რამდენიმეთვიანი „ნერვების წყვეტა“ დასრულებულია. ყოველ შემთხვევაში, ამ დროის მონაცემებით, ხელისუფლებამ და ოპოზიციამ, დასავლელი პარტნიორების აქტიური ჩარევის შედეგად, შეთანხმებას მიაღწია, რაც იმას ნიშნავს, რომ წელს და ასევე 2024 წლამდე, ვადამდელის დანიშვნის შემთხვევაში, არჩევნები 120/30-ზე სისტემითა და 1%-იანი ბარიერით ჩატარდება. ამ შეთანხმებას, ჯერჯერობით, მემორანდუმის სახე აქვს და, რამდენიმე დღეში, როგორც პოლიტიკურ წრეებში ამბობენ, პარლამენტი ყველაფერ ამას კანონის სახესაც მისცემს.

ხელისუფლებასა და ოპოზიციას შორის დადებულ ურთიერთგაგების მემორანდუმში, რომელიც აშშ-ის საელჩომ გაავრცელა, ვკითხულობთ:

„ამ დოკუმენტის ხელმომწერები თანხმდებიან, რომ მხარს უჭერენ საქართველოს კონსტიტუციის შესაბამის დებულებაში ცვლილებას, რომელიც 2020 წლის საპარლამენტო არჩევნებისთვის საარჩევნო სისტემის შემდეგ მოდელს განსაზღვრავს: საქართველოს პარლამენტი შედგება პროპორციული წესით არჩეული 120 და მაჟორიტარული წესით არჩეული 30 დეპუტატისგან. პროპორციული არჩევნებისთვის საარჩევნო ბარიერი შეადგენს 1%-ს. ჩამკეტი მექანიზმი გამორიცხავს შესაძლებლობას, რომ პროპორციულ არჩევნებში ხმების 40%-ზე ნაკლების მიმღებმა პოლიტიკურმა სუბიექტმა მიიღოს მთლიანი საპარლამენტო მანდატების უმრავლესობა. მანდატების პროპორციული განაწილების წასახალისებლად, დამატებითი ჩამკეტი მექანიზმები და შეზღუდვები დადგინდება საარჩევნო კანონმდებლობით
30 მაჟორიტარული საარჩევნო ოლქის საზღვრები განისაზღვრება საქართველოს საკონსტიტუციო სასამართლოს შესაბამისი გადაწყვეტილებისა და ვენეციის კომისიის რეკომენდაციის თანახმად. ამომრჩეველთა რაოდენობის მიხედვით საარჩევნო ოლქების გადახრა მათი საერთო საშუალო მაჩვენებლიდან არ უნდა აღემატებოდეს 15%-ს. უპირატესობა უნდა მიენიჭოს ოლქების საქართველოს რეგიონების ფარგლებში ფორმირებას, თუ ამომრჩეველთა რაოდენობა ამის შესაძლებლობას იძლევა. საარჩევნო ოლქების განსაზღვრის ზემოაღნიშნული წესებიდან შეიძლება დაშვებულ იქნეს არაუმეტეს სამი გამონაკლისისა უმცირესობათა და მაღალმთიანი მოსახლეობის წარმომადგენლობის წასახალისებლად ან უნიკალური გეოგრაფიული საჭიროებების გასათვალისწინებლად. საპარლამენტო უმრავლესობა საჯაროდ წარმოადგენს საარჩევნო ოლქების განაწილების თაობაზე მის წინადადებას საკონსტიტუციო ცვლილების პარლამენტში ინიცირებიდან არაუგვიანეს 10 დღისა. 2020-დან 2024 წლამდე შუალედში ვადამდელი საპარლამენტო არჩევნების დანიშვნის შემთხვევაში, პირველი ასეთი არჩევნები ჩატარდება 2020 წლისთვის განსაზღვრული წესების შესაბამისად. ყველა მომდევნო არჩევნები ჩატარდება სრულად პროპორციული სისტემით, 2024 წლისთვის საქართველოს კონსტიტუციაში ამჟამად განსაზღვრული წესის მიხედვით…
ჩვენ, ხელისმომწერი პარტიები, ჩავერთეთ დიალოგში 2020 წლის საპარლამენტო არჩევნების თავისუფალ და სამართლიან გარემოში ჩატარების უზრუნველსაყოფად, რაც საქართველოს ხალხის ნებას ასახავს. ჩვენ ვეთანხმებით საქართველოს მართლმსაჯულების სისტემაში უმაღლესი სტანდარტების დაცვისა და მათი დახვეწისკენ სწრაფვის მნიშვნელობას. მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომელიც შესაძლოა აღქმულ იქნეს, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნეს აცილებული. მივესალმებით პრეზიდენტის წინადადებას, მისი საკონსტიტუციო უფლებამოსილების ფარგლებში, თავისუფალი, სამართლიანი და გამჭვირვალე საარჩევნო პროცესის ხელშეწყობასთან დაკავშირებით“.

ერთი სიტყვით, ისეთი პირი უჩანს, რომ საქართველოში ახალი პოლიტიკური ერა იწყება, თუმცა, შეთანხმების მიუხედავად, გარკვეული კითხვებიც გაჩნდა. სწორედ ამ კითხვებზე შეეცადა ჩვენი გამოცემა პასუხების მიღებას ედპ-ს ლიდერ ბაჩუკი ქარდავასგან, რომელიც ზემოხსენებულ მოლაპარაკებებში აქტიურად იყო ჩართული:

_ ბატონო ბაჩუკი, ის, რაც 8 მარტს მოხდა, უნდა მოგილოცოთ?
_ საქართველოს უნდა მივულოცოთ, ოღონდ _ ნაწილობრივ!
_ „ნაწილობრივი მილოცვა“ რას ნიშნავს? ისე, ოპოზიცია სულ სხვა რამეს ითხოვდა და სულ სხვა რეალობის წინაშე დადგა…
_ ოპოზიცია ითხოვდა, რომ ხელისუფლებას ბონუსი არ ჰქონოდა, ანუ საარჩევნო კამპანიის დროს ხელისუფლებების ბონუსები ერთხელ და სამუდამოდ დამთავრებულიყო.
_ ანუ?
_ 73 მაჟორიტარს ხელისუფლება მანიპულაციისთვის იყენებდა, რათა უმრავლესობაში დარჩენილიყო. ახლა კი დათმობაზე წავიდა.
_ დათმობა, მაინც, რაში გამოიხატება?
_ 30 კი 73-ისგან განსხვავდება და სწორედ ეს მეტყველებს, რომ ოპოზიცია იმთავითე მართალი იყო. ამასთან, „ოცნებამ“ ქართველი ხალხისა და საერთაშორისო პრესინგს ვერ გაუძლო. ოპოზიციის ტაქტიკურმა კურსმა განაპირობა, რომ „ოცნება“, ამ ეტაპზე, ნაწილობრივ დათმობაზე წავიდა, თუმცა ამას, მაინცდამაინც, დიდი მოლოდინით არ უნდა შევხვდეთ.
_ რატომ?
_ თუ პოლიტპატიმრები არ განთავისუფლდებიან და არჩევნებში კრიმინალის ჩართულობაც არ გამოირიცხა, მაშინ სისტემა იდეალურიც რომ იყოს, ეს სამართლიან არჩევნებს ვერ უშველის!
_ 8 მარტის შეთანხმება, ჯერჯერობით, მხოლოდ მემორანდუმია, ანუ მას კანონის სახე არ აქვს. ივანიშვილმა, თავის დროზე, სრულიად პროპორციულ არჩევნებზე გადასვლის პირობაც დადო, თუმცა ბოლო წუთს გადაიფიქრა. მოკლედ, რა გარანტია არსებობს, რომ 8 მარტის მემორანდუმსაც იგივე ბედი არ უწერია და ხელისუფლება ოპოზიციას ისევ არ გადააგდებს?
_ ოპოზიციას კი არა, ხალხს, ანუ ოპოზიცია ხალხის ნაწილია.
_ კი ბატონო, მაგრამ კითხვაზე მიპასუხეთ: „ოცნებას“ რატომ ენდობით?
_ ბიძინა ივანიშვილისგან გამორიცხული არაფერია, თუმცა დღევანდელი მოცემულობა ისეთია, რომ თუ ხალხსა და საერთაშორისო საზოგადოებას კიდევ გადააგდებს, ყველაფერი ეს უკვე საკუთარი თავის დასამარებად ექცევა და იმის დროც კი აღარ დარჩება, რომ საქმე ოქტომბრის არჩევნებამდე მივიდეს!
_ ვნახოთ, რა და როგორ იქნება, მაგრამ სიმართლე გითხრათ, ვერ ვხვდები, ამ 120/30-ზე რატომ დასთანხმდით, ანუ ოპოზიცია მაქსიმალურს იმიტომ ითხოვდით, რომ მინიმალური მიგეღოთ?
_ ოპოზიციამ პროპორციული სისტემა მიიღო, ივანიშვილმა კი თავისი დაპირება უკან წაიღო. საერთოდ, ჩვენ ამ პრობლემას, ხელისუფლებისგან განსხვავებით, სწორი სახელმწიფოებრივი პოზიციიდან ვუდგებოდით. 120/30 უარესი არ არის, არც იდეალურია, თუმცა ყველა პირობა არსებობს საიმისოდ, რომ თუ შეთანხმება შესრულდება, ივანიშვილი ხელისუფლებიდან წავა.
_ 8 მარტის მემორანდუმში წერია, რომ 2024 წლამდე, თუ ვადამდელი არჩევნები დაინიშნება, სწორედ 130/20-ზე სისტემით ჩატარდება. ბატონო ბაჩუკი, ოპოზიცა ამ „დაშვებაზე“ რატომ წავიდა?
_ ეს შედეგი, გარკვეულწილად, ალბათ, 30 პოლიტიკური ორგანიზაციის ერთობამ მოიტანა, ანუ ივანიშვილს უკან დახევა, ხალხისა და საერთაშორისო ზეწოლასთან ერთად, ამ ერთობამაც აიძულა, თუმცა ოპოზიციაში აზრთა სხვადასხვაობა ბევრ საკითხზე არსებობდა, არსებობს და მომავალშიც იარსებებს. პირადად ჩემი პოზიცია იყო, რომ ბევრად ხისტები უნდა ვყოფილიყავით, თუმცა, საბოლოოდ, მთელმა ოპოზიციამ აბსოლუტურად სწორი გადაწყვეტილება მიიღო, მით უმეტეს, რომ პოლიტიკა ერთ დღეს არ მთავრდება. წინ კიდევ ბევრი ბრძოლა გველოდება და ამ შემთხვევაში, სიხისტე და რადიკალიზმი შესაძლოა, გამართლებული არ ყოფილიყო, თან თუ საერთაშორისო ფაქტორსაც გავითვალისწინებთ.
_ წეღან პოლიტპატიმრები ახსენეთ. ჩემს ხელთ არსებული ინფორმაციით, 8 მარტის მემორანდუმიდან გამომდინარე, „ოცნება“ თანახმაა, რომ ხაზარაძისა და ბოკერიას წინააღმდეგ აღძრული სისხლის სამართლის საქმეები შეწყვიტოს, თუმცა იმაზე არაა თანახმა, რომ ციხიდან ირაკლი ოქრუაშვილი გამოუშვას. თუ მოვლენები სწორედ ამ სცენარით განვითარდა, რა მოხდება?
_ სიმართლე გითხრათ, ეს მემორანდუმი ჩემთვის მოულოდენლობა არ ყოფილა, ხელმოწერამდე ბევრად ადრე ვიცოდი და გარკვეულ საკითხებზე ჩემი თანხმობაც მქონდა.
_ მხოლოდ თქვენ კი არა, ყველამ ვიცოდით, რომ ეს შეთანხმება შედგებოდა, მაგრამ, ბატონო ბაჩუკი, კონკრეტულად მიპასუხეთ, იმ შემთხვევაში, თუ „ოცნება“ ვინმეზე, მაგალითად, ოქრუაშვილზე იტყვის, პოლიტპატიმარი კი არა, კრიმინალიაო და არ გაათავისუფლებს, ოპოზიცია როგორ მოიქცევა?
_ თუ ივანიშვილი პირობას კიდევ ერთხელ დაარღვევს, ოპოზიცია უფლებას იტოვებს, რომ შესაბამისად იმოქმედოს.
_ და ეს „შესაბამისი მოქმედება“ რა არის?
_ ქუჩის რადიკალური მოძრაობა.
_ ანუ, პირადად თქვენ, ბაჩუკი ქარდავა, უშვებთ ალბათობას, რომ ხელისუფლებამ ყველა პოლიტპატიმარი არ გაათავისუფლოს, არა?
_ გონიერი ადამიანი ასე არ მოიქცევა. ივანიშვილმა პოლიტიკაში ბევრი ცუდი ნაბიჯი გადადგა, მაგრამ არ მგონია, ამ ქონების პატრონი მთლად უჭკუო იყოს. ჰოდა, თუ ოდნავი ჭკუა მაინც აქვს, ასეთი ნაბიჯი არ უნდა გადადგას. მოკლედ, ვნახოთ, რას იზამს.
_ თუ ხელისუფლება და ოპოზიცია ყველა პოლიტპატიმრის განთავისუფლებაზე შეთანხმდა, მაშინ საკითხავია, ეს შეთანხმება მესამე პრეზიდენტზე რატომ არ უნდა გავრცელდეს? ანუ ლოგიკით სისხლის სამართლის დევნა მიხეილ სააკაშვილზეც ხომ უნდა შეწყდეს და მის წინააღმდეგ სხვადასხვა საქმეზე გამოტანილი განაჩენების ანულირება მოხდეს?
_ არ მგონია, რომ ამ პოლიტიკურ რაუნდში, რომელიც ხელისუფლებასა და ოპოზიციას შორის გაიმართა, მიხეილ სააკაშვილს თავისი პოლიტიკური ინტერესები ჰქონოდა. მას, ალბათ, სხვა გათვლები აქვს და დარწმუნებული ვარ, პოლიტიკურ დევნილობას ძალიან მალე დაასრულებს, თუმცა ასევე არ მგონია, რომ ივანიშვილთან დაჯდომა და ამ თემაზე ვაჭრობა სურდეს!
_ ვაჭრობა რა შუაშია? წესით, სააკაშვილზე პოლიტიკური დევნის შეწყვეტა ოპოზიციას უნდა მოეთხოვა.
_ ოპოზიციამ ყველა პოლიტპატიმრისა და დევნილის საკითხი დააყენა, თუმცა ქვეცნობიერი ზღვარი 20 ივნისის შემდეგ განვითარებული მოვლენები გახლდათ, რაც, ალბათ, ბუნებრივი და ლოგიკური იყო.
_ ბუნებრივი და ლოგიკური რატომ იყო?
_ 20 ივნისის მოვლენებს პოლიტპატიმრების ახალი ტალღა მოჰყვა.
_ სხვათა შორის, თუკი ჩემი წყაროს ინფორმაცია გამართლდება და ხაზარაძე-ბოკერიას წინააღმდეგ აღძრული საქმეები შეწყდება, მაშინ, როგორც კულუარებში ამბობენ, 8 მარტის მემორანდუმიდან ყველაზე დიდ ხეირს „ევროპული საქართველო“ ნახავს, რომელიც მომავალ პარლამენტში მეორე ძალად მოგვევლინება…
_ და პირველი ძალა ვინ იქნება?
_ ოპოზიციაში ბევრი დარწმუნებულია, რომ „ოცნება“ თავის პოზიციებს ახალი საარჩევნო კონფიგურაციითაც შეინარჩუნებს.
_ ოპოზიციას ყველა რესურსი აქვს, რომ ხელისუფლება დაამარცხოს. ხელისუფლებას კი ეს რესურსი არ გააჩნია. ერთადერთი, რაც მას შეეძლო, ის იყო, რომ არჩევნებისთვის ლეგიტიმაცია არ დაეკარგა და ამ კუთხით პოზიტიური ნაბიჯი გადადგა.
მოკლედ, ვინ პირველი იქნება და ვინ _ მეორე, არ მგონია, პოლიტიკური პროცესები ახლა ამ კონტექსტში იხილებოდეს. ოპოზიციაში სრული ერთიანობა გვაქვს და ის პროცესი, რომელიც მაჟორიტარებთან დაკავშირებითაა დაწყებული, გაგრძელდება და დარწმუნებული ვარ, მაჟორიტარების ნაწილში მაინც ოპოზიცია ერთიანი იქნება, ბლოკებად არ გაიყოფა, თუმცა პროპორციულში, რა თქმა უნდა, გავიყოფით.
კიდევ ერთხელ გეუბნებით: ვინ პირველი იქნება და ვინ _ მეორე, ეს საკითხი ოპოზიციაში არ დგას. ჩვენი მიზანია, რომ ივანიშვილს ყველა ის ბერკეტი გამოეცალოს ხელიდან, რომელიც ხელისუფლებაში უკანონოდ დარჩენის საშუალებას მისცემს.
_ ბატონო ბაჩუკი, ცნობილია, რომ 8 მარტის მემორანდუმს 30-მა პარტიამ მოაწერა ხელი, ანუ „ძალა ერთობაშიას“ ყველა წევრი მემორანდუმის მხარდამჭერია?
_ ქაღალდის ჩამოტარების გარდა კომუნიკაციის სხვა წყაროებიც გვაქვს და თანხმობა ყველამ განვაცხადეთ.
_ დამიკონკრეტეთ, ამ მემორანდუმს პარტია „კანონი და სამართალიც“ ეთანხმება, რომელიც „ძალა ერთობაშიას“ წევრია?
_ ეს არ ვიცი, მაგრამ, სიმართლე გითხრათ, თაკო ჩარკვიანისგან ნეგატიური პოზიცია არ მომისმენია. როგორც ვიცი, ოპოზიციაში თაკოს სხვა პრეტენზიები აქვს.
_ მაინც, რა პრეტენზიები?
_ ეს საგარეო პოლიტიკას ეხება და არა _ ამ ნაწილს.
_ თაკო ჩარკვიანი წინააღმდეგია, რომ ოპოზიციამ ერთიან მაჟორიტარებად პრორუსული განწყობების პოლიტიკოსები დაასახელოს.
_ საგარეო პოლიტიკა მეც ამიტომ ვახსენე, თორემ იმ ნაწილში, რომ ოპოზიცია ერთიანი უნდა იყოს, რათა ივანიშვილი დავამარცხოთ, თაკო ჩარკვიანისგან განსხვავებული აზრი არ მომისმენია.
_ ისე, ბატონო ბაჩუკი, დასავლელი პარტნიორები ითხოვდნენ, რომ საარჩევნო სისტემაზე ხელისუფლება და მთელი ოპოზიციური სპექტრი უნდა შეთანხმებულიყო, თუმცა, როგორც აღვნიშნეთ, მემორანდუმს მხოლოდ 30-მა პარტიამ მოაწერა ხელი, ანუ მომცრო პარტიებიც, მაგალითად, „ქრისტიან-დემოკრატები“, ასევე „ტრიბუნა“ თანახმანი იყვნენ, რომ ხელისუფლებასთან ამ სახის შეთანხმება დადებულიყო?
_ ამ პროცესს ყველა პარტია ესწრებოდა.
_ 8 მარტის შეთანხმებას მომცრო პარტიებიც ესწრებოდნენ?
_ ეს არ ვიცი, თუმცა ვერ წარმომიდგენია, რომ ლეიბორისტების ოფისში შეკრებილი მაგიდიდან ვინმეს ამ შეთანხმებაზე უარი ეთქვა.
ისე, თუ ივანიშვილმა დანაპირები ისევ არ შეასრულა, ჩათვალეთ, რომ ეს მემორანდუმი თავზეა გადახეული ცალკე უცხოელებისთვის, ცალკე _ ოპოზიციისთვის და, პირველ რიგში, _ ქართველი ხალხისთვის!
_ 8 მარტის მემორანდუმი, როგორც ვიცი, მხოლოდ მემორანდუმის დონეზე არ უნდა დარჩეს და პარლამენტს საარჩევნო კანონში შესატანი ცვლილებების პაკეტი უნდა წარედგინოს.
_ დიახ, ყველაფერი ეს უნდა დაკანონდეს, თან მხოლოდ 120/30-ისა და პოლიტპატიმრების გარდა, ბევრი სხვა საკითხიცაა.
_ ბლოკებიც ძალაში რჩება, არა?
_ კი ბატონო, თუმცა ბლოკებზე მნიშვნელოვანი სხვა რამეა.
_ ანუ?
_ 30 მაჟორიტარზე კი შევთანხმდით, მაგრამ თუ ივანიშვილი მაჟორიტარული ოლქების ისე „ჩაკერვას“ დაიწყებს, როგორც ხელისუფლებას აწყობს, მაშინ ჩათვალეთ, რომ შეთანხმება არ შემდგარა!
_ ერთი სიტყვით, ბატონო ბაჩუკი, 4 აპრილისთვის დაგეგმილი საპროტესტო აქცია უკვე ანულირებულია და მისი გამართვა დღის წესრიგში აღარ დგას?
_ სანამ ერთიანი გადაწყვეტილება არ იქნება მიღებული, ამ კითხვაზე ვერ გიპასუხებთ, თუმცა, ჩემი აზრით, ერთადერთი მიზეზი, რის გამოც შეიძლება, ეს აქცია გადაიდოს, კორონავირუსის მოსალოდნელი ეპიდემიაა, ანუ თუ ამ მხრივ ვითარება გართულდება, მაშინ შეიძლება, თავი შევიკავოთ, თორემ სხვა მხრივ არ მგონია, ეს აქცია გადაიდოს.
_ ხელისუფლებასთან შეთანხმება მიღწეულია და 4 აპრილს აქცია რომც ჩაატაროთ, რაღას მოითხოვთ ან გააპროტესტებთ?
_ ოპოზიციის მიზანი ბიძინა ივანიშვილის დამარცხებაა და არა _ 120/30.
_ მესმის, მაგრამ ივანიშვილი 4 აპრილს კი არა, არჩევნებზე უნდა დამარცხდეს.
_ ბევრი საკითხია.
_ ანუ?
_ ეს აქცია, რა თქმა უნდა, ტაქტიკის ნაწილი იყო და ძირითადად ჩიხში შესულ მოლაპარაკების პრცესს უკავშირდებოდა. ამასთან, ამ აქციის დატვირთვა ოპოზიციის ერთიანი სტრატეგიაც გახლდათ, ანუ ხალხისთვის ჩვენი უახლოესი სტრატეგია უნდა გაგვეცნო, თუმცა კიდევ ერთხელ გეუბნებით, რომ ჯერ არ ვიცი, აქცია გადაიდება თუ არა. ამის შესახებ გადაწყვეტილებას ერთად მივიღებთ.
_ იქიდან გამომდინარე, რომ ბლოკები რჩება, ხომ არ უნდა ველოდოთ, რომ ლეიბორისტების ოფისში გამართულ მაგიდასთან მსხდომი პარტიები ერთ ბლოკად გამოვიდნენ?
_ ვერაფერს გამოვრიცხავთ. პირადად მე ვისურვებდი, რომ ის პარტიები, რომლებსაც ერთნაირი საგარეო პოლიტიკა აქვთ, ერთად დადგნენ, მემარცხენეები _ ერთად, მემარჯვენეები კი _ ერთად. ეს ბუნებრივი პოლიტიკური პროცესი იქნება, რაშიც რამე განსაკუთრებული არ უნდა დავინახოთ. ყოველ შემთხვევაში, მოცემულობა ისეთია, რომ, საბოლოო ჯამში, ოპოზიცია ხელისუფლებას ამარცხებს!
_ 2016 წლის საპარლამენტო არჩევნებზე „ედპ“ „ნაციონალურ მოძრაობასთან“ იყო დაბლოკებული. ეს სტატუს-კვო შენარჩუნდება?
_ ამის მოშლის წინაპირობა არ დგას.
_ ისე, თუ იცით, ყველაფერ ამაში მიხეილ სააკაშვილის პირადი შტაბი, რომელმაც რამდენიმე დღის წინ დაიწყო მუშაობა, რა ფორმით ჩაერთვება?
_ ეს სრულიად ახალი მიმართულება და ახალი ადამიანები არიან.
_ უკაცრავად, ახალი ადამიანი რომელია _ დიმიტრი შაშკინი თუ გუბაზ სანიკიძე?
_ მიხეილ სააკაშვილი, დიმიტრი შაშკინი და გუბაზ სანიკიძე ერთად ახალია, აბა, რა არის? შტაბში მეც მივდივარ ხოლმე და ვცდილობ, დავეხმარო, თუმცა, ზოგადად, ამ პროცესში, ანუ პოლიტიკის გაჯანსაღებისთვის, ახალგაზრდების ჩართულობა ძალიან მნიშვნელოვანია.
_ ბატონო ბაჩუკი, ასეა თუ ისე, მაინც ვერ გავიგე, რა აძლევს ოპოზიციას იმის გარანტიას, რომ 120 მანდატიდან უმეტესობას მოიპოვებს და 30 მაჟორიტარულ ოლქსაც მოიგებს?
_ რასაც ახლა ვიტყვი, შეიძლება, ცუდი კონტექსტი იყოს, მაგრამ ამის იმედს ის გვაძლევს, რომ ბიძინა ივანიშვილი და მისი პარტია, პრაქტიკულად, უკვე პოლიტიკური გვამია! საზოგადოების მხარდაჭერა არ აქვს და ქართველი ხალხი შიმშილობს! ამიტომ ქვეყანას ცვლილებები სჭირდება. ამ ცვლილებების განხორციელება ყოფილს კი არა, ახალს შეუძლია!
_ ბატონო ბაჩუკი, ძალიან დიდი ბოდიში, მაგრამ ოპოზიციაში ახალი რომელი ხართ _ თქვენ, გიგა ბოკერია, შალვა ნათელაშვილი თუ ნინო ბურჯანაძე?
_ როცა პოლიტიკაში ახალზე ვსაუბრობთ, არასწორი დამოკიდებულებაა. პოლიტიკაში ახალი კონფიგურაცია ბევრად უფრო დიდი ძალისა და ენერგიის მატარებელია, ვიდრე _ ახალი ადამიანი.
_ ეს საკამათო თემაა… სხვათა შორის, ჩემს ხელთ არსებული ინფორმაციით, 8 მარტის მემორანდუმამდე კობახიძე-თალაკვაძეს მხოლოდ „გირჩი“ კი არა, ზემოხსენებული ოპოზიციური მაგიდის სხვა წევრებიც, მათ შორის, „ძალა ერთობაშიას“ წარმომადგენლებიც ხვდებოდნენ, თუმცა ამაზე საჯარო განცხადებები არ გაკეთებულა. ამის შესახებ რამე იცით?
_ საერთოდ, პოლიტიკაში კომუნიკაციას, თუნდაც, მტერთან, კატასტროფად არ მივიჩნევ. ქართველი პოლიტიკოსები კი ერთმანეთის მტრები არ ვართ და ყველას აქვს უფლება, კომუნიკაცია ჰქონდეს, მაგრამ ფარული გარიგებები, ცხადია, უწესობა და არასოწრი საქციელია, თუმცა ამასთან საქმე, მგონი, არ გვქონია.
მოკლედ, ყველას ყველასთან აქვს შეხვედრის უფლება, თუმცა აქვე გეტყვით, რომ მე არავის შევხვედრივარ ან თალკავაძესა და კობახიძეს რაზე უნდა შევხვედროდი? არშეხვედრის მიზეზი მხოლოდ ეს იყო, თორემ თუ შეხვედრა რამე შედეგს მოიტანდა, ხელისუფლებას შესაძლოა, მეც შევხვედროდი.
_ „ოცნებამ“ რომ შეიწყალოს, მაგრამ ირაკლი ოქრუაშვილმა განაცხადოს, სანამ მთლიანად პროპორციული სისტემა არ „დაიდება“, პროტესტის ნიშნად ციხიდან არ გამოვალო, ასეთ შემთხვევაში ოპოზიცია რა გზას დაადგება?
_ მგონია, რომ ირაკლი ოქრუაშვილი ციხიდან რამდენიმე თვეში გამოვა, მაგრამ თუ ისე მოხდა, რასაც თქვენ ამბობთ, მაშინ ვიტყვი, რომ „ჯიგარია“!
ისე, თუ ვამბობთ, რომ ახლა ფრონტის მთავარი ხაზი არჩევნებია, მაშინ ყველანი ამ ხაზს უნდა დავადგეთ, რადგან ახლა დაქსაქსულობის დრო არაა. შეიძლება, განსხვავებები იყოს და არჩევნებში სხვადასხვა პლატფორმებიდან ვიბრძოლოთ, მაგრამ ერთიანი ფრონტის ხაზი მაინც არ უნდა მოიშალოს!
_ ერთი სიტყვით, პოლიტიკური კრიზისი, რომელიც „გავრილოვის სისხლიანი ღამით“ დაიწყო, ამოწურულია?
_ არა!
_ აბა?
_ ხელისუფლებამ „გავრილოვის კრიზისი“ ვერ დაძლია და ყველაფერ ამას საბოლოო წერტილი ოქტომბერში დაესმევა!
_ მოკლედ, ოქტომბერში პოლიტიკური წიწილების დათვლის დრო იქნება, არა?
_ დიახ, თუმცა ვნახოთ, იქამდე რა მოხდება.
_ ე. ი., ელოდებით, რომ პროცესები შეიძლება, დაჩქარდეს და ყველაფერი ოქტომბრამდე შეიცვალოს? ისე, ბოკერიამ, 8 მარტის მემორანდუმი გაფორმდა თუ არა, საუბარი ვადამდელზე დაიწყო. კერძოდ, თქვა, ამ არჩევნებიდან 6 თვის შემდეგ, შესაძლოა, ვადამდელი საპარლამენტო არჩევნები ჩატარდესო. ოპოზიცია ამ ვერსიაზე მსჯელობს?
_ ვერ გეტყვით, რომ ამ თემას სკრუპულოზურად გავდივართ, მაგრამ ფაქტია, რომ ქვეყანაში სრულად პროპორციული არჩევნები ძალიან მალე უნდა ჩატარდეს!
_ ჩემი ინფორმაციით, მემორანდუმის გაფორმების შემდეგ ბოკერიამ ოპოზიციის შიდა ჩატში დაწერა, წავიდეთ და ეს წარმატება აღვნიშნოთო. სად იქეიფეთ?
_ არ მინახავს, ალბათ, რამე გამომეპარა.
_ ეს როგორ უნდა გამოგპარვოდათ?
_ თქვენ გელოდებოდით და ჩატისთვის არ მეცალა!

გიორგი აბაშიძე