მთავარი ინტერვიუ მიხეილ რამიშვილი დიდ მხილებას იწყებს!

მიხეილ რამიშვილი დიდ მხილებას იწყებს!

469
0
გაზიარება

ძალადობის მსხვერპლის, 15 წლის ლუკა სირაძის ტრაგედიამ მთელი საქართველო შეძრა. მართალია, „ოცნების“ „ტროლების ქარხანა“, რომელიც უკვე დახურულია, შეეცადა, მომხდარში სისტემა კი არა, „მწვანე სკოლა“ დაედანაშაულებინა, მაგრამ ამ პროპაგანდამ საზოგადოებაზე ვერ იმუშავა და ყველა _ დიდი თუ პატარა _ ერთხმად აღიარებს, რომ მოზარდი სწორედ სისტემამ მოკლა.
ზოგადად, ძალოვანი უწყებები სამოთხის ფილიალი რომ არ არის, ამაზე კამათი არ ღირს, მაგრამ ის, რაც ბოლო დროს ქართულ პოლიციაში ხდება, ნამდვილად საგანგაშოა, ანუ ლუკა სირაძე ერთადერთი არ ყოფილა, ვისზეც ფორმიანები ძალადობდნენ. ასე, მაგალითად, გვახსოვს დემურ სტურუას შემთხვევა, როცა ახალგაზრდა მამაკაცმა თავი მოიკლა და წერილში, რომელიც თვითმკვლელობამდე დატოვა, პირდაპირ წერდა, რომ პოლიციის ერთ-ერთი თანამშრომელი მის „დავერბოვკებას“ ცდილობდა. სტურუამ, სავარაუდოდ, სწორედ ამის გამო მოიკლა თავი!

სხვათა შორის, ადვოკატი მიხეილ რამიშვილი „ქრონიკა+“-სთან საუბრისას არ გამორიცხავს, რომ დეტექტივ-გამომძიებელი მარიანა ჩოლოიანიც 15 წლის მოზარდ ლუკა სირაძეზე სწორედ მისი „გადაბირების“ მიზნით ახდენდა ზეწოლას, ანუ ცდილობდა, რომ ბავშვი ე. წ. უნომრო აგენტად ექცია და მისი დახმარებით სხვადასხვა ინფორმაცია მიეღო.
ადვოკატ რამიშვილის ეს მოსაზრება ირეალური სულაც არ არის, რადგან ყველამ ვიცით, რომ სხვადასხვა სახელმწიფო უწყებას, განსაკუთრებით, პოლიციას ასეთი „უნომრო აგენტების“ მთელი არმია ჰყავს.
„ეს ჩეკისტური მეთოდია“, _ აცხადებს მიხეილ რამიშვილი და იმასაც გვეუბნება, რომ მისთვის, როგორც ადვოკატისთვის, არაერთი ისეთი ფაქტის შესახებაა ცნობილი, როცა კონკრეტული ადამიანის სიცოცხლე ძალოვნებმა შეიწირეს, მაგრამ ამაზე მედიასა და საზოგადოებისთვის ცნობილი არ არის, რადგან გარდაცვლილთა ახლობლები ტრაგიკული ფაქტების გახმაურებას შიშის ან იმის გამო ერიდებიან, რომ იმედოვნებენ, სიმართლეს სასამართლოში მაინც იპოვიან.

მოკლედ, ბრუნდება თუ არა საქართველოში შავბნელი 90-იანები? დანაშაულის შემთხვევაში უნდა შევატყობინოთ თუ არა პოლიციას? და რა ახალი სკანდალური მასალები გასაჯაროვდება უახლოეს მომავალში საპატრიარქოზე? _ ყველაფერ ამაზე „ქრონიკა+“ ადვოკატ მიხეილ რამიშვილს ესაუბრა:

_ ბატონო მიხეილ, ძალადობამ, როგორც იტყვიან, წაგვლეკა _ დაჭრა, ძარცვა თუ ყაჩაღობა ყოველდღიურობად იქცა. 90-იან წლებში ვბრუნდებით?
_ კი არ ვბრუნდებით, 90-იანებს, მგონი, გადავასწარით!
_ დამისაბუთეთ, ამას რატომ ამბობთ?
_ მაშინ ძალიან დიდი ძალადობა არსებობდა და ყველასთვის ნათელია, როგორი დაპირისპირებები და მკვლელობები ხდებოდა, თუმცა ყველაფერ ამას მინიმიმალურად მაინც რაღაც არეგულირებდა. ახლა კი ეს ძალადობა აღარაფრით რეგულირდება, ანუ პირადად მე არაჯანსაღი სისტემის შეცვლის პროცესს ვერ ვხედავ.
_ ძნელია, არ დაგეთანხმოთ. ამასთან, ისიც ვაღიაროთ, რომ ცალკეული გადაცდომების მიუხედავად, „ვარდების რევოლუციის“ შემდეგ, სახელმწიფო სტრუქტურების მშენებლობა დაიწყო და ადამიანებს პოლიციის იმედი ჰქონდათ. დღეს კი ისე გამოდის, რომ პოლიცია ერთგვარი „მგლის ხახაა“, ანუ ძალოვანი უწყება დამნაშავეებს კი არ ებრძვის, არამედ დანაშაულს თავად სჩადის და ეს 15 წლის ლუკა სირაძის ტრაგედიამაც ნათელყო.
_ დიახ, სამწუხაროდ, ასეა. შევარდნაძის დროს პოლიციაში კატასტროფები ხდებოდა და მაშინ მაღალჩინოსანმა პოლიციელებმა არაეთი ძალადობრივი დანაშაული ჩაიდინეს. „ვარდების რევოლუციის“ შემდეგ რეფორმა დაიწყო და ყველაფერი ეს, გარკვეულად, გაკონტროლდა, თუმცა ეს რეფორმა ბოლომდე წარმატებული არ გამოდგა.
_ რატომ?
_ სხვა დროსაც მითქვამს და ახლაც გავიმეორებ: ყველაფერს კადრები წყვეტს, ანუ სისტემა ზუსტად ისე იმოქმედებს, როგორი ადამიანებითაც იქნება იგი დაკომპლექტებული. წინა ხელისუფლების შეცვლა სისტემაში მყოფმა არაჯანსაღი პიროვნებების ყოფნამ გამოიწვია და ახლაც იგივე ხდება _ რეფორმის საფუძველი არ არსებობს და ყველაფერი უარესობისკენ მიდის!
_ არავინ უარყოფს, რომ სააკაშვილის ხელისუფლების დასასრული სანდრო გირგვლიანის ამბით დაიწყო, თუმცა მაშინ იმის პრეცედენტი არ ყოფილა, რომ პოლიციას ადამიანი, „საქმის გარჩევის“ მიზნით, კრიმინალებისთვის მიეყვანა. ამასთან, იმ ყბადაღებული 9 წლის განმავლობაში პოლიციის ზეწოლის გამო, მგონი, თავიც არავის მოუკლავს. ახლა კი ყველაფერი ეს ჩვეულებრივი მოვლენაა. მეთანხმებით?
_ დიახ, ნიკა სირაძისა თუ დემურ სტურუას ფაქტები ჩვენთვის მედიის დახმარებით გახდა ცნობილი, თუმცა მიჩუმათებული ფაქტებიც არსებობს.
_ ამას რის საფუძველზე ამბობთ?
_ ჩემი პროფესიიდან გამომდინარე, ბევრი კავშირი მაქვს და, მაგალითად, გარდაბანში, მარნეულსა თუ ახალციხეში არიან პირები, რომლებიც პირდაპირ პოლიციის მაღალჩინოსნებს ადებენ ხელს და ამბობენ, რომ მათ გამო ადამიანის სიცოცხლე ფატალურად დამთავრდა, მაგრამ ეს ფაქტები ცნობილი არც მედიისთვისაა და არც _ საზოგადოებისთვის.
_ თუ კონკრეტულმა პიროვნებებმა იციან, რომ პოლიციელების უკანონო ქმედების გამო ვინმე გარდაიცვალა, ამის შესახებ ხმამაღლა რატომ არ საუბრობენ, ეშინიათ?
_ კი, შიშის ქვეშ არიან და ფიქრობენ, რომ იქნებ, სამართალს სასამართლოს გზით მიაღწიონ.
იმაზე მეტი სიბინძურე რაღა უნდა იყოს, რომ წინა ხელისუფლების დროს პოლიციელების მხრიდან გარკვეული სექსუალური ძალადობა ხდებოდა და ახლაც ანალოგიური მეორდება. ასეთი ფაქტი მოხდა სამეგრელოში და ის პოლიციელი დააკავეს, მაგრამ ვერავინ დამარწმუნებს, რომ ასეთები ერთეულები არიან!
ღირსეული ადამიანები პოლიციასა და სხვა სისტემაშიც მუშაობენ, მაგრამ ეს ადამიანები ჩუმად არიან. უღირსები და ნეპოტიზმით დანიშნულები კი, რომლებიც გარკვეული ძალების ინტერესებს ატარებენ, ბოგინობენ!
აი, ხომ ვნახეთ, რომ ასეთი კადრების მოქმედებას 15 წლის არასრულწლოვნის სიცოცხლე ემსხვერპლა!
მოკლედ, ნიკა სირაძის ტრაგედიის გარდა სხვა ფაქტებიც არსებობს, რომელიც წინა ხელისუფლებისგან არაფრით განსხვავდება. განსხვავება მხოლოდ ისაა, რომ მაშინ რეფორმა დაიწყო, მაგრამ არ დასრულდა, ყველა ამორალური და უზნეო ქმედების კლონირება მოხდა და ყველაფერი ეს ახლა სახელმწიფო პოლიტიკას ემსახურება!
_ ყველაფერ აქედან გამომდინარე, არ მიკვირს, რამდენიმე დღის წინ, პოლიციის დიღმის სამმართველოსთან გამართულ აქციაში რატომაც მიიღეთ მონაწილეობა, მაგრამ მაინც ჩაგეკითხებით: რას აპროტესტებდით _ იმას, რომ მომხდარის შესახებ, ანუ კედლებზე უხამსი წარწერების გაკეთების გამო „მწვანე სკოლას“ პოლიციისთვის არ უნდა მიემართა და, როგორც „ქოცტროლები“ ამბობენ, ლუკა სირაძეს „კაცურად“ უნდა დალაპარაკებოდა თუ იმას, რომ პოლიციას მოზარდი თვითმკვლელობამდე არ უნდა მიეყვანა?
_ არსებობს სამართლებრივი სტანდარტები, რაზედაც, გინდა თუ არა, რეაგირება უნდა მოახდინო. აი, მაგალითად, 112-ით სასწრაფო რომ გამოიძახოთ და რამდენიც უნდა ამტკიცოთ, ხელი მე თვითონ გავიჭერი ან თავში რამე მომხვდაო, ექიმები ვალდებული არიან, სამართალდამცველებს შეატყობინონ.
არ ვიცი, წარწერის _ „ამ ცხოვრების დედაც“ _ გარდა სკოლაში რამე ისეთი კიდევ იყო თუ არა, მაგრამ აქ მთავარი ერთი რამეა.
_ რა?
_ გასაგებია, რომ სკოლამ პოლიციას მიმართა და იმასაც ამბობენ, რომ ადმინისტრაციამ ბავშვებს თითქოს ჩვენებების მიცემა აიძულა, მაგრამ სამართალდამცველების მოვალეობა სწორედ ისაა, რომ ყველაფერი გაარკვიონ და ადმინისტრაციას პასუხი მოსთხოვონ, მაგრამ ესენი პირიქით მოიქცნენ და მათი ქმედება ყველანაირი სამართლებრივი ჩარჩოდან გავიდა, თან საქმე არასრუწლოვნებს ეხებოდა.
ცხადია, არ ვამბობ, რომ სრულწლოვანთა უფლებები უნდა დაირღვეს. მოკლედ, ჩემი პროტესტი სწორედ იმას ემსახურება, რომ სამართალდამცველი ორგანოები სამართალდამრღვევები არ უნდა იყვნენ და პოლიციის გამოძახება „მგლის ხახაში თავის ჩადებას“ არ უნდა ნიშნავდეს!
_ და ნიშნავს?
_ დიახ, ნიშნავს, ანუ ის ნდობა, რაც პოლიციას ჰქონდა, ახლა, გარკვეულწილად, დაკარგული აქვს და ჩვენი პროტესტიც სწორედ ამას ემსახურება, რომ ეს მანკიერი და დანაშაულის ჩამდენი ნებისმიერი პიროვნება კარგად შეფასდეს და მისი წარსულიდან გამომდინარე გადაწყდეს, მას სამართალდამცველ ორგანოებში დარჩენის უფლება უნდა ჰქონდეს თუ არა!
მოკლედ, სისტემა უნდა დაინგრეს!
_ კი ბატონო, სისტემა უნდა დაინგრეს და ჩვენ, ყველანი, ამას აუცილებლად შევძლებთ, მაგრამ, ბატონო მიხეილ, როგორც იურისტს, ჩაგეკითხებით: როცა დანაშაული ხდება, მისი სიმძიმის მიუხედავად, პოლიციას უნდა მივმართოთ თუ არა?
შეიძლება, ვცდები, მაგრამ მეჩვენება, რომ ხელისუფლების მხარდამჭერები ასეთი აზრის კულტივირებას ეწევიან, _ ჯობია, დანაშაული „კაი ბიჭებმა“ გაარჩიონო.
_ რას ნიშნავს, „საქმე კაი ბიჭებმა გაარჩიონ“? ასეთი მიდგომა არ შეიძლება! „კაი ბიჭების მიერ საქმის გარჩევა“ მომავალი თაობის ფსიქიკას მენტალურად ანგრევს და შესაბამისად, ახალგაზრდები კანონმორჩილები კი არა, კანონდამრღვევები ხდებიან!
_ ე. ი., „მწვანე სკოლის“ ადმინისტრაცია კარგად მოიქცა, როცა კედლებზე გაკეთებული წარწერების გამო პოლიციას მიმართა, არა?
_ არ ვიცი, სკოლამ რა ჩათვალა, მაგრამ, ალბათ, ისეთი ნიშნები არსებობდა, რომლითაც მისი ნაბიჯი არ კნინდება, ანუ რადგან პოლიციას მიმართა, ეს არ ნიშნავს, რომ სკოლამ რამე დაარღვია.
_ საერთოდ, პოლიციაში ადამიანებზე, მით უმეტეს, მოზარდებზე რატომ ძალადობენ? ამით ძალოვნები რის დემონსტრირებას ცდილობენ?
_ იცით, ეს რა არის?
_ რა?
_ პროვინციალიზმი და ძალიან დაბალი აზროვნება, ანუ ძალოვანი უწყების წარმომადგენლები ცდილობენ, რომ ხალხს ძალა დაანახონ და შიში დათესონ. ეს კომუნისტების მეთოდია და „ჩეკას“ დროიდან მოდის _ უნდათ, რომ აგენტები ჰყავდეთ და ნებისმიერი საქმე მათი დახმარებით გახსნან. მაშინ ადამიანების „დასავერბოვკებლად“ ძალიან ბევრ მეთოდს იყენებდნენ და ახლაც იმის მცდელობაა, რომ უნომრო აგენტების მთელი ჯარი შექმნან! არასრუწლოვნები კი ყველაზე იოლად გადასაბირებლები არიან!
მოკლედ, აგენტები იმისთვის სჭირდებათ, რომ ყველაფერი „გაიპრავონ“!
_ ანუ, ბატონო მიხეილ, არ გამორიცხავთ, რომ დეტექტივ-გამომძიებელი მარიანა ჩოლოიანი 15 წლის ლუკა სირაძის „დავერბოვკებას“ ცდილობდა და მასზე ზეწოლაც ამიტომ მოახდინა?
_ დიახ, არ გამოვრიცხავ. ამით ორ კურდღელს დაიჭერდნენ.
_ კერძოდ?
_ ჯერ ერთი, სკოლას, მოსწავლეებსა და მათ მშობლებს დაანახვებდნენ, რა დიდი ძალა აქვთ და ნებისმიერ ე. წ. დარღვევაზე რეაგირება ექნებათ; მეორეც: ვითომ კონკრეტულ „დანაშაულსაც“ გახსნიდნენ.
ამ ქმედებამ და მეთოდმა, რომ აგენტი გახდეს, შეიძლება, ბევრზე ვერ გაჭრას, მაგრამ ამ შემთხვევაში, ყველაფერი ეს, ალბათ, სწორედ ამას ემსახურებოდა. ბოლოს და ბოლოს, ვიცით, რომ ერთმანეთს ბავშვები დააპირისპირეს, რაც 2010 წლიდან, საპროცესო კოდექსით, აკრძალულია!
დიახ, დაპირისპირება ჩეკისტური ქმედებაა, რასაც პოლიციაში მყოფი გარკვეული ჯგუფი ინერციით იყენებს!
_ თქვენი შეფასებით, ლუკას ტრაგედიაში დამნაშავე მხოლოდ ჩოლოიანია?
_ არა, ეს გამორიცხულია! ეს ვერტიკალია.
_ ანუ?
_ კანონითაც რომ მივყვეთ, რიგითი პროკურორი გადაწყვეტილებას ზემდგომთან შეუთანხმებლად ვერ მიიღებს და იმასაც ვერ გადაწყვეტს, ვინმეს ბრალი წაუყენოს თუ არა, ანუ ყველაფერი ხელმძღვანელობასთან თანხმდება!
სწორედ ასეა პოლიციაშიც _ ნებისმიერი გამომძიებელი ან ოპერმუშაკი, თუ ხელმძღვანელობა საქმის კურსში არაა, ვერანაირ ქმედებას ვერ განახორციელებს!
სხვათა შორის, არაეთმა პირმა ამ კონკრეტულ გამომძიებელზე თქვა, რომ წარსულში მასზე ზეწოლას ახდენდა და ამ არასრულწლოვნის შემთხვევაშიც ასე იქნებოდა, თუმცა ამაში მხოლოდ ჩოლოიანი არ იქნება მონაწილე. ის, უბრალოდ, უკანონო ბრძანების უკანონო შემსრულებელია და შესაბამისად, ორივე _ ბრძანების გამცემიც უნდა დაისაჯოს და შემსრულებელიც!
_ ლუკა სირაძის გარდაცვალების გამო უნდა დადგეს თუ არა შს მინისტრის პოლიტიური პასუხისმგებლობის საკითხი, ანუ გომელაურმა თანამდებობა უნდა დატოვოს თუ არა?
_ ცივილიზებულ ქვეყნებში ასეთი ფაქტების დროს ბევრი შს მინისტრი გადამდგარა და სხვა მაღალჩინოსნების პასუხისმგებლობის საკითხიც დამდგარა.
_ ვიცი, მაგრამ ჩვენ ხომ ცივილიზებული ქვეყანა არ ვართ?
_ დიახ და რადგან ჩვენთან სისტემა ძირმომპალია, ასეთი რეაგირება, ალბათ, არ მოხდება!
_ სხვათა შორის, გარდა იმისა, რომ ბრალს არ აღიარებს, ბრალი თვითმკვლელობამდე მიყვანის კი არა, ჩვენების გამოძალვის მუხლით წაუყენეს, რაც შედარებით მსუბუქი დანშაულია და, როგორც ვიცი, სამ წლამდე პატიმრობას ითვალისწინებს, ანუ სისტემა ჩოლოიანს იცავს?
_ ძალიან ბევრი დანაშაულის ნიშანი იკვეთება.
_ კერძოდ?
_ მაგალითად, იძულება, სასტიკი მოქცევა, სამსახურებრივი უფლებამოსილების გადამეტება და გულგრილობა, ანუ სასჯელის შეკრებითობის პრინციპი ისევ რომ არსებობდეს, საკმაოდ დიდი სასჯელი დაეკისრებოდა, მაგრამ ახლა შთანთქმის პრინციპი არსებობს _ უფრი დიდი დანაშაული პატარას შთანთქავს.
_ ეს გასაგებია, მაგრამ ჩოლოიანს, როგორც აღვნიშნე, შედარებით მსუბუქი მუხლით წაუყენეს ბრალი.
_ პრაქტიკად აქციეს _ როცა დადგენილი არ არის, ადამიანი ბუნებრივი სიკვდილით გარდაიცვალა, მოკლეს თუ თავი მოიკლა, გამოძიებას თვითმკვლელობამდე მიყვანის მუხლით იწყებენ. ამიტომ არ გამოვრიცხავ, რომ დროთა განმავლობაში, ანუ გამოძიების პროცესში, უფრო ნათლად გამოჩნდეს, რა დანაშაული მოხდა! შესაბამისად, მხოლოდ ამ გამომძიებლის კი არა, შეიძლება მისი ხელმძღვანელობის პასუხისგებაც დადგეს, თუმცა ჩოლოიანი ყოველთვის იტყვის, რომ უდანაშაულოა. სხვათა შორის, ჯერ კიდევ მაშინ, როცა მოზარდი ცოცხალი იყო, „იმედზე“ სიუჟეტი გავიდა, რომელიც საზოგადოების მოტყუებას ემსახურებოდა, მაგრამ ამან არ გაამართლა!
_ არ მგონია, ჩოლოიანს ბრალი დაუმძიმონ, რამეთუ საპატრიარქომ, კერძოდ, ანდრია ჯაღმაიძემ, განაცხადა, დედასთან საუბრით შემექმნა შთაბეჭდილება, რომ ლუკა სირაძე მე-9 სართულიდან კი არ გადმოხტა, არამედ გადმოვარდაო, ანუ რაკი ხელისუფლებამ სისტემის დაცვა ვერ შეძლო, დასახმარებლად საპატრიარქოს უხმო?
_ დიახ, ამას არ გამოვრიცხავ. ყველაფერს თავი რომ დავანებოთ, იგივე „ციანიდის საქმეში“ საპატრიარქო და ძალოვანი უწყებები _ გოგაშვილები და სხვები, შეხმატკბილებულად მოქმედებდნენ.
ისე, ჯობია, ჯაღმაიძემ თავის საქმეს მიხედოს და შეფასებას ნუ აკეთებს _ ადამიანი შემთხვევით გადმოვარდა თუ თვითმკვლელობამდე მიიყვანეს. ერთიც კარგად გაიაზროს: როცა 15 წლის ბავშვი წერს: „ამ ცხოვრების დედაც“, ეს შემთხვევითობა კი არაა, აქამდე მიზანმიმართულადაა მიყვანილი!
მოკლედ, სასულიერო პირები ნუ ცდილობენ, რომ ამ საქმეში არსებული დანაშაულის ნიშნები „გააპრავონ“. უდანაშაულობის პრეზუმპციიდან გამომდინარე, კონკრეტულად არავის ვადებ ხელს, მაგრამ სისტემის გათვალისწინებით, თუ გამოძიება სამართლიანად და ობიექტურად ჩატარდება, პასუხისგება ბევრს მოუწევს!
_ გგონიათ, რომ გამოძიება სამართლიანი და ობიექტური იქნება? აქვე, ერთსაც გკითხავთ: გირგვლიანისა და ლუკა სირაძის ტრაგედიებს შორის ტოლობის ნიშნის დასმა შეიძლება?
_ საპატრიარქოს ასეთი აქტიურობის შემდეგ, თავი კი არ მოუკლავს, შემთხვევით გადმოვარდაო; ასევე შს მინისტრის მოადგილის თავდაპირველი განცხადების მერე, პოლიციელები არ ძალადობდნენო, ცხადია, პარალელის გავლება შეიძლება.
სხვათა შორის, პარალელი „ციანიდის საქმესთანაც“ არსებობს.
_ ანუ?
_ მაშინ შოთაძეც მსგავს განცხადებებს აკეთებდა… „გირგვლიანის საქმის“ დროს კი მაღალჩინოსნების ე. წ. სვანურ ვენდეტაზე საუბრობდნენ, თუმცა ბოლოს, იძულებული გახდნენ, რომ „კარტები გაეხსნათ“.
მოკლედ, მაშინდელი სიბინძურე ახლაც გრძელდება და თუ კადრები, ასევე სისტემური მიდგომა არ შეიცვლება, ანალოგიები ყოველთვის იარსებებს!
_ ბოლოს, ბატონო მიხეილ, ერთი კვირის წინ დააანონსეთ, რომ სოციალურ ქსელში „შორენასა და მისი ბანდის“ მხილებას დაიწყებდით და სკანდალურ მასალებს გაასაჯაროვებდით, მაგრამ ეს ნაბიჯი აქამდე არ გადაგიდგამთ. რატომ გადაიფიქრეთ, ხომ არ შეგეშინდათ?
_ არანაირი შიში!
_ აბა, მხილება რატომ არ დაიწყეთ?
_ სანამ გასაჯაროვება დაიწყება, ერთ-ერთი სასულიერო პირის განცხადება გამოქვეყნდება.
_ ანუ?
_ ჩემ მიერ ერთ-ერთი დედაოს განცხადება გასაჯაროვდება, სადაც ის გარკვეულ მინიშნებებს აკეთებს, საპატრიარქოდან გარე ძალებთან ვინ რას ურთიერთობს.
_ ეს სასულიერო პირი დედა თამარი ხომ არ იქნება?
_ დიახ, განცხადებას დედა თამარი გააკეთებს და ამის შემდეგ საზოგადოებას საშუალება ექნება, რომ ინფორმაცია პერიოდულად პირადად მისგან მიიღოს!
ამას დაემატება „ციანიდის საქმის“ დარღვევები, რითაც ნათელი მოეფინება ამ საქმეში გარკვეული ძალოვანი სტრუქტურების ჩართულობას!
_ ეს მხილება ახალ წლამდე მოხდება?
_ დიახ.
_ ბატონო მიხეილ, ამ ნაბიჯით საკუთარ უსაფრთხოებას დარტყმის ქვეშ ხომ აყენებთ?
_ ცხადია, ვაყენებ, მაგრამ არ შემიძლია, როცა ასეთი დარღვევებია, ჩუმად ვიყო!
ისე, საშიში რა არის? _ იმის გამო, რომ სიმართლე გაცხადდეს, ვინმე პასუხს მომთხოვს?
_ დიახ, სავსებით შესაძლებელია, მით უმეტეს, უკვე გვაქვს ცოტნე გამსახურდიას მაგალითი, რომელიც სასიკვდილოდ, სავარაუდოდ, იმის გამო გაიმეტეს, რომ ხელისუფლებას სოციალურ ქსელში მწვავედ აკრიტიკებდა!
_ მესმის, მაგრამ ეს ჩემთვის არაფერს ცვლის!

გიორგი აბაშიძე

დატოვეთ კომენტარი