თამუნა მჭედლიშვილი

რატომ „ებრძვის“ „ქართული ოცნება“ კორუფციას ახლა და მოიგებს თუ არა ბიძინა ივანიშვილი ლონდონის საბოლოო ინსტანციის სასამართლო დავას Credit Suisse-თან დაკავშირებით? დაიბრუნებს თუ არა 607 მილიონს? რატომ მალავს კობახიძე „EAGLE HILLS“-თან გაფორმებულ ხელშეკრულებას და რა იგულისხმება კომერციულ საიდუმლოებაში? შეიცავს თუ არა სერიოზულ საფრთხეებს ეს კონტრაქტი ქვეყნისთვის? რა მიზეზით დაუმძიმეს ბრალი ოპოლიდერებს ციხეში და რატომ ართმევენ სინამდვილეში ქართველ ემიგრანტებს არჩევნებზე ხმის მიცემის უფლებას საზღვარგარეთ?

„ქრონიკა+“-ის კითხვებს პასუხობს „სამოქალაქო მონაწილეობის ცენტრის“ დამფუძნებელი, საქართველოს პარლამენტისა და თბილისის საკრებულოს ყოფილი დეპუტატი ირაკლი აბესაძე:

_ ბატონო ირაკლი, ბოლო თვეების განმავლობაში მიმდინარე პროცესებს, რაც „ქართული ოცნების“ ყოფილი თუ მოქმედი ჩინოვნიკების მიერ კანონსაწინააღმდეგო ქმედებების ჩადენის მხილებას, დაკავებებსა და სასამართლო პროცესებს უკავშირდება, მმართველი პარტია კორუფციასთან ბრძოლას უწოდებს... თქვენ როგორ შეაფასებთ „ოცნების“ ბრძოლას კორუფციასთან, რატომ ახლა?

_ პირველ რიგში, ვინ გვიცხადებს, რომ ებრძვის კორუფციას ივანიშვილის რეჟიმის ქვეშ?.. ესენი არიან კობახიძე, მდინარაძე და ის ადამიანები, რომლებიც თუნდაც ივანიშვილის გუნდისთვის ახლები არ ბრძანდებიან. ისინი წლების განმავლობაში, 2016 წლიდან, იყვნენ ივანიშვილის გუნდის მთავარი საყრდენები, და რაც მთავარია, საქართველოს პარლამენტის რეალური მმართველები. რატომ არის ეს მნიშვნელოვანი? ეს მნიშვნელოვანია იმიტომ, რომ საქართველოს პარლამენტის საკონსტიტუციო მოვალეობაა აღმასრულებელი ხელისუფლების საპარლამენტო კონტროლის განხორციელება, ანუ იმ კორუფციულ ფაქტებზე რეაგირება და მათი გამოვლენა, რაზედაც ახლა გვიცხადებს პრემიერად დასმული რეჟიმის პრემიერი კობახიძე, რომ ის ახლა ებრძვის თითქოს კორუფციას. მაშინ სად იყო კობახიძე 2016-  2024 წლებში, რვა წლის განმავლობაში? თან არ კმარა ის საუბარი, რომ მათ ვერ გამოავლინეს კორუფცია _ ან ცოდნა არ ეყოთ და გამოცდილება... კი ბატონო, მათ არც კომპეტენციაზე და არც გამოცდილებაზე დიდი წარმოდგენის შეიძლება არ ვიყოთ, მაგრამ ჩვენ კარგად გვახსოვს, ბრჭყალებში ვიტყოდი, კობახიძეები, რომლებიც „აპრავებდნენ“ სწორედ იმ კორუფციულ ფაქტებს, რაზედაც ახლა გვიცხადებენ თავად, რომ საგამოძიებო ორგანოები დაინტერესდნენ. თუკი თავად ვერ ახერხებდნენ კორუფციის გამოვლენას, კორუფციას ავლენდა, მაგალითად, თქვენი რედაქცია, კორუფციას ავლენდნენ ტელევიზიები, არასამთავრობო სექტორი, ოპოზიციონერი პოლიტიკოსები, სხვადასხვა ექსპერტი და მაშინ, სწორედ ეს კობახიძეები იდგნენ და ყველას ერთად გვეუბნებოდნენ, რომ ჩვენ ვიყავით მიკერძოებულები, რომ ჩვენ არ გვქონდა საკმარისი ცოდნა, რომ ჩვენ უბრალოდ ვატყუებდით საზოგადოებას! აი, სწორედ იგივე კობახიძე თუ თავის დროზე „აპრავებდა“ ამ კორუფციულ ფაქტებს, თუ თავის დროზე „აპრავებდა“ ღარიბაშვილს, რომელმაც სახელმწიფო რეისით ისარგებლა თავისი პირადი მიზნებისთვის და დღემდე არ ვიცით, რა ფულით და გასაგებია, რომ სინამდვილეში ბიუჯეტის ხარჯზე დაფინანსდა და ესეც კორუფციაა, ესეც საბიუჯეტო სახსრების ფლნგვაა... თუკი ამას „აპრავებდნენ“ კობახიძეები, კოლექტიურად, მაშინ დღეს როგორ შეიძლება დავიჯეროთ, რომ ისინი კორუფციას ებრძვიან?

მეორე და მნიშვნელოვანი, ჩვენ კარგად ვხედავთ, _ ის, რაზედაც გვესაუბრებიან, რომ არის კორუფცია, კონკრეტული ფაქტები, სინამდვილეში, საერთო სურათის, ალბათ, 10%-იც არ არის. უბრალოდ, დაუჯერებელია, რომ ირაკლი ღარიბაშვილმა მხოლოდ 7 მილიონი დოლარი გაათეთრა პრემიერ-მინისტრად ყოფნის დროს. უბრალოდ, დაუჯერებელია, რომ თავდაცვის მინისტრს დარღვევა მხოლოდ ერთ სატენდერო საკითხში ჰქონდა... უბრალოდ, დაუჯერებელია, რომ მინისტრის მოადგილეები იყვნენ კორუმპირებულები და მინისტრები _ არა, ვგულისხმობ ინფრასტრუქტურის მინისტრს, რომლის მოადგილე, საგზაო დეპარტამენტში თუ შემდეგ, როგორც მინისტრის მოადგილე, დაჭერილია. უბრალოდ, დაუჯერებელია, რომ სუს-ის ხელმძღვანელის ახლო გარემოცვა დაკავებულია და მას ამის შესახებ არანაირი ინფორმაცია არ ჰქონდა ან ამაში მონაწილეობა არ მიუღია. როდესაც ასეთი შავით თეთრზე ძალიან ცხადი მაგალითები გვაქვს, რომ ეს რეალური, სრულფასოვანი და სრულმასშტაბიანი ბრძოლა კი არ არის კორუფციასთან, არამედ შერჩევით, რა პოლიტიკური მიზანიც საკუთარ თავს დაუსახეს ამ ვითომ კორუფციასთან ბრძოლაში, ასეთი ფაქტების გამოვლენაზეა საუბარი და რა თქმა უნდა, შეუძლებელია დავიჯეროთ, რომ ვინმე რეალურად კორუფციას ებრძვის.

_ რა ხდება სინამდვილეში, რას ებრძვის „ოცნება“?

_ სინამდვილეში, იმ უკვე მოპარული ასეულობით მილიონობით თუ მილიარდობით ლარის გადანაწილება ხდება სხვადასხვა ჯგუფებს შორის, ანუ ვინც თავის დროზე მოიპარა, ახლა სხვას უნდა, რომ ეს მოპარული ფული ჩაიდოს ჯიბეში.

_ ე. ი., ფული, რომელიც ამოიღო და ამოიღებენ მომავალში შესაბამისი სტრუქტურები, სხვის ჯიბეში ჩაიდება და არა ბიუჯეტში?

_ ცალსახაა, რომ ეს ფული ბიუჯეტში არ წავა, რადგან ჩვენ, როგორც უკვე გითხარით, ოფიციალური ბრალდებების ნაწილში ვიხილეთ ძალიან მცირე მოცულობით ფინანსურ დარღვევებზე საუბარი _ 7 მილიონი დოლარი, მილიონ 700 000 ლარი, იქ რაღაც 15 მლნ ლარი და ა. შ. ეს არის ის თანხები, რაც ოფიციალურ ბრალდებებში ჩაიწერება, რომლებიც წავა ბიუჯეტში, ხოლო ის ასეულობით მილიონი თუ მილიარდი ლარი, რომელსაც საზოგადოებაც ხედავს, რომ რეალურად მოპარულია სახელმწიფო სექტორში, მოპარულია კერძო სექტორში, რაც ასევე დანაშაულია, ოფიციალური ბრალდება ჯერჯერობით დუმს. როგორც ჩანს, ამაზე გარჩევები მიდის კერძო ოთახებსა და კაბინეტებში და, შესაბამისად, კერძოდვე გადანაწილდება კვლავ საზოგადოების ზურგს უკან სხვადსხვა ჯგუფებს შორის. ეს არის რეალური მიზეზი და მიზანი. საზოგადოებას კი უნდათ ეს შეასაღონ და უნდათ, რომ საზოგადოებამ თავი მოვიტყუოთ, თვალში ნაცარი შევიყაროთ და დავიჯეროთ, რომ რეალურად ივანიშვილის რეჟიმი გაკეთილშობილდება, კორუფციას შეებრძოლება, კორუფციას დაამარცხებს და კიდევ ერთხელ გავიმეორებ ხაზგასმით, განსაკუთრებით იმ ხალხით, რომელსაც კორუფციასთან ბრძოლა 8 წლის განმავლობაში ევალებოდა,

_ რატომ არის გასაიდუმლოებული „იგალ ჰილზის“ ხელშეკრულება და არ არის გამჭირვალე საზოგაოებისთვის იგი? სინამდვილეში რას მალავს ამ ხელშეკრულებაში „ოცნება“?

_ მთავარი შეკითხვა არის ეს, რადგან როდესაც საუბრობენ საფრთხეებზე - იქნება თუ არა ეს არაბული ქალაქი, მე პირადად საფრთხეს ვერ ვხედავ ეროვნებიდან გამომდინარე. თავისთავად ეს საფრთხეს არ წარმოადგენს, მაგრამ როდესაც ისეთ მოშლილ უსაფრთხოების სისტემაზე ვსაუბრობთ, ზოგადად, ისეთ მოშლილ სახელმწიფო ინსტიტუციებზე ვსაუბრობთ, როგორადაც, სამწუხაროდ, სახელმწიფო აპარატი ივანიშვილის რეჟიმმა გადააქცია, ამიტომ, რა თქმა უნდა, უკვე ყველა დეტალს მნიშვნელობა ენიჭება და ჩვენ ვერ ვგრძნობთ იმას, რომ სახელმწიფო ზრუნავს ჩვენს უსაფრთხოებაზე. მართლაც, ვინ იქნება ის უცხოელი შემძენი, ხომ არ გათეთრდება აქ ფული?

_ ერთ-ერთი ვერსიით, „EAGLE HILLS“-ის უკან რუსეთის ფულია დამალული...

_ დიახ, მე პირადად მჯერა, რომ არანაირი არაბები ამ გარიგების უკან არ დგანან, სინამდვილეში, აქ რუსები იყიდიან ქონებას და, ასე ვთქვათ, გაათეთრებენ თავიანთ შემოსავლებს, რომ შემდგომ ევროპაში შეეძლოთ ამ ფულის გატანა. მაგრამ ეს ყველაფერი არის ცოტა ხნით გვერდზე გადასატანი, მთავარია, როდესაც  განსაკუთრებით ისეთი რეჟიმის პირობებში, რომელიც თავად გვეუბნება, რომ ვძარცვავდი სახელმწიფო ბიუჯეტს, ვძარცვავდი სახელმწიფო უწყებებს, რომლებიც ჯერჯერობით არ აღიარებენ ცხადად, მაგრამ ვხედავთ, რომ ასევე ძარცვავენ ქართულ ეკონომიკას, სადაც ივანიშვილის ინტერესია, სხვადასხვა ოლიგარქების ინტერესია, როდესაც ვხედავთ, როგორ იფლანგება და იძარცვება ქართული ეკონომიკის ის შესაძლებლობები რომლებიც უნდა ხმარდებოდეს სინამდვილეში ამ ქვეყნისთვის შემოსავლების ზრდას, და, შესაბამისად, საზოგადოების კეთილდღეობას, აი, ამ პირობეებში, როდესაც სახელმწიფო გვეუბნება, პირველ რიგში, დაუჯერებელ რაღაცა ციფრს, რომ ვიღაცა აქ 6 მილიარდი დოლარის ინვესტიციას შემოიტანს უძრავ ქონებაში, იმავდროულად გვეუბნება, რომ ამ კონტრაქტს ვასაიდუმლოებ, მინიმუმ არ გვეუბნება, რამდენი წლის განმავლობაში დაიხარჯება ეს 6 მლრდ დოლარი... იქნებ, 50 წელზეა გაწერილი ეს თანხა, მაშინ ძალიან მცირე ინვესტიცია გამოდის, თუ ორ წელზეა გაწერილი, მაშინ დაუჯერებლად დიდი ინვესტიცია გამოდის. ჩვენ ვერ ვხედავთ რეალობას იქიდან გამომდინარე, რომ კონტრაქტი დამალულია, რა გარანტიები დევს სახელმწიფო ინტერესების დასაცავად? ხომ არ აღმოჩნდება ისე, რომ კვლავ ხელოვნურად შიქმნება რაღაც დავა ინვესტორთან, წავა საერთაშორისო არბიტრაჟში ისე, რომ საქართველოს არანაირი ეკონომიკური სარგებელი არ ექნება ნანახი, პირიქით, იქით დავზიანდებით ასეულობით მილიონით ინვესტორის სასარგებლოდ? ასე რომ, ძალიან ბევრი კონკრეტული, სამართლებრივი დეტალია, რომელზედაც მნიშვნელვანია, რომ საზოგადოებას ჰქონდეს ცხადი წარმოდგენა, რათა საბოლოოდ შევაფასოთ. სასარგებლოა ეს ურთიერთობა სახელმწიფოსთვის, თუ არა? მაშინ, როდესაც მთელი სახელმწიფო მანქანა და თავად პრემიერ-მინისტრი ვნახეთ სარეკლამო აგენტივით კლიპში გამოჭიმული ამ თემასთან, თუ კეთილი საქმე კეთდება, თუ ასე ცალსახად კარგი საქმეა, რატომ გვიცხადებენ ამ კონტრაქტს კომერციულ საიდუმლოებად? ჯერ კომერციული საიდუმლოება რა არის?

_ რა არის?

_ უკვე გვითხრეს ციფრი _ ინვესტორმა უნდა შემოიტანოს 6 მლრდ დოლარი, ამის მიღმა, რა კომერციული საიდუმლო უნდა ჰქონდეს ინვესტორს? როგორც წესი, კომერციული საიდუმლოება არის თანხებთან დაკავშირებული საკითხები და რას არ გვიმხელენ? რამდენ წელიწადში შემოიტანს? მისი ვალდებულებაა, რეალურად ამ თანხის საბოლოო ჯამში შემოტანა ან რა გზებით შემოიტანს, ღია უნდა იყოს საზოგადოებისთვის, მით უმეტეს, კიდევ ვიმეორებ, თუ სახელმწიფოს ის მთელი პროპაგანდისტული მესიჯბოქსი და მთელი პროპაგანდის ნიაღვარი სიმართლეა. და რაც მთავარია, ჯერჯერობით ვერ ვნახეთ „ქართული ოცნების“ პირობებში ვერცერთი შემოყვანილი მსხვილი ინვესტორი ამ ქვეყანაში. ამის შანსი იყო, მაგალითად, იგივე ანაკლიის პორტთან მიმართებით, რომელიც ჯერ საერთოდ ჩაშალეს, გვითხრეს, რომ ჩინური კონსორციუმი შემოჰყავდათ. ჯერჯერობით ამ ჩინურ კონსორციუმთან საბოლოო კონტრაქტი გაფორმებული არ არის, ანუ რეალურად ჯერ არ გვინახავს არცერთი მსხვილი საინვესტიციო პროექტი დასრულებული, შესრულებული, რომელზედაც დაპირება გასცა სახელმწიფომ ზოგადად, იგივე ჩინელებთან მიმართებით, როგორც ახლა არაბებზე გვეუბნებიან, საემიროებზე. ზუსტად ასეთ დიდ იმედებს ამყარებინებდნენ საზოგადოებას ჩინელებთან ურთიერთობაზე. გააფორმეს ის სტრატეგიული პარტნიორობის ხელშეკრულება და გვიმტკიცებენ,  რომ ახლა რაღაც ჩინეთიდან წამოსულ ინვესტიციას ავაშენებინებთ, სინამდვილეში, ჩინეთიდან შემოდის მიზერული რაოდენობის ინვესტიცია _ 10-ჯერ და მეტჯერ ნაკლები, ვიდრე შემოდიოდა ევროკავშირიდან თუ სხვა ქვეყნებიდან, რომლებიც ტრადიციულად დებდნენ საქართველოში ინვესტიციებს. სამწუხაროდ, გააქცია „ქართული ოცნების“ რეჟიმმა და, ფაქტობრივად, ეს ჩინური იმედებიც თავად ხელისუფლების მხრიდანაც აღარ არის აქცენტირებული. უკვე თავად გადაერთვნენ ახლა სხვა მიმართულებაზე. რატომ უნდა დავიჯეროთ კობახიძის სარეკლამო მესიჯბოქსი და რატომ უნდა ვენდოთ მათ? თანაც მაშინ, როდესაც არცერთი წარმატებული მაგალითი არ აქვთ და მეტიც, კიდევ ერთხელ ვამბობ, თავად აღიარებენ, როგორ ძარცვავდნენ ამ ქვეყანას. რა თქმა უნდა, სერიოზულ ფინანსურ საფრთხეებს შეიცავს არაბული კონტრაქტი _ რა დანაკარგები შეიძლება ნახოს ქვეყანამ ან მოგება ამ კონტრაქტის გაფორმებით.

_ 2024 წელთან შედარებით მხოლოდ ხუთი უწყების: პარლამენტის, შსს-ს, სუს-ის, პროკურატურისა და სასამართლოს ხელფასები 2026 წელს, ჯამურად. თითქმის 320 მილიონი ლარით იზრდება. პენსიორებს პენსია მხოლოდ 20 ლარით გაუზარდეს. რატომ?

_ რეჟიმი არის საკუთარი თავის ტყვე. თუ ის არ გააგრძელებს, არ განავრცობს საბიუჯეტო ფუფუნებას, რაშიც ამყოფებს იმ რეპრესიულ სახელმწიფო აპარატს, რომელზედაც დგას ეს რეჟიმი, მაშინ ისინი უბრალოდ ჩამოიშლებიან. ჩვენ კარგად ვიცით,  რომ მისი დანაშაულებრივი დავალების შემსრულებელ პოლიციელებს, პროკურორებს, მოსამართლეებსა და დეპუტატებს, რომლებიც აბსოლუტურად დრაკონულ, გაუგონარ და იმავდროულად სულელურ კანონებს იღებენ, ძალიან მსხვილი საბიუჯეტო ანაზღაურება არ ეყოთ. ამ ადამიანებს, არ ვიცი, შესაძლებელია, კონვერტებით შავი ფული არ მიუტანეს ყოველთვიურად. მაგრამ უფულოდ, უბრალოდ, ისინი რეჟიმის მსახურები აღარ იქნებიან, რადგან ამ რეჟიმს ისინი ერთადერთი იდეალის, ფულის გამო ემსახურებიან, ამიტომ ხელისუფლება იძულებულია და თავად გვითხრა, რომ მაგალითად 2026 წელს უარი თქვას ინფრასტრუქტურულ პროექტებზე.

იმავდროულად, ეს არის იმ ტოტის მოჭრა, რომელზედაც სხედან, იმიტომ რომ ყველამ კარგად იცის, რომ ასე უბრალოდ ხელფასებში გადახდილი ფული, მაშინ როდესაც ეკონომიკური მყარი საფუძველი არ აქვს ამ ხელფასების ზრდას და ბიუჯეტი იმიტომ კი არ იზრდება, რომ ეკონომიკა განვითარდა, წარმოება გაიზარდა, ხელოვნურად ზრდიან. აგერ ჯარიმებს ზრდიან, თამბაქოზე აქციზს ზრდიან. ჯამურად, ეს შეიძლება ნახევარ მილიარდ ლარზე მეტიც კი იყოს დამატებით ადამიანების ჯიბიდან ამოღებული. გვიანონსებენ პრივატიზებას საგანმანათლებლო სისტემის დანგრევასთან ერთად, ანუ ხელისუფლება ხედავს, რომ ეკონომიკა ვეღარ ახერხებს, ვეღარ უზრუნველყოფს იმდენი გადასახადების გენერირებას, რაც მათ გაზრდილ საბიუჯეტო მადას და ფუფუნებას უზრუნველყოფს და პირდაპირ, ასე უხეშად ცდილობენ ჯიბეში ჩაგვიყონ ხელი. თან ამასაც, კორუფციასთან ბრძოლის არ იყოს, კეთილშობილური მიზნებით გვიფუთავენ, თითქოს ჩვენზე ზრუნავენ, რაღაც საგზაო უსაფრთხოება გაუმჯობესდეს, ვიღაცამ თამბაქო აღარ მოწიოს და ა. შ. სრული სისულელე და აბსურდი! ამათ ადამიანის არც ბედი ანაღვლებთ, არც მომავალი, არამედ მხოლოდ რეჟიმის შენარჩუნება ანაღვლებთ. რეჟიმის შესანარჩუნებლად კი განსაკუთრებით იზრდება და დეპუტატების ხელფასები, რაც ფაქტობრივად გაორმაგდა, ასევე მოსამართლეების; ხელფასები იზრდება პოლიციაში, სუსსა და ა. შ. ნორმალურ შემთხვევაში ასეთ მატებას მივესალმებოდით, ოღონდ, ვიმეორებ და საზოგადოებას უნდა ესმოდეს _ ხელფასების მატებას უნდა ჰქონდეს თავისი მყარი ეკონომიკური საფუძველი და წინაპირობები, ბიუჯეტი უნდა იზრდებოდეს და მეტი გადასახადი უნდა ამოდიოდეს. მთლიანი შიდა პროდუქტი უნდა გაიზარდოს და, შესაბამისად, მეტი გადასახადი უნდა ამოვიდეს. ამის საპირისპიროდ, პირველი 9 თვის განმავლობაში, პირველად ალბათ 20 წლის განმავლობაში, დამატებითი ღირებულების გადასახადის გეგმა ვერ შეასრულეს! რაც იმას ნიშნავს, რომ ზოგადად ეკონომიკური ბრუნვა შემცირებულია, აქციზის გადასახადის გეგმა ვერ შეასრულეს, რაც იმას ნიშნავს, რომ მოხმარება შემცირებულია.

_ 19 ნოემბერს ცნობილი გახდა, რომ ლონდონის საბოლოო ინსტანციის სასამართლო, ივანიშვილის Credit Suisse-თან დაკავშირებულ დავაზე საბოლოო გადაწყვეტილებას 24 ნოემბერს გამოაცხადებს. დავა 607 მილიონ დოლარს შეეხება. ივანიშვილის ადვოკატმა გაავრცელა განცხადება, რომ ბიძინა ივანიშვილს არ აქვს მოლოდინი, რომ აღნიშნულ თანხას დაიბრუნებს. მოიგებს თუ წააგებს ივანიშვილი პროცესს და წამოეწევა თუ არა მას გაერთიანებული სამეფოს მიერ დაწესებული სანქციები?

_ უფრო მეორე ნაწილზე გიპასუხებთ: კარგად გვესმის, რომ განსხვავებით ივანიშვილის რეჟიმის კლანური სასამართლოსგან,  ბრიტანული სასამართლო თავისუფალია ყოველგვარი მსგავსი გავლენებისგან ან პოლიტიკური თუ პირადი სიმპათიებისგან. ისინი რეალურად იმსჯელებენ კანონზე სამართალზე დაყრდნობით, ამიტომ ვნახოთ, რა მოხდება. მაგრამ გაცილებით მნიშვნელოვანია საკითხი, შეძლებს თუ არა ივანიშვილი მიიღოს ის ფული, რომელზედაც, თავის დროზე, განგვიცხადა და საზოგადოებას მინდა შევახსენო, რომ ეს არის ის ფული, რომელზეც პირდაპირ, ღია ეთერში განაცხადა, რომ „მე როდესაც ჩემს ფულზე ვფიქრობ, ვერ ვახერხებ და ვერ მივიღებ თუნდაც ქვეყნისთვის სასარგებლო გადაწყვეტილებას, იმიტომ რომ კომპლექსი მაქვსო“; ვინმემ არ თქვას, რომ ფულის გამო გადაწყვიტეო. ამიტომ, პირველი: საინტერესოა, რომ ამერიკის მიერ გასული წლის დეკემბერში, ივანიშვილის დასანქცირების დროს, გამოიცა სპეციალური ლიცენზია, რომელშიც ჩაიწერა, რომ ივანიშვილი სანქცირდებოდა, მაგრამ არ სანქცირდებოდა მისი კომპანიები. იქვე მიეთითა, რომ ამ გამონაკლისის გარდა, კიდევ იყო ერთი გამონაკლისი, რომ ეს სანქციები პირდაპირ გავრცელდებოდა ივანიშვილის დავაზე სინგაპურში. „კრედიტ სუისთან“ მას მოგებული ქვს 400 მლნ დოლარზე მეტი და აიკრძალა ივანიშვილისთვის ამ თანხის გადარიცხვა. იქვე ჩაიწერა, რომ სხვა დაკავშირებულ დავებზეც იკრძალებოდა აღსრულება სპეციალური ნებართვის გარეშე. ახლა არის თუ არა ეს ბერმუდაში მიმდინარე „კრედიტ სუისთან“ დავა, სხვა დაკავშირებული დავა და გავრცელდება თუ არა ამერიკული ლიცენზია, ვნახოთ. შემოდის მეორე, ძალიან საინტერესო საკითხი: თავად გაერთიანებულ სამეფოშიც აქტიური მსჯელობა მიდის ივანიშვილის სანქცირების შესახებ და მაღალია ალბათობა, რომ თავად გაერთიანებულმა სამეფომ დაასანქციროს ივანიშვილი. თუ ის მოიგებს იმ თანხას ლონდონში, შეიძლება მისი სიხარული ხანმოკლე აღმოჩნდეს და,  პრინციპში, მან მაინც ვერ შეძლოს ამ თანხებზე წვდომა.

_ მოგეხსენებათ, ყველა ოპოზიციურ ლიდერს რეჟიმმა ბრალი დაუმძიმა. მათ მიმართ სისხლის სამართლის საქმეები აღძრეს. რატომ და რა მიზეზით ტოვებს ციხეში ბიძინა ივანიშვილი ოპოზიური პარტიის ლიდერებს?

_ რეალურად ხელისუფლება ვეღარ მალავს, რომ ამ ქვეყანაში პოლიტიკოსები ისჯებიან პოლიტიკის გამო და პოლიტიკური განცხადებების გაკეთების გამო. ოპოლიდერებს აბსურდული ბრალი წაუყენეს, _ თქვენ უცხოელებს ჩვენზე უყვებოდით, რომ ცუდად ვიქცეოდით და ამიტომ დაგვასანქცირესო. როგორი აბსურდია! ასე გამოდის ეს ბრალი, რომ საზოგადოებავ, _ ჩვენ მოვიქცევით ცუდად და თქვენ ამის შესახებ უცხოელებს ნუ ეტყვით. ამ 21-ე საუკუნეში, თავისით, უცხოელებს თურმე  ინფორმაციაზე წვდომა არ აქვთ და ა. შ. ხელისუფლება გვეუბნება, რომ მე დავსჯი საზოგადოებას, რომელიც თავისი აზრის გამოთქმას გამიბედავს. მიიღეს ე. წ. პირბადეების აბსურდული კანონი, რომ თუ ქუჩაში აპროტესტებ და წინააღმდეგობას უწევ ხელისუფლებისთვის მიუღებელ პოლიტიკას, შენ თურმე ციხეში უნდა გაგიშვან. საზოგადოებას უნდა ესმოდეს, რა აბსურდულობასთან გვაქვს საქმე. ხელისუფლება გვეუბნება, რომ ჩემ წინააღმდეგ პოლიტიკოსი განცხადებას ნუ გააკეთებს, თორემ დავიჭერ, საზოგადოების წევრს ეუბნება, რომ ჩემ წინააღმდეგ ქუჩაში ნუ გამოხვალ, თორემ დაგიჭერ, სახლში იჯექი და იქიდან რაც გინდა, გააპროტესტე. ეს არის აბსურდი! ამიტომ გასაგებია, რომ არანაირი სამართლებრივი საფუძვლის ძებნა ჩვენ ამ ბრალდებების მიღმა არ გვჭირდება. შუძლებელიც კი არის. უნდა ვეძებოთ, რა პოლიტიკური ამოცანა აქვს ივანიშვლს?

_ საინტერესოა, რა პოლიტიკური ამოცანა აქვს სინამდვილეში ბიძინა ივანიშვილს?

_ სინამდვილეში, რამდენიმე პოლიტიკური ამოცანის შესრულებას ცდილობს ივანიშვილი: 1. ასეთი რეპრესიული მიდგომით ივანიშვილი პოლიტიკოსებისა თუ საზოგადოების აქტიური წარმომადგენლების მიმართ ცდილობს გადატეხოს რამენაირად წინააღმდეგობა და შეამცეროს ის პროტესტი, რაც მიმდინარეობს და ეს აბსოლუტურად მიუღწეველი მიზანი ჩანს, მით უმეტეს ამ ფორმით და ხერხებით. 2. შესაძლებელია აგროვებდეს სავაჭროდ ამ ადმამიანების ბედს იგივე დასავლეთთან, თუნდაც თავის ფულზე ივაჭროს, ან რაღაცა თავის მდგომარეობაზე ივაჭროს და ესეც შეუსრულებელი ამოცანა ჩანს, რადგან კარგად ვხედავთ, თავად ივანიშვილს არავინ აღიქვამს სერიოზულ ფიგურად, რომელსაც შეიძლება ელაპარაკო და რამეზე გაურიგდე. ვნახეთ სრული იგნორი აშშ-ის ახალი ადმინისტრაციის მხრიდან. ტრამპი, რომელიც პოსტსაბჭოთა სივრცის 12 რესპუბლიკის ხელმძღვანელს შეხვდა, მხოლოდ და მხოლოდ საქართველოს წარმომადგენლებს არ შეხვედრია! გასაგებია, რომ თეთრ სახლში და სახლემწიფო დეპარტამენტში კარგად ხედავენ, როგორი, მართლაც, მარიონეტული რეჟიმია. აზრი არ აქვს საქართველოს ბედზე ელაპარაკო კობახიძეს და ივანიშვილს, ამაზე შეიძლება ესაუბრო პირდაპირ პუტინს, დღევანდელი სამწუხარო რეალობა საქართველოსი ეს არის. ამიტომ, მათ სერიოზულად არავინ აღიქვამს, იგივე ევროკავშირის დონეზე. ასე რომ, გასაგებია ივანიშვილის ამოცანები.

_ ქართველი ემიგრანტებისთვის არჩევნებში ხმის მიცემის უფლების ჩამორთმევა რაზე მეტყველებს? დაარღვევს თუ არა „ოცნება“ ამ კანონით საქართველოს მოქალაექების კონსტიტუციურ უფლებას?

_ ფაქტია, რომ მორიგ ჯერზე რეჟიმი არ აღიარებს, თავად არ თვლის თავს ხალხის ხელისუფლებად, ხალხის მმართველად. შეუძლებელია იმ მილიონზე მეტ ადამიანს, რომელიც ამ ქვეყნის შიდა პროდუქტის 10%-მდე თანხას რიცხავს ყოველწლიურად საქართველოში _ 3 მლრდ 400 მილიონი დოლარი გადმოირიცხა 2024 წელს და 3 მლრდ 100 მლნ დოლარი გადმოირიცხა უკვე ოქტომბრის ჩათვლით 2025 წელს, შეუზღუდო არჩევანის უფლება! ანუ ეს ადამიანები, გარდა იმისა, რომ საქართველოს მოქალაქეები არიან, არ შეიძლება ხმის უფლება ჩამოართვა და სამართლებრივი კავშირი გაუწყვიტო სახელმწიფოსთან ამ თვალსაზრისით! ისინი არიან მნიშვნელოვანი აქტორები ქვეყნის ეკონომიკური მოცემულობისა, რასაც „ოცნების“ წარმომადგენლები ძარცვავენ. მარტო ამ პრიზმიდან რომ შევხედოთ, ეს, რა თქმა უნდა, გაუგონარი უსამართლობა, ანტიკოსტიტუციური ნაბიჯიც არის.

რაც შეეხება იმ აბსურდულ განცხადებებს, _ ჩამოდი და ხმა მიეცი, რა თქმა უნდა, დაცინვაა ამ ადამიანების. ეს არის ანტიკონსტიტუციური ნაბიჯი.