მთავარი ინტერვიუ თამარ ჩხეიძე: „ოცნების“ ხელისუფლებაში მოსვლა ტრაგიკულად განვიცადე!“

თამარ ჩხეიძე: „ოცნების“ ხელისუფლებაში მოსვლა ტრაგიკულად განვიცადე!“

337
0
გაზიარება

ეჭვი არავის ეპარება, რომ მას შემდეგ, რაც შუალედური არჩევნები დაინიშნა, ქართული პოლიტიკის სიმძიმის ცენტრმა ზუგდიდში გადაინაცვლა. ზოგადად, სამეგრელო ჩვენებური პოლიტიკის მამოძრავებელ ღერძად მიიჩნევა და მით უმეტეს, ახლა, როცა ზუგდიდის მერობისთვის ბრძოლას საქართველოს ყოფილი პირველი ლედი, სანდრა რულოვსი აპირებს.
სხვა საქმეა, ეს ქალბატონი ვის უყვარს და ვის _ არა, ფაქტია, ის წონიანი ფიგურაა და ამიტომ „ოცნება“ უკან არ დაიხევს და ყველაფერს იზამს, რომ ზუგდიდის მერი მისი კანდიდატი გახდეს. ამას ისიც მოწმობს, რომ ჯერ იყო და, მმართველი პარტიის თავმჯდომარემ ზვიად გამსახურდიას გარდაცვალების გამოძიებაზე დაიწყო საუბარი, მერე, _ ხიბულაში, ანუ იმ სოფელში ჩავიდა, სადაც გამსახურდია გარდაიცვალა.

„ილია ჭავჭავაძის საზოგადოების“ თავმჯდომარე, ეროვნული მოძრაობის ძირძველი ლიდერი, თამარ ჩხეიძე, ამბობს, რომ ივანიშვილი რულოვსის წინააღმდეგ სწორედ ზვიადისტური ფაქტორის გამოყენებას აპირებს.
ამას გარდა, ქალბატონი თამარი „ქრონიკა+“-თან საუბრისას არც იმის თქმას ერიდება, რომ ზუგდიდის მერის არჩევნებში ოპოზიციის დამარცხება ერთგვარი რუსული ნარატივია და ამიტომ ხელისუფლება ყველა წითელ ხაზს გადალახავს.
ზოგადად, თამარ ჩხეიძე ზვიად გამსახურდიას ოპოზიციაში იყო და, როგორც ამბობს, სხვებისგან განსხვავებით, პოზიცია დღესაც არ შეუცვლია, მაგრამ მომხრეა, რომ პირველი პრეზიდენტის გარდაცვალების გამოძიება ობიექტურად ჩატარდეს, თუმცა პოლიტიკოს ქალბატონს ეჭვი ეპარება, რომ ის, რაც ივანიშვილმა ამ თემასთან მიმართებით გაახმოვანა, რეალობად იქცევა.

თანაუგრძნობს თუ არა გაერთიანებულ ოპოზიციას? რატომ იყო იმთავითვე „ოცნების“ მიმართ უარყოფითად განწყობილი? როგორ უნდა დააღწიოს საქართველომ თავი რუსეთს და იქნება თუ არა ვადამდელი საპარლამენტო არჩევნები? _ ამ და სხვა თემებზე „ქრონიკა+“ თამარ ჩხეიძეს ესაუბრა.

_ ქალბატონო თამარ, მნიშვნელობა არ აქვს, ვინ მომხრე იყო და ვინ _ მოწინააღმდეგე. ფაქტია, რომ 26 წელია, ზვიად გამსახურდიას გარდაცვალების გამოძიებას საშველი არ დაადგა. არადა, უნდა ვიცოდეთ, საქართველოს პირველ პრეზიდენტს რეალურად რა დაემართა. ამ საქმის ობიექტური გამოძიება ქართულ პოლიტიკურ დღის წესრიგს შეცვლის?
_ ამაში დარწმუნებული არ ვარ.
_ ამბობენ, რომ იმ ადამიანების ნაწილი, რომელიც გამსახურდიას, მინიმუმ, დევნის ოპერაციაში მონაწილეობდა, დღესაც პოლიტიკაშია. შესაბამისად, ობიექტური გამოძიების შემთხვევაში, ეს ხალხი, სულ მცირე, უხერხულად არ გრძნობს თავს?
_ თუ ამ გაგებით ამბობთ, მაშინ უშუალოდ ის ადამიანი ცოცხალი აღარ არის, თუმცა მისი გუნდიდან ხელისუფლებაში, რა თქმა უნდა, ბევრია, მაგრამ საიდუმლო არავისთვისაა, რომ ამ ხელისუფლების მთავარი ფაქტორი ივანიშვილია _ მხოლოდ ეს კაცია გადამწყვეტი და სერიოზულ როლს სხვა არავინ თამაშობს. ივანიშვილის ეს ნაბიჯი კი მოახლოებულ არჩევნებში, რასაკვირველია, „ზვიადისტური“, უფრო სწორად, „ზვიადიზმის“ ფაქტორის გამოყენების სურვილს უკავშირდება.
_ ქალბატონო თამარ, იზიარებთ მოსაზრებას, რომ ივანიშვილი რუსული ნარატივის გამტარებელია?
_ ამ მოსაზრებას არათუ ვიზიარებ, არამედ ეს ჩემთვის იმდენად ნათელია, რომ დავა სერიოზულად არც მიმაჩნია იმიტომ, რომ ეს მთელი მისი მოქმედებებიდან და განცხადებებიდან ჩანს.
_ გასაგებია, მაგრამ თუ გავყვებით ვერსიას, რომ გამსახურდიას გარდაცვალებაში რუსების ხელი ურევია, მაშინ რა გამოდის _ ივანიშვილი კრემლის წინააღმდეგ მიდის, როცა ამბობს, უნდა ვიცოდეთ, პირველი პრეზიდენტი როგორ გარდაიცვალა და ამ საქმის გამოძიება უნდა ჩატარდესო?
_ კრემლის წინააღმდეგ რატომ მიდის? ის ყოველთვის კრემლის დავალებებს ასრულებს. დღეს კი კრემლის დავალება ისაა, რომ ზუგდიდში ოპოზიციის გამარჯვება არ დაუშვას. ამისთვის ზვიადის ფაქტორის გამოყენება, არ მესმის, კრემლის წინააღმდეგ წასვლა რატომ არის?
ისე, ამ საქმეზე ობიექტური გამოძიება არასოდეს ჩატარებულა და მეეჭვება, ახლა ჩატარდეს.
_ რუსეთს უამრავი პრობლემა აქვს და იმისთვის სცალია, რომ ზუგდიდის არჩევნებზე იფიქროს?
_ რას ჰქვია, სცალია? რუსეთს, რა თქმა უნდა, ბევრი პრობლემა აქვს და მთლიანად ჩვენით არ არის დაკავებული, მაგრამ, სამწუხაროდ, რუსეთისთვის საქართველო მეასეხარისხოვანი არ არის. ზოგადად, რუსეთს უნდა, რომ ყოფილ საბჭოთა ტერიტორიებს ფლობდეს, მათზე გავლენაც ჰქონდეს და ამ მხრივ საქართველოს ძალიან დიდი მნიშვნელობა აქვს.
_ გასაგებია, რომ კრემლს ნატოსა და, საერთოდ, დასავლეთთან ჩვენი ურთიერთობა აღიზიანებს, მაგრამ მისგან 2008 წლის მსგავს მოვლენებს უნდა ველოდოთ თუ ახლა კრემლი, თქვენი აზრით, სხვანაირად დაგვსჯის?
_ რუსეთისგან ყველაფერი მოსალოდნელია, მაგრამ, ვიმედოვნებ, იმდენს ვეღარ შეძლებს, რაც 2008-ში შეძლო, თუმცა გააჩნია, ის ფაქტორები, რომელიც რუსეთისთვის შემაკავებელია, რამდენად ეფექტიანად იმოქმედებს.
ასევე იმასაც გააჩნია, რუსეთის საქმე მსოფლიო მასშტაბით როგორ წავა და ძალთა წონასწორობა საით გადაიხრება, თორემ სრულიად ნათელია, რომ რუსეთი საქართველოს თავისი არათუ გავლენის, არამედ, უშუალოდ ბატონობის სფეროდ განიხილავს.
სხვათა შორის, ისიც, რასაც ახლა გეტყვით, რუსეთის განზრახვებზეა მიბმული: რუსეთუმეებისა და რუსოფილების ერთ-ერთი მთავარი ნარატივი ასეთია, _ აი, რუსეთი თავს იმიტომ გვესხმის და ასეთი აგრესიული იმიტომ არის, რომ ცხვირწინ ნატოს ვუფრიალებთ, რუსეთს სააკაშვილი და სხვები აღიზიანებენო, მაგრამ ამ ნარატივის სიყალბე ძალიან კარგად გამოიკვეთა.
_ ანუ?
_ ახლახან სააკაშვილმა თავის ინტერვიუში თქვა, რომ ომამდე ცოტა ხნით ადრე, თუ ომის დროს, რუსეთს ბაზების დატოვებას, ასევე საქართველოს მიერ ნატოზე უარის თქმასაც სთავაზობდა, ოღონდ კრემლი ჩვენს ტერიტორიებს მოშვებოდა _ აფხაზეთისა და ცხინვალის რეგიონის მითვისებისთვის თავი დაენებებინა, მაგრამ ფაქტია, რომ ამ შეთავაზებამ რუსეთი არ შეაჩერა.
მოკლედ, ქართველი პრორუსი პოლიტიკოსების ნარატივი, რომ ტერიტორიების დაკარგვა თითქოს ჩვენი ხელისუფლებების მიერ რუსეთის ნატოთი გაღიზიანების შედეგია, აბსოლუტურად არასწორი აღმოჩნდა. რუსეთს ნატო, რა თქმა უნდა, ძალიან აღიზიანებს, მაგრამ რუსეთი საქართველოს მიმართ აგრესიულად იმიტომ იქცევა, რომ მისი პოლიტიკა და ბუნება დამპყრობლურია!
ამასთან, პრორუსული პოლიტიკოსები ფიქრობენ, რომ თუ დათმობებზე წავალთ, მაშინ რუსეთი აფხაზეთსა და ცხინვალს ასევე დაგვითმობს, მაგრამ თუ გარკვეული გარემოებებით იძულებული არ გახდა, რუსეთი თავისი ნებით ჩვენს ტერიტორიებს არავითარ შემთხვევაში არ დაგვიბრუნებს!
_ სხვათა შორის, სააკაშვილის იმ განცხადებას, რომელიც თქვენ გაიხსენეთ, არაერთგვაროვანი შეფასება მოყვა. ზოგმა ისიც კი თქვა, აი, ბურჯანაძეც სწორედ ამას ამბობს, ოღონდ ტერიტორიული მთლიანობა აღვადგინოთ და რა დროს ნატოაო. ჰოდა, ის, რაც ბურჯანაძეს არ ეპატიება, სააკაშვილს რატომ ეპატიება?
_ ასე არ არის.
_ აბა, როგორ არის?
_ ის, რასაც ბურჯანაძე ამბობს, იმისგან, რაც სააკაშვილმა თქვა, აბსოლუტურად განსხვავდება.
კერძოდ, ბურჯანაძე ამბობს, რუსებს, აპრიორი, ყველაფერი უნდა დავუთმოთ, ასევე უნდა განვაცხადოთ, რომ ნატო არ გვინდა, პუტინი შესანიშნავი პოლიტიკოსია და მის მიმართ დამნაშავეები ვართო.
ბურჯანაძის აზრით, თუ ასე „წესიერად“ მოვიქცევით, მაშინ რუსეთი სანაცვლოდ აფხაზეთსა და ცხინვალს დაგვიბრუნებს.
ის კი, რაც სააკაშვილმა ინტერვიუში თქვა, ამ თეორიას, პირიქით, აბსოლუტურად აბათილებს.
_ როგორ აბათილებს?
_ როგორც სააკაშვილმა თქვა, როცა რუსეთს ცხინვალი მიჰქონდა, სწორედ მაშინ უთხრა, _ ოღონდ ეს არ გააკეთო, ჩვენს ტერიტორიებს თავი გაანებე და ნატოზე უარს ვიტყვითო.
_ ქვეყნის უმაღლესი მთავარსარდლისგან მტრისთვის ასეთი შეთავაზება გამართლებულად მიგაჩნიათ, ქალბატონო თამარ?
_ იცით, რა ხდება? _ გააჩნია, ეს შეთავაზება რა ვითარებაში გაკეთდა.
ასეა თუ ისე, ჩვენთვის მთავარი ამოსავალი, რასაკვირველია, ჩვენი ქვეყანაა, ანუ ჩვენი თვითმიზანი საქართველო და მისი ტერიტორიული მთლიანობაა. ნატო კი ამის მიღწევისა და ასევე რუსეთისგან დაცვის საშუალებაა.
ნატო, მათ შორის, ნატოს წევრებისთვისაც კი, არ შეიძლება, რომ თვითმიზანი იყოს.
_ გეთანხმებით… სხვათა შორის, თავის დროზე, საქართველოს მოსახლეობამ რეფერენდუმით გადაწყვიტა, რომ ჩვენი ქვეყნის არჩევანი რუსეთი კი არა, ნატოა, თუმცა გასული წლის საპრეზიდენტო არჩევნებზე, მოსყიდვასა და დაშინებას თავი რომ გავანებოთ, ისეთებიც გამოჩნდნენ, რომლებმაც სალომე ზურაბიშვილს ხმა, როგორც იტყვიან, შინაგანი რწმენით მისცეს და იმასაც კი არ მიაქციეს ყურადღება, რომ ეს ქალბატონი აგვისტოს ომის დაწყებაში ჩვენს ქვეყანას ადანაშაულებს. აი, ამას როგორ ხსნით, ქალბატონო თამარ?
_ სამწუხაროდ, მოსახლეობის დიდ ნაწილს არც ჰქონდა ინფორმაცია, სალომე ზურაბიშვილს ნატოსთან დაკავშირებით როგორი პოზიცია აქვს _ ფართო მასები ასეთ დეტალებში, როგორც წესი, არ ერკვევიან.
ჯერ ერთი, სალომე ზურაბიშვილს რეალურად არც გაუმარჯვია _ ის, რაც ჩატარდა, არჩევნები არ იყო. ეს აბსოლუტურად მოსყიდული და ძალადობაზე აგებული კენჭისყრა გახლდათ და რომ არა წარმოუდგენელი გაყალბება, სალომე ზურაბიშვილი აუცილებლად წააგებდა.
მეორეც, ზურაბიშვილს, მართალია, გამარჯვებისთვის საკმარისი არა, მაგრამ ხალხის რაღაც რაოდენობა მხარს უჭირდა და, ვფიქრობ, ეს არაადეკვატური იყო, ანუ ქართული საზოგადოება ჩვენ წინაშე მდგარ გამოწვევებს ადეკვატურად რომ აღიქვამდეს, ზურაბიშვილს, დაშინებისა და მოსყიდვის გარეშე, ხალხის ეს მცირე რაოდენობაც არ დაუჭერდა მხარს!
_ საპრეზიდენტო არჩევნების დროს გამოვლენილ დარღვევებზე ევროპარლამენტარების იმ წერილშიც არის საუბარი, რომელიც მათ პრემიერ ბახტაძეს გამოუგზავნეს, ანუ დასავლეთს უნდა, რომ საქართველოში დემოკრატიამ იზეიმოს, თუმცა, თავის დროზე, მსოფლიოს განსხვავებული პოზიცია ჰქონდა, კერძოდ, უმცროსმა ბუშმა ზვიად გამსახურდიაზე თქვა, დინების საწინააღმდეგოდ მიცურავსო. მოკლედ, მაშინ მსოფლიო პოლიტიკურ ელიტას ეროვნული ხელისუფლების ინტერესები რომ დაეცვა და სამხედრო გადატრიალება, პირდაპირ თუ ირიბად, არ გაემართლებინა, დღეს საქართველო ხომ უკვე შემდგარი დემოკრატიის ქვეყანა იქნებოდა?
_ პირადად მე გადატრიალებას თავის დროზეც უარყოფითად ვაფასებდი და ახლაც უარყოფითად ვაფასებ.
დღეს მოდურია, რომ ისინი, ვინც ზვიადისტები იყვნენ თუ არა, ზვიად გამსახურდიას მიმართ ერთმნიშვნელოვან პოზიციას იკავებენ. მე მათ რიცხვს არ მივეკუთვნები და ამ კუთხით შეხედულება არ შემიცვლია _ ზვიად გამსახურდიას დროს ოპოზიციურად ვიყავი განწყობილი და ამ პოზიციას დღესაც აბსოლუტურად ვიზიარებ, თუმცა ვიმეორებ: გადატრიალება ის უარყოფითი ფაქტორი იყო, რომელმაც ქვეყნის განვითარებას თავისი დაღი დაასვა!
_ დღეს უკვე აღარავინ უარყოფს, რომ გადატრიალებაში ბალტინის ჯარები მონაწილეობდნენ. დღევანდელი გადასახედიდან, მსოფლიომ რატომ დაუშვა, რომ რუსეთი საქართველოს სახელმწიფო საქმეებში ჩარეულიყო?
_ ალბათ, განსაკუთრებული საფუძველი ვერ დაინახა, ანუ არ მგონია, რომ იმ შემთხვევაში დასავლეთის პოზიცია გადამწყვეტი ფაქტორი ყოფილიყო.
_ ე. ი. მაშინ საქართველო დასავლეთისთვის სტრატეგიულად მნიშვნელოვანი არ იყო, არა?
_ საქართველოს დამოუკიდებლობა გამოცხადებული კი ჰქონდა, მაგრამ საბჭოთა კავშირი, რეალურად, ჯერ კიდევ არსებობდა.
_ ისე, ქალბატონო თამარ, ყველაფერი ის, რაც ბოლო დროს საქართველოს სამეფო სახლის გარშემო ხდება, რუსული თამაშებია?
_ შეიძლება, სარეზერვოა, მაგრამ არ მგონია, რომ ეს ამბები დღევანდელ ქართულ პოლიტიკაში არსებითი და გადამწყვეტი იყოს. ამ ფაქტორს, გარკვეულწილად, ქართული სამეფო იდეისა თუ ბაგრატიონთა დინასტიის გასამასხარავებლად იყენებენ.
_ დიახ, მეც სწორედ ეს ვიგულისხმე, მით უმეტეს, რომ საქართველოში სამეფო ტახტი სწორედ რუსებმა გააუქმეს.
როგორ ფიქრობთ, „ოცნება“ ხელისუფლებაში მოსვლამდეც რუსული გავლენების ქვეშ იყო თუ საგარეო კურსი ხელისუფლებაში მოსვლის შემდეგ შეიცვალა?
_ გავლენები რბილი ნათქვამია.
_ რატომ?
_ ზოგის მხრიდან შეიძლება, გულუბრყვილობას ჰქონდა ადგილი, თუმცა უმეტესობას, ვფიქრობ, ძალიან კარგად ჰქონდა გაცნობერებული, როგორ და რისთვის მოდიოდა, უბრალოდ, ასე აწყობდა.
ივანიშვილის ხელისუფლებაში მოყვანა რუსეთის მხრიდან საქართველოსთვის ბრძოლის გაგრძელება იყო, თორემ იმის თქმა გულუბრყვილობაა, რომ რუსეთმა ივანიშვილი, უბრალოდ, გამოუშვა და იმის საშუალებაც მისცა, რუსეთიდან ორი მილიარდი წამოეღო. რუსული სისტემა ასეთ რაღაცას გამორიცხავს.
_ ქალბატონო თამარ, ივანიშვილი საქართველოში 1999 წლიდან ცხოვრობს, პოლიტიკაში კი მხოლოდ 2011-ში ჩაერთო. მანამდე, როგორც ცნობილია, „ნაციონალურ“ ხელისუფლებასთან მჭიდრო ურთიერთობა ჰქონდა.
_ დიახ, ურთიერთობა სააკაშვილთან ჰქონდა და ხელისუფლებაში მოსასვლელად პლატფორმას იმზადებდა, ანუ ის რუსეთისთვის ერთ-ერთი რეზერვი იყო. აქედან გამომდინარე, რუსეთს აწყობდა, რომ საქართველოში ყოფილიყო და აქ პლაცდარმი ჰქონოდა, რადგან მერე, როცა დასჭირდებოდა, სცენაზე გამოეყვანა.
_ ქალბატონო თამარ, ივანიშვილის შესახებ პირველად როდის შეიტყვეთ?
_ გაგონილი მქონდა, რომ არსებობდა ასეთი ბიზნესმენი, რომელიც თავის ჭორვილაში საქმიანობდა.
სხვათა შორის, ისიც მახსოვს, ძალიან ადრე შევარდნაძემ ინტერვიუში ისე ახსენა, როგორც ქვეყნის მომავალი შესაძლო ხელმძღვანელი.
ჩემს აღქმაში კი ივანიშვილი 2011 წელს, ანუ იმ დროიდან გაჩნდა, როცა ქვეყნის პოლიტიკურ ცხოვრებაში გამოჩნდა და ჩემთვის მაშინვე ნათელი იყო, რომ იგი ხელისუფლებაში რუსეთს მოჰყავდა. ამიტომ „ოცნების“ ხელისუფლებაში მოსვლის სასტიკი წინააღმდეგი ვიყავი, მიუხედავად იმისა, რომ სააკაშვილის მომხრეობით არ გამოვირჩეოდი და, პირიქით, იმ ხელისუფლების მიმართ ოპოზიციურად ვიყავი განწყობილი.
მოკლედ, იმ კადრების მიუხედავად, რომელიც 2012 წლის არჩევნების წინ გაუშვეს, „ოცნების“ ხელისუფლებაში მოსვლის კატეგორიული წინააღმდეგი ვიყავი! ივანიშვილის ხელისუფლებაში მოსვლა ტრაგიკულად განვიცადე!
ისე, ხელისუფლებაში მოსვლამდე ივანიშვილმა არაერთი განცხადება გააკეთა, რომლითაც ნათელი გახდა, რისთვისაც მოდიოდა.
_ რომელ განცხადებას გულისხმობთ?
_ მაგალითად, განაცხადა, რომ საქართველო არ უნდა იყოს დასავლეთსა და რუსეთს შორის ხელის შემშლელი, ასევე ჩვენი ოკუპაციით დასავლეთი არ უნდა შევაწუხოთ. მგონი, ისიც კი განაცხადა, რასაც სალომე ზურაბიშვილი საპრეზიდენტო არჩევნების დროს ამბობდა. ასე რომ, ამ კაცის წარმოშობაზე ეჭვი არასოდეს მქონია!
როგორც გითხარით, სააკაშვილის მომხრე არასოდეს ვყოფილვარ, მაგრამ საქართველოს განვითარებისთვის იმ ხელისუფლების დარჩენა უკეთესი იყო.
_ დღეს გაერთიანებულ ოპოზიციას გულშემატკივრობთ, ქალბატონო თამარ?
_ ვერ ვიტყვი, რომ თავს მასთან ვაიგივებ, მაგრამ საპრეზიდენტო არჩევნებში ნამდვილად ვგულშემატკივრობდი და შემდეგ არჩევნებშიც ასე იქნება, რადგან ვფიქრობ, გაერთიანებული ოპოზიცია ერთადერთი ძალაა, რომელიც ივანიშვილის რეჟიმსა და, ზოგადად, იმ საფრთხეს, რომელიც ივანიშვილისგან მომდინარეობს, ეფექტიან წინააღმდეგობას უწევს.
ვერ ვიტყვი, რომ ყველა საკითხში, მაგრამ რუსეთთან მიმართებით და ასევე მთელ რიგ თემებზე გაერთიანებული ოპოზიციის პოზიცია ჩემთვის მისაღებია.
_ საარჩევნო სისტემის შეცვლასაც უჭერთ მხარს?
_ დიახ, მისაღებია. ზოგადად, ვერ ვიტყვი, რომ მაგალითად, ინგლისში მაჟორიტარული არჩევნები ანტიდემოკრატიულია და პროპორციულით უნდა შეიცვალოს.
დემოკრატიულ ქვეყნებში მაჟორიტარული არჩევნები სრულიად ნორმალურია, მაგრამ ჩვენს რეალობაში მაჟორიტარული არჩევნები იმის საშუალებას იძლევა, რომ სახელისუფლებო ძალამ ხელისუფლებაში არაპროპორციული ძალა მიიღოს და გაბატონდეს!
ამას გარდა, საქართველოში მაჟორიტარული სისტემა მახინჯ ფორმას ატარებს.
_ ყველაფერ აქედან გამომდინარე, გაერთიანებული ოპოზიციის კამპანიაში, რომელიც საარჩევნო სისტემის შესაცვლელად მილიონი ხელმოწერის შეგროვებას ითვალისწინებს, მონაწილეობას მიიღებთ?
_ ამ დროისთვის არც რესურსი მაქვს და არც _ ენერგია, თუმცა ამ მოთხოვნას ვიზიარებ და ხელსაც მოვაწერ!
_ ქალბატონო თამარ, დიდი პოლიტიკური გამოცდილება გაქვთ. პოლიტიკური ვერტიკალი, თუნდაც ოპოზიცია რატომ არ გიყენებთ?
_ მართალია, მხარს ვუჭერ, მაგრამ მისი ნაწილი არ ვარ, თან ჩვენ ყოველთვის დამოუკიდებელი პოზიცია გვქონდა და, როგორც ჩანს, ეს დამოუკიდებელი პოზიცია, თუნდაც აფხაზეთთან დაკავშირებით, ვიღაც-ვიღაცებს არ აწყობთ.
_ აფხაზეთთან დაკავშირებით რა პოზიცია გაქვთ?
_ ფრჩხილების გახსნა არ მინდა, მაგრამ ყველა საკითხზე დამოუკიდებელი პოზიცია გვაქვს და ვიღაცის შეკვეთას არასოდეს ავსახავთ.
გაერთიანებულ ოპოზიციას არ ვგულისხმობ, მაგრამ ზოგიერთს აფხაზეთთან დაკავშირებით პრორუსული პოზიცია აქვს…
ასეა თუ ისე, არაფერი მიშლის ხელს, რომ არჩევნების დროს იმ ძალას დავუჭირო მხარი, რომელსაც ივანიშვილის დამარცხება შეუძლია!
_ თუ ხელისუფლება საარჩევნო სისტემას არ შეცვლის და არც სხვა დათმობებზე წავა, „ოცნება“, რომელსაც ივანიშვილის რეჟიმს უწოდებთ, როგორ უნდა დამარცხდეს?
_ ეს ძალიან რთული ამოცანაა.
_ რთული ამოცანა მაინც, რატომ არის?
_ იმიტომ, რომ ყველა ბერკეტს ხელისუფლება ფლობს.
ამასთან, მისთვის მორალური დაბრკოლებები არ არსებობს და ყველაფერზე წამსვლელია! აქედან გამომდინარე, ხელისუფლების დამარცხება თითქმის შეუძლებელი ამოცანაა, თუმცა ხაზს ვუსვამ _ თითქმის!
საერთოდ, ყველაფერი ეს მარტო შიდა პროცესებით არ წყდება.
_ რას გულისხმობთ?
_ ეს ხელისუფლება მთლიანად რუსეთის მხარდაჭერაზე დგას.
არ ვიცით, ეს ფაქტორი როდის და რა დოზით მოისპობა, მაგრამ, საბოლოო ჯამში, იმის თქმა მინდა, რომ საგარეო ფაქტორი ხელშემწყობი გახდეს.
ამასთან, ქვეყნის შიგნითაც საზოგადოების უფრო მეტი აქტივობა და მუხტი იყოს.
საპრეზიდენტო არჩევნებში ოპოზიციას ამომრჩევლის უფრო დიდმა ნაწილმა დაუჭირა მხარი, ვიდრე _ ხელისუფლებას და ამაზე ყველა ფაქტი მეტყველებს, თუმცა ერთია ხმის მიცემა და მეორე _ ამ შედეგების დაცვა, რაც ვერ მოხდა.
არადა, მთელი მსოფლიო განწყობილი იყო, რომ ეს უნდა მომხდარიყო, მაგრამ ვერც ქართულმა საზოგადოებამ და ვერც _ ოპოზიციამ ხმების დაცვა ვერ მოახერხა.
ამიტომაც ვამბობ, რომ თუ ქართული საზოგადოების აქტიურობა მხოლოდ ხმის მიცემით არ შემოიფარგლება, მაშინ ხელისუფლების დამარცხება შეუძლებელი არ არის!
_ ქალბატონო თამარ, თქვენი პოლიტიკური გამოცდილება და ალღო რას გკარნახობთ, ვადამდელი საპარლამენტო არჩევნები იქნება?
_ ვერ გეტყვით. მოვლენები ისე სწრაფად ვითარდება, რომ შესაძლოა, ვადამდელი საპარლამენტო არჩევნები იყოს, მაგრამ საკითხავია, ამ ეტაპზე ვადამდელი ვის უფრო აწყობს.
_ ანუ უშვებთ ალბათობას, რომ ვადამდელი საპარლამენტო არჩევნები შესაძლოა, „ოცნებას“ უფრო აწყობდეს?
_ იმ ვითარებით, რაც დღეს არის, შესაძლოა, „ოცნებას“ უფრო აწყობდეს, მაგრამ ისიც შეიძლება, რომ მეორე წუთს სხვა ვითარება შეიქმნას და „ოცნებას“ ვადამდელი აღარ აწყობდეს.
ისე, რიგით არჩევნებამდე დიდი დრო აღარ არის დარჩენილი, თუმცა ამის მიუხედავად, შეიძლება, მაინც ბევრი რამ შეიცვალოს.
_ ბოლოს, 19 მაისის ზუგდიდის არჩევნების შედეგი პოლიტიკურ პროცესებზე გავლენას მოახდენს?
_ თუ დადებითად ჩატარდა, ანუ თუ ოპოზიცია გამარჯვებას შეძლებს, რასაკვირველია, „ოცნების“ დეგრადირებასა და დასუსტებაში წვლილს შეიტანს!
_ და ოპოზიცია გამარჯვებას შეძლებს?
_ არ ვიცი, ამაში დარწმუნებული არ ვარ. ივანიშვილი ცდილობს, რომ სანდრა რულოვსს ე. წ. ზვიადისტური ფაქტორი დაუპირისპიროს, თუმცა არ ვიცი, ეს გამოუვა თუ არა.
თუ ოპოზიცია ზუგდიდში ვერ გაიმარჯვებს, ეს უარყოფითი ფაქტორი იქნება, თუმცა ვერ ვიტყვით, რომ ამის გამო შემდგომი გამარჯვების იმედი მოისპობა!

გიორგი აბაშიძე

 

დატოვეთ კომენტარი