისა და ხელისუფლების დეპუტატის შეხვედრები შედეგის მომტანი არ არის, მაგრამ რაღაც შედეგისთვის დასაწყისია. რაღაცის დასაწყისი კი, ალბათ, ყოველთვის საჭიროა, მით უმეტეს, რომ მაშინ საუბრები ისეთ სოციალურ პრობლემებს შეეხებოდა, როგორიცაა, მაგალითად, გალის რაიონში ქართული წიგნების შეტანა, ქართველებისთვის, რომლებსაც რუსეთში უამრავი ნათესავი და ახლობელი ჰყავთ, ვიზის მიღების გაიოლება _ ყველამ ვიცით, საელჩოსთან ვიზის აღებისას როგორი კორუფციაც ტრიალებდა. ამ ტიპის პრობლემების მოგვარება საქართველოს მოსახლეობისთვის, რაღა თქმა უნდა, კარგი იქნებოდა. ყოველ შემთხვევაში, ჩემი სურვილი სწორედ ეს იყო და მოქმედებაც ამან განაპირობა.
_ რომა არა „ომეგას“ ამბები, „პატრიოტთა ალიანსს“ დატოვებდით?
_ ზოგჯერ საბაბი და მიზეზი სხვადასხვაა.
_ ანუ?
_ დატოვების საბაბი ცოტა ადრე, შეიძლება, სხვა რამ ყოფილიყო. ცოტა მერე კი _ სხვა.
ზოგადად, პოლიტიკა ისეთი რამეა, რაღაცაში რომ ვერ შეთანხმდები და საერთო აზრი აღარ არსებობს, მერე, რა თქმა უნდა, გზები იყოფა.
_ ცხადია, ასეა, მაგრამ „სახელმწიფო ხალხისთვის“ თქვენთვის მესამე პარტიაა _ პოლიტიკური მოღვაწეობა 90-იან წლებში „ტრადიციონალისტთა კავშირით“ დაიწყეთ, მერე „პატრიოტების“ წევრი იყავით, ახლა კი სრულიად სხვა პარტიის ლიდერი ხართ. ქალბატონო ნატო, პირდაპირ გკითხავთ და პირდაპირ მიპასუხეთ: უფრო კომფორტულად რომელ პარტიაში გრძნობდით თავს?
_ ყველა პარტია, რომელშიც ვიყავი, ოპოზიციური იყო.
_ ეს რა შუაშია?
_ ოპოზიციურ პარტიაში ყოფნა კომფორტული არაა.
_ რატომ?
_ როცა ოპოზიციურ პარტიაში ხარ, საბრძოლო განცდა გაქვს. მაშინ კი, როცა დავინახავ, რომ ეს საბრძოლო განცდა არასაბრძოლოთი შეიცვლება, კომფორტულად ვერ ვიგრძნობ თავს!
_ ისე, 2018 წლის შემდეგ მოვლენები ელვის სისწრაფით ვითარდება, ანუ მაშინ „ომეგაზე“ სახელისუფლებო შეტევას „იბერიის“ დახურვა მოყვა. ახლა კი „ომეგას“ მიერ დაფუძნებული კომპანიები „მთავარის“ 40-პროცენტიანი წილის მფლობელები არიან. ყველაფერი ეს იმას ნიშნავს, რომ ტვ „იბერია“ უკვე ქართული მედიის წარსულია?
_ არა, ასე რატომ უნდა ვთქვათ?
_ აბა, როგორ უნდა ვთქვათ?
_ „იბერია“ ხელისუფლებამ ჟურნალისტებისა და ოპერატორების ნაწილის საშუალებით დახურა _ „იბერიაში“ დაწყებული ჯანყი გახსოვთ და, სხვათა შორის, მერე იგივე აჭარის ტელევიზიაშიც გაიმეორეს.
„იბერია“, ჯერჯერობით, დახურულია, მაგრამ „იბერია“ სხვა დროსაც იყო დახურული, თუმცა ეთერში ისევ გავიდა.
_ კი ბატონო, მაგრამ მაშინ, როცა ერთხელ დახურული „იბერია“ ეთერში დაბრუნდა, სხვა ტელევიზია არ გქონდათ. ახლა კი „მთავარის“ მსხვილი მეწილე ხართ.
_ ტელევიზიებს რამდენიმე არხი ხომ აქვთ ხოლმე?
_ დიახ, აქვთ.
_ ჰოდა, ვნახოთ. საერთოდ, გრძელვადიან გეგმებზე საუბარი რთულია.
_ რატომ?
_ იმიტომ კი არა, რომ ამის გათვლა არ შეგიძლია. უბრალოდ, რეალობამაც უნდა შეგიწყოს ხელი. ჯერ იმის რეალობა არ არსებობს, რომ „იბერია“ ეთერში იყოს, მაგრამ როგორც კი ამის რეალობა დადგება, ეს მოხდება!
_ საინტერესო პასუხია…
სხვათა შორის, ზოგი მიიჩნევს, რომ კორონა საარჩევნოდ „ოცნების“ მთავარ მოკავშირედ იქცა. თქვენც ასე ხომ არ ფიქრობთ, ქალბატონო ნატო?
_ კორონას ხელისუფლება უკვე იყენებს.
_ როგორ?
_ მეორე ტალღის ასეთი მოლოდინის აქტივაცია ტყულად არ ხდება და კანონებსაც ისეთს იღებს, რომ ხალხზე მზრუნველობის საბაბით, კორონას არჩევნების დროს ოპოზიციის წინააღმდეგ გამოყენება შესაძლებელი იქნება, მაგრამ ბუნებრივი ვითარება ისეთია, რომ „ოცნება“ თავდაღმართზეა. არჩევნების დროს ეს თავდაღმართი ჩათავდება, ანუ გავაკებამდე მივა და ასი კორონა რომ იყოს, „ოცნება“ ბუნებრივ ვითარებას წინ ვერ აღუდგება!
იცით, როგორაა? _ ვთქვათ, ქარიშხალი მოდის, მაგრამ წინ ვერ გადაეღობები. აი, ხელისუფლება ახლა ასეთ ვითარებაშია _ ძალიანაც უნდა, რომ არც ქარიშხალი იყოს და არც _ სეტყვა, მზე ანათებდეს და ნაზი სიო უბერავდეს, მაგრამ ამის განწყობა არ არსებობს _ ცა მოქუფრულია და ის ბუნებრივი პროცესები, რაც უნდა მოხდეს, აუცილებალდ მოხდება!

გიორგი აბაშიძე