იმ დროს, როცა მთელი სახელისუფლებო ელიტა „ნაციონალური მოძრაობის“ პოლიტსაბჭოს თავმჯდომარე ნიკა მელიას პოლიტიკურ სასამართლოს უწყობდა და ერთი სული ჰქონდა, მისთვის იმუნიტეტის მოხსნის საკითხი კენჭისყრაზე როდის დადგებოდა, „პატრიოტთა ალიანსის“ წევრ ემზარ კვიციანის განცხადებამ სრულიად ერი დაშოკა, ანუ კვიციანმა კოლეგებს მოუწოდა, რომ მელიასთვის იმუნიტეტი არ მოეხსნათ.
„ჩვენ 21-ში ვიხილეთ ძალიან ბევრი ადამიანი, რომელიც მოუწოდებდა. მახსოვს ასეთი ფრაზა: ივანიშვილს ხელიდან უნდა წავგლიჯოთ ხელისუფლება.
გახსოვთ, ალბათ, ხო, მაგის ავტორი? _ ქვეყნის გამყიდველი ირაკლი ოქრუაშვილი, რომელსაც არ სჭირდება შეჩერება, არც იმუნიტეტის ჩამორთმევა. არის დაკითხული ან დაკავებული იგი?
რაც შეეხება ნიკანორ მელიას, არის მასზე სისხლის სამართლის საქმე აღძრული. გირაოთია გამოშვებული და არც გაქცეულა არსად. დღესაც, აგერ, მოვიდა, ზის და გისმენთ, ანუ ყველა საფუძველი არსებობს, რომ არსად გაიქცევა და რატომ არის აუცილებელი მაგისი პატიმრობაში ყოფნა, ძალიან მაინტერესებს.
თუ არის საშუალება მაგისი, რომ დეპუტატები, ვისაც სურვილი ექნება, რომ თავდებში დაუდგეს ნიკანორ მელიას, არის თუ არა შესაძლებლობა, რომ აიღონ დეპუტატებმა თავის თავზე, რომ ნიკანორ მელია არ გაიქცევა და არ შეუშლის ხელს გამოძიებას ან შიდა პატიმრობა იყოს.
მიუხედავად იმისა, რომ სხვადასხვა მიმართულება გვაქვს ჩვენ პოლიტიკური, ის არის ჩვენი კოლეგა და ეს ისტორიაში ჩაიწერება, რომ მეცხრე მოწვევის პარლამენტარებმა თავისი კოლეგა გაწირეს.
რადგან მივიღეთ, მოვიყვანეთ და დავსვით აქ, მაშინ, კეთილი ინებეთ და კოლეგიალობა დავიცვათ. ამიტომ მოვითხოვოთ შინაპატიმრობა, სანამ არ მორჩება გამოძიება“, _ ეს განცხადება ემზარ კვიციანმა პარლამენტის პლენარულ სხდომაზე გააკეთა და ძალიან ბევრი თუნდაც იმიტომ გააოცა, რომ არცთუ შორეულ წარსულში კვიციანის პოლიტიკურმა გუნდმა პარლამენტს „ნაციონალური“ მოძრაობის, როგორც პარტიის, აკრძალვის პროექტი წარუდგინა, თუმცა მაშინ ეს ინიციატივა ჩავარდა. ჰოდა, ამ ფონზე არავინ ელოდა, რომ „პატრიოტი“ კვიციანი „ნაციონალ“ მელიას დაიცავდა.

რა მოხდა და, ზოგადად, ამ ფაქტმა კიდევ ერთხელ ხომ არ დაადასტურა, რომ პოლიტიკაში მუდმივი მტრები და მეგობრები არ არსებობენ? _ ამის გარკვევას „ქრონიკა+“ თავად ემზარ კვიციანთან შეეცადა, რომელსაც ე. წ. გავრილოვის კრიზისზე საკუთარი შეხედულებები აქვს და პირდაპირ ამბობს, რომ ყველაფერი, რაც ბოლო დღეებში ხდება, რუსულმა სპეცსამსახურებმა გიგა ბოკერიას იმიჯის ასაწევად დაგეგმეს. მეტიც, კვიციანი იმაშიც დარწმუნებულია, რომ ნიკა მელიას თავად ოპოზიცია წირავდა.
მოკლედ, შესაძლოა, ყველაფერი ის, რასაც „პატრიოტთა ალიანსის“ წევრი ამბობს, ზოგს შეთქმულების თეორიად მოეჩვენოს, მაგრამ არსებობის უფლება ნებისმიერ ვერსიას აქვს.
მაშ, ასე! ემზარ კვიციანის სკანდალური ინტერვიუ გულდასმით წაიკითხეთ და დასკვნები თავად გამოიტანეთ:

_ ბატონო ემზარ, იმ განცხადების გამო, რომელიც ნიკა მელიას მხარდასაჭერად პარლამენტში გააკეთეთ, თვით „ნაციონალების“ ოვაციებიც დაიმსახურეთ. ამას ელოდით და, საერთოდ, რატომ გადაწყვიტეთ, რომ მელია უნდა დაგეცვათ _ ეს წმინდა კაცური ფაქტორი იყო თუ პოლიტიკური ნაბიჯი?
_ არ ვიცი, საიდან და როგორ დავიწყო, პასუხი რომ გაგცეთ.
_ საიდანაც გინდათ, იქიდან დაიწყეთ, გისმენთ.
_ „ნაციონალური მოძრაობა“ ჩემი და ჩემი ოჯახის არათუ მოწინააღმდეგე, არამედ თავიდან ბოლომდე გამანადგურებელია და ეგენი სამშობლოს გამყიდველებად მიმაჩნია.
_ რატომ?
_ მთელი ჩვენი ნაშრომი და ნაბრძოლი კოდორის ხეობაში გაგვიყიდეს, მაგრამ იმ დღეს ჩემ წინ „ნაციონალური მოძრაობის“ ერთ-ერთი წევრი იჯდა, რომელიც ამ პარტიაში 2012 წელს შევიდა, ამას, პლუს, განიარაღებული და მარტო იყო. ამან ჩემზე იმოქმედა.
სააკაშვილი ვინც არის, ვიცით, ისიც ვიცით, ბოკერია ვინც არის და სხვა კიდევ რამდენიმე ლიდერი, მაგრამ ყველაფერ ამაში მელიას წვლილი არ მიუძღვის.
_ რა ყველაფერში?
_ თუნდაც იმ სისხლისღვრაში, რაც თბილისში ხდებოდა და არც _ ტერიტორიების გასხვისებაში.
მოკლედ, ჩავთვალე, რომ მელია ყველასგან განწირული იყო.
_ ანუ იმას ამბობთ, რომ მელია თავად ოპოზიციამაც გაწირა?
_ დიახ, მაშინ ასე მომეჩვენა და იმისთვის გაწირა, რომ თევზაობის დროს „ნაჟილკას“ რომ იტყვიან, მელიას საშუალებით ბოკერიასა და სხვა დესტრუქციულ ძალებს ხალხი გამოეყვანათ.
თვითონ ის ფაქტი, რასაც „გავრილოვის ოპერაცია“ ჰქვია და რაც ჩვენმა „მეხუთე კოლონამ“ ჩაგვიტარა, თავიდანვე დადგმული იყო.
_ ამას რის საფუძველზე ამბობთ, ბატონო ემზარ?
_ გავრილოვი შტურმით კი არ მოსულა, კაცო, პარლამენტის ასაღებად. ის ჩვენმა მხარემ, საქართველომ დაპატიჟა და სადაც უთხრეს, დაჯექიო, იქ დაჯდა. მერე, მეორე მხრიდან შემოუვარდნენ და წივილ-კივილი ატყდა. ამიტომ ყველაფერი ეს ერთი და იგივე ადამიანისა და ჯგუფის მიერ იყო დაგეგმილი. ეს იმ ადამიანებმა დაგეგმეს, რომლებმაც კოდორის ხეობის ჩაბარება და სამაჩაბლოს მოწინააღმდეგეზე იურიდიულად გაფორმება დაგეგმეს. რუსეთში 8 წელი ვიყავი და ძალიან ბევრი ინფორმაცია მაქვს _ იქიდან ვინ მართავს საქართველოს და საქართველოში საყრდენი ვინ ჰყავთ.
მოკლედ, უცებ, იმ წუთას, ჩემი ანალიზი გავაკეთე და ამაზე დაყრდნობით ის განცხადება გავაკეთე, რომელიც გავაკეთე.
_ ამ განცხადებას თქვენი გუნდის შიგნით უკმაყოფილება არ მოყვა?
_ სხვათა შორის, არა, პირიქით, აბსოლუტურად ყველა ერთ აზრზე ვიყავით, რომ არავითარ შემთხვევაში არ უნდა დაიჭირონ მელია, ყველაფერი დეტალურად უნდა იყოს გამოძიებული. ისიც ვუთხარით, რომ გამოძიება მელიათი, ანუ შუიდან კი არა, თავიდან უნდა დაიწყოს _ გავრილოვის შემოყვანა ვინ დაგეგმა შემდეგ ამას რა მოყვა, ამით ჩვენმა ქვეყანამ რამდენი პოლიტიკური და ეკონომიკური ზარალი მიიღო. მოკლედ, ყველაფერი უნდა იყოს დათვლილი და ამის მიხედვით უნდა იქნენ ის ადამიანები დასჯილები, რომლებიც ამ პროვოკაციაში ურევიან.
სხვათა შორის, „გავრილოვის პროვოკაციაში“ მელია არ ერია.
_ თქვენი ინფორმაციით, „გავრილოვის პროვოკაციაში“ მარტო ბოკერიას „ევროპული საქართველო“ იყო ჩარეული თუ „ოცნების“ ე. წ. ახალგაზრდულ ნაწილთან, ანუ კობახიძის ფრთასთან შეთანხმებულად მოქმედებდა?
_ იცით, რა ხდება? _ ჩემი გამოცდილებით და იმ ინფორმაციებით, რაც მაქვს, ყველაფერი, თავიდან ბოლომდე, რა თქმა უნდა, მოსკოვში დაიგეგმა.
_ რა მიზნით?
_ ყველაზე საყრდენი ძალა, რომელიც რუსეთის სპეცსამსახურებს ჰყავს, ბოკერიაა და ესეც მაგის გასაძლიერებლად მოიმოქმედეს.
ისე, ალბათ, გახსოვთ, თავის დროზე, რუსებმა სააკაშვილს რეიტინგი რომ აუწიეს და ჟირინოვსკის დაუსვეს, ანუ ჟირინოვსკიმ ჯერ ისეთი განცხადება გააკეთა, რომ მთელ საქართველოს შეაძულა თავი. ამის მერე სააკაშვილს უჯდება, სააკაშვილი ლანძღავს და მისმა რეიტინგმაც აიწია, ანუ ჟირინოვსკიმ, რომელიც, სხვათა შორის, ლიბერალია, ყველაფერი გააკეთა, რათა სააკაშვილი გაეძლიერებინა. რამდენიმე წლის შემდეგ ჟირინოვსკიმ ყველაფერი ეს აღიარა და პირდაპირ ეთერში თქვა, სააკაშვილი ჩვენ მოვიყვანეთ, გავაძლიერეთ და ახლა ჩვენ წინააღმდეგ იბრძვისო.
ახლაც იგივე ჩაგვიტარეს და ვინც გამოცდილი არ არის, ამას ვერ მიხვდებოდა, მაგრამ ჩვენ იმ თამაშის, რომელიც მოსკოვიდან იგეგმება, უკვე დიდი გამოცდილება გვაქვს. მოსკოვმა ერთი მხარე, შეიძლება ითქვას, გადააგდო.
_ გადაგდებაში რას გულისხმობთ?
_ არ მგონია, რომ კობახიძემ ან ივანიშვილმა საკუთარი თავის წინააღმდეგ იმუშაონ. უბრალოდ, ეგენი გადააგდეს, მოატყუეს და ასეთი ჩასაფრება მოუწყვეს.
_ ამ ვერსიაში შეიძლება, ლოგიკა არის, მაგრამ დეპუტატი ხართ, პოლიტიკურ კულუარებში ჩემზე კარგად ერკვევით და, ალბათ, იმის შესახებაც გექნებათ გაგონილი, „ოცნება“ ცდილობს, ხელისუფლება ბოკერიას გადააბაროსო, ანუ გამოდის, რომ ბოკერიას რენომეს აწევაზე თავად მმართველი გუნდი ზრუნავს?
_ გასაგებია. 2003 წელი ძალიან კარგად მახსოვს და ისიც მახსოვს, ამერიკელები მინისტრებს როგორ აჩერებდნენ _ წვრთნისა და აღჭურვის პროგრამით მთელი ძალოვანი სტრუქტურები ხელში ჩაიგდეს, ანუ ყველა ძალოვან უწყებაში მათი სპეცსამსახურის წარმომადგენელი იჯდა. დღესაც იგივეა და არაფერი შეცვლილა, თან ამერიკელები და რუსები ერთობლივად და ერთმანეთში მოლაპარაკებით მუშაობენ. ამიტომ ვერავინ ხვდება, სად როგორ მოგვატყუებენ.
კარგი საქმე გაკეთდა, რომ მართლმადიდებელ პარლამენტართა საერთაშორისო ასამბლეა ჩატარდა _ საქართველოში 25 ქვეყანა ჩამოვიდა. ახალი არავისთვის არის, რომ მთელ მსოფლიოში გლობალიზაციის მთავარი სამიზნე მართლმადიდებლობაა.
პირველ რიგში, დარტყმა ჯერ მართლმადიდებლობაზე მიიტანეს.
მეორეც, ქართველები და რუსები ერთმანეთთან ძალიან ახლოს მივედით _ რუსეთიდან ბევრი ტურისტი ჩამოდის. რაც ყველაზე მეტად მსოფლიო მმართველებს აწუხებთ, ეს სახალხო დიპლომატიაა. ალბათ, გახსოვთ, სახალხო დიპლომატიამ აფხაზეთსა და იგივე სამაჩაბლოში რასაც მიაღწია _ თითქმის შევრიგდით. იგივე მიდიოდა ახლა რუსებთანაც. ტელევიზიები კი ამბობენ, რომ ქართველებს რუსები თითქოს სძულთ, მაგრამ უკან დაბრუნებულმა რუსმა ტურისტებმა სიმართლე ჩაიტანეს და რუსები ჩვენკენ შემოტრიალდნენ. ყველაფერი, აი, ამის გათიშვასაც ემსახურებოდა.
მოკლედ, შეიძლება ითქვას, რომ ჩვენი მოწინააღმდეგეები ძალიან ბევრ კურდღელს იჭერენ. ეს არის და ეს.
_ შეიძლება, მაგრამ კითხვაზე არ მიპასუხეთ, ამიტომ ჩაგეკითხებით, ბატონო ემზარ: „გავრილოვის კრიზისი“ ბოკერიასა და „ოცნების“ საერთო ინტერესი ხომ არ იყო?
_ დიახ, ეს ჩანს, რადგან ოპოზიციაც და ხელისუფლებაც ერთი და იგივე ხელით იმართება.
_ დავუშვათ, ასეა, მაგრამ „ოცნებას“ რაში აწყობს, რომ ხელისუფლება მაინცდამაინც ბოკერიას გუნდს გადააბაროს?
_ ეს „ოცნებას“ არ უნდა აწყობდეს, მაგრამ ამას უცხო ქვეყნის სპეცსამსახურები აკეთებენ.
_ უცხო ქვეყნის სპეცსამსახურებში რუსულ სპეცსამსახურებს გულისხმობთ?
_ აბსოლუტურად!
_ ე. ი., ამ თამაშიდან „ნაციონალური მოძრაობა“, ანუ მიხეილ სააკაშვილი გათიშულია?
_ იცით, სააკაშვილი როგორი მომენტია?
_ როგორი?
_ იგორა გიორგაძე ხომ გახსოვთ?
_ დიახ, მახსოვს.
_ იგორა გიორგაძე ახლა სააკაშვილით ჩაანაცვლეს. ადრე ამბობდნენ, აი, იგორა მოდის, იგორა ისა, იგორა ესაო და სააკაშვილზეც ახლაც იგივე ხდება, მაგრამ სააკაშვილს თუ მოიყვანენ, მხოლოდ აჭარაში და ამით აჭარას ჩაკეტავენ.
_ აჭარის ჩაკეტვა, ანუ იქ სააკაშვილის მოყვანა რუსეთის ინტერესში რატომ არის?
_ იმიტომ არის, რომ მერე სააკაშვილმა იყვიროს, აი, აჭარა გავათავისუფლე და აწი, დანარჩენ საქართველოსაც გავათავისუფლებო. ამის საშიშროება არსებობს, თორემ ის, რომ სააკაშვილი მთელ საქართველოში მოიყვანონ, სისულელეა!
თავის დროზე, სააკაშვილს მოტყუებული ხალხისგან 97-პროცენტიანი რეიტინგი ჰქონდა, მაგრამ წარმოიდგინეთ, ეს რეიტინგი უცებ, ერთ წელიწადში უკვე ნულზე იყო.
მოკლედ, მაგის მოყვანას არავინ ფიქრობს და ახლა იმაზე მიდის ლაპარაკი, რომ ბოკერიას „კამანდა“ გააძლიერონ! მელიას გამოყენებაც ამისთვის უნდოდათ, მაგრამ, მგონი, ვერ გამოიყენეს.
_ ისე, აჭარა ახსენეთ და ჩემდაუნებურად გამახსენდა _ თუ არ ვცდები, საპრეზიდენტო არჩევნების დროს სააკაშვილმა აჭარაში ალტერნატიული მთავრობა შექმნა. თქვენი განცხადებებით ამაზე მიანიშნებთ?
_ კი ბატონო.
_ ერთი სიტყვით, თქვენი ლოგიკით, „ნაციონალური მოძრაობა“ და, შესაბამისად, გაერთიანებული ოპოზიცია ბოკერიასთვის მიუღებელია?
_ იცით, აქ მთავარი რა არის?
_ რა?
_ უცხო ქვეყნის სპეცსამსახურებს ის ქართველები აწყობთ, რომლებიც სამშობლოს იოლად ყიდიან, თორემ, აბა, „პატრიოტებთან“ საქმეს არ დაიჭერენ.
_ ბატონო ემზარ, ამ თემაზე საუბარს არ ვაპირებდი, მაგრამ „გავრილოვის ღამის“ შემდეგ რუსულმა მედიამ ინფორმაცია გაავრცელა, რომ თქვენი პარტია შესაძლოა, მოსკოვში გამგზავრებულიყო, სადაც კონფერენციას დაესწრებოდა.
_ ეს ივლისის პირველ რიცხვებში იყო დაგეგმილი, მაგრამ ჩაიშალა. ყველაფერი ეს ამისთვისაც იყო გაკეთებული.
_ ანუ?
_ რუსებთან შეხვედრებზე „პატრიოტებმა“ ვიმუშავეთ, ამასთან, კარასინ-აბაშიძის ფორმატი, თან სახალხო დიპლომატია და ყველაფერმა ამან ქართველებსა და რუსებს შორის სიტუაცია დაათბო.
სხვათა შორის, აფხაზებთან ერთი-ერთზე უნდა გვქონოდა შეხვედრა, ასევე ოსებთანაც, მაგრამ ახლა გალიდან ბავშვები ვეღარ გადმოდიან, ეროვნული გამოცდები რომ ჩააბარონ. ის თვითმფრინავები კი, რომელიც მოსკოვში თბილისიდან დაფრინავდნენ, ახლა ერევნიდან იფრენენ და ამისთვის სომხები მადლობს ეუბნებიან, ანუ ყველაფერი წაგვართვეს და ყველაფერი, რაც რუსეთთან მიმართებით ნაშრომი იყო, წყალში ჩაყარეს.
ვითომ მებრძოლი ხალხი გავრილოვს შეუვარდა და გააპროტესტა, მაგრამ ტელევიზიები ჩემს პროტესტს არ აჩვენებენ.
_ თქვენ რა გააპროტესტეთ?
_ ერთსაც შევუვარდი და მეორესაც, გავრილოვს ვუთხარი, ყველაფერი თქვენიდან ხდება, ეს თქვენი ხალხი და აგენტურაა-მეთქი. ისიც ვუთხარი, თუ გგონია, რომ „პადსტავკა“ მოსკოვიდან გაგიკეთეს, საქმე კარგად გქონია-მეთქი.
როცა გავრილოვს ველაპარაკებოდი, ერთ-ერთი რუსი დეპუტატი გამომელაპარაკასავით, რომელიც ჟირინოვსკის პარტიის წევრი აღმოჩნდა. ჰოდა, ის გავრილოვმა გააჩუმა, ძალიან საინტერესო რაღაცებს ამბობს და მომასმენინეთო.
მერე, როცა ფაქტები დავუდე, რომ მთელი ეს უბედურება მოსკოვიდან მოდის, გავრილოვმა თავისი რეკვიზიტები მომცა და მითხრა, მინდა, შენთან საუბარი აუცილებლად გავაგრძელო, ყველაფერი, რასაც ამბობთ, ძალიან მაინტერესებსო. ჩემი ნომერიც ჩაიწერა.
_ გავრილოვი, მას შემდეგ, რაც მოსკოვში დაბრუნდა, შეგეხმიანათ?
_ ჯერჯერობით, არა, მაგრამ ფაქტი ის არის, რომ ჩემგან რაღაც ახალი გაიგო.
_ სხვათა შორის, წეღან თქვით, მთელ მსოფლიოში მართლმადიდებლობაზე შეტევა მიმდინარეობსო. შეიძლება, ასეა, მაგრამ გავრილოვი კომუნისტია და კომუნისტი მართლმადიდებელი როგორ წარმოგიდგენიათ?
_ გასაგებია და შემთხვევითი, შეიძლება, არც ეს არის, თან, კი ბატონო, გავრილოვი კომუნისტია, მაგრამ მართლმადიდებლური ქვეყნის პარლამენტის წევრია.
სხვათა შორის, აქამდე ხელმძღვანელი ვინმე პოპოვი ყოფილა, მაგრამ ამ ასამბლეამდე რამდენიმე ხნით ადრე პოპოვი გავრილოვით შეიცვალა. აქაც რაღაც ხდება.
_ შეთქმულების თეორიებში არ წავალ, მაგრამ თქვენი საუბრით თუ ვიმსჯელებთ, თუკი სახელმწიფო გადატრიალება მართლა მზადდებოდა, რომლითაც ხელისუფლება აპელირებს, მაშინ გამოდის, რომ ამ გადატრიალების მცდელობაში მარტო ოპოზიცია კი არა, მთავრობის კონკრეტული ფრთაც მონაწილეობდა, არა?
_ ვფიქრობ, რომ ოპოზიციის ნაწილი, რა თქმა უნდა, ჩარეული და ამისთვის მომზადებული იყო, ხელისუფლება კი შეცდომაში შეიყვანეს.
ისე, ჩვენი უშიშროება, რატომღაც, გაჩუმებულია და ხმას არ იღებს, ანუ ძალიან მკაფიოდ ჩანს, რომ ამ საქმეში უშიშროება ურევია.
ამასაც თავი რომ დავანებოთ, გადატრიალების მცდელობაში მარტო მელიაზე იყო საუბარი, მაგრამ ეს უნამუსობა და უსამართლობაა.
ისე, ამ გადატრიალებას ჟურნალისტებიც უწყობენ ხელს. ყოველ შემთხვევაში, ყველაფერს აკეთებენ, რომ ხალხის მობილიზება მოახდინონ და აბსოლუტურად ყველაფერს პირდაპირ აშუქებენ.
_ ბატონო ემზარ, მე და ჩემი კოლეგები იმას ვაშუქებთ, რაც ხდება!
_ რა თქმა უნდა, ჟურნალისტები ხართ და უნდა გააშუქოთ, მაგრამ მარტო ამათ რომ აშუქებთ და სხვებს _ არა? აი, „პატრიოტებს“ ზუგდიდში იმხელა მიტინგი გვქონდა, მაგრამ პირდაპირ ეთერში კი არა, ჩანაწერითაც არ გააშუქეს და იმასაც ცდილობენ, რომ დააკნინონ. აი, ჯიბის ტელევიზიების მიერ ასეთი მიკერძოება არ უნდა იყოს _ მხოლოდ სააკაშვილი, ოპოზიცია და სხვა ყველა დანარჩენი იგნორირებულია.
_ თავისი ტელევიზია „პატრიოტებსაც“ აქვს.
_ გასაგებია, მაგრამ ეს იმ სიმძლავრის ტელევიზია არ არის, როგორიც, მაგალითად, „იმედი“ ან „რუსთავი 2“-ია.
_ ყველა მედიასაშუალებას აქვს უფლება, თავისი სარედაქციო პოლიტიკა ჰქონდეს, თუმცა ამაზე საუბარი შორს წაგვიყვანს და, მოდით, მითხარით, დღეს ქვეყანაში პოლიტიკური კრიზისია თუ არა?
_ ეს პოლიტიკური კრიზისია, მით უმეტეს, როცა ასეთ პროვოკაციას მოგიწყობენ და ჯოხი ქვეყნის მეორე პირზე ტყდება, მაგრამ მაინც არ ჩერდება, ისევ გრძელდება და შს მინისტრის გადადგომას ითხოვენ, რომელიც აბსოლუტურად კორექტულად მოიქცა. სხვათა შორის, 30 კაცი მოპარეს.
_ ვის?
_ იმ დღეს პოლიციის წინა ხაზიდან 30 პოლიციელი მოიპარეს. პოლიცია ვალდებული იყო, რომ ერთი კაცის მოპარვის შემდეგ იერიშზე გადასულიყო, მაგრამ არ გადავიდა და წარმოიდგინეთ, ხალხთან რამხელა დათმობაზე წავიდა.
ჰოდა, დესტრუქციული ძალები მაინც იმ ადამიანის გადადგომას ითხოვენ, რომელმაც ყველაფერი ეს ასე კაცთმოყვარეობით ჩაატარა. ამ სიტუაციიდან გამომდინარე, მაგის გადადგომა სამართლიანი არ იქნება.
_ ხომ არ გეჩვენებათ, რომ გახარიას „ოცნებაშივე“ ებრძვიან?
_ სხვათა შორის, გამორიცხული არ არის, რომ გახარიას შიგნით „ოცნებაშიც“ ებრძოდნენ.
_ ყველაფერი, რაც ახლა ხდება, რით დამთავრდება, თქვენი პროგნოზი როგორია, ბატონო ემზარ?
_ თუ ჩვენ ერი, ხალხი, მოქალაქეები ვართ და ჩვენი ქვეყნის ღირსება და პატივისცემა გვაქვს, ყველა ქუჩაში უნდა გამოვიდეთ და ვაჩვენოთ, რომ საქართველოს მოქალაქეები მარტო ეს დესტრუქციული ძალები არ არიან.
_ „ოცნებამ“ საკუთარ მხარდამჭერებს მოუწოდა, კონტრაქცია საჭირო არ არისო.
_ კონტრაქცია საჭირო იმიტომ არ არის, რომ საქმე ისე მიჰყავთ, როგორც უნდათ, მაგრამ ეს სისულელეა და ხალხი, ბოლოს და ბოლოს, ქუჩაში გამოვა.
_ აქციას კონტრაქცია რომ დაუპირისპირდება, ამით საქმე სამოქალაქო დაპირისპირებამდე ხომ არ მივა?
_ არანაირი სამოქალაქო დაპირისპირება არ იქნება. ამ ხმას ის დესტრუქციული ძალები ავრცელებენ, რომლებსაც უნდათ, რომ გამარჯვებას მიაღწიონ!
სხვათა შორის, აქციაზე ვიყავი და კამათიც კი არავისთან მომსვლია. ვერის ბაღში შეკრებილებსაც ვუთხარი, წავიდეთ და ძალადობა ორივე მხარეს გავაპროტესტოთ და არაფერი მოხდება-მეთქი.
_ ბატონო ემზარ, როგორ ფიქრობთ, გარკვეული დროის შემდეგ ივანიშვილი შს მინისტრს მაინც ხომ არ გადააყენებს?
_ ეს თავად გახარიას ხასიათზეა დამოკიდებული. თუ ვაჟკაცია, ბოლომდე ვაჟკაცურად უნდა მოიქცეს და მარტო თავისი კი არა, მათი სამართლიანობაც უნდა დაიცვას, ვისაც მისი გვჯერა.
სხვათა შორის, შს ერთი მინისტრიც კი არ მახსენდება, ამხელა მხარდაჭერა რომ ჰქონოდა. ეს გახარიამ სათავისოდ უნდა გამოიყენოს.
_ თუ აქციები გაგრძელდება, საქმე ვადამდელ არჩევნებამდე მივა?
_ თუ აქციები გაგრძელდა, მთელი თბილისი ქუჩაში სწორედ ამ დროს უნდა გამოვიდეს! ძალიან ბევრი მირეკავს, რომ მაგათი საწინააღმდეგო გამოსვლა სწყურია.
რაც შეეხება ვადამდელს, თუ მას, ვინც ეს სიტუაცია დაგეგმა, გეგმაში აქვს, რომ ვადამდელი ჩატარდეს, მაშინ ჩატარდება! ჩატარდეს, რა უჭირს? _ ჩვენ ამისთვის მზად ისე ვართ, როგორც არასდროს!

გიორგი აბაშიძე