გიგა გელხვიიძე

2024 წლის საპარლამენტო არჩევნებამდე ნახევარ წელზე ცოტა მეტი რჩება, ხოლო პოლიტიკური დუღილის ტემპერატურა სულ უფრო და უფრო იზრდება.

„ქართული ოცნება“, რომელიც ხელისუფლებაში ყოფნის მესამე ვადას ასრულებს, სრულიად დარწმუნებულია, რომ ამომრჩეველი მას მეოთხე ვადითაც ანდობს ქვეყნის მართვას, ვინაიდან წინა ხელისუფლებისგან განსხვავებით, საქართველოსთვის ძალიან ბევრი გააკეთეს და ეს სხვადასხვა მაჩვენებლის გაუმჯობესებასა და ევროკავშირთან კიდევ უფრო დაახლოებაში გამოიხატება.

მეოთხე ვადისკენ მიმავალი „ოცნება“, რომელიც არა მხოლოდ უმრავლესობით, არამედ საკონსტიტუციო უმრავლესობითაც ხელისუფლებაში მოსვლას აანონსებს, ევროკავშირისკენ მიმავალ გზაზე დგამს ისეთ ნაბიჯებს, რაც ქართული ოპოზიციური სპექტრისა და თავად ევროპელი პარტნიორების აღშფოთებას იწვევს.

ამ და სხვა საკითხების შესახებ „ქრონიკა+“ ესაუბრა ყოფილ პრემიერ გიორგი გახარიას გუნდის წარმომადგენელს, პარტია „საქართველოსთვის“ პოლიტსაბჭოს წევრ გიორგი ჭანტურიას:

_ გიორგი, პირველ რიგში, საარჩევნო კოდექსთან დაკავშირებით მინდა, გკითხოთ: „ოცნებამ“ საარჩევნო კოდექსი, როგორც ოპოზიცია აცხადებს, საკუთარ თავზე მოირგო, დაძლია პრეზიდენტის ვეტო და ვერც იმაში ხედავენ ტრაგედიას, თუ ამის შემდგომაც არ მოაწერს ხელს საკანონმდებლო ცვლილებებს ზურაბიშვილი, რადგანაც ამის საშუალება უკვე პარლამენტის თავმჯდომარეს ეძლევა. რამდენად დაეხმარება ეს მმართველ პარტიას 2024 წლის არჩევნებზე?

_ ცოტა სასაცილო არის „ოცნების“ ასეთი დამოკიდებულება არჩევნებთან დაკავშირებით, რადგანაც ჩვენ რასაც ვხედავთ, პირველ რიგში, „ოცნებამ“ რაც გააკეთა, ეს იყო ცესკოს თავიდან ბოლომდე დაქვემდებარება. ცესკოს დამოუკიდებლობის სტატუსი დღეს აღარ გააჩნია, მან იცის, რომ ეს ორგანო არის „ოცნებაზე“ დაქვემდებარებული, იგი ერთგვარ სააგენტოსავით იქცა. რაც შეეხება რეკომენდაციებს, რომლებიც უგულებელყო მმართველმა გუნდმა, თქვენ იცით, რომ რეკომენდაციების ნაწილში ჩვენი გუნდი პირველივე დღიდან ჩართულია, წარვადგინეთ ჩვენი ინიციატივები ყველაფერთან ერთად, თუმცა „ოცნებას“ არ აქვს პოლიტიკური ნება, რომ ეს რეკომენდაციები აღასრულოს და ბოლომდე მიიყვანოს საკითხი.

_ თქვენც ახსენეთ წინა კითხვაზე პასუხის დროს და მეც მინდა, რომ გკითხოთ, _ ეუთო-ოდირისა და ვენეციის კომისიის დასკვნების უგულებელყოფა, რომელიც მმართველ პარტიას გამოეგზავნა საარჩევნო კოდექსში შესატან ცვლილებებთან დაკავშირებით, შეიძლება თუ არა იყოს გავლენის მომხდენი ქვეყნის ევროპულ კურსზე? აქვე მინდა შეგახსენოთ ისიც, რომ უმრავლესობის მხრიდან ეს არ არის პირველი შემთხვევა, როდესაც ის ვენეციის კომისიისა და ეუთო-ოდირის დასკვნას არ ითვალისწინებს.

_ ზოგადად, „ოცნების“ ბოლო პერიოდის სტრატეგიას თუ შევხედავთ, ის ყველაფერს აკეთებს იმისთვის, რომ სტრატეგიული პარტნიორები და მეგობრები რაც გვყავს დასავლეთში, ყველამ ზურგი აქციოს და შეეცადოს ხალხს დაანახოს, რომ მათ აზრებს „ოცნება“ აღარ ითვალისწინებს. ეს საბოლოოდ იმ შედეგამდე მიიყვანს ჩვენს ქვეყანას, რომ ევროინტეგრაციის გზა, რომელიც ჩვენთვის ძალიან მნიშვნელოვანია, შეფერხდეს ან ჩაიკეტოს. რა თქმა უნდა, არც ჩვენი პარტია და არც ჩვენი თანამოქალაქეები ამას არ დაუშვებენ, არჩევნები ძალიან მალე იქნება და „ოცნებას“ ყველა მგავსს ქმედებაზე პასუხი გაეცემა. შვიდი თვე და რამდენიმე დღე არის დარჩენილი არჩევნებამდე და ჩვენ ამ ყველაფერს ვიხილავთ არჩევნებზე.

_ ევრონესტის შესახებ მინდა, გკითხოთ, _ ოპოზიციის ქმედება, რომელიც იმყოფებოდა ამ დელეგაციაში ევროპარლამენტში, რამდენად არის თანხვედრაში ქართველი ხალხის ინტერესებთან?

_ რეზოლუცია არ წამიკითხავს, მაგრამ პირდაპირ გეტყვით: დიდი ხნის წინ უნდა დაეწყო „ქართულ ოცნებას“ იმაზე ზრუნვა, რომ ევროინტეგრაციის ფარგლებში საკითხის განხილვის დროს საქართველო უკრაინასთან და მოლდოვასთან ერთად ყოფილიყო. რაც შეეხება რეზოლუციას, ენმ-სგან არაფერი გამიკვირდება და არც ეს მოქმედება გამკვირვებია. უბრალოდ, აქ „ოცნების“ მოქმედებაც სასაცილოა, როგორ აქვთ გაფუჭებული საქმე, რომ ათი კაციც კი ვერ მოკრიბეს, მხარი რომ დაეჭირათ.

_ ევრონესტის სამიტზე „ნაციონალური მოძრაობის“ გარდა სხვა პარტიის წარმომადგენლებიც იმყოფებოდნენ, საუბრისას კი თქვენ ახსენეთ, რომ „ნაციონალური მოძრაობისგან“ არაფერი გიკვირთ, ანუ სხვა ოპოზიციურ პარტიებსაც მათ განშტოებად მიიჩნევთ, როგორც ამას „ოცნება“ ამბობს ხოლმე?

_ ჩვენ გაცხადებული გვაქვს პოზიცია ამასთან დაკავშირებით და ჩვენი პარტია ხშირად იყენებს ტერმინს „კოლექტიური ნაცმოძრაობა“, ეს არ არის ჰაერიდან მოტანილი. რაღაც პარტიები დაიშალა, გამოეყვნენ, რაღაც ახალი პარტიები იქმნება, მაგრამ ვხედავთ, რომ გარკვეული პარტიები „კოლექტიური ნაცმოძრაობის“ წევრები არიან. არათუ ვიზიარებთ, არამედ ჩვენ ვთქვით პირველად, რომ ერთ მხარეს 2024 წლის არჩევნებზე „კოლექტიური ნაცმოძრაობა“ იქნება წარმოდგენილი, ხოლო მეორე მხარეს _ „კოლექტიური ოცნება“.

_ მიხეილ სააკაშვილმა რამდენიმე დღის წინ სხვა საკითხებთან ერთად ისაუბრა მომატებული დანაშაულის სტატისტიკაზე და განაცხადა, რომ მის დროს ეს არ ხდებოდა. როგორ აფასებთ მის ამ განცხადებას, თუ გავიხსენებთ იმ მეთოდებს, რომლითაც მაშინ იბრძოდნენ დანაშაულთან?

_ „ოცნების პირობებში“ მიხეილ სააკაშვილს ყველაფრის უფლება აქვს, არა მხოლოდ მსგავსი განცხადებების კეთების, არამედ ისმის უფლებაც, რომ სასამართლო დარბაზიდან პირდაპირ ჩაერთოს საარჩევნო კამპანიაში და პოლიტიკური განცხადებები აკეთოს. ამიტომაც ჩვენ უკვე აღარაფერი გვაკვირვებს, რაც „კოლექტიურ ნაცმოძრაობასთან“ არის შემხებლობაში ან კოლექტიურ „ოცნებასთან“. ვხედავთ, რომ ორივე პარტიისთვის ეს ყველაზე კომფორტული მოცემულობაა.

_ ლგბტ პროპაგანდის წინააღმდეგ კანონზე მინდა, რომ გკითხოთ. თქვენი გუნდის წარმომადგენელმა ანა ბუჩუკურმა განაცხადა, რომ გახარიას გუნდი წინააღმდეგია ყოველგვარი პროპაგანდის, განსაკუთრებით თუ ის ეხება ბავშვებს. სად დაინახეთ ლგბტ პროპაგანდა, შეიძლება ერთი ფაქტი მაინც რომ დაასახელოთ?

_ ჩვენ განვაცხადეთ და კიდევ ერთხელ გავიმეორებთ, რომ თუკი დღეს ქვეყანაში ლგბტ პროპაგანდას ვინმე აწარმოებს, ეს არის „ოცნება“ და კონკრეტულად მამუკა მდინარაძე, რომელიც ბოლო პერიოდში გამოყოფილია სპიკერად ლგბტ პროპაგანდის კუთხით. ასევე განვაცხადეთ, რომ ჩვენ მონაწილეობს მივიღებთ განხილვაში, რადგანაც გვაინტერესებს, როგორ შეძლებს „ოცნება“, საკუთარი თავი აკრძალოს და საკუთარი თავისგან დაიცვას ბავშვები? ეს ძალიან გვაინტერესებს.

_ ხდება აპელირება, რომ ეს არის რუსული კანონი, ვინაიდან მხოლოდ რუსეთსა და უნგრეთს აქვს მსგავსი კანონი მიღებული. ხომ არ ფიქრობთ, რომ მისი მიღების შემთხვევაში რუსთაველის გამზირზე კიდევ ერთ, მარტის მოვლენების მსგავსს აქციას ვიხილავთ?

_ მე მაქვს ერთადერთი რამის მოლოდინი: „ოცნება“ რამდენჯერაც შეძლებს, მსგავსი ქმედებით ქვეყანა ჩამოაშოროს ევროინტეგრაციის გზას, გადაუხვიოს კურსიდან, ამას ქართველი ამომრჩეველი არ დაუშვებს და მარტის აქციები ამის ყველაზე ნათელი მაგალითი იყო.

_ 9 რეკომენდაცია _ უკვე გასული წლის დეკემბრიდან ვხედავთ, რომ „ოცნება“ მუშაობს ამ საკითხზე, თუმცა კონკრეტული შედეგი ვერ დაიდო. რამდენად გაქვთ იმის მოლოდინი, რომ საბოლოოდ აღასრულებს მმართველი პარტია იმ მოთხოვნებს, რომლებიც არსებობს ევროკავშირში საქართველოს მოსახვედრად?

_ სიმართლე რომ გითხრათ, 9 რეკომენდაციასთან დაკავშირებით ჩვენ მაღალი მოლოდინები არასდროს გვქონია, უბრალოდ ჩვენი პასუხისმგებლობა იყო მოქალაქეების წინაშე, რომ ამ რეკომენდაციების განხილვებში „ოცნებასთან“ ერთად ვყოფილიყავით ჩართულები. რაზედაც თქვენ მეკითხებით, გიპასუხებთ, რომ ჩემთვის მთავარი რეკომენდაცია და ტესტი იქნება არჩევნები. უნდა ვნახოთ, „ოცნება“ როგორ ჩაატარებს არჩევნებს. თუ ქვეყანაში დემოკრატიული არჩევნები არ ჩატარდება, ამით „ოცნებას“ არა მხოლოდ მომავალზე, არამედ წარსულზე ლაპარაკის უფლებაც კი აღარ დარჩება და ვერც „ნაციონალური მოძრაობა“ ვეღარ უშველის, როგორც მაშველი რგოლი ისე, როგორც ეს ხდება წლების განმავლობაში.

_ არჩევნებამდე სულ უფრო ცოტა დრო რჩება და ჩვენ გვესმის სხვადასხვა დაპირება. როგორ ფიქრობთ, რამდენად მუშაობს იგივე დაპირებები მოქალაქეებზე, რომლებიც უკვე ბევრი წელია ესმით წინასაარჩევნო პერიოდში?

_ დაპირებებთან დაკავშირებით ცნობილია ჩვენი გუნდის საარჩევნო პროგრამა. დღესდღეობით ძალიან აქტუალურია სოციალური და სატრანსპორტო პოლიტიკის მხრივ წარდგენილი გეგმა, რამაც დიდი აჟიოტაჟი გამოიწვია გარკვეული მიზეზების გამო როგორც „ოცნებაში“, ასევე ოპოზიციურ პარტიებში. ეს სასაცილო არის ხოლმე და უცნაურად ემთხვევა, რომ ოპოზიციური და სახელისუფლებო ფლანგი ჩვენ წინააღმდეგ ერთიანდება, მაგრამ ამას ჩვენ ჩვეულებრივად ვიღებთ და ეს არის ჩვენი მამოძრავებელი ძალა. რაც შეეხება დაპირებებს, დიახ, ადამიანები ამ ქვეყანაში დაპირებების მოსმენით დაიღალნენ. ამომრჩეველს სხვა, უფრო მეტი რამ სჭირდება, აქედან გამომიდინარე არის ჩვენი გეგმა შედგენილი, ჩვენ არ გვაქვს უბრალოდ საარჩევნო დაპირებები. გვინდა გამოვასწოროთ ადამიანების შრომითი უფლებები, მათი სახელფასო განაკვეთი და ა. შ.

_ მეტი კონკრეტიკისთვის, უფრო რომ გავშალოთ მკითხველისთვის თქვენი სარჩევნო გეგმა.

_ ჩვენ რამდენიმე ძირითადი კომპონენტი გამოვყავით: ეს არის მინიმალური ხელფასი, არის უმუშევრობის დაზღვევა, რაც განაპირობებს იმას, რომ თუ ბოლოდროინდელ ვითარებას გადავხედავთ, ქვეყანაში ყველაზე დიდი პრობლემა არის ემიგრაციის თემა. ახალგაზრდები ქვეყანას ტოვებენ, ძალიან მცირე ნაწილი ბრუნდება უკან და ამის მიზეზი არის ის, რომ საქართველოში უსამართლობის განცდაა. ამას ვგულისხმობდი, როცა ვამბობდი,  რომ დაპირებები არ არის საკმარისი, ადამიანებს სამართლიანობის განცდა თუ არ გავუჩინეთ, მათ ქვეყანაში ვერ გავაჩერებთ და სწორედ აქედან მოდის ეს მინიმალური ხელფასი და დაზღვევა, _ ოჯახებს, რომლებსაც ბანკში ყველაზე კარგ შემთხვევაში ერთი, ხოლო ყველაზე ცუდ შემთხვევაში რამდენიმე სესხი აქვთ და გაუსაძლის გარემოში უწევთ ცხოვრება, მათ სახელმწიფოსგან მხარდაჭერა სჭირდებათ. ისინი არ უნდა გარბოდნენ ქვეყნიდან, აქ უნდა იპოვონ დასაყრდენი. სხვა შემთხვევაში ჩვენი მხრიდან ევროინტეგრაციაზე საუბარი, უბრალოდ, უხერხული იქნება, თუკი ამ ქვეყანაში ისინიც არ დარჩნენ, რომლებსაც დემოკრატია და ეკონომიკა უნდა შეექმნათ.

_ ნიკა მელიასა და ნიკა გვარამიას პოლიტიკურ პარტია „ახალზე“ მინდა, რომ გკითხოთ: რამდენად აქვს ამ ორ ფიგურას იმის პოტენციალი, რომ მმართველი გუნდი და ოპოზიცია დააფიქროს იმ ამომრჩევლის წაყვანაზე, რომელსაც გადაუწყვეტელი ამომრჩეველი ჰქვია?

_ ცოტა სასაცილოა ეგ წარმოდგენა ჩემთვის, რადგანაც ნიკა გვარამიას და ნიკა მელიას ახალი პარტია, ჯერ ერთი, რომელი ახალი ეგ არის და მეორე, მათ ეთერებს რომ ვუყურებ, რაღაც შიდა კონფლიქტები აქვთ ამ ადამიანებს ერთმანეთთან დაკავშირებით და ჯერ, ალბათ, შიგნით აქვთ რაღაცები დასალაგებელი, ვნახოთ. სიმართლე თუ გინდათ, დიდად საინტერესო არ არის ეს პროცესები. „ახალი“ არ არის ჩვენთვის ახალი, ის „კოლექტიური ნაცმოძრაობაა“. ჩემზე უკეთესად იცის ყველამ, როგორი ადამიანები ქმნიდნენ „ნაციონალურ მოძრაობას“ წლების განმავლობაში.

_ დემოკრატიის ინდექსზე მინდა, რომ გკითხოთ, ძალიან მძიმე ვითარებაში იმყოფება საქართველო _ რა არის ამის მიზეზი? იქ საუბარი იყო სხვადასხვა საკითხზე, მათ შორის ნახსენები იყო ბიძინა ივანიშვილი, მიხეილ სააკაშვილი და ის, რომ მმართველი პარტია ცდილობს გავლენების მოპოვებას სასამართლოზე. თქვენ როგორ აფასებთ დემოკრატიის მოცემულ ინდექსს?

_ ეს ახალი არ არის, ამას ინდექსი და გამოქვეყნებაც კი არ სჭირდება. კიდევ ერთხელ გავიმეორებ: მთავარი ტესტი „ოცნებისთვის“ იქნება 2024 წლის არჩევნები: თუ 24 წლის არჩევნები დემოკრატიულ და სამართლიან გარემოში არ ჩატარდება, „ოცნება“ ამით არა მხოლოდ საკუთარ მომავალს, იმასაც კი დაანგრევს, რაც აქამდე კარგი უშენებია.

_ ე. წ. გამარჯვების კოალიციის წარმომადგენლები, მაგალითად, გიორგი ვაშაძე, განცხადებებს აკეთებენ, როგორც შემდგომი კოალიციური მთავრობის წარმომადგენლები. აჩენს თუ არა მსგავსი ტიპის განცხადებები ლოგიკურ შეკითხვებს იმის შესახებ, რომ შესაძლოა, „ქართულ ოცნებასა“ და ენმ-ს შორის იყოს რაიმე სახის გარიგება? ან შეიძლება ერთგვარი გადანაწილებაც უკვე მომხდარია, ვინაიდან ჩვენ ვიცით, თუ როგორ ნაწილდება პროცენტულობის მიხედვით თანამდებობები კოალიციურ მთავრობაში და ცხადია, ამ შემთხვევაში ყველზე დიდი პროცენტული მაჩვენებელი ექნება „ქართულ ოცნებას“ და, სავარაუდოდ, ენმ-ს.

_ ასეთი ტიპის განცხადებები არც არის საჭირო, რადგანაც ის, რომ დალაგებებია გარკვეულწილად „ოცნებასა“ და „ნაცებს“ შორის, ამის ფაქტები არსებობს. იუსტიციის უმაღლეს საბჭოში ამ ადამიანებმა ერთად აირჩიეს მოსამართლეები, ასვე რუსთავსა და სხვა მუნიციპალიტეტებში ერთად ამტკიცებდნენ რეგულაციებს ხალხის წინააღმდეგ და ამის ქეისები არსებობს. ბრიფინგიც კი გვქონდა. ყველაზე მსხვილ და გახმაურებულ თემაზე ვისაუბრეთ, მოვუწოდეთ ყველას, რომ კეზერაშვილის ქოლცენტრებთან დაკავშირებით საგამოძიებო კომისია შექმნილიყო. ამაზე „ოცნებამ“ უარი განგვიცხადა და საბავშვო ბაღში არ ვართ, ყველასთვის მისახვედრია, რატომაც თქვა „ოცნებამ“ უარი. წარმოუდგენელია, ოლიგარქი, რომელიც ყველაზე მსხვილი დამფინანსებელია, „ნაციონალური მოძრაობის“ ფულს აკეთებდეს სხვა ქვეყნიდან და თან ამ ფულს აკეთებდეს შავად „ოცნების“ მმართველობის პერიოდში, ამის არავის სჯერა, მით უფრო იმ ფონზე, როდესაც „ოცნებამ“ უარი განაცხადა საგამოძიებო კომისიის შექმნაზე. თქვენს კითხვას რომ დავუბრუნდეთ, გეტყვით, რომ არაფერს გამოვრიცხავ და შეიძლება „ნაცები“ და „ქოცები“ ახლაც ერთად ლაგდებიან ერთ ოთახში.

_ ბოლოს გადაუწყვეტელ ამომრჩეველზე მინდა, რომ გკითხოთ: რამდენად გაქვთ იმის მოლოდინი, რომ სწორედ გახარიას გუნდი შეიძლება იყოს ის პოლიტიკური ძალა, რომლისკენაც გადაიხრება გადაუწყვეტელი ამომრჩეველი?

_ ჩვენი პარტია არის ერთადერთი ორნიშნა პროცენტული მაჩვენებლის მქონე პარტია, რომელიც ყოველდღიურად იზრდება. ჩვენ არ ვყოფთ ამომრჩეველს „ნაცებად“, „ქოცებად“ გადაუწყვეტელ ამომრჩევლებად. ჩვენ ვართ პროევროპული პარტია, რომელიც ამ არჩევნებზე გაიმარჯვებს, აიღებს მაღალ პროცენტს, რომ ეს ქვეყანა ევროინტეგრაციის კუთხით დააჩქარებს სვლას, რათა ამ ქვეყანაში ეს ჩაკეტილი გზა ერთხელ და სამუდამოდ გაიღოს. იმედი მაქვს, ბევრი ადამიანი მივა არჩევნებზე. მე რასაც გავაკეთებ შემდეგი შვიდი თვის განმავლობაში, იქნება ის, რომ მაქსიმალურად მოვუწოდებ ყველას, მივიდეს არჩევნებზე, რადგანაც ეს არჩევნები არ იქნება არც ბენზინის ფასზე, არც პურის ფასზე, ის იქნება ჩვენი ქვეყნის ევროპულ მომავალზე ორიენტირებული და იმაზე, დაკარგავს ეს ქვეყანა ევროპულ პერსპექტივას თუ გახდება ევროპული ოჯახის წევრი?