ენმ-ს თავმჯდომარე ნიკა მელია კიევიდან დაბრუნდა, სადაც საქართველოს მესამე პრეზიდენტთან კონსულტაციები გამართა. რაზე შეთნხმდნენ ყოფილი მმართველი პარტიის დამფუძნებელი მიხეილ სააკაშვილი და ახლანდელი ლიდერი? _ ამის შესახებ საზოგადოება თვის ბოლოს შეიტყობს, ანუ როგორც მელიამ განაცხადა, რამდენიმე დღეში გახდება ცნობილი, „ნაციონალური მოძრაობა“ პარლამენტში შედის თუ არა.

ისე, ყველაზე დიდ და გავლენიან ოპოზიციურ პარტიაში განწყობები ორადაა გაყოფილი, რაც იმას ნიშნავს, რომ ლიდერშიფის ნაწილი, მაგალითად, ხატია დეკანოიძე, თინა ბოკუჩავა და სხვები მიიჩნევენ, რომ არსებული რეალობიდან გამომდინარე, საკანონმდებლო ორგანოში შესვლა აუცილებელია. მეორე ნაწილი კი, ვთქვათ, გია ბარამიძე ასე არ ფიქრობს.
ბარამიძისგან განსხვავებით, ენმ-გაერთიანებული ოპოზიციის წარმომადგენელი, მედეა ვასაძე, რომელიც „ნაციონალური მოძრაობის“ წევრი არ არის, მიიჩნევს, რომ ამ ეტაპზე პარლამენტში შესვლა აუცილებელია.

სხვათა შორის, ქალბატონი მედეა აჭარის უმაღლესი საბჭოს დეპუტატია. ყოველ შემთხვევაში, მისი უფლებამოსილება ამ დროდმე არ შეწყვეტილა. ჩვენი რესპონდენტი ამბობს, რომ უმაღლეს საბჭოში შესვლა უნდა, რადგან ამ ნაბიჯით, მინიმუმ, ტრიბუნას გამოიყენებს.

რა გადაწყვეტილებას მიიღებს იმ შემთხვევაში, თუკი ენმ საკანონმდებლო ორგანოში და, შესაბამისად, აჭარის უმაღლეს საბჭოში შესვლაზეც უარს იტყვის? _ „ქრონიკა+“ მედეა ვასაძეს ესაუბრა:

_ ქალბატონო მედეა, ძალიან უცნაურ ქვეყანაში ვცხოვრობთ…

_ დიახ, ძალიან.

_ ადამიანები, როგორც წესი, ყველაფერს აკეთებენ, დეპუტატები რომ გახდნენ, თქვენ კი იხვეწებით, დეპუტატობა არ მინდაო და უფლებამოსილებას არ გიხსნიან…

_ თავის დროზე, ჩვენი გადაწყვეტილება გულწრფელი იყო.

_ ოპოზიციის ბოიკოტსა და თქვენს შემთხვევაში, აჭარის უმაღლეს საბჭოში არშესვლას გულისხმობთ?

_ დიახ. გაყალბების გამო არჩევნები აუცილებლად უნდა ჩატარებულიყო და ეს იმის სტიმულს იძლეოდა, რომ ქუჩაში ვმდგარიყავით.

_ მერე, ამ ქუჩაში დგომამ გაამართლა?

_ ის, რასაც მივაღწიეთ, რეალურად ქუჩის შედეგია.
სხვათა შორის, დეპუტატის სტატუსი მე, როგორც ადამიანს, ძალიან მამძიმებდა. ამასთან, მაზარალა კიდეც.

_ რატომ გაზარალათ?

_ ამ სტატუსის გამო გარკვეულ ქმედებებში შეზღუდული ვარ, თუმცა დღეს მიმაჩნია, რომ გზაჯვარედინზე ვდგავართ.

_ კერძოდ?

_ გარდა იმისა, რომ ევროსტრუქტურებმა ოპოზიციასა და ხელისუფლების შეთანხმებაში ამდენი ძალისხმევა ჩადეს, პირადად მე მიმაჩნია, რომ…

_ ერთი სიტყვით, გინდათ, რომ აჭარის უმაღლეს საბჭოში შეხვიდეთ?

_ დიახ, მინდა, რადგან ტრიბუნა გამოვიყენო.

_ ქალბატონო მედეა, ამ პრობლემის მოგვარება მარტივად შეიძლება _ განცხადება, რომელიც დეპუტატის უფლებამოსილების გაუქმებაზე დაწერეთ, უკან გამოითხოვეთ და ეგ იქნება!

_ ეს სხვა საკითხია.

_ სხვა საკითხი რატომაა?

_ სურვილი ერთია, მაგრამ საერთო გადაწყვეტილებიდან არ უნდა გამოვიდე. მოგეხსენებათ, გაერთიანებულ ოპოზიციაში წამყვანი ძალა „ნაციონალური მოძრაობაა“ და სიის მიმართ გარკვეული მორალური ვალდებულება მაქვს.
მოკლედ, დღეს ჩემი სურვილი აჭარის უმაღლეს საბჭოში შესვლაა, მაგრამ იმ გადაწყვეტილებას დავემორჩილები, რომელსაც გაერთიანებული ოპოზიცია მიიღებს!

_ წლებია, თქვენ და მურმან დუმბაძე თანამებრძოლები ხართ. ამას წინათ, ვესაუბრე და ბატონი მურმანი კატეგორიული წინააღმდეგია, რომ ენმ პარლამენტში შევიდეს. იმის გამო, რომ აჭარის უმაღლეს საბჭოში შესვლა გინდათ, თქვენსა და დუმბძაეს შორის უთანხმოება ხომ არ ჩამოვარდება? სხვათა შორის, თავის დროზე, ითქვა, მედეა ვასაძეს „ოცნების“ დატოვება მურმან დუმბაძემ აიძულაო…

_ ვანო, იცით, მაშინ მიზეზი რა იყო?

_ რა?

_ მე და მურმან დუმბაძე 30 წელია, ოჯახებით ერთად მოვდივართ.

_ ეს რა შუაშია?

_ მაშინ მურმან დუმბაძე ქვეყნის პარლამენტის ვიცე-სპიკერი იყო და პარტიიდან ისე გარიცხეს, რომ ჩვენ _ მის თანამებრძოლებს _ არაფერი გვკითხეს, ანუ არ აინტერესებდათ, ამას რა მოჰყვებოდა. მაშინ „ქართულ ოცნებაზე“ ძალიან გავნაწყენდი, თუმცა ეს მთავარი მიზეზი არ გახლდათ. მურმანს არასოდეს წავუქეზებივარ, რომ მის გზას გავყოლოდი…

_ ქალბატონო მედეა, ამ თემაზე სხვა დროსაც გვისაუბრია, ამიტომ კითხვაზე მიპასუხეთ: მურმან დუმბაძე ახლა ხომ არ გაგინაწყენდებათ, რომ მისგან განსხვავებით, ენმ-გაერთიანებული ოპოზიციის პარლამენტსა და, შესაბამისად, აჭარის უმაღლეს საბჭოში შესვლის მომხრე ხართ?

_ არა, გამორიცხულია! აზრთა სხვადასხვაობა არის, მაგრამ ჩვენ ერთმანეთს ვუგებთ და არ მგონია, ამან ჩვენ შორის განხეთქილება გამოიწვიოს.

_ ვთქვათ, ენმ საკანონმდებლო ორგანოში ოფიციალურად არ შევიდა, მაგრამ გადეპუტატებულებს უთხრა, გადაწყვეტილება ინდივიდუალურად მიიღეთ და თუ გინდათ, შედითო. რას იზამს მედეა ვასაძე?

_ არა, არ შევალ!

_ რატომ?

_ სხვათა შორის, თავის დროზე, როცა ირაკლი ჩავლეიშვილმა რესპუბლიკური პარტია დატოვა და გაერთიანებულ ოპოზიციასაც გაემიჯნა, აჭარაში ჩვენმა ლიდერმა, ლევან ვარშალომიძემ, მითხრა, ქალბატონო მედეა, ჩვენი პარტია არ შედის, მაგრამ ამ გადაწყვეტილების მიღების უფლება გაქვთ და თქვენს არჩევანში სრულიად თავისუფალი ხართო. გადავწყვიტე, რომ უმაღლეს საბჭოში არ შევსულიყავი და ოპოზიციასთან ერთად ვყოფილიყავი.
ისე, გამსვლელ სიაში ვიყავი, რაც არ მითხოვია _ მიუხედავად იმისა, რომ გარკვეულწილად ასაკი მაქვს, ეს გადაწყვეტილება თავად მიიღეს. დიახ, სიაში მეოთხე ნომერი ვიყავი და ეს რიგითობა გუნდის მიმართ გარკვეულ პასუხისმგებლობას მაკისრებდა.
მართალია, დღეს შესვლა-არშესვლა ასეთი პრინციპული აღარაა, მაგრამ ახლაც მიმაჩნია, რომ მორალური პასუხისმგებლობის გამო საერთო გადაწყვეტილების ქვეშ უნდა დავრჩე.

_ ქალბატონო მედეა, თუკი პარლამენტსა და, შესაბამისად, უმაღლეს საბჭოში შესვლა-არშესვლა პრინციპული საკითხი არ არის, აბა, ექვსი თვე ქუჩაში რატომღა იდექით და ბოიკოტს აცხადებდით, ანუ ყველაფერ ამით ოპოზიციამ რა მოიგო?

_ შედეგი დადგა.

_ გასაგებია, რომ ნიკა მელიამ და გიორგი რურუამ საპატიმრო დატოვეს, მაგრამ ამის მიუხედავად, ძალიან მაინტერესებს, შედეგს რას ეძახით, იმას ხომ არა, „ოცნება“ რომ გამუნათებთ, პარლამენტში შემოსვლით აღიარებთ, არჩევნები არ გაყალბებულა და ახლა, ნება იბოძეთ და, თამარ ჟვანიას ბულინგისთვის ბოდიში მოუხადეთო? ისიც ვიცი, რომ 19 აპრილის შეთანხმებაში სიტყვა „ვადამდელი“ ჩაიწერა, მაგრამ რა გარანტია გაქვთ, რომ ადგილობრივში „ოცნება“ 43 პროცენტზე ნაკლებს აიღებს და ვადამდელი საპარლამენტო არჩევნები დაინიშნება?

_ გარანტია ის გვაქვს, რომ 31 ოქტომბრის საპარლამენტო არჩევნები გაყალბდა, ადგილობრივ არჩევნებში კი „ოცნება“ 43 პროცენტს ვერაფრით დააგროვებს!

_ ქალბატონო მედეა, პოლიტმოღვაწეობის 30-წლიანი გამოცდილება გაქვთ და ჩემზე კარგად იცით, რომ ადგილობრივი არჩევნების გაყალბება უფრო ადვილია!

_ გამორიცხულია!

_ დამისაბუთეთ, გამორიცხული რატომაა?

_ თავად ხომ იციან, რომ საპარლამენტო არჩევნები გააყალებს?

_ დავუშვათ, იციან. მერე?

_ შინაგანი რწმენა მეუბნება, რომ ახლა გაყალბებაზე ვეღარ წავლენ!
საერთოდ, გაყალბება მხოლოდ საარჩევნო ყუთთან არ ხდება. გაყალბებას სხვა ფორმები, გზები და საშუალებები აქვს.
აი, შეიძლება, მოსყიდვის ნაწილში რაღაცები „მოაგვარონ“, მაგრამ ხომ ხედავთ, ქვეყანაში როგორი მდგომარეობაა _ მასობრივი საპროტესტო აქციებია.

_ მომიტევეთ და, იმ წერტილოვან პროტესტს, რომელიც ხან სად იფეთქებს და ხან _ სად, მასობრივს ვერ დავარქმევთ. ეს კი არადა, იგივე ბოიკოტის პიკზე ოპოზიციამ ქუჩაში 10 ათასზე მეტი ადამიანი ვერ გამოიყვანა…

_ ღრმად ვარ დარწმუნებული, რომ ესენი 43 პროცენტს ვერ მოაგროვებენ!

_ ქალბატონო მედეა, პოლიტიკაში მთავარი რწმენა კი არა, პრაგმატული ტაქტიკა და სტარტეგიაა! აი, მაგალითად, საარჩევნო კოდექსში შესატანი ცვლილებებით, ცესკო-ში უმრავლესობა, პრაქტიკულად, ისევ ხელისუფლებას რჩება და ამ ფონზე, რატომ ხართ დარწმუნებული, რომ ადგილობრივი თვითმმართველობის არჩევნები აღარ გაყალბდება და ხელისუფლება 43 პროცენტს ვერ აიღებს? აქვე, ისიც გასათვალისწინებელია, რომ მოსახლეობას ოპოზიციის მიმართ, განსაკუთრებით 19 აპრილის შეთანხმების შემდეგ, ნიჰილიზმი აქვს…

_ კი ბატონო, გეთანხმებით, მაგრამ ყველაფერი ეს გათვლილი გვაქვს.

_ რა ყველაფერი?

_ რაღაც ცდომილება არსებობს, მაგრამ მოგეხსენებათ, მათემატიკა ზუსტი მეცნიერებაა და, როგორც გითხარით, ყველაფერი დათვლილია.
მოკლედ, გაყალბებით ვერ გააყალბებენ და ადგილობრივი არჩევნების შედეგი ვადამდელი არჩევნების ჩატარების საშუალებას აუცილებლად მოგვცემს. შეიძლება, რაღაც მოიგონონ და იგივე ვადის გამო პროცესი გაწელონ, მაგრამ ვადამდელი არჩევნები, ჩემი აზრით, გარდაუვალია.

_ კარგი, დავუშვათ, რომ ვადამდელი არჩევნები დაინიშნა, მაგრამ კითხვის ნიშნები აქაც არსებობს, ანუ ე. წ. პროდასავლური ოპოზიცია რატომაა დარწმუნებული, რომ ვადამდელს მოიგებს, მით უმეტეს, მაშინ, როცა ორი ახალი მოთამაშე გამოჩნდა _ გიორგი გახარია და ლევან ვასაძე? შეიძლება, ვინმეს არ მოსწონს, მაგრამ ფაქტია, რომ თავისი ელექტორატი ერთსაც ჰყავს და _ მეორესაც.

_ ორივეს ელექტორატი „ქართული ოცნების“ ხარჯზე ჰყავს.

_ ეს როგორ, ქალბატონო მედეა?

_ „ნაციონალური მოძრაობის“ ამომრჩეველი სტაბილურია.

_ დიახ, მაგრამ ამ ამომრჩეველთა რიცხვი სტაბილურად 500 ათასია. 500 ათასი ხმა კი გამარჯვებისთვის არასაკმარისია.

_ შეიძლება, მაგრამ ჩვენ ხომ კოალიციურ მთავრობაზე ვსაუბრობთ.

_ ვიცი, მაგრამ ამ შემთხვევაში კოალიციური მთავრობა რა შუაშია?

_ „ნაციონალური მოძრაობა“ ყველაზე მძლავრ პარტიად დარჩება და შემდეგ საუბარი კოალიციურ მთავრობაზე იქნება.

_ ქალბატონო მედეა, „კარტები გავხსნათ“ და ისე ვისაუბროთ…

_ კი ბატონო.

_ პირადად მე მექმნება შთაბეჭდილება, რომ მთელი ოპოზიცია „ნაციონალურ მოძრაობას“ ემიჯნება…

_ დიახ…

_ ჰოდა, ენმ-მ კოალიცია შესაძლოა, ლეიბორისტებსა და თაკო ჩარკვიანის „კანონსა და სამართალთან“ შექმნას. „ევროპული საქართველოსა“ და „ნაცმოძრაობის“ თანამშრომლობა კი ძნელი წარმოსადგენია…

_ „ნაციონალური მოძრაობის“ გაერთიანების აუცილებლობა ყველა შემთხვევაში დადგება. დღეს ამას კოორდინაციას ეძახიან, მაგრამ ეს მხოლოდ კოორდინაცია არ იქნება, ანუ თავისთავად ვალდებულება და აუცილებლობაც გაჩნდება.

_ რისი?

_ ახლა თითქოს გარკვეული მიმართულება გამოჩნდა, მაგრამ მაშინ, როცა ღრმა პოლიტიკურ კრიზისში ვიყავით, იდგა თუ არა საკითხი, „ნაცმოძრაობის“ გარეშე პარლამენტში, პრაქტიკულად, არაფერს წარმოვადგენთ და ამიტომ ამ პარტიის საკანონმდებლო ორგანოში შესვლა და შემდგომ გაერთიანებაზე ფიქრი აუცილებელიაო?
სხვათა შორის, იმაზე არის საუბარი, აი, თემატურად შევიდეთო, ანუ რაღაც ჰიბრიდზე ლაპარაკობენ _ არც ხელფასი ავიღოთ, არც მიმდინარე საკითხებში განხილვაში ჩავერიოთ, მაგრამ იმ საკითხებზე ვიაქტიუროთ, რაც შეთნხმებაშიაო.

_ გასაგებია, მაგრამ ეს ხომ ნახევრად ფეხმძიმობას ჰგავს, რაც აპრიორი წარმოუდგენელია?

_ დიახ, მგონია, ეს ჰიბრიდი არ გამოვა და კიდევ ერთხელ ვიმეორებ, მგონია, რომ ჩვენი შესვლა აუცილებელია.
ისე, ამ თემაზე მხარდამჭერების გამოკითხვაც მიმდინარეობს და გადაწყვეტილებამდე მივალთ, მაგრამ პირადად მე მიმაჩნია, რომ ყველაფერი ეს საჭირო არ იყო. გადაწყვეტილება ლიდერებს უნდა მიეღოთ და პარლამენტში შევსულიყავით.

_ ლიდერმა, ანუ მიხეილ სააკაშვილმა, გადაწყვეტილება რამდენიმე კვირის წინ მიიღო, როცა თანამებრძოლებს მოუწოდა, ნიკა მელიას ციხიდან გამოსვლის შემდეგ პარლამენტში უნდა შეხვიდეთო…

_ კი, ასეთი განცხადება იყო…

_ ამ თემაზე სააკაშვილს განცხადება აღარ გაუკეთებია, თუმცა კიევში ჩასულ ნიკა მელიას იგივე რჩევა მისცა, რაც თავის დროზე ვანო მერაბიშვილს _ ციხიდან გამოსვლის მერე, ჯობია, დაისვენოო. იმედია, დამიდასტურებთ, რომ „ნაციონალურ მოძრაობაში“ ორი ფრთაა _ მელიასა და სააკაშვილის. ჰოდა, შემექმნა შთაბეჭდილება, რომ მედეა ვასაძე სააკაშვილის ფრთის წარმომადგენელია, ანუ საქმე საქმეზე რომ მიდგეს, სააკაშვილის მხარეს დადგებით. ასეა?

_ ვერავინ გადამარწმუნებს, რომ „ნაციონალური მოძრაობის“ მხარდამჭერი მიხეილ სააკაშვილის მხარდამჭერია და ხმებიც იმიტომ გროვდება, რომ მიშასადმი ფანატიკური დამოკიდებულება და სიყვარული აქვთ. აი, ზვიადის მიმართ რომ ჰქონდათ დამოკიდებულება, მიშასადმიც რაღაც მსგავსი დამოკიდებულება არსებობს.
ნიკა მელიას და მის პრინციპებს პატივს ვცემ. რაზეა ლაპარაკი, „ნაციონალური მოძრაობისთვის“ გამოკვეთილი ლიდერია, მაგრამ მაინც ვფიქრობ, რომ უმთავრესი მიშაა.
დიახ, თავდაპირველად სააკაშვილმა განაცხადა, რომ „ნაციონალური მოძრაობა“ უნდა შევიდეს პარლამენტში. ამის შემდეგ ამ თემაზე დასმული შეკითხვისთვის პასუხი პირდაპირ აღარ გაუცია. არადა, მაინტერესებს, ამ საკითხზე მისმა დამოკიდებულებამ ტრანსფორმაცია ხომ არ განიცადა?..
რაც შეეხება მერაბიშვილისადმი აღნიშნულის თქმას, ეს, მგონი, თავად მერაბიშვილის უარყოფა იყო…

_ ყოველივე ზემოთქმულიდან გამომდინარე, გამორიცხავთ, რომ ყოფილი მმართველი პარტია ორად გაიყოს, ანუ მელია, თავის ახალგაზრდულ ფრთასთან ერთად, წავიდეს და ახალი პარტია დააფუძნოს?

_ არ მგონია, ეს მოხდეს.

_ ქალბატონო მედეა, რატომ არ გგონიათ?

_ მორიგ გახლეჩას პარტია ვეღარ გაუძლებს და მგონია, ვერც ერთი მხარე ისე ვერ გაძლიერდება, როგორი ძლიერიც „ნაციონალური მოძრაობა“ ახლაა.
ეს „ნაცმოძრაობისადმი“ მორიგი ვერაგული ჩანაფიქრი იქნება. პირადად მე, ვფიქრობ, რომ ეს პარტია ჩვენს ქვეყანას ჯერ კიდევ სჭირდება, მიუხედავად იმისა, რომ 9 წლის განმავლოაბში მასთან დაუნდობელ ოპონირებაში ვიყავი _ მოგეხსენებათ, მაშინ ადამიანის უფლებები როგორ მდგომარეობაში იყო, თუმცა ისიც ფაქტია, რომ ქვეყანა შენდებოდა _ ინსტიტუციები ჩამოყალიბდა.

_ დიახ, მაგრამ ქვეყნის მშენებლობა მხოლოდ ხიდები და გზები არ არის.

_ გეთანხმებით, თუმცა ადამიანს ყველაფერი ეს თვალში ხვდება და ილექება.

_ ბოლოს, ქალბატონო მედეა, სახელმწიფო ინსტიტუციებში მიხეილ სააკაშვილის ყოფნა აუცილებელია?

_ თუკი ხელისუფლების განაწილების პრინციპი ისეთი იქნება, როგორიც ყველა დემოკრატიულ ქვეყანაშია, ეს კაცი ხელისუფლების სათავეში კიდევ გამოდგება!
_ მიშა ხელისუფლებაში რომ დაბრუნდეს, ადამიანის უფლებებისთვის ბრძოლა ისევ მოგიწევთ.
_ მგონია, რომ ამ შემთხვევაში, ადამიანის უფლებები ისე აღარ დაირღვევა, როგორც ადრე.

_ ასე რატომ გგონიათ?

_ კოალიციური მთავრობა და ხელისუფლების დანაწილების სწორი პრინციპი ადამიანის უფლებების დარღვევის შემაკავებელი იქნება.

_ ვნახოთ, რა და როგორ იქნება… წარმატებებს გისურვებთ, ქალბატონო მედეა.

_ თქვენც, ასევე, ვანო…

ვანო პავლიაშვილი