მთავარი ინტერვიუ პაატა დავითაია: „ოცნებას“ ოპოზიცია კი არა, თავად „ოცნება“ დაამარცხებს!“

პაატა დავითაია: „ოცნებას“ ოპოზიცია კი არა, თავად „ოცნება“ დაამარცხებს!“

202
0
გაზიარება

„პირველი მარტიდან, „სააკაშვილის საპრეზიდენტო ბიბლიოთეკის“ ბაზაზე, მე ვხსნი ჩემს შტაბს, პირად შტაბს, რომელიც „ნაციონალურ მოძრაობასა“ და სხვა ოპოზიციურ ძალებთან, ახალ ხალხთან ერთად, რომელიც მოდის პარტიების გარეშე, შევქმნათ კიდევ მეტი საფუძველი და დავაჩქაროთ ივანიშვილის რეჟიმის დასასრული და საქართველოს გადარჩენა…
ძალიან ბევრი ადამიანი მიდგას გვერდით, ძალიან დიდი საერთაშორისო მხარდაჭერა აქვს ქართველ ხალხს და მაქვს მე. ყველა ჩემს რესურსს, ყველა ჩემს კონტაქტს ადამიანურს, პოლიტიკურს, ჩემს გამოცდილებას მოვახმარ იმას, რომ ეს უბედურება სწრაფად გადაილახოს. წელს ისინი დასრულდებიან! წელს საქართველო დაიწყებს დაჩოქილი მდგომარეობიდან ადგომას! წელს საქართველოში გათენდება და ქართველი ხალხი აუცილებლად გავა სამშვიდობოზე! დროის ათვლა დაწყებულია, ქართველი ხალხისა და თითოეული ჩვენგანის გამარჯვებამდე!“ _ ეს განცხადება რამდენიმე დღის წინ საქართველოს მესამე პრეზიდენტის, მიხეილ სააკაშვილის „ფეისბუქის“ პირად გვერდზე გამოქვეყნდა.

მიშას ამ ახალ ინიციატივას დიდი აჟიოტაჟი მხოლოდ ოპოზიციაში კი არა, ხელისუფლებაშიც მოყვა. ამასთან, ვითარების დრამატიზებას იმანაც შეუწყო ხელი, რომ ბოლო დროს ყოფილი მმართველი გუნდი ზაზა ბიბილაშვილმა, მარიამ გერსამიამ ნინო კალანდაძემ და ჩიორა თაქთაქიშვილმა დატოვა.
ყველაფერ ამის პარალელურად, პოლიტიკურ კულუარებში გავრცელდა მოსაზრება, რომ ოპოზიციური გაერთიანება „ძალა ერთობაშია“, რომელიც 2018 წლის საპრეზიდენტო არჩევნების წინ შეიქმნა და რომლის „გამწევი ძალაც“ „ნაციონალური მოძრაობაა“, შესაძლოა, დაიშალოს.
იმას, რომ „ძალა ერთობაშიას“ ფორმატმა „თავი ამოწურა“, ამ გაერთიანების ერთ-ერთი წევრი, პოლიტიკური პარტია “ჩვენ თვითონ “ ლიდერი, პაატა დავითაია არ ადასტურებს, თუმცა ჩვენი რესპონდენტი გვეუბნება, რომ „ძალა ერთობაშია“ დიდი ხანია, არ შეკრებილა და გარკვეულ საკითხებთან დაკავშირებით კითხვის ნიშნები აქვს.
ამას გარდა, პაატა დავითაიას იმის შესახებაც ვკითხეთ, არსებობს თუ ალბათობა, რომ „ძალა ერთობაშია“ „ნაციონალებმა“ დატოვონ ან, სულაც, „ნაცმოძრაობას“ თავად სააკაშვილი გაემიჯნოს და წინასაარჩევნოდ ახალი პარტია შექმნას? _ ამ და სხვა საინტერესო თემებზე პაატა დავითაიას მოსაზრებებს წინამდებარე ინტერვიუში გაეცნობით.

_ ბოლო დღეების ერთ-ერთი მთავარი ახალი ამბავი ისაა, რომ საქართველოს მესამე პრეზიდენტი პირად შტაბს ქმნის, რომელიც სააკაშვილის საპრეზიდენტო ბიბლიოთეკაში განთავსდება. ბატონო პაატა, მიხეილ სააკაშვილის ეს გზავნილი თქვენ, როგორც გაერთიანებული ოპოზიცია „ძალა ერთობაშიას“ წევრმა, როგორ გაიგეთ და, საერთოდ, პირადი შტაბი რას ნიშნავს?
_ პირდაპირ რომ გითხრათ, ამ საკითხზე კონსულტაციები არც ერთმანეთში გვქონია და არც _ სააკაშვილთან, თუმცა ის აქტიური ფიგურაა და უფლება აქვს, განცხადებები გააკეთოს. ასევე უფლება აქვს, შტაბიც ჩამოაყალიბოს და იმოქმედოს.
_ კი ბატონო, უფლება კი აქვს, მაგრამ სხვა რამ გკითხეთ, ანუ პირადი შტაბი რას ნიშნავს?
_ ის დიდი საერთო ოპოზიციური ფორმატი, რომელიც ლეიბორისტების ოფისში იკრიბება და რომლის აღმასრულებელი კოორდინატორიც ვარ, დიდი პოლიტიკური მაგიდაა, სადაც აზრების გაცვლა-გამოცვლა მხოლოდ საარჩევნო სისტემასთან დაკავშირებით ხდება. ამ მაგიდაზე ვერავინ იტყვის, სადმე უნდა გადავიდეს თუ გადმოვიდეს, ანუ ეს ფორმატი დარჩება.
_ ოპოზიციის ინტერპარტიული გაერთიანება გასაგებია, მაგრამ იმას გეკითხებით, სააკაშვილის განცხადება „ძალა ერთობაშიას“ წევრებმა როგორ გაიგეთ-მეთქი?
_ დიახ, მივხვდი, მაგრამ ეს იმიტომ გითხარით, რომ დიდი გაერთიანების კოორდინაცია მიწევს.
რაც შეეხება „ძალა ერთობაშიას“, ეს გაერთიანება საკონსულტაციო ფორმატში დიდი ხანია, არ შეკრებილა.
_ რატომ?
_ ყველა საარჩევნო სისტემაზეა გადართული.
მოკლედ, „ძალა ერთობაშიას“ სახელით იმაზე ლაპარაკი, თუ როგორ იქნა სააკაშვილის განცხადება აღქმული, გამიჭირდება, თუმცა ჩემი პოზიციის თქმა შემიძლია.
_ და თქვენი პოზიცია როგორია?
_ როგორც გითხარით, სააკაშვილს სუვერენული უფლება აქვს, ისე იმოქმედოს, როგორც უნდა, თუმცა აქვე, ღიად იმასაც ვიტყვი, რომ „ძალა ერთობაშიას“ ფორმატში ბევრი საკითხია გასარკვევი.
_ ანუ?
_ მინიმუმ, არჩევნებში გასვლასთან დაკავშირებით პირადად მე ძალიან ბევრი კითხვა მაქვს, მაგრამ პასუხები ჯერ არ მიმიღია.
_ მაინც, რა კითხვები გაქვთ, ბატონო პაატა?
_ მაგალითად, როგორი საარჩევნო კამპანია იქნება და რა იურიდიული ფორმით ჩატარდება იგი? ყველაფერი ეს მსჯელობის საგანია, თუმცა ამაზე მსჯელობა, სამწუხაროდ, ჯერ არ გამართულა.
_ არც გაიმართება?
_ გაიმართება. ყოველ შემთხვევაში, ინფორმაცია მაქვს, რომ ამ ფორმატში მსჯელობა, ალბათ, თვის ბოლოს გაიმართება.
_ ე. ი., „ძალა ერთობაშიას“ ფორმატში ერთგვარი გაუგებრობა არსებობს?
_ არა.
_ აბა?
_ ჩვენ დოკუმენტზე გვაქვს ხელი მოწერილი.
_ რა დოკუმენტზე?
_ საპრეზიდენტო არჩევნების წინ, ალბათ, გახსოვთ, ვთქვით, არჩევნებზე ერთიანი საარჩევნო ბლოკით გავალთ და იმ სუბიექტებს, რომლებიც საარჩევნო რეგისტრაციას გაივლიან, შესაძლებლობა ექნებათ, სიის პირველი 30-ეული დააკომპლექტონო. ერთი სიტყვით, ყველაფერი ეს საჯაროდ ითქვა, მაგრამ ეს 2018 წლის საპრეზიდენტო არჩევნების წინ იყო, ახლა კი 2020-ია.
მოკლედ, პირადად ჩემს პოლიტიკურ პარტიას მოქმედების გეგმასთან დაკავშირებით ბევრი კითხვის ნიშანი აქვს.
_ ბატონო პაატა, დამიკონკრეტეთ, ეს კითხვის ნიშნები რატომ გაჩნდა?
_ ახლა 2018 წლის გეგმებით ვერ ვიხელმძღვანელებთ და ამიტომ სამსჯელოა. როგორც ვუყურებ, „ნაციონალურ მოძრაობას“ ერთგვარი ტაიმ-აუტი აქვს აღებული. ყოველ შემთხვევაში, ვხედავთ, რომ ამ პარტიას გარკვეული წევრები ტოვებენ. ამასთან, „ნაციონალური მოძრაობის“ ლიდერი სააკაშვილი შტაბის შექმნაზე განცხადებას აკეთებს. უახლოეს ხანებში, ალბათ, ჩამოყალიბდებიან და ჩვენც, დანარჩენი ოპოზიცია, დავაყენებთ საკითხს, თუ რასთან გვაქვს საქმე.
_ ბატონო პაატა, თქვენი საუბრით ისეთი შთაბეჭდილება მექმნება, რომ ამ ეტაპზე „ძალა ერთობაშიამ“ თავი ამოწურა. ასეა?
_ არა, არა. თავის ამოწურვა რა შუაშია? მე, უბრალოდ, ხაზს ვუსვამ იმას, რომ წელს საარჩევნო წელია და უნდა ვიმსჯელოთ, „ძალა ერთობაშიას“ სტრატეგია როგორი იქნება _ პოლიტიკურ ბლოკზე უნდა ვისაუბროთ, იურიდიულზე თუ საარჩევნო სიაზე? ამასთან, ისიც სამსჯელოა, ამ ფორმატს პრემიერობის კანდიდატი ეყოლება თუ არა.
_ ყველაფერი ეს გასაგებია, მაგრამ მე მაინც ჩემს აზრზე ვრჩები, ანუ მგონია, რომ „ძალა ერთობაშიას“ წევრებს შორის გარკვეული ფარული უთანხმოება არსებობს, რაც სააკორდინაციო საბჭოში ნინო ბურჯანაძის გამოჩენით დაიწყო. ყოველ შემთხვევაში, ეს საბჭო თაკო ჩარკვიანის პარტიამ დატოვა და, მიუხდავად იმისა, რომ „კანონი და სამართალი“ „ძალა ერთობაშიას“ წევრად რჩება, პროდასავლურ ოპოზიციონერებს მოგიწოდათ, ბურჯანაძეს გაემიჯნოთ.
_ საკოორდინაციო საბჭოში დასატოვებელი ან შემოსასვლელი არაფერია, ანუ ეს ჩვეულებრივი მრგვალი მაგიდაა, რომელსაც იურიდიული ფორმატი არ გააჩნია.
_ დიახ, ეს ვიცი.
_ მოკლედ, თაკო ჩარკვიანმა თავისი პოზიცია დააფიქსირა, თუმცა ოპოზიციური პარტიების ყველა საკოორდინაციო მოქმედებაში აქტიურად მონაწილეობს.
_ 5 თებერვლის „სირცხვილის დერეფანში“, რომელიც ოპოზიციამ პარლამენტთან „ოცნების“ დეპუტატებს მოუწყო, როგორც ვიცი, „კანონსა და სამართალს“ მონაწილეობა არ მიუღია.
_ ქალბატონი თაკოს ნაცვლად ვერ ვილაპარაკებ. ამ კონკრეტულ აქციაში მონაწილეობა შეიძლება, იმიტომ არ მიიღო, რომ ქალაქში არ იყო, თუმცა ხაზს ვუსვამ: თაკო ჩარკვიანი „ძალა ერთობაშიას“ წევრია!
_ კეთილი…
_ იმ საკითხებს, რომლებზედაც ახლა ვსაუბრობ, ჩემი მხრიდან ვაყენებ და არა _ სხვისი.
_ ბატონო პაატა, უნდა ჩაგეკითხოთ: თუკი „ნაციონალური მოძრაობა“ იტყვის, რომ „ძალა ერთობაშიას“ პრემიერობის კანდიდატი მისი წარმომადგენელი უნდა იყოს, ამ გაერთიანებაში შემავალი სხვა პარტიებისთვის ეს მისაღები იქნება?
_ ამაზე ახლა ვერაფერს ვიტყვი.
_ რატომ ვერ იტყვით?
_ ამ მიმართულებით ჩემი მოსაზრებები მაქვს, თუმცა თუ ჩემს მოსაზრებებს არ გაითვალისწინებენ, ეს იმის საბაბი არ იქნება, რომ „ძალა ერთობაშია“ დავტოვო.
ერთი სიტყვით, ყველა ის პუნქტი, რომელიც ზემოთ ჩამოვთვალე, მსჯელობის საკითხია, თუმცა ვიმეორებ: ამ საკითხებზე კითხვის ნიშნები მაქვს, მაგრამ ეს იმას არ ნიშნავს, რომ „ძალა ერთობაშია“ დაშლილია. უბრალოდ, ყველაფერი ეს იმას ნიშნავს, რომ ამ საკითხებზე სამსჯელოდ „ძალა ერთობაშია“ არ შეკრებილა.
წეღანაც გითხარით, რომ ჩემი ინფრომაციით, „ძალა ერთობაშია“ თებერვლის ბოლოს შეიკრიბება და ამას სხვა პოლიტიკური დატვირთვაც ექნება.
_ ანუ?
_ ჯერჯერობით არაა გარკვეული, თუ როგორი საარჩევნო სისტემა გვექნება.
_ ბატონო პაატა, დასამალი არავისთვისაა, რომ „ნაციონალური მოძრაობა“ ყველაზე დიდი და გავლენიანი ოპოზიციური პარტიაა. ჰოდა, იმ შემთხვევაში, თუ „ნაციონალები“ „ძალა ერთობაშიას“ დატოვებენ, ამის შემდეგ მოვლენები როგორ განვითარდება, უფრო კონკრეტულად, ამ ოპოზიციური გაერთიანების არსებობას აზრი მაინც ექნება?
_ რატომ არ ექნება?
_ კითხვაზე კითხვით მპასუხობთ?
_ „ძალა ერთობაშია“ „ნაციონალური მოძრაობის“ ირგვლივ არაა შექმნილი, ანუ „ძალა ერთობაშია“ შეიძლება, „ნაციონალურმა მოძრაობამ“ დატოვოს, მაგრამ სხვა პოლიტიკური პარტიები იმსჯელებენ.
_ რაზე?
_ შეიძლება, „ძალა ერთობაშია“ დარჩეს და „ნაციონალური მოძრაობა“ ცალკე იყოს. ისიც შეიძლება, რომ საერთოდ დაიშალოს ან, პირიქით, ერთ პარტიად ან ერთ საარჩევნო ბლოკად ჩამოყალიბდეს.
_ ერთი სიტყვით, ბატონო პაატა, უშვებთ ალბათობას, რომ „ნაციონალურმა მოძრაობამ“ შესაძლოა, „ძალა ერთობაშია“ დატოვოს?
_ ყველაფრის ალბათობას ვუშვებ, მათ შორის, იმ ალბათობასაც, რომ არჩევნებში „ნაციონალური მოძრაობა“ მარტო გავიდეს, თუმცა აქვე ხაზს გავუსვამ, რომ ეს მისთვის კრახი იქნება.
_ კრახი რატომ იქნება?
_ „ნაციონალურმა მოძრაობამ“ საჯაროდ, მთელი საზოგადოების წინაშე, თავის დროზე, ხელი მოაწერა შეთანხმებას, რომ არჩევნებში „ძალა ერთობაშიასთან“ ერთად გავიდოდა და თუ ამ გაერთიანებას დატოვებს, მაშინ ამ შეთანხმებაზე უარის თქმა მოუწევს და ცალსახად გამოჩნდება, რომ პოლიტიკურ ვალდებულებებს არ ასრულებს. ამიტომ ეჭვი მეპარება, რომ ეს ნაბიჯი გადადგას!
_ ბოლო დროს „ნაციონალური მოძრაბა“ რამდენიმე ადამიანმა დატოვა. მნიშვნელოვანია, რომ ყველა ეს ადამიანი სააკაშვილთან დაახლოებულად მიიჩნევა. მეტიც, მას შემდეგ, რაც თქვა, პროპორციული არჩევნები „ნაცმოძრაობის“ მონაპოვარიაო, გრიგოლ ვაშაძე თინა ბოკუჩავამაც გააკრიტიკა, რომელიც ყოფილ ხელისუფლებაში ასევე სააკაშვილის ფრთის წარმომადგენლად ითვლება. ერთი სიტყვით, საქმე იქითკენ ხომ არ მიდის, რომ წინასაარჩევნოდ „ნაცმოძრაობას“ თავად მიშა გაემიჯნოს და ახალი პარტია შექმნას?
_ სიმართლე რომ გითხრათ, ამაზე ლაპარაკი მიჭირს.
_ თქვენ ხომ დიდი პოლიტიკური გამოცდილება გაქვთ და ლაპარაკი რატომ გიჭირთ?
_ „ნაციონალური მოძრაობის“ შიდაპარტიულ საქმეებში ვერ ჩავიხედავ, მაგრამ როგორც ვიცი, იქ ერთპიროვნული მმართველობა არ არის, ანუ ყველას თავისი აზრი აქვს. ადრე კი, სანამ „ევროპული საქართველო“ გამოეყოფოდა, „ნაციონალურ მოძრაობაში“ მონოლითური სისტემა იყო და პროგნოზირებაც ადვილად შეიძლებოდა. ახლა კი მათი მოქმედებების პროგნოზირება ძნელია _ სააკაშვილი საზღვარგარეთაა, აქ მყოფი რამდენიმე ლიდერი კი სხვადასხვა განცხადებას აკეთებს. ყველაფერ აქედან გამომდინარე, პროგნოზირება მიჭირს.
_ კულუარებში არავინ მალავს, რომ „ნაციონალურ მოძრაობაში“ ერთ-ერთი ყველაზე გავლენიანი ნიკა მელიას ფრთაა, რომელსაც პარტიის ახალგაზრდული ორგანიზაციის გარდა, როგორც ამბობენ, თქვენც უჭერთ მხარს და ედპ-ს ლიდრი ბაჩუკი ქარდავაც, რომელიც ასევე „ძალა ერთობაშიას“ წევრია. ამაზე რას მეტყვით?
_ დიდი მადლობა ამ კითხვისთვის.
_ მადლობას რატომ მიხდით?
_ ცალსახად ვაცხადებ: „ნაციონალური მოძრაობის“ შიდა ფრთების დაპირისპირებაში ჩემი მონაწილეობა აბსოლუტურად გამორიცხულია! მადლობასაც ამ კითხვისთვის იმიტომ გიხდით, რომ ეს არაწორი ინფორმაციაა და არავის მხარეს არ ვარ, რადგან მე ჩემი პოლიტიკური პარტია მაქვს და მისი პოლიტიკური ინტერესებიდან ვმოქმედებ!
მეტიც: თუ ჩემი და „ნაციონალური მოძრაობის“ ინტერესები არ დაემთხვა, საარჩევნო ბლოკში ერთად ყოფნის პერსპექტივასაც ვერ ვხედავ, მიუხედავად იმისა, რომ 2018 წლის შეთანხმებაზე მეც მოვაწერე ხელი.
საერთოდ, პოლიტიკა ინტერესთა თანხვედრაა. ამჯერად, ჩემი ინტერესია, რომ ძლიერი ოპოზიციური ერთობა არსებობდეს, რომელიც ხელისუფლებაში მოვა და „ქართულ ოცნებას“ შეცვლის!
თუ ასე არ იქნება, ანუ დაიქსაქსებიან და ვინმე პოლიტიკურ თამაშს ითამაშებს, პირდაპირ გეუბნებით: ამაზე ლაპარაკს ღიად დავიწყებ, ასევე სახელებსა და გვარებსაც ღიად დავასახელებ. ვინც ასეთ თამაშს ითამაშებს, ეს ივანიშვილის წისქვილზე დასხმული წყალი იქნება!
იმის თქმა, რომ რომელიმე პოლიტიკური ძალა „ქართულ ოცნებას“ არჩევნებს მარტო მოუგებს, აბსურდია! თუ ვინმე ამას ამბობს, ე. ი. დიდი ოპოზიციური გაერთიანების დაშლაზე მუშაობს!
მოკლედ, „ნაციონალური მოძრაობის“ რომელიმე ფრთის გაძლიერება არ მაინტერესებს. სამაგიეროდ, მაინტერსებს: „ნაციონალური მოძრაობა“, რომელმაც ზემოხსენებულ დოკუმენტს ხელი მოაწერა, პირობას შეასრულებს თუ სხვა გზით დაიწყებს სიარულს?!
_ სხვათა შორის, ოპოზიციაში გარკვეული უკმაყოფილება იმასაც მოყვა, რომ ბურჯანაძის მოსკოვურ ვიზიტზე მხოლოდ თქვენ იცოდით.
_ ეს უკმაყოფილება არ იყო.
_ აბა, რა იყო?
_ დიახ, გიდასტურებთ, რომ ბურჯანაძის მოსკოვში ვიზიტთან დაკავშირებით ვიცოდი.
_ ჰოდა, საკორდინაციო საბჭოს წევრებს, როგორც ვიცი, სწორედ ეს კითხვა ჰქონდათ, დავითაიამ რატომ იცოდაო?
_ ეს მარტივია: როგორც ოპოზიციური ერთობის კოორდინატორი, ქალბატონმა ნინომ საქმის კურსში ჩამაყენა, რომ მოსკოვში მიდიოდა.
აქვე ხაზს ვუსვამ: უფლება არ მაქვს, ვინმეს ვუთხრა, სადმე წავიდეს თუ არა. ამ მაგიდასთან მჯდომ ყველა პოლიტიკურ სუბიექტს თავისი აზრი და მოქმედების გეგმა აქვს. ეს მაგიდა საარჩევნო თემის გარშემოა შეკრებილი. დანარჩენ თემაში კი ყველა სუვერენულია. მოკლედ, ქალბატონმა ნინომ ინფორმაცია მომაწოდა და რა უნდა მექნა, ხომ არ ვეტყოდი, არ უნდა წახვიდეთ ან უნდა წახვიდეთ-მეთქი?
_ ისე, ბატონო პაატა, როგორც ოპოზიციური ე. წ. მაგიდის კოორდინატორი, ხომ არ ფიქრობთ, რომ „ანტიქოცებმა“ შეცდომა დაუშვით, როცა ერთგვარი შვებულება აიღეთ და მთელი იანვარი ისე გავიდა, რომ ერთი საპროტესტო აქციაც არ გამართეთ?
_ ეს სწორი კითხვაა.
_ ჰოდა, მიპასუხეთ: „შვებულებამ“ პროტესტი ხომ არ ჩააქრო?
_ პოლიტიკა ორივეს გვესმის და, მოდით, ვთქვათ, რომ ამ ტაიმ-აუტს ორი მიზეზი ჰქონდა: პირველი ის, რომ საახალწლოდ პოლიტიკურ ან რამე სხვა თემაზე აქტიურობა არავის უნდა.
მეორეც: ოპოზიციის ინტერპარტიული მაგიდა საარჩევნო სისტემასთან დაკავშირებითაა შექმნილი. ამ ფორმატში მოლაპარაკების რამდენიმე რაუნდი გაიმართა და საამისოდ სერიოზული ზეწოლა იყო გამოყენებული. არ ვიცით, ამ მოლაპარაკების მეხუთე რაუნდი როდის დაინიშნება. მოკლედ, მოქმედების სტრატეგია ყველასთან შეჯერებულია, ანუ როგორ ვიმოქმედებთ იმ შემთხვევაში, თუ ეს მოლაპარაკებები უსასრულოდ გაგრძელდა ან თუ მოლაპარაკების მეხუთე რაუნდი ჩაიშალა.
_ სამოქმედო გეგმა გასაგებია, მაგრამ დამეთანხმეთ, რომ იგივე საარჩევნო სისტემასთან დაკავშირებით საზოგადოებას ისეთი მძფარი პროტესტი აღარ აქვს, როგორიც პირველ ეტაპზე ჰქონდა.
_ ვერ დაგეთანხმებით. უფრო სწორად, საზოგადოებას საარჩევნო სისტემა შესაძლოა, დიდად არც ადარდებდეს. ამას გარდა, თავისი პლუსები და მინუსები მხოლოდ მაჟორიტარულს კი არა, პროპორციულ სისტემასაც აქვს.
_ უკაცრავად, სხვა რამ გკითხეთ და ეს რა შუაშია?
_ საზოგადოება იმაზე აღშფოთდა, რომ „გადააგდეს“. ბოლოს და ბოლოს, ე. წ. პრეზიდენტი გაეროს ტრიბუნაზე გამოვიდა და განაცხადა, საქართველო პროპორციულ საარჩევნო სისტემაზე გადადისო.
მოკლედ, ხალხის აღშფოთება სწორედ ამ „გადაგდებას“ მოყვა და თუ ვინმეს ჰგონია, რომ ეს აღშფოთება სადმე წავიდა, ძალიან ცდება!
სხვათა შორის, საქართველოში პოლიტიკური კულტურა გაზრდილია და ყველას ესმის, რომ ხელისუფლება რევოლუციით არ შეიცვლება. უბრალოდ, გარკვეული ჯგუფები აქტიურ პროტესტს გამოხატავენ, მაგრამ, საბოლოოდ, ყველაფერი ეს ხმებში აკუმულირდება.
ისე, იმ ხნის განმავლობაში, რაც საჯარო პოლიტიკაში ვარ, აქციების ჩავარდნა ბევრჯერ მინახავს. ზოგადად, არ შეიძლება, რომ აქცია ყოველთვის პიკზე იყოს: ზოგჯერ ქვევით მიდის, ზოგჯერ _ ზევით, მაგრამ, საბოლოო ჯამში, ეს საპროტესტო მუხტი არსად ქრება.
_ კი ბატონო, გეთანხმებით, მაგრამ იმისთვის, რომ ეს საპროტესტო მუხტი აფეთქდეს, ერთგვარი მოტივაციაა საჭირო.
_ ეს მუხტი შეიძლება, ისეთმა თემამ ააფეთქოს, რომლისგანაც აფეთქებას არავინ ელოდება. აი, მაგალითად, „გავრილოვის ღამემდე“ არაფერი ხდებოდა, მაგრამ ერთ დღეში ვნახეთ, როგორი აფეთქებაც მოხდა, ანუ პროტესტი დაგროვილი იყო და „გავრილოვის ღამემ“, უბრალოდ, დეტონატორის ფუნქცია შეასრულა!
ახლაც ზუსტად იგივე ხდება _ საარჩევნო „გადაგდება“ თუ კონგრესმენების წერილები გროვდება და აუცილებლად იფეთქებს!
_ ე. ი., ბატონო პაატა, გგონიათ, რომ წლევანდელი არჩევნები „ოცნებისთვის“ კრახით დასრულდება?
_ ძალიან სწორად დასმული შეკითხვაა, რომელზედაც პასუხის გაცემა ორი მხრიდან შეიძლება.
_ რას გულისხმობთ?
_ არჩევნები „ოცნებისთვის“ კრახით იმ შემთხვევაში დასრულდება, თუ ოპოზიცია ერთიანი იქნება, მაგრამ თუ ოპოზიცია დაიქსაქსება, მაშინ ეჭვი მეპარება, რომ „ოცნებამ“ არჩევნები კრახით დაასრულოს, თუმცა ისეთ „ჩეპეებსაც“ არ გამოვრიცხავ, როგორიც მაგალითად, „გავრილოვის ღამე“ იყო. „გავრილოვის ღამე“ თავად „ოცნებამ“ მოაწყო, როცა გავრილოვის დაცვა დაიწყო. ახლაც არ გამოვრიცხავ, ისეთი რამ გააკეთოს, რომ ოპოზიცია კი არა, მთელი ხალხი ჭკუიდან გადავიდეს!
_ სხვათა შორის, მაისში თბილისს შესაძლოა, ლავროვი ესტუმროს და „დეტონატორის“ როლს, დიდი ალბათობით, ეს ვიზიტი შეასრულებს, არა?
_ დიახ, შეიძლება. მოკლედ, „ოცნებას“ ოპოზიცია კი არა, თავად „ოცნება“ დაასრულებს, თუმცა ოპოზიციის ერთიანობაზეც ბევრია დამოკიდებული!

გიორგი აბაშიძე

დატოვეთ კომენტარი