„დღეს პრობლემა საქართველოს მოსახლეობის პოზიციაა და არა ის _ ხელისუფლება ან ოპოზიცია რას აკეთებს. საერთოდ, საქართველოში სამი სუბიექტია _ ხელისუფლება, ოპოზიცია და ხალხი. ამ სამიდან მთავარი, წესით, ხალხია, რომელიც არაფერს ამბობს და ყველაფერს იტანს _ გაძვირებასა და უსამართლობასაც“, _ ამ განცხადებას „ქრონიკა+“-სთან პოლიტიკოსი გუბაზ სანიკიძე აკეთებს.

ჩვენი რესპონდენტის თქმითვე, დასავლეთი _ ევროპა და აშშ-ც _ ანგარიშს უწევს არა პოლიტიკურ ელიტებს, ოლიგარქებსა და მაფიოზებს, არამედ _ ხალხს. ამის დასტურად გუბაზ სანიკიძე ეგვიპტის მოვლენებს იხსენებს: იგივე ამერიკელებს მუბარაქის გაშვება არ უნდოდათ, მაგრამ მას შემდეგ, რაც დაინახეს, რომ ქუჩები პროტესტანტებით გაივსო, თქვეს, ჩვენ ხალხის მხარეს ვართო.

მოკლედ, რატომ პასიურობს საქართველოს მოსახლეობა? რატომ არის გიორგი გახარია „კაბინეტური ლიდერი“? რა შეცდომა დაუშვა ოპოზიციამ? _ „ქრონიკა+“ გუბაზ სანიკძეს ესაუბრა:

_ ბატონო გუბაზ, ევროპარლამენტარები უკვე ღიად ამბობენ, რომ საქართველოსა და ევროკავშირის ურთიერთობა საფრთხეშია. ამასთან, მინიშნება სანქციებზეც კეთდება. ყველაფერი ეს, თქვენი აზრით, რეალობასთან ახლოსაა?

_ ევროპა საქართველოს საპარტნიორო ერთგულებაზე დაფიქრებულია.

_ ეს რას ნიშნავს?

_ ეჭვი ეპარება, თუმცა ყველაფერს პირადად მე, ცოტა სხვანაირად ვუყურებ.

_ მაინც, როგორ?

_ მოდი, ხელისუფლება და ოპოზიცია გვერდზე გადავწიოთ.

_ რატომ?

_ პირდაპირ ვთქვათ: დასავლეთს საქართველოს მოსახლეობის პოზიცია აინტერესებს, რომელიც არ ფიქსირდება. დიახ, ევროპელებს აინტერესებთ, შექმნილ სახიფათო ვითარებაზე, რომ ჩვენ შესაძლოა, ევროპას მოვწყდეთ და ყველა ის უპირატესობა _ ევროპასთან თავისუფალი მიმოსვლა, ვაჭრობა და დახმარებები, რაც ამდენი წლის განმავლობაში სისხლი და ოფლი დაგვიჯდა, დავკარგოთ, მოსახლეობა ხმას რატომ არ იღებს?

მოკლედ, დღეს პრობლემა საქართველოს მოსახლეობის პოზიციაა და არა ის _ ხელისუფლება ან ოპოზიცია რას აკეთებს. საერთოდ, საქართველოში სამი სუბიექტია _ ხელისუფლება, ოპოზიცია და ხალხი. ამ სამიდან მთავარი, წესით, ხალხია, რომელიც არაფერს ამბობს და ყველაფერს იტანს _ გაძვირებასა და უსამართლობასაც.

_ ხალხი იქნებ, იმიტომ არ იღებს ხმას, რომ პოლიტიკოსების მიმართ ტოტალური ნიჰილიზმი აქვს?

_ კაცო, გავიგე, მაგრამ ადამიანებს მაცივარი ცარიელი რომ აქვთ, ეს ნიჰილიზმს როგორ იწვევს? ადამიანის ბუნებაა _ როცა შიმშილობს, ინსტინქტურ ქმედებებზე გადადის და ხან ნადირობს, ხან იმას შვრება, ხან _ ამას, რომ შვილებს ლუკმა-პური მიუტანოს, მაგრამ ჩვენი ხალხი ხმას არ იღებს. ამ ჩვენი ხალხის მოსაწონი ჯერ არავინ დაბადებულა და ეს გასაგებია, მაგრამ პრადად ჩემთვის გამოცანაა, შინ საჭმელი რომ არ აქვთ, ამაზე რატომ არ რეაგირებენ?

_ ე. ი. საქართველოს მოსახლეობამ ის ადამიანური ინსტინქტი დაკარგა, რომელიც წეღან ახსენეთ?

_ ამ საზოგადოებაში ცოცხალი ორგანიზმის ინსტინქტი აღარ არის!

_ ეს იქნებ, იმის ბრალია, რომ ერი დაბერდა?

_ არა, კაცო, რა ერი დაბერდა? ასე არ ხდება.

_ აბა, როგორ ხდება?

_ სიბერეში სიბრძნეა... მგონია, რომ რაღაცის ექსპერტი ვარ და ამ ქვეყანას სხვაზე უკეთესად ვიცნობ, მაგრამ ვერაფერი გავიგე. აი, მაგალითად, ეს კომენდანტის საათი ყველას აწუხებს _ ბიძინას მომხრესაც და მოწინააღმდეგესაც, პროდასავლელსაც და პრორუსსაც, მაგრამ სულ ახლახან კომენდანტის საათის გაუქმების მოთხოვნით გამართულ აქციაზე რამდენი ადამიანი გამოვიდა?

_ აქციაზე თქვენ იყავით?

_ დიახ, ვიყავი...

_ ისე, ევროპელებს ბევრი რამ ვერ გაუგიათ და, სხვათა შორის, მხოლოდ ხელისუფლებასთან კი არა, ოპოზიციასთანაც აქვთ პრეტენზია.

_ გავიგე, მაგრამ თუ ატყობთ, ამერიკელებისა და ევროპელების მთავარი მესიჯი საქართველოს მოსახლეობის მიმართაა. ისინი აღარც ხელისუფლებას ეკითხებიან და აღარც _ ოპოზიციას.

ხომ გახსოვთ, წასვლის წინ დანიელსონმა რა თქვა, მედიისა და სამოქალაქო საზოგადოების იმედი მაქვსო. სამოქალაქო საზოგადოებაში კი სწორედ საქართველოს მოსახლეობას გულისხმობდა.

_ თქვენი საუბრიდან ისე გამოდის, რომ პრობლემის გადაჭრა პლებისციტს შეუძლია. ყოველ შემთხვევაში, ხალხი საკუთარ სათქმელს იტყვის. ვცდები?

_ არ ვიცი. ადამიანები, შეიძლება, პლებისციტზეც არ მივიდნენ და საერთოდ, არსად მივიდნენ. ვერ გაიგებ: კოვიდზე აცრა არ უნდათ, ევროპაში სამუშაოდ წასვლა უნდათ, თუმცა მიზეზ-შედეგობრიობას ვერ აკავშირებენ.

_ ანუ?

_ თუ ევროპაში წასვლა გინდა, უნდა აიცრა, რადგან სხვანაირად იქ არ შეგიშვებენ.

_ ჩვენში დარჩეს და, საქართველოში ზოგს ისევ რუსი „ნაშები“ უნდა...

_ ეს რუსი „ნაშები“ აღარ ჩამოდიან და ისინიც იქ დადიან, სადაც სიმდიდრე და კმაყოფილებაა!

_ ყველაფერ ზემოთქმულიდან გამომდინარე, ბატონო გუბაზ, ოპოზიციის მათავარი შეცდომა ის ხომ არაა, რომ საპროტესტო აქციებს აპაუზებს? აქციის 15 მაისისთვის გადადებას რით ხსნით?

_ ოპოზიცია მარტო იბრძვის!

_ რას გულისხმობთ?

_ ოპოზიციასთან ბევრი პრეტენზია მქონდა, მაქვს და, როგორც ჩანს, მომავალშიც მექნება, მაგრამ ოპოზიციის დევანდელი მოქმედება ხალხის მხრიდან დასაფასებელია!

_ და ოპოზიცია როგორ მოქმედებს?

_ არ იყიდება!

_ დარწმუნებული ხართ, რომ ოპოზიცია არ იყიდება?

_ შედეგს ხომ ვუყურებთ _ პარლამენტში არავინ შედის!

_ ელისაშვილი შევიდა.

_ ელისაშვილს არ ვგულისხმობ და თავი დავანებოთ, რა!

_ ბატონო გუბაზ, ახლა გამახსენდა: 9 აპრილს, „უცნობის“ ინიციატივით, დიდი შეკრება იმართება, რომელსაც, მგონი, „ქართველების მარადისობის დღე“ ჰქვია (იტერვიუ ჩაწერილია 4 აპრილს, _ რედ.)...

_ „ქართველების მარადისობა“ რას ნიშნავს, ეს რა პათეთიკაა?

_ ამას ვერ გეტყვით, მაგრამ ზოგი ფიქრობს, ამ შეკრებით შესაძლოა, სამოქალაქო დაპირისპირების ინსპირირება მოხდესო...

_ და ვის უნდა დაუპირისპირდნენ? სახლებში მოგვაკითხავენ თუ რას იზამენ?

_ „მარადისობის დღეზე“, როგორც სოციალური ქსელიდან ირკვევა, დასწრებას, უმეტესად, „ქოცები“ აპირებენ...

_ გასაგებია და ეს რა ძნელი გამოსაცნობია, ვინ იაქტიურებს?

_ ისე, რატომ გამორიცხავთ, რომ „არასასურველ ელემენტებს“ სახლებშიც მიაკითხონ?

_ ყველას ვურჩევ, ჩემს სახლში ნურავინ მოვა! მათთვის ასე სჯობს!

_ ამასობაში, ყოფილი პრემიერი, გიორგი გახარია, აქტიურდება. ამაზე რას იტყვით, გუბაზ ბატონო?

_ გახარია არის ზორო, რომელიც ხან იქ გამოჩნდება და ხან _ აქ, თან თავი ისევ პრემიერ-მინისტრი ჰგონია.

_ ანუ?

_ ოპოზიციური ან პოლიტიკური ლიდერი, რომელიც ჟურნალისტებს ემალება, როგორ წარმოგიდგენიათ?

_ პირადად მე ისიც ვერ წარმომედგინა, 31 მარტს მაინცდამაინც ზუგდიდში რატომ აპირებდა ჩასვლას...

_ გასაგებია, რასაც „ჩალიჩობს“.

_ რას?

_ უნდა, რაღაც ტომობრივი გააკეთოს, მაგრამ არ გამოუვა! მეგრელები მაღალი კულტურის ხალხია და სამეგრელოც ყოველთვის საქართველოსთვის ბრძოლის ავანგარდშია!

_ უშვებთ იმის ალბათობას, რომ გახარია ივანიშვილის პროექტი, ანუ „ბიძინა 2“-ია?

_ არ ვიცი, თუმცა დიდი მნიშვნელობა არც ამას აქვს. მნიშვნელოვანი ისაა, რომ ისტორიამ გამოძერწილი და გაბერილი ბელადები არ იცის. ბელადები არ იბერებიან, თვითონ ჩნდებიან, იბრძვიან, ხან იგებენ, ხან მარცხდებიან. გახარია კაბინეტური ბელადია!..

_ ისე, რა ამის პასუხია და, ევროპელების იდეა რეალობად რომ ქცეულიყო და მოლაპარაკებებში ივანიშვილ-სააკაშვილი ჩართულიყვნენ, ვითარება არ განიმუხტებოდა?

_ განიმუხტებოდა, მაგრამ პრობლემა სააკაშვილში კი არა, ივანიშვილშია!

_ რატომ?

_ იმ ევროპელებმა ივანიშვილი მოძებნონ, თუ ჩვენ უნდა გამოვუყვანოთ და მოვუძებნოთ?

იცით, იმ მოლაპარაკებაზე რა ხდებოდა?

_ არა, არ ვიცი. თქვენ იცით?

_ ყველას ტელეფონები გარეთ დაატოვებინეს, მხოლოდ კობახიძეს ჰქონდა, ყოველ ხუთ წუთში გადიოდა და რეკავდა, ნეტავ, ვის ურეკავდა?

_ ამას დიდი მარჩიელობა არ სჭირდება...

_ ევროპელმა ელჩებმაც ხომ იციან, რომ კობახიძე არაფერს წყვეტს. ყველაფერს ივანიშილი წყვეტს და ვერ გავიგე, ამ ივანიშვილს ასე რატომ ელოლიავებიან?

_ თქვენი აზრით, დასავლეთი ივანიშვილს რატომ ელოლიავება?

_ არ ვიცი, ეს მათ უნდა ჰკითხოთ...

_ სხვათა შორის, კულუარებში ამბობენ, რომ „ოცნებამ“ ევროპელ ლობისტებში ძალიან დიდი ფული დახარჯა.

_ დიახ, ასეა და ჩანს კიდეც.

_ ჰოდა, ევროპა, ალბათ, ამიტომაც ელოლიავება.

_ მესმის, მაგრამ როდემდე უნდა ელოლიავოს? ამასოაბში, რეგიონში ევროპის ინტერესები ზიანდება, ცოტაც და, დასავლეთს ახლო აღმოსავლეთიდან ისე ამოაგდებენ, როგორც _ „პრობკას“!

_ რუსეთი ამოაგდებს?

_ რუსეთიც, თურქეთიც და ირანიც.

_ ამ თემებზე ჩვენი პოლიტიკური წრეები არ საუბრობენ...

_ ცოდნა უნდა, რომ ამაზე ილაპარაკონ...

_ პოზნერის ვიზიტიც დასავლეთის „პრობკასავით“ ამოგდების კონტექსტში უნდა განვიხილოთ თუ ეს რამე სხვა პროვოკაცია იყო?

_ „საგულაოდ“, დროის გასატარებლად ჩამოვიდა და ისეთი ადამიანები ჩამოიყვანა, რომლებიც საქართველოსთან მიმართებით პოზნერზე უარესები არიან! „ТАСС“-ის გენერალური დირექტორი იყო ჩამოსული, „ТАСС“ კი რუსეთში მთავარი სახელისუფლებო საინფორმაციო სააგენტოა და ხელისუფლების წარმომადგენლებთან, არ გამოვრიცხავ, რომ ბიძინასთანაც, ალბათ, რაღაც კონტაქტი ჰქოდნათ!

_ თუ ასეა, მაშინ ამ ვიზიტს კონკრეტული მიზანიც ექნებოდა, თორემ „გულაობა“, ალბათ, უბრალო შირმა იყო და მეტი არაფერი...

_ ამას რუსები „პრიატნაია სპალეზნის“ ეძახიან.

_ გავრილოვის ღამის მერე, თქვენი აზრით, ხელისუფლებამ იგივე შეცდომა რატომ დაუშვა?

_ შეცდომა კი არ დაუშვა, არამედ ეს შეგნებულად გააკეთა. შეცდომა ისაა, როცა არ გინდა და სხვანაირად გამოგივა. ზოგი ოპოზიციონერი ამბობს, ამ ნაბიჯით ხელისუფლება დასავლეთთან ძაფს წყვეტსო და იქნებ, გეგმა სწორედ ეს აქვს? ყველაფერ ამას ზუსტად იმიტომ აკეთებენ, რომ დასავლეთის დახმარება აღარ წამოვიდეს და მშიერმა ხალხმა დაიძახოს, რუსეთი გვირჩევნიაო.

დარწმუნებული ვარ, რომ ყველაფერი ეს სწორედ ამისთვის კეთდება, მაგრამ ვისაც მიაჩნია, რომ რუსეთი გამოსავალია, აგერაა აფხაზეთი, ცხინვალი, სადაც წუმპეში ცხოვრობენ და სომხეთიც, რომელიც დაქცეულია. თუ გვინდა, რომ დანარჩენი საქართველოც ისე იყოს, როგორც აფხაზეთი და ცხინვალი, კი ბატონო, არავის არაფერი უნდა დააძალო. არიან ადამიანები, რომელთა ბუნებრივი მდგომარეობაც წუმპეში ცხოვრებაა!

_ ისე, სომხეთში ვადამდელი არჩევნები დაინიშნა, ანუ სომხები ჩვენზე ჭკვიანები აღმოჩნდნენ, არა?

_ არა, იქ ვადამდელი არჩევნები ფაშინიანის ინტერესშია.

_ ზოგიერთი იმედოვნებს, რომ აპრილის ბოლოდან აშშ გააქტიურდება და ხელისუფლებასა და ოპოზიციას შორის მოლაპარაკებებზე შედეგი დაიდება. ამას თქვენც ელოდებით, ბატონო გუბაზ?

_ დიახ, იმედი მაქვს, მაგრამ ამერიკელებიც ხალხს ელოდებიან, ერთხელ მაინც გამოდით ქუჩაშიო. ახლა, აქ სამიტინგოდ თვითონ ხომ არ ჩამოვლენ? სადღაც, ტრიალ მინდორზე, 50 ათასი ადამიანი უნდა გამოვიდეს და თქვას, ეს ხელისუფლება არ გვინდაო.

_ ქუჩაში ხალხის გამოსვლას დიდი მნიშვნელობა არ უნდა ჰქონდეს...

_ არა, არა, სხვა ვერსია არ არსებობს!

დასავლეთის უპირატესობა სწორედ ის არის, რომ ხალხის პოზიციაზე რეაგირებს! იგივე ეგვიპტეში ამერიკელებს მუბარაქის გაშვება ძალიან არ უნდოდათ, მაგრამ ხალხი ქუჩაში რომ გამოვიდა, ამერიკელებმაც თქვეს, ჩვენ ხალხის მხარეზე ვართო.

მოკლედ, დასავლეთი ხალხზე რეაგირებს და არა _ ოლიგარქებზე, ელიტებსა და მაფიოზებზე! იციან, რომ საქართველოში პოლიტიკურად, ეკონომიკურად და სოციალურად საქმე უკან მიდის, მაგრამ ხალხის რეაქციას ვერ ხედავენ.

_ ბატონო გუბაზ, წეღან დავიწყე და კითხვა არ დამასრულებინეთ, ანუ რადენიმე წლის წინ იპოდრომზე ათეულ ათასობით ადამიანი გამოვიდა, მაგრამ მოულოდნელად მომიტინგეები შინ გაუშვით. მოგვიანებით კი გაირკვა, რომ ძმებმა „გრეჩიხებმა“ სააკაშვილისგან რაღაც ინდულგენციები მიიღეს. ჰოდა, ხალხი ახლაც, ალბათ, ფიქრობს, კი გავალ ქუჩაში, მაგრამ მერე ოპოზიცია ხელისუფლებას გაურიგდება და ყველაფერი ამით დამთავრდებაო...

_ რომ გვდომოდა, გავიყიდებოდით! აგერ, ხელისუფლება ღიადაც და ფარულადაც 

ახლაც გადასარევ პირობებს გვთავაზობს.

_ რა პირობებს?

_ ღიად ამქვეყნიურ სამოთხეს გვთავაზობს, დახურულად კი _ სამოთხის სამოთხეს. ხალხმა ხომ იცის, რომ დეპუტატებზე, რომლებიც პარლამენტში არ შევდივართ, ძალიან დიდი ზეწოლა მიდის, _ აგერ, ძმაო, რამდენიც გაგიხარდება, ფურცელი ცარიელია და ციფრი თვითონ დაწერეო, მაგრამ ოპოზიცია ამაზე არ მიდის და ამას დაფასება ხომ უნდა! მეტი რაღა ვქნათ, თავი დავიწვათ თუ კლდიდან გადავიჩეხოთ?!

_ ე. ი., ყველაფერ იმაში, რაც ხდება, ხალხია დამნაშავე?

_ არა!

_ აბა?

_ ხალხი ინერტულია!

_ ინერტულობაც ხომ ერთგვარი დანაშაულია?..

_ დამნაშავეები ყველანი ვართ!

ოპოზიციამ ის დააშავა, რომ არჩევნებზე ერთი დიდი ბლოკით არ გავიდა, რისი შეკვეთაც ხალხს ჰქონდა. ხალხის მხრიდან ოპოზიციის უნდობლობის მთავარ მიზეზად ის მიმაჩნია, რომ ოპოზიციამ არჩევნები სწორად ვერ ჩაატარა და ყველა შეცდომა, რაც კი თეორიულად არსებობს, დაუშვა. არჩევნებზე დაშლილი და ცალ-ცალკე გავიდა. ხალხი ხედავს, რომ ამის აღიარება არ ხდება, თუმცა ოპოზიცია იმ შეცდომისა თუ დანაშაულის გამოსწორებას ცდილობს, რაც ჩაიდინა.

_ როგორ ცდილობს?

_ პრინციპული პოზიცია უკავია და პარლამენტში არ შედის!

საქართველოს მოსახლეობა და ოპოზიცია ერთმანეთზე მომდურებულები როდემდე უნდა ვიყოთ? ხომ ვატყობთ, რომ ცალ-ცალკე ვერაფერს ვშვრებით?! არ გაინტერესებთ, ნამახვანჰესის მიტინგებზე რატომ აღარავინ რეაგირებს?

_ მაინტერესებს და ამიხსენით...

_ მათი არჩევანი იყო, ერთი პოლიტიკოსიც არ მოგვეკაროსო და მარტო დარჩნენ. არადა, არჩევნებში ყველამ „ოცნებას“ მისცა ხმა...

_ სხვათა შორის, გაერთიანების იდეა ნიკა მელიას ჰქონდა...

_ დიახ. გაერთიანების იდეას მეც გადავაკვდი და ვემსხვერპლე...

მოკლედ, ოპოზიციამ ერთი იერარქიული ორგანო უნდა შექმნას, თავისი პერიოდიკით და ყველამ ფუნქციები უნდა გადაინაწილოს: ვიღაცამ გარეთ უნდა იმუშაოს, ვიღაცამ _ შიგნით.

თუ პროტესტზეა საუბარი, მაშინ პროტესტს ორგანიზება სჭირდება და ამას მხოლოდ ტელევიზიით საუბარი არ ჰყოფნის! ეს ხალხი ყველაფერ ამით დაიღალა _ ეკრანზე რომ დაგვინახავენ, ტელევიზორს თიშავენ!

არ ვამბობ, რომ ყველანი ერთ პარტიაში გავერთიანდეთ, მაგრამ არსებობს, აი, მაგალითად, პოლონეთი, სადაც „სოლიდარობა“ შეიქმნა და მასში ყველა პარტია გაერთიანდა _ საეკლესიო პირები, მემარცხენეები, მემარჯვენეები, მუშები და გლეხებიც...

საქართველოშიც ჯერ „ეროვნული ხსნის კომიტეტი“ იყო, მერე _ „მრგვალი მაგიდა“...

ერთი სიტყვით, მოსახლეობას დაფიქსირებული ერთობა უნდა! ხალხის უნდობლობას სწორედ ეს იწვევს და მართალიც არის: რაღაც საკითხზე ერთი ოპოზიციონერი ერთს ამბობს, მეორე _ მეორეს. არადა, საერთო მესიჯებია შესამუშავებელი.

ოპოზიციას სამუშაო საკუთარ თავზე აქვს!

_ ოპოზიცია თქვენს ამ წინადადებებს რატომ არ იღებს?

_ არაერთხელ ვუთხარი და მეტი რა უნდა ვქნა? მივედი და ვთქვი, ესაა გასაკეთებელი, ეს და ეს-მეთქი, მაგრამ არ რეაგირებენ. ის კი, რაც მოსახდენია, თავისით არ მოხდება, ვიღაცამ საკუთარ თავზე უნდა აიღოს და რაღაცაზე უარი თქვას. ახლა პარტიების კი არა, მოქმედების დროა! ხალხი ვეღარ არჩევს, ვინ ენმ-დან არის, ვინ _ „ევროპული საქართველოდან“ და ვინ _ „ლელოდან“, თან ხელისუფლება ყველას „ნაცებს“ გვეძახის. ესენიც გაიძახიან, არ ვართ „ნაცები“ და მიშა შენზე მაგრად გვეზიზღებაო. ეს რა უბედურებაა?

ყველა ერთსა და იმავეს რომ ვილაპარაკებთ, მერე ხალხიც დაგვიჯერებს!

ვანოპავლიაშვილი