ყველას გვახსოვს: „ომეგას სკანდალის“ ერთ-ერთი მთავარი ფიგურანტი „თიბისი ბანკისა“ და აწ უკვე საზოგადოებრივი მოძრაობა „ლელოს“ დამფუძნებელი, მამუკა ხაზარაძე იყო. ყოველ შემთხვევაში, ერთი წლის წინ „ომეგა ჯგუფის“ დამფუძნებელმა ზაზა ოქუაშვილმა ხაზარაძეს ბრალი დასდო, რომ ის „ოცნების“ სასარგებლოდ მოქმედებდა და ბანკიდან „ომეგას“ კუთვნილი მილიონობით თანხა უკანონოდ გასცა. ბატონი ხაზარაძე მაშინაც და ახლაც ამ ბრალდებას უარყოფს. სამაგიეროდ, მან „პლასტინკა“ სხვა მიმართულებით „ამოატრიალა“, ანუ თუ შარშან მოგვიწოდებდა, რომ საპრეზიდენტო არჩევნებში ხელისუფლებისგან მხარდაჭერილი სალომე ზურაბიშვილისთვის მიგვეცა ხმა, ახლა ბანკირი ხელისუფლებას უპირისპირდება და ამბობს, რომ ასე გაგრძელება აღარ შეიძლება.

რატომ შეცვალა ხაზარაძემ პოზიცია და, საერთოდ, რატომ გადაწყვიტა პოლიტიკაში ჩართვა? _ ამის შეფასება „ქრონიკა+“-მა საქართველოს პარლამენტის დამოუკიდებელ დეპუტატს, ნატო ჩხეიძეს სთხოვა. ჩვენ რესპონდენტს, ცხადია, იმის შესახებაც დავუსვით კითხვები, თუ რატომ გადაწყვიტა „ომეგა ჯგუფმა“, რომ ტელეკომპანია „იბერიის“ ინფრასტრუქტურა და ასევე ტექნიკა დროებით სარგებლობაში „მთავარი არხისთვის“ გადაეცა, მით უმეტეს, მაშინ, როცა არსებობდა მოლოდინი, რომ „იბერია“ მაუწყებლობას განაახლებდა.
ამას გარდა, იმითაც დავინტერესდით, 2020-ში ნატო ჩხეიძე რომელიმე პარტიის სააჩევნო სიაში იქნება თუ საკუთარ პარტიას შექმნის? ვიდრე ამ კითხვებზე რესპონდენტის პასუხებს შემოგთავაზებთ, შეგახსენებთ: რამდენიმე თვის წინ ნატო ჩხეიძემ პარლამენტში მისულ მამუკა ხაზარაძეს „ომეგას“ საქმეზე კითხვები დაუსვა.
„ჩემთვის ერთი რამ ნიშანდობლივი იყო. ამ ორკესტრირებული შეტევის ერთი გვარი დაასახელეთ თქვენ – გახარია და 2016 წლის 21-22 აპრილს თქვენი ბანკის მიერ უკანონოდ გაცემული, თქვენზე იძულების გამო ორკესტრირებული შეტევის ორკესტრანტი ერთ-ერთი სწორედ გახარია გახლდათ. ახლა რასაც ამბობთ, რომ დირექტორების მიერ იყო გატანილი, დიახ, მაგრამ მშვენივრად იცით, _ თქვენ და თქვენს ბანკს არ ჰქონდა უფლება, ეს თანხა გაეცა. ბანკის თანამშრომლები ამას არც აკეთებდნენ, მაგრამ გააკეთეს მხოლოდ მას შემდეგ, რაც ბატონმა ბუცხრიკიძემ მისცა დავალება, ხოლო ბატონ ბუცხრიკიძეს დავალება მიეცით თქვენ.
ძალიან ცუდია, ბატონო მამუკა, რომ მთელი პასუხისმგებლობით ახლა ამას აცხადებთ. სამწუხაროდ, თქვენ მოგიწევთ სიმართლის თქმა იქ, სადაც მეტი პასუხისმგებლობაა სიმართლისა. მე სოლიდარული ვიყავი თქვენ მიმართ და დავრჩები სოლიდარული, მაგრამ, როგორც ჩანს, თქვენ ღირსი ბრძანდებით იმ ამბისა, რა დღეშიც ახლა ხართ. სამწუხაროდ, ასე გამოდის. მე რა დავაშავე, თორემ ძალიან ცუდია, მთელი პასუხისმგებლობით ტყუილს რომ ბრძანებთ და გასაგებია, რატომაც. მაგრამ თქვენ უკვე გაბედეთ და დაასახელეთ ორკესტრის ერთი წევრი, სხვათა შორის, „ომეგამ“ ორკესტრის ყველა წევრი დაასახელა თავის დირიჟორთან ერთად, მაგრამ პროკურატურაში ის საქმე გაჩერებულია და თქვენამდე არც მოსულან და არც მოვლენ“, _ მიმართა მიმდინარე წლის მარტში პარლამენტში მისულ ხაზარაძეს ჩხეიძემ, რაზეც მიმართვის ადრესატმა ასე უპასუხა:
„მთელი პასუხისმგებლობით გეუბნებით, გიყურებთ თვალებში, ქალბატონო ნატო, თქვენი განცხადება იმასთან დაკავშირებით, რომ ვინმეს რამე დავავალე, არის ტყუილი. ლონდონით ნუ გვაშინებთ. ლონდონის მისამართიც ვიცით ძალიან კარგად“.
„ქრონიკა+“ ნატო ჩხეიძის ინტერვიუს წარმოგიდგენთ:

_ ქალბატონო ნატო, ჩვენი ბოლო საუბრის შემდეგ ბევრი რამ მოხდა. აი, მაგალითად, „თიბისი ბანკის“ დამფუძნებელი მამუკა ხაზარაძე პოლიტიკაში ჩაერთო. ბანკირის ამ ნაბიჯს როგორ აფასებთ?
_ პოლიტიკურ ველზე გამოჩენა, რა თქმა უნდა, ყველას შეუძლია _ ეს ველი ხომ ყველას და ყველაფერს იტევს, მაგრამ სიმართლე რომ გითხართ, მისი ისეთი დიდი იმედი არ მაქვს, როგორც _ სხვებს.
_ ჩემი დაკვირვებით ისინი, რომლებიც იმედოვნებენ, რომ ხაზარაძე ქვეყანას გადაარჩენს, ცოტანი არიან.
_ ცოტანი იქნებიან იმიტომ, რომ ვხედავთ, ქვეყანას „ქართუ ბანკის“ თანამშრომლებმა რა ხეირიც დააყარეს. ჩვენს ქვეყანას ბევრად უკეთესი ვერც „თიბისი ბანკის“ საგამოფენო დარბაზის მონაწილეებისგან ექნება! ვინც პოლიტიკაში ერკვევა, ასეთი ნაკლები იმედიანობა, ალბათ, ამიტომაც აქვთ. მათში კი, რომლებიც ყველაფერს ზედაპირულად და ცოტა ემოციურადაც უყურებენ, ყველა ახალი ძალის გამოჩენა იმედს აღძრავს, თუმცა ეს იმედი, ალბათ, ფუჭია!
_ ისე, ქალბატონო ნატო, როგორც ადამიანს, სავლეს პავლედ გადაქცევის გჯერათ?
_ სავლე შეიძლება, პავლედ გადაიქცეს, მაგრამ აუცილებელია, რომ ის ქრისტეს გზას დაადგეს! დიახ, მეტამორფოზა მაშინ ხდება, როცა სავლე ქრისტეს გზას ადგება, მაგრამ თუ სავლე ისევ იმ გზას ადგას, რომელი გზითაც სავლეობის დროს მიდიოდა, ცხადია, ვერც მეტამორფოზა მოხდება და ვერც პავლედ გადაკეთდება!
_ ალბათ, ხვდებით, სავლეს პავლედ გადაქცევაზე რატომაც გეკითხებით, ანუ შარშან „ომეგას სკანდალის“ ერთ-ერთი მთავარი ფიგურანტი მამუკა ხაზარაძე იყო _ „თიბისი ბანკიდან“ დიდი რაოდენობით თანხის უკანონოდ გატანის ისტორიას დეტალურად აღარ მოვყვები, თუმცა იმას აუცილებლად გავიხსენებ, რომ საპრეზიდენტო არჩევნებში ხაზარაძე ხალხს მოუწოდებდა, „ოცნებისგან“ მხარდაჭერილ სალომე ზურაბიშვილს მიეცით ხმაო. ახლა კი რადიკალურად განსხვავებული პოზიცია აქვს. მოკლედ, ბანკირმა თუნდაც „ომეგას“ გამო, თქვენი აზრით, პასუხი არ უნდა აგოს? სხვათა შორის, პარლამენტში კითხვები დაუსვით, მაგრამ, როგორც მახსოვს, პასუხები არ გაგცათ…
_ პასუხებს ვერც გამცემდა, რადგან „ომეგას“ საქმეში ის ისეთივე დამნაშავეა, როგორებიც მისი დამქირავებლები არიან! დიახ, მაშინ მან ჩვეულებრივი კრიმინალი ჩაიდინა და, რა თქმა უნდა, პასუხს ასე ადვილად ვერ გაგვცემს, თუმცა მედიას გარკვეულ არასწორ ინფორმაციას მიაწვდის. იქ კი, სადაც არგუმენტირებაა საჭირო, ამას ვერ მოახერხებს!
მოკლედ, ხაზარაძის თავზე „ომეგას“ საქმე დამოკლეს მახვილივით კიდია!
_ არსებული ინფორმაციით, „ომეგას“ საქმეზე დავა საერთაშორისო სასამართლოებშია. მითხარით: უცხოეთში გაგზავნილ „ქეისებში“ ხაზარაძეც ფიგურირებს?
_ პროცესები მიმდინარეობს და თანმიმდევრული საფეხურებია. ერთ-ერთი საფეხური კი, დიახ, ხაზარაძეა!
_ ისე, იზიარებთ მოსაზრებას, რომ პოლიტიკაში მოსვლა ხაზარაძისთვის ერთგვარი ინდულგენციაა, ანუ პარტიას იმიტომ ქმნის, რომ პასუხისმგებლობას თავი დააღწიოს?
_ ადამიანები პასუხისმგებლობას თავს ვერ აღწევენ და ეს, უბრალოდ, ილუზიაა.
_ ანუ?
_ ადრე თუ გვიან პასუხისმგებლობა ყველას მიუკაკუნებს!
_ ქალბატონო ნატო, ადრეც მიკითხავს და ახლაც გკითხავთ: ერთი წლის წინ ბიზნესსექტორის დიდი ნაწილი „ომეგას“ გვერდით რომ დამდგარიყო, როგორ ფიქრობთ, ახლა ქვეყანაში სხვა რეალობა ხომ არ იქნებოდა?
_ იმაზე ნუ ვისაუბრებთ, რაც არ მომხდარა, თუმცა რაღაც რომ მომხდარიყო, ყველაფერი, ცხადია, სხვანაირად იქნებოდა. ახლა კი იმის მიხედვით უნდა ვიმოქმედოთ, რაც ხდება!
_ გეთანხმებით, მაგრამ საქმეც ეგაა, რომ არც რეალობის შესაბამისად ვმოქმედებთ. ყოველ შემთხვევაში, პირადად მე ვერ ვხედავ, რომ იგივე ბიზნესი მის წინაშე არსებულ პრობლემებზე ხმამაღლა საუბრობდეს, ანუ ყოველგვარი სუბიექტურობის გარეშე ვამბობ, „ომეგასნაირი“ თამამი ნაბიჯი არავის გადაუდგამს!
_ „ომეგასნაირი“ ნაბიჯი რომ გადადგა, ზაზა ოქუაშვილი უნდა იყო! ზაზა ოქუაშვილმა ის გააკეთა, რაც უნდა გაეკეთებინა _ მათსავით დამნაშავე არ გახდა. საერთოდ, როცა გარკვეულ ცუდ საქმეებს აჰყვები, მერე უკვე ადვილია, რომ ბოლომდე ჩაგითრიონ.
სამწუხაროდ, ხაზარაძეს სწორედ ეს მოუვიდა _ ყველა ხელისუფლებას ჰყვებოდა და ეგონა, რომ ზედა ტალღაზე იყო, მაგრამ ეს ილუზია გახლდათ, ანუ ის, რაც ადამიანს ზედა ტალღა ჰგონია, სინამდვილეში, ჭაობია!
_ „ომეგას“ საქმეს კიდევ ერთი მთავარი ფიგურანტი ჰყავდა _ გიორგი გახარია, რომელსაც, თავის დროზე, ბიზნესომბუდსმენის პოსტი ეკავა. ახლა ქვეყნის პრემიერია. ამ დეტალის გათვალისწინებით „ომეგას“ მდგომარეობა კიდევ უფრო ხომ არ დამძიმდება, ანუ ყველაფრის სააშკარაოზე გამოტანის გამო შურისძიებას ხომ არ ელოდებით?
_ არა! მდგომარეობა როგორ უნდა დამძიმდეს, როცა მტკიცებულებები მტკიცებულებებადაა?! გარკვეული ხნის შემდეგ „ომეგას“ კი არა, გახარიას მდგომარეობა დამძიმდება.
_ რატომ?
_ ის, რომ სტატუსი მოემატა, მისთვის ბევრად უფრო რისკისშემცველია და ამ შემთხვევაში მხოლოდ „ომეგას“ საქმეს კი არა, იგივე 20-21 ივნისის მოვლენებსა და ბევრ სხვა საქმესაც ვგულისხმობ. ისე, ალბათ, მთლიანად საკუთარ თავზეც არ იყო დამოკიდებული, რომ ასეთ რისკზე წასულიყო.
ზოგადად, ადამიანები საკუთარ თავზე არ არიან დამოკიდებულნი _ ეს გახარიასაც ეხება, ხაზარაძესაც და სხვებსაც _ პასუხისმგებლობის აღება მხოლოდ იმ საქმეებზე კი არ უწევთ, რაც თვითონ ჩაიდინეს, არამედ იმ ვითარებაზეც, რომელიც თავიანთი ქმედების გამო შექმნეს!
_ ქალბატონო ნატო, 20 ივნისი ახსენეთ და ბარემ, აქვე გკითხავთ: ანტისაოკუპაციო აქციებზე თავდაპირველად აქტიურად დადიოდით, თუმცა ბოლო დროს თქვენთვის თვალი აღარ მომიკრავს. თქვენი აზრით, ადამიანების გულწრფელი ანტისაოკუპაციო პროტესტი ცალკეულმა ოპოზიციურმა პარტიებმა საკუთარი პოლიტიკური მიზნებისთვის ხომ არ გამოიყენეს?
_ იმაში უცნაური არაფერია, რომ 20 ივნისი პოლიტიკოსებს გამოეყენებინათ.
_ დამისაბუთეთ, უცნაური რატომ არ არის?
_ ნებისმიერ მოვლენას, რომელშიც ადამიანები გულწრფელად არიან ჩართულები და რამეს აპროტესტებენ, რა თქმა უნდა, აუცილებელია, რომ პოლიტიკური მიმართულება მიეცეს. ეს მოვლენა გზას ზოგჯერ თვითონ პოულობს, ზოგჯერ კი ამას პოლიტიკოსები აკეთებენ!
ზაფხულში აქციაზე ადამიანები და, მათ შორის, მეც აქტიურად დავდიოდით _ პროტესტი აბსოლუტურად სამართლიანი იყო და ახლაც სამართლიანია, თუმცა ვერ ვიტყვი, რომ პროტესტი შენელდა. შესაძლოა, გარეგნულად ასე ჩანს _ შეკრება ყოველი თვის 20 რიცხვში ხდება, მაგრამ აქციის ორგანიზატორებს თავიანთი მიმართულება აქვთ.
მოკლედ, იმის თქმა მინდა, რომ 20 ივნისს დაწყებული არ განელდება! რა დროც უნდა გავიდეს, 1989 წლის 9 აპრილის ტრაგიკული მოვლენები მაინც ჩვენთანაა.
_ ანუ 9 აპრილსა და 20 ივნისს შორის ტოლობის ნიშანს სვამთ?
_ იმის თქმა მინდა, რომ ასეთი მწვავე და ტრაგიკული თარიღები მუდამ ადამიანებშია და ოდესმე აუცილებლად იფეთქებს!
_ კითხვას, როგორც იტყვიან, ჩავშლი და კულუარებში გავრცელებულ ხმაზე გკითხავთ: იზიარებთ მოსაზრებას, რომ 20 ივნისის მოვლენები „ევროპულმა საქართველომ“ ხელისუფლებასთან სავაჭროდ გამოიყენა?
_ ვერ გეტყვით, ვინ რა გამოიყენა. შეიძლება, ვინმესთან სავაჭროდ თავად ხელისუფლებამ გამოიყენა. საერთოდ, ყველაფრის ვარაუდი შეიძლება, მით უმეტეს, რომ 20 ივნისის მოვლენა იმდენად მწვავეა, რომ მის განვითარებას ან შენელებას გარკვეული პროცედურა სჭირდება. ყველა ადამიანს კი თავისი მიზანი და მისწრაფება აქვს!
ზოგადად, ყველაფერზე შედეგით უნდა ვიმსჯელოთ, თუმცა ჯერ არ ჩანს, 20 ივნისი ვინ როგორ გამოიყენა.
_ ქალბატონო ნატო, საუბრის თემას შევცვლი და ბოლო დროის კიდევ ერთ-ერთ მნიშვნელოვან, ასე ვთქვათ, მოვლენას შევეხები _ „მთავარმა არხმა“ „იბერიის“ შენობაში დაიდო ბინა. მეტიც, როგოც ცნობილია, „იბერიის“ დამფუძნებლებმა ტელეკომპანიის ტექნიკა და ინფრასტრუქტურა „მთავარს“ უსასყიდლოდ დაუთმეთ. ეს გადაწყვეტილება რატომ მიიღეთ?
_ ამ გადაწყვეტილების მიღება ძალიან მარტივი იყო _ „ომეგას“, ზაზა ოქუაშვილსა და მეც კონსტიტუციის მოთხოვნა უნდა შეგვესრულებინა! კონსტიტუციის მოთხოვნა კი ქვეყანაში დამოუკიდებელი და ალტერნატიული სიტყვის აუცილებლად არსებობაა!
_ მიმიტევეთ, მაგრამ კონსტიტუციის ეს მოთხოვნა შეგეძლოთ, „იბერიის“ მაუწყებლობის აღდგენით დაგეცვათ!
_ დიახ, „იბერიის“ აღდგენითაც შეიძლებოდა, მაგრამ ის ალტერნატიული სიტყვა, რომელიც „რუსთავი 2-ს“ ჰქონდა, „იბერიას“ ასე მასშტაბურად არ გააჩნდა, ანუ არ ვამბობ, რომ „იბერიას“ ეს ალტერნატიული სიტყვა არ ჰქონდა _ რომ ჰქონდა, ამანაც გამოიწვია მთავრობის მხრიდან მისი დახურვის სურვილი, მაგრამ აქ მასშტაბზეა საუბარი. ისე, „იბერიის“ დახურვა „ნიუსების“ ჟურნალისტებმა თავიანთი მოტივირებული პროტესტით დააჩქარეს.
_ შეიძლება, მაგრამ „იბერიაში“ ისეთებიც იყვნენ, რომლებიც მზად გახლდნენ, ენთუზიაზმით ემუშავათ.
_ დიახ, მაგრამ ტელევიზიის მუშაობისთვის თითო-ოროლა ადამიანის ენთუზიაზმი კი არა, გუნდია საჭირო. ასეთი გუნდი „რუსთავი 2-ზე“ არსებობდა, „იბერიაში“ კი, სამწუხაროდ, _ არა!
_ მთლად არ გეთანხმებით, თუმცა თქვენს მოსაზრებას პატივს ვცემ. ქალბატონო ნატო, გულახდილად მითხარით, არ გეხამუშებათ, რომ „იბერიის“ შენობაში, როგორც „მთავრის“ თანამშრომლები, ის ჟურნალისტებიც არიან, რომლებიც ერთი წლის წინ დაგიპირისპირდნენ?
_ ეს თვითონ უნდა ეხამუშებოდეთ, თან ძალიან, მაგრამ ადამიანები, რომლებსაც შეუძლიათ, რომ მოტივირებულად ან ნაკლები გონიერების გამო სხვებს აყვნენ და არაჯანსაღი მოტივაციის გამო ის ჩაიდინონ, რაც ჩაიდინეს, რა თქმა უნდა, ნაკლებად ეხამუშებათ.
„მთავარს“ და სხვა ტელევიზიებსაც, სადაც ეს მოტივირებული ჟურნალისტები იქნებიან, უბრალოდ, ვურჩევდი, ასეთ ადამიანებს არ ენდონ!
_ „იბერიის“ ყოფილ და „ომეგას“ კუთვნილ შენობაში, სადაც ახლა „მთავარია“ დისლოცირებული, მამუკა ხაზარაძის მისვლა შოკისმომგვრელი არ იყო?
_ ტელევიზია მიმდინარე მოვლენებს აშუქებს. მამუკა ხაზარაძე იმ პროცესებში ჩართული აღმოჩნდა, რომელიც ტელევიზიამ უნდა გააშუქოს! მთვარია, ამ გამოჩენით რას იტყვის და თავის სახეს როგორ გამოაჩენს.
მოკლედ, ტელევიზიაში ყველა უნდა გამოჩნდეს და ნამდვილად ვერ ვიტყვი, რომ ამან შოკი მომგვარა!
_ თუ გაირკვევა, რომ „მთავარი არხის“ ერთ-ერთი ინვესტორი მამუკა ხაზარაძეა, თქვენი რეაქცია როგორი იქნება? სხვათა შორის, კულუარებში ასეთი ხმა უკვე დადის…
_ ამ ქვეყანაზე ბევრი ხმა დადის და ასეც რომ იყოს, მერე რა?
_ ამის გამო უხერხულობა არ შეგექმნებათ?
_ ღმერთო, ჩემო! ქვეყანაზე იმდენი პარადოქსი ხდება, რომ ეს პარადოქსიც იმ მრავალს მივათვალოთ!
_ ისე, ზოგი ფიქრობს, რომ „მთავრისთვის“ „იბერიის“ ინფრასტრუქტურის დროებით გადაცემა შესაძლოა, „ომეგაზე“ ხელისუფლების ახალი შეტევის საბაბი გახდეს. ასეთი მოლოდინი თქვენც ხომ არ გაქვთ?
_ „ომეგასა“ და ზაზა ოქუაშვილის თითოეული ნაბიჯი არა მხოლოდ ამ ხელისუფლების მხრიდან დარტყმის საბაბი ხდება ხოლმე. ასე რომ, გარკვეულ წინააღმდეგობებს ყოველთვის ველოდებით, მაგრამ ეს იმაზე, რაც სამართლიანად მიგვაჩნია, ხელს ვერ აგვაღებინებს!
_ მედიაბიზნესზე „ომეგამ“ საბოლოოდ აიღო ხელი?
_ არა, ხელი არ აგვიღია.
_ ანუ „იბერიამ“, შესაძლოა, მაუწყებლობა განაახლოს?
_ იბერია გაბრწყინდება!
_ იბერიის გაბრწყინების იმედი საუკუნეებია, გვაქვს, მაგრამ მე ტელეკომპანია „იბერიის“ გაბრწყინება-განათებაზე გეკითხებით, ქალბატონო ნატო!
_ „იბერია“ ბევრჯერ დახურულა და ისევ გახსნილა! „იბერია“ მოულოდნელად დახურულა და ასევე მოულოდნელად გახსნილა!
ასე რომ, იგივე განმეორებებს უნდა ველოდოთ!
_ საინტერესო პასუხია… ქალბატონო ნატო, მომავალ არჩევნებში მონაწილეობას აპირებთ?
_ არჩევნებამდე ერთი წელია დარჩენილი. ეს არც ბევრია და არც _ ცოტა. ამიტომაც შევხედოთ. თუ ჩემი და რომელიმე პარტიის მიზნები ერთმანეთს დაემთხვევა, რატომაც არა?!
_ ქართულ პოლიტიკურ ბაზარზე არსებობს ისეთი პარტია, რომლის მიზნებსაც თქვენი მიზნები ემთხვევა?
_ ლენინივით ხომ ვერ გეტყვით, არის ასეთი პარტია-მეთქი? როგორც იტყვიან, დაკვირვებას წინ რა უდგას? მაგრამ, ალბათ, მეც მაკვირდებიან და ამიტომაც გეუბნებით, რომ გარკვეული ურთიერთსიმპათია უნდა არსებობდეს! ასეთ შემთხვევაში ერთობლივი მუშაობა შეიძლება!
_ ქალბატონო ნატო, ყოველგვარი მიკიბ-მოკიბვის გარეშე გკითხავთ: გაერთიანებულმა ოპოზიამ კენჭისყრა საკუთარი სიით რომ შემოგთავაზოთ, დასთანხმდებით? არ დაგავიწყდეთ, რომ გაერთიანებულ ოპოზიციაში ის ადამიანებიც არიან, რომლებთანაც „ომეგას“, თავის დროზე, სერიოზული კონფლიქტი ჰქონდა!
_ 1999 წლიდან, რაც პოლიტიკაში შემოვედი, ყოველთვის ოპოზიციურ პარტიებთან ვარ! ამიტომ ოპოზიციურ პარტიაში ჩემი ყოფნა გასაკვირი პირადად არც ჩემთვის იქნება და, ვფიქრობ, არც _ სხვისთვის!
_ ვინაიდან 20 წელზე მეტია, პოლიტიკაში ხართ, გასაკვირი არც ის იქნება, რომ საკუთარი პარტია შექმნათ, თან ახლა ხომ პარტიების შექმნა ერთგვარი პოლიტიკური მოდაა!
_ ახლა ისეთი საარჩევნო კანონია და ისეთი წესები იქმნება, რომ ბევრი პარტია შეიქმნება. ასე რომ, რა გითხრათ, გამორიცხული არაფერია!
_ ქალბატონო ნატო, რეზიუმე რომ გააკეთოთ: ბოლო ერთი წლის განმავლობაში ქვეყანამ ავტორიტარიზმისკენ გადადგა ნაბიჯები, თუ ადამიანები გამოფხიზლდნენ და უსამართლობას არ შეეგუებიან?
_ ქვეყანა სწორად არ ვითარდება, ღარიბდება და უკმაყოფილებაცაა. აი, მთავარი ეს არის. ასეთ განწყობას, ცხადია, არასწორი მმართველობა ქმნის. ეს მმართველობა ზოგჯერ ოფიციალურია, ზოგჯერ _ არაოფიციალური, მაგრამ თუ მმართველობა უკმაყოფილებას ქმნის, ამ უკმაყოფილებას გამოსავალი აუცილებლად ექნება!
_ და გამოსავალი არჩევნებია თუ რევოლუცია?
_ ქვეყნის სწორი განვითარებისთვის სასურველია, რომ არჩევნები იყოს და მოვლენები არაფერმა დააჩქაროს, თუმცა ზოგჯერ ძაფი წყდება.
_ ე. ი., ირიბად რევოლუციასაც არ გამორიცხავთ, არა?
_ ამ ქვეყანაზე არაფერი გამოირიცხება! წინასწარმეტყველი არ ვარ, რომ ვთქვა, როგორ იქნება, თუმცა უკმაყოფილების მუხტი ისეთი დიდია, რომ გამორიცხული არაფერია. მაგრამ, როგორც გითხარით, ქვეყნის სწორი განვითარებისა და საზოგადოების მშვიდი არსებობისთვის არჩევნები აუცილებელია!
საერთოდ, რევოლუციას ყოველთვის ევოლუცია სჯობს!
_ ცხადია, ასეა.

გიორგი აბაშიძე