ოპოზიციამ თბილისის 6 ოლქში მაჟორიტარობის კანდიდატები დაასახელა, თუმცა კანდიდატების აბსოლუტური უმრავლესობა დომინანტი ოპოზიციური პარტიების წარმომადგენელია, რაც იმას ნიშნავს, რომ თბილისისთვის „ძალა ერთობაშიას“ ისეთი წევრი, მაგალითად, როგორიც ედპ-ა, არ იბრძოლებს. რატომ მიიღეს ასეთი გადაწყვეტილება და ამასთან, მოქმედებს თუ არა ის მემორანდუმი, რომელსაც „ძალა ერთობაშიას“ წევრებმა 2018 წლის საპრეზიდენტო არჩევნების წინ მოაწერეს ხელი და თქვეს, რომ საპარლამენტო არჩევნებზე ერთიანი სიით გამოვიდოდნენ? _ ამ და სხვა აქტუალურ საკითხებზე „ქრონიკა+“ „ძალა ერთობაშიას“ ერთ-ერთ ლიდერს, ეროვნულ-დემოკრატიული პარტიის თავმჯდომარე ბაჩუკი ქარდავას ესაუბრა:

_ ბატონო ბაჩუკი, როგორ მოიკორონეთ?
_ საკმაოდ კარგად.
_ ხან კუბოებით გვემუქრებოდნენ, ხან კი _ „მეორე ტალღით“ და „საკმაოდ კარგად“ „მოკორონება“ რას ნიშნავს?
_ ამ პერიოდში პირადი პრობლემები მქონდა _ მამა გარდამეცვალა და საგანგებო მდგომარეობამ თუ კომენდანტის საათმა ვერ შემაჩერა, რომ ქალაქში მემოძრავა, თუმცა კორონა არსად შემხვედრია, განსაკუთრებით, ღამის საათებში.
_ ამ ფონზე ხომ არ გეჩვენებათ, რომ ხელისუფლება ყველაფერს აზვიადებდა და კორონას პოლიტიკური მიზნებისთვის იყენებდა და იყენებს?
_ ვერ ვიტყვი, რომ მსოფლიო პანდემია თითიდან იყო გამოწოვილი, თუმცა საქართველოში ყველაფერს აზვიადებენ და სარგებლის ნახვას ცდილობენ. ამ შემთხვევაშიც, სწორედ ასე მოხდა, ანუ ხელისუფლებამ სცადა, რომ კორონითაც სარგებელი ენახა.
_ ხელისუფლება კორონობით ფინანსური სარგებლის ნახვას შეეცადა თუ პოლიტიკურის?
_ ორივეს ერთად. ამასთან, შეეცადა, პოლიტიკური ოპონენტები დაესუსტებინა.
_ დაასუსტა?
_ ქართველებს კიდევ ერთი სენი გვახასიათებს _ გადამლაშება. „ოცნებამაც“ გადაამლაშა და პოლიტიკური ოპონენტები ვერ დაასუსტა.
_ „გადამლაშებაში“ რას გულისხმობთ?
_ ზომიერება ხომ არაფერში გვაქვს და იგივე კომენდანტის საათმა თუ სხვა ღონისძიებებმა ეკონომიკასა და თითოეული ოჯახის ფინანსურ მდგომარეობაზე ძალიან ცუდად იმოქმედა. აი, „გადამლაშებაც“ ამას ჰქვია.
_ სხვების მსგავსად, თქვენც ხომ არ ფიქრობთ, რომ კორონადახმარებებით „ოცნებამ“ წინასაარჩევნო კამპანია დაიწყო?
_ დახმარებების შესახებ, რაც გლობალურად უნდა განხორციელებულიყო, მაინცდამაინც, არ მსმენია, თუმცა ცალკეულ შემთხვევებს, დიახ, საარჩევნო ინტერესებისთვის იყენებს!
_ ე. ი., კორონა არჩევნების წინ „ოცნების მთავარ მოკავშირედ იქცა?
_ ხელისუფლებამ სცადა, რომ კორონა მისი მთავარი მოკავშირე გამხდარიყო, მაგრამ ბოლო დროის პოლიტიკურ პროცესებს რომ ვუყურებ, „ოცნებას“ კორონამაც ვერ უშველა!
_ ბოლო დროს პოლიტიკაში მნიშვნელოვანი ის მოხდა, რომ ოპოზიციამ თბილისის 8 ოლქში მაჟორიტარობის კანდიდატები წარადგინა. ამაზე საუბრობთ?
_ ოპოზიციის მაჟორიტარობის კანდიდატების გარდა, შემიძლია, ექსკლუზიურად გითხრათ, რომ ის მაგიდა, რომელიც ოპოზიციაში არსებობს, ერთიანობას ინარჩუნებს, ანუ ის პოლიტიკური პარტიებიც კი, რომლებიც მაჟორიტარების წარდგენაში არ იყვნენ ჩართულები, მზად არიან, ერთად იყონ და მაგიდას არჩევნების შედეგების დასრულების დათვლამდე წერტილი არ დაესმევა!
_ ვერ ვხვდები, „ერთიანობის შენარჩუნებაში“ რას გულისხმობთ, მით უმეტეს, ცნობილია, რომ ოპოზიციას ერთიანი საარჩევნო სია არ ექნება.
_ ერთიანობას ეს მაგიდა, როგორც გითხარით, იქამდე შეინარჩუნებს, სანამ ქვეყანაში არჩევნების შედეგები საბოლოოდ არ დაითვლება, ანუ ჩვენ ერთმანეთის ხმებს დავიცავთ და ეს ლამაზად ნათქვამი სიტყვები არაა. დიახ, უფრო მეტი მექანიზმი შეიქმნება, რომ ხმები დავიცვათ.
_ ისე, ამ მაგიდის მიმართ გარკვეული კითხვის ნიშნები „კანონი და სამართლის“ ლიდერ თაკო ჩარკვიანს აქვს.
_ დიახ, ქალბატონ თაკოს ზოგჯერ თავისი პოლიტიკური ანალიზი აქვს და ეს მისი საქმეა. რეალობა კი ისაა, რომ ამ ოპოზიციურ ერთიანობაზე ბიძინა ივანიშვილს ელეთმელეთი ემართება და რამდენიმე დღის წინ მაჟორიტარი კანდიდატების დასახელებით, მგონი, ბოლო იმედიც გადაეწურა, რომ ოპოზიცია დაიშლებოდა.
_ ჩვენში დარჩეს და, თბილისის ექვს ოლქში მაჟორიტარი კანდიდატები „ძალა ერთობაშიას“ პლატფორმაში შემავალი პარტიებიდან მხოლოდ „ნაცმოძრაობამ“ წარადგინა. ამას რით ხსნით, ბატონო ბაჩუკი?
_ რატომ მხოლოდ „ნაციონალურმა მოძრაობამ“? გიორგი ვაშაძეც ხომ „ძალა ერთობაშია“, მაგრამ თუ ყოფილ „ნაციონალებს“ გულისხმობთ, მაშინ ყოფილი „ნაციონალი“ ნინო ბურჯანაძეცაა.
_ ყოფილ „ნაციონალებს“ კი არა, იმას ვგულისხმობ, რომ მაგალითად, ედპ და კიდევ ათამდე პარტია „ძალა ერთობაშიას“ წევრია, თუმცა მაჟორიტარობის კანდიდატები მხოლოდ „ნაცმოძრაობიდან“ და „ახალი საქართველოდან“ არიან.
_ როცა რეგიონებზე დაიწყება საუბარი, ედპ-ს ამბიციაც აქვს და პოტენციაც, რომ ჩვენი პოზიცია დავიცვათ, თბილისში კი ყველა მოთხოვნა დღის წესრიგიდან მოხსნილი გვქონდა.
_ რატომ?
_ ამის აუცილებლობას, უბრალოდ, ვერ ვხედავთ. დღეს ბევრად მნიშვნელოვანი ისაა, რომ ოპოზიციური ერთობა შენარჩუნებულიყო და ამასთან, იმის დრო ნამდვილად არაა, მოდი, ძალა მოვსინჯოთო.
დღეს მთავარი ამოცანა ხელისუფლების მორიგი ცვლილება კი არა, ხელისუფლებიდან საქართველოს ეროვნული ინტერესებისადმი, პრაქტიკულად, მტრად ჩამოყალიბებული ოლიგარქის ჩამოცილებაა. ასეთ დროს ისეთი ნაბიჯები უნდა გადავდგათ, რაც ვიწრო პარტიულ ინტერესებზე მაღლა დგას!
_ ბატონო ბაჩუკი, ალბათ, გაიგებდით, რომ თაკო ჩარკვიანმა საბურთალოზე მაჟორიტარად საკუთარი კანდიდატურა დააყენა. „ძალა ერთობაშია“ ან ე. წ. ლეიბორისტული მაგიდა ჩარკვიანს მხარს დაუჭერს?
_ არც ეს და არც სხვა მაგიდა მხარს ასე არავის დაუჭერს.
_ აბა, როგორ დაუჭერს?
_ ნებისმიერ ადამიანზე, ვინც კანდიდატობის სურვილს გამოთქვამს, საუბარი იქნება და თუ კანდიდატი არჩევნების რეალური მომგები და ივანიშვილის რეალური მოწინააღმდეგეა, რა თქმა უნდა, მხარს დაუჭერს.
_ თაკო ჩარკვიანს კენჭისყრა გადაწყვეტილი აქვს და ამის შესახებ სოციალურ ქსელში დაწერა, მაგრამ თუ თქვენ მხარს არ დაუჭერთ, რა გამოვა?
_ საბურთალო და დიდუბე ღიად სათამაშოდ კი არა, იმიტომ დავტოვეთ, ჩამოყალიბებული ნამდვილად არ ვართ და ოპოზიციისთვის ე. წ. ლუფტი არსებობს, ანუ ეს ორი ოლქი საზოგადოებრივად აქტიური ან პოლიტიკის მიღმა მყოფი პიროვნებებისთვის დავტოვეთ, ვინც ოპოზიციის ფასს კიდევ უფრო გაზრდის. ვნახოთ, ასეთი ტიპის ადამიანი თაკო იქნება თუ სხვა ვინმე, ამაზე ვიმუშავებთ.
საზოგადოებას ერთი რამ დავანახეთ, რომ ოპოზიციაში კონსენსუსი მიღწევადია და ეს ვისწავლეთ!
საერთოდ, თაკო ჩარკვიანს დიდ პატივს ვცემ, ძალიან პრაგმატული ადამიანია და პოლიტიკაშიც მისი პირველი ნაბიჯები აშკარად სწორი იყო. შეიძლება, ჩემი შესაფასებელი არაა, მაგრამ ეს აპლოდისმენტებს იმსახურებდა, მაგრამ ხვალ და ზეგ რა ნაბიჯს გადადგამს, ეს უკვე თაკოს არჩევანია. არ მგონია, რომ პოლიტიკაში უხეში შეცდომები დაუშვას!
_ უხეშ შეცდომებზე ლაპარაკი არაა, რადგან ჩარკვიანი თავიდანვე ამბობდა, რომ ე. წ. ლეიბორისტულ მაგიდასთან ოპოზიციას, მხოლოდ და მხოლოდ, პროპორციულ არჩევნებზე უნდა ემსჯელა და არა _ მაჟორიტარების საერთო კანდიდატებზე, თუმცა ამაზე საუბარი შორს წაგვიყვანს…
ისე, 2018 წლის საპრეზიდენტო არჩევნების წინ „ძალა ერთობაშიას“ წევრმა პარტიებმა მემორანდუმს მოაწერეს ხელი, რაც საპარლამენტო არჩევნებისთვის ამ პლატფორმაში შემავალი პარტიებისგან საერთო სიის დაკომპლექტებას ითვალისწინებდა. ეს შეთანხმება ისევ ძალაშია, ბატონო ბაჩუკი?
_ ეს საჯარო ღონისძიება იყო?
_ რა თქმა უნდა.
_ რაღაც არ მახსენდება.
_ შეიძლება, თქვენ არ გახსენდებათ, მაგრამ მერწმუნეთ, „ძალა ერთობაშიას“ წევრებმა ზემოხსენებულ მემორანდუმს საჯაროდ მოაწერეთ ხელი.
_ ასეთი ხელმოწერა, რა თქმა უნდა, არსებობს და ერთიანი პროპორციული სიის საკითხი, პრაქტიკულად, განსაზღვრულია. სხვათა შორის, მაშინ ჩვენ ჯერ კიდევ იმედი გვქონდა, რომ პროპორციული სია მთლიანობაში იქნებოდა, მაგრამ ასე არ მოხდა. საერთოდ, პოლიტიკაში ასეთი რაღაცები ხშირია.
_ რას გულისხმობთ?
_ აი, მაგალითად, ივანიშვილმა რაღაც თქვა, მაგრამ მერე უკან წაიღო, თუმცა იმაზე ხელმოწერა, რომ ივანიშვილის ხელისუფლებიდან ჩამოშორებაში ერთად დავდგებით, ურყევია!
_ ბატონო ბაჩუკი, თუ ოპოზიციის მთავარი მიზანი ივანიშვილის გუნდის ხელისუფლებიდან ჩამოშორებაა, მაშინ დამისაბუთეთ, მთაწმინდაზე მაჟორიტარად იმ ადამიანის კანდიდატურა რატომ წარადგინა, რომელმაც შარშან, ლადო კახაძესთან, მეორე ტური წააგო?
_ „მეორე ტური წააგო“ ცოტა ხმამაღალი ნათქვამია.
_ რატომ?
_ 2018 წელს ხელისუფლებამ გაიმარჯვა და პრეზიდენტად უდევთ, უკაცრავად, ზის სალომე ზურაბიშვილი, მაგრამ საკამათოა, პრეზიდენტი რამდენადაა.
_ შეიძლება, მაგრამ ეს რა შუაშია?
_ იმის თქმა მინდა, რომ ივანიშვილს დღეს ის ძალა და რესურსი აღარ გააჩნია, რაც მაშინ ჰქონდა. ივანიშვილი გაკოტრებულია და მხოლოდ ქვეყნის შიგნით კი არა, გარეთაც მისი ყველანაირი რესურსი დასრულებულია! შესაბამისად, იგი არჩევნებს ვეღარ გააყალბებს!
_ ვნახოთ, თუმცა მანამდე კიდევ ერთ საკითხს შევეხები _ „ევროპულმა საქართველომ“ საკონსტიტუციო ცვლილებების კენჭისყრაში მონაწილეობა მიიღო. ეს გადაწყვეტილება ლეიბორისტების მაგიდაში დისონანსს ხომ არ შეიტანს? ე. ი., ბოკერიას გუნდი გიორგი რურუას პოლიტპატიმრად არ მიიჩნევს?
_ არც „ევროპულ საქართველოს“ გადავეფარები და არც _ სხვა ვინმეს, მაგრამ დიდი ხანია, მიცნობთ და ერთ რამეს გაგიმხელთ.
_ რას?
_ განსაკუთრებით ბოლო პერიოდში ჩემი რადიკალური პოზიციით ნამდვილად გამოვირჩევი.
_ ანუ?
_ ყველა რადიკალური ზომისთვის მზად ვიყავი, რომ ბიძინა ივანიშვილი ხელისუფლებაში არ ყოფილიყო, მაგრამ არის რადიკალიზმი და ასევე არის შედეგზე ორიენტირებული რადიკალიზმი. შეიძლება, მეც გამიჩნდა კითხვის ნიშნები, თუ რამდენად სწორი იქნებოდა ჩვენი მხრიდან ბურთისა და მოედნის ივანიშვილისთვის დატოვება, მიუხედავად იმისა, რომ რურუას განთავისუფლების მოთხოვნა შესრულებული არაა და ამაში მხოლოდ მორალური ფაქტორი არ არსებობს. მორალურ-ეთიკური მომენტია, როცა ორ ადამიანს ათავისუფლებ, მაშინ მესამეც უნდა განთავისუფლდეს, მაგრამ ივანიშვილმა შეგნებულად გადადგა ეს ნაბიჯი, რომ რურუა პატიმრობიდან არ გაათავისუფლა.
საერთოდ, ქვეყანაში, სადაც პოლიტპატიმრები არსებობენ, თავისუფალ და სამართლიან არჩევნებზე საუბარი ზედმეტია, მით უმეტეს, რომ ეს პოლიტპატიმარი, მისი სახელი და გვარი როგორც უნდა ატრიალონ, დღეს ერთ-ერთი ყველაზე მთავარი ოპოზიციური არხის საკმაოდ სოლიდური ინვესტორი, დამფინანსებელი და დამფუძნებელია.
ესეცაა ერთ-ერთი მთავარი მოტივი, რის გამოც ჩვენ შეიძლება, რადიკალურ ნაბიჯსა და საკონსტიტუციო ცვლილებებისთვის ხმის არმიცემაზე გვეფიქრა, მაგრამ გამოჩნდა, რომ „ოცნების“ ლიდერი ამ ჩვენი გულწრფელი პოზიციის საკუთარი მიზნების განსახორციელებლად გამოყენებას აპირებდა. ივანიშვილს 120/30-ზე საარჩევნო სისტემა ისე უნდა, როგორც თავში _ ლურსმანი.
მოკლედ, მგონია, რომ „ევროპულმა საქართველომ“ პრაგმატული გადაწყვეტილება მიიღო და იგივე გადაწყვეტილება სხვა დეპუტატებსაც რომ მიეღოთ, ჩემი რადიკალიზმის მიუხედავად, ალბათ, მივესალმებოდი!
_ ბატონო ბაჩუკი, „მთავარი არხი“ ახსენეთ და, მეჩვენება, რომ გიორგი გაბუნიას შესაძლო ლიკვიდაციის თემა ოპოზიციამ არ „აწია“. რა ხდება?
_ ეს ცოტა უცნაური ნათქვამია, ან მეტი რაღა უნდა „აიწიოს“? _ ცხადზე ცხადია, რომ გაბუნიას ლიკვიდაციისთვის ქილერი ჩრდილოეთში დაიქირავეს. რამდენიც უნდა ვიძახოთ კადიროვი-მადიროვი, ფაქტია: ოკუპანტი ქვეყნის მეთაურის მიმართ გაბუნიას თუნდაც რადიკალური და უხამსი პოზიცია იმის მიზეზი აღმოჩნდა, რომ მისი მკვლელობა შეიკვეთა და მკვლელი, თვეების განმავლობაში, საქართველოში დაბორიალობდა და ობიექტს უთვალთვალებდა. მას შემდეგ კი, რაც ეს ინფორმაცია ბევრისთვის გახდა ცნობილი, ხელისუფლება იძულებული გახდა, დაქირავებული ქილერის იზოლაცია მოეხდინა.
მით უარესი ხელისუფლებისთვის, თუ აქამდე არაფერი იცოდა და ეს ფაქტი გამოეპარა! არანაკლებ ცუდია, როცა იმაზე ვსაუბრობთ, რომ ნაბიჯები პოლიტიკური ოპონენტებისადმი დამოკიდებულების მიხედვით იდგმება და არა _ სახელმწიფო ინტერესებიდან გამომდინარე!
_ მართალია, ოპოზიციაში დარწმუნებულები ხართ, რომ ივანიშვილს საერთაშორისო ასპარეზზე საქმე ცუდად აქვს, მაგრამ იმ 13 კონგრესმენიდან, რომელმაც ცნობილ დასკვნას მოაწერა ხელი, ერთ-ერთმა ხელმოწერა უკან წაიღო, ანუ როგორც მან თქვა, ფრაზა: „ივანიშვილი საქართველოში რუსულ ინტერესებს ატარებს“, მოხსენებაში ტექნიკურმა ჯგუფმა ჩაწერა. ამაზე რას იტყვით, ბატონო ბაჩუკი?
_ თავისი სიტყვები ცამეტივემ უკან რომ წაიღოს, მაინც არაფერი შეიცვლება.
_ რატომ?
_ ივანიშვილის პრობლემა მხოლოდ ეს 13 კონგრესმენი არაა. დასავლეთში საზოგადოებრივი აზრი ივანიშვილის საწინააღმდეგოა და იქ ყველამ კარგად იცის, რომ ივანიშვილი საქართველოში, მაპატიეთ და, პუტინის „შნირია“, ანუ საქართველოში პუტინის პოლიტიკას, მართალია, ფრთხილად და ზომიერად, მაგრამ მაინც ახორციელებს.
ამასთან, ისიც ფაქტია, რომ საქართველოს მოსახლეობა თუნდაც ისეთ ბიძინა ივანიშვილს აღარ შეეგუება, როგორიც 2012-ში იყო! დიახ, საქართველოში რუსული პოლიტიკის გამტარებელია და ივანიშვილის მთავარი პრობლემა ესაა და არა _ ის 13 კონგრესმენი, რომელიც ამა თუ იმ განცხადებას აკეთებს!
ანაკლიისა და სხვა პროექტების ჩაგდების შემდეგ ივანიშვილის მიმართ ეჭვი აღარ არსებობს, რომ ის საქართველოში წმინდა რუსული პოლიტიკის გამტარებელია, რაც ქართული სახელმწიფოს მტრობას ნიშნავს!
_ ოპოზიციას რა მექანიზმი აქვს, რომ ოქტომბერში „ოცნებამ“ არჩევნები ვერ გააყალბოს?
_ ამის მექანიზმი ოპოზიციას კი არა, ხალხს აქვს, ანუ ხმას ხალხი აძლევს და თუ იგრძნობს, რომ გამარჯვებულად ის არ გამოცხადდა, ვისაც ხმა მისცა, მაშინ გადაწყვეტილებას ქუჩაში მიიღებს!
საერთოდ, იქ, სადაც კონსტიტუცია არ მუშაობს და არჩევნებს აუქმებენ, გადაწყვეტილებას ქუჩაში იღებენ! სწორედ ეს ელოდება ივანიშვილს და ნებისმიერ ხელისუფლებას, რომელიც ხალხის ნების წინააღმდეგ წავა და ამას ენის მოჩლექით საუბარი არ უნდა!
_ არჩევნების გაყალბების შემთხვევაში, ხალხი ქუჩაში რომ არ გამოვიდეს, ოპოზიცია რას იზამს?
_ ეს ხალხის გადაწყვეტილება იქნება. ოპოზიცია იმას აკეთებს, რაც ხალხს უნდა!
_ სხვათა შორის, „ქრონიკა+“-ს აქვს ინფორმაცია, რომ კოალიციური მთავრობის შემთხვევაში, პრემიერის პოსტზე „დემოკრატიული მოძრაობა“ ნინო ბურჯანაძის კანდიდატურის წამოყენებას აპირებს. ამაზე „ძალა ერთობაშიას“ რა პასუხი ექნება?
_ არ ვიცი, რამდენად სწორი ინფორმაცია გაქვთ.
_ ბატონო ბაჩუკი, შეგიძლიათ, ჩვენი გამოცემის ამავე ნომერში გიგლა ბარამიძის ინტერვიუ წაიკითხოთ, სადაც ამ თემაზეა საუბარი.
_ ნებისმიერ პოლიტიკურ პარტიას, მათ შორის, ისეთსაც, რომელსაც პროცენტ-ნახევარზე მეტი მხარდაჭერა არ აქვს, შეიძლება, მსგავსი ამბიცია ჰქონდეს, თუმცა ამბიცია და სურვილი იმას არ ნიშნავს, რომ ეს განხორციელებადია!
ის, თუ საიდან იქნება პრემიერობის კანდიდატი, იმაზეა დამოკიდებული, ხალხიდან ვის როგორი მხარდაჭერა ექნება. შეიძლება, კოალიციაში იყო, მაგრამ იგივე ხმების თვალსაზრისით კოალიციისთვის ვის რა მონაგარი აქვს, ეს ხომ ყველასთვის ნათელია და დაფარული, მით უმეტეს, პოლიტიკოსებისთვის არაა! პრემიერობის საკითხიც სწორედ ამაზე იქნება დამოკიდებული.
_ კოალიციურ მინისტრთა კაბინეტში ედპ-ს რომელი მინისტრის პორტფელზე ექნება პრეტენზია?
_ დღეს პორტფელებზე ნამდვილად არ ვფიქრობთ, რადგან ჩვენი მთავარი ამოცანაა, ყველა პორტფელის მფლობელი ხელისუფლებას ჩამოვაცილოთ და ის, რაც ჩვენს ხელში იქნება, მერე გავანაწილოთ.
_ იმისთვის, რომ „ოცნებამ“ მთავრობის დაკომპლექტება ერთპიროვნულად ვერ შეძლოს, არჩევნებში 40 პროცენტზე მეტი არ უნდა აიღოს, არა?
_ თუ ფორმალურად ვიტყვით, 50 პროცენტზე ნაკლები. ხელისუფლება, რომელიც 50 პროცენტზე ნაკლებს ფლობს, მაგრამ მთავრობას მაინც აკომპლექტებს, მყარი არაა!
_ „ოცნებას“ ხომ შეუძლია, რომ საპარლამენტო კოალიცია რომელიმე ოპოზიციურ პარტიასთან, მაგალითად, „პატრიოტთა ალიანსთან“ შექმნას და მთავრობა ასე დააკომპლექტოს?
_ ისეთ დროსა და პირობებში ვცხოვრობთ, რომ გასაკვირი არაფერია.
_ ე. ი.?
_ არ იქნება გასაკვირი, რომ პუტინმა მოისურვოს, საქართველოში „ედინნაია როსსიას“ ფილიალი გახსნას და ივანიშვილმა კოალიცია მასთან შექმნას!
_ ბატონო ბაჩუკი, გასაგებია, რომ ხელისუფლება ცუდია, მაგრამ ამას წინათ, კვლევა გამოქვეყნდა, რომლის თანახმადაც, მოსახლეობის 65 პროცენტს მხოლოდ მმართველ გუნდში კი არა, ოპოზიციაშიც ახალი სახეების ხილვა უნდა. აქედან გამომდინარე, რატომ არ უშვებთ, რომ ამომრჩეველმა ნდობა არც „ოცნებას“ გამოუცხადოს და არც _ ოპოზიციას?
_ არ მინდა, იმ ჟურნალისტებსა თუ ორგანიზაციას, რომელმაც ეს კვლევა ჩაატარა, რაიმე სახით შეურაცხყოფა მივაყენო, მაგრამ ეს კვლევა იმას არ ასახავს, რა კითხვაც ისმის. საერთოდ, მთელ მსოფლიოში ასეა, რომ ადამიანები ახალ პოლიტიკურ ძალებს ითხოვენ, მაგრამ პოლიტიკური ლიდერი ერთსა და ორ დღეში არ იბადება!
როცა ადამიანები ამბობენ, რომ რაღაც ახალი უნდათ, ეს ხელისუფლებასა და იმ ყოფას ეხება, რომელშიც ცხოვრობენ, ანუ ხალხს სწორედ ამ ყოფის შეცვლა უნდა. ვინმეს ტყუილად ჰგონია, რომ თუ დღეს პოლიტიკურ პარტიას შექმნის, ხვალ ხალხი იხუვლებს და ხმას მისცემს.
_ ამაში გეთანხმებით, მაგრამ თუ კოალიციური მთავრობის დაკომპლექტებას შეძლებს, პირველი ცვლილება, რასაც ოპოზიცია გაატარებს, რა იქნება?
_ პირველი ცვლილება ის იქნება, რომ ბიძინა ივანიშვილს მთავრობაზე გავლენის ყველა საცეცი გადაეკეტება!
_ ეს გასაგებია, მაგრამ რა საკანონმდებლო ცვლილებებს გაატარებთ?
_ სასამართლო და ძალოვანი უწყებები ჩვენთვის პრიორიტეტია. მართალია, ქვეყანა უმძიმეს სოციალურ-ეკონომიკურ ვითარებაშია და ახალ ხელისუფლებას უმძიმესი მემკვიდრეობა ელოდება, მაგრამ სასამართლო სისტემა და ძალოვანი უწყებები ერთხელ და სამუდამოდ დამოუკიდებელი უნდა გახდეს!
_ არჩევნებამდე ძალიან ცოტა დრო _ ოთხი თვეა დარჩენილი და ვანხოთ, რა და როგორ იქნება! ასე რომ, წარმატებას გისურვებთ, ბატონო ბაჩუკი!
_ გმადლობთ, თქვენც ასევე.

გიორგი აბაშიძე