ვალერი გელბახიანი: „ივანიშვილი სიხლისღვრაზეა წამსვლელი, უნდა შევაჩეროთ!“

გუბაზ სანიკიძისა და ვალერი გელბახიანის კიევურმა ვიზიტმა და მიხეილ სააკაშვილთან შეხვედრამ მთელი „ქოცსამყარო“ შეაშფოთა, ანუ უფრო გასაგებად რომ ვთქვათ, „ქოცები“ დაპანიკდნენ და ზემოხსენებულ ბატონებს სხვადასხვა უწმაწური ეპითეტით ამკობენ.

რატომ შეაშინა „ოცნება“ სანიკიძე-გელბახიანის სააკაშვილთან შეხვედრამ? _ ამის გარკვევას „ქრონიკა+“ თავად ვალერი გელბახიანთან შეეცადა, რომელმაც გვითხრა, რომ „ოცნების“ პოლიტელიტას მისი სიმართლის ეშინია!
რა არის გელბახიანის სიმართლე? _ ამას წინამდებარე ინტერვიუდან შეიტყობთ. ამას გარდა, იმასაც გაიგებთ, თუ ვინ იყო ზემოხსენებული კიევური აუდიენციის შუამავალი და რატომ შეხვდა იგი 2003 წლის 21 ნოემბერს აწ გარდაცვლილ ედუარდ შევარდნაძეს.
მოკლედ, „ქრონიკა+“ გთავაზობთ სკანდალურ ინტერვიუს ვალერი გელბახიანთან.

_ ბატონო ვალერი, ჩვენი დღევანდელი საუბრის მთავარი თემა, ცხადია, თქვენი და გუბაზ სანიკიძის კიევური ვიზიტი იქნება, თუმცა მანამდე ერთ დეტალს შევეხოთ, კერძოდ, „ოცნება“ გვარწმუნებდა, პროპორციული არჩევნების საკითხი დახურულია, მაგრამ როგორც აღმოჩნდა, აქაც იტყუებოდა, ანუ ოპოზიციასთან სალაპარაკოდ მაინც დაჯდა. თქვენი აზრით, ხელისუფლება რამ აიძულა, რომ „დახურული თემა“ გაეცოცხლებინა?
_ საერთაშორისო ზეწოლა დიდი იყო, რისი იგნორირებაც ვერც „ოცნებამ“ შეძლო და ვერც _ ივანიშვილმა, მიუხედავად იმისა, რომ თავის ბოლო ტელეგამოსვლაში სხვა რამეს ლაპარაკობდა. საერთოდ, როცა ერთი ხელით ამერიკელებს აქებ, მეორე ხელით კი მათ უარს ეუბნები, ისინი არც გიჟები არიან, არც _ ყრუები და არც _ გონებაშეზღუდულები. ჰოდა, პასუხი მოსთხოვეს და დიალოგიც დაიწყო.
_ ანუ თქვენი ინფორმაციით, ამერიკელებმა ივანიშვილს „იმედისთვის“ მიცემული ინტერვიუს გამო მოსთხოვეს პასუხი?
_ რა თქმა უნდა. უთხრეს, _ ან დიალოგზე დასხდებით, ან საქართველოსთან არანაირი კომუნიკაცია და სტრატეგიული თანამშრომლობა აღარ იქნებაო. მოკლედ, ივანიშვილი სწორედ ამიტომ გახდა იძულებული, ოპოზიციასთან მოლაპარაკებაზე დასთანხმებოდა. ისე, ამბობდა, თავი კედელსაც რომ ურტყან, პოზიციას არ შევცვლიო, მაგრამ, თურმე, შეიძლება, პოზიცია ისე შეიცვალოს, რომ კედელს თავი არ ურტყას.
_ ივანიშვილს იქნებ, გარემოცვა აიძულებდა, რომ პოზიცია არ შეეცვალა და არწმუნებდა, ოპოზიციას მხარდამჭერები არ ჰყავს და ორ კვირაში ყველაფერი დამთავრდებაო?
_ არ დაიჯეროთ, რომ ივანიშვილს ვინმე რამეს უბედავს! მას ხედვის თავისი არეალი აქვს, რომელშიც კორექტირების შეტანა არ შეიძლება და დაუშვებელია! ეს კაცი სხვაგან არის და სხვა სამყაროდან გველაპარაკება! თუნდაც ბოლო ინტერვიუში ეტყობოდა, რომ გარემოცვასთან კონსულტაციები ჰქონდა გავლილი? _ ეს მე ვერ შევამჩნიე და თუ თქვენ შეამჩნიეთ, მაშინ ბოდიშს მოვიხდი, რადგან არასწორად მივხვდი.
_ არ დაგიმალავთ და, ნერვი არ მეყო, რომ ამ ინტერვიუსთვის თავიდან ბოლომდე მეყურებინა და ივანიშვილის ტელეგამოსვლის ანალიზსაც ვერ გავაკეთებ. ამიტომ, „ოცნების“ მსგავსად, ამ თემას დავხურავ და თქვენს კიევურ ვიზიტს დავუბრუნდები. ნათელია, რომ თქვენი და გუბაზ სანიკიძის კიევში ჩასვლამ მთელი „ქოცსამყარო“ წყობილებიდან გამოიყვანა. მე კი ვიცი, „ქოცები“ ასე რატომაც გაწიწმატდნენ, მაგრამ თქვენი ახსნა როგორია?
_ თუ მე და გუბაზი ასეთი უმნიშვნელო პერსონები ვართ, მაშინ წონასწორობა რამ დააკარგვინათ, რამ გადარიათ და ათასანაირი ეპითეტი რომ შექმნეს ცალკე ტროლებმა, ცალკე _ ბოტებმა, ცალკე _ პოლიტიკურმა ლიდერებმა და აჟიოტაჟი ატეხეს? რა, სააკაშვილთან ოპოზიციის წარმომადგენლები აქამდე არ დადიოდნენ და ეს პირველი იყო? კიევში ჩვენი ჩასვლა ვერ აიტანეს და ჩათვალეს, აი, ახალი ფორმატი კეთდება, რაც ჩვენთვის საფრთხის შემცველიაო. არადა, სინამდვილეში, არანაირი ფორმატი არ კეთდება და სულ სხვა გზავნილებით ჩამოვედით, ანუ ვამბობ, _ ვინაიდან სააკაშვილი ყველაზე გავლენიანი პოლიტიკური პარტიის ლიდერი და თუნდაც ბელადია, როგორც ბიძინა ეძახის და ვინაიდან საქართველოში დაძაბული ვითარება, ე. ი., იმ მოვლენების ნიშნებია, რაც წინა წლებში გვაქვს ნანახი, ქუჩაზე პოლიტიკური პასუხისმგებლობა იმ პოლიტიკურმა ძალამ უნდა აიღოს, რომელსაც დომინანტი პოზიცია აქვს. ასეთი ძალა კი „ნაციონალური მოძრაობაა“ და, შესაბამისად, მის ლიდერთან მუდმივი კომუნიკაცია და კონსულტაციაა საჭირო, რათა პროცესები კონსტიტუციურ ჩარჩოებს არ გასცდეს!
მოკლედ, სწორედ ამის გამო გადავწყვიტეთ, რომ კიევში ჩავსულიყავით და სააკაშვილთან დაგველაპარაკა, თან ის ყინულიც უნდა გაგვედნო, რომელიც არსებობდა _ წლების განმავლობაში მე და გუბაზ სანიკიძეც სააკაშვილთან დაპირისპირებულები ვიყავით. საერთოდ, სამშობლო უფრო მეტია, ვიდრე _ წყენა. სხვათა შორის, ამ თემაზეც ვილაპარაკეთ, მაგრამ მთავარი მაინც ის იყო, თუ რა ხედვა აქვს სააკაშვილს არსებულ პროცესებზე. ჩვენ ექვსი საათი ვისაუბრეთ, მაგრამ ისე კი არა, როგორც ჩინოვნიკი ელაპარაკება თავის უფროსს, არამედ თანასწორუფლებიანობის პირობებში.
როგორც გითხარით, წინა წლებიც გავიხსენეთ, რა მოვლენა როგორ განვითარდა, „ნაციონალური მოძრაობა“ დამარცხებამდე რამ მიიყვანა.
_ რაო, რა გითხრათ მიშამ, „ნაცმოძრაობა“ დამარცხებამდე რამ მიიყვანაო?
_ აი, იმ შეცდომებმა, რომლებზედაც მაშინ ჩვენ, როგორც ოპოზიცია, ვსაუბრობდით. მოკლედ, სააკაშვილი აღიარებს, რომ სერიოზული შეცდომები იყო დაშვებული, მათ შორის, ერთ-ერთი კატასტროფული თუ არა, გამოუსწორებელი შეცდომა სასამართლო რეფორმა იყო. მიშას თქმით, ბოლო ორი წლის განმავლობაში მან საკუთარ ხელისუფლებაზე კონტროლი დაკარგა და ამის გამო სადავეები გაექცა.
_ ე. ი., ყველაფერ იმას, რაც „ნაცმოძრაობას“ დაემართა, სააკაშვილი სხვას აბრალებს?
_ არა. ამ შეცდომებს ნაწილობრივ საკუთარ თავს, ნაწილობრივ კი სხვას მიაწერს. სხვათა შორის, ისიც შეცდომა იყო, რომ ოპოზიცია კედელთან მიაყენა და იმის გარდა გზა არ დაუტოვა, რომ ბიძინა ივანიშვილი მოსულიყო.
_ 2007 წლის 7 ნოემბრის შემდეგ საქართველო დატოვეთ და რამდენიმე წელი, პრაქტიკულად, დევნილობაში იყავით. ამის გამო სააკაშვილმა ბოდიში თუ მოგიხადათ, ბატონო ვალერი?
_ დიახ, ხუთი წელი უმძიმეს ყოფაში ვიყავი და არ ვიცოდი, ყველაფერი ეს რისთვის ხდებოდა. საქართველოში რომ დავბრუნდი, „ნაციონალური მოძრაობის“ იმდროინდელი ლიდერების უმეტესობას შევხვდი, ყველა ყველაფერს თავისებურად ყვებოდა და სიმართლე ვერ გავიგე. მიშასგან კი დამატებით ის გავიგე, რაც არ ვიცოდი.
_ მაინც, რა გითხრათ სააკაშვილმა, რატომ გდევნიდიო?
_ ჩემი დაჭერა, თურმე, მანამდე იყო გადაწყვეტილი, სანამ 2007 წლის 7 ნოემბრის მოვლენები იქნებოდა და ჩემი დაჭერით ბადრი პატარკაციშვილის გუნდს დაანგრევდნენ.
_ ეს როგორ?
_ თუ გახსოვთ, პარლამენტში ფრაქციის თავმჯდომარის თანამდებობა რომ დავიკავე, ასეთი შეფასებები გაკეთდა, _ აი, რუსული ფრაქცია შეიქმნაო. ეს პროპაგანდა, თურმე, იმიტომ მიდიოდა, რომ ერთ მშვენიერ დღეს დავეჭირე.
_ რა მოტივით უნდა დაეჭირეთ?
_ როგორც რუსეთის აგენტი. მოკლედ, პროპაგანდა მიდიოდა და, წადი, ხალხი არწმუნე, რომ ასე არ არის.
_ სააკაშვილს ვინ არწმუნებდა, რომ რუსეთის აგენტი იყავით?
_ ახლა ამას არ გავახმოვანებ.
_ რატომ?
_ ამის დროც მოვა. ის ერთი და ორი ადამიანი, რომელიც სააკაშვილმა დაასახელა, დაკავშირებულია ისეთ ადამიანთან, რომელიც ახლა ხელისუფლებაშია!
_ უნდა ვივარაუდოთ, რომ თქვენს დაჭერას მიშას ივანიშვილი ურჩევდა? ცნობილია, რომ პატარკაციშვილსა და ივანიშვილს ცუდი ურთიერთობა ჰქონდათ, თქვენ კი პატარკაციშვილის გუნდს წარმოადგენდით და ამის თაობაზე ადრე დეტალურად გვისაუბრია…
_ სახელებისა და გვარებისგან თავს შევიკავებ!
_ სახელებსა და გვარებს თქვენ კი არა, მე ვასახელებ! ჰოდა, ან დამიდასტურეთ, ან უარყავით!
_ თუ უნდა, სააკაშვილს, დაასახელოს, მაგრამ მე არ ვასახელებ, თუმცა პირობას ვიძლევი: მოვა დრო, დავასახელებ და შესაძლოა, სააკაშვილმაც დაადასტუროს ან თავი შეიკავოს. ისე, ვკითხე, ჩემს თემაზე საჯარო საუბარს აპირებს თუ არა-მეთქი?
_ რა გიპასუხათ?
_ კი, ვიტყვი, ორმხრივი შეცდომები იყო და ერთმანეთს ყველაფერი უნდა ვაპატიოთო.
_ ბატონო ვალერი, აღიარეთ, რომ ჩემი ეჭვი უსაფუძვლო არაა და სააკაშვილს თქვენს აგენტობაში ივანიშვილი არწმუნებდა.
_ ხომ იცით, თუ პატარა ნაპერწკალი არ არის, ბოლი არ ამოდის.
_ დიახ, ასეა.
_ მოკლედ, ის, რაც მაინტერესებდა, გავიგე. შეიძლება, სხვებსაც აინტერესებთ, მაგრამ ამ შემთხვევაში, ეს ჩემი ინტერესის საგანი არაა. მე ჩემი საკითხი და პოზიციაც გავარკვიე, ანუ სააკაშვილის ახლანდელი პოზიცია საქართველოში არეულობას არ უკავშირდება! პირიქით, ის ამბობს, არც ერთ შემთხვევაში რევოლუციური სცენარიო, მაგრამ ახლა, თუ ბიძინა არ გადაირია და ყველაფერი თავზე არ ჩამოიმხო, ჩვენ უნდა შევეცადოთ, რომ პროცესი არჩევნებამდე მივიყვანოთ.
_ არჩევნებში ვადამდელს გულისხმობთ?
_ არა, მორიგ არჩევნებს.
_ ე. ი., სააკაშვილს ვადამდელი არჩევნები არ უნდა?
_ ის ამბობს, რასაც ოპოზიცია იტყვის, ხელს არ შევუშლიო. საერთოდ, ახლა მთავარი ამოცანა ხელისუფლებიდან ივანიშვილის ჩამოცილებაა და ამ სქემაში სააკაშვილი ისე მონაწილეობს, როგორც თანასწორი და დამატებითი კვოტები არ აქვს. პირიქით, თუ დროებითი მთავრობა შეიქმნება, „ნაციონალურ მოძრაობას“ არსებითი პრეტენზია არ ექნება, ანუ მინიმალურ კვოტას გამოიყენებს და ხელისუფლების, ვთქვათ, მთლიან ან მესამედის დაკომპლექტებას არ მოითხოვს.
_ ალბათ, ამ თემაზეც ისაუბრებდით _ მიშა საქართველოში ჩამოსვლას გეგმავს?
_ არა, უკრაინის პოლიტიკურ პროცესთან მიმართებით მას თავისი პოზიცია აქვს. საქართველოში მიმდინარე მოვლენებს, ბუნებრივია, თვალს ადევნებს, მაგრამ ის, რომ მიშა თვითმფრინავში ჩაჯდეს, ჩამოვიდეს და ივანიშვილს თავი დააჭერინოს, ეს, ბოდიში და, სასაცილოა!
_ ბატონო ვალერი, თქვენი და სააკაშვილის შუამავალი ვინ იყო, ანუ ეს შეხვედრა ვინ დაგეგმა?
_ გეტყვით: ერთი კვირით ადრე, სანამ კიევში წავიდოდი, ტელეკომპანია „კავკასიაზე“ გავაკეთე განცხადება, წინა ხელისუფლება მდევნიდა და ახლანდელიც მდევნის-მეთქი
_ ახლანდელი ხელისუფლებისგან დევნა რაში გამოიხატება?
_ გაიხსენეთ: ხელისუფალი ჯერ კიდევ არ იყო, როცა ივანიშვილმა გორში, საჯარო გამოსვლისას საჩხერლებს მოუწოდა, საჩხერეში არ ჩავეშვი და თუ ჩავიდოდი, თავს დამსხმოდნენ და ან მოვეკალი, ან ვეცემე. მას შემდეგ ეს კაცი არ მასვენებს _ ჩემი საქმე თაროდან ჩამოხსნა და სასამართლოში გაუშვა, მაგრამ წარმოებაში არ წავიდა, რადგან მოწმე არ ჰყავთ, არც მტკიცებულებები აქვთ და ჰაერზე ვერ გამასამართლებენ. მოკლედ, არ ვიცი, ივანიშვილი რატომ მდევნის.
_ მგონია, რომ იცით, ივანიშვილი რატომ გდევნით…
_ მინდა, მისგან მოვისმინო, რატომ ვიდევნები. ამიტომ „კავკასიაზე“ განვაცხადე, ივანიშვილისგან არც ფულს ვეძებ, არც _ თანამდებობას. ჰოდა, ან შემხვდი, ან საჯაროდ განაცხადე, რა დაგიშავე და რატომ მდევნი-მეთქი. თუ ერთი ადამიანი მაინც არსებობს, ვისაც რამე დავუშავე, ის მაინც გამოიყვანოს და ათქმევინოს, რა დავუშავე.
იგივე ვთქვი სააკაშვილის მისამართითაც, რომელმაც მიპასუხა.
_ ანუ „კავკასიაზე“ გაკეთებული ამ განცხადების შემდეგ პირადად სააკაშვილი დაგიკავშირდათ?
_ დიახ და შევთანხმდით, რომ კიევში ჩავიდოდი. ამის შემდეგ გუბაზს შევხვდი და მან თქვა, განცხადება მაქვს გაკეთებული, კიევში ჩავალო და ბარემ, ერთად წავიდეთო. აი, სულ ეს იყო.
_ მართალია, არ აღიარებს, მაგრამ „ოცნება“ კუთხეშია მიყენებული. ჰოდა, თქვენთან შეხვედრის სურვილი ივანიშვილმაც რომ გამოთქვას, შეხვდებით?
_ შევხვდები, რატომ არ შევხვდები?
_ რას ჰკითხავთ?
_ იგივე კითხვას დავუსვამ და იცით, რატომ?
_ რატომ?
_ თუ გახსოვთ, 2003 წელს საჩხერის მაჟორიტარული ოლქიდან დეპუტატი დამოუკიდებლად გავხდი. 22 ნოემბერს პარლამენტში გადატრიალება მოხდა, 21-ში კი, ჩემი ინიციატივით, შევარდნაძეს შევხვდი. იქ მთელი მაშინდელი უმრავლესობა დამხვდა. რომ დამინახეს, ზოგი შეცბა, ზოგმა კი თქვა, _ ვა, რა კარგია, რომ მოხვედი, ე. ი., შემოგვიერთდიო. შევარდნაძეს თვალებში შევატყვე, რომ მიხვდა, იქ შესაერთებლად არ მივსულვარ და უმრავლესობის წევრები გააჩუმა, დააცადეთ, ათქმევინეთო. მოკლედ, შევარდნაძეს ვუთხარი, _ ბატონო ედუარდ, საქართველოს პრეზიდენტთან ისე მოვედი, როგორც დეპუტატი და როგორც _ რიგითი ადამიანიც. თქვენთან შეკითხვა მაქვს, _ გარეთ ხალხია, პარლამენტი კი იზოლირებულია. ჰოდა, მაძლევთ თუ არა პირობას, რომ ამ ქვეყანაში კონსტიტუციური წესრიგის გარანტიას შექმნით-მეთქი? ეგ რას ნიშნავსო? _ მომიგო.
ვუპასუხე, _ ეს იმას ნიშნავს, რომ ქვეყანაში კრიზისია და პარლამენტის სხდომას ნუ ჩაატარებთ, ოპოზიციასთან მოლაპარაკების მაგიდასთან დაჯექით, რათა ამ კრიზისიდან გამოსავალი ვიპოვოთ-მეთქი.
_ რა გიპასუხათ?
_ დაიბნა. უმრავლესობამ ყაყანი დამაყარა, _ ამისთვის მოხვედი, მოგზვნილი ხარო. მოკლედ, ათასი უბედურება მეძახა. ცოტა ხნის ფიქრის შემდეგ შევარდნაძე მომიტრიალდა და მითხრა, _ მაგენს, ანუ ოპოზიციას, გადაეცი, რომ ქუჩის ხალხს არ დაველაპარაკებიო. ვუპასუხე, _ ბატონო ედუარდ, იქ დეპუტატებიც არიან და ქუჩის ხალხი რა შუაშია-მეთქი? შევარდნაძემ, _ მაგათ დეპუტატებად არ ვცნობო.
პირდაპირ ვუთხარი, _ მეგონა, სახელმწიფოს მეთაურის შესაბამის პასუხს მივიღებდი, მაგრამ ქვეყანაში არც მშვიდობა გდომებიათ და არც _ სიკეთე-მეთქი. იქიდან გაბრაზებული წამოვედი.
_ იმის შესახებ გკითხეთ, ივანიშვილმა შეხვედრის სურვილი რომ გამოთქვას, შეხვდებით თუ არა-მეთქი და ეს ამბავი რატომ მომიყევით?
_ ივანიშვილთანაც იგივე კითხვა მაქვს, რაც შევარდნაძეს დავუსვი, ანუ შეუძლია თუ არა, რომ მოლაპარაკების მაგიდასთან დაჯდეს? საერთოდ, ყველაფერი ეს ივანიშვილს თავისმა პარტიის წევრმა ან ჩინოვნიკმა კი არა, რიგითმა ადამიანმა უნდა უთხრას, რომელიც მებრძოლია და თავისი სამშობლო უყვარს.
_ ბატონო ვალერი, გულუბრყვილო ადამიანი ნამდვილად არ ხართ. ჰოდა, რატომ გგონიათ, რომ ივანიშვილი, რომლის წარსულზეც ძალიან ბევრი რამ იცით, შეგხვდებათ და თქვენს რჩევებს გაითვალისწინებს?
_ ახლა მთავარი ის კი არაა, რა ვიცი და რა _ არა, არამედ ახლა მთავარია, რომ ესკალაცია თავიდან ავიცილოთ და ვისაც ამის რამე ბერკეტი აქვს, იმას ულტიმატუმით კი არა, თავისუფლად უნდა დაელაპარაკო.
ერთი სიტყვით, ნაწყენი კი ვარ, მაგრამ ამ შემთხვევაში სამშობლო უფრო ღირებულია. ჰოდა, მოდი, იმ ადამიანებს დაუჯერე, ვისაც ამ ქვეყნის ბედი თანამდებობების გარეშე აწუხებთ!
_ ივანიშვილსა, ზოგადად, „ქართულ ოცნებას“, თქვენი აზრით, ამ ქვეყნის ბედი აწუხებთ?
_ მათი ლაპარაკიდან გამომდინარე, ასე მგონია, რომ სხვა ტელევიზორს უყურებენ!
_ დიახ, ნამდვილად სხვა ტელევიზორს უყურებენ _ „იმედზე“ ხომ ცხოვრება ძალიან მშვენიერია!
_ ივანიშვილი მხოლოდ თავისიანებს უსმენს და ჰგონია, რომ ხალხი ისევ უჭერს მხარს. არადა, უნდა იცოდეს, რომ ხალხი მის მხარეზე არ იქნება, რადგან ხალხის სასიკეთოდ ნაბიჯებს არ დგამს!
მე ქვეყნის წინაშე ვალს ვიხდი და კარგი იქნება, თუ გაიგებს და შეისმენს, თუმცა ვიცი, რასაც იტყვის.
_ რას იტყვის?
_ თქვენი ჭკუის სასწავლებელი არაფერი მჭირსო.
_ ბატონო ვალერი, თქვენული გეგმა როგორია, ვითარება როგორ უნდა განიმუხტოს?
_ ჩემი აზრით, ივანიშვილი სამოქალაქო დაპირისპირებაზე წავა და ამის თაობაზე ერთხელ უკვე ვთქვი.
_ ასე რთულადაა საქმე?
_ დიახ, თუ დასავლეთმა სერიოზულად არ იმუშავა, ივანიშვილს ფული აქვს, რომ ვიღაცას მისცეს და უთხრას, წადი, ესროლეო, ანუ გარშემო კრიმინალურ ბანდებსა და მკვლელებს შემოიკრებს, რომ უდანაშაულო ხალხის სისხლი დაიღვაროს და მერე „ნაციონალურ მოძრაობას“ დააბრალოს, ამიტომ როგორმე უნდა შევაჩეროთ!
_ თუ ეს სცენარი რეალურად არსებობს, ალბათ, დასავლეთი უფრო მეტად უნდა გააქტიურდეს.
ბატონო ვალერი, ვიდრე დაგემშვიდობებით, კიდევ ერთ თემას შევეხები: მას შემდეგ, რაც კიევიდან დაბრუნდით, „ქოცები“ სოციალურ ქსელში თქვენი შვილის ქორწილში გადაღებულ ფოტოებს დააფრიალებენ და ერთ ამბავში არიან, აი, შეთქმულება როგორ დაიგეგმაო.
_ იმ ადამიანს რა ვუთხარი, ქორწილში გადაღებულ სურათს პოლიტიკისთვის რომ იყენებს!
საერთოდ, ქორწილში მრავალ ადამიანს ეპატიჟები, ზოგი სად ჯდება, ზოგი _ სად, მაგრამ ერთად სურათებს იღებენ და ეს სურათები პოლიტიკისთვის როგორ უნდა გამოიყენო?
მიმიფურთხებია მაგათი მორალისთვის!
ისე, როდის იყო, რომ ქეიფსა და ქორწილში შეთქმულება იგეგმებოდა ან ხომ ვერ მეტყვიან, რომელ შეთქმულებაზეა ლაპარაკი?ქორწილიც ჭორვილაში იყო,შეთქმულების შესახებ რიგითმა ქოცებმა გაიგეს და ივანიშვილმა ვერა? თუ ამ სურათებში პეტრე ცაავა დაინახეს, მაშინ ის მეუფე იყო და არავინ იცოდა, რას აპირებდა. ესეც რომ არა, წლების განმავლობაში ერთთან კი არა, ბევრ მეუფესთან მაქვს კონტაქტი და ეს დანაშაულია?
_ ცხადია, დანაშაული არ არის, მაგრამ ამ ფოტოების ფრიალი კიდევ ერთი დასტურია, რომ „ქოცებს“ თქვენი ძალიან, ძალიან ეშინიათ, არა?
_ ჩემი რატომ უნდა ეშინოდეთ? მე არც ჯარი მყავს და არც ფული მაქვს, მაგრამ, ალბათ, ჩემი სიმართლის ეშინიათ!
_ და თქვენი სიმართლე რა არის?
_ სააკაშვილთანაც ცამდე მართალი ვარ, ბიძინა ივანიშვილთანაც და ქართველ ხალხთანაც! ცუდ და ამორალურ რამეზე ხელი არასოდეს წამცდენია! ვინმესთვის არაფერი წამიგლეჯავს, არ მომიპარავს, არ მიმითვისებია, მიუხედავად იმისა, რომ ამის შანსი მქონდა!
მოკლედ, სიმართლე ჩემს მხარესაა! ჩემი ყველა თანამედროვე მილიონერია, ერთადერთი გაფხეკილი მე ვარ იმიტომ, რომ ცუდი არ მიკადრებია!
ბიძინა სხვაზე რომ ამბობს, ნაძარცვი ფული აქვსო, რა, თვითონ ნაძარცვი არ აქვს? მაგას ჩემზე სათქმელი რა აქვს? ჩემზე მეტი განათლება აქვს მიღებული, ჩემზე მეტ ინსტიტუციებშია ნამუშევარი, ჩემზე უკეთესი მოსწავლე და სტუდენტი იყო, ჩემზე კარგმა მშობლებმა გაზარდეს თუ ჩემზე კარგი მეგობრები ჰყავს? ერთი, ამიხსნას, რა ლოგიკით უნდა მითხრას ივანიშვილმა, რომ მე თითქოს ცოდვილი ვარ, თვითონ კი უმწიკვლო ადამიანია?!
ის, რომ ბადრი პატარკაციშვილთან ვმეგობრობდი, ეს იმას არ ნიშნავს, რომ ბიძინა სხვაზე უკეთესია!
_ ე. ი., მაინც იმედოვნებთ, რომ სიმართლე გაიმარჯვებს, არა?
_ დიახ, სიმართლე ყოველთვის იმარჯვებს. სიმართლისთვის მებრძოლი აქ თუ არა, იმქვეყნად მაინც ცხონდება!
_ რა დროს იმ ქვეყანაზე ფიქრია, ბატონო ვალერი, სიმართლეს ამქვეყნად უნდა მოვესწროთ!
_ დიახ, მაგრამ თავს იმითაც ვიმშვიდებ, რომ ზოგიერთს ჯოჯოხეთი არ გველის!

გიორგი აბაშიძე