მთავარი ინტერვიუ გუბაზ სანიკიძე: „აღდგომის შემდეგ განცხადებებს გავაკეთებ, რაც ვიღაც-ვიღაცებს არ მოეწონებათ!“

გუბაზ სანიკიძე: „აღდგომის შემდეგ განცხადებებს გავაკეთებ, რაც ვიღაც-ვიღაცებს არ მოეწონებათ!“

260
0
გაზიარება

იმის თაობაზე, რომ კორონავირუსის პანდემიამ მსოფლიოს დღის წესრიგი შეცვალა, უკვე ბევრჯერ ითქვა და ამ მხრივ გამონაკლისი არც საქართველოა. ყველაფერს თავი რომ დავანებოთ, უკვე დადასტურებულად შეიძლება ითქვას, რომ 4 აპრილისთვის დაანონსებული ოპოზიციის აქცია არ გაიმართება, თუმცა, კორონავირუსის მიუხედავად, ოპოზიციონერი გუბაზ სანიკიძე ამბობს, რომ ოპოზიცია კაბინეტებში არ უნდა წამოწვეს და იმისთვის, რომ არჩევნებზე „ოცნება“ დაამარცხოს, საველე მოქმედებაზე გადავიდეს, ანუ ხალხში გავიდეს.
ამას გარდა, გუბაზ სანიკიძე ჩვენს გამოცემასთან ექსკლუზიურ ინტერვიუში ერთ მნიშვნელოვან განცხადებასაც აკეთებს. კერძოდ, ამბობს, რომ ნააღდგომევს ისეთ რაღაცებს იტყვის, რაც ოპოზიციაში შესაძლოა, ზოგს არ მოეწონოს, თუმცა რესპონდენტი იქვე დასძენს, რომ დიდი ხანია, სხვის მოსაზრებებს ყურადღებას აღარ აქცევს და ამიტომ მნიშვნელობა არ აქვს, მისი ნათქვამი ვის მოეწონება და ვის _ არა.

ერთი სიტყვით, შეძლებს თუ არა ოქტომბერში ოპოზიცია „ოცნების“ დამარცხებას და, საერთოდ, არის თუ არა 8 მარტის მემორანდუმი ისტორიული? _ „ქრონიკა+“ გთავაზობთ ინტერვიუს გუბაზ სანიკიძესთან:

_ ბატონო გუბაზ, ვინაიდან და რადგანაც მსოფლიოში კორონას პანდემია მძვინვარებს, ტრადიციას არც თქვენთან დავარღვევ და გკითხავთ: კორონავირუსის გეშინიათ?
_ მეშინია, მაგრამ პანიკაში არ ვარ! კორონავირუსში სასიამოვნო რა უნდა იყოს?
_ ცხადია, სასიამოვნო არაფერია, მაგრამ ხომ არ გეჩვენებათ, რომ ეს პანიკა მსოფლიოს ფინანსური თუ პოლიტიკური დღის წესრიგის შეცვლას უკავშირდება, მით უმეტეს, რომ წელს რამდენიმე ქვეყანაში არჩევნები უნდა ჩატარდეს?
_ არ ვიცი, ვერ გეტყვით. საერთოდ, ბოლო დროს ერთმანეთის გამომრიცხავი ბევრი შეთქმულების თეორია მოვისმინეთ, მათ შორის, ისიც, რომ ეს ვირუსი, თითქოს, ხელოვნურია, მაგრამ ამ საქმის სპეციალისტი არ ვარ. ერთი ის ვიცი, რომ პანიკას არ უნდა ავყვეთ და ქართველი ხალხი ყველაფერ ამას, ჯერჯერობით, ყოჩაღად ხვდება!
_ ყველაფერი ის, რაც ხდება, ქართულ პოლიტიკაზე რა გავლენას მოახდენს?
_ იმედი მაქვს, რომ ყველაფერი გადაივლის, მზე გამოანათებს და, როგორც ამბობენ, წამალიც მალე იქნება. არ მგონია, ეს პანდემია დიდხანს გაგრძელდეს.
_ ანუ ხელისუფლება კორონაპანიკის საკუთარი მიზნებისთვის გამოყენებას არ შეეცდება, ვთქვათ, საგანგებო მდგომარეობას გამოაცხადებს და ამით ოპოზიციას საარჩევნო კამპანიის ჩატარებაში ხელს შეუშლის?
_ ნამდვილად ვერ გეტყვით, ეს პანდემია რა მასშტაბს მიიღებს. ფაქტია, ჩინეთში ჩაქრობა დაიწყო, იტალიაში კი იმატებს, ანუ ამ კრიზისმა აზიიდან ევროპაში გადმოინაცვლა და აგერ, ესპანეთშიც უკვე ბევრია დაინფიცირებული. ამ ფონზე, თუ საჭირო იქნება, საგანგებო მდგომარეობა, ცხადია, უნდა გამოცხადდეს და ყველა დავემორჩილოთ დისციპლინას.
_ ისე, ხელისუფლება 8 მარტის მემორანდუმის დისციპლინას ემორჩილება?
_ არა.
_ რატომ?
_ აგერ, პოლიტპატიმრების გამოშვებას ველოდებით, მაგრამ, ჯერჯერობით, არაფერია. ის, რაც თამლიანთან დაკავშირებით მოხდა, დიდ ეჭვს აჩენს.
საერთოდ, ამ ხელისუფლებასა და მის თავკაც ბიძინა ივანიშვილზე დაბალი წარმოდგენა მაქვს. ეს ვერაგი, უპირო, უსინდისო და უნამუსო კაცია! ამიტომ მისგან ყველაფერს უნდა ველოდოთ!
მოკლედ, არ ვიცი, თამლიანის გამოშვებას წინ რა ედგა, მაგრამ არ გამოუშვეს. წესით, ოქრუაშვილიც უნდა გამოუშვან, გიგი უგულავა კი შეიწყალონ. არ ვიცი, რამდენად მართალია, მაგრამ ასეთი ჭორი დადის, რომ ყველაფერი ეს თითქოს აღგდომა დღეს მოხდება.
გითხარით და კიდევ გეუბნებით: ამ ხელისუფლების მიმართ ნდობა განულებული მაქვს. ივანიშვილზე კი ლაპარაკიც ზედმეტია!
_ თუ ხელისუფლებას არ ენდობით, ე. ი. არც ხელისუფლებასა და ოპოზიციას შორის მიღწეულ შეთანხმებას ენდობით, არა?
_ შეთანხმება რას ნიშნავს? რასაც უნდა, ხელს იმას მოაწერს, მაგრამ რა, ჯერ არ გადავუგდივართ? ბოლოს და ბოლოს, სალომე ზურაბიშვილმა გაეროს ტრიბუნიდან განაცხადა, პროპორციულ არჩევნებზე უკვე გადავედითო, მაგრამ გადაგვაგდო. ამიტომაც ვამბობ, რომ ეს გადამგდები კაცია და გარედან თუ შიგნიდან მუდმივ პრესინგში უნდა იყოს. ივანიშვილთან ასეთი შეთანხმებებით საუბარს აზრი არ აქვს, რადგან საქართველოს ისტორიაში ლეგენდარულ ვერაგ კაცთან გვაქვს საქმე!
_ მოკლედ, ოპოზიციას სასიხარულო არაფერი აქვს, მით უმეტეს, იმ ფონზე, როცა მემორანდუმით გათვალისწინებული საკითხები, კანონპროექტის სახით, პარლამენტს 11 მარტს უნდა წარდგენოდა, მაგრამ, ჩემი ინფორმაციით, მსგავსი ცვლილებების პაკეტი საკანონმდებლო ორგანოში ჯერ არ დარეგისტრირებულა.
_ დიახ, სასიხარულოს ვერაფერს ვხედავ. ის, რაც 8 მარტს მოხდა, უბრალოდ, ორმხრივი კომპრომისი იყო და არა _ რაღაც ისტორიული გარღვევა, როგორც შეფასდა. ამ ურთიერთდათმობისას ორივე მხარეს განსხვავებული მოტივაცია ჰქონდა, ანუ ოპოზიციამ სრული პროპორციული არჩევნები ქვეყნის ინტერესებიდან გამომდინარე დათმო. ხელისუფლება კი დათმობაზე იმიტომ წამოვიდა, რომ ამერიკელებმა ბიძინას თავში წაუთაქეს და, როგორც ჩანს, კიდევ წაუთაქებენ!
_ ბატონო გუბაზ, ამ პროცესში ჩართული იყავით?
_ ნაკლებად.
_ უფრო კონკრეტულად?
_ მხარდამჭერი და გულშემატკივარი ვიყავი, თორემ მოლაპარაკების პროცესში არ ვმონაწილეობდი.
_ თქვენი, როგორც დამკვირვებლის შეფასებით, ოპოზიციას უნდა დაეთმო, ანუ 120/30-ზე წასულიყო?
_ ალბათ, უნდა დაეთმო.
_ დამისაბუთეთ, რატომ?
_ აქ საუბარი მორალურ უპირატესობასა და ინიციატივაზეც იყო.
_ ანუ?
_ ოპოზიციას მორალური უპირატესობაც ჰქონდა და _ ინიციატივაც.
_ შეიძლება, მაგრამ ხომ არ გეჩვენებათ, რომ ამ შეთანხმება-დათმობით მოგებული ოპოზიციის ერთი ფრთა, კერძოდ, „ევროპული საქართველოა“, იგივე „ნაციონალური მოძრაობა“ კი, გარკვეულწილად, თამაშგარე მდგომარეობაში აღმოჩნდა?
_ ვნახოთ.
_ რა ვნახოთ?
_ მოგებულს არჩევნებზე ვნახავთ, ანუ როგორც ამბობენ, წიწილები შემოდგომაზე დაითვლება.
_ ე. ი., ეჭვს, რომ ბოკერიას გუნდი, ამ ეტაპზე, მომგებიან პოზიციაშია, იზიარებთ?
_ ნაკლებად. საერთოდ, ასეთ რაღაცებზე ნაკლებად ვფიქრობ.
_ ბატონო გუბაზ, როგორც ვიცი, იმ შტაბის მუშაობაში ხართ ჩართული, რომელიც მიხეილ სააკაშვილმა საპრეზიდენტო ბიბლიოთეკაში შექმნა.
_ მუშაობაში ჩართული არ ვარ.
_ რატომ?
_ ეს შტაბი, ჯერჯერობით, აქტიურ ფაზაზე არაა გადასული, თუმცა მიშასთან ურთიერთობა მაქვს.
_ ჰოდა, გეცოდინებათ, ამ შტაბის მისია რა არის, ანუ ქართულ პოლიტიკაში მან რა როლი უნდა შეასრულოს?
_ ჩემი მოსაზრება მაქვს, რომელსაც ჩემს მეგობრებსა და პოლიტიკურ პარტნიორებსაც ვუზიარებ, რომ ზეპარტიული და დიდი საერთო-სახალხო მოძრაობა უნდა შეიქმნას. ზოგადად, აშკარაა, რომ ამ საქმეს პარტიები აღარ ჰყოფნის.
_ ე. ი., იმას გულისხმობთ, რომ ის მაგიდაც, რომელიც „ლეიბორისტების“ ოფისში იკრიბება, სააკაშვილის შტაბს უნდა შემოუერთდეს?
_ არა, ამას არ ვგულისხმობ.
_ აბა?
_ ამ მაგიდას, ანუ „ლეიბორისტულ ერთობას“, თემატური ერთობის სახე ჰქონდა და ეს ერთობა საარჩევნო გარემოს გაუმჯობესებას შეეხებოდა.
ასევე ძალიან სასიამოვნოა სასამართლოზე მემორანდუმის გაფორმება. ამ მემორანდუმის ტექსტი წავიკითხე და აბსოლუტურად ვეთანხმები.
სხვათა შორის, მოსამართლეების არჩევითობა, თავის დროზე, პროგრამაში „ფორუმსაც“ ჰქონდა და იმასაც ვემხრობი, რომ უცხოელი მოსამართლეები უნდა ჩამოვიყვანოთ, რადგან ქართული სასამართლო კორპუსი ძალიან დაზიანებულია და იმის გარჩევა, იქ ვინ წესიერია და ვინ _ არა, თითქმის შეუძლებელია. როგორც ჩანს, უწესოები უფრო ბევრნი არიან, ვიდრე _ წესიერები.
ერთი სიტყვით, ჯერ საარჩევნო კანონმდებლობა უნდა გამოიცვალოს და მოქმედებები ამის მიხედვით უნდა დავიწყოთ. როგორც გითხარით, ჩემი მოსაზრებებიც მაქვს და _ სამოქმედო გეგმაც, ოპოზიციამ ან მისმა ნაწილმა რა და როგორ უნდა გააკეთოს.
_ რატომ ამბობთ, ოპოზიციის ნაწილმაო?
_ ბუნებრივია, ყველანი ერთ ჭკუაზე ვერ ვიქნებით.
_ თქვენი მოსაზრებები და სამოქმედო გეგმა, მაინც, რას გულისხმობს?
_ ამაზე საუბრისგან, ჯერჯერობით, თავს შევიკავებ.
_ რატომ?
_ გარკვეულ მოვლენებს დაველოდები და, ალბათ, აღდგომის მერე რაღაცებს უკვე ღიად ვიტყვი.
_ აღდგომამდე, ლამის, თვე-ნახევარია დარჩენილი. მანამდე ოპოზიციის მაგიდა, ალბათ, ერთიან მაჟორიტარებზე შეთანხმდება. საერთო მაჟორიტარების შერჩევაში ჩაერთვებით, ბატონო გუბაზ?
_ ვნახოთ, ჯერ საარჩევნო სისტემა გამოცვალონ. დღევანდელი მონაცემებით, მაჟორიტარი ისევ 73-ია. მემორანდუმი გასაგებია, მაგრამ წეღანდელი თქმისა არ იყოს, ამ ქაღალდს ბიძინა ივანიშვილისთვის ფასი არ აქვს და არ ვიცით, რა და როგორ იქნება.
_ ვთქვათ, „ოცნებამ“ სიტყვა შეასრულა და საარჩევნო სისტემა შეცვალა, მაგრამ პოლიტპატიმრები არ გაათავისუფლა, ასეთ შემთხვევაში ოპოზიცია როგორ მოიქცევა?
_ ვნახოთ. ჩემთვის აღდგომა, ამ შემთხვევაში, რელიგიურის გარდა, პოლიტიკური თარიღიცაა, ანუ აღდგომამდე დაველოდები და რაღაცებზე ჯერ არ ვისაუბრებ, მერე კი ვიტყვი.
_ მემორანდუმის გაფორმების შემდეგ მიხეილ სააკაშვილთნ კომუნიკაცია გქონდათ?
_ დიახ, სააკაშვილთან სატელეფონო საუბარი გუშინწინ მქონდა.
_ კმაყოფილია?
_ მემორანდუმი ნორმალურია, რადგან არ შეიძლება, ჭკუათმყოფელი სასამართლო რეფორმის წინააღმდეგი იყოს.
_ ბატონო გუბაზ, ოპოზიციის მიერ სასამართლოზე გაფორმებულ მემორანდუმზე კი არა, 8 მარტის ხელისუფლებისა და ოპოზიციის შეთანხმებაზე გეკითხებით, ანუ სააკაშვილი ამ შეთანხმება-დათმობით კმაყოფილია?
_ დიახ, მიაჩნია, რომ ეს წინგადადგმული ნაბიჯია, თუმცა ამას ისტორიულ ნაბიჯს არ უწოდებს, ანუ გადამეტებული შეფასებები არ აქვს, რაშიც ვეთანხმები. ბოლოს და ბოლოს, ისტორიკოსის ოჯახშია გაზრდილი და იცის, ისტორიული გარღვევა და თარიღი რა არის. ერთი სიტყვით, მიშა ფიქრობს, რომ ოპოზიციას უკეთესი პირობები აქვს.
_ სხვათა შორის, მცირე პარტიები, მაგალითად, კახა კუკავა აცხადებს, რომ 8 მარტის მემორანდუმი მათთვის კარგია.
_ კი, ალბათ, ასეა. ყოველ შემთხვევაში, ეს შეთანხმება მრავალპარტიულ პარლამენტს გვპირდება, თუმცა ვნახოთ, ამომრჩეველი რას იზამს. ისიც მნიშვნელოვანია, არჩევნები დაბალანსებული იქნება თუ არა.
_ რას გულისხმობთ?
_ მშვიდ გარემოში ჩატარდება თუ რადიკალიზაცია მოხდება, რომლის ავტორიც, რა თქმა უნდა, ისევ ბიძინა ივანიშვილი იქნება. თუ რადიკალიზაციას ვიხილავთ, მაშინ მთავარი მაინც ორი-სამი ბანაკი გახდება.
_ ერთი სიტყვით, ხელისუფლებას დასავლეთისგან წერილი წერილზე რომ არ მიეღო, ზემოხსენებულ დათმობაზე არ წამოვიდოდა?
_ რა თქმა უნდა, არა. ისე, რა დათმო? _ ხელისუფლება, უბრალოდ, ამბობს, დავთმობ და საარჩევნო კანონმდებლობას შევცვლიო, თორემ, ჯერჯერობით, ხელში არაფერი გვაქვს. როგორც ჩანს, პოლიტპატიმრებზე საუბარი იყო და პირობაც დადო, მაგრამ ახლა გამოდის და ამბობს, ამ თემაზე არანაირი პირობა არ დამიდევსო. გათახსირებულ ხალხთან გვაქვს საქმე!
_ თუ პოლიტპატიმრების განთავისუფლებასა და პოლიტიკური ნიშნით დევნის შეწყვეტაზეა საუბარი, მაშინ სისხლის სამართლის დევნა მიხეილ სააკაშვილზეც ხომ უნდა შეწყდეს?
_ ცხადია, აბა, რა! ეს შეკითხვა მაქვს _ თუ ქვეყნის შიგნით პოლიტიკური დევნაა, მაშინ სააკაშვილი პოლიტიკური დევნილი რატომ არაა?
ცოტა გაუგებარია და, ალბათ, უსამართლობაა, როცა ზოგიერთი ოპოზიციონერი ლიდერი ამბობს, სააკაშვილს არ დაველაპარაკებიო. არადა, იმ ხალხის გვერდით ზის, რომელიც სააკაშვილის ხელისუფლებაში იყო. ვერ გავიგე, სააკაშვილი ასე ამოჩემებული რატომაა?
_ მიხეილ სააკაშვილის პირადი შტაბის გააქტიურებას „ძალა ერთობაშიას“ დაშლა ხომ არ მოყვება?
_ „ძალა ერთობაშია“ რატომ უნდა დაიშალოს? ვერავინ ამიხსნა, ბიბლიოთეკის შტაბი ლეიბორისტების ფორმატს ხელს რაში უშლის?
_ ბატონო გუბაზ, ლეიბორისტების ფორმატზე კი არა, იმ გაერთიანებულ ოპოზიციაზე გეკითხებით, რომელიც 2018 წლის საპრეზიდენტო არჩევნების წინ შეიქმნა.
_ ან ეს გაერთიანებული ოპოზიცია რატომ უნდა დაიშალოს? მგონია, რომ გაფართოება უკეთესია.
_ ანუ?
_ 30 წელია, ქართულ პოლიტიკაში ვარ და მოძრაობებზე ძალიან მაღალი წარმოდგენა მაქვს. აი, მაგალითად, მახსოვს ეროვნული მოძრაობა.
_ უკაცრავად, ეს რა შუაშია?
_ საერთოდ, ქვეყანაში პოლიტიკურ სიტუაციას მოძრაობები ცვლიან და არა _ პარტიული ბლოკები და გაერთიანებები. ნამდვილად დავიჩემებ, რომ სხვაზე უკეთესად ვიცი, მოძრაობა რა არის და რა მნიშვნელობა აქვს მას.
ბიძინა ივანიშვილს მხოლოდ პოლიტიკური პარტიები ვერ გაუშვებენ! ივანიშვილი ქართველმა ხალხმა უნდა გაუშვას! ამ ხალხის მნიშვნელოვან ნაწილს კი არც ერთი პარტია არ ეხატება გულზე და შესაბამისად, არც ის უნდა, რომ პარტიულ საქმიანობაში ჩაებას. სწორედ ამიტომაც, პოლიტიკოსებმა იმ აქტიურ ადამიანებს, რომლებსაც ქვეყანაში ცვლილებები უნდათ, შანსი უნდა მივცეთ. საამისოდ კი ყველაზე საუკეთესო გამოსავალი მოძრაობაა! თუ ვცდები, მაშინ გამოვიდეს და ვინმემ საპირისპირო მითხრას, ასე არ არისო.
_ ბატონო გუბაზ, ეს მოძრაობა თავისით არ შეიქმნება, ანუ აქაც ხომ მოთავეა საჭირო?
_ ამიტომაც გეუბნებით, რომ ცოტა ხანს დაველოდოთ და საბოლოოდ გადაწყდეს, ეს ხელისუფლება პოლიტპატიმრებს უშვებს თუ არა და ამის მიხედვით ვიმოქმედოთ.
ეს ცხოვრება ჩემს ჭკუაზე არაა მოწყობილი და გადაწყვეტილებები სიტუაციებიდან გამომდინარე უნდა მივიღოთ, ანუ თუ ხელისუფლება დათმობს, სხვანაირად უნდა მოვიქცეთ, თუ არ დათმობს, _ სხვანაირად.
ერთი სიტყვით, ყველაფერი ეს ჩვეულებრივი არჩევანი და არადანია. არჩევანს ბიძინა აკეთებს, არადანს _ ჩვენ.
_ ბატონო გუბაზ, აღდგომა 19 აპრილსაა, შესაბამისად, ეს დრო ხელისუფლების სასარგებლოდ მუშაობს.
_ რატომ?
_ იმიტომ, რომ ოპოზიცია, მინიმუმ, საარჩევნო კამპანიის დაწყებას აგვიანებს.
_ ისე მელაპარაკებით, რომ ხელისუფლება თითქოს საარჩევნო მანქანადაა გადაქცეული. დაბნეულები არიან და ვერ ატყობთ, აღმა-დაღმა თავმოწყვეტილი ინდაურებივით რომ დარბიან?!
_ ამაში გეთანხმებით, მაგრამ პირადად მე მგონია, რომ იგივე კორონავირუსის პანიკას „ოცნება“ საპიაროდ გამოიყენებს, ანუ იტყვის, აი, საბანკო სესხები სამი თვით გადავავადეო.
_ არა, არა, ჩემო კარგო.
_ რა არა, ბატონო გუბაზ?
_ ჯერ ერთი, როგორ შეიძლება, კორონავირუსს პოლიტიკური ელფერი ჰქონდეს? მეორეც, ბანკებს, აბა, რა უნდა ექნათ, სესხები არ უნდა გადაევადებინათ?
_ უნდა გადაევადებინათ, მაგრამ იმას ვამბობ, რომ ყველაფერ ამას „ოცნება“ სათავისოდ გამოიყენებს-მეთქი.
_ და ხალხი ბიძინა ივანიშვილის ამ ქმედებით აღფრთოვანებული და ბედნიერი იქნება? ეს გადავადება დაგროვდება და ხალხს ერთბაშად ექნება გადასახდელი, ანუ ბანკებმა მოსახლეობას არაფერი ჩამოაჭრა და თუ ადამიანს ახლა ასი ლარი უნდა გადაეხადა, ამ გადავადების გამო, ერთბაშად, სამასის გადახდა მოუწევს!
ერთი სიტყვით, ხელისუფლება კედელთანაა მიყენებული და ძალიან მძიმე დღეშია როგორც შიგნიდან, ასევე გარედანაც! აი, პომპეოს ოფისის განცხადება კი, ლამის, ულტიმატუმი იყო!
_ შეიძლება, მაგრამ 8 მარტის მემორანდუმამდე, ერთ-ერთი სატელევიზიო გამოსვლისას განაცხადეთ, ივანიშვილის დამარცხება ძალიან ძნელი იქნებაო. ბატონო გუბაზ, ისევ ამ აზრზე ხართ?
_ დიახ, ძალიან ძნელი იქნება.
_ რატომ?
_ სისხლს გაგვიშრობს და სიურპრიზებს მოგვიწყობს! თუ ვინმეს ჰგონია, რომ დივანზე უნდა წამოწვეს, ცდება _ კაბინეტებში შეკეტილი ოპოზიცია ივანიშვილს არჩევნებს ვერ მოუგებს! საველე მდგომარეობაში უნდა გადავიდეთ.
_ „საველე მდგომარეობაში“ გასვლა რას გულისხმობს?
_ ქუჩაში გასვლას და ხალხთან შეხვედრა-დალაპარაკებას, არჩევნებში მონაწილეობისკენ უნდა მოვუწოდოთ, პროგრამები გავაცნოთ და რაღაცებში დავარწმუნოთ!
საერთოდ, ხალხი, ოპოზიციასა და ხელისუფლებასაც, ისე გვიყურებს, როგორც გლადიატორებს.
_ ხალხში გასვლა კი არა, კორონაპანდემიის გამო 4 აპრილის აქციის ბედიც გაურკვეველია.
_ გარკვეულია _ ახლა შეკრება როგორ შეიძლება?
_ ჰოდა, კარგა ხანს ხალხშიც ვერ გახვალთ, ბატონო გუბაზ.
_ არჩევნებამდე 7-8 თვეა დარჩენილი და ვნახოთ, იქამდე რა იქნება. საერთოდ, არჩევნების ბედი ბოლო 60 დღეში წყდება.
_ ერთი სიტყვით, ერთმნიშვნელოვნად ვერ ამბობთ, წელს „ოცნება“ დამარცხდება თუ არა?
_ „ოცნების“ დამარცხება ძალიან რეალურია, თუმცა ეს ამინდივით არ მოხდება.
_ ანუ?
_ „ოცნების“ დამარცხებას ძალიან სერიოზული მუშაობა უნდა!
_ ე. ი., 8 მარტის მსგავსად, ოპოზიცია ნირვანაში არ უნდა ჩაიძიროს, არა?
_ დიახ, 8 მარტს აშკარად ასე იყო, რაც მესმის _ ოპოზიცია შედეგზე იყო ორიენტირებული და ამას ნერვული დაძაბულობაც ახლდა, თუმცა მოსავალი, ჯერჯერობით, არ აგვიღია.
_ მაშასადამე, აღდგომას დაველოდოთ და იმედი დავიტოვოთ, რომ ნააღდგომევს ქართული პოლიტიკაც „აღდგება“?
_ კი ბატონო, თუმცა, შესაძლოა, რაღაცები აღდგომამდეც მოხდეს. როგორც გითხარით, აღდგომის შემდეგ რაღაცებს ვიტყვი და განცხადებებს აუცილებლად გავაკეთებ, რაც ვიღაც-ვიღაცებს შესაძლოა, არ მოეწონოთ.
_ და ეს ვიღაც-ვიღაცები ოპოზიციაში იქნებიან?
_ შეიძლება, გამორიცხული არაფერია, თუმცა დიდი ხანია, სხვის მოსაზრებებს ანგარიშს აღარ ვუწევ!

გიორგი აბაშიძე

დატოვეთ კომენტარი