მთავარი პოლიტიკა ვინ მონაწილეობდა ვახტანგ გოძიაშვილის ბიზნესის წართმევის საქმეში?

ვინ მონაწილეობდა ვახტანგ გოძიაშვილის ბიზნესის წართმევის საქმეში?

732
0
გაზიარება

ბიზნესმენი ვახტანგ გოძიაშვილი ქვეყნიდან მას შემდეგ წავიდა, რაც ჯერ ბიზნესი წაართვეს, მერე დაემუქრნენ და მის მიერ გაკეთებულ საჯარო განცხადებებზე პროკურატურამ გამოძიება მხოლოდ ფორმალურად დაიწყო, მაგრამ საქმე ამ დრომდე თაროზეა შემოდებული. ის ამჟამად ამერიკის შეერთებულ შტატებში იმყოფება და შეხვედრებს მართავს სხვადასხვა საერთაშორისო ორგანიზაციაში: Watch, Amnesty international, Freedom House.

ის „ქრონიკა+“-ს ნიუ-იორკიდან დაუკავშირდა და ბიზნესის ახევის საქმეში ახალი ფიგურანტები დაუსახელა:

_ ქვეყნიდან წასული ხართ. რა როლი ჰქონდა ამ საქმეში დღევანდელ პრემიერ-მინისტრ ირაკლი ღარიბაშვილს და მის ახლო გარემოცვას?
_ ჩვენ უკვე გვქონდა ამ საკითხის შესახებ დეტალური საუბარი. იქიდან გამომდინარე, რომ ღარიბაშვილი აღარ იყო არც ერთ თანამდებობაზე და მით უმეტეს, პრემიერ-მინისტრი აღარ იყო, ამიტომ ამდენი ხნის განმავლობაში ამაზე აქცენტი არ გამიკეთებია.
_ ვახტანგ, მკითხველისთვის რომ უფრო გასაგები იყოს, მოგვიყევით, რას ეხება თქვენი ქეისი?
_ კომპანია „ემ-ენ ჯორჯიას“, რომელმაც 2014 წელს გააფორმა ხელშეკრულება „ჯორჯია მანგანეზთან“, გარემოპოვებასთან დაკავშირებით ჰქონდა ექსკლუზივი. უფრო სწორად, ეს სქემა თავიდან ბოლომდე ჩვენ დავალაგეთ, ანუ ჩემი სქემით და ჩემი ინიციატივით. ამის შემდეგ ჩემმა ნაცნობმა პარლამენტის წევრმა იმდროინდელ პრემიერ-მინისტრს ინფორმაცია მიაწოდა. ჩვენ მაშინ ხელისუფლების მხარდაჭერა გვჭირდებოდა, რათა მარგანეცის უკანონო მოპოვება აღეკვეთათ. მაშინდელი პრემიერ-მინისტრი გახლდათ ირაკლი ღარიბაშვილი.
_ დავაკონკრეტოთ, ვინ იყო პარლამენტის დეპუტატი და რა ფორმით ჰქონდა ირაკლი ღარიბაშვილთან კომუნიკაცია?
_ დეპუტატმა ირაკლი ტრიპოლსკიმ, რომელთან ერთადაც ვისხედით „რედისონში“, ჩემ თვალწინ დაურეკა და მესმოდა, როცა ირაკლი ღარიბაშვილს ესაუბრებოდა. მაშინ ჩემდა გასაკვირად მოხდა ისეთი რამე, რამაც გაგვაოცა: ირაკლი ღარიბაშვილმა გადაგვამისამართა პირდაპირ ჯანყარაშვილთან, _ თურქეთშია ორი დღით წასული და რომ ჩამოვა, დაელაპარაკეთ ჯანყარაშვილსო.
_ დავაზუსტებ: ჯანყარაშვილი მაშინ რაიმე თანამდებობაზე მუშაობდა თუ, უბრალოდ, მისი ცოლის ნათესავი იყო?
_ კი და მაგიტომ გამიკვირდა, რადგან ჯანყარაშვილი მაშინ იყო გენინსპექციის ხელმძღვანელი და საერთოდ გამიკვირდა, რა კავშირში იყო ჯანყარაშვილი ამ კონკრეტულ საქმესთან და ზოგადად, ბიზნესთან, რადგან ის იყო ძალოვანი სტრუქტურის წარმომადგენელი. ჩვენ ამ შემთხვევაში აბსოლუტურად გულწრფელად გვინდოდა პრემიერ-მინისტრისთვის გვეთხოვა, რომ სახელმწიფოს აღმოეჩინა ჩვენთვის მხარდაჭერა და არა, ვიღაცის „კრიშა“ გვეთხოვა. თუმცა ისეთი მოცემულობა მივიღეთ, რომ პრემიერ-მინისტრმა პირდაპირ „კრიშასთან“ გადაგვამისამართა, რაც მაშინ ჩემთვის ძალიან გასაკვირი იყო. შემდეგ ჩამოვიდა ჯანყარაშვილი, ჩემს ამერიკელ პარტნიორებს პირდაპირ დაუკავშირდა და ძალიან დიდი უკმაყოფილება გამოთქვა, თუ რატომ გააფორმეს ჩემთან ხელშეკრულება?! მაქედან დაიწყო ჩემი პრობლემები.
_ რა სტატუსით უკავშირდებოდა, პრემიერის სახელით?
_ სავარაუდოდ, კი. კონკრეტულად, ამაზე დეტალური საუბარი არ მქონია ამერიკელებთან. ჩემთან მოვიდნენ, ღამის საათები იყო, საქართველოდან მიფრინავდა. გაფრენის წინ მნახა და მითხრა, რომ მას პირდაპირ დაურეკა ჯანყარაშვილმა და ძალიან დიდი უკმაყოფილება გამოთქვა, რომ ჩემთან გააფორმეს ხელშეკრულება.
_ და ვინ მოვიდა, შეგიძლიათ დავაზუსტოთ?
_ ვერლოდ ლოზინსკი, „ჯორჯიან მანგანეზის“ მაშინდელი გენერალური დირექტორი… შემდეგ აღმოჩნდა, რომ ამ კახელების ჯგუფმა გამომიგზავნა პიროვნება (სამწუხაროდ, მის სახელს ვერ დავასახელებ, ჩემი ოჯახის ახლობელია), დამიკავშირდნენ და პირდაპირ მითხრეს, _ კი, ბიძინა ივანიშვილთან ავიდა თამაზ თამაზაშვილი და მან დაარწმუნა ივანიშვილი, რომ შენი ამ ბიზნესში ყოფნა არ შეიძლება, რადგან მიხეილ სააკაშვილის ძალიან ახლობელი ხარო და აქედან გამომდინარე, ყველას _ პრემიერ-მინისტრსა და ბიძინა ივანიშვილსაც გულწრფელად სჯერა, რომ ეს მასეაო. თუმცა თვითონ მითხრეს, რომ იციან, ამ საქმესთან და ამ ბიზნესთან მიხეილ სააკაშვილი არაფერ კავშირში არ არის, მაგრამ, აბა, რა გეგონა, თამაზაშვილს პირდაპირ ცხვირწინ ააცალე ეს ხელშეკრულება და შეგრჩებოდაო?! _ დაახლოებით ასე მითხრეს.
_ რატომ იყო დასახელებული მიხეილ სააკაშვილი? წარსულში იცნობდით, რაიმე შეხება გქონდათ და ამიტომ ფიქრობდნენ, რომ შესაძლებელია, ამ ბიზნესშიც იყო მიხეილ სააკაშვილი?
_ კი, „ნაცმოძრაობის“ დამფუძნებელი ვიყავი, საკრებულოს წევრი ვიყავი „ნაცმოძრაობიდან“ და ახლო ურთიერთობა მქონდა მიხეილ სააკაშვილთან, თუმცა არასდროს, არანაირი კავშირი ჩემს საქმიანობას მიხეილ სააკაშვილთან არ ჰქონია. რა თქმა უნდა, არც ამ ბიზნესთან არანაირი კავშირი არ ჰქონია. მათ მითხრეს, რომ იცოდნენ, დიდი ხანი არ მქონია ურთიერთობა სააკაშვილთან, თუმცა მათ ეს აწყობდათ და ასე გააკეთეს. შემდეგი რაღაც მითხრეს, რომ როცა ბიძინა უკვე დაარწმუნა თამაზაშვილმა ამაში, ახლა გარკვეული პერიოდი დასჭირდება შენს რეაბილიტაციასო. მთხოვეს, რომ ამ ამერიკელებთან დაგვილაგეო და ამის შემდეგ მითხრეს, რომ რაღაც პერიოდი დასჭირდება რეაბილიტაციას და გაგიკეთებთო, რაზედაც ჩემგან ძალიან მწვავე რეაგირება მიიღეს და მე არ წავედი ამ რაღაცებზე, ასეთი დონის ურთიერთობებზე.
_ ვახო, დავაზუსტოთ, რას ნიშნავდა ფრაზები, _ თამაზაშვილს ცხვირწინ ააცალე ხელშეკრულებაო? ანუ თამაზაშვილს უნდოდა, ჭიათურაში ჰქონოდა ეს ბიზნესი?
_ დიახ, ზუსტად ასე იყო და ახლავე გავშლი თემას: იმის მერე, რაც მე ჩამომაშორეს, ამ ყველაფრის გამხმოვანებელი იყო გახარია. ბიძინა ივანიშვილის გადაწყვეტილების შემდეგ მოვიდა გახარია და მითხრა, რომ ამ ბიზნესიდან უნდა წავსულიყავი. იქ შეიყვანეს კომპანია, რომელსაც ხელმძღვანელობდა ჯანი მიხაილოვი, რომელიც მოსკოვში მოღვაწე ბიზნესმენ თამაზ სომხიშვილის წარმომადგენელი იყო. ეს უკანასკნელი ივანიშვილთან დაახლოებული პირია. ის წარმოადგენდა პირდაპირ უჩა მამაცაშვილს და მათ ჯგუფს. მეორე კომპანია, რომელიც მათ შეიყვანეს, ძმები ჩხენკელები არიან, რომელიც, ალბათ, საზოგადოებისთვის ცნობილია. ამათი კომპანია შეიყვანეს, აქ პირდაპირ იყო ჩადებული ამ კახელების ჯგუფის ინტერესი, შესაბამისად, მათ ჰქონდათ ინტერესი, ამ ბიზნესში შესულიყვნენ და შეიყვანეს კიდეც თავისი კომპანია, თუმცა მერე რამდენიმე თვის შემდეგ გამოვიდნენ და უკვე აღარ ვიცი, მათ შორის რა მოხდა, რადგან არ ვარ ამ საქმეში კომპეტენტური.
_ რომ დავაზუსტოთ: მას შემდეგ, რაც ჩამოგაშორეს ამ ბიზნესს, იგი გაიყო ორმა ფრთამ, _ ერთი მხრივ, უჩა მამაცაშვილმა და მეორე მხრივ, ღარიბაშვილმა და მისმა გუნდმა.
_ დიახ, იქ მესამე კომპანიაც იყო, თუმცა ისინი დღეს იქ აღარ არიან და პოლიტიკურად მათთან კავშირში არ არის. თავიდან სულ სამი კომპანია შევიდა, თუმცა ეს ორი კომპანია იყო: ერთი კომპანია უჩა მამაცაშვილის ინტერესებს წარმოადგენდა და მეორე იყო კახელების კომპანია, რომელიც ძმები ჩხენკელების სახით იყო წარმოდგენილი.
_ თუმცა გარკვეული პერიოდის შემდეგ მხოლოდ ერთი დარჩა, ხომ?
_ დიახ, ახლა არის ერთი. ვისაც ამ თემატიკასთან ჰქონია შეხება, ყველამ კარგად იცის, რომ დღეს არის ერთი კომპანია. რა პრეტენზიაც ჰქონდათ ჩემთან, რომ მონოპოლიის აღება მინდოდა, ზუსტად ისე ფუნქციონირებს დღეს ის კომპანია და მის სათავეში დგას ყველასთვის ცნობილი „რიჟა“ _ გიორგი კაპანაძე, რომელიც მედიამფლობელი გახდა და ახალ ჰოლდინგს აკეთებს „რუსთავი- 2-თან“. სავარაუდოდ, ამ ბიზნესიდან წამოსული ფულით დაფინანსდება ეს ჰოლდინგი.
შემიძლია, თამამად განვაცხადო, მის უკან პირდაპირ ბიძინა ივანიშვილი დგას…
_ თქვენ წასული ხართ ქვეყნიდან და ამერიკის შეერთებულ შტატებში იმყოფებით. რას აპირებთ სამართლებრივად, როგორ გეგმავთ, ეს ბრძოლა გაშალოთ და გადაიტანოთ უკვე საგარეო ფრონტზე?
_ ჩვენს უახლოეს გეგმებში არის ის, რომ აქ გვქონდა მოლაპარაკება ბევრ უფლებდამცველ ორგანიზაციასთან, გვაქვს ინტენსიური მოლაპარაკებები და შეხვედრები, ინფორმაციას ვაწვდით, თუ რა მოხდა ჩემთან დაკავშირებით, როგორ უკანონოდ და უსამართლოდ გამომაგდეს და გამომაძევეს ჩემივე შექმნილი ბიზნესიდან, ასევე ვაპირებთ საქართველოს მეგობარ სენატორებთან შეხვედრას. გვინდა, მათაც მივაწოდოთ სრული ინფორმაცია იმასთან დაკავშირებით, თუ რა მოხდა ჩემს კომპანიასთან და ზოგადად ჩემი ქეისის ირგვლივ, მაქსიმალურად მოვახდინოთ ინფორმირება ჩვენი პარტნიორი სახელმწიფოსი და რა თქმა უნდა, არაერთხელ მითქვამს და გავიმეორებ, რომ ჩემი მიზანია, საბრალდებო სკამზე დასხდეს ყველა, ვინც მონაწილეობდა ჩემ წინააღმდეგ ამ განხორციელებულ ტერორში. ესენი არიან პირადად ბიძინა ივანიშვილი, დღევანდელი პრემიერ-მინისტრი ირაკლი ღარიბაშვილი და ასევე მისი სიმამრი. მათ უშუალოდ მიიღეს, რატომღაც, გადაწყვეტილება, რომ არ მქონოდა უფლება, ვყოფილიყავი ასეთი კომპანიის მფლობელი და გადაწყვიტეს, ამ ბიზნესს ჩამოვეშორებინეთ.
_ ჯანყარაშვილი სხვა ფორმატით ხომ არ გამოჩენილა თქვენ ახლომახლო, თუ როცა ბიზნესი წაიღეს, მისი ინტერესი საბოლოოდ გაქრა?
_ ბიზნესი რომ წაიღეს, იმის შემდეგ აღარ გამოჩენილან.
_ მაინც ჩაგეკითხებით: ვინ იყო ის პირი, ვისი პირითაც შემოგითვალათ ჯანყარაშვილმა?
_ ის აბსოლუტურად ნეიტრალური ადამიანია, არანაირი კავშირი არ აქვს პოლიტიკასთან და ამჯერად თავს შევიკავებ მისი დასახელებისგან. თუმცა როცა ამაზე დამისვეს კითხვები საგამოძიებო სტრუქტურაში, მაშინ საუბარი მქონდა, მაგრამ არ მინდა, ფართო მსჯელობის საგნად ვაქციო, რადგან მას არანაირი ინტერესი არ გააჩნდა. უბრალოდ, მომინახეს ოჯახის ახლობელი და ასე მოვიდნენ ჩემამდე.
_ გამოძიება რა ეტაპზეა? ვიცი, ერთხელ ხართ გამოკითხული.
_ დიახ, პროკურატურაში ერთხელ ვარ გამოკითხული ჩემი საჯარო გამოჩენის შემდეგ და მას მერე არანაირი რეაგირება პროკურატურას არ მოუხდენია, ასე ვთქვათ, მხარე არ არსებობს. 2015 წლის ივნისში აღიძრა საქმე, ამდენი წელი გავიდა და მხარე არ არის ცნობილი საქმეში, რომ არ გვქონდეს წვდომა საქმის მასალებთან. რა თქმა უნდა, ჩემი აზრით, ეს იყო მაშინდელი პრემიერ-მინისტრის წინააღმდეგ განხორციელებული, რომ ივანიშვილს თაროზე ჰქონოდა შემოდებული საქმე მის წინააღმდეგ და არა იმიტომ, რომ რაღაც სიმართლეს ეძებდნენ. არ შეიძლება, ამდენი წელი მიდიოდეს გამოძიება და ვერ დაედგინათ ელემენტარული რამე.
_ ანუ გამოძიება დასრულებული არ არის, უბრალოდ, დაიწყო და საქმე შემოიდო სადღაც პროკურორის რომელიღაც თაროზე.
_ უამრავი ადამიანი დაიკითხა, მათ შორის, მეც, მიმატანინეს მასალები, ტელეფონიდან ამონაწერები, ასევე სატელევიზიო სიუჟეტები, რომელიც დაილუქა ჩემ თვალწინ, ამოიღეს და ამის შემდეგ არაფერი, არანაირი რეაგირება. ვიმეორებ: დღემდე მხარეც არ არის ცნობილი, რომ მაქსიმალურად დახურული იყოს ეს გამოძიება და ჩვენ არ გვქონდეს წვდომა მასალებზე.
_ ტრიპოლსკის ხომ არ გასჩენია სურვილი, ჩარეულიყო და ხმა მიეწვდინა, თუნდაც ივანიშვილისთვის, თუ როგორი უკანონობა მოხდა მისი სახელით და მისი გარემოცვის მიერ?
_ ბოლოს ტრიპოლსკისთან ჩემი შეხვედრა შედგა ჩემს სახლთან მდებარე კაფეში, იგი მოვიდა და უბრალოდ მომიბოდიშა, _ ეს ბიძინა ივანიშვილის გადაწყვეტილებაა და რა ვქნა, მე ვერაფერს გავხდებიო. მას შემდეგ ერთმანეთს არ შევხვედრივართ. ჩანდა, რომ იმდენად დიდი იყო ინტერესი და იმდენად მტკიცე გადაწყვეტილება მიიღეს, რაც იმაში ჩანდა, რომ თვითონ გახარია მოვიდა და გამიხმოვანა ეგ გადაწყვეტილება. პრაქტიკულად, პირდაპირ მითხრა, რომ ეს გადაწყვეტილება ზევით მიიღეს, შენ ამ სქემაში არ უნდა იყოო. თავიდან ბოლომდე მიმანიშნა გახარიამ, რომ ეს იყო ბიძინა ივანიშვილისა და პრემიერ-მინისტრის დონეზე, ასე ვთქვათ, უმაღლესი პირების დონეზე. რაც, რა თქმა უნდა, ტრიპოლსკის საუბარშიც ჩანდა.
_ გასაგებია, რადგან სამივე ინსტანციის სასამართლო წააგეთ ქვეყანაში, რაც ასე არ ხდება, თუ პოლიტიკური ნება არ არსებობს. ახლა აპირებთ საერთაშორისო სასამართლოს მიმართოთ?
_ ამაზე მუშაობენ იურისტები და ამ საქმეს დისკრიმინაციის მუხლით წავიღებთ სტრასბურგში. ასევე ვაპირებთ ინტენსიურად ვიმუშაოთ, მაქსიმალურად შევეწინააღმდეგოდ ამ უკანონობას. არ მოვისვენებ მანამ, სანამ სიმართლეს არ ვიპოვი, რადგან კიდევ ერთხელ მინდა ვთქვა, რომ რაც ჩემ წინააღმდეგ განხორციელდა, აბსოლუტური უსამართლობა იყო, არაფრის ჩარჩოში რომ არ ჯდება: არც სახელმწიფოებრიობის, არც ადამიანობის, არც კაცობის, პირიქით, ეს არის არაკაცური, არაადამიანური, არაკანონიერი გადაწყვეტილება, რომელიც მიიღეს მხოლოდ იმიტომ, რომ ასე მოუნდათ და ვალდებული ვარ, თუნდაც ჩვენი მომავალი თაობების წინაშე, რომ ვიბრძოლო და საქმე ბოლომდე მივიყვანო, რათა ამის შემდეგ ვერც ერთმა ხელისუფლებამ ვერ გაბედოს ასე უკანონოდ ბიზნესში ხელების ფათური. ბოლოს, ისიც მინდა გითხრათ, რომ შემახვედრეს ჯანი მიხაილოს, სომხიშვილის წარმომადგენელს. მან მითხრა, ასე ვთქვათ, ხელისუფლების მესიჯი, _ ძალიან ნიჭიერი კაცი ხარ და იქნებ, გვემეგობრაო. უბრალოდ, ამ ბიზნესს ჩაეხსენი და სხვა თემებში შენნაირი ნიჭიერი ხალხი გვჭირდებაო. ამაზე ძალიან მტკიცე უარი მიიღეს, რადგან კიდევ ერთხელ ვამბობ: ასეთი ფორმით კერძო საქმიანობაში ჩარევა და ასეთი გადაწყვეტილების მიღება ჩემთვის იყო აბსოლუტურად მიუღებელი. არც ერთი დოკუმენტი და არც ერთი წერილი არ მომსვლია, რის საფუძველზე და რატომ? უბრალოდ, თქვეს, ჩვენს ხელშია ახლა ძალაუფლება და არ გვინდა, შენ იყოო! ამით მორჩა. დაახლოებით ასეთი ტიპის ურთიერთობა იყო. ამიტომ მე მინდა, ბოლომდე მივიყვანო ეს საქმე, ერთხელ და სამუდამოდ დამთავრდეს ხელისუფლებების ასეთი უხეში ჩარევები კერძო ბიზნესსა და კერძო საქმიანობაში. მე ვარ ისეთ ქვეყანაში, სადაც ბიზნესი ძალიან ძლიერია და აქეთ კარნახობს ხელისუფლებას წესებს. სწორედ ბიზნესია ის, რაც ქმნის ქვეყნისთვის მატერიალურ დოვლათს და რაც აძლიერებს ქვეყნის ეკონომიკას. უბრალოდ, არ შეიძლება სახელმწიფოს ჰქონდეს ასეთი დამოკიდებულება და ბიზნესს უყურებოდეს, როგორც თავისი ჯიბის ბიზნესს, რადგან ის ხელისუფლებაშია. ასეთი დამოკიდებულება აქვს დღეს ბიძინა ივანიშვილს, პრემიერ-მინისტრ ღარიბაშვილსა და მისი ოჯახის წევრებს, საქართველოში ყველას, რაც ძალიან სამწუხაროა. მთელმა საზოგადოებამ ერთად უნდა იბრძოლოს ამის წინააღმდეგ, რომ ეს აღარასოდეს განმეორდეს.

ელისო კილაძე

დატოვეთ კომენტარი