ირინა მაკარიძე

რეჟიმს ნერვებმა უმტყუნა _ კანონმდებლობის გამკაცრებასთან ერთად აძლიერებს რეპრესიებს, იზრდება დაკავებულთა რაოდენობა და აბსურდული ბრალდებებით ჯარიმები, თუმცა პროტესტი არ წყდება. 28 ნოემბრის შემდეგ  ერთი დღითაც არ შეჩერებულა ხალხის წინააღმდეგობა.

უწყვეტ პროტესტზე, რეჟიმის რეაქციასა და დიქტატურის დამარცხების გზებზე „ქრონიკა+“-ს ესაუბრება „ერთიანობა ნაციონალური მოძრაობის“ ერთ-ერთი ლიდერი, ხატია დეკანოიძე:

_ ხალხი არ აპირებს უკან დახევას, ამიტომ ცდილობს ახლა ბიძინა ივანიშვილი, რომ როგორმე პროტესტი ჩაახშოს რაც შეიძლება სწრაფად. ასეთი განცდა მაქვს, რომ უნდათ, სანამ დათბება, მარტამდე, ეს ყველაფერი მოილიონ. მგონია, იმასაც ხვდებიან, რომ ეს გამორიცხულია. ამ ხალხს ვერაფერი დაუდგება წინ, ვერც ჯარიმები, ვერც რეპრესიები და, საერთოდ, ვერაფერი.

_ რით ახსნით, რომ „ოცნებამ“ მიიღო გადაწყვეტილება და დეპუტატის უფლებამოსილება შეუწყვიტა 49 ოპოზიციონერ პარლამენტარს?

_ ნაკლებად მაინტერესებს ეს მანდატი და არც არავინ აპირებდა მანდ ინტეგრაციას. ყველაზე მნიშვნელოვანია ის ფაქტი, რომ პარლამენტი არალეგიტიმურია. ამ გადაწყვეტილებით ჩანს, რომ მოჩვენებითადაც აღარ უნდათ, რამე დემოკრატიულობის სახე შეინარჩუნონ, ეს არის, რაც ჩანს. შესაძლოა, სისხლის სამართლებრივი დევნის დაწყებასაც აპირებენ. სხვადასხვა მიზეზი შეიძლება იყოს, მაგრამ, ძირითადად, ივანიშვილის რეჟიმიც ისე იქცევა, როგორც იქცევიან ხოლმე რეჟიმები.

_ ოპოზიციური ფლანგიდან მანდატები რჩება გახარიას პარტიას. რამდენად მნიშვნელოვანია, რომ მათაც დაწერონ განცხადებები პარლამენტის დატოვების შესახებ?

_ არ ვარ დიდად მომხრე პარტიული კინკლაობის. იმედი მაქვს, ისინიც მივლენ იმ დასკვნამდე, რომ დატოვონ მანდატები, თუმც, არ მგონია, რომ ვინმემ (ოპოზიციიდან) შეიძლება გააგრძელოს ამ პარლამენტში მუშაობა.

_ არ აქვს პრინციპული მნიშვნელობა, პარლამენტში 101 დეპუტატი იქნება თუ თუნდაც 99, ანუ საერთო რაოდენობის 2/3-ზე ნაკლები?

_ ჩემთვის ეს თემა ახლა საინტერესო არ არის. პარლამენტზე საუბარი საერთოდ არანაირი პრინციპული საკითხი არ არის. ყველას ვურჩევდი, რომ ნაკლები ილაპარაკონ ამ თემაზე, რადგან ხალხს ეს არ აინტერესებს. ხალხს აინტერესებს რეჟიმის დამარცხება. ვერ ვხვდები, პარლამენტში მანდატების საკითხი რატომ არის საინტერესო? პრინციპული საკითხია, შევინარჩუნოთ რეჟიმის არალეგიტიმურობა. სხვა,არ მგონია, რომ პრინციპული მნიშვნელობის იყოს ამ შემთხვევაში.

_ თუმცა ვხედავთ, რომ დაჩქარებული წესით იღებენ რეპრესიულ კანონებს. მათ წინააღმდეგობის გამწევიც აღარავინ ჰყავთ პარლამენტში, რომ დროში მაინც შეაფერხონ ისინი. ძალიან სწრაფად ახერხებენ ახალ-ახალი რეპრესიული და სადამსჯელო კანონების მიღებას. ამის შესახებ და ამ კანონებზე, რომლებიც მიიღეს და რომლებიც ასევე დააანონსეს, რას იტყვით?

_ რეჟიმი ყველაფერს გააკეთებს, სანამ რეჟიმია და სანამ არ დაემხობა. მე გაცილებით უარესსაც ველოდები და არაფერი მიკვირს. 12 წელია, ოპოზიციაში ვარ და ვიცი, ბიძინა ივანიშვილი ვინ არის და რას წარმოადგენს. ამიტომ მთავარია, ივანიშვილი დაემხოს, ჩვენ მოვიპოვოთ ახალი არჩევნები და დემოკრატიული მმართველობა დამყარდეს, თორემ ბიძინა ივანიშვილი ყველაფერს გააკეთებს, ყველანაირ კანონს მიიღებს, რომ პროტესტი ჩაახშოს.

_ ეს, პირიქით, მათ შიშს ხომ არ აჩვენებს?

_ არ მიყვარს ეს ყალბი იმედისმომცემი განცხადებები, რომ „აი, აგონიაშია“... არა, მონოლითურია ჯერ რეჟიმი, რამდენიმე ფუნდამენტზე დგას, მათ შორის, ეს არის პოლიცია, სადამსჯელო ჯგუფები, მაგრამ რომ აწუხებს ივანიშვილს ეს ყველაფერი, ძალიან კარგად ჩანს. ასე ვგრძნობ, რადგან მისთვის მნიშვნელოვანია, რომ ლეგიტიმაცია ჰქონდეს და დაწყნარდეს კიდეც ხალხი. ის კოლბაში რატომ ზის? იმიტომ, რომ არ უყვარს დისკომფორტი. ამდენად, მგონია, რომ ეს აწუხებს, რაც ხდება. ვფიქრობ, ძალიან მნიშვნელოვანია, გვესმოდეს, რომ არ უნდა შევწყვიტოთ ეს პროტესტი.

_ ამ კანონების გამკაცრება, ჯარიმების გაზრდა, დემონსტრანტების წინააღმდეგ სასტიკი მეთოდებით გასწორება არ შეამცირებს პროტესტის მუხტს?

_ რეჟიმი ცდილობს, პროტესტი გაგუდოს, დაასრულოს რაც შეიძლება სწრაფად, რადგან ჰგონია, რომ მერე კარგ ამინდში გაუჭირდება ადამიანების სახლში ჩაკეტვა და „გაგუდვა“. ამიტომ ძალიან სწრაფად მოქმედებს. მაგრამ რა ვიცი, რომ დააჯარიმებენ ამ ადამიანებს, ქუჩაში აღარ გამოვლენ, თუ რა?

_ „ოცნებამ“ დააანონსა, რომ მიიღებენ „ფარას“ ანალოგიურ კანონს, რომელიც არასამთავრობო სექტორის მოგუდვას ისახავს მიზნად. ამის შესახებ რას იტყვით?

_ „რუსული კანონის“ მიღების შემდეგ აღარაფრის უნდა გაგვიკვირდეს. რაც უნდათ, ის შემოიტანონ, მთავარია, ჩვენ უნდა ვიაქტიუროთ და ეს რეჟიმი წავა.

_ რატომ დასჭირდათ? წესით, რუსული კანონი ხომ უნდა ამოქმედებულიყო?

_ პროპაგანდისთვის სჭირდებათ ყველაფერი.

_ მედიის რეგულირებას აპირებენ და ბრიტანული კანონმდებლობის შემოტანით „იმუქრებიან“, ეს მათთვის რამე შედეგს გამოიღებს?

_ არაფერ შედეგს არ გამოიღებს, ამ ხალხის სახლებში შეყვანა და მედიის გაჩუმება არის შეუძლებელი.

_ თქვენ თქვით, რომ ცდილობენ, პროტესტის ჩახშობა გაზაფხულამდე მოასწრონ...

_ გაზაფხული საერთოდ აქტიურია, შესაბამისად, რეჟიმი ცდილობს, რაც შეიძლება მალე ჩაახშოს ეს ყველაფერი, მაგრამ არ გამოუვა, ყველამ კარგად ვიცით. როდესაც გადალახავ ზღვარს, მით უმეტეს, ჩვენნაირ თავისუფლების მოყვარულ საზოგადოებაში, მუხტის ჩახშობა, ადამიანების შეყვანა სახლებში და ზოგადად ყველას გაჩუმება, რა თქმა უნდა, არის შეუძლებელი. თუ მართლა ყველას დაგვიჭერს და დაგვხვრეტს, ასე შეიძლება, კი.

_ სამწუხაროდ, ეს შეძლო წინა საუკუნეში იმ რეჟიმმა. ეს უსიამოვნო შედარებაა, მაგრამ რამდენად რეალურია საფრთხე, რომ ამჯერადაც შეძლოს?

_ თუ ჩვენ არ ვიმოქმედებთ და არ ვიქნებით მოწოდების სიმაღლეზე და ბრძოლაში, რა თქმა უნდა, არის იმის საფრთხე, რომ ზუსტად ბელარუსიზაცია მოხდეს საქართველოში. ამაზე არავინ დაობს, მაგრამ ჩვენ ყველაფერი უნდა გავაკეთოთ, რომ ეს არ მოხდეს. წინააღმდეგ შემთხვევაში, ვინც სახლში შევა და დაჯდება, რეჟიმი იმასაც მიაკითხავს. ის, რომ ვიღაც თუ გაჩერდება და გარეთ აღარ გამოვა, ამით ეს რეჟიმი გაჩერდება და შეაჩერებს რეპრესიებს, ეს ასე არ მოხდება. ამიტომ ის რომ არ მოხდეს, რაც იყო, ვთქვათ, საუკუნის წინ, ის რომ არ მოხდეს, რაც იყო, ვთქვათ, ბელარუსსა და სხვაგან, რომ ჩვენ გავიმარჯვოთ და გავიმეოროთ მოლდოვის ვარიანტი, სადაც გააგდეს ოლიგარქი, ამისთვის ძალიან ბევრი უნდა ვიბრძოლოთ. ჩვენ, რა თქმა უნდა, ყოველთვის უნდა გვახსოვდეს ეს მაგალითები, რომ არ განელდეს ეს ბრძოლა და საქართველომ არ დაკარგოს სახელმწიფოებრიობა.

_ განსხვავებით წინა საუკუნისგან, ჩვენ ახლა გვაქვს დასავლეთის მხარდაჭერა. რას იტყვით ამის შესახებ, იმ სანქციებზე, რომელიც კიდევ უფრო მეტად ამოქმედდება?

_ რა თქმა უნდა, უპრეცედენტო მხარდაჭერა გვაქვს. აშშ-ს პრეზიდენტ ტრამპის ადმინისტრაცია ქვეყნის შიდა პრობლემების შემდეგ, რა თქმა უნდა, გაცილებით უფრო აქტიური იქნება საგარეო საკითხების მიმართ, მათ შორის, უკრაინის საკითხთან მიმართებით. ამიტომ ეს ყველაფერი ძალიან ჭკვიანურად უნდა გამოვიყენოთ. რაც შეეხება სანქციებს, ამ საკითხზე შარშანაც რომ ვლაპარაკობდით, მაშინაც ყველა ამბობდა, _ არა, ეგ ხომ არარეალურია. ფაქტია, სანქციების რეჟიმი ამოქმედდა, ივანიშვილი დასანქცირდება. ვმუშაობთ ყველა ქვეყანასთან ეროვნულ სანქციებზე, მათ შორის იმაზე, რომ მათ ვეღარ შეძლონ ევროპაში თავისუფლად მიმოსვლა.

_ თუმცა გულხელდაკრეფილი არც ოლიგარქი ზის და პარალელურად ცდილობს აღმოსავლეთით, აზიაში გადაიტანოს თავის აქტივები. ვნახეთ, რომ იაპონიაშიც აქვთ მცდელობა... ამის შესახებ რას იტყვით?

_ იაპონიაშიც გვაქვს კავშირები, ძალიან ბევრი კარგი ადამიანი მუშაობს იქ, რომ დემოკრატიულ ქვეყანაში ბიძინა ივანიშვილის საცეცები და დამნაშავე წარმომადგენლობა თავისუფლად ვერ გრძნობდეს თავს.

_ როგორ ფიქრობთ, ახლა ოლიგარქი მიდის ვა-ბანკზე, მის ხელთ არსებულ უკანასკნელ ბერკეტებს იყენებს, თუ რისი იმედი აქვს მას?  

_ არ ვიცი, ვა-ბანკზე მიდის თუ რას აკეთებს, ვიცი მხოლოდ, რა არის ჩვენი ამოცანა. ჩვენი ამოცანა არის, რომ უნდა დავამარცხოთ ბიძინა ივანიშვილი. მე ივანიშვილის ფსიქოლოგიას ვერ გავაანალიზებ. რა თქმა უნდა, ყველა ოლიგარქი და რუსული სტილის მმართველობის ადამიანი შეეცდება, საკუთარი ძალაუფლება ყველანაირი ხერხით განამტკიცოს, მაგრამ ჩვენ როგორ მოვიქცევით, ეს არის ძალიან მნიშვნელოვანი.

_ ყველა დიქტატორს აქვს თავისი ნიუანსი, როგორ უნდა დავამარცხოთ ეს კონკრეტული დიქტატორი?

_ სიმტკიცით, გამძლეობით, პროტესტით, შეუპოვრობით, მარშით, მანიფესტაციით, ყველა დემოკრატიული ხერხით. პირველ რიგში, არ უნდა შეგვეშინდეს მათი, რადგან გაცილებით ბევრნი ვართ. რაც მთავარია, ერთად დგომით _ ეს არის ძალიან მნიშვნელოვანი. დიქტატურა კიდევ უფრო გაძლიერდება, თუ ჩვენ არ გავაკეთებთ ყველაფერს მის თავიდან მოსაშორებლად. ასე ხდება საერთოდ. მაგრამ ვფიქრობ, რომ სწორი გზით მივდივართ, ახლა უნდა ვიყოთ მტკიცედ, არ უნდა დავიღალოთ. სხვა რეცეპტი არ მაქვს და ვერც ვერავინ გეტყვით ამას.