ძმები გაჩეჩილაძეები პოლიტიკიდან წავიდნენ, მაგრამ მედიამაგნატობის პრეტენზია გაუჩნდათ. საკონტროლო პაკეტის მოპოვების მიუხედავად, ლევან გაჩეჩილაძე საჯარო რეესტრმა „მაესტროს“ გენერალურ დირექტორად არ დაარეგისტრირა. გაჩეჩილაძეების გამოჩენამდე იყო ჩაშლილი მოლაპარაკებები „რუსთავი 2“-თან და გაფორმებული კონტრაქტი „იმედთან“. ამ პროცესში გაირკვა, რომ გიორგი გაჩეჩილაძე პრემიერ გიორგი კვირიკაშვილის ახლო მეგობარია, ხოლო წილების შესაძენად ფული მას ბიზნესმენმა ირაკლი რუხაძემ მიაპროცენტა. „მაესტროსა“ და „რუსთავი 2“-ს შორის დაწყებული და ჩაშლილი  მოლაპარაკების დეტალებზე „ქრონიკა+“-ს „რუსთავი 2“-ის გენერალური დირექტორი, ნიკა გვარამია ესაუბრება: _ ნიკა, როდის დაიწყო მოლაპარაკებები „მაესტროსთან“? რატომ იყო ეს თემა „რუსთავი 2“-ისთვის საინტერესო? _ ეს მოლაპარაკებები მიმდინარეობდა შარშანაც, სარეკლამო წლის დაწყებამდე და წელსაც. შარშან არ გამოვიდა _ უბრალოდ, ვერ მოვასწარით, თან ბაზარზე სარეკლამო ცვლილებები იგეგმებოდა და დინამიკა გვაინტერესებდა. წელს განვაახლეთ _ წმინდა კომერციული მოლაპარაკებები იყო. „რუსთავი 2“-ისთვის საინტერესოა „მაესტროც“, „კავკასიაც“, „ტვ პირველიც“ _ ყველა ტელევიზია, რომელთანაც შეიძლება სარეკლამო დროის გაერთიანება და ერთიანად გაყიდვა. ვისაც ეს ბიზნესი ესმის, მარტივი გასაგებია, რასაც ნიშნავს და თავისთავად ცხადი იყო „მაესტროსთვისაც“. _ ნიკა, ეს იყო მხოლოდ ბიზნესპროექტი, თუ კულუარულ პოლიტიკურ გარიგებასაც გულისხმობდა? _ ეს იყო მხოლოდ ბიზნესწინადადება. ზემოთ ვინც ჩამოგითვალეთ, ვერც ერთ ტელევიზიაზე გავლენებს ვერ ვფლობთ. „მაესტროს“ კი არ ვაჩუქებდით რამეს, ჩვეულებრივად, მათ სარეკლამო დროს გავყიდიდით, მათთან მოლაპარაკება წარიმართებოდა და ისინი მიიღებდნენ იმას, რაც მათ რეიტინგთან შესაბამისობაში იქნებოდა. არც ერთი ტელევიზია, რომელიც მე დაგისახელეთ, ჩვენი სარედაქციო პოლიტიკის თვალთახედვის ტელევიზია არ არის, ხშირ შემთხვევაში, დრამატული განსხვავებებია. ბუნებრივია, ამ მოლაპარაკებების საგანი არ ყოფილა სარედაქციო პოლიტიკა. ამის უფლებას თავს არც მივცემდით და ვერც მივცემდით. _ „მაესტროს“ მხრიდან ვინ მონაწილეობდა ამ მოლაპარაკებებში? _ „მაესტროს“ მხრიდან ამ მოლაპარაკებებში მუდმივად მონაწილეობდა ვახტანგ ჩახნაშვილი, რომელიც წარმოადგენდა ასთიანი- გოგელიას ოჯახს. წელს ინიციატივა მათგან წამოვიდა, ეს სრულიად გასაგებია, რადგან „მაესტროს“ გაყიდვებში უჭირს, არა იმიტომ, რომ რეიტინგის პრობლემა აქვს, რეიტინგის თვალსაზრისით „მაესტრო“ მესამე ტელევიზიაა, უბრალოდ, გაყიდვის პოლიტიკა აქვს საკმაოდ სუსტი, „რუსთავი 2“-ისთვის კი ეს ძალიან ძლიერი მხარეა. ამიტომ სრულიად გასაგებია მათი ინტერესი ჩვენი მისამართით, თუნდაც იმიტომ, რომ „იმედს“ ძალიან უჭირს გაყიდვებში და რეიტინგის შეუსაბამო გაყიდვები აქვს. ამიტომ ჩვენ ეს წინადადება ძალიან ნორმალურად მივიღეთ, _ ჩვენთვის კომერციულად საინტერესო იყო და მათთვის, _ გადარჩენის შესაძლებლობა, რომ ტელევიზიას საკუთარი შემოსავლებით ეარსება. ჩვენთვის ეს ნაცნობი სიტუაციაა _ ჩვენც ჩვენი შემოსავლებით ვარსებობთ. მათ გარკვეული ციფრი დაასახელეს, რადგან მათი წლიური ხარჯები ამ კონკრეტულ ციფრს შეადგენდა. ჩვენ ვიხილავდით, რამდენად რეალისტური იყო დასახელებული თანხა, მერე გარკვეულ შეთანხმებამდე მივედით, ბატონი ჩახნაშვილი რამდენჯერმე შემხვდა. ერთადერთი, რაზედაც საუბარი იყო, არა სარედაქციო პოლიტიკაზე, არამედ პროგრამირებაზე, იმიტომ, რომ თუ ჩვენ ერთიანი სარეკლამო სახლი გვექნებოდა, კონტრპროგრამირება არ უნდა მომხდარიყო. მაგალითად, ჩვენი ნიუსი იმათ ნიუსს არ უნდა აჯდეს და ა. შ. ლიტონი სიტყვები რომ არ გამომივიდეს, გეტყვით, რომ შარშანდელმა მოლაპარაკებებმა სწორედ ეს შედეგი გამოიღო _ „მაესტროს ცხრიანი“ გადავიდა რვა საათზე, იმიტომ, რომ ჩვენგან გადააწყვეს კონტრპროგრამირება. ეს იყო მოლაპარაკებების ერთადერთი თემა და არავითარ შემთხვევაში სარედაქციო დამოუკიდებლობა. ეს საკითხი წელსაც ასე დაიძრა, _ ვისაუბრეთ ბატონ ჩახნაშვილთან, მე მას ერთხელ შევხვდი. ძირითადად ხვდებოდნენ ის ადამიანები, რომელებსაც კომერციული მოლაპარაკებები ეხებოდა, მაგრამ ჩვენთვის ძალიან მოულოდნელად, აუხსნელად და ჩვენგან მალულად, აღმოჩნდა, რომ მათ „იმედთან“ ჰქონდათ მოლაპარაკებები. _ და აქ უკვე ჩნდება ხელისუფლების ინტერესი? მინისტრები და ექსპრემიერის ნათესავები. _ მათი მხრიდან საუბარი კოტე გოგელიასთან შარშანაც იყო და თან არაერთგზის. ჩახნაშვილს რაც შეეხება, ზუსტად ვიცით და თვითონ აქვს ჩვენთვის ნათქვამი, რომ, პრაქტიკულად, ყველა სამთავრობო უწყებაში დაიბარეს და მასთან საქმის გარჩევები ჰქონდათ ხელისუფლების მხრიდან, რომ ის არ უნდა ყოფილიყო „რუსთავი 2“-თან და უნდა ყოფილიყო „იმედთან“.    ჩახნაშვილმა ვერ გაუწია წინააღმდეგობა. ბოლომდე აწარმოებდნენ ჩვენთან მოლაპარაკებებს და ბოლომდე ჩვენთან უნდოდათ, იმიტომ რომ კომერციულად ეს სწორი იყო. როცა ხელისუფლების დაკვეთით რაღაცას აკეთებ, გასაგებია, რომ სარედაქციო პოლიტიკაზეა პირდაპირი მინიშნება, ამიტომ ეს მოლაპარაკებები ჩვენგან მალულად მიდიოდა „იმედთან“ და საბოლოოდ გადაწყვეტილება მიიღეს, რომ გაყიდვებში „იმედთან“ გაერთიანებულიყვნენ. რა შედეგი გამოიღო ამან, კი ხედავთ. რამდენადაც მესმის, „იმედის“ დამატებითი ინტერესი ის არის, რომ ის 4 400 000, რაზედაც მოლაპარაკება შედგა, საერთოდ არ გადაიხადოს. ხედავს, რომ „იმედის“ გაყიდვების პირობებში ეს არარეალისტური ციფრია, თვითონ აქვთ უზარმაზარი დეფიციტი და „მაესტროსი“ რაღა უნდა გაყიდონ? შესაბამისად, მათი ინტერესიც არის, რომ „მაესტროს“ მეორე მხარეს ისეთი კონტრაგენტი ჰყავდეთ, რომელსაც უნდა, ოთხ მილიონს მისცემენ და უნდა, _ 400 000-ს. ესეც „იმედის“ დამატებითი ინტერესია, რადგან იმთავითვე ეს კონტრაქტი არარეალისტური იყო, იმედი საკუთარ თავს ვერ ყიდის, არათუ „მაესტროს“ სარეკლამო დროს გაყიდის. _ გაჩეჩილაძეების გამოჩენის შემდეგ, ნიკა, თქვენ გააკეთეთ ძალიან საინტერესო განცხადება და დაადასტურეთ, რომ ძმებმა „ნაციონალებთან“ ივაჭრეს. მე ვიცი, რატომ შემიძლია დავასაბუთო, რა ფორმით ხდებოდა ეს გარიგებები, მაგრამ ძალიან საინტერესოა თქვენი, როგორც მაშინდელი ხელისუფლების მაღალჩინოსნის პოზიცია, _ რას გულისხმობდით, როცა თქვით, რომ გაჩეჩილაძეებმა სარფიანად ივაჭრეს? _ აღარ დავაზუსტებ, რაც საჭიროდ მიმაჩნდა, უკვე ვთქვი, მაგრამ, მე მგონი, არავისთვის იყო უცნაური ეს განცხადება. მაშინაც მარტივად ვთქვი და, მე მგონი, ამას დამატებითი მტკიცებულება არ სჭირდება. საკმარისია თვალი გადაავლოთ ამ ადამიანების პოლიტიკურ დინამიკას, მიხვდებით, რომ მათი პოლიტიკური საქმიანობა ყოველთვის კომერციულ გამორჩენას ისახავს მიზნად. ეს ადამიანები არასდროს ჩანან არასაარჩევნო პერიოდში, ყოველთვის გამოჩნდებიან არჩევნებამდე რთულ პერიოდში და მერე ისევ განზე გადგებიან, ანუ გრძელვადიანი პოლიტიკური ამოცანები მათ არ გააჩნიათ. მათი ამოცანაა, პოლიტიკური პროცესიდან იხეირონ. ახლაც ასე ხდება და „ნაციონალების“ დროსაც ასე ხდებოდა. მე გიდასტურებთ, რომ მათ კომერციული ინტერესი ჰქონდათ ყველა შემთხვევაში, როცა ისინი პოლიტიკურ ასპარეზზე გამოჩნდნენ. ასევე, ალბათ, თქვენთვის უცხო არ იქნება, რომ იგივე ინტერესი ჰქონდათ მათ ბადრი პატარკაციშვილის შემთხვევაშიც. ამიტომ ვფიქრობ, რომ აქ ახალი არაფერია, ეს ისედაც ყველამ იცის. მათი გამოჩენა სიმპტომატურია და ყოველთვის ხელისუფლების ინტერესების გატარებას ნიშნავს. _ ჩაგეკითხებით: იყო თუ არა კომერციული ინტერესები მაშინაც, როცა პრეზიდენტ სააკაშვილის ინაუგურაციის დღეს იპოდრომზე უამრავი ადამიანი შეიკრიბა, ყველა ელოდა გადაწყვეტილებას, რომ მიტინგი რუსთაველისკენ დაიძრებოდა, მაგრამ ლევან გაჩეჩილაძისა და დავით უსუფაშვილის ერთობლივი გადაწყვეტილებით, ეს ასე არ მოხდა. _ მე ამაზე პასუხს არ გაგცემთ, ვერა-თქო არა, არ გაგცემთ!!! _ თუმცა ეს იმას არ ნიშნავს, რომ ინფორმაცია არ გაქვთ. _ რა თქმა უნდა, ეს ამას არ ნიშნავს. მოვლენების ლოგიკას დააკვირდით და ბევრი დასკვნის გაკეთებას შეძლებთ. _ ნიკა, არის თუ არა შანსი, „რუსთავი 2“-ისა და „მაესტროს“ მოლაპარაკებები გაგრძელდეს მას შემდეგ, რაც არსებული დავა ფინალისკენ წავა? _ ჩვენ არ ვიცით, პროცესები როგორ სახეს მიიღებს. მაშინაც არსებობდნენ „მაესტროში“ ადამიანები, რომლებსაც უნდოდათ, რომ ეს ასე მომხდარიყო, რადგან იცოდნენ, რომ ჩვენ მხოლოდ კომერციული ინტერესი გვქონდა და ამის გამკეთებლები ვიყავით. ცხადია, ჩვენს ფულს „მაესტროს“ ვერ მივცემდი, მაგრამ გავყიდდით სარეკლამო დროს იმდენად, რომ „მაესტროს“ დაფინანსება აბსოლუტურად გამჭვირვალე ყოფილიყო. თუ „მაესტრო“ ამას მოინდომებს, ჩვენ მზად ვართ, ამ წინადადებას კომერციულად ხელახლა შევხედოთ და ამაზე ვიმსჯელოთ. _ იყო თუ არა პროცესებში ჩართული თავდაცვის ყოფილი მინისტრი დავით კეზერაშვილი? კულუარებში გავრცელდა ინფორმაცია, რომ ძმებმა გაჩეჩილაძეებმა ამ ნაბიჯით „მაესტროს“ დავით კეზერაშვილი ჩამოაშორეს. _ ლოგიკა მაინტერესებს, როგორ უნდა ყოფილიყო ამ პროცესებში ჩართული დავით კეზერაშვილი? ის რომ ჩართული ყოფილიყო, უბრალოდ, „მაესტროს“ იყიდდა, რადგან ბოლო ორი წელია, საუბარი იყო „მაესტროს“ გაყიდვაზე. ჩვენ გავყიდდით „მაესტროს“ საეთერო დროს და „მაესტროში“ მოხდებოდა იმის მონეტიზაცია, რასაც იმსახურებდა. სად უნდა დავინახო აქ კეზერაშვილის ინტერესი? თუ კეზერაშვილის ჩემთან მეგობრობა „მაესტროში“ მის ჩართულობას ნიშნავს, არ ვიცი, მაგრამ არანაირად არ ნიშნავს. ამ ლოგიკით, რასაც მე ვაკეთებ, შეიძლება ყველაფერი კეზერაშვილს დაუკავშირო, იმიტომ რომ ჩემი უახლოესი მეგობარია. „მაესტროს“ სარეკლამო დროზე მასთან მესაუბრა, არ მახსენდება, მე არ ვათანხმებ ამ ტიპის გადაწყვეტილებებს არც მასთან და არც სხვასთან. ის, რომ მისთვის მეკითხა, როგორ ხედავს ფინანსურად ამ პროცესს, შეიძლებოდა მომხდარიყო, რადგან ბიზნესმენია და ჩემთვის კომპეტენციის თვალსაზრისით ძალიან სანდო წყაროა, მაგრამ არც მიკითხავს, რადგან ძალიან ზედაპირზე იდო, რომ ჩვენთვის ეს კომერციულად საინტერესო წინადადება იყო. ნამდვილად არ ვიცი, კეზერაშვილი რა შუაშია. ერთი რამ დადასტურებულად შემიძლია გითხრათ, რომ ზეწოლები იყო არა მხოლოდ ჩახნაშვილზე, არამედ იმ პირებზე, რომლებიც მოლაპარაკებებს აწარმოებდნენ და „რუსთავი 2“-ის მხარეს წარმოადგენდნენ. ესეც ძალიან კარგად ვიცი და იმ მომენტში არ შევიმჩნიეთ, რადგან არ მიგვაჩნდა, რომ ეს რაიმე საფრთხის შემცველი იყო. თუ ზეწოლები გაგრძელდებოდა, ცხადია, საჯაროდ განვაცხადებდი და პროკურატურასაც მივმართავდი. მოვუწოდებ ყველას და, მათ შორის,  ძმებ გაჩეჩილაძეებსაც, თავი შეიკავონ სხვა დროს ამგვარი მოქმედებებისგან იმ ადამიანებთან, რომლებიც „რუსთავი 2“-ის ინტერესებს წარმოადგენდნენ. _ ვის გულისხმობთ? _ მიხვდებიან გაჩეჩილაძეები თვითონ. იმ ადამიანებს ვგულისმობ, რომლებიც მოლაპარაკებებს ჩემი სახელით აწარმოებდნენ. _ ძველბიჭურ გარჩევებზე იყო საუბარი? _ დიახ, კარგად და ზუსტად შეარჩიეთ ტერმინი. მე არ ვერიდები განცხადებების გაკეთებას, როცა ამას საჭიროდ და სტრატეგიულად სწორად მივიჩნევ. არავისთვის ნამუსის შენახვას არ ვაპირებ. კიდევ ერთხელ ჩაივლიან იმ ადამიანების გვერდით, რომლებიც „რუსთავი 2“-ის ინტერესებს წარმოადგენენ, ისე როგორც საჭირო არ არის და ყველაფერს გავაკეთებ იმისათვის, რომ პრემიერის მეგობრებმა პასუხი აგონ კანონის მთელი სიმკაცრით!!! რაც შეეხება პრემიერთან მათ კავშირს, ეს ერთმნიშვნელოვანია. რომ არ დაგიმალოთ, მე შევისწავლე მათი კავშირი ჩემთვის ნაცნობი ადამიანების მეშვეობით და ცალსახაა, რომ მოქმედი პრემიერისთვის ერთ-ერთი ყველაზე დიდი ავტორიტეტი, თუ ერთადერთი არა, არის ლევან გაჩეჩილაძე. არა მგონია, რომ მოქმედი პრემიერი სიმართლეს ამბობდეს, რომ გია გაჩეჩილაძესთან „მაესტროს“ თემაზე საუბარი არ ყოფილა. _ იყო თუ არა ალიბი გია გაჩეჩილაძის ბოლო განცხადება, რომ საჯარო რეესტრის უარყოფითი  გადაწყვეტილება პრემიერს უკავშირდებოდა? _ აბსოლუტური სისულელეა. საჯარო რეესტრი სახის შენარჩუნებას ცდილობს და პროცესებისათვის იმ ფორმის მიცემას, რომ სახელმწიფო არაფერ შუაშია. დაელოდებიან სასამართლოს გადაწყვეტილებას და მერე დაარეგისტრირებენ. ჩემს კოლეგებსაც ვუთხარი, რომ ასე მოხდება. ჩვენს შემთხვევაში საშინელება ქნა რეესტრმა _ მათი მოქმედება პირდაპირი მტკიცებულება გახლდათ იმისა, რომ ხელისუფლება პროცესებში იყო ჩართული. ადრე თუ გვიან, რეესტრი ამას აუცილებლად გააკეთებს, სახელმწიფო ამაში სრულად ჩართულია, ბიძინა ივანიშვილის ფულიც არის. _ თუმცა ივანიშვილს იმედი ჰქონდა, რომ „მაესტროში“ პროცესი ბევრად უფრო წყნარად წავიდოდა, ვიდრე ეს „რუსთავი 2“-ის შემთხვევაში მოხდა. _ ივანიშვილს ეს იმედები ძმებმა გაჩეჩილაძეებმა არ გაუმართლეს. დარწმუნებული ვარ, ამის გამო მათ ძალიან მძიმე ხვედრი ელოდებათ. ასევე დარწმუნებული ვარ, რომ არა მხოლოდ მას, არამედ მათ მეგობარ პრემიერსაც, იმიტომ რომ ეს ერთი გუნდია, ივანიშვილმა გადაწყვეტილება მიიღო და პრემიერად კვირიკაშვილის დანიშვნის გადაწყვეტილება იყო პაკეტში იმ გადაწყვეტილებასთან ერთად, რომ ამ დაჯგუფებისთვის გადაებარებინა პასუხისმგებლობა ქვეყანაში მიმდინარე პროცესებთან დაკავშირებით. აქამდე ქვეყანას კახელების დაჯგუფება მართავდა ირაკლი ღარიბაშვილთან ერთად. ის დაჯგუფება შეიცვალა ამ დაჯგუფებით. ჩვენ მალე ვნახავთ, რომ თანამდებობრივი დანიშვნებიც წავა ამ მიმართულებით. ეს აუცილებლად ასე იქნება, მაგრამ ეჭვი მაქვს, რომ „მაესტროს“ ქეისი იყო პირველი, რაზედაც ამ დაჯგუფებამ კისერი წაიტეხა. ღრმად ვარ დარწმუნებული, რომ ეს მარცხი ძალიან მწარედ მოუბრუნდება მოქმედ პრემიერსაც, იმიტომ, რომ ეჭვი არ მეპარება ბიძინა ივანიშვილის შურისმაძიებლურ უნარებში. _ ნიკა, მიუხედავად იმისა, რომ „მაესტრომ“, თავის დროზე, „რუსთავი 2“-ის პროცესებიდან დისტანცირება მოახდინა, არ გაკეთებულა მხარდამჭერი განცხადებაც კი, თქვენ პირველივე დღეებიდანვე ღია მხარდაჭერა გამოუცხადეთ „მაესტროს“, რატომ? _ პირველ რიგში იმიტომ, რომ დარწმუნებული ვარ, „მაესტროში“ მხარე, რომლის წინააღმდეგაც ახლა იბრძვიან, არის დაზარალებული და უსამართლოდ ებრძვიან. მეორე, მე მხარს ვუჭერ არა „მაესტროს“, არამედ მედიათავისუფლებას და, მათ შორის, ჩემს საკუთარ კომპანიასაც, რაც მთავარია, ქვეყანასაც. მგონია, რომ ამის გარეშე შეუძლებელია დემოკრატიული რეზულტატის მიღება 2016 წლის არჩევნებზე და მესამე: ის, რომ სხვა ცუდად მოიქცა, ჩემთვის არ არის მაგალითი. მე და ჩემი ტელევიზია ისე ვიქცევით, როგორც საჭიროდ მიგვაჩნია. _ ელოდებით თუ არა, რომ „რუსთავი 2“-ის წინააღმდეგ პროცესები განახლდება და ზეწოლები გაგრძელდება? _ ამაზე უკვე გავაკეთე განცხადება, ზეწოლები გაგრძელდება. ამისთვის მზად ვარ. ჩვენ ძალიან ბევრი გვადანაშაულებს, რომ გადატრიალებას ვაწყობდით, მაგრამ ბევრმა დაინახა, რომ ჩვენ სამართლებრივად მოვიგეთ ეს პროცესები და ზუსტად იგივენაირად ვაპირებთ გაგრძელებას. თუმცა ეს იმას არ ნიშნავს, რომ თუ სამართლებრივს მიღმა რაიმე სხვა ფორმით დაგვიპირისპირდებიან, ჩვენ ადეკვატური ვიქნებით ყოველი გამოწვევის წინაშე. _ ნიკა, 2007 წელს, როცა ფილმს „ნოემბრიდან ნოემბრამდე“ აკეთებდით, 315-ე მუხლი რეალურად პირველად თქვენმა ხელისუფლებამ გამოიყენა. იფიქრებდით თუ არა, რომ ამ ქვეყანაში დადგებოდა დრო და ამჯერად უკვე ამ მუხლით თქვენ წინააღმდეგ  დაიწყებოდა გამოძიება? _ არ მიფიქრია, მაგრამ უნდა მეფიქრა, როცა ამაში ვმონაწილეობდი. მე ვფიქრობ, „ნოებრიდან ნოემბრამდე“  გადაჭარბებაა და მე არ მაქვს ამასთან კავშირი. თუმცა ცხადია, იმ გამოძიებასთან მაქვს. პირველი, რაც უნდა ვთქვა, რომ ბადრი პატარკაციშვილის საქმე ნამდვილად არ იყო თითიდან გამოწოვილი, მეორე _ მედიასთან დამოკიდებულების ის ფორმა და ფართო პოლიტიკურ სპექტრთან დამოკიდებულების ის ფორმა, რაც მაშინ იყო, არა ჩემი გადაწყვეტილებით, მაგრამ ჩემი ჩართულობით, სწორი არ იყო. სამართლებრივად ყველაფერი რომ გამართული ყოფილიყო, პოლიტიკურად მიზანშეწონილი არ იყო. ვფიქრობ, პოლიტიკურად ეს ყველაზე დიდი შეცდომაა, რომელიც დამიშვია და რომლის გამოსწორებასაც ახლა ვცდილობ იმით, რომ მედიას ვუჭერ მხარს, მისი დამოუკიდებლობის ყველა გამოვლინებით. ეს არის პასუხი თქვენს კითხვაზე, რატომ ვუჭერ მხარს „მაესტროს“. რაც შეეხება გადატრიალების საქმეს, მაგ საქმეში შედეგი ერთადერთი დადგება, ამაში სრულიად დარწმუნებული ვარ. ჩანაწერების უკანონო მოპოვებასთან დაკავშირებით სხვა შედეგს ეს საქმე არ იმსახურებს და არც დადგება ეს შედეგი. იმ საუბრებში არანაირი დანაშაულის შემადგენლობა არ არის, რაც სისხლის სამართლებრივ კვალიფიკაციას იმსახურებს. ერთადერთი, რაც ყველაზე მნიშვნელოვანია, საიდან მოვიდა ეს ჩანაწერები, შესაძლებლობა მხოლოდ ორია, ან ხელისუფლება გვისმენდა უკანონოდ, ეს ცუდია, ან უარესი, _ უკანონოდ გვისმენდა რუსეთის სპეცსამსახური და ხელისუფლებამ მათთან ითანამშრომლა. ორივე შემთხვევაში პასუხისმგებლობა აუცილებლად დადგება. _ ეს მოხდება მხოლოდ მას შემდეგ, რაც ქვეყანაში ხელისუფლება შეიცვლება. ელოდებით თუ არა, რომ 2016 წელს ქვეყანას ახალი ხელისუფლება ეყოლება? _ არ ვიცი, ამაზე არ ვფიქრობ, ზუსტად მხოლოდ ერთი რამ ვიცი, რომ ამ ხელისუფლებას ხმას არ მივცემ. ვის მივცემ ხმას, ეს ჯერ არ გადამიწყვეტია. _ თუმცა ძნელი გამოსაცნობიც არაა. _ არ ვიცი, ზუსტად ვიცი, რომ ხმას მივცემ ევროანტლანტიკურ ძალას. ეს ხელისუფლება კი, ასეთად არ მიმაჩნია. ყველაფერი იქნება რევიზირებული, როცა ივანიშვილის ხელისუფლება აქ აღარ იქნება, ეს 2016 წელს მოხდება თუ უფრო გვიან, 2020 წლის არჩევნებზე, თუ სადღაც შუაში, რომ ბოლომდე ვერ მიიყვანონ ვადა, ეს არ ვიცი, მაგრამ აუცილებლად მოხდება. რაც შეეხება ჩემს პროგნოზს, 2016 წელს კოალიციის პირობებში დასავლურ ძალებს არჩევნების მოგების შანსი აქვთ. მათ შეუძლიათ, ბიძინა ივანიშვილი ისტორიის სანაგვეზე გაისტუმრონ. ვფიქრობ, რომ ეს შანსი არსებობს, თუმცა ასევე მგონია, რომ ეს შანსი პირადად ბიძინა ივანიშვილისთვისაც არის. როგორ პარადოქსულადაც არ უნდა ჟღერდეს, თუ ის არჩევნებზე დამარცხდება, ისე მშვიდად წავა, რომ არავინ ხელს არ მოჰკიდებს, ისიც და მისი გუნდიც. იმ შემთხვევაში, თუ არჩევნებზე იძალადა და მოიგო, ეს მოხდება ძალიან მცირე უპირატესობით. ეს იქნება პიროსის გამარჯვება და ვადას ბოლომდე ვერ მიიყვანენ, ეს პიროსის გამარჯვება რით დასრულდება, სულაც არ არის ჩემთვის სასურველი სცენარი, მაგრამ, ჯერჯერობით, ეს ხელისუფლება საარჩევნო ძალადობისთვის მზად არის, _ ამას აკეთებს მედიაში, ამას აკეთებს არჩევნებზე, სპეცუბნები კიდევ ცალკე პრობლემაა. ძალიან ცუდად დასრულდება მათთვის, ქვეყნისთვისაც არაა სასურველი, მაგრამ საქართველო ამის გამო არ დაიღუპება, თვითონ  კი ძალიან ცუდად დაამთავრებს. მათი რეიტინგიდან, მათი დეგრადირების ტემპიდან, ქვეყნის მდგომარეობიდან  გამომდინარე, დემოკრატიული არჩევნების პირობებში, ვეჭვობ, რომ ხელისუფლებას  გამარჯვების რამე შანსი ჰქონდეს.  

                                                                                                                     ელისო კილაძე