მთავარი სიახლეები თამარ ჩხეიძე: „ხელისუფლება რუსეთის საამებლად ამძიმებს ვითარებას“

თამარ ჩხეიძე: „ხელისუფლება რუსეთის საამებლად ამძიმებს ვითარებას“

0
0
გაზიარება

ეროვნული მოძრაობის ერთ-ერთი ლიდერი, თამარ ჩხეიძე, დარწმუნებულია, რომ საქართველო არასდროს გახდება რუსეთის გუბერნია ამ სიტყვის პირდაპირი გაგებით. ამასთან, კარგად ხედავს, რომ ჩვენმა ქვეყანამ კარგა ხანია, რაც დასავლური კურსიდან გადაუხვია. მისი თქმით, თუ გვინდა, რომ საქართველო კვლავ დასავლურ რელსებზე დადგეს, „ქართულ ოცნებას“ უარი უნდა ვუთხრათ. ჩხეიძის აზრით, ამის გაკეთებაში დასავლეთს შეუძლია დიდი დახმარების გაწევა, მაგრამ მთავარი გასაკეთებელი ჩვენმა საზოგადოებამ უნდა გააკეთოს. მას ეჭვები აქვს კოვიდის მართვასთან დაკავშირებით. ფიქრობს, რომ ხელისუფლებამ განგებ დაამძიმა სიტუაცია. მისი თქმითვე, „ოცნებამ“ იმიტომ შეზღუდა მუნიციპალური ტრანსპორტი, რომ ვაქცინაციის პროცესი შეფერხდეს.

რა ეჭვები აქვს კოვიდის მართვასთან დაკავშირებით? რა კავშირი აქვს ამ ყველაფერთან რუსეთს? რით ხსნის ოპოზიციის პასიურობას? რა შემთხვევაში დაგვეხმარება დასავლეთი? _ ამ თემების შესახებ თამარ ჩხეიძე „ქრონიკა+“-ს ესაუბრება:

_ ბევრს ეშინოდა, რომ ხელისუფლებაში „ქართული ოცნების“ მოსვლის შემდეგ საქართველო რუსულ ორბიტაზე აღმოჩნდებოდა. საქართველომ დასავლური კურსიდან რომ გადაუხვია, ამაზე უკვე ღიად საუბრობენ ევროპასა და ამერიკაში. თქვენი აზრით, ეს არჩეული გზა საქართველოს გადააქცევს რუსეთის გუბერნიად?

_ „ქართულ ოცნებას“ როგორ უნდა გადაეხვია დასავლური კურსიდან, როცა არასდროს ყოფილან პროდასავლურები? მათი განცხადებები დასავლეთზე იყო ლოზუნგები და მეტი არაფერი. ეს ხელისუფლება რეალური არსით ყოველთვის რუსეთზე იყო ორიენტირებული. აქამდე რაღაცნაირად ინიღბებოდნენ, ახლა კი რუსეთისკენ აშკარა ნაბიჯები გადადგეს. ჯერ კიდევ ხელისუფლებაში მოსვლამდე ჰქონდათ მიზანი, რომ საქართველო ნაკლებად აქტუალური გაეხადათ, დაეშორებინათ დასავლეთისთვის, ოკუპაციაზე არავის ელაპარაკა. მთელი რიგი წინააღმდეგობის გარეშე რუსებისთვის უნდა გადაეცათ ჩვენი მიწები. ეს პროცესი „ოცნების“ მოსვლისთანავე დაიწყო და დღემდე გრძელდება. მხედველობაში მაქვს მცოცავი ოკუპაცია. არ ვეთანხმები იმ მოსაზრებას, რომ „ოცნებამ“ დასავლურ კურსს გადაუხვია. ისინი იმ გზას ადგანან, რა გზასაც ადგნენ თავიდანვე. საქართველო რუსეთისკენ რომ წავიდოდა, ეს დეკლარირებულიც იყო.

_ რას გულისხმობთ?

_ ხელისუფლებაში მოსვლამდე ივანიშვილმა არაერთი განცხადება გააკეთა. ამბობდა, აგვისტოს ომი საქართველომ დაიწყო, ჩვენი პრობლემებით დასავლეთსა და რუსეთს ურთიერთობაში ხელი არ უნდა შევუშალოთო და ათასი სხვა რამე.

_ ჩვენი პრობლემებით დასავლეთს უკვე აღარ ვაწუხებთ და ისინი, თავის მხრივ, აღარ ახორციელებენ ზეწოლას რუსეთზე.

_ რუსეთის მიზანიც ეს იყო. საქართველოში მოიყვანა ისეთი ხელისუფლება, რომელიც ხმას არ იღებს ოკუპაციაზე.

_ ჩვენი რუსეთის მიმართულებით სვლა სადამდე უნდა გაგრძელდეს, სანამ რუსეთის გუბერნია არ გავხდებით, როგორც ამას ხშირად ამბობენ?

_ რუსეთის გუბერნია არასდროს გავხდებით. ეს ანაქრონიზმია. პირდაპირი მნიშვნელობით რუსეთის გუბერნია არ ვიქნებით, მაგრამ არც თავისუფლები გვერქმევა. როდესაც დამოუკიდებელ პოლიტიკას არ ატარებ და საქართველოს ინტერესების ნაცვლად რუსეთისას ითვალისწინებ, ეს უკვე ძალიან ცუდია.

_ ვინ ან რამ შეიძლება შეუშალოს ხელი „ქართულ ოცნებას“, რომ საქართველოში რუსული ინტერესები აღარ გაატაროს?

_ არ ვიცი. ამასთან დაკავშირებით პირდაპირ რამის თქმა ძალიან ძნელია. როგორც წესი, ასეთ რამეში ხელისუფლებას საზოგადოება უნდა უშლიდეს ხელს. „ოცნებისთვის“ ხელის შეშლა დასავლეთის დემოკრატიულ სამყაროსაც შეუძლია. ვერ ვიტყვი, რომ ქართული საზოგადოება საკმარისად აქტიურია და ადეკვატური რეაქციები აქვს ქვეყანაში მიმდინარე პროცესებზე. ყველაფრის მიუხედავად, მაინც იმედი მაქვს, რომ ხალხი გამოიღვიძებს.

_ როდის გამოიღვიძებს? ან რა უნდა მოხდეს ისეთი, რომ ქართულმა საზოგადოებამ ადეკვატური რეაქცია გამოამჟღავნოს?

_ ვერ გეტყვით, ამის განსაზღვრა ძალიან ძნელია. ჩვენს საზოგადოებას ხშირად უმნიშვნელო ამბავზე ახასიათებს აღშფოთების გამოხატვა, სამაგიეროდ, მნიშვნელოვან საკითხებზე არ რეაგირებს. მაგრამ როცა არ ელი, ხალხის პროტესტი მაშინ იფეთქებს ხოლმე. ახლა მოგუდული პროტესტის რეჟიმში ვართ. საქართველოში რუსული ინტერესების გატარება რომ შეწყდეს, ეს, პირველ რიგში, ჩვენი საზოგადოების მოსაგვარებელია. აქტიურობა მართებს ოპოზიციასაც, რომელიც ასევე საზოგადოების ნაწილია.

_ დასავლეთის რეაქციებზე რას ფიქრობთ, საკმარისია?

_ საქართველოში მიმდინარე პროცესებით დასავლეთი აშკარად შეშფოთებულია.

_ იმედია, შეშფოთების დონეზე არ დარჩებიან.

_ ვერ გეტყვით. მიჭირს იმის თქმა, რამდენად ადეკვატური იქნება დასავლეთის რეაქცია. ჯერ ჩვენ უნდა გვქონდეს რეაქცია.

_ ე. ი. დასავლეთის რეაქცია ჩვენს რეაქციაზეა დამოკიდებული.

_ რა თქმა უნდა. ჩვენ თუ არაფერი ვთქვით და მოგუდული პროტესტით დავკმაყოფილდით, არც დასავლეთი შეიწუხებს თავს. ასე რომ, დიდწილად საზოგადოებაზეა. დამოკიდებული, რას იზამს დასავლეთი. დასავლეთს ძალიან ბევრი რამის გაკეთება შეუძლია.

_ საქართველოსთვის ფინანსური დახმარების შეწყვეტას გულისხმობთ?

_ ამას ნამდვილად არ ვგულისხმობ. დასავლეთის აღშფოთება „ქართული ოცნების“ მიმართ ქვეყანაზე არ უნდა აისახოს. ფინანსური დახმარება თუ შეგვიწყვიტეს, ეს საქართველოსა და მისი მოსახლეობის წინააღმდეგ იქნება მიმართული. ევროპამ და ამერიკამ კონკრეტულ პირებს უნდა დაუწესოს ფინანსური სანქციები. ამ პირებს საერთოდ არ ადარდებთ, დასავლეთი დახმარებას თუ შეაჩერებს. მათ პირადი ანგარიშები და ინტერესები ადარდებთ. მათ ანგარიშებს თუ დაემუქრება საფრთხე, ეს „ოცნებისთვის“ სერიოზული მუხრუჭი იქნება.

_ თქვენი აზრით, დაუწესებს დასავლეთი „ოცნების“ მაღალჩინოსნებს ფინანსურ სანქციებს?

_ ვერ გეტყვით. ამასთან დაკავშირებით რაღაც მინიშნებები გაკეთდა, მაგრამ კონკრეტული არაფერი ჩანს.

_ ამასობაში ტროლები და ბოტები ცდილობენ, ხალხში ანტიდასავლური განწყობები გააჩინონ. მაგალითად მოჰყავთ ავღანეთი და ამბობენ, ჩვენც ისევე შეგვატოვებენ რუსებს, როგორც ავღანეთი შეატოვეს თალიბებსო.

_ ვიღაცები მართლა შეშინდნენ, რომ შეიძლება დასავლეთმა მიგვატოვოს, მაგრამ ამით ანტიდასავლურ განწყობებს ვერ გააღვივებენ. ამ მიმართულებით კარგა ხანია, სერიოზული მუშაობა მიდის. პრორუსებს, მაგალითად, იმისაც არ ეშინიათ, თუკი დასავლეთი საქართველოს დატოვებს. ერთი სული აქვთ, რუსეთთან და რუსეთის ამარა დავრჩეთ.

_ მსოფლიოში უცნაური და საინტერესო პროცესები მიდის, არის იმის ალბათობა, რომ დასავლეთმა რაღაცის სანაცვლოდ საქართველო რუსეთს დაუთმოს?

_ ისეთი პროცესები მიდის, რომ რაღაცის გამორიცხვა ძალიან ძნელია. რაღაც საშიშროება ყოველთვის არსებობს. ჩვენ უნდა ვიყოთ ძალიან აქტიურები, მოსკოვსაც და დასავლეთსაც მკაფიოდ უნდა ვუთხრათ, რომ რუსულ ორბიტაზე დაბრუნებას არ შევეგუებით. ისევ ასეთი პასიურები თუ ვიქნებით, მაშინ ჩვენი საქმე კარგად არ იქნება.
ავღანეთის მაგალითი მოიყვანეთ და მეც ავღანეთის მაგალითს მოვიყვან: ავღანურ საზოგადოებას ცოტა მეტად რომ გამოეჩინა თავი, მაშინ ისეთ სავალალო დღეში არ ჩავარდებოდნენ, როგორშიც ახლა არიან. მათ ვერ შეძლეს სათანადოდ გამოეყენებინათ ამერიკის დახმარება.

_ არადა, ამერიკამ ძალიან ბევრი ფული ჩადო ამ ქვეყანაში.

_ ფულის რაოდენობას მნიშვნელობა არ აქვს. ავღანელებმა ეს დახმარება ვერ გამოიყენეს. არ იაქტიურეს და დღეს ავღანეთს თალიბები დაეპატრონნენ. ახლა მესმის მოსაზრებები, რომ ის, რაც ავღანეთში მოხდა რუსეთისთვის იქნება ცუდი. შესაძლოა, ეს რუსეთისთვის მართლა ცუდი იყოს, მაგრამ, პირველ რიგში, ავღანეთისთვისაა ცუდი.

_ თალიბების ხელში ავღანელებს ჯოჯოხეთში მოუწევთ ცხოვრება.

_ რა თქმა უნდა. ძალიან მადარდებს ამ ადამიანების ბედი. იქ ცხოვრება უკვე საშიშია. ნებისმიერი იქაურის სიცოცხლე საფრთხეშია. ის, რაც ავღანეთში მოხდა, ამერიკის პრესტიჟსაც სერიოზულ ზიანს მიაყენებს.

_ ისევ ჩვენს ქვეყანას დავუბრუნდეთ. ძალიან მალე გვაქვს არჩევნები და მისთვის არც ხელისუფლება ემზადება და არც ოპოზიცია. საზოგადოებაც ზერელედ უყურებს ამას. არადა, ეს არჩევნები რეფერენდუმად მოინათლა. რატომ არის ასეთი პასიურობა ამ მეტად მნიშვნელოვანი არჩევნების წინ?

_ ჯერჯერობით ის პოლიტიკური ტემპერატურა არ არის ქვეყანაში, რაც არჩევნების წინ უნდა იყოს. ოპოზიციამ ამომრჩეველს კარგად უნდა აუხსნას, რას ნიშნავს რეფერენდუმი. საზოგადოების იმ ნაწილმა, რომელიც აქტიურია და კარგად ერკვევა პოლიტიკაში, იცის, რომ ეს არის ჩვეულებრივი არჩევნები. საზოგადოების ნაწილი ფიქრობს, რომ საარჩევნო ყუთთან რომ მივლენ, ბიულეტენში ჩვეულებრივად რეფერენდუმის კითხვას ნახავენ. მათ იქ ასეთი კითხვა არ დახვდებათ. ამან შეიძლება, დაბნეულობა გამოიწვიოს.
დაბნეულობა და გაურკვევლობა რომ არ იყოს, ოპოზიციამ ამომრჩეველს მისთვის გასაგებ ენაზე უნდა აუხსნას, რას გულისხმობენ, როცა ამ არჩევნებს რეფერენდუმს უწოდებენ? ყველას თავში უნდა ჩაუდონ, რაში მდგომარეობს ამ რეფერენდუმის არსი. მე ჩემი მხრიდან ვეტყვი ამომრჩეველს, რეფერენდუმის არსი ახლა იმაში მდგომარეობს, რომ „ოცნებას“ ხმა არ უნდა მისცენ. ნებისმიერი პარტია შემოხაზონ, მაგრამ არა ივანიშვილის პარტია.
ასეთი არჩევანი თავისთავად შეასრულებს რეფერენდუმის როლს. რა იგულისხმება ამ რეფერენდუმში, ეს უნდა დავიდეს ნებისმიერ არაპოლიტიზებულ მოქალაქემდე. ამ მიმართულებით ოპოზიციამ სერიოზულად და აქტიურად უნდა იმუშაოს.

_ ხალხთან როგორ უნდა იმუშაონ, როცა თავად ოპოზიციის რიგებშიც არ იგრძნობა ენთუზიაზმი?

_ გეთანხმებით. ნამდვილად არ არის ისეთი პოლიტიკური ტემპერატურა, როგორიც არჩევნების წინ უნდა იყოს.

_ მიხეილ სააკაშვილის ჩამოსვლის შემთხვევაში თუ მოიმატებს ეს ტემპერატურა? მან კიდევ ერთხელ დააანონსა, რეფერენდუმის წინ ჩამოვალ საქართველოშიო.

_ ეს განცხადება რამდენიმე კვირის წინ გააკეთა. მას შემდეგ მისგან მსგავსი რამე არ მომისმენია.

_ არ გაუმეორებია, მაგრამ მის მომხრეებს სჯერათ, რომ დაბრუნდება.

_ ვერ გეტყვით.

_ თუ ჩამოვიდა, ეს აწევს პოლიტიკურ ტემპერატურას?

_ არ ვარ დარწმუნებული, რომ ახლა მისი ჩამოსვლა აუცილებელი იყოს.

_ რატომ არ არის მისი ჩამოსვლა აუცილებელი?

_ სააკაშვილი რომ დაბრუნდეს, მაშინ საამისო პირობები უნდა არსებობდეს საქართველოში.

_ საამისო პირობებში რას გულისხმობთ?

_ საქართველოში სათანადო პირობები თუ არ იქნა, „ოცნებას“ საშუალება მიეცემა, დაბრუნებული სააკაშვილის წინააღმდეგ კონკრეტული ზომები მიიღოს.

_ კონკრეტულ ზომებში მის დაკავებას გულისხმობთ?

_ არაფერია გამორიცხული, ამიტომ ვამბობ, საამისო პირობები თუ არ იქნა, მიშა არ უნდა ჩამოვიდეს. ან უნდა ჰქონდეს გარანტია, რომ თუ დააკავებენ, სათანადო პროტესტი იქნება. ჯერჯერობით საქართველოში პოლიტიკური ტემპერატურა მაღალი არ არის. მერე რა იქნება, ვნახოთ.

_ ტემპერატურამ თუ არ აიწია, ყველაფერი, ალბათ, ისე დამთავრდება, როგორც „ოცნებას“ უნდა.

_ ოპოზიციამ და საზოგადოებამ თუ არ იაქტიურეს, დიდი ალბათობით, არაფერი შეიცვლება.

_ და როგორც ირაკლი კობახიძემ თქვა, 2024 წლამდე საქართველოში არჩევნები აღარ ჩატარდება.

_ ღმერთმა ნუ ქნას, რომ ირაკლი კობახიძის ოცნება ახდეს. ამაზე ფიქრიც კი არ მინდა. 2024 წლამდე მოცდა ძალიან საშიშია ქვეყნისთვის. ყველა სფეროში აშკარა განადგურების პროცესი მიდის. არსებული მდგომარეობა იმ საფრთხეს შეიცავს, რომ შემდეგი საპარლამენტო არჩევნები მართლაც 2024 წელს ჩატარდეს.

_ ოპოზიციას აქვს იმის უნარი, რომ თვითმმართველობის არჩევნებში, საერთო ჯამში, 57%-ზე მეტი აიღოს?

_ ძალიან ძნელი იქნება ამ მიზნის მიღწევა. ამ პროცესების უკან მხოლოდ ერთი კაცი კი არ დგას _ ივანიშვილს ვგულისხმობ. მარტო ეგ კაცი რომ იდგეს, ვერ გაბედავდა იმას, რასაც ბედავს. მის უკან დგას რუსეთი. რუსეთი რომ დაამარცხო, ბევრად მეტი ძალისხმევაა საჭირო, ვიდრე დღეს იჩენს ოპოზიცია. ძალიან დიდი მნიშვნელობა აქვს სათანადო განწყობის შექმნას. ეს განწყობა ჯერ კიდევ არჩევნებამდე უნდა შეიქმნას. არჩევნებამდე თუ არ შეიქმნა ეს განწყობა, მერე მისი შექმნა შეუძლებელი იქნება. ძალიან მნიშვნელოვანია არსებული განწყობის შედეგის დაფიქსირება. ოპოზიციამ და ხალხმა კბილებით უნდა დაიცვან მიღებული ხმები.

_ შეძლებენ?

_ შედეგი თუ უნდათ, უნდა შეძლონ. რამდენად შეძლებენ, ეს მე არ ვიცი. წინა გამოცდილება მთლად სახარბიელო არ იყო. მაშინ ოპოზიციამ ვერ შეძლო მიღებული ხმების დაცვა.

_ ვერც ხმები დაიცვა და ვერც ბოიკოტი შეინარჩუნა ოპოზიციამ.

_ ხმები რომ დაეცვათ, მერე ბოიკოტი აღარ დასჭირდებოდათ. მე იმას არ ვამბობ, რომ ხმების დაცვა ადვილია და ეს ვერ გააკეთეს, ხმების დაცვა უმძიმესი პროცესია. სამწუხარო ისაა, რომ ოპოზიციას ბოლომდე არ ესმოდა, თუ რა მნიშვნელოვანი იყო ხმების დაცვა. ბოლო არჩევნების საღამოს წამოვიდნენ ოპოზიციონერები და ზეიმი გამართეს. ამბობდნენ, ისე მოვიგეთ, რომ ვეღარ გააყალბებენო. ვერ გაიაზრეს, რასთან ჰქონდათ საქმე. ეგენი რომ ზეიმობდნენ, ხელისუფლება გამალებით მუშობდა გაყალბებაზე.

_ მათმა ძალისხმევამ ნამდვილად გამოიღო შედეგი.

_ ოპოზიციას გააზრებული რომ ჰქონოდა, რა ხდებოდა, ნაადრევ ზეიმს არ დაიწყებდა და დღეს ქვეყანაში სულ სხვა ვითარება იქნებოდა.

_ იმედია, ამ მწარე გამოცდილებას წელს მაინც გამოიყენებენ.

_ რა ვიცი? წესით არც შარშან უნდა დაეშვათ ეს შეცდომა. მწარე გამოცდილება 2018 წლის საპრეზიდენტო არჩევნებზეც ჰქონდათ მიღებული. მეშინია, მესამედაც იგივე არ გააკეთონ.

_ მესამეო, თქვით და თქვენი აზრი მაინტერესებს „მესამე ძალაზე“. საქართველოში ამ დასახელების პარტია ახლახან შეიქმნა. ბევრმა ეს არასერიოზულად მიიღო.

_ მეც არასერიოზულად მიმაჩნია მესამე ძალის ხელოვნურად შექმნა. ვინმე თუ გაძლიერდება ოპოზიციაში და რაღაცის გაკეთებას შეძლებს, ეს ბუნებრივად უნდა მოხდეს. ასე ხელოვნურად იმის ძახილი, მესამე ძალა ვარო, არ შეიძლება. ისეთი შთაბეჭდილება მრჩება, რომ ამ მესამე ძალას „ნაციონალური მოძრაობის“ არსებობა აღიზიანებს.

_ გახარიას პარტიას თუ აქვს შანსი, გახდეს მესამე ძალა?

_ გახარიას ნდობა ძალიან ძნელია, თუ შეუძლებელი არა. ყველა უბედურებაზე, რაც ამ ქვეყანაში მოხდა, ის არის პასუხისმგებელი ივანიშვილის შემდეგ. მე მას არ ვენდობი.

_ მის სახელს ბევრი ცუდი უკავშირდება, მაგრამ მხარდამჭერები მაინც ჰყავს.

_ მას, ძირითადად, „ოცნების“ ბირთვი უჭერს მხარს, რომელსაც ოდიოზური კობახიძე და ღარიბაშვილი არ მოსწონს. ამ არჩევნებში გახარიას ფაქტორი ჩვენთვის ცუდი არ არის. ეს პარტია, ძირითადად, „ქართულ ოცნებას“ წაართმევს ხმებს. ჩვენც ეგ გვინდა, რომ „ოცნებამ“ რაც შეიძლება ნაკლები ხმა აიღოს. საპარლამენტო არჩევნებში მან შეიძლება, ოპოზიცია დააზარალოს, მაგრამ ახლა მხოლოდ ოცნებას“ შეუქმნის პრობლემებს.

_ რამე რჩევას თუ მისცემდით ოპოზიციას?

_ ჩემი რჩევა იქნება, რომ უფრო თანმიმდევრულები იყვნენ.

_ რაში უნდა იყვნენ თანმიმდევრულები?

_ იგივე ეპიდემიის მართვის საკითხში. არ შეიძლება, ერთ დღეს მოითხოვდე ყველაფრის გახსნას, მერე კი ჩაკეტვას. როცა ჩაიკეტება, ამბობ, რატომ არ დაამატე მუნიციპალური ტრანსპორტიო. ზოგიერთ ოპოზიციონერს ამაზე მაშინ უნდა ეფიქრა, როცა საყოველთაო ჩაკეტვას ითხოვდა. მუნიციპალური ტრანსპორტის ჩაკეტვას სჯობდა, დაემატებინათ,. რათა ხალხს რეგულაციების დაცვა მოეხერხებინა.
ტრანსპორტის აკრძალვა გარდა იმისა, რომ ეკონომიკისთვის არის საზიანო, შეაფერხა აცრის პროცესიც. ხალხი ასაცრელ პუნქტებთან ვერ მიდის. ვფიქრობ, ეს შემთხვევით არ მომხდარა.

_ თქვენი აზრით, იმიტომ აკრძალეს ტრანსპორტი, რომ ვაქცინაციის პროცესი შეფერხებულიყო?

_ ასე გამოდის. არ შეიძლება, ბრმად ვენდოთ „ოცნების“ გამოცხადებულ კოვიდსტატისტიკას. აშკარაა, რომ ვირუსი ახლა უფრო მეტადაა გავრცელებული და ახალი შტამიც უფრო საშიშია. რატომღაც, მგონია, რომ ხელისუფლება ციფრებით მანიპულირებს: როცა უნდა მეტს დაწერს, როცა უნდა _ ნაკლებს. რეალურად, ამის კონტროლი არ არსებობს.
არც იმაზე მახვილდება ყურადღება, რომ საავადმყოფოები ზედმეტად არის გადატვირთული. თავად ექიმები ამბობენ, რომ ძალიან ბევრი ჰოსპიტალიზაციას არ საჭიროებს. საავადმყოფოებში მხოლოდ ისინი უნდა მოხვდნენ, ვისაც ეს აუცილებლად სჭირდება.
ყველაფერი უნდა გაკეთდეს, რომ ასეთი პანიკა არ იყოს. პანიკის დროს ადამიანებს უქვეითდებათ იმუნიტეტი, უვითარდებათ დაავადებისადმი მიდრეკილება. რაღაც სიმპტომებიც ემატება და ცდილობენ მოხვდნენ საავადმყოფოში. ეს იწვევს სიკვდილიანობის ზრდას. ვერც ერთი ჯანდაცვის სისტემა ასეთ დაწოლას ვერ გაუძლებს.
ოპოზიცია ამბობს, რომ ხელისუფლება უუნაროა და ამიტომ ვერ მართავს პანდემიასო. ვფიქრობ, რომ ხელისუფლებას აქვს მართვის უნარი, მაგრამ შეგნებულად ამძიმებს სიტუაციას, რომ რაც შეიძლება მეტი მსხვერპლი იყოს, რაც მათი პატრონის, რუსეთის ინტერესებში შედის.

_ რუსებს აქ სიკვდილიანობის მაჩვენებლის ზრდა არ ეწყინებათ, მათი ოცნება ხომ ესაა _ საქართველო ქართველების გარეშე.

_ რა თქმა უნდა. ამიტომ ვფიქრობ, რომ ხელისუფლება რუსეთის საამებლად ამძიმებს ვითარებას.

შორენა მარსაგიშვილი

დატოვეთ კომენტარი