მთავარი ინტერვიუ ლევან ხაბეიშვილი: „ბოკერიას წუხილები პუჭურა ამბად მიმაჩნია!“

ლევან ხაბეიშვილი: „ბოკერიას წუხილები პუჭურა ამბად მიმაჩნია!“

207
0
გაზიარება

მას შემდეგ, რაც პოლიტიკურად განქორწინდნენ, მათ შორის თბილი ურთიერთობა არასოდეს ყოფილა, ანუ „ნაციონალები“ და „ევროპელები“ ერთმანეთისთვის ფარული კვანტის დადებაზე უარს არასოდეს ამბობდნენ. ამ კუთხით განსაკუთრებით გიგა ბოკერიას ცოლი, თამარ ჩერგოლეიშვილი აქტიურობდა, თუმცა ბოლო დროს ვითარება კიდევ უფრო დაიძაბა და „ნაცმოძრაობაზე“ იერიში გიგა ბოკერიამ, აკაკი ბობოხიძემ და ოთარ კახაძემაც მიიტანეს. ეს, ერთი შეხედვით, გასაკვირი არ უნდა იყოს, რადგან პოლიტიკურ კულუარებში დიდი ხანია, დადის ხმა, რომ „ოცნებასა“ და „ევროპელებს“ შორის ფარული კავშირები არსებობს. მეტიც, ბოკერიას პოლიტიკურ გუნდს „ევროქოცებსაც“ კი ეძახიან.

ყველაფერი ეს „ნაციონალური მოძრაობის“ წარმომადგენლისთვის, თბილისის საკრებულოს დეპუტატ ლევან ხაბეიშვილისთვის, შეთქმულების თეორიაა, თუმცა „ქრონიკა+“-სთან საუბრისას ადასტურებს, რომ „ევროპული საქართველოს“ მხრიდან გაერთიანებულ ოპოზიციასა და, კერძოდ, „ნაცმოძრაობაზე“ თავდასხმა „ოცნების“ წისქვილზე ასხამს წყალს! ამის მიუხედავად, ლევან ხაბეიშვილი განმარტავს, რომ ახლა ოპოზიციამ ყველა პირად წყენაზე უარი უნდა თქვას და ქვეყნის ინტერესებიდან გამომდინარე იმოქმედოს. ეს ინტერესი კი, როგორც ხაბეიშვილი ამბობს, „ოცნების“ ხელისუფლებიდან გაშვებაა!
სხვათა შორის, „ქრონიკა+“-მა შემთხვევით ისარგებლა და ხაბეიშვილს იმის შესახებაც ჰკითხა, აპირებს თუ არა გაერთიანებული ოპოზიცია მამუკა ხაზარაძესთან თანამშრომლობას? იმას, თუ რა გვიპასუხა ჩვენმა რესპონდენტმა ამ კითხვაზე, წინამდებარე ინტერვიუდან შეიტყობთ:

_ ლევან, გაერთიანებული ოპოზიცია და „ევროპული საქართველო“ ერთმანეთს რატომ ექიშპება, თქვენ შორის შავმა კატამ რატომ გაირბინა?
_ ეს თემა ნაკლებ მნიშვნელოვანია, მაგრამ რადგან თქვენ გაინტერესებთ, ვისაუბროთ. სამწუხაროდ, ოპოზიციის ერთი მხარე, ამ შემთხვევაში, „ევროპული საქართველო“, გიგა ბოკერიას ხელმძღვანელობით, ცდილობს, გაერთიანებულ ოპოზიციაზე იერიში მიიტანოს, რაც არანორმალური მგონია, მით უმეტეს, ამ პირობებში.
_ „ამ პირობებში“ რას გულისხმობთ?
_ კორუმპირებულ, პოლიტიკურად და მორალურად აბსოლუტურად ნულზე მყოფ ხელისუფლებას ხალხში არანაირი მხარდაჭერა არ გააჩნია. ამ დროს ოპოზიციის გათითოკაცება და ერთმანეთზე თავდასხმა ბიძინა ივანიშვილისთვის საჩუქარია! შესაბამისად, ყველა ადამიანი, პოლიტიკური გაერთიანება თუ საზოგადოებრივი ჯგუფი, ვისაც უნდა, რომ ისრები, მაგალითად, მიხეილ სააკაშვილსა და მის გამონათქვამებზე ან „ერთიან ნაციონალურ მოძრაობაზე“ გადაიტანოს, ნებსით თუ უნებლიეთ, ბიძინა ივანიშვილისა და ხელისუფლების წისქვილზე ასხამს წყალს! საერთოდ, არ მგონია, რომ ისეთი გამოცდილი პოლიტიკოსები, როგორებიც ბოკერია, ბობოხიძე და ძმანი მათნი არიან, ყველაფერ ამას შემთხვევით აკეთებდნენ.
მოკლედ, რომ არა „ევროპული საქართველოს“ თავდასხმა, არაფერი იქნებოდა, თუმცა სიმართლე გითხრათ, ვერ ამოვხსენი, ეს თავდასხმა რას ემსახურება? იცით, როგორი სიტუაციაა? _ აი, უფროსთან ბავშვი რომ გაჭინჭყლდება და შარს ეძებს, ყველაფერი ამას ჰგავს! ამ პოლიტიკურ რეალობაში იდენტობას კარგავენ და ამიტომ ქვეყნის ინტერესებზე მაღლა პირად ინტერესებს აყენებენ!
_ ლევან, იქნებ, ყველაფერი ეს დავალებაა, მით უმეტეს, დიდი ხანია, დადის ხმა, რომ „ოცნება“ ცდილობს, ხელისუფლება „ევროპულ საქართველოს“ გადააბაროს?
_ ამასაც გეტყვით.
_ გისმენთ.
_ ერთია, მე რას ვფიქრობ და, შესაძლოა, ამ მიმართულებითაც ვფიქრობდე, მაგრამ მეორეა, საჯაროდ რას ვიტყვი, ანუ ამას წინა პლანზე დავაყენებ თუ არა. თქვენთან ინტერვიუებში ბოკერიასთან ჩემ დამოკიდებულებაზე მისაუბრია, მაგრამ ახლა მთავარი არაა, ბოკერიასა და მისი პარტიის მიმართ მე რა დამოკიდებულება მაქვს, რადგან ბევრად მნიშვნელოვანი ამოცანაა გადასაჭრელი, რაც ივანიშვილის რუსული რეჟიმის დასრულება და ამის შემდეგ ჩვენი ქვეყნის წინსვლაა. იმასთან შედარებით, რაც ქვეყანაში ხდება, ბოკერიას წუხილები ყველაზე პატარა და პუჭურა ამბად მიმაჩნია!
_ შეიძლება, მაგრამ თუ დავუშვებთ, რომ ბოკერია ივანიშვილის დავალებას ასრულებს, მაშინ?
_ ადამიანები დასკვნას ჩემ გარეშეც გააკეთებენ. გიგა ბოკერიამ მიხეილ სააკაშვილს არაფრის გამო გაუხსნა ცეცხლი. ისე, პირდაპირ ვთქვათ: ამას „ევროპული საქართველოს“ ყველა წევრი არ აკეთებს! ასე გიგა ბოკერია, კაკო ბობოხიძე, ოთარ კახიძე და მათი „იდეოლოგიური დედა“ _ თამარ ჩერგოლეიშვილი იქცევიან. სხვა პოლიტიკური ლიდერები მსგავს რამეებს ერიდებიან. ამიტომ კარგი იქნება, „ევროპულმა საქართველომ“ გადააფასოს, რა არის მნიშვნელოვანი, თორემ ისრების გადატანა ივანიშვილის თამაშია!
არ ვიცი, ამას დავალებით, ყურში ჩურჩულით აკეთებენ თუ უნებლიეთ, მაგრამ ფაქტია: ოპოზიცია ოპოზიციას ესხმის თავს და ეს ცალსახად ივანიშვილის წისქვილზე წყლის დასხმაა!
სხვათა შორის, ელენე ხოშტარიას განსხვავებული პოზიცია აქვს და, საერთოდ, როგორც ვიცი, რაიონებში შეხვედრებზე დადიოდა და ამბობდა, პარტიას ვტოვებ და მოღვაწეობის გაგრძელებას დამოუკიდებლად ვაპირებო. მოკლედ, ფაქტია, რომ იქ უკმაყოფილება არის, თუმცა „ევროპულ საქართველოზე“ საუბარი არ მინდა. უბრალოდ, თამამად ვამბობ, რომ ყველაფერ ამას ბოკერია, ჩერგოლეიშვილი, ბობოხიძე და კახიძე მიზანმიმართულად აკეთებენ!
_ ასეა თუ ისე, ეს კინკლაობა ოპოზიციურად განწყობილ ამომრჩეველს აბნევს.
_ რა თქმა უნდა, კარგი და ნორმალური არ არის, თუმცა ვიმეორებ: ჩვენთვის ყველაზე მნიშვნელოვანი ქვეყნის ინტერესებია და პირადზე არ უნდა წავიდეთ, თორემ ბოკერია-თარგამაძე-მაჭავარიანთან განსხვავებული შეხედულებები ყველაზე მეტად მე მაქვს და ამაზე საჯაროდაც მისაუბრია.
სხვათა შორის, კმაყოფილი ვარ, რომ ისეთი აგრესიული ბოკერია, როგორსაც ბოლო დროს ვუყურებთ, „ნაციონალურ მოძრაობასთან“ აფილირებული არ არის! შეიძლება, ცალკეულ საკითხებზე ვითანამშრომლოთ, მაგრამ ცალსახად გეუბნებით, რომ მელია-ხაბეიშვილ-დეკანოიძე-უდუმაშვილისა და ბოკერია-ბობოხიძე-თარგამაძე-მაჭავარიანის პარტიებს შორის, რა თქმა უნდა, განსხვავება არის! ამიტომაც, 2018 წელს ადამიანებმა არჩევანი გრიგოლ ვაშაძის სასარგებლოდ გაკეთეს, რომელიც „ნაციონალურ მოძრაობასაც“ წარმოადგენდა, ანუ გაერთიანებულმა ოპოზიციამ ოთხჯერ მეტი მხარდაჭერა მიიღო, ვიდრე გიგა ბოკერია-ჩერგოლეიშვილის კანდიდატმა. აქედან გამომდინარე, მგონი, საზოგადოება კარგად ხვდება, როგორი მნიშვნელოვანია არა განსხვავებებზე საუბარი, არამედ _ გაერთიანება!
ისე, მათი უპასუხისმგებლო პოლიტიკის გამო ახლა ჩვენ ამ თემებზე გვიწევს საუბარი და არა _ იმაზე, თუ როგორ უნდა დავასრულოთ ბიძინა ივანიშვილი ან იმაზე, თუ რა ხდებოდა ზალკალიანისა და რუსეთის საგარეო საქმეთა მინისტრის შეხვედრაზე. სხვათა შორის, ქართული მხარე სხვა რამეს ამბობს, რუსული კი _ სხვას. ისე, საინტერესოა, ერთმანეთს საერთოდ რატომ შეხვდნენ?
_ ამ შეხვედრაში ცუდი რა არის?
_ რუსეთთან ერთი-ერთზე დარჩენა იმას ნიშნავს, რომ ჩვენს დასავლელ მეგობრებსა და პარტნიორებს ვეუბნებით, ოკუპაციის მოგვარება მარტო შეგვიძლიაო. როცა ტერიტორიები ოკუპირებულია და უკანონო ბორდერიზაცია მიმდინარეობს, ჩვენი ქვეყნის ინტერესებზე ჩვენ უნდა ვიფიქროთ, ანუ თუ მეგობრებს არ ვეტყვით, თქვენი დახმარბა გვჭირდებაო, ისინი, რა თქმა უნდა, გვეტყვიან, თუ მოლაპარაკება შეგიძლია, კი ბატონო, რუსეთს მარტო მოელაპარაკეო. მოკლედ, როცა ამბობ, რომ რუსეთთან ერთი-ერთზე მოლაპარაკება შეიძლება, ეს უკვე სახელმწიფო ინტერესების ღალატია!
_ ლევან, ოპოზიციაში არსებულ განხეთქილებაზე სწორედ ამ კონტექსტში გელაპარაკებით, ანუ 20 ივნისს, როცა გავრილოვი პარლამენტის თავმჯდომარის სავარძელში ჩაჯდა, დიდი საპროტესტო მუხტი იყო, მაგრამ ეს მუხტი თანდათან მინელდა. მაქვს ინფორმაცია, რომ ოპოზიცია ამ მუხტის მინავლებას „ევროპელებს“ აბრალებს და, მეტიც, ჩერგოლეიშვილს, რომელიც, თურმე, მიტინგზე გამომსვლელთა სიას ადგენდა, ბრალიც წაუყენეს. მოკლედ, ყველაფერი ეს განა, ერთ კონტექსტში არ უნდა განვიხილოთ?
_ გულწრფელად გეუბნებით: იმ ახალგაზრდებმა, რომლებიც სამი თვე ქუჩაში იდგნენ, დიდი საქმე გააკეთეს!
_ ამაზე არც მე გეკამათებით!
_ ვერ დავადასტურებ, რამე განხილვები იყო თუ არა. ისიც ცალკე საკითხია, ვინმე სიას ადგენდა თუ არა, მაგრამ ეს მნიშვნელოვანი არაა! შეიძლება, სხვადასხვა მიმართულებაზე განსხვავებული ხედვები გვაქვს, მაგრამ ამ ახალგაზრდებმა, ქართველ ხალხთან ერთად, უდიდესი საქმე გააკეთეს.
_ და ეს „უდიდესი საქმე“ რა არის?
_ თუნდაც, პროპორციული არჩევნები, ანუ ამ ახალგაზრდებმა პროცესი გარკვეულ დონემდე მიიყვანეს და ამისთვის ძალიან დიდი მადლობა. სხვათა შორის, მინდა, რომ ეს ახალგაზრდები ივანიშვილის ხელისუფლების გაშვებაშიც ჩაერთონ, ამიტომ არ შევდივარ იმ შეთქმულების თეორიაში, რომ, მაგალითად, აქცია ვინმეს ოკუპირებული ჰქონდა. კი ბატონო, მესმის, რომ ამ თემას საზოგადოება განიხილავს, მაგრამ ამაზე მნიშვნელოვანი პრობლემები გვაქვს. ბოლოს და ბოლოს, ოფიციალურად მოძალადე პრემიერი დაგვინიშნეს _ დიახ, ფილმის გადაღებაც შეიძლება იმაზე, რომ გახარია მოძალადე დამნაშავეა, კერზაიას მკვლელობიდან დაწყებული ხაზარაძის ამბით დამთავრებული. ისე, ხაზარაძეზე შეიძლება, დიდი წარმოდგენა არ მაქვს, მაგრამ ფაქტია, რომ ეს კაცი შს ყოფილ მინისტრს პირდაპირ ადებს ხელს და ამბობს, რომ მასზე ძალადობდა. ამას გარდა, გახარიამ 20 ივნისის აქციაზე ძალა გამოიყენა.
მოკლედ, საქართველოს რუსეთის მიერ არჩეული და გავრილოვ-პუტინის მიერ მოწონებული პრემიერი ჰყავს, რომელსაც დანაშაულებები აქვს ჩადენილი და ამ დროს ცეცხლი ოპოზიციას გავუხსნა და მაგალითად, თამარ ჩერგოლეიშვილი შევაფასო, რომელსაც, ალბათ, სახლშიც არ აფასებენ, საინტერესო არ იქნება!
სხვათა შორის, ჩერგოლეიშვილმა ყველაზე მეტად თვითონ იცის, რომ საინტერესო არ არის და ამიტომ ცდილობს, დისონანსი შემოიტანოს და ამით ყურადღება მიიქციოს!
_ ლევან, ჩერგოლეიშვილზე საუბრის გაგრძელებას არც მე ვაპირებ, ამიტომ, რასაც გკითხავთ, პირდაპირ მიპასუხეთ: ოპოზიციამ მიდგომა ხომ არ უნდა შეცვალოს და, ოკუპაციის პარალელურად, სხვა აქტუალური თემებიც ხომ არ უნდა წამოსწიოს წინა პლანზე? იცით, ამას რატომ გეკითხებით? _ გამოკითხვების მიხედვით, ტერიტორიული მთლიანობის საკითხი უკანა პლანზეა გადასული.
_ სამწუხაროა, რომ ეს თემა მინელდა, რაც სახელმწიფო პოლიტიკის ბრალიცაა. ადამიანებს, უბრალოდ, შიათ. ისე, წინა ხელისუფლების დროს ტერიტორიული მთლიანობა ნომერ პირველი პრობლემა იყო, მიუხედავად იმისა, რომ სოციალური პრობლემები მაშინაც არსებობდა, თუმცა არა ასეთი სიმძაფრით.
მოკლედ, ახლა ადამიანებს პირველადი მოხმარების პრობლემები აქვთ, რაც შიმშილსა და ეკონომიკას უკავშირდება. აი, ამის შემდეგ მოდის ტერიტორიული მთლიანობის პრობლემა. ეს, ვიმეორებ, სახელმწიფოს პოლიტიკის ბრალია, ანუ ადამიანები თვითგადარჩენაზე ფიქრობენ!
_ ჰოდა, აქედან გამომდინარე, ოპოზიციამ „მესიჯბოქსი“ ხომ არ უნდა შეცვალოს?
_ ადამიანების მოტყუება არ მიყვარს და ვცდილობ, გულწრფელი პოლიტიკოსი ვიყო, ამიტომ ოპოზიციის ტაქტიკაზეც ღიად გეტყვით: დიახ, ოპოზიციის სტრატეგია ბევრი მიმართულებით შესაცვლელია და ამაზე სამუშაოა!
ოპოზიციას, რა თქმა უნდა, ბევრი შეცდომა ჰქონდა.
_ მაინც, რა შეცდომა?
_ მაგალითად, შეგვეძლო, რომ კონკრეტულ სიტუაციაში უფრო მოქნილად და სწორად გვემოქმედა. სხვათა შორის, მე, როგორც ოპოზიციის წარმომადგენელი, ამ უთავმოყვარეო ხელისუფლების გამო პასუხისმგებლობას ვგრნობ!
_ ხელისუფლების გამო პასუხისმგებლობას თქვენ რატომ გრძნობთ?
_ ეს უპასუხისმგებლო ხელისუფლება ჩვენი სამშობლოს ინტერესებს ყოველდღიურად აზიანებს და იმაზეც, რომ „ოცნება“ ისევ ხელისუფლებაშია, დიახ, პასუხისმგებლობას ვგრძნობ, თუმცა მეც და ჩემი კოლეგებიც მზად ვართ, უფრო ეფექტიანად ვიმუშაოთ და ეს პროცესი სწრაფად დავასრულოთ!
ხომ ვნახეთ, შეწყალებებთან დაკავშირებით რაც ხდება, მაგრამ გასაკვირი არაა, რადგან კრიმინალებთან გარიგებული ხელისუფლება კრიმინალებთან ითანამშრომლებს და ეს ორჯერ ორი ოთხია!
ყველაფერს თავი რომ დავანებოთ, თავად ივანიშვილიც კრიმინალია _ მარტო საყდრისის აფეთქება და „გავრილოვის ღამეს“ გაცემული დავალებები რად ღირს!
_ რით ამტკიცებთ, რომ 20 ივნისს, აქციის დაშლის დროს, დავალებებს ივანიშვილი გასცემდა?
_ დააკვირდით: იგივე პროპორციულ არჩევნებზე პრემიერმა ან სხვა თანამდებობის პირმა კი არა, ივანიშვილმა თქვა.
_ დიახ, ასე იყო, მაგრამ ეს, ჩემი აზრით, არცთუ მყარი არგუმენტია. ისე, ამბობთ, ეს პროცესი დროზე უნდა დასრულდესო და რა, 2020-ის არჩევნებს არ უნდა დაველოდოთ?
_ ხელისუფლება, ნებისმიერ შემთხვევაში, არჩევნებით შეიცვლება. სხვათა შორის, ხელისუფლებამ ამ წლების განმავლობაში სიტყვა „რევოლუციაზე“ ხალხს ისეთი განცდა გაუჩინა, რომ ეს თითქოს კატასტროფაა, რომელმაც სახელმწიფო შეიძლება, დაანგრიოს.
_ რევოლუცია კარგი, მართლაც, არ არის!
_ უკაცრავად, მაგრამ ის, რაც სომხეთში მოხდა, რევოლუცია იყო, რომელიც შემდეგ არჩევნებით დეკლარირდა! მოკლედ, სომხეთში განსაკუთებული არაფერი მომხდარა და ისიც, რაც მოლდოვაში მოხდა, რევოლუცია იყო, რითაც ოლიგარქის მმართველობა, პრაქტიკუალდ, დასრულდა.
_ უკაცრავად, ეს რა შუაშია?
_ ხელისუფლების შესაცვლელად კონსტიტუციით სხვადასხვა ბერკეტია გათვალისწინებული, მათ შორის, სახალხო აქციები, რასაც, შესაძლოა, ვადამდელი არჩევნები მოყვეს!
_ ამ მსჯელობაში ლოგიკა, ცხადია, არის, მაგრამ სომხეთის ე. წ. რევოლუციას პაშინიანი ჩაუდგა სათავეში, ჩვენ კი პაშინიანი, ანუ ისეთი ოპოზიციური ლიდერი, ვისაც ხალხი უპირობოდ გაჰყვება, არ გვყავს!
_ პაშინიანი დიდი ხნის პოლიტიკოსია, დიდი გზა გაიარა და, საბოლოო ჯამში, ის მოხდა, რაც მოხდა, ანუ პაშინიანი ციდან უცებ არ ჩამოვარდნილა!
არჩევნების ლოდინი, რომ ეს აუცილებლად 2020-ში მოხდება, დანაშაულია
_ ანუ?
_ 2020 წლის ოქტომბრამდე ხელები უნდა ჩამოვუშვათ? _ არა! მე, როგორც საქართველოს მოქალაქე, ვგრნობ, რომ „ოცნების“ ხელისუფლებაში ყოფნის ყოველი წამი და წუთი პრობლემაა, ამიტომ უნდა ვიბრძოლოთ, რომ „ქართული ოცნების“ ხელისუფლება რაც შეიძლება, მალე დამთავრდეს და ყველაფერი ეს, რა თქმა უნდა, არჩევნებით მოხდეს!
_ ლევან, თქვენი სურვილი გასაგებია, მაგრამ ყველაფერს პრაგმატულად შევხედოთ და მითხარით, ხედავთ საზოგადოების მზაობას, რომ ოპოზიციას გაჰყვეს?
_ მართალია, საპრეზიდენტო არჩევნებით მთავრობა არ იცვლებოდა და ეს ყველამ კარგად იცოდა, ძალადობისა და ტერორის მიუხედავად, ოპოზიციამ, პრაქტიკულად, იმდენი ხმა მიიღო, 2016 წლის საპრეზიდენტო არჩევნებში „ოცნებას“ საკონსტიტუციო უმრავლესობა მოუტანა, ანუ მაშინ „ოცნებამ“ 800 ათასი ხმა აიღო, ოპოზიციამ კი გასული წლის საპრეზიდენტო არჩევნებზე 900 ათასზე მეტი ხმა აიღო!
მოკლედ, ვერ დაგეთანხმებით, რომ საზოგადოება მზად არაა. პირიქით, მგონია, რომ საზოგადოება იმაზე მეტადაც კი არის მზად, ვიდრე, ვთქვათ, ოპოზიცია იყო მომზადებული!
აქედან გამომდინარე, მნიშვნელოვანია, რომ ოპოზიცია მტკიცე და ერთიანი იყოს! პირადი დაპირისპირება და ბოღმა უნდა გადავდოთ. ამ განსხვავებებზე საუბარი მას შემდეგ შეიძლება, რაც ივანიშვილი ხელისუფლებაში აღარ იქნება!
_ სხვათა შორის, „ოცნების“ ხელისუფლებიდან გაშვება, მაგალითად, ნინო ბურჯანაძესაც სურს, ანუ უნდა ველოდოთ, რომ ამ მიზნისთვის ოპოზიციის ყველა ფრთა გაერთიანდება?
_ მახსოვს, ქალბატონი ნინო პუტინთან. მემორიალი ყვავილებითაც შეამკო. ეს უსაშინელესი კადრი იყო, რომელიც არ დამავიწყდება! შესაბამისად, პრორუსულ ძალებთან თანამშრომლობაზე საუბარიც კი ზედმეტია!
რაც შეეხება პროდასავლურ ძალებს, მეც, მიხეილ სააკაშვილიც და, საერთოდ, გაერთიანებული ოპოზიცია მათთან სათანამშრომლოდ მზად ვართ!
_ მამუკა ხაზარაძესთანაც ითანამშრომლებთ? სხვათა შორის, მავანნი ხაძარაძესაც, ივანიშვილის მსგავსად, ოლიგარქად მიიჩნევენ და ამბობენ, რომ ქართულ პოლიტიკაში ოლიგარქატის დრო უნდა დასრულდეს. ასევე არსებობს მოსაზრება, რომ ხაზარაძის პოლიტიკაში შემოსვლა ივანიშვილს აძლიერებს. ამაზე რას იტყვით, ლევან?
_ ხაზარაძემ პირდაპირ ეთერში კონკრეტულ კრიმინალზე ისაუბრა, ანუ თქვა, კაბინეტში დაგვიბარეს და ბიზნესზე იძალადესო.
_ მერე?
_ თუ გაინტერესებთ, ჩემი სუბიექტური დამოკიდებულება ასეთია: ხაზარაძემ, პრაქტიკულად, აღიარა, რომ წინასაარჩევნოდ ივანიშვილთან დანაშაულებრივ გარიგებაში შევიდა. აქედან გამომდინარე, მაქვს საფუძველი, რომ ხაზარაძის მიმართ სკეპტიკურად ვიყო განწყობილი, მაგრამ მის გუნდში არიან ადამიანები, რომლებთანაც თანამშრომლობა, რიგ საკითხებში, რა თქმა უნდა, შესაძლებელია.
თუ ხაზარაძე თამაშს ისევე არ დაიწყებს, როგორც, მაგალითად, 2018 წელს თამაშობდა _ ერთი ხელით მასზე, თურმე, ზეწოლა ხორციელდებოდა, მეორე ხელით კი გამოდიოდა და ამბობდა, ბიზნესში რენესანსის ხანააო. მოკლედ, იმის თქმა მინდა, რომ თუ ამ ბრძოლაში ხაზარაძე გულწრფელი იქნება, რა თქმა უნდა, მასთანაც ვითანამშრომლებთ!
_ ისე, ლევან გამორიცხავთ, რომ ბოლო წუთს ხაზარაძემ პოლიტიკური პარტიის შექმნა გადაიფიქროს და თქვას, მთელ ჩემს ფინანსურ და ადამიანურ რესურსს „ევროპულ საქართველოს“ მოვახმარო? სხვათა შორის, ამ ვერსიას კულუარებში უკვე აქტიურად განიხილავენ…
_ ხაზარაძის ნაცვლად ვერ გიპასუხებთ, თუმცა პოლიტიკაში არაფერს გამოვრიცხავ! მაგალითად, 2013-2014 წელს ჩემთვის ვინმეს რომ ეთქვა, მოვა დრო და ეკა ბესელიას მიმართ სოლიდარული იქნებიო, გამეცინებოდა, თუმცა ახლა ეს მოხდა. მოკლედ, პოლიტიკაში ვართ და არაფერს გამოვრიცხავ!
ყველაფერი იმ შემთხვევაში უნდა დავივიწყოთ, თუ ეს ჩვენი სამშობლოს ინტერესებს სჭირდება, თუმცა ადამიანების გრძნობებით მანიპულირების საშუალება არავის უნდა მივცეთ! ყოველ შემთხვევაში, მე ასე ვარ!
_ ბესელიას მიმართ კი ხართ სოლიდარული, მაგრამ „ოცნების“ ქმედებებზე პასუხისმგებლობა, განა, მასაც არ ეკისრება?
_ რა თქმა უნდა, ეკისრება! ამ ადამიანს მორალური ტერორი მოუწყვეს და მის მიმართ სოლიდარული ამ კუთხით ვარ, თუმცა მისი პოლიტიკური ქმედებებისა და საქციელის სოლიდარული ვერასოდეს ვიქნები, რადგან იმ რუსული ხელისუფლებისა და სასამართლო სისტემის თანამონაწილეა, რომელიც ივანიშვილმა ჩამოაყალიბა!

გიორგი აბაშიძე

 

დატოვეთ კომენტარი