მთავარი პოლიტიკა სკანდალი სუსში, მითვისებული მილიონები და „სვეტის“ მოწილე მაღალჩინოსნები

სკანდალი სუსში, მითვისებული მილიონები და „სვეტის“ მოწილე მაღალჩინოსნები

6907
0
გაზიარება

„ქართული ოცნება“ დიდ შარშია. სამართლიანობის აღდგენის ლოზუნგით ხელისუფლებაში მოსული „ქართული ოცნება“, ზუსტად ექვსი წლის თავზე, სისტემური კორუფციის ბრალდებით დიდ სკანდალშია.
„ომეგა“ ჯგუფის დამფუძნებელი და ტელეკომპანია „იბერიის“ მეპატრონე ზაზა ოქუაშვილი ბიზნესიდან წილის ახევაში „ოცნების“ ყოფილ და მოქმედ მაღალჩინოსნებთან ერთად პირადად ბიძინა ივანიშვილს ადანაშაულებს. სკანდალური ინტერვიუ მან „რუსთავი 2“-ს ლონდონიდან მისცა.

მიუხედავად იმისა, რომ „ქრონიკა +“-ის წყაროს ინფორმაციით, ზაზა ოქუაშვილის ინტერვიუს მსვლელობისას „ოცნების“ ცენტრალურ შტაბში „პიარშიკების“ სრული მობილიზაცია გამოცხადდა, ორშაბათ დილას ხელისუფლება ისევ დაბნეული ღიმილით შეხვდა, პირველი ოქტომბრის გამარჯვების ექვსი წლის იუბილეზე დაანონსებული პოლიტიკური განცხადება პარტიის გენერალურმა მდივანმა კახი კალაძემ წაიკითხა, საკუთარი პარტიის მიღწევების მაგიერ ისევ იმ ცხრა წელსა და „ნაციონალური მოძრაობის“ დანაშაულზე, ბიზნესის რეკეტზე, მედიაზე ზეწოლაზე, პატიმრების წამებასა და გაუპატიურებაზე ილაპარაკა.
„ოცნების“ ფეისები „მასოვკაში“ მდუმარე სახეებით იდგნენ და საგანგებო ბრიფინგი ისე დასრულდა, პრეზიდენტობის დამოუკიდებელი კანდიდატი, სალომე ზურაბიშვილი, ტრიბუნასთან არც მისულა, თუმცა მოგვიანებით ისიც ანტინაცურ რიტორიკას შეუერთდა და მიშას დროს ბიზნესი დარაკეტებული იყოო, _ გვამცნო.
დაბნეული მხოლოდ ხელისუფლების პოლიტიკური ნაწილი არ არის, სრული არაკოორდინაცია და ქაოსია ძალოვან უწყებებში. როგორც ზაზა ოქუაშვილის ინტერვიუდან ირკვევა, „ოცნების“ გადარჩენის ერთადერთი იმედი შს მინისტრი გიორგი გახარია, პირადად ესწრებოდა ბიძინა ივანიშვილისა და ზაზა ოქუაშვილის პრივატულ შეხვედრებს. ოქუაშვილისვე განმარტებით, მეორე შეხვედრაზე ივანიშვილი ბოლო ხმაზე უყვიროდა ბიზნესობმუდსმენ გახარიას.
პოლიციის რეფორმა, რომელიც გიორგი გახარიამ დანიშვნისთანავე დააანონსა, ის ნათელი წერტილი იყო, რომელსაც ყველა ნორმალურად მოაზროვნე ადამიანთან ერთად, პირადად მეც ვებღაუჭებოდი, მით უფრო იმ მძიმე დღეების მერე, რაც ჩემი შვილისთვის ნარკოტიკების ჩადებისა და პოლიციის მხრიდან ძალადობის დროს გადავიტანე, მაგრამ ბოლო ორი კვირის განმავლობაში ე. წ. რეფორმირებული პოლიცია იმდენად სამარცხვინოდ გამოიყურება, რეფორმებზე საუბარიც კი უხერხულია.
თბილისის პოლიციის უფროსმა არ იცის, რომელი კანონის რომელი მუხლის თანახმად არ შეიძლება პარლამენტის შენობის წინ მიმდებარე აქციაზე პროექტორის შეტანა და ანტისაოკუპაციო ფილმის ჩვენება, პოლიციელები კანონის სრული იგნორით ჩხრეკენ ზაზა სარალიძის მანქანას და იპარავენ კარვებს, თბილ „ადეალებსა“ და ტანსაცმელს, პოლიციელები სარგებლობენ ნებისმიერი ჩოჩქოლით და აქციის მიმდებარე ტერიტორიიდან იპარავენ ბენზინს. მათ უწევთ უკანონო ბრძანებების შესრულება, მაგრამ ამ უკანონო ბრძანების გამცემზე მინისტრი კომენტარსაც კი არ აკეთებს.
არანაკლები ქაოსია სუს-შიც. მართალია, ვახტანგ გომელაურს თანამდებობა ჯერ არ დაუტოვებია, მაგრამ ფორმალურად ყველამ იცის, რომ მას არავინ არაფერს ეკითხება. გავლენების სფეროებისა და თანამდებობების განაწილებისათვის ბრძოლა გადამწყვეტ ფაზაში შედის. კომპრომატების ომში და შეთქმულების თეორიების განხილვაში მათი გეგმების მთავარ მოწინააღმდეგედ, ცხადია, „ქრონიკა+“-სსა და პირადად მე მომიაზრებენ. ე. წ. სკანდალური ინტერვიუ, რომელიც სუს-ის სტაჟიანმა აგენტმა, გოდერძი ჯოლოხავამ ზვიად კუპრავას მიაწოდა, რეალურად მახე და დიდი სატყუარა იყო. ჯოლოხავა ყვებოდა, რომ მას სუს-ის ანტიკორუფციული სამსახურის თანამშრომელმა ლევან დგებუაძემ თემირლან მაჩალიკაშვილის მკვლელობის საქმეზე კონკრეტული დავალება და სანდო სტუდენტების მობილიზება სთხოვა. რომ ჯოლოხავამ „მოახერხა“ და სუს-ის მაღალჩინოსანი ფარულად ჩაწერა.
ლეგენდა და სუს-ის მაღალჩინოსნის ჩანაწერი ნებისმიერი ჟურნალისტისთვის შთამბეჭდავად გამოიყურებოდა, რომ არა რამდენიმე მაგრამ … „ქრონიკა+“-ის წყაროს ინფორმაციით, გოდერძი ჯოლოხავა ალეკო ტაბატაძის მარჯვენა ხელის, დათო ბედიას პირადი აგენტია და მის გარეშე ნაბიჯს არ დგამს, მეორე მხრივ, დასახელებული პირი ლევან დგებუაძე ანტიკორუფციულ სამსახურში მუშაობს და გრიგოლ ლელუაშვილის კადრად მოიაზრებოდა, რომელსაც ბიზნესთან ურთიერთობა და „ქართული ოცნების“ სასარგებლოდ შემოწირულობების მობილიზაცია ევალებოდა. პრაქტიკულად გამორიცხულია, რომ გოდერძი ჯოლოხავას სუს-ის დახმარების გარეშე მოეხერხებინა ჩანაწერის გაკეთება. თუ ეს ინტერვიუ და „სკანდალური“ ჩანაწერი ჩემთან მოხვდებოდა, ბედიას აგენტი გოდერძი ჯოლოხავა ჩვენებას მისცემდა, რომ მე მას ჩანაწერის მოპოვებაში ფული გადავუხადე და აპარატურაც შევუძინე.
ეს იაფფასიანი პროვოკაცია ჩაიშალა. სამაგიეროდ, ამ ინფორმაციის გასაჯაროების მერე სუს-ში დიდი გარჩევები დაიწყო.
„ქრონიკა+“-ის წყაროს ინფორმაციით, ჯანდაცვის სამინისტროს მაღალჩინოსნის დაკავების გადაწყვეტილება სუს-ის უფროსის მოადგილემ და ანტიკორუფციული სამსახურის კურატორმა გრიგოლ ლილუაშვილმა მიიღო, გომელაურმა ამის თაობაზე წინასწარ არაფერი იცოდა, ინფორმაცია მედიიდან ჯანდაცვის მინისტრმა დავით სერგეენკომაც მიიღო. სწორედ ამ კითხვით დაიწყო საგანგებო თათბირი ვახტანგ გომელაურმა. როგორც ჩვენი წყარო ამბობს, თათბირზე სუს-ის ერთ-ერთმა მაღალჩინოსანმა პირდაპირ უთხრა გომელაურს, რომ თვალავაძე ლილუაშვილმა მხოლოდ იმიტომ დააკავა, რომ მისგან მოთხოვნილი წილი ვერ მიიღო, რასაც გრიგოლ ლილუაშვილის გაწიწმატება მოჰყვა და მან რეპლიკის ავტორს ავტოკალამიც კი ესროლა. თათბირი ისე ჩაიშალა, საბოლოოდ სიტუაცია ისევ გაურკვეველი დარჩა.
მეორე საგანგებო თათბირი გომელაურმა პარლამენტის წინ მიმდინარე აქციაზე იმ ინფორმაციის გასაჯაროების მერე მოიწვია, რომელიც ზაზა სარალიძისა და ოპოზიციის ლიდერების საუბრის დამონტაჟებულ ჩანაწერებს შეეხებოდა. თათბირი დაწყებიდან 15 წუთში დამთავრდა, ოფიციალურ მიზეზად გომელაურმა მოიმიზეზა, გასაქცევი ვარო, მაგრამ „ქრონიკა+“-ის წყაროს ინფორმაციით, გომელაურს შინაგან საქმეთა სამინისტროდან დაურეკეს და უთხრეს, რომ აქციაზე თათბირების ჩატარება მისი უწყების პრეროგატივა არ არის.
სუს-ში კიდევ ერთი განხეთქილების ვაშლი სამშენებლო კომპანია „სვეტი“ და მისი დამფუძნებელი გივი ჯიბლაძეა. ფინანსურ პოლიციაში ჯიბლაძის წინააღმდეგ გამოძიება უკვე დასრულებულია და ფინანსური დოკუმენტების მიხედვით, ჯიბლაძეს 700-ზე მეტი ბინა აქვს გაყიდული და თანხა მითვისებული. „ქრონიკა+“-ის წყაროს ინფორმაციით, გივი ჯიბლაძის დაკავება უკვე გადაწყვეტილი იყო, მაგრამ პროცესი სუს-ის უფროსის მოადგილე ალეკო ტაბატაძის ზარმა დააყოვნა, ეს კი მას შემდეგ მოხდა, რაც ალეკო ტაბატაძეს გივი ჯიბლაძე და მისი მეგობარი კახა აბზიანიძე, მეტსახელად „ჟოროვიჩი“ შეხვდა. ჩვენი წყაროს ინფორმაციით, ტაბატაძეს დახმარების სანაცვლოდ ჯიბლაძე ერთ-ერთი ბიზნესიდან სოლიდურ წილს დაჰპირდა.

„ქრონიკა+“-ს ხელში ჩაუვარდა გივი ჯიბლაძის წერილი, რომელშიც ის დეტალურად აღწერს, ვინ იღებს „სვეტიდან“ წილს
სტილი დაცულია :

1. წილი ლაშა ჭელიძეზე – გრიგოლ ლილუაშვილი
2. ხელფასი მაია ლილუაშვილზე – გრიგოლის მეუღლე
3. წილი ჭელიძეზე რომელიც ამ ბოლოს ფორმდება გიორგი სანაძის შვილზე პაპუნა სანაძეზე. ამ უკანასკნელს სანაძეს ჰქონდა 20% და ლილუაშვილის წილი 20% გადაუფორმდა სანაძეს და გაუხდა 40% და მიზეზი სავარაუდოდ უნდა იყვეს განხეთქილება, რაც გულისხმობს ნებართვის მოგვარებას, რომელიც უნდა მოეგვარებინა ლილუაშვილს და ვერ მოაგვარა, მთავარი მომენტი კი არის კახი კალაძე, რომელიც შიდა კონფლიქტის გამო ლილუაშვილს ხელს უშლის და უშლიდა, რასაც სავარაუდოდ დაემატა ბიზნესსაქმიანობა კალაძის სადაზღვევო კომპანია „უნისონში“ რასაც ფლობს კახი და რომელ კომპანიასაც „სვეტი“ არაერთხელ შეხვდა ჯიბლაძის ხელმძღვანელობით. სადაც სავარაუდოდ წინააღმდეგი ლილუ წავიდოდა, რადგან მისი როლი „სვეტში“ ნებართვების შეთანხმება იყო, და ამ ნებართვას თუ სხვა მოაგვარებდა, ხო ბოლომდე კნინდებოდა რადგან ისედაც ბევრი პრობლემა მის გამო შეექმნა „სვეტს“, მისი წილში ყოფნამ გამოიწვია ამდენი პრობლემა, რაც კახის პირადად ლილუაშვილთან იყო და არის მთავარი პრობლემა. მათი სკამების ომს შეეწირა „სვეტი“. კახი როგორც კი მოვიდა მერიაში, სადაც მანამ მოადგილედ ლილუაშვილი და მის მიერ გაყრილი ყველა კადრი დააბრუნა მათ შორის არქიტექტურის სამსახურში, რომლებიც ხელს უშლიდნენ ლილუს ნებართვების აღებაში. რადგან ამათ ცოტა თვალის დახუჭვას თხოვდა, ხოლო კახიმ ეს ხალხი მოიყვანა ისევ, რათა ინფორმაცია აეღო მათგან.
4. ლილუს თხოვნები რაში მდგომარეობდა. – მაია ლილუაშვილის წასვლა.
5. შემდგომ ხდება რომ ლილუს მეუღლე მიდის „სვეტიდან“ და აფუძნებს კომპანიას რომელიც უძრავი ქონების ყიდვა-გაყიდვით იქნებოდა დაკავებული. ხოლო ამონაწერში ფიქსირდება მაიასთან ერთად პარტნიორებად გოგოები რომლებიც ფიქსირდებოდნენ, „სვეტის“ სახელფასო გადარიცხვების სიაში და რომლებიც „სვეტში“ გაყიდვებით იყვნენ დაკავებული. ხოლო ეს ნაბიჯი უფრო დე მარში ლილუმ მოაწყო.რადგან დაენგრია „სვეტი“ და განადგურებულიყო დეველოპერულ ბაზარზე. გააკეთა კიდეც ასე, რადგან მისი მეუღლის კომპანია ყიდის დღეს „სვეტის“ მშენებლობას, ბაკურიანში, და რომელიც ქართუ ფონდის მიერ იყო დაფინანსებული აქ კი ლილუს გავლენა ჰქონდა.
დატა ცენტრი ლისზე
სადაც ჯიბლაძემ გიორგი სანაძემ დავით ჭიჭინაძემ და გრიგოლ ლილუაშვილი აწარმოებენ კრიპტოვალუტას,
BTC  ანუ ბიტკოინი იწარმოება რომელიც არის რამდენიმე მილიონის და გამოიმუშავებენ ბევრ კრეპტოს.
ეს არის წერილის სრული შინაარსი, რომელიც „ქრონიკა+“-მა მოიპოვა. წერილი არის გივი ჯიბლაძის ხელნაწერი, (დედანი) და ბუნებრივია, მასზე ექსპერტიზის ჩატარება შესაძლებელია. რაც შეეხება წერილში დასახელებულ პირებს, „ქრონიკა+“-ის წყაროს ინფორმაციით:
გრიგოლ ლილუაშვილი არის სუს-ის უფროსის მოქმედი მოადგილე;
გიორგი (გოგა) სანაძე სასჯელაღსრულების დეპარტამენტის მაღალჩინოსანია;
დავით ჭიჭინაძე სუს-ის ანტიკორუფციული დეპარტამენტის სამმართველოს უფროსია.
„ქრონიკა+“ მზადაა, წერილის დედანი ფინანსურ პოლიციას გადასცეს და გამოკითხვაზე მთავარი რედაქტორის დაბარებას ელოდება.
„ქრონიკა+“ იმედს იტოვებს, რომ „სვეტის“ დამფუძნებლის მიერ მენაშენეების თანხის მითვისების ფაქტები ბოლომდე იქნება გამოძიებული და ყველა დამნაშავე კანონის მიხედვით დაისჯება!

ელისო კილაძე

 

 

 

დატოვეთ კომენტარი