საქართველოს პრეზიდენტი მორიგ სკანდალში გაეხვია. საუბარი იმაზეა, რომ სალომე ზურაბიშვილმა „ამერიკის ხმასთან“ ინტერვიუში ჩვენი მთავარი მოკავშირის წინააღმდეგ ღიად გაილაშქრა და განაცხადა, _ არ მგონია, საქართველოში ამერიკული ბაზის აშენება რეკომენდირებული იყოსო.
სწორედ ამ განცხადების გამო ოპოზიცია არ გამორიცხავს, რომ დღის წესრიგში ზურაბიშვილის იმპიჩმენტის საკითხი დადგეს.
მეტიც: „ევროპელი დემოკრატების“ ლიდერი, პაატა დავითაია „ქრონიკა+“-თან საუბრისას იმასაც ვარაუდობს, რომ ზურაბიშვილის იმპიჩმენტს შესაძლოა, ქართულმა „ოცნებამაც“ დაუჭიროს მხარი.
ამასთან, დავითაია ვადამდელი საპარლამენტო არჩევნების დანიშვნის ალბათობასაც უშვებს.

მაშ, ასე: როგორი პოლიტიკური ზაფხული იქნება საქართველოში და რატომ უქმნის სალომე ზურაბიშვილი მმართველ გუნდს პრობლემებს? _ „ქრონიკა+“ პაატა დავითაიას ინტერვიუს წარმოგიდგენთ:

_ ბატონო პაატა, ჩვენი დღევანდელი საუბრის თემა სალომე ზურაბიშვილის მიერ „ამერიკის ხმისთვის“ მიცემული სკანდალური ინტერვიუა, სადაც მან თქვა, რომ საქართველოში ამერიკული სამხედრო ბაზის აშენება რეკომენდებული არ არის. თქვენი აზრით და შეფასებით, პრეზიდენტმა ამ განცხადებით მინიშნება რაზე გააკეთა?
_ პირდაპირ ვთქვათ, რომ ამ საკითხს ორი _ პოლიტიკური და სამართლებრივი _ მხარე აქვს. სამართლებრივი მხრიდან გამომდინარე, სალომე ზურაბიშვილს ბერკეტი არ გააჩნია, რომ ასეთი განცხადებები გააკეთოს.
_ რატომ არ გააჩნია?
_ იმიტომ, რომ ასეთი განცხადებები საქართველოს კონსტიტუციასთან წინააღმდეგობაში მოდის, ანუ ამ საკითხის განსაზღვრა პრეზიდენტის პრეროგატივა არ არის. საამისოდ საქართველოს მთავრობა და პარლამენტი არსებობს. შესაბამისად, ქალბატონმა სალომემ თავის უფლებამოსილებას გადაამეტა, რადგან ეს საკითხი, ჯერ ერთი, ერთპიროვნულად არ წყდება, მეორეც, პრეზიდენტი ეროვნული უსაფრთხოების საბჭოს წევრიც კი არ არის.
_ დიახ, სამაგიეროდ, პრეზიდენტი ქვეყნის უმაღლესი მთავარსარდალია.
_ კი ბატონო, მაგრამ პრეზიდენტი უმაღლესი მთავარსარდალი საომარი მოქმედებების დროს არის და ამ სიტუაციაზე კონსტიტუციაში საინტერესო ჩანაწერია, რომლის თანახმადაც, თავდაცვის მინისტრი პრემიერს ემორჩილება. ახლა ამ თემას არ ჩავეძიები, მაგრამ პრეზიდენტი ასეთ დროსაც კი შეზღუდულია და ეს ჩვენი კონსტიტუციის პრობლემაა. ზოგადად, ის ცვლილებები, რაც კონსტიტუციაში შეიტანეს, სასაცილოა.
ასეა თუ ისე, სალომე ზურაბიშვილს კარგად უნდა ესმოდეს, რომ მის პოლიტიკურ განცხადებებს ოკუპანტი ქვეყანა ძალიან კარგად იყენებს და ამასთან, თავისი განცხადებებით პარტნიორ ქვეყანასთან ურთიერთობას ძაბავს. ამიტომაც ხაზსგასმით აღვნიშნავ, რომ ამ დღეებში მთელი რუსული მედია ზურაბიშვილის განცხადებებით იყო აჭრელებული. ეს განცხადება ერთი-ერთზე ემთხვევა იმას, რასაც რუსეთი წლებია, საქართველოს ნებისმიერ მთავრობას სთხოვს, რომ ნატოსკენ სწრაფვა შეწყვიტოს.
მოკლედ, ამ განცხადებით სალომე ზურაბიშვილმა ქართულ სახელმწიფოს ზიანი მიაყენა. არადა, დღევანდელ კონსტიტუციაშიც პირდაპირ წერია, რომ საქართველო ევროკავშირისა და ნატოსკენ ისწრაფის. ამიტომ ზურაბიშვილი იმ გარდამავალ დებულებებთანაც, სადაც საქართველოს დასავლურ მისწრაფებებზეა საუბარი, წინააღმდეგობაში მოვიდა.
_ ზოგი მიიჩნევს, რომ ზურაბიშვილს ამერიკული ბაზების საწინააღმდეგო არაფერი აქვს, უბრალოდ, ქართულად იმას, რასაც ფიქრობს, კარგად ვერ ამბობს. ამასთან, ისიც ითქვა, რომ არც ინგლისური ეხერხება და მისი ნათქვამი სხვანაირად ამიტომ იქნა აღქმული. ამ ვერსიას გამორიცხავთ?
_ ეს ისეთი განცხადებაა, რომლის კონტექსტშიც ქართულის ან ინგლისურის კარგად არცოდნა ვერ ჯდება. მან ამ თემას მიზანმიმართულად მიაყენა დარტყმა!
სხვათა შორის, ბოლო დღეებში გავრცელდა ინფორმაცია, რომ ზურაბიშვილს აშშ-ში ვიზიტთან დაკავშირებით პრობლემები შეექმნა.
_ დიახ, ამის შესახებ პირველად ინფორმაცია „ქრონიკა+“-ის მთავარმა რედაქტორმა, ელისო კილაძემ, სოციალური ქსელით გაავრცელა, თუმცა საგარეო საქმეთა სამინისტრომ თავი გაიგიჟა, მსგავსი არაფერი ყოფილა, ვიზიტზე მუშაობა მიმდინარეობსო.
_ საგარეო საქმეთა სამინისტრო, ცხადია, არ დაადასტურებს, რომ საქართველოს პრეზიდენტს აშშ-ში ვიზიტთან დაკავშირებით პრობლემა აქვს. სხვათა შორის, არც აშშ-ს მხარე დაადასტურებს, რომ ზურაბიშვილს ვიზიტზე უარი უთხრა, მაგრამ სიმართლე ვთქვათ: საქართველოს ყველა პრეზიდენტის პირველი ვიზიტი, შევარდნაძიდან დაწყებული, ყოველთვის აშშ-ში იმართებოდა. ზურაბიშვილი კი ურთიერთობას ბრიუსელს იქით ვერ გასცდა და ამდენი ხნის განმავლობაში აშშ-მა არ მიიღო.
ეს „არმიღება“ პიროვნული ფაქტორი არ არის.
_ აბა, რა არის?
_ ეს ზურაბიშვილის, როგორც პრეზიდენტის ლეგიტიმაციასთან დაკავშირებით პირდაპირ პოლიტიკური განაცხადია! აშშ-ის სახელმწიფო დეპარტამენტის განცხადება საპრეზიდენტო არჩევნებთან დაკავშირებით, პრაქტიკულად, ბრალის წაყენებაა, ანუ თუ გინდა, ადამიანს არჩევნების გაყალბებაში ბრალი წაუყენო, შეგიძლია, ეს განცხადება „კოპი ფეისთით“ გადაიტანო.
მოკლედ, როცა აშშ-ის სახელმწიფო დეპარტამენტი ასეთ განცხადებას აკეთებს, ეს იმას ნიშნავს, რომ არჩევნებში გამარჯვებული პრეზიდენტის ლეგიტიმაცია ძალიან დაბალია! აშშ-ში ვიზიტის პრობლემა ამიტომაც შეექმნა, ამაზე გაბრაზდა და ამერიკულ ბაზებთან დაკავშირებით ზემოხსენებული განცხადებაც, ვფქირობ, ამიტომ გააკეთა. ზოგადად, ზურაბიშვილს ასეთი ექსცენტრიკული გამოხტომები ახასიათებს.
_ ექსცენტრიკულობა გასაგებია, მაგრამ ზურაბიშვილი, ვინმეს მოსწონს თუ არა, ფრანგი დიპლომატია. ფრანგული დიპლომატია კი აშშ-ს, მაინცდამაინც, არ უყვარს. შესაბამისად, რატომ უნდა გამოვრიცხოთ, რომ ამერიკულ ბაზებზე ზურაბიშვილმა განცხადება გაბრაზებულმა კი არა, შეგნებულად გააკეთა და, პარალელურად, „ოცნების“ განწყობაც დატესტა, თუ როგორ მიიღებდა საზოგადოება აშშ-სთვის ზურგის შექცევას? სხვათა შორის, აქვე აღვნიშნავ, რომ კალაძე ზურაბიშვილს გაემიჯნა, ეგ „ოცნება“ არ არისო.
_ თქვენს კითხვას, რა თქმა უნდა, აბსოლუტური ლეგიტიმაცია აქვს და ზურაბიშვილის ფრანგი დიპლომატობა შესაძლოა, ამ განცხადების ერთ-ერთი კომპონენტი იყოს, მაგრამ ამ განცხადებით ზურაბიშვილმა „ქართულ ოცნებასა“ და, საერთოდ, საქართველოს მთავრობას მიაყენა ზიანი! მართალია, მთავრობის ქმედებები სხვანაირია, მაგრამ ღიად დეკლარირებს, რომ ნატოსა და ევროკავშირისკენ მიდის. აქედან გამომდინარე, ზურაბიშვილმა თავისი განცხადებით „ოცნება“ ძალიან უხერხულ მდგომარეობაში ჩააგდო და „ოცნებამ“ მისგან გამიჯვნა ამიტომაც დაიწყო, რაც სწორი ტაქტიკაა. სხვა საკითხია, ამ ქალზე, როგორც პრეზიდენტობის კანდიდატზე, „ოცნებამ“, თავის დროზე, არჩევანი რატომ გააკეთა, მაგრამ ფაქტია, რომ მისი განცხადებები მმართველი გუნდისთვის, ამ ეტაპზე, დამაზიანებელია.
_ ზურაბიშვილის ანტიამერიკულ განცხადებას მთელი მმართველი გუნდი კი არა, მხოლოდ თბილისის მერი, კახა კალაძე გაემიჯნა.
_ კალაძე „ოცნებაში“ ხელწამოსაკრავი ფიგურა არ არის.
პარალელურად, გვესმის, რომ ბიძინა ივანიშვილსა და სალომე ზურაბიშვილს შორის დაპირისპირებაა, რაც ქუჩაში მიცემული ინტერვიუთი ზურაბიშვილმა, პრაქტიკულად, დაადასტურა, რომ მძიმე პრობლემები არსებობს.
ისიც ვთქვათ, რომ „ოცნებიდან“ სალომე ზურაბიშვილის დაცვა საკუთარ თავზე არავის აუღია. ზოგადად, საუბარი მარტო ამერიკულ ბაზებთან გაკეთებულ განცხადებაზე არ არის.
_ აბა, კიდევ რაზეა?
_ გავიხსენოთ იგივე ტრამპის „ტვიტერის“ სტატუსის გაზიარება.
_ ბატონო პაატა, წეღან თქვით, ამერიკული ბაზების საწინააღმდეგო განცხადებით ზურაბიშვილმა თეთრ სახლზე შური იძია, რადგან აშშ-ში ვიზიტზე უარი უთხრაო, მაგრამ თუ ასეა, მაშინ საინტერესოა, ტრამპის „ტვიტერის“ პოსტი რატომ გააზიარა? განა, არ შეიძლება, ისე ვიფიქროთ, რომ ამით ზურაბიშვილმა ტრამპს კოჭი გაუგორა?
_ არა, კოჭს ვერ გაუგორებდა და ეს მარტივი ასახსნელია: მნიშვნელობა არ აქვს, აშშ-ში პრეზიდენტი დემოკრატი იქნება თუ რესპუბლიკელი, რადგან აშშ ინსტიტუტების ქვეყანაა, რომელიც საქართველოს პარტნიორად განიხილავს. მოკლედ, იმის თქმა მინდა, რომ ორივე ამერიკული პოლიტიკური ძალა ჩვენი მოკავშირეა და როცა ერთ-ერთი პოლიტიკური ძალის პრეზიდენტობის რეალურ კანდიდატს ასეთ შეურაცხყოფას აყენებ, ეს ჩვენი ქვეყნის იმიჯს ლახავს. დიახ, ყველაფერ ამით აშშ კი არა, ჩვენ დავზიანდით!
_ თუ ასეა, ზურაბიშვილი მსგავს რაღაცებს რატომ აკეთებს?
_ აი, სოწრედ აქ არის კითხვის ნიშნები. როგორც ჩანს, ეს ქალბატონი ერთობა, მაგრამ ამ გართობით ქვეყანას ზიანს აყენებს და პირდაპირ რუსეთის ინტერესებზე ასხამს წყალს! თუ ასე გააგრძელა, ზურაბიშვილის მიმართ იმპიჩმენტის პროცედურა სერიოზულად ამუშავდება და, დარწმუნებული ვარ, „ოცნების“ მხრიდანაც!
_ ანუ ვარაუდობთ, რომ ზურაბიშვილის იმპიჩმენტს „ოცნებაც“ დაუჭერს მხარს?
_ დიახ, არ გამოვრიცხავ! ისე, საქმე შეიძლება, იმპიჩმენტამდეც კი არ მივიდეს და საზოგადოება ქუჩაში გამოვიდეს და პრეზიდენტს ე. წ. სახალხო იმპიჩმენტი მოუწყოს!
სხვათა შორის, „ოცნებაში“ ბევრს ვიცნობ, ვიცი, რა საუბრებიც მიდის და ამ ქალბატონს მმართველ პარტიასთანაც პრობლემა აქვს!
_ ბატონო პაატა, ცნობილია, რომ დასავლეთის პოლიტიკურ და დიპლომატიურ წრეებთან მჭიდრო კონტაქტები გაქვთ. ევროპული პოლიტელიტა ზურაბიშვილზე რას ამბობს?
_ იმ უფლებამოსილებიდან გამომდინარე, რაც საქართველოს პრეზიდენტს აქვს, ზურაბიშვილს სერიოზულ პოლიტიკურ ფიგურად არ აღიქვამენ! დასავლეთის ყველა იმ ჩინოვნიკმა და პოლიტიკურმა ლიდერმა, ვინც საქართველოზე მუშაობს, იცის, რომ ჩვენი ქვეყნის რეალური მმართველი ბიძინა ივანიშვილია! ამიტომ მათ პრემიერის, პრეზიდენტისა და პარლამენტის თავმჯდომარის კი არა, ივანიშვილის აზრი აინტერესებთ.
პირდაპირ გეტყვით: დასავლეთის წარმომადგენლებს ივანიშვილთნ კომუნიკაცია აქვთ _ საჯარო შეხვედრების გარდა, არსებობს არასაჯარო შეხვედრებიც.
_ ამ არასაჯარო შეხვედრებზე ევროპელები ივანიშვილს რაზე ესაუბრებიან?
_ დეტალები არ ვიცი, მაგრამ ვიმეორებ: მას ისე ელაპარაკებიან, როგორც ქვეყნის მმართველს. ვინაობას ვერ დავასახელებ, მაგრამ ყველა უცხოელთან, ვისთანაც ურთიერთობა მაქვს, თუ პრემიერს ან პრეზიდენტს ვახსენებ, ეცინება.
_ აქედან გამომდინარე, დასავლეთში არ უშვებენ, რომ ზურაბიშვილი, უბრალოდ, ივანიშვილის იდეებს ახმოვანებს?
_ ასეთ დეტალებში ვერ შევალ, რადგან იგივე ამერიკულ ბაზებზე განცხადება ზურაბიშვილმა ახლახან გააკეთა და უცხოელებთან პირადი კომუნიკაცია არ მქონია, მაგრამ ფაქტია: ზურაბიშვილის განცხადებებს რუსეთის ფედერაცია სათავისოდ იყენებს და ამას დასავლეთშიც ხედავენ! შესაბამისად, დასავლეთში კითხვები აღარც აქვთ, ზურაბიშვილის განცხადებების უკან ვინმე დგას თუ არა. მათ იციან, რომ საქართველოს პრეზიდენტს პოლიტიკური ლეგიტიმაცია არ გააჩნია და მისი უფლებამოსილება გაურკვეველია!
ისე, დარწმუნებული ვარ, რომ ნატოსთან დაკავშირებით ჩვენი პარტნიორები პირადად ჰკითხავდნენ. სასამართლო ხელისუფლება რომ ავიღოთ, აშშ-ის ელჩის მოვალეობის შემსრულებელმა ღიად განაცხადა, ხელისუფლება, სამწუხაროდ, სასამართლო რეფორმასთან დაკავშირებით არ გვისმენსო.
_ ნიშანდობლივია, რომ პრეზიდენტმა ზურაბიშვილმა საერთო სასამართლოების კანონს ვეტო არ დაადო.
_ ცალსახად ჩანდა, რომ ზურაბიშვილი ამ კანონს ვეტოს არ დაადებდა…
მოკლედ, ჟურნალისტი ხართ და ძალიან კარგად გესმით, რას ნიშნავს, როცა აშშ-ის ელჩის მოვალეობის შემსრულებელი ამბობს, ხელისუფლება არ გვისმენსო.
_ მე შეიძლება, მესმის, მაგრამ მაინც განვმარტოთ, ამერიკელი დიპლომატის ეს განცხადება რაზე მიანიშნებს?
_ ძნელი წარმოსადგენი არ არის, კულუარებში რა ხდება!
_ გასაგებია, მაგრამ იმაზე ვისაუბროთ, თუ ზურაბიშვილის იმპიჩმენტს, ღიად თუ ირიბად, თავად „ოცნება“ მოითხოვს, ასეთ დროს პოლიტიკური ვითარება რა კუთხით შეიცვლება?
_ ვიმეორებ, თუ ასე გააგრძელა, ზურაბიშვილს პრობლემები აუცილებლად შეექმნება! იმას არ ვამბობ, რომ მას იმპიჩმენტს, მაინცდამაინც, „ქართული ოცნება“ მოუწყობს, მაგრამ არც ეს არის გამორიცხული!
ზურაბიშვილის იმპიჩმენტის საკითხი პრობლემა ისევ „ოცნებისთვის“ იქნება, რადგან ზურაბიშვილი მისი კანდიდატი იყო და ახლა მხარდამჭერებს რამე უნდა უთხრას.
_ გეთანხმებით, რომ ზურაბიშვილის გამო „ოცნებას“ პრობლემები საკუთარ მხარდამჭერებთანაც ექნება, მაგრამ სხვა რამეს ვკითხულობ, ანუ თუ დღის წესრიგში პრეზიდენტის იმპიჩმენტი დადგება, ეს ზოგად პოლიტიკურ ვითარებაზე რა გავლენას მოახდენს?
_ რაც უფრო დიდხანს იქნება პრეზიდენტი სალომე ზურაბიშვილი, პოლიტიკურ ვითარებას მეტად დაამძიმებს! მისი იმპიჩმენტი კი პოლიტიკური სიტუაციის გაჯანსაღებას გამოიწვევს _ მაგალითად, დაინიშნება ახალი არჩევნები, ასევე იქნება სხვა მოქმედებები.
_ გამორიცხულია, რომ ზურაბიშვილის იმპიჩმენტის მერე „ოცნებამ“ პრეზიდენტის პოსტი ოპოზიციას დაუთმოს?
_ უახლოეს მომავალში პრეზიდენტის იმპიჩმენტს ვერ ვხედავ, რადგან საპარლამენტო არჩევნები მოდის და მთელი აქცენტი ამაზე გაკეთდება.
ზოგადად, არ მგონია, რომ ქართულ პოლიტიკაში ვინმემ ვინმეს რამე დაუთმოს, მაგრამ იგივე ზურაბიშვილის გამო „ოცნება“ ძალიან მძიმე მდგომარეობაშია. ამას გარდა, უმრავლესობა, პრაქტიკულად, იშლება…
_ სხვათა შორის, ამ დღეებში საინფორმაციო სააგენტო „თაიმერმა“ ინფორმაცია გაავრცელა, რომ ივანიშვილი თითქოს ვადამდელი საპარლამენტო არჩევნების ჩატარებას დასთანხმდა.
_ პირადად მე ვადამდელი საპარლამენტო არჩევნების ძალიან დიდ ალბათობას ვუშვებ.
_ თქვენ კი უშვებთ, მაგრამ ვადამდელი არჩევნები პრეზიდენტმა უნდა დანიშნოს და თუ „ოცნებასთან“ დაძაბული ურთიერთობა აქვს, ზურაბიშვილი მის ნარატივს რატომ გაატარებს?
_ გასაგებია, მაგრამ ზურაბიშვილმა „ოცნებას“ სასამართლოს კანონზე მოუწერა ხელი და ვადამდელ საპარლამენტო არჩევნებს რატომ არ დანიშნავს? ზურაბიშვილი იმას გააკეთებს, რასაც ეტყვიან!
_ ვადამდელის საბაბი შესაძლოა, ბიუჯეტის ჩავარდნა გახდეს, მაგრამ 2019 წლის ბიუჯეტი დამტკიცებულია. ასე რომ, ვადამდელი რის საფუძველზე დაინიშნება?
_ კონსტიტუციური საბაბი ბევრი არსებობს, მაგრამ თუ ვადამდელი არჩევნების თემა დადგა, მგონია, რომ ამ კონსტიტუციურ საბაბს არავინ გამოიყენებს და ყველაფერი სხვანაირად იქნება.
_ მაინც, როგორ?
_ ვთქვათ, უმრავლესობა პარლამენტში არ მივა, ამით კრიზისს გამოიწვევს და ღიად იტყვის, ვადამდელი საპარლამენტო არჩევნები მინდაო.
_ ე. ი., ვარაუდობთ, რომ, დიდი ალბათობით, შემოდგომაზე ვადამდელი საპარლამენტო არჩევნები ჩატარდება?
_ დიახ. ვადამდელი არჩევნების ამბავი, ჩემი ვარაუდით, ივნისში გაჟღერდება.
_ მანამდე ზურაბიშვილს ვადამდელის დანიშვნის უფლება არც აქვს, ანუ კონსტიტუციით, პრეზიდენტს არჩევნების დანიშვნა მხოლოდ ინაუგურაციიდან ექვსი თვის შემდეგ შეუძლია.
_ დიახ, ასეა.
ზოგადად, „ქართულ ოცნებას“ ვადამდელი არჩევნები აწყობს.
_ რატომ აწყობს?
_ იმიტომ, რომ ვადამდელ არჩევნებს ძველი კანონით, ე. ი., მაჟორიტარული და პროპორციული სისტემით ჩაატარებს. ამასთან, „ოცნებას“ ფინანსური და ადმინისტრაციული წყაროებიც აქვს. ამ რისკზე წასვლა, გაერთიანებული ოპოზიციის გარდა, სხვა ოპოზიციურ ძალას გაუჭირდება.
_ იმას ამბობთ, რომ ვადამდელი საპარლამენტო არჩევნებით „ოცნება“ თავს გადაირჩენს?
_ დიახ, ამის დიდი ალბათობა აქვს. მაჟორიტარობის კანდიდატებად, დარწმუნებული ვარ, „ოცნება“ ბიზნესმენებს დაასახელებს და ისინი ფულს დახარჯავენ.
_ ვადამდელის შემთხვევაში „ოცნება“ პარლამენტში ხომ ისევ უმრავლესობით მოვა?
_ დიახ და ეს ძალიან მძიმე სიტუაცია იქნება, ანუ პარლამენტის ლეგიტიმურობის აღიარება კითხვის ნიშნის ქვეშ დადგება.
ერთი სიტყვით, „ოცნება“ ძალიან მძიმე დღეშია და ამიტომ, მძიმე პოლიტიკური შეტაკება იქნება, თუმცა წეღანდელი თქმისა არ იყოს, ვადამდელი „ოცნების“ გარდა არავის აწყობს!
_ ბატონო პაატა, საუბრის ბოლოს კიდევ ერთ თემას შევეხები: როგორც ცნობილი გახდა, ოფიციალურმა მოსკოვმა ევროსასამართლოს იმ გადაწყვეტილების აღსრულებაზე, რომელიც რუსეთიდან დეპორტირებული ქართველებისთვის ფულადი კომპენსაციის გადახდას ითვალისწინებს, უარი განაცხადა. საქართველოს რა ბერკეტები აქვს, რომ კრემლს აღნიშნული გადაწყვეტილების აღსრულება აიძულოს?
_ ეს თემა ძალიან კარგად ვიცი და გეტყვით, რომ სტრასბურგის ადამიანის უფლებათა სასამართლომ ბევრჯერ გამოიტანა გადაწყვეტილება, რომელიც რუსეთს უნდა აღესრულებინა, მაგრამ რუსეთის საკონსტიტუციო სასამართლომ გადაწყვეტილება გამოიტანა, რომელშიც წერია: თუ ევროპის ადამიანის უფლებათა დაცვის სასამართლოს გადაწყვეტილება რუსეთის ინტერესებსა და კანონმდებლობას ეწინააღმდეგება, მაშინ რუსეთი ვალდებული არ არის, რომ ეს გადაწყვეტილება შეასრულოს.
არშესრულებაზე ბერკეტი ამ საკითხის ევროპის საბჭოს მინისტრთა კაბინეტზე გატანა და განხილვაა.
რაც შეეხება სანქციებს, ეს ხმის მიცემის შეჩერებაა, თუმცა რუსეთს ევროსაბჭოში ხმის მიცემა უკვე შეჩერებული აქვს. ამიტომაც ევროსაბჭოს გადაწყვეტილების არშესრულებით რუსეთი თავისი ქმედებების პოლიტიკური ლეგიტიმაციის გარდა არაფერს კარგავს, ანუ საერთაშორისო ორგანიზაციები კიდევ ერთხელ დარწმუნდებიან, რომ საქართველო მართალია, რუსეთი კი აგრესორია. რუსეთის წინააღმდეგ სხვა ბერკეტი არ ამუშავდება.
_ ე. ი., ამ კონკრეტულ შემთხვევაში საქართველო რუსეთს ვერაფრით დასჯის, არა?
_ ერთადერთი, რაც საქართველოს შეუძლია ისაა, რომ საერთაშორისო არენაზე საკითხი დააყენოს და თქვას, _ აი, რუსეთმა საერთაშორისო სასამართლოსაც გაუკეთა იგნორირებაო, მაგრამ არ მგონია, საქართველოს საგარეო საქმეთა მინისტრი ამაზე წავიდეს, რადგან განცხადებების გაკეთებას მაქსიმალურად არიდებს თავს.
_ რაკი რუსეთზე ვსაუბრობთ, ამ კონტექსტში დავითგარეჯის თემასაც შევეხები, ანუ არსებობს ვერსია, რომ ის, რაც გარეჯაში მოხდა, შესაძლოა, რუსული სპეცსამსახურების, კერძოდ, გრუ-ს დაგეგმილი იყოს. ამაზე რა აზრის ხართ?
_ არ ვიტყვი, რომ ეს სპეცსამსახურების დაგეგმილია. დავითგარეჯის პრობლემა დიდი ხანია, დგას, თუმცა ახლა სიტუაციის პროვოცირება სალომე ზურაბიშვილის ქმედებამ გამოიწვია.
_ ზურაბიშვილი კი, როგორც წეღან აღნიშნეთ, რუსეთის წისქვილზე ასხამს წყალს…
_ დიახ, მაგრამ აქ მხოლოდ ზურაბიშვილზე არ არის ლაპარაკი. გავიხსენოთ ახალქალაქში ყარაბაღის ომის მონაწილის ძეგლის დადგმა, რამაც აზერბაიჯანი სერიოზულად გააღიზიანა, თუმცა მაშინ არაფერი თქვა. დავითგარეჯაში ვითარება ცოტა განეიტრალებული იყო, მაგრამ ზურაბიშვილის განცხადებამ სიტუაცია დაძაბა. ორი აზრი არ არსებობს, რომ გარეჯას არ დავთმობთ, მაგრამ იმას, რაც გასამწვავებელი არ არის, რატომ ვამწვავებთ? დავითგარეჯა ეკლესიისთვისაც ძვირფასია და მის დაკარგვას ასე მარტივად ვერ შეეგუება.
ასეა თუ ისე, როცა ზურაბიშვილი დავითგარეჯაში ვიზიტს გეგმავდა, ამის შესახებ მთავრობა საქმის კურსში უნდა ჩაეყენებინა. თუ საქმის კურსში ჩააყენა და მთავრობამ წინააღმდეგობა არ გაუწია, ეს სხვა პრობლემაა, მაგრამ თუ წინააღმდეგობა გაუწია და ზურაბიშვილი მაინც წავიდა, ეს კიდევ სხვა საკითხია. საერთო ჯამში, ფაქტი ის არის, რომ ეს პრობლემა არსებობს და სერიოზული სამუშაოა ჩასატარებელი, რომ იმ სტატუს კვოს დავუბრუნდეთ, რომელიც ვითარების დაძაბვამდე იყო.
_ ერთი სიტყვით, ბატონო პაატა, ქვეყანა სერიოზული საფრთხეების წინაშე დგას?
_ დიახ, ასეა და ქვეყანა საფრთხეების წინაშე იმიტომ დგას, რომ მთელი მმართველობა ერთ კაცზეა ჩამოკიდებული და პასუხისმგებლობის რეალური ამღები არც პრეზიდენტია, არც _ პრემიერი და არც _ პარლამენტის თავმჯდომარე. ქვეყანაში ინსტიტუტები არ მუშაობს და ესაა მთავარი პრობლემა.

გიორგი აბაშიძე