მთავარი ინტერვიუ პაატა დავითაია: „მაინტერესებს, გაბუნიას ასეთი გამოსვლა რისთვის დასჭირდა?“

პაატა დავითაია: „მაინტერესებს, გაბუნიას ასეთი გამოსვლა რისთვის დასჭირდა?“

500
0
გაზიარება

გიორგი გაბუნიამ პოსტსაბჭოთა სივრცეში ახალი მედიამოდა დაამკვიდრა, რაც იმას ნიშნავს, რომ „რუსთავი 2-ის“ რეიტინგული წამყვანის შემდეგ რუსეთის პრეზიდენტს პირდაპირ ეთერში უკვე უკრაინელმა ჟურნალისტმაც აგინა.
„კოლეგები „რუსთავი 2-დან“ ტყუილის თქმის უფლებას არ მომცემენ. პუტინ, შენ ხარ ხ…ილო და რაც უფრო მალე გიხილავთ კუბოში თეთრი ფაჩუჩებით, მით მეტ საფერავსა და წინანდალს დავლევთ ამ ბედნიერ დღეს. მანამდე კი, სანამ შენს ბოტოქსს ბოლომდე შეუჭამია შენი ტვინი, გამარკვიე, რას გვეკვეხები? რატომ ვერ დაეტევი შენს მოჩლაჩულ უკანალზე, რას გვეკვეხები და გვეკვეხები უკრაინელებს, ქართველებსა და მოლდოველებს?“ _ ამ სიტყვების ავტორი უკრაინულ ტელეარხ „24-ე არხის“ წამყვანი არტემ ოვდიენკოა, რომელმაც ვლადიმირ პუტინისადმი სპეციალური მიმართვა ჩაწერა, თუმცა, საქართველოსგან განსხვავებით, ოვდიენკოს არაეთიკურ განცხადებას უკრაინაში აჟიოტაჟი არ მოჰყოლია. ამასთან, უკრაინელი ჟურნალისტის ექსტრადირება არც „დუმელებს“ მოუთხოვიათ და თავად პუტინიც, ჯერჯერობით, დუმს.

რატომ განიცადეს გაბუნიასგან პუტინის გინება ჩვენი ხელისუფლების წარმომადგენლებმა და ვინ არიან „ოცნებაში“ რუსული სპეცსამსახურების გავლენის აგენტები? _ „ევროპელი დემოკრატების“ ლიდერი, გაერთიანებული ოპოზიციის წევრი, პაატა დავითაია, ბოლო დროს ქვეყანაში განვითარებულ მოვლენებზე „ქრონიკა+“-ს საინტერესო ვერსიებს უზიარებს:

_ ბატონო პაატა, 20-21 ივნისის მოვლენების საქმეზე დაკითხვაზე თქვენც ხომ არ დაგიბარეს?
_ ჯერ არა.
_ ანუ ელოდებით? 20 ივნისს პარლამენტის წინ მიმდინარე აქციაზე ხომ იყავით?
_ კი, როგორ არ ვიყავი და ეს კადრებშიც ჩანს, თუმცა იქ იმ მომენტში ვიყავი, როცა ხელები ავწიეთ. ამ დროს ხალხსა და სპეცრაზმს შორის ვიდექი და ზურგით ფარებს ვეყრდნობოდი.
_ ე. ი., მშვიდობიან მომიტინგეებს პარლამენტში შესვლისკენ არ მოუწოდებდით?
_ არა, არა. ამ დროს მხოლოდ ძიძგილაობა იყო და მეტი არაფერი. მერე მე, დავით ბაქრაძემ, უგულავამ და ყველამ ხელები ავწიეთ. ხალხსა და სპეცრაზმს შორის, დაახლოებით, 40 წუთი ვიდექი. უჰაერობა დამეწყო და ვიფიქრე, ათი წუთით ქვევით ჩავალ-მეთქი, თან სიტუაცია უკვე დაწყნარებული იყო. მოკლედ, ქვევით ჩამოვედი.
_ სად ქვევით?
_ დაახლოებით, ეკლესიასთან, სადაც შედარებით თავისუფლება იყო. უცებ, იქუხა და ჭიდაობა დაიწყო.
_ ე. ი., სამართალდამცველები ოპოზიციის იმ ლიდერებით არიან დაინტერესებულნი, რომლებიც ე. წ. მეორე ეპიზოდში მონაწილეობდნენ?
_ არ ვიცი, წარმოდგენა არ მაქვს, თუმცა, როგორც გითხარით, კადრებში მეც ვჩანვარ და თუ დამიძახებენ, მივალ. ისე, ისიც არ ვიცი, ოპოზიციის ლიდერებს დაკითხვაზე რატომ იბარებენ?
_ როგორც ხელისუფლება ამბობს, იმ ღამეს ქვეყანა სახელმწიფო ხელისუფლების დამხობასა და ამბოხებას გადაურჩა. შესაბამისად, გამოძიებას ოპოზიციის ლიდერებთან კითხვები, ალბათ, ამ თემაზე ექნება, თუმცა სანამ გადატრიალების თემა წამოტივტივდებოდა, ქუჩაში ხალხი რუსული პროპაგანდის ტირაჟირებამ გამოიყვანა. ჰოდა, ჩვენც ყველაფერი ქრონოლოგიურად გავიხსენოთ და შევაფასოთ: გავრილოვი საქართველოს პარლამენტის თავმჯდომარის სავარძელში ჯდება, რასაც მოსახლეობა ქუჩაში გამოსვლით პასუხობს. მოგვიანებით, ხელისუფლება ანტისაოკუპაციო მშვიდობიან აქციას არბევს, პარალელურად, პუტინი სანქციებით გვემუქრება. ამასობაში, გიორგი გაბუნია მას აგინებს. საპასუხოდ, პუტინი სანქციებს აღარ გვიწესებს, თუმცა ისტორიას გვიმახინჯებს. მოკლედ, ყველაფერი ეს ერთი ჯაჭვია?
_ გამოცდილი ჟურნალისტი ხართ, მოვლენები ძალიან სწორად დაალაგეთ და მეც რომ არ გითხრათ, ალბათ, დარწმუნებული ხართ, რომ ყველაფერი, დიახ, ეთმანეთთან კავშირშია, თუმცა ეს თემა მაინც ეპიზოდებად დავყოთ.
_ კი ბატონო, გისმენთ.
_ იმის თქმა, რომ ყველაფერი ასე მიზანმიმართულად იყო დაგეგმილი, აბსურდია, ანუ გავრილოვის ჩამოსვლა და გაბუნიას განცხადება, მართალია, ერთმანეთზეა მიყოლებული, მაგრამ ვერ ვიტყვით, რომ დაგეგმილი იყო. სხვათა შორის, თავდაპირველად გავრილოვის ჩამოსვლამდე პოლიტიკურ სპექტრში სრული სიჩუმე იყო და არჩევნების პროპორციულ სისტემაზე გადასვლისთვის ხელმოწერები გროვდებოდა. ხელმოწერები შეგროვდა, პარლამენტში შევიტანეთ და განხილვას ველოდებოდით. არ უნდა დაგვავიწყდეს „ოცნების“ ცინიზმი, რომელიც ამ თემას არცთუ სერიოზულად უყურებდა. მოკლედ, ოპოზიცია პროპორციული სისტემის მოთხოვნით ხალხს ქუჩაში არ ეძახდა, მოდით, აქციები დავიწყოთო და კანონის გზით მივდიოდით. ამასობაში, პარლმენტი დღის წესრიგს წერს, რომლის თანახმადაც ეს თემა ივლისში უნდა განიხილონ.
ამ ფონზე საქართველოში გავრილოვი ჩამოდის. გავრილოვის ჩამოსვლასთან დაკავშირებით ამბობენ, ის რაღაც მართლმადიდებლური საპარლამენტო ასამბლეის თავმჯდომარეა, ეს ასამბლეა საერთაშორისო ფორმატია და ამიტომ უნდა მიგვეღოო, მაგრამ ამ კონტექსტში ერთ მაგალითს მოგიყვანთ: როცა ევროპის საბჭოს საპარლამენტო ასამბლეის წევრი ვიყავი, რუსი დეპუტატი მარკოვი საქართველოში იმის გამო არ შემოვუშვით, რომ, თავის დროზე, აფხაზეთის დამოუკიდებლობას მისცა ხმა. სხვათა შორის, მარკოვი მაშინ საქართველოში ევროსაბჭოს საპარლამენტო ეგიდით ჩამოდიოდა. ამას ევროსაბჭოში ერთი ამბავი მოყვა, მაგრამ ევროსაბჭოში გამოვედი და დეპუტატებს ავუხსენი, მარკოვი საქართველოში რატომაც არ შემოვუშვით. ჩემი არგუმენტები ევროპის საბჭოს საპარლამენტო ასამბლეამ გაიზიარა. ხომ ხვდებით, საუბარი რაზეც არის?
_ დიახ, რა თქმა უნდა, ვხვდები.
_ გავრილოვი რუსეთის მიერ შექმნილი ორგანიზაციის თავმჯდომარეა. ყოველ შემთხვევაში, ე. წ. მართლმადიდებელ დეპუტატთა საერთაშორისო ასამბლეას რუსეთი ლობირებს. ყველა საერთაშორისო ორგანიზაციაში, რომლის წევრიც რუსეთია, „წამყვან თანამდებობებზე“ ყოველთვის „ედინაია როსიას“, ანუ რუსეთის მმართველი პარტიის წარმომადგენლები არიან. ეს მართლმადიდებელ დეპუტატთა ასამბლეა ერთადერთი სასაცილო ფორმატია, სადაც თავმჯდომარე კომუნისტია. აქვე, არ დაგავიწყდეთ, რომ რუსეთის კომუნისტური პარტიის სტრატეგიული ამოცანა საბჭოთა კავშირის აღდგენაა. აი, ამ პარტიის წამომადგენელს საქართველოში იმ მოტივით იღებენ, საერთაშორისო ასამბლეის თავმჯდომარეა და აბა, როგორ არ უნდა მივიღოთო, თან მარტო კი არ იღებენ, არამედ, პარლამენტის თავმჯდომარის სავარძელში სვამენ. ეს ხომ პირდაპირ რუსეთის სპეცსამსახურების მიერ დადგმული პროვოკაციაა, რომელიც საქართველოში მათმა გავლენის აგენტებმა შეასრულეს?!
_ ამ ლოგიკით, ზოგის ის ვერსიაც არ უნდა გამოვრიცხოთ, რომ გაბუნიას განცხადება პროვოკაცია იყო.
_ გაბუნიამდეც მივალ, თუმცა ამ წუთს გავრილოვზე ვსაუბრობ.
სიმათლე ვთქვათ, ამ ასამბლეის სხდომა „ჰუალინგის“ შენობაში რომ ჩაეტარებინათ, რამე მოხდებოდა?
_ ალბათ, არაფერი მოხდებოდა. მეტიც, შესაძლოა, ვერავის ვერც გაეგო, რომ თბილისში გავრილოვი იყო ჩამოსული.
_ საქართველოში გავრილოვზე უარესი თანამდებობის პირები ჩამოუყვანიათ, მაგრამ არაფერი მომხდარა. ამ შემთხვევაში კი საზოგადოებაზე იმან იმოქმედა, რომ ოკუპანტი ქვეყნის წარმომადგენელი საქართველოს პარლამენტის თავმჯდომარის ადგილზე ზის და მისი ჩაქუჩით ტრიბუნას ურტყამს! აი, კატასტროფა, თუნდაც ვიზუალურად, სწორედ ამიტომ იყო!
ყველაფერ ამას დეტალურად იმიტომ ვიხსენებ, რომ ვიღაცის მიერ დადგმული პროვოკაცია იყო.
_ ბატონო პაატა, დავაკონკრეტოთ: „ვიღაცა“ რუსული სპეცსამსახურია?
_ ეჭვიც არ მეპარება.
ერთი სიტყვით, ხალხი აღშფოთდა, მაგრამ საინტერესოა, ასეთი მაიმუნობა „ქართული ოცნების“ ინტერესში შედიოდა თუ არა?
_ თქვენი აზრით, შედიოდა?
_ ეს მაიმუნობა „ოცნების“ ინტერესში არ შედიოდა!
_ ე. ი., „ოცნება“ დაგეგმილ პროვოკაციაზე წამოეგო?
_ რუსული ინტერესების გატარება „ოცნებაში“ მყოფმა გავლენის აგენტებმა უზრუნველყვეს!
_ ოპოზიცია წლებია, აცხადებს, რომ ივანიშვილი კრემლის პროექტია. აქედან გამომდინარე, დამიკონკრეტეთ: გავრილოვის პროვოკაცია ივანიშვილს აწყობდა თუ არა?
_ არ ვამბობ, რომ ივანიშვილის ინტერესში შედიოდა ან არ შედიოდა. უბრალოდ, ერთი წუთით წარმოიდგინეთ, რომ ხელისუფლებაში ხართ და იმხელა რისკზე მიდიხართ, რომ პარლამენტის თავმჯდომარეს კარგავ, ამასთან, იძულებული ხდები, არჩევნების იმ სისტემაზე წახვიდე, რომელიც არ გინდა. დიახ, მმართველ ძალას არჩევნების პროპორციული სისტემა არ აწყობდა. მოკლედ, მართალია, ოპოზიციის წარმომადგენელი ვარ, მაგრამ ვცდილობ, ყველაფერს ობიექტურად შევხედო, ანუ ვიღაცას აწყობდა, რომ ყველაფერი ისე წასულიყო, როგორც წავიდა.
თვალების დათხრით მიღებულ შოკს თავი დავანებოთ და ივანიშვილის ორი განცხადება განვიხილოთ, ანუ მან ჯერ თქვა, მართლმადიდებელ დეპუტატთა ასამბლეა შევაჩერეო. თუ ეს საერთაშორისო ორგანიზაციაა, საინტერესოა, ივანიშვილმა როგორ შეაჩერა, ამ შეჩერებისთვის რა ბერკეტი ჰქონდა? ისე, დარწმუნებული ვარ, მუშტი მკაცრად დაარტყა და შეაჩერა, მაგრამ სიტუაცია ამით არ განიმუხტა და ე. წ. გავრილოვის ღამემდე მივედით. ამის შემდეგ ხელისუფლება იმ ნაბიჯს დგამს, რომელიც არ აწყობს.
_ რას გულისხმობთ?
_ არჩევნების პროპორციულ სისტემას. სხვათა შორის, თუ გახსოვთ, თავის დროზე, როცა ეს კონსტიტუცია მიიღეს, „ოცნების“ წარმომადგენლები აცხადებდნენ, ეს კონსტიტუცია დიდი იქნებაო.
მოკლედ, ხელისუფლება იმას თმობს, რისი დათმობაც მისთვის წარმოუდგენელი იყო და ამ დროს იმას, რაც მარტივი დასათმობია, არ თმობს.
_ „მარტივი დასათმობი“ რა არის?
_ ამ სიტუაციაში ყველაზე მარტივად გადასაწყვეტი თემა გახარიას გადაყენებაა, მაგრამ ამაზე ხელისუფლება ჯიუტდება, პროტესტი ძლიერდება _ ახალგაზრდები 20 დღეზე მეტია, ქუჩაში დგანან, საზოგადოებაში შს მინისტრის მიმართ ნეგატივი კი არ იკლებს, არამედ, იმატებს. ამ ფონზე რუსეთი მდგომარეობას ძაბავს, ანუ პირდაპირ ამბობს, მელია უნდა დაისაჯოსო _ მელიას დასჯა გავრილოვმა მოითხოვა.
სხვათა შორის, თქვენ, როგორც პიარის კარგი მცოდნე, ალბათ, დამეთანხმებით, რომ პიარის კუთხით მელიამ „ქართულ ოცნებას“ ასით ნული მოუგო.
_ დიახ, გეთანხმებით _ მელია, ნებსით თუ უნებლიეთ, გმირი გახდა.
_ მელიას ეპიზოდმა „ქართული ოცნება“ პიარულად დაანგრია.
აქედან გამომდინარე, ვსვამ კითხვას: მელიას დაჭერა ვის აწყობდა?
_ რახან კითხვას სვამთ, პასუხი გექნებათ, ანუ მელიას დაჭერა „ოცნების“ თუ არა, აბა, ვის ინტერესში იყო?
_ მელიას დაჭერა იმ გავლენიანი რუსული აგენტურის ინტერესში იყო, რომელსაც ქართული სახელმწიფოს „გაბანძება“ უნდოდა!
_ გავლენიანმა რუსულმა აგენტურამ თავისას მიაღწია?
_ დიახ, ეს მოახერხა!
_ ბატონო პაატა, ბევრ ინფორმაციას ფლობთ, შესაბამისად, ისიც გეცოდინებათ, „ოცნებაში“ რუსეთის გავლენის აგენტები ვინ არიან.
_ იცით, რა ხდება? _ ამას ვერ ვიტყვი.
_ მესმის, რომ დელიკატური თემაა, მაგრამ როცა ქვეყანა ჩიხშია, ვფიქრობ, დასამალი აღარაფერი უნდა იყოს.
_ ამას ერთი მიზეზის გამო ვერ ვიტყვი: მართლა არ ვიცი, „ოცნებაში“ გადაწყვეტილებებს ვინ იღებს. ყველაფერი, რასაც გეუბნებით, ჩემი ვარაუდია.
ისე, რუსულ ტელევიზიებს თუ შეხედავთ, ნახავთ, ყველაფერი ეს როგორ პირამიდასავით ლაგდება.
მოკლედ, ხალხი აღშფოთებულია, ყველა აფექტშია და ამ დროს გაბუნია თავის განცხადებას აკეთებს.
_ საუბარი იქითკენ მიგყავთ, რომ გაბუნიას განცხადებაც რუსული სპეცსამსახურების მიერ დაგეგმილ პროვოკაციაში ჯდება?
_ არა.
_ აბა?
_ გაბუნიას გამოსვლა, ვთქვი და ახლაც გავიმეორებ, რომ ყოვლად მიუღებელი იყო, მაგრამ დამოუკიდებელ ტელევიზიას თავისი აზრის გამოხატვის უფლება აქვს. საქართველოში აზრის გამოხატვა კონსტიტუციით არის გარანტირებული. ამასთან, გაბუნიას სისხლის სამართლებრივი პასუხისმგებლობის საკითხი ვერ დადგება და საუბარი შესაძლოა, ეთიკურ პასუხისმგებლობაზე იყოს.
_ მესმის, მაგრამ სხვა რამ გკითხეთ და თუ შეიძლება, კითხვაზე მიპასუხეთ.
_ სწორედ მაქამდე მივდივარ. საკითხი ასე დგას: გაბუნიას თემა ვის აწყობდა?
_ ამას მე მეკითხებით?
_ ეს კითხვა მარტო თქვენთან კი არა, საკუთარ თავთანაც მაქვს. დიახ, მაინტერესებს, გაბუნიას ასეთი გამოსვლა რისთვის დასჭირდა?
სხვათა შორის, გაბუნიამდე პუტინი ბევრს შეუგინებია, მათ შორის, ვასიკო ოდიშვილსაც და არაფერი მომხდარა.
_ ოდიშვილის გარდა პუტინს ოთარ ტატიშვილმაც აგინა, მაგრამ მაშინაც არაფერი მომხდარა. ამას რით ხსნით, ბატონო პაატა?
_ ომის დროს, როცა მტერს აგინებ, არ ეუბნები, დედაშენის საფლავზე ეს და ეს უნდა გავაკეთოო. ახლა გაბუნიას ვეკითხები: ეს რისთვის სჭირდებოდა?
_ ისე, თქვენმა კითხვამ „ოცნების“ ერთ-ერთი იდეოლოგის, გოგა ხაინდრავას ნათქვამი გამახსენა, ანუ ხაინდრავამ „იმედზე“ განაცხადა, გაბუნიას ტექსტი შკრიალოვის დაწერილი იყოო.
_ არ ვიცი…
ამ კითხვას პასუხი გაბუნიამ უნდა გასცეს: ეს გადაწყვეტილება რატომ მიიღო? თუ პუტინის გინება უნდოდა, მისი მესმის და პუტინისთვის მეც მიგინებია.
_ პუტინს მთელი საქართველო აგინებს და ამაში ახალი და გასაკვირი არაფერია.
_ დიახ, ასეა, მაგრამ საინტერესოა, გაბუნიამ რატომ მიიღო გადაწყვეტილება, რომ ყველაფერი ასეთი ფორმით გაეკეთებინა?
სხვათა შორის, გაბუნიას ის ტექსტი ქართულად რომ ეთქვა, დამერწმუნეთ, არაფერი მოხდებოდა. მოკლედ, როცა იცოდა, ეს რასაც გამოიწვევდა და მაინც გააკეთა, აი, ამას ვერ ვიგებ.
_ ანუ მიიჩნევთ, რომ გამოსაძიებელია, თუ რატომ მიიღო ჟურნალისტმა ასეთი გადაწყვეტილება?
_ არა, გამოძიება ვერ ჩატარდება, რადგან გაბუნიას სისხლის სამართლის პასუხისმგებლობა არ დგას და ვერც დადგება.
_ გამოძიებაში სისხლის სამართლის პასუხისმგებლობა არც მიგულისხმია, მაგრამ ყველას გვაინტერესებს, რეალურად რა მოხდა. სიმართლე ხომ უნდა გავიგოთ?
_ გაბუნიამ უნდა თქვას, ეს გადაწყვეტილება რატომ მიიღო. თუ ის იტყვის, მინდოდა, მისთვის მეგინებინაო, ეს მისაღები იქნება.
_ პუტინმა „კეთილი ბიძის“ როლი გაბუნიას გინების შემდეგ მოირგო, რაც თავისთავად დასაფიქრებელია, არა?
_ აი, აქ უკვე მეორე საკითხი დგება, ანუ დავუშვათ, რომ რუსულმა მხარემ გაბუნიასგან ბურთის კარგი ჩაწოდება მიიღო და ახლა ცდილობს, თავისი პოლიტიკა სწორედ ამაზე ააგოს. ყოველ შემთხვევაში, ყველაფერი ეს გამოიყენა.
_ ე. ი., გაბუნიამ, ნებსით თუ უნებლიეთ, პუტინს „სატოპკე“ აუწია?
_ რა თქმა უნდა. ამიტომაც გაბუნია ოდესმე უნდა გამოვიდეს და თქვას, ამის გაკეთება იმ დღეს რატომ გადაწყვიტა, თორემ პუტინის გინებაში ვეთანხმები და მეც ვაგინებ!
_ საერთო ჯამში, ბატონო პაატა, საქმე სახელმწიფო გადატრიალებასთან კი არ გვაქვს, რითიც ხელისუფლება აპელირებს, არამედ სახეზეა რუსული სპეცსამსახურების მიერ კარგად დაგეგმილი და მათი გავლენის აგენტებით შესრულებული პროვოკაცია, არა?
_ ჩემი გადასახედიდან ასე ჩანს: პოლიტიკურად „მშვიდ“ ვითარებაში გავრილოვი, 20 ივნისი და მთელი უბედურება იწყება.
_ აქვე, ალბათ, თანამედროვე „კომბლეებიც“ უნდა ვახსენოთ.
_ დიახ, თუმცა „კომბლეები“ საერთოდ სხვა თემაა. არ ვამბობ, რომ ყველაფერი ეს დალაგებული იყო, მაგრამ ვიღაცამ რაღაც აურია, რის შემდეგაც თემების მოდერნიზება მოხდა.
_ შეიძლება, მაგრამ ფაქტია: „კომბლეები“ თამაშიდან გაიყვანეს. ყოველ შემთხვევაში, რუსთაველზე ისევ ანტისაოკუპაციო აქციები ტარდება, ანუ მოცემულ მომენტში „კომბლეების“ გააქტიურება თავად „ოცნებასაც“ არ აწყობდა?
_ მან, ვინც „კომბლეების“ გამოჩენის გადაწყვეტილება მიიღო, შეცდომა ისევ „ქართული ოცნებისთვის“ დაუშვა. როგორც ჩანს, ამას მიხვდნენ და ამიტომაც მოაშორეს.
ყველაფერ აქედან გამომდინარე, პირდაპირ ვამბობ: საქართველოს ხელისუფლებაში ვიღაც რუსეთის ინტერესებზე მიბმული გავლენის აგენტია, რომლის მთავარი ამოცანაც ქვეყანაში ყველა პროვოკაციული ფორმით დესტაბილიზაციის შემოტანაა.
_ ამ დესტაბილიზაციის საბოლოო მიზანი რა უნდა იყოს?
_ ალბათ, ის, რომ ანაკლიის პროექტი არ განხორციელდეს, თან ევროკავშირსაც გაუჩნდება კითხვები, აი, საქართველოში ადამიანის უფლებები ირღვევა და სხვა ცუდი რაღაცებიც ხდებაო. ამას მოჰყვება უვიზო რეჟმის გაბანძება. ამასთან, გაბანძდება ქვეყნის ეკონომიკა და ევროკავშირი იტყვის, ამ ქვეყანაზე როგორ უნდა ვიფიქროთო?
მოკლედ, ყველა წინაპირობა იქმნება საიმისოდ, რომ საქართველოს ერთადერთ გზად რუსეთთან ურთიერთობა დარჩეს!
_ ანაკლიის პორტი ახსენეთ და ბარემ გკითხავთ: აი, ამ ორომტრიალში მამუკა ხაზარაძე სახალხო მოძრაობას აფუძნებს. ამას როგორ ხსნით?
_ ცალსახად ჩანს, რომ ეს ადამიანი პოლიტიკაში მოდის, თუმცა ჯერ არ ვიცით, მისი პოლიტიკური ხედვა როგორი იქნება. ჯერჯერობით, ერთმნიშვნელოვნად ის ჩანდა, რომ მის ანაკლიის პორტს ხელი ეშლებოდა და ამის შესახებ აშშ-ის სახელმწიფო დეპარტამენტმაც განაცხადა.
საერთოდ, გავლენის აგენტებმა „წყალი აამღვრიეს“ და კაციშვილმა არ იცის, ამ „მღვრიე წყალში“ ვინ რას დაიჭერს.
_ ამ „მღვრიე წყლიდან“ როგორ უნდა გამოვიდეთ, ბატონო პაატა?
_ ძალიან რთული კითხვაა და პირდაპირი პასუხიც არ მაქვს, თუმცა ამ „მღვრიე წყლიდან“ ერთადერთი გამოსავალი დემოკრატიის გაძლიერებაა.
_ ანუ?
_ სახელმწიფომ დემოკრატიული ინსტიტუტები ნორმალური საარჩევნო კოდექსით, მედიაზეწოლაზე უარის თქმით, გახარიას გადადგომით და 20 ივნისის ობიექტური გამოძიებით უნდა გააძლიეროს.
_ შს მინისტრი, როგორც მან ინგა გრიგოლიას „რეაქციაში“ განაცხადა, გადადგომას, ჯერჯერობით, არ აპირებს.
_ ამიტომ რუსთაველიდან არც ახალგაზრდობა „გადადგება“.
_ ე. ი., ეს ორომტრიალი დაუსრულებლად გაგრძელდება?
_ სანამ შს მინისტრი არ გადადგება, ეს ახალგაზრდები არ დაიშლებიან. ამით ქვეყანაში სიტუაცია იძაბება. ვსვამ კითხვას: უსაფრთხოებისა თუ უშიშროების საბჭოს მდივანი, შს მინისტრი და, ამავდრულად, ვიცე-პრემიერი სიტუაციას რატომ ძაბავს? რომ გადადგეს, გამოძიება ისე ჩატარდეს და გახარია გამართლდეს, რამე პრობლემაა?
_ ცხადია, არა.
_ ვთქვათ, გამოძიებით დადგინდა, რომ გახარია მართალი არ არის. რა, შს მინისტრს დააკავებენ ან ვინ დააკავებს _ თავისივე სამინისტრო?
_ რატომ არ დააკავებს? _ თუ გახსოვთ, თავის დროზე, სსრკ-ს გენმდივანი ხრუშჩოვი დააკავეს.
_ მაშინ ინსტიტუტები მუშაობდნენ, ახლა კი პიროვნებები მუშაობენ.
_ ე. ი., დიდ ჩიხში ვართ შესულები, საიდანაც კარგა ხანს ვერ გამოვალთ?
_ ჯერჯერობით ასეთი პირი უჩანს.
_ და ჩიხიდან ვადამდელი საპარლამენტო არჩევნები გამოგვიყვანს?
_ ძალიან კარგი კითხვა დასვით: ვადამდელი საპარლამენტო არჩევნები ყოველთვის გამოსავალია, მაგრამ თუ იურიდიულ პროცედურას გავყვებით, პროპორციულ სისტემაზე გადასვლა შემოდგომაზე, ვადამდელი საპარლამენტო არჩევნების ჩატარება კი გაზაფხულზე შეიძლება.
_ 2020 წლის გაზაფხულზე ვადამდელის ჩატარებას რა აზრი აქვს, როცა მომავლი წლის შემოდგომაზე არჩევნები, როგორც იტყვიან, რიგითობითაც უწევს?
_ დიახ, ასეა, მაგრამ თუ სახელმწიფოში დაძაბული ვითარება და მაღალი ტემპერატურა გაქვს, ორთქლის გამოშვებას გაზაფხულიდან შემოდგომამდე რატომ უნდა დაელოდო?

გიორგი აბაშიძე

 

დატოვეთ კომენტარი