მთავარი ინტერვიუ გიორგი ვაშაძე: რას ნიშნავს სტრატეგია „აღმაშენებელი“ და როგორ უნდა ავაშენოთ ძლიერი და...

გიორგი ვაშაძე: რას ნიშნავს სტრატეგია „აღმაშენებელი“ და როგორ უნდა ავაშენოთ ძლიერი და ერთიანი საქართველო?

142
0
გაზიარება

კარგა ხანია, სოციალურ ქსელში კლიპი ტრიალებდა, რომელიც საზოგადოებას ამცნობდა, რომ პირველი ოქტომბრიდან სტრატეგია „აღმაშენებელი“ დაიწყებოდა. იქიდან გამომდინარე, რომ სხვა დეტალები არ ხმაურდებოდა, უმეტესობას სტრატეგია „აღმაშენებელი“ კომპიუტერული თამაში ეგონა, მაგრამ პრეზენტაციაზე გაირკვა, რომ სტრატეგია „აღმაშენებელი“ დიდი და ამბიციური პროექტია, რომლის მიზანიც ძლიერი, ერთიანი და თავისუფალი, ანუ ისეთი საქართველოს აშენებაა, სადაც ადამიანები თავისუფლები იქნებიან და ძლიერი ოჯახები ექნებათ.

„სტრატეგია „აღმაშენებელი“ ითვალისწინებს საქართველოს კრიზისიდან გამოყვანისა და განვითარების კომპლექსურ, გრძელვადიან პროგრამას, რომელსაც, რიგითი და პრაგმატული პრობლემების გადაწყვეტასთან ერთად, საფუძვლად უდევს, უპირველესად, ის მასშტაბური, ამბიციური, რეალისტური მიზნები, რაც მოსახლეობასა და ქვეყანას სასიცოცხლოდ აუცილებელი, აღმშენებლობის პოზიტიური ენერგიით უზრუნველყოფს!
სტრატეგია „აღმაშენებლის“ დეტალური, კომპლექსური და ერთმანეთთან დაკავშირებული რეფორმების გეგმა სამი გარემოების გააზრებას ეფუძნება: საქართველოს ისტორიული გამოცდილება, ანუ ვინ ვართ ჩვენ? საქართველოს დღევანდელი რეალობა, ანუ სად ვართ ჩვენ? როგორ ვითარდება თანამედროვე მსოფლიო?
სტრატეგია „აღმაშენებლის“ მიხედვით, საქართველო რეგიონსა და მსოფლიოს საკუთარ თავს შესთავაზებს, როგორც საერთაშორისო თანამეგობრობის მნიშვნელოვან, ღირებულ და პოზიტიურ სუბიექტს. შესაბამისად, აუცილებელია ჩვენ, საქართველოს მოქალაქეებმა, გავიაზროთ და შევიგრძნოთ საკუთარი თავი, როგორც ქვეყნის მძიმე მდგომარეობიდან გამომყვან ძალად და მისი წარმატებული აწმყოსა და მომავლის შემომქმედად“, _ ნათქვამია სტრატეგია „აღმაშენებლის“ ანოტაციაში.
და მაინც: რატომ „აღმაშენებელი“ ან რეალურია თუ არა თანამედროვე საქართველოსთვის აღმაშენებლისეული დიდების დაბრუნება? _ ამის შესახებ „ქრონიკა+“ გაერთიანებული ოპოზიციის ერთ-ერთ ლიდერს, პარტია „ახალი საქართველოს“ ხელმძღვანელსა და სტრატეგია „აღმაშენებლის“ ერთ-ერთ თანაავტორ გიორგი ვაშაძეს ესაუბრა:

_ ბატონო გიორგი, რამდენიმე დღის წინ სტრატეგია „აღმაშენებლის“ პრეზენტაცია გამართეთ. ეს სტრატეგია ქვეყნის განვითარებას ეხება, რაც კარგია, მაგრამ ყურს „აღმაშენებელი“ მოხვდა, ანუ ყველაფერი ეს ერთგვარი მესიჯი ხომ არაა, რომ აღმაშენებლობის ამბიცია გაქვთ?
_ არა, ამბიცია არაფერ შუაშია.
_ აბა, შუაში რა არის?
_ ყველაფერი აჩვენებს, რომ დღეს ქვეყანა უკიდურესად მძიმე მდგომარეობაშია და აქედან გამომდინარე, დაპირისპირებაზე ვართ გადასულები, ანუ პოლიტიკაში, ბიზნესსა თუ ყოველდღიურ ურთიერთობაში ერთმანეთს ვუპირისპირდებით და იცით, ასე რატომ ხდება? _ იმიტომ, რომ არ ვიცით, ერთად რისი მიღწევა გვინდა.
_ ამ დაპირისპირების, ასე ვთქვათ, დედაბოძი არცდონა კი არა, სოციალური გაჭირვებაა.
_ დიახ, ასეა. ამას წინათ ჩემს სოფელში ვიყავი და ადამიანებმა არ იციან, თვითან თვემდე კი არა, დღიდან დღემდე როგორ გაიტანონ თავი, ანუ ადამიანები დილით სტრესულად იღვიძებენ და იმაზე ფიქრობენ, შინ რა მიიტანონ, რომ ოჯახები გამოკვებონ.
ცოტა შორს წავიდეთ და დავსვათ კითხვა, _ გაჭირვებით ეს მოჯადოებული წრე რატომ ვერ გავარღვიეთ? _ იმიტომ, რომ არ ვიცით, როგორი სახელმწიფო გვინდა ავაშენოთ, რა ტიპის რეფორმები გავატაროთ და, საერთოდ, არ ვიცით, გამოსავალი სადაა.
_ ბატონო გიორგი, მომიტევეთ და, რატომ გგონიათ, რომ საზოგადოებამ არ იცის, როგორი ტიპის სახელმწიფოში უნდა ცხოვრება?
_ გამოკითხვებს ვატარებთ და იმის კონკრეტული ხედვა, თუ რას გვინდა მივაღწიოთ, არ გვაქვს! ისე, ერთია, რა გვინდა და მეორე _ ყველაფერ ამას როგორ უნდა მივაღწიოთ, ანუ გეგმა და სტრატეგია არ გვაქვს!
_ ეს, მგონი, იმის ბრალია, რომ ქართული პოლიტიკა დილეტანტებითაა სავსე. ყოველ შემთხვევაში, მათმა უმეტესობამ, ვინც სამსახური დაკარგა, პოლიტიკოსობა დაიწყო.
_ დიახ, გეთანხმებით _ ხშირად სწორედ ასე ხდება: ადამიანები, რომლებმაც სხვაგან ვერაფერი შეძლეს, პოლიტიკაში მიდიან ან მუშაობას სამთავრობო თანამდებობებზე იწყებენ და რადგან საქმე ნაკლებად განათლებულ ადამიანებთან გვაქვს, ყველაფერი ეს ამიტომაც გვჭირს! კი ბატონო, მთავრობისგან ინიციატვებს ვისმენთ, თუ რის გაკეთებას აპირებს, მაგრამ ეს ინიციატივები აბსოლუტურად ამოგლეჯილია, ანუ ხელისუფლება პრობლემას კომპლექსურად არ უდგება. ვთქვათ, იტყვის, აი, სოფლის მეურნეობაში პრობლემაა და ამ კუთხით მილიარდი დავხარჯოთო, მაგრამ ეს მილიარდი ისე იხარჯება, ამ ფულის დიდი ნაწილი ვინმეს ჯიბეში ილექება და შედეგსაც ვერ ვიღებთ!
მოკლედ, უნდა ჩამოვყალიბდეთ, რა მისია გვაქვს, ანუ როგორი სახელმწიფოს აშენება გვინდა _ ისეთი სახელმწიფო, სადაც, უბრალოდ, სახელმწიფო ინსტიტუციები იარსებებს თუ ისეთი სახელმწიფო, სადაც მთავარი ორიენტირი ადამიანი და ოჯახი იქნება!
_ კარგია, რომ ადამიანზე ორიენტირებული სახელმწიფოს აშენება გინდათ, მაგრამ გულახდილად მითხარით, როდის მიხვდით, რომ სახელმწიფოში მთავარი ადამიანია და არა _ ინსტიტუცია?
_ დიდი ხანია, ამაზე ვმსჯელობთ. სხვათა შორის, 2017 წელს, როცა „ახალი საქართველო“ ახლად შექმნილი პარტია იყო, სწორედ ამის მცდელობა გვქონდა, რომ იმაზე დაგვეწყო მსჯელობა, თუ რას და როგორ ვაპირებთ!
_ 2017 წელი გასაგებია, მაგრამ, თავის დროზე, ხელისუფლებაში იყავით. კი ბატონო, თქვენს სახელთან რამდენიმე ინოვაცია ასოცირდება, მაგალითად, იუსტიციის სახლი, მაგრამ ნუთუ, მაშინ ვერ ხვდებოდით, რომ პრობლემების მოსაგვარებლად კომპლექსური ხედვა იყო საჭირო?
_ მაშინაც ვხვდებოდი და თუ გახსოვთ, მუდამ ვიმეორებდი ტერმინს _ მოქალაქესა და ადამიანზე ორიენტირებული სისტემა! იცით, იუსტიციის სახლი წარმატებული რატომაა? _ იმიტომ, რომ შენობაზე კი არა, ადამიანზე, ანუ იმაზეა ორიენტირებული, იქ ადამიანი რომ მიდის, კომფორტი როგორ იგრძნოს და ნაკლები დრო როგორ დახარჯოს. აქედან გამომდინარე, ვფიქრობ, რომ ყველა მიმართულება სწორედ ადამიანსა და მოქალაქეზე უნდა იყოს ორიენტირებული! იმ ხელისუფლებაში მე კონკრეტული მიმართულების ხელმძღვანელი ვიყავი.
_ ვიცი, თუმცა მსმენია, რომ მაშინდელ ხელისუფლებაზე გავლენა გქონდათ. შესაბამისად, მითხარით: პრობლემების კომპლექსურ მოგვარებაზე მთავრობის იმდროინდელ წევრებთან გისაუბრიათ?
_ რა თქმა უნდა, მიფიქრია, რომ ასეთი სისტემური მიდგომა საჭირო იყო. ზოგან ასეთი მიდგომა არსებობდა და შედეგიც დადგა, ზოგან კი არ არსებობდა და ვერც შედეგი მივიღეთ. ისე, ათი წლის წინანდელი და ახლანდელი გიორგი ვაშაძე ერთი და იგივე არაა _ ამ ხნის განმავლობაში უფრო მეტი ცოდნა და გამოცდილება შევიძინე, მათ შორის, საერთაშორისოც _ სხვა ქვეყნებში ვმუშაობდი და ჩემი ცოდნისა და ექსპერტიზის არეალი, რა თქმა უნდა, გაიზარდა!
სხვათა შორის, 2012 წელს სამოქალაქო რეესტრი სერვისების განვითარების სააგენტოდ გადავაკეთეთ, რადგან გვინდოდა, რომ ეს სააგენტო სხვადასხვა დარგობრივ რეფორმასთან თანხვედრაში ყოფილიყო.
_ მაინც, რომელ დარგობრივ რეფორმასთან?
_ მაგალითად, საზოგადოებრივი ცენტრების, ანუ ე. წ. სოფლის სახლების კონცეფცია სწორედ მაშინ შევიმუშავეთ. ასევე იმდროინდელია კომპიუტერული ცოდნის გამავრცელებელი საზოგადოების იდეა _ 300 სოფელში ცენტრი გავხსენით და ადამიანებს ინტერნეტზე წვდომა მივეცით.
_ დიახ, ეს პროექტი მახსოვს, მაგრამ მოდით, ისევ სტრატეგია „აღმაშენებელს“ დავუბრუნდეთ. როგორც ვიცი, სტრატეგია „აღმაშენებელში“ ექსპერტებიც არიან ჩართულები, თუმცა პირადად მე ამ ადამიანებისგან აქამდე ინოვაციური არაფერი მომისმენია, ანუ ექსპერტების გარეშეც ვიცით, რომ, მაგალითად, სოფლის მეურნეობა უნდა განვითარდეს და ჯარი გაძლიერდეს.
_ ჩვენი სტრატეგიები ჯერ არ გინახავთ.
_ არ მინახავს, მაგრამ ვეჭვობ, სტრატეგია „აღმაშენებლის“ ფარგლებში ექსპერტებმა რამე სიახლე შეოგვთავაზონ.
_ დიახ, ის არაფერს ნიშნავს, რომ ჯარი ძლიერი უნდა იყოს და სოფლის მეურნეობა განვავითაროთ.
_ ცხადია, ეს ჩვეულებრივი ლოზუნგებია.
_ ყოველ სამშაბათს სხვადახვა პროექტის პრეზენტაციას გავმართავთ და ზოგადად კი არ ვისაუბრებთ, არამედ საზოგადოებას კონკრეტულ ფორმულას გავაცნობთ, ესა თუ ისე სფერო როგორ უნდა განვითარდეს. აქვე გეტყვით, რომ ამ პროგრამების შემუშავებაში, ქართველ ექსპერტებთან ერთად, უცხოელებიც მონაწილეობდნენ.
სხვათა შორის, ექსპერტებთან არაერთი შეხვედრა მქონია და ვიცი, რომ ძალიან კარგად აქვთ დამუშავებული ქვეყანაში, მაგალითად, თავდაცვისა და ეროვნული უსაფრთხოების კუთხით რა უნდა გაკეთდეს, მაგრამ ვინმემ მოუსმინა?
_ ანუ იმას ამბობთ, რომ ექსპერტებს და, საერთოდ, დარგის სპეციალიტებს ხელისუფლება არ უსმენს?
_ დიახ.
_ უცნაურია, რადგან ხელისუფლება, წესით, ძლიერი ქვეყნის შექმნაზე უნდა იყოს ორიენტირებული.
_ ყველაზე დიდი პრობლემა ისაა, რომ ამ ხელისუფლების წყარო ხალხი არ არის და, შესაბამისად, ხელისუფლება ხალხთან არაა ანგარიშვალდებული.
აი, ნახეთ რა მდგომარეობაა: მაგალითად, ირაკლი ღარიბაშვილს თავდაცვის სფეროში მცოდნე და განათლებული ადამიანი რაში აინტერესებს, როცა ფიქრობს, რომ იმ მიზნისთვის, რაც აქვს, თვითონ ყველაფერი იცის. მისი მიზანი კი ისაა, რომ როგორმე შემდეგი არჩევნები მოიგოს და ბევრი ფული გააკეთოს. დიახ, საქართველოს უსაფრთხოება და თავდაცვისუნარიანობა მისი მიზანი არაა, თორემ ექსპერტულ წრეებსა და, ზოგადად, საზოგადოებაში გაბნეულ ცოდნას შეკრებდა.
_ არ მიწყინოთ და ზოგმა, შეიძლება იფიქროს, რომ თქვენი, როგორც ოპოზიციის ერთ-ერთი ლიდერის, მიზანი წინასაარჩევნოდ ამომრჩევლის „დაბოლებაა“ და ზემოხსენებული სტრატეგიაც ამას ემსახურება!
_ პირიქით, ჩვენი მიზანია, რომ ამომრჩეველი აღარ „დაბოლდეს“. დიახ, სტრატეგია „აღმაშენებლის“ მიზანია, რომ ზოგადი თეზისებით კი არა, კონკრეტულად ვისაუბროთ, რას და როგორ ვაპირებთ! ერთი წლის წინ ივანიშვილმა გვითხრა, მაპატიეთ, ბევრი შეცდომა გვქონდა და ყველაფერს ერთ წელიწადში გამოვასწორებთო, მაგრამ რამე გამოსწორდა? პირიქით, უარესი მდგომარეობა გვაქვს _ მეორე კვარტალში პირდაპირ უცხოური ინვესტიციები 54%-ითაა შემცირებული და ვინმემ იკითხა, რატომ? პირადად მე, დარწმუნებული ვარ, რომ ამის მთავარი მიზეზი კორუფციაა!
_ ასეთი დარწმუნებული რატომ ხართ?
_ იმიტომ ვარ, რომ თუ ვინმესთან „დალაგებული“ არ ხარ, დღეს ქვეყანაში საშუალო ან საშუალოზე მსხვილ ინვესტიციას ვერ ჩადებ! აი, ესაა პრობლემა!
მოკლედ, ჩვენი მცდელობაა, რომ ყველამ დადოს გეგმა და თქვას, როგორ აპირებს, ვთქვათ, სამუშაო ადგილების შექმნას, სოფლის განვითარებას, თვითმმართველობის რეალიზებას, სასამართლო ხელისუფლებისთვის ნდობის მოპოვებას თუ სოციალური პრობლემების მოგვარებას.
საერთოდ, სტრატეგია „აღმაშენებელი“ 15 თემადაა დაყოფილი და ყველა იმ ძირითად მიმართულებას მოიცავს, რომელიც იმისთვისაა აუცილებელი, რომ საქართველო რეგიონის ძლიერი ქვეყანა გახდეს!
_ სტრატეგია „აღმაშენებელი“ ეკლესიის რეფორმასაც ითვალისწინებს?
_ არა.
_ რატომ?
_ ვფიქრობ, რომ საეკლესიო რეფორმა სახელმწიფოს კი არა, ეკლესიის საქმეა!
_ ბატონო გიორგი, ნუთუ, დაგავიწყდათ, რომ მეფე დავითმა ქვეყნის რეალური აღმშენებლობა რუის-ურბნისის საეკლესიო კრებით დაიწყო?
_ მაშინ აბსოლუტურად სხვა გარემო იყო.
_ კი ბატონო, მაგრამ ხომ გაქვთ ამბიცია, რომ საქართველოს აღმაშენებლისეული დიდება დაუბრუნოთ?
_ მაშინ იმის დიდი პრობლემა არსებობდა, რომ ეკლესია და სახელმწიფო მმართველობა, პრაქტიკულად, გადაჯაჭვული იყო.
_ ახლაც ასეა, რასაც, მინიმუმ, „ციანიდის საქმეც“ მოწმობს.
_ მე ასე არ ვფიქრობ… ეკლესიას თავისი საქმე აქვს, სახელმწიფოს კი _ თავისი. ამიტომ ეკლესია და საერო ხელისუფლება ერთმანეთის საქმეში არ უნდა ერეოდნენ. თუ ამ მიმართულებით გარკვეული ნიშნები არსებობს, ძალიან ცუდია. მოკლედ, ჩვენ ეკლესიის საქმეში ჩარევას არ ვაპირებთ და, შესაბამისად, საეკლესიო რეფორმა სტრატეგია „აღმაშენებლის“, ასე ვთქვათ, საგანი არაა! გაცილებით დიდი პრობლემები გვაქვს, რაზედაც ხელისუფლებამ უნდა იმუშაოს და როცა ყველაფერი ეს მოგვარდება, დამერწმუნეთ, საეკლესიო კუთხით არსებული პრობლემებიც დალაგდება!
_ დიდებულმა მეფემ სახელმწიფოს სიძლიერე ურჩი ფეოდალების დასჯაზე ააგო. კორუმპირებულ ჩინოვნიკებს თქვენს ძელზე ხომ არ გასვამთ?
_ დავით აღმაშენებელმა კომპლექსურად დაინახა, თუ რა ნაბიჯები უნდა გადაედგა, რათა გავერანებული ტერიტორიიდან საქართველო სახელმწიფოდ ჩამოყალიბებულიყო! ეს აღმშენებლობის იდეა იყო და აღმაშენებელიც ამიტომ უწოდეს! ჩვენი სტრატეგიაც კანონის უზენაესობას ითვალისწინებს, ანუ კანონის წინაშე ყველა თანასწორი უნდა იყოს! გამორიცხულია, ვინმეს თავი მოვაჭრათ, იმის უფლება არც ივანიშვილს და არც სხვა ვინმეს უნდა ჰქონდეს, გადაწვიტოს, ვინ მტყუანია და ვინ _ მართალი. ჩვენ, ყველანი უნდა შევთანხმდეთ, რომ ამ ქვეყანაში არსებობს კანონი და კანონის უზენაესობა! იმაზე კი, თუ როგორ უნდა განვამტკიცოთ კანონის უზენაესობა, დიახ, პასუხი გვექნება და საამისოდ ფორმულები გვაქვს დამუშავებული!
_ ბატონო გიორგი, ფორმულებიც კარგია, მაგრამ, მაგალითად, იმას, რომ საქართველოში სასამართლო პოლიტიკური გავლენებისგან განთავისუფლდეს, ძალიან ბევრი წელი დასჭირდება.
_ ჩვენი ფორმულა სწორედ იმას ითვალისწინებს, რომ ეს სწრაფად და მყისიერად გავაკეთოთ. პირდაპირ ვთქვათ: სასამართლოს პრობლემა მოსამართლეების მიუკერძოებლობა და მათ მიმართ ნდობაა, ეს კი იმის შედეგია, დღეს მოსამართლეებს კი არ არჩევენ, არამედ, ნიშნავენ!
სხვათა შორის, უკრაინაში, ჩემს გუნდთან ერთად, ანტიკორუფციული სასამართლოს ფორმირებაზე ვმუშაობდი და მსოფლიოში პირველად უცხოელ ექსპერტთა პანელი გამოვიყენეთ, ანუ მაღალი გამოცდილების უცხოელი მოსამართლეები იმიტომ მოვიწვიეთ, რომ მოსამართლეობის მსურველები გაეცხრილათ და იცით, რა მოხდა?
_ რა?
_ სხვა შემთხვევაში მოსამართლეების მიმართ უკრაინელები ნეგატიურად იყვნენ განწყობილნი, მაგრამ იმ მოსამართლეებმა, რომლებიც ანტიკორუფციული სასამართლოს ფარგლებში შეირჩნენ, აბსოლუტური ნდობა მიიღეს!
ჩვენ ახალ ველოსიპედს არ ვიგონებთ, ანუ ჩვენი სტრატეგიის მიზანია, რომ რამე კი არ დავაკოპიროთ, არამედ ახალი სტანდარტი შევქმნათ _ სიახლისა და ინოვაციისთვისთვის, დიახ, გახსნილები უნდა ვიყოთ, თორემ, სხვა შემთხვევაში, წარმატებას ვერ მივაღწევთ!
არჩევანი ორია: გადატანითი მნიშვნელობით რომ ვთქვა, ან ფარნიანი „ნოკია“ გამოვუშვათ, რომელსაც მომხმარებელი უფრო და უფრო ცოტა ჰყავს, ან „სმარტოფონი“ გამოვუშვათ, რომელსაც მთელი მსოფლიო მოიხმარს და ამ „სმარტფონს“ ისეთი ფუნქცია დავამატოთ, რომლითაც კონკურენტუნარიანი გახდება!
სწორედ ასე მოვიქეცით იუსტიციის სახლის შემთხვევაში _ მთელი მსოფლიოს გამოცდილება შევისწავლეთ და იუსტიციის სახლი შევქმენით, რომელიც მსოფლიოში, თავის სეგმენტში, ახლაც ერთ-ერთი საუკეთესოა და ხალხის მხრიდანაც ყველაზე მაღალი ნდობა აქვს!
_ ისე, ბატონო გიორგი, სტრატეგია „აღმაშენებლის“ შემუშავებაში მიხეილ სააკაშვილი მონაწილეობდა? იცით, ამას რატომ გეკითხებით? _ სტრატეგიის პრეზენტაციამდე მესამე პრეზიდენტმა განაცხადა, 600 ეკლესია ავაშენე და, მათ შორის, ბაგრატიცო…
_ მიხეილ სააკაშვილს თავისი მოსაზრებები აქვს.
_ ანუ ეს სტრატეგია მხოლოდ თქვენია თუ მთელი გაერთიანებული ოპოზიციის?
_ სტრატეგია „აღმაშენებელი“ გაერთიანებული ოპოზიციის საკუთრება არაა, თუმცა მის დამუშავებაში, ექსპერტებთან ერთად, გაერთიანებული ოპოზიციის წევრებიც მონაწილეობდნენ. ეს საერთო, საყოველთაო სტრატეგიაა.
_ პირდაპირ ვთქვათ, რომ ეს სტრატეგია გიორგი ვაშაძესთან ასოცირდება.
_ კი ბატონო, ერთ-ერთი ავტორი მეც ვარ!
_ აქედან გამომდინარე, ხომ არ უნდა ვივარაუდოთ, რომ ახალ პოლიტიკურ თამაშს იწყებთ?
_ არა!
_ 2020-ის არჩევნებში კოალიციები იკრძალება. შესაბამისად, გაერთიანებული ოპოზიცია დაიშლება.
_ მერე რა? ამის გადაწყვეტის მექანიზმიც გვაქვს, თუმცა ამაზე საჯაროდ არ ვსაუბრობთ და საბოლოო კანონს ველოდებით.
_ ეს გასაგებია, თუმცა ერთი რამ მაინც ვერ გავიგე: ჩვეულებრივი ობივატელი როგორ უნდა დაარწმუნოთ, რომ სტრატეგია „აღმაშენებლით“ ქვეყანა აყვავდება? არ დაგავიწყდეთ, რომ ადამიანები ნიჰილიზმში არიან და პოლიტიკოსების აღარ სჯერათ!
_ ჩვენი კამპანიის ნაწილია, ოთახებიდან გამოვიდეთ, ყველა სოფელში, ქალაქში ჩავიდეთ და ადამიანებს იმაზე ვესაუბროთ, რომ გამოსავალი არსებობს და გაჭირვებაში არ უნდა ჩავიკეტოთ!
დიახ, გეთანხმებით, რომ ჩვენი ერთ-ერთი მთავარი პრობლემა ნიჰილიზმია, ანუ ადამიანები ფიქრობენ, რომ ამ გაჭირვებაში უნდა იცხოვრონ და ყველაფერს შეგუებული არიან. ჩვენ ბრძოლის უნარი უნდა გამოვიმუშაოთ და ვიცოდეთ, როგორ და რისთვის ვიბრძვით!
_ ეს სტრატეგია რამდენ წელზეა გათვლილი?
_ ამ სტრატეგიის რეალიზების პირველივე დღიდან თითოეული ადამიანი იგრძნობს, რომ ქვეყანა წინ მიდის!
_ საამისოდ აუცილებელია, რომ ხელისუფლებაში მოხვიდეთ, არა?
_ რა თქმა უნდა!
_ ბოლოს, ბატონო გიორგი, თუ ეს სტრატეგია წარმატებული იქნება, წლების მერე გიორგი ვაშაძე შთამომავლობას დაუბარებს, ფეხი დამადგით, გულზე დამადგითო?
_ არა, თუმცა იმის ამბიცია ნამდვილად მაქვს, რომ თანაგუნდელებსა და საქართველოს მოქალაქეებთან ერთად, ისეთი ქვეყანა ავაშენოთ, რომელიც რეგიონის ლიდერი და განვითარების ავანგარდში იქნება! დიახ, მჯერა, რომ ჩვენ, ქართველებს ეს შეგვიძლია! 21-ე საუკუნე ჩვენთვის უზარმაზარი შესაძლებლობაა იმიტომ, რომ ეს ცოდნისა და ტვინის საუკუნეა და არა _ ფიზიკური ძალის! აქამდე ასე იყო: ის ქვეყანა, სადაც ბევრი ხალხი ცხოვრობდა, იმ ქვეყანას ჩაგრავდა, სადაც ცოტა ხალხი იყო, მაგრამ ახლა ყველაფერი შეიცვალა და ამ საუკუნეში მნიშვნელობა ძალას კი არა, ცოდნასა და ნიჭს აქვს!
დიახ, ჩვენ შეგვიძლია, ავაშენოთ ძლიერი, ერთიანი საქართველო, რომელიც თავისუფალი ადამიანებისა და ძლიერი ოჯახების ქვეყანა იქნება, ქვეყანა, რომელიც ტრადიციებს პატივს სცემს და ამასთან, გლობალური განვითარების ავანგარდში იქნება! აქ სინგაპურს ვერ ავაშენებთ. აქ ამ ორი სეგმენტის სინთეზით წარმატებული საქართველოს აშენება შეგვიძლია, მით უმეტეს, რომ ამის ისტორიული გამოცდილება გვაქვს!

გიორგი აბაშიძე

 

დატოვეთ კომენტარი