მთავარი ინტერვიუ გიორგი ვაშაძე: „სტრატეგია აღმაშენებელსა“ და „ლელოს“ ყველაზე მეტი ხმა წაგვართვეს!“

გიორგი ვაშაძე: „სტრატეგია აღმაშენებელსა“ და „ლელოს“ ყველაზე მეტი ხმა წაგვართვეს!“

170
0
გაზიარება



ისე ჩანს, რომ ოპოზიციის ერთიანობას თითქოს ბზარი შეეპარა. ყოველ შემთხვევაში, ცალკეული პოლიტიკური ძალები იმას აპროტესტებენ, რომ „ანტიქოცურ“ აქციებზე ვიღაცები პლაკატებს აფრიალებენ: „მიშა, ჩამოდი!“ ამასთან, მესამე პრეზიდენტი სოციალურ ქსელში ხშირად იმეორებს, _ თუ ოპოზიცია მეტყვის, სამშობლოში დავბრუნდებიო. სააკაშვილის ეს განცხადება, როგორც ოპოზიციაში ამბობენ, „ოცნების“ წისქვილზე ასხამს წყალს. ამ ვერსიას ჩემი რესპონდენტიც იზიარებს, ანუ „სტრატეგია აღმაშენებლის“ ლიდერი, გიორგი ვაშაძე, ამბობს, თუ სააკაშვილს ჩამოსვლა უნდა, ჩამოვიდეს, თუ არადა, ამ საუბარს თავი დაანებოსო.

ამას გარდა, „ქრონიკა+“-ისთვის მიცემულ ექსკლუზიურ ინტერვიუში გიორგი ვაშაძე აცხადებს, რომ ოპოზიციიდან „ოცნებამ“ ხმები ყველაზე მეტად „სტრატეგია აღმაშენებელსა“ და „ლელოს“ გაუყალბა, რადგან ამ პარტიებს საარჩევნო კომისიებში წარმომადგენლები არ ჰყავდათ და მმართველმა გუნდმა, როგორც ჩანს, ჩათვალა, ხმაურს არ ატეხენო, მაგრამ „ოცნების“ გუმანი არ გამართლდა _ პირველი სწორედ „სტრატეგია აღმაშენებელმა“ განაცხადა, არჩევნები გაყალბებულია, შედეგებს არ ვაღიარებთ და ამიტომ პარლამენტშიც არ შევალთო.
ერთი სიტყვით, როგორ განვითარდება მოვლენები, ანუ „ოცნება“ დაიხევს თუ არა უკან და დანიშნავს თუ არა ახალ არჩევნებს? _ „ქრონიკა+“ „სტრატეგია აღმაშენებლის“ ლიდერ გიორგი ვაშაძის ვრცელ ინტერვიუს გთავაზობთ:

_ გიორგი, ყველამ ვიცით, რომ არჩევნები გაყალბდა, მაგრამ, თქვენი შეფასებით, „ოცნება“ ასეთ ვა-ბანკზე რატომ წავიდა? არ ელოდა, რომ არჩევნების მოპარვას საზოგადოების მხრიდან ასეთი მძაფრი რეაქცია მოყვებოდა?
_ „ოცნებას“ გაყალბება, ალბათ, გადაჭარბებით მოუვიდა და არ ელოდა, რომ ყველაფერ ამაზე ასეთი რეაქცია იქნებოდა, თუმცა გაყალბების გარდა სხვა ალტერნატივა არც ჰქონდა. ის ხმები, რასაც რეალურად მიიღებდა, ე. წ. მონოუმრვალესობის ჩამოსაყალიბებლადაც არ ეყოფოდა.
_ ისე, არჩევნებამდე რამდენიმე დღით ადრე ბიძინა ივანიშვილმა განაცხადა, _ ჩემი გუნდი ახალ პარლამენტში, მინიმუმ, 100 მანდატს მიიღებსო…
_ დიახ, არჩევნებამდე ბევრი ბევრ რამეს ამბობდა, მაგრამ რეალობა სულ სხვანაირი იყო, ამიტომაც უმცირესობაში აღმოჩენას ამ რისკზე წასვლა არჩიეს.
_ გასაგებია, რომ არჩევნებით კმაყოფილი მხოლოდ „ოცნებაა“, მაგრამ თქვენს ხელთ არსებული მონაცემებით, ყველაზე მეტი ხმა რომელ ოპოზიციურ პარტიას მოპარეს?
_ ვფიქრობ, რომ „სტრატეგია აღმაშენებელს“ ყველაზე მეტი ხმა წაგვართვეს.
_ დამისაბუთეთ, ასე რატომ ფიქრობთ?
_ კომისიის წევრები არ გვყავდა და ყველა უბანში ჩვენი, ასე ვთქვათ, დაკარგული ხმები ამოდის. ეს კი ძალიან მნიშვნელოვანი ხმებია.
მოკლედ, ყველაფერ ამის გათვალისწინებით „სტრატეგია აღმაშენებელმა“ იმაზე ორჯერ მეტი ხმა მიიღო, ვიდრე ცესკომ აჩვენა, თუმცა ჩვენი ხმების დაცვა ვერ შევძელით, რადგან ე. წ. შუა პარტიების ხმები ტოტალურად გაყალბდა. ჩემი აზრით, „ლელოსაც“ ბევრი ხმა წაართვეს. ასე რომ, ჩვენ და „ლელო“, ალბათ, ყველაზე მეტად დავზარალდით.
_ „ოცნებამ“ „სტრატეგია აღმაშენებელსა“ და „ლელოს“მიზანმიმართლად წაართვა ხმები?
_ ეს სტარტეგიული გადაწყვეტილება იყო… „ევროპულ საქართველოსა“ და „ნაციონალურ მოძრაობას“ კომისიის წევრები ჰყავდათ, ამიტომ, როგორც ჩანს, ჩამოყალიბდნენ, თუ შესაძლებლობა მოგვეცემა, ისეთი პარტიების ხმები „ჩავითვალოთ“, რომელსაც კომისიის წევრები არ ჰყავს და ზედმეტი ხმაურიც არ იქნებაო.
_ გასაგებია, რომ კომისიის წევრები არ გყავდათ, მაგრამ, როგორც მახსოვს, ოპოზიციამ ერთიანი სპეცშტაბი შექმნა, რომელსაც ხმების დაცვაზე უნდა ემუშავა. ამ შტაბმა რატომ ვერ გაამართლა?
_ გეტყვით: ოპოზიციის მთავარი პრობლემა ისაა, რომ საარჩევნო კომისიის 2/3-ს „ქართული ოცნება“ აკონტროლებს. შესაბამისად, ყველგან, სადაც ოპოზიციის, ვთქვათ, ორ წარმომადგენელთან შეთანხმება ან რაღაც მეთოდებით გაჩუმება შეძლო, ასეთი შედეგი დადგა, ანუ გაყალბდა.
_ ე. ი. კომისიებში ოპოზიციის ცალკეული წარმომადგენლები გაიყიდნენ?
_ სამწუხაროდ, გაყიდვას არ გამოვრიცხავ, მაგრამ ძირითადი ფაქტორი მაინც ზეწოლა და კომისიაში უმცირესობაში ყოფნაა, უფლებებიც არ გაქვს _ რამეს ზედმეტად იტყვი თუ არა, გაგაგდებენ.
სწორედ ამიტომაც, პირადად ჩემთვის, საარჩევნო რეფორმა პრინციპულად მნიშვნელოვანია და თუ საარჩევნო რეფორმა არ განხორციელდება, მნიშვნელობა არ ექნება, რიგგარეშე ან ახალი არჩევნები ჩატარდება თუ არა.
_ საარჩევნო რეფორმა, ცხადია, მხოლოდ თამარ ჟვანიას გადაყენებასა და ცესკოს ადმინისტრაციის შეცვლას არ გულისხმობს, არა?
_ რა თქმა უნდა.
_ თქვენეული საარჩევნო რეფორმა რას ითვალისწინებს?
_ ორი ვერსია მაქვს.
_ კერძოდ?
_ დეტალურ აღწერას ვაკეთებ, ელექტრონული არჩევნები როგორი უნდა იყოს და როგორ უნდა ჩატარდეს, მაგრამ ჩვენთვის ახლა მთავარია, რომ ხმის მიცემის პროცედურა შეიცვალოს და ისეთი საშუალებები გამოვიყენოთ, რომლითაც ბიულეტენების მოპარვა შეუძლებელი გახდეს. აი, მაგალითად, ახლა „კარუსელის“ 8 ათასი წერტილი იყო და თითოს რომ ხმა თხუთმეტჯერ მიეცა, ეს უკვე 120 ათასი ხმაა. 120 ათასი ხმა კი, ლამის, 6 პროცენტია, ანუ ძალიან დიდი ციფრია.
მოკლედ, ეს უზარმაზარი მანიპულაციის საშუალებას იძლევა. ამიტომ ყველაფერი თავიდან ბოლომდე სისტემურად უნდა შეიცვალოს.
ამას გარდა, კომისიის შემადგენლობა ხელისუფლებასა და ოპოზიციას შორის პარიტეტული უნდა იყოს. ახლა ე. წ. პროფესიული, 6-კაციანი კვოტა რომ აქვთ, ამასაც აკონტროლებენ და პლუს სამი „ოცნების“ წარმომადგენელია. ასე აღარ უნდა იყოს.
პარალელურად, დავების ახალი მექანიზმიც უნდა შევიმუშაოთ.
_ ამ საარჩევნო რეფორმის გასატარებლად პარლამენტი ხომ საჭიროა?
_ დიახ, საჭიროა.
_ მაშასადამე, ოპოზიციას საკანონმდებლო ორგანოში შესვლა თუნდაც ამ რეფორმის გატარების მიზნით მაინც მოუწევს. ასეა, არა?
_ არა.
_ რატომ?
_ თუკი „ოცნებას“ პარლამენტში 90 დეპუტატი ეყოლება, ამ რეფორმის გატარება შეეძლება, თუმცა ახლა ყველაზე მნიშვნელოვანი ისაა, რომ თარიღზე შევთანხმდეთ, ახალი საპარლამენტო არჩევნები როდის ჩატარდება.
_ ვთქვათ, „ოცნება“ ახალი არჩევნების ჩატარებას დასთანხმდა, რაც, სავარაუდოდ, გაზაფხულზე იქნება. მანამდე მეცხრე მოწვევის პარლამენტმა უნდა იფუნქციონიროს თუ ე.წ. მეათემ?
_ მეცხრე მოწვევის პარლამენტი ფუნქციონირებას ვეღარ გააგრძელებს.
_ ე. ი., თუ ახალ არჩევნებზე შეთანხმება შედგა, ოპოზიცია პარლამენტში შევა?
_ ამ ეტაპზე ჩვენ პარლამენტში შესვლას არ ვიხილავთ. ჯერ მთავარი შეთანხმებაა დანარჩენ საკითხებზე, ანუ იმაზე, ეს შეთანხმება როგორ უნდა რეალიზდეს.
საერთოდ, ამ შეთანხმების რეალიზებასაც ბევრი გარანტი სჭირდება, რადგან ისევ გადაგდებულები არ აღმოვჩნდეთ.
_ გადაგდება „ოცნების“ სტილია. ჰოდა, ოპოზიცია, ჯერ კიდევ, მოქმედ ხელისუფლებას სიტყვაზე ენდობა თუ შეთანხმების შესასრულებლად რამე გარანტიას მოითხოვს?
_ ამაზე ვფიქრობთ. მნიშვნელოვანი ისაა, რომ ამ პროცეში ამერიკელი და ევროპელი პარტნიორები მონაწილეობენ. დანარჩენი ვნახოთ…
_ სხვათა შორის, 31 ოქტომბერს, როცა „ოცნების“ ეგზიტპოლები გასაჯაროვდა, იმის შესახებ დაიწყო საუბარი, ხელისუფლება ოპოზიციიდან ვის გადაბირებას მოახერხებდა. ჰოდა, კულუარებში ეჭვობდნენ, ივანიშვილის გუნდს „სტრატეგია აღმაშენებელთან“ საერთო ენის გამონახვა არ გაუჭირდებოდა, თუმცა ისე მოხდა, რომ პირველმა სწორედ თქვენი ბლოკის ერთ-ერთმა ლიდერმა, თაკო ჩარკვიანმა განაცხადა, პარლამენტში არ შევდივართ და, საერთოდაც, არჩევნების შედეგებს არ ვაღიარებთო…
_ ჩვენ მიმართ ნეგატიური კამპანია მიზანმიმართულად ჰქონდათ დაწყებული, განსაკუთრებით, „ნაცმოძრაობის“ წევრებს _ მიშადან დაწყებული… ახლა კი, ვფიქრობ, ჩვენთან ყველას ბოდიში აქვს მოსახდელი!
_ რატომ?
_ ამ ტყუილში მხოლოდ საკუთარი თავი კი არა, ბევრი სხვა ადამიანიც დააჯერეს…
სხვათა შორის, მოვა დრო და ბოდიშს სააკაშვილისგანაც ველოდები იმის გამო, რასაც „ბნელ ძალებთან“ დაკავშირებით ამბობდა.
_ საქმე ისე მიდის, რომ სააკაშვილი ოპოზიციაში შესაძლოა, „განხეთქილების ვაშლად“ იქცეს. ყოველ შემთხვევაში, რამდენიმე დღის წინ, ექსპრეზიდენტის ნიადაგზე, ერთ-ერთ გადაცემაში გია ბარამიძე, გიგა ბოკერია, ალეკო ელისაშვილი და ნინო ბურჯანაძე ერთმანეთს დაუპირისპირდნენ. გრიგოლ ვაშაძის სკანდალურ განცხადებასა და 14 ნოემბრის მიტინგზე „მიშა, ჩამოდის“ მოთხოვნაზე აღარაფერს ვამბობ. მოკლედ, „ნაცები“ რამე ახალ პოლიტიკურ თამაშს ხომ არ თამაშობენ?
_ არ ვიცი, „ნაციონალური მოძრაობა“ რა თამაშს თამაშობს…
საერთოდ, ვფიქრობ, რომ ამ პარტიაში სიტუაცია ბოლომდე არეულია, რაც მათი შიდა საქმეა, თუმცა საკითხების ასე თავზე მოხვევა სწორი არაა.
_ რატომ?
_ შეიძლება, ოპოზიციამაც თქვას, თუ ჩამოსვლა უნდა, ჩამოვიდეს, ვიღაცისგან ნებართვას ან მოწვევას რატომ ელოდებაო?
მოკლედ, ასეთი დამოკიდებულება სწორი არაა. ამას ხომ თავად მიშა აკეთებს? _ აი, თუ დამიძახებენო… მაგრამ ვერ გავიგე, ოპოზიციამ რატომ უნდა დაუძახოს? თავისი მხარდამჭერები ხომ ეუბნებიან, ჩამოდიო. ჰოდა, თუ შეუძლია, ჩამოვიდეს, თუ არადა, ამ საუბარს თავი გაანებოს!
საერთოდ, მიშას ჩამოსვლა-არჩამოსვლა „ოცნების“ მთავარი საპროგრამო კამპანიაა.
_ ე. ი., სააკაშვილი „ოცნების“ წისქვილზე ასხამს წყალს?
_ ნებსით თუ უნებლიეთ, ასეა…
სხვათა შორის, 2018 წელს, როცა ერთად ვიყავით, გრიგოლ ვაშაძემ 38 პროცენტი აიღო. ახლა კი, როცა მიშა _ მთვარი ფალავანი _ პრემიერობის კანდიდატად გამოიყვანა, „ნაცმოძრაობამ“ 27 პროცენტი აიღო. ეს ხომ გაკვეთილი უნდა იყოს?
_ რას გულისხმობთ?
_ 100 ათასი ხმით ნაკლები რატომ აიღო, როცა 2018 წელს საპრეზიდენტო არჩევნები 300 ათასი ხმით მოვიგეთ?
მოკლედ, ამ ადამიანებისთვის ეს ხომ რაღაცნაირად გაკვეთილი უნდა იყოს, რომ ერთსა და იმავე მოჯადოებულ წრეზე არ ვიაროთ? მიხვდით, რაზე ვსაუბრობ?
_ დიახ, მე კი მივხვდი, მაგრამ ისე ხომ არ მოხდება, რომ, საბოლოო ჯამში, პარლამენტში „ნაციონალური მოძრაობა“ შევიდეს და დანარჩენი ოპოზიცია ბოიკოტის რეჟიმში დარჩეს?
_ (იცინის)
_ რა გაცინებთ, გიორგი?
_ რა ვიცი… ყველაფერი შესაძლებელია, მაგრამ ვნახოთ…
საერთოდ, არ უნდა გვეგონოს, რომ ეს პროცესი მარტივია.
_ რას გულისხმობთ?
_ ამ პროცესში ძალიან მნიშვნელოვანი ჩვენი ამერიკელი და ევროპელი პარტნიორების პოზიციაა. ამიტომ, რაღაც მომენტში, ყველას მოგვიწევს, რომ პროცესს ადეკვატურად შევხედოთ.
_ ვერ ვხვდები, საუბარი საითკენ მიგყავთ…
_ დღეს და ხვალ პარლამენტში ვერც ვერავინ შევარდება და ვერც გამოვარდება, ამიტომ დაველოდოთ მოვლენებს.
_ კი ბატონო, დაველოდოთ…
რამდენიმე დღის წინ კახა კალაძემ საზოგადოებას ამცნო, უცხოელების შუამავლობით მიმდინარე მოლაპარაკებები ახალ არჩევნებს არ ეხებაო. გიორგი, ამ მოლაპარაკებების მონაწილე ხართ და მითხარით, კონსულტაციები რაზე მიდის და, საერთოდ, ევროპელ-ამერიკელები რას ამბობენ?
_ ველოდები, რომ შემდეგ რაუნდზე, როცა დაინიშნება, მთავარი საუბარი იმაზე იქნება, „ოცნება“ რა დათმობაზე მოდის. თუ ახალი არჩევნების დანიშვნაზე არაფერს იტყვიან, ეს ძალიან ცუდი იქნება, რადგან პროცესი ჩიხში შევა და პარლამენტში მარტო დარჩებიან.
_ სიმართლე ვთქვათ, „ოცნებას“ პარლამენტში მარტო დარჩენა სულაც არ ანაღვლებს. აკი, თქვეს კიდეც, კარგიც იქნება, თუ ოპოზიცია საკანონმდებლო ორგანოში არ შემოვაო…
_ ის, რომ მოლაპარაკება დასავლეთის შუამავლობით დაიწყო, რაღაც შედეგზე გაგვიყვანს.
_ ვთქვათ, შედეგზე ვერ გავედით. რა მოხდება, თუკი „ოცნება“ პარლამენტში მარტო შევა?
_ ეს პარლამენტი ძალიან მყიფე იქნება და მასთან მიმართებით მუდმივი ტურბულენცია იარსებებს.
_ ასე რატომ ფიქრობთ?
_ „ოცნება“ მარტო იქნება!
_ ისე, გიორგი, ხმები ისანშიც გაგიყალბეს, სადაც მაჟორიტარად იყრიდით კენჭს?
_ დიახ, ისანშიც იგივე გააკეთეს, სადაც დარტყმის მთავარი, ასე ვთქვათ, ობიექტი ჩემი მხარდამჭერები იყვნენ.
სხვათა შორის, ისანში ძალიან ბევრი საჩივარი გვაქვს _ გადათვლას ვითხოვდით, მაგრამ ერთიც არ დაგვიკმაყოფილეს!
_ ჩვენში დარჩეს და, არჩევნების გაყალბებას სისხლის სამართლის კვალიფიკაცია მხოლოდ „სტრატეგია აღმაშენებელმა“ მისცა _ სარჩელი სასამართლოში კი არა, პირდაპირ პროკურატურაში შეიტანა.
_ დიახ…
_ ამ გზას მთელი ოპოზიციური სპექტრი რატომ არ დაადგა?
_ ყველას თავისი სტრატეგია აქვს, თუმცა, რაღაც მომენტში, ამ საკითხში სინერგიას ვნახავთ…
საერთოდ, იცით, რა ხდება?
_ რა?
_ პირდაპირ გეტყვით: ისე არ მინდა, რომ ყველა ოპოზიციური პარტია ავითქვიფოთ.
_ „ათქვეფაში“ რას გულისხმობთ?
_ ყველა ერთი კი არა, განსხვავებული ვართ და ამა თუ იმ პროცესს განსხვავებულად ვუყურებთ.
„სტრატეგია აღმაშენებელს“ მოვლენების ასეთი განსაზღვრა გვაქვს: იმ მხარდამჭერებს, რომელთაც ხმა მოგვცეს, პირველ რიგში, მადლობა უნდა გადავუხადოთ და ისინი შევინარჩუნოთ.
ამასთან, ჩვენი მხარდაჭერა და იდენტიფიცირება კიდევ უფრო გავაფართოვოთ, ანუ ვინმესთან შერწყმასა და შემორწყმას არ ვაპირებთ, რადგან სამი თვის პარტიის კვალობაზე, ამ არჩევნებში, გაყალბების მიუხედავად, საკმაოდ კარგ შედეგს მივაღწიეთ!
ისე, ის პროცესი, რომელიც მე და თაკო ჩარკვიანმა დავიწყეთ, ალბათ, უფრო ადრე უნდა დაგვეწყო!
_ გიორგი, გასაგებია, რომ არჩევნები გაყალბდა, მაგრამ, მგონი, დადგა დრო, რომ ოპოზიციამ საკუთარ სტრატეგიასაც გადახედოს, კერძოდ, შეცდომა ხომ არ იყო, ლამის ყველა პარტიამ პრემიერობის საკუთარი კანდიდატი რომ დაასახელა, ანუ არჩევნებამდე ოპოზიცია უფრო მონოლითური რომ ყოფილიყო, „ოცნებას“ გაყალბება, იქნებ, ვერც გაებედა?
_ არ მგონია, რომ ეს მთავარი საკითხი იყოს. ჩემი აზრით, მთავარი საკითხი „ნაციონალური მოძრაობის“ მიერ ოპოზიციურ პარტნიორებზე აგრესიული თავდასხმები იყო.
შეგახსენებთ, რომ ეს მასობრივი თავდასხმა ჩვენზე დაიწყო და მერე სხვებთან გააგრძელეს. მათ უპასუხეს, ჩვენ კი არ ვპასუხობდით.
მოკლედ, ყველაზე ცუდი ოპოზიციის ოპოზიციონერობა იყო და ეს როლი „ნაციონალურმა მოძრაობამ“ ითამაშა დაწყებული ხატია დეკანოიძის მაჟორიტარობის კანდიდატად დასახელებით, და ბევრი სხვა საკითხით დამთავრებული. შესაბამისად, ამით ხალხმა დაინახა, რომ ოპოზიციაში ერთობა არ არის.
რაც შეეხება პრემიერობის კანდიდატებს, აბა, თუ პრემიერობის კანდიდატი არ გყავს, რა არჩევნებში მონაწილეობ?
ერთი სიტყვით, ვფიქრობ, რომ ყველაზე ცუდი და ნეგატიური როლი ოპოზიციის ოპოზიციონერობამ ითამაშა.
_ ყველაფერ ამის გათვალისწინებით, შეიძლება თუ არა ვთქვათ, რომ 31 ოქტომბერს „ნაციონალური მოძრაობა“ გამარჯვებისთვის კი არა, მთავარი ოპოზიციური ძალის სტატუსის შესანარჩუნებლად იბრძოდა?
_ ამას მომავალი გვაჩვენებს. ახლა არ მინდა, რომ მოვლენებს გავუსწრო…
_ საუბრის ბოლოს კიდევ ერთ თემას შევეხოთ: ზოგი ამბობს, რომ ოპოზიცია ხალხს მხოლოდ ტელევზიით კი არ უნდა ელაპარაკოს, არამედ ქუჩაში უნდა გავიდეს, მთელი საქართველო ფეხით შემოიაროს, რათა ადამიანები არჩევნების გაყალბებაში კიდევ უფრო დაარწმუნოს. ამაზე რას ფიქრობთ?
_ ამას მაქსიმალურად ვაკეთებთ, თუმცა კორონავირუსი და ამით გამოწვეული პრობლემებია. შესაბამისად, არ გვინდა, რომ არასწორად მოვიქცეთ, თუმცა ხალხს ვხვდებით.
_ ოპოზიციამ სამი დიდი აქცია დააანონსა, თუმცა ამ აქციებს შორის, მინიმუმ, ერთკვირიანი ინტერვალია. ამის გამო საპროტესტო მუხტი ხომ არ მინავლდება?
_ არ მგონია, თუმცა, მეორე მხრივ, დროზე ადრე ეს მუხტი არ უნდა გამოვწუროთ.
_ ანუ?
_ არის პროცესი, რომელსაც უნდა მივყვეთ.
_ კარგი, მივყვეთ… ერთ კითხვაზეც მიპასუხეთ და საუბარი დავასრულოთ: თქვენი აზრით, ახლანდელი პოლიტიკური კრიზისი იმ პროცესებს ჰგავს, რომელიც 2003 წლის 23 ნოემბრამდე, ე. ი., „ვარდების რევოლუციამდე“ ვითარდებოდა?
_ არ ვიცი, არ ვიცი… ამასაც დრო გვიჩვენებს.
_ მაინც ჩაგეკითხებით: თუ „ოცნება“ დათმობაზე არ წამოვიდა, რევოლუცია გარდაუვალი იქნება?
_ ჩვენ რევოლუციურ სცენარებს ნამდვილად არ ვიხილავთ. ჩვენ სვლა შეთანხმების მიმართულებით გვიდნა.
_ ე. ი., „ოცნება“ ხელისუფლებიდან წავა?
_ მოლაპარაკებების პროცესია და წესით, წინ უნდა წავიწიოთ…
_ უნდა მეკითხა და დამავიწყდა: არჩევნები უშუალოდ ივანიშვილის მითითებით გაყალბდა თუ ეს გადაწყვეტილება კობახიძე-მდინარაძე-კალაძემ და სხვებმა ერთად მიიღეს?
_ ამაში თანამონაწილე ყველა ერთადაა.
_ ხელისუფლების შეცვლის შემდეგ არჩევნების გამყალბებლები უნდა დაისაჯონ?
_ დიახ!

გიორგი აბაშიძე



დატოვეთ კომენტარი