გიგა გელხვიიძე

ოპოზიციური ერთობის მორიგი დემონსტრირება, რას განიხილავენ საქართველოს მე-5 პრეზიდენტის ოფისში შეკრებილი პოლიტიკური პარტიების ლიდერები? რას უნდა ელოდოს „ქართული ოცნება“ ბალტიის ქვეყნების ინდივიდუალური სანქციების შემდგომ და არის თუ არა კვლავ მნიშვნელოვანი აშშ-ისთვის საქართველო? _ ამ და სხვა საკითხების შესახებ „ქრონიკა+“-ს ესაუბრება „ძლიერი საქართველოს“ ერთ-ერთი ლიდერი, გრიგოლ გეგელია:

_ ბატონო გრიგოლ, პროცესები, რომლებიც ახლა მიმდინარეობს საქართველოში, როგორ აღიქმება ქვეყნის ფარგლებს გარეთ? _ თქვენ აქტიურად ადევნებთ თვალყურს და ჩართული ხართ საგარეო ფორმატის საკითხებში. როგორია არსებული ქართული რეალობის აღქმები პარტნიორ სახელმწიფოებში?

_ დღეს ყველა ჩვენი ძირითადი პარტნიორი ძალიან შეშფოთებული და იმედგაცრუებულია იმით, რომ საქართველოში არსებული ე. წ. ხელისუფლების პირობებში საქართველო სრულად და საბოლოოდ ჩამოშორდა ცივილიზებულ მსოფლიოს. ამ ე. წ. ხელისუფლებამ ყველაფერი გააკეთა იმისთვის, რომ საქართველო კარგავდეს შანსებს და შესაძლებლობებს, ნაცვლად იმისა, რომ მოლდოვისა და სომხეთის მსგავსად ჩვენ ვაკეთებდეთ ყველაფერს, რომ შევუერთდეთ ახალ ფორმატებს, მივიღოთ მეტი ფული და ინვესტიცია და შევქმნათ შანსები საქართველოს მოქალაქეებისთვის. კითხვა მინდა დავსვა: ვინმე გრძნობს თავს უკეთესად? ვინმე უფრო მეტი მშვიდობის, მეტი უსაფრთხოების, მეტი კეთილდღეობის მდგომარეობას ხედავს? ვინმე ფიქრობს, რომ საქართველო დაუახლოვდა ევროკავშირსა და ევროპას? ან ვინმე ხედავს პერსპექტივას? პასუხია _ არა! ამ ხელისუფლებამ არა მარტო ცელი გამოუსვა საქართველოს საგარეო კურსს, არამედ ყველა ქართველი დააღალატა, როდესაც დაგვაკარგვინა და გვაკარგვინებს იმ უნიკალურ შანსებსა და შესაძლებლობებს, რომლებიც ჩვენს ქვეყანას ისტორიულად მიენიჭა და რომელიც, ამავე დროს, სწორი პოლიტიკის პირობებში სრულად განხორციელებადი და მიღწევადია.

_ თუ ჩვენ უნდა განვიხილოთ და როგორც „ქართულ ოცნებაში“ აცხადებენ, განიხილავენ კიდევაც ამერიკას, როგორც სტრატეგიულ პარტნიორს, მისთვის მიუღებელი იქნება და არის კიდევაც უკვე ამაზე საუბარი, ისეთი სტრატეგიული ობიექტის არსებობა ჩინეთის ხელში, როგორიც არის ანაკლიის პორტი. რა შედეგს მოიტანს „ოცნების“ ეს ქმედება ამერიკასთან ურთიერთობაში?

_ ანაკლიის პორტის გადაცემა ჩინეთისთვის ეს არის ერთ-ერთი ყველაზე კარგი გამოხატულება იმ სრული საგარეო კაპიტულაციის, რაც ამ ე. წ. ხელისუფლების პირობებში გამოაცხადა „ქართულმა ოცნებამ“. მაშინ, როდესაც ჩვენს სახელმწიფოს აქვს ძალიან მკაფიოდ განსაზღვრული ეროვნული ინტერესი, როდესაც ჩვენს სახელმწიფოსა და მისი მოსახლეობის აბსოლუტურ უმრავლესობას გაცხადებული აქვს ნატოში წევრობა, როგორც ერთ-ერთი უდიდესი ეროვნული მიზანი, ამ ფონზე სტრატეგიული ობიექტების დათმობა ისეთი მხარეებისთვის, რომლებიც ეწინააღმდეგებიან ნატოს გაფართოებას, არის პირდაპირ, გრამატიკულადაც კი პირდაპირ წინააღმდეგობაში იმ ჩანაწერთან, რაც არსებობს ქართულ კონსტიტუციაში. ამიტომ ეს პოლიტიკა ვერ იქნება თავსებადი საქართველოს კონსტიტუციასთან და იმ ეროვნულ ინტერესთან, რომელიც არის ძალიან მკაფიოდ გამორკვეული და არ წარმოადგენს დავის საგანს. ჩვენ რეალურად ვიცით, რომ მოსახლეობის 85% უჭერს ამას მხარს, ეს რომ იყოს სადავო საკითხი, მაშინ სხვა თემა იქნებოდა, მაგრამ როდესაც ვიცით, რომ ეს არ არის სადავო საკითხი, აქ პირდაპირ ეროვნულ ინტერესს ღალატობს ხელისუფლება. რაც შეეხება შეკითხვის მეორე ნაწილს, რა თქმა უნდა, ეს გამოიწვევს საქართველოს შემდგომ იზოლირებას და რას ნიშნავს ეს? _ თითოეული ქართველი მოქალაქე აგებს ამით: შემოდის ნაკლები ინვესტიცია, შემოდის ნაკლები პერსპექტივა, არის ნაკლები შემოსავალი და ნაკლები სტაბილურობა. რომელ მიზანსა და ამოცანას იცავს ეს პოლიტიკა? ეს კითხვა ხომ ისმის, მაშინ როდესაც ტერიტორიული გამთლიანების არსის არავითარი ხედვა არ დაგვინახავს ამ ხელისუფლებისგან.

_ ბოლო პერიოდის განმავლობაში პირველი შემთხვევა იყო ანაკლიის პორტის საკითხი, როდესაც აშშ-მა ახსენა საქართველო, მანამდე ჩვენზე არანაირი ლაპარაკი არ ყოფილა აშშ-ის ახალი ადმინისტრაციის პირობებში. რატომ არის დუმილი საქართველოსთან მიმართებით? ეს არის გამოწვეული უკრაინის საკითხის წინა პლანზე წამოწევით, თუ სხვა რამესთან გვაქვს საქმე?

_ რასაკვირველია, „ქართული ოცნების“ ქმედებებმა და საგარეო რიტორიკამ მნიშვნელოვანი ზარალი მიაყენა საქართველო-ამერიკის ურთიერთობებს და ამისი ფორმალური გამოხატულება არის თუნდაც ის, რომ აშშ-მა გააჩერა სტრატეგიული ურთიერთობა საქართველოსთან. რაც შეეხება უშუალოდ საკუთრივ პრეზიდენტ ტრამპის ახალ ადმინისტრაციას, ბუნებრივია, მას აქვს ძალიან ბევრი საკითხი მოსაგვარებელი გლობალურ ასპარეზზე და ბუნებრივია, რუსეთის უკრაინაში შეჭრის დასრულება და პოლიტიკური მშვიდობის მიღწევა არის მნიშვნელოვანი და კარგი ამოცანა. შესაბამისად, მთავარი ფოკუსის საგანი ეს საკითხები არის. მაგრამ ეს არ ნიშნავს, რომ ამერიკა არ არის დაინტერესებული საქართველოთი და ნამდვილად არ ნიშნავს, რომ ამერიკა არ იმოქმედებს განგრძობითად ქართული დემოკრატიის დასაცავად და ქართველი ხალხის პროტესტის მხარდასაჭერად.

ამას მოწმობს ისიც, რომ როგორც სენატი, ასევე კონგრესი არის ძალიან ფხიზლად ჩვენს თემატიკაზე, იანვარში გვქონდა შეხვედრები „ძლიერი საქართველოს“ დელეგაციას, მამუკა ხაზარაძეს, ბადრი ჯაფარიძესა და მე აშშ-ში და ვხედავთ, რომ სულ რამდენიმე დღის წინათ „მეგობარი აქტი“ კიდევ უფრო დაიძრა და გრძელდება მისი განხილვა. უბრალოდ, ახლა ამერიკის შიდა პოლიტიკური თემები არის წინა პლანზე, თუმცა ვხედავთ, რომ „მეგობარი აქტი“ დღის წესრიგში დაბრუნდა, რაც ამერიკის პოლიტიკისთვის მნიშვნელოვანია, რადგან ძალიან ბევრი მსგავსი აქტი განიხილება ხოლმე და ზოგჯერ წლები სჭირდება აქტის განხილვას და მიღებას. ჩვენ ვხედავთ, რომ რეალურად ეს აქტი დაბრუნდა.

_ რა შედეგების მომტანი იქნება „მეგობარი აქტი“ „ქართული ოცნების“ წარმომადგენლებისთვის მისი დამტკიცების შემთხვევაში? რა დარტყმა შეიძლება მიადგეს ე. წ. ხელისუფლებას?

_ იმის გათვალისწინებით, რომ „ქართული ოცნება“ აცდენილია საქართველოს და ქართველი ხალხის რეალურ ინტერესებს, რა თქმა უნდა, „ქართული ოცნებისთვის“ იქნება ცუდი იმიტომ, რომ მას კიდევ უფრო მკაფიოდ დაერქმევა ის სახელი, რაც ფორმალურად უკვე ჰქვია. რაც შეეხება საქართველოს, ეს აქტი ქვეყანას სთავაზობს მეტ კარგ შესაძლებლობას, მეტ ვაჭრობას პირდაპირ შეერთებულ შტატებთან, უვიზო მიმოსვლას, კულტურულ და საგანმანათლებლო შანსებს ჩვენი ახალგაზრდებისთვის, ამიტომ ეს აქტი ახალისებს საქართველოს, ქართველ ხალხს, მის ეროვნულ ინტერესებს და სჯის ბოროტმოქმედ, დესპოტ ხელისუფლებას, რომელმაც გადაწყვიტა, რომ მილიონობით ადამიანის არჩევანი გაეუქმებინა და უგულებელეყო.

_ ევროკავშირმა არაერთი რეზოლუცია მიიღო „ქართულ ოცნებასთან“ მიმართებით. ამის შემდეგ ქვეყნებმა ინდივიდუალურად დაიწყეს სანქციების დაკისრება _ რას უნდა ველოდეთ საბოლოოდ ევროკავშირისგან და ევროპის ქვეყნებისგან?

_ ჩვენ ახლახან გვქონდა მნიშვნელოვანი, მრავალპარტიული ვიზიტი ბალტიის ქვეყნებში, სადაც შევხვდით საგარეო კომიტეტების თავმჯდომარეებს. ეს იყო ვიზიტი ლატვიაში, ესტონეთსა და ნორვეგიაში, ჩვენ შევხვდით საგარეო საქმეთა სამინისტროების ხელმძღვანელებს, იმ პირებს, რომლებიც უშალოდ მუშაობენ პოლიტიკის შემუშავებაზე, სახელმწიფოებისა და რეგიონების კუთხით და ამავე დროს შევხვდით, როგორც გიხარით, პარლამენტის საგარეო კომიტეტების თავმჯდომარეებს და გვქონდა ძალიან მნიშვნელოვანი საუბრები იმაზე, თუ როგორ დავიცვათ საქართველოს ეროვნული ინტერესი. რაც შეეხება სანქციებს, ეს არის მნიშვნელოვანი ზომა იმისთვის, რომ ამ რეჟიმმა იგრძნოს საერთაშორისო საზოგადოების წნეხი და ის, რომ არიან იზოლირებულები. თუ არ დაინიშნება ახალი საპარლამენტო არჩევნები და თუ ქართველ ხალხს არ მიეცემა საშუალება, რომ საკუთარი პოლიტიკური არჩევანი დააფიქსიროს თავისუფალ, ნორმალურ გარემოში, ამ შემთხვევაში წნეხი არ შეჩერდება და პირიქით, იქნება სულ უფრო მზარდი და მათ შორის მოიცავს ისეთი ტიპის ზომებს, რომელსაც ფინანსური და ეკონომიკური სანქციები ჰქვია. შემიძლია გითხრათ, რომ არა მხოლოდ ბალტიის ქვეყნებში, ევროპის ძალიან ბევრი სახელმწიფოს მასშტაბით აქტიურად განიხილება ამ სანქციების არათუ გაგრძელება, არამედ გაღრმავება. 13 ევროპული სახელმწიფო ღიად უჭერს მხარს ახალი საპარლამენტო არჩევნების ჩატარებას საქართველოში.

_ „ქართული ოცნება“ ბოლო დღეების განმავლობაში მასიურ შეტევას ახორციელებს ევროპელი ქვეყნების ელჩებზე. შესაძლებელია თუ არა, რომ დაიწყონ ელჩების გაძევების „სპეცოპერაცია“ იმ მოტივით, რომ ისინი ერევიან შიდაპოლიტიკურ საქმიანობაში?

_ ელჩები არ ვიტყოდი, რომ ერევიან, ისინი გვგულშემატკივრობენ და გვირჩევენ როგორც მეგობრები და როგორც იმ სახელმწიფოების ხმოსნები და წარმომადგენლები, რომლებიც ჩვენს ქვეყანაში ათწლეულების განმავლობაში ხარჯავენ მილიონობით ევროს, რათა ჩვენ ვიყოთ უკეთესი სახელმწიფო, ვიყოთ უფრო დაცული, სტაბილური იმისთვის, რომ ევროპული მომავალი და შანსი გვქონდეს. ხალხს, რომელიც ამით არის დაკავებული ათწლეულებია, აქვს იმის უფლება, რომ ჰქონდეს მკაფიო პოზიცია, როდესაც ხედავს, რომ ქვეყანა არის გადაჩეხის პირას. ისინი მეგობრულად გვირჩევენ, რომ თუ ჩვენ გვსურს ევროპული მომავალი და ძლიერი ევროპული სახელმწიფო, ამას სჭირდება მოქმედება. „ქართული ოცნება“ აცდენილია არა მხოლოდ ელჩებთან, არამედ თავის ხალხთანაც. საკუთარი ხალხის 85% რასაც ამბობს, იმასთან არის აცდენილი, ასევე მსოფლიოსთან. ის დემარში და თავდასხმები, რასაც ელჩების მიმართ აკეთებენ, არ დარჩება არც უყურადღებოდ და არც უშედეგოდ, ამ ყველაფერს ექნება თავისი წილი შედეგები.

_ სანქციების საკითხს მინდა, დავუბრუნდე _ როდესაც ბალტიის ქვეყნებმა პირველად დაასანქცირეს „ქართული ოცნების“ მაღალჩინოსნები, ამის შემდგომ გაფართოება დაიწყო სასანქციო წრემ ევროკავშირის ქვეყნებში „ქართული ოცნების“ წარმომადგენლების მიმართ. უნდა ველოდოთ თუ არა იმავეს ახლაც?

_ სანქციების არეალი „ქართული ოცნების“ წარმომადგენლებთან მიმართებით გაიზრდება. ჩვენთვის მთავარი და მნიშვნელოვანი არის, რომ სახელმწიფო არ დაზარალდეს და საქართველოს მოქალაქეები, ქართველი ერი, ჩვენ ადამიანები არ დავზარალდეთ კიდევ უფრო მეტად, ვიდრე უკვე დაგვაზარალა ეკონომიკურად, სოციალურად, იმიჯის კუთხით და ყველანაირად ამ ბოროტმოქმედმა ხელისუფლებამ. უშუალოდ ხელისუფლების მიმართ სანქციების პოლიტიკა გაგრძელდება და გაღრმავდება, როგორც ევროპული კავშირის სახელმწიფოების მხრიდან, ასევე დანარჩენი ცივილიზებული თანამეგობრობის მხრიდან და ეს სანქციები არ იქნება მხოლოდ სამოგზაურო შეზღუდვებით გამოხატული, არამედ ასევე ექნება ფინანსური და ეკონომიკური ხასიათის.

_ ოპოზიციურ ერთობაზე მინდა, გკითხოთ: 31 მარტს საქართველოს მე-5 პრეზიდენტმა სალომე ზურაბიშვილმა დააანონსა მასშტაბური აქცია. ცხადად არის ნათქვამი, რომ ამ დღეს, კიდევ ერთხელ გამოჩნდება ოპოზიციური ერთობა და ამას დაინახავს ხალხი. რა საკითხებზე ახერხებს შეჯერებას ოპოზიცია და როგორია დღეს ეს ერთობა?

_ ოთხი თუ ხუთი წლის განმავლობაში საქართველოს ოპოზიციას უნდა შეექმნა ერთიანი კოორდინების ფორმატი, ერქმეოდა მას სახალხო პარლამენტი თუ სხვა სახელი, ამიტომაც ჩვენ მივესალმებოდით და კვლავაც მივესალმებით, რომ საერთო კოორდინაციის ფორმატი იყოს. ჩვენ გვაქვს კარგი მაგალითი ოპოზიციის დემოკრატიული ძალების, საერთო საგარეო პოლიტიკის მუშაობის სახით, რომელშიც არის წარმოდგენილი ყველა კოალიციის საგარეო მდივანი. ეს ჯგუფი ძალიან ეფექტიანად ყოველდღიურ რეჟიმში მუშაობდა და მუშაობს. ვაგრძელებთ ჩვენი ხალხის დემოკრატიული ინტერესების ლობირებას მთელი მსოფლიოს მასშტაბით და ვისურვებ, რომ ბევრი ასეთი ფორმატი იყოს. საუბარია თანამშრომლობაზე საერთო მიზნების მისაღწევად. ეს არის ახალი საპარლამენტო არჩევნები და ყველა პოლიტპატიმრის განთავისუფლება.