ლეიბორისტები ინიციატივით გამოდიან, რომ პოლიტიკურმა პარტიებმა სპორტსმენები, რომლებიც ძალადობაში არიან ეჭვმიტანილები, პარტიულ სიებში არ ჩაწერონ. ამას გარდა, შრომის პარტია მსოფლიო საზოგადოებას მიმართავს და სთხოვს, რომ იმ სპორტულ ფედერაციებს, რომელთა წევრებიც ზონდერებად „მუშაობენ“, საერთაშორისო ფედერაციების წევრობა შეუჩერდეთ, ზონდერობაში მხილებულ სპორტსმენებს კი ყველა ის ტიტული ჩამოერთვათ, რომელიც მათ საერთაშორისო შეჯიბრებებზე სხვადასხვა დროს მოიპოვეს.

რა შემთხვევაში წალეკავს აღშფოთებული ხალხი „ოცნებას“ და რა ერთიანი სტრატეგია აქვს ოპოზიციას „მმართველობის ოლიგარქიული რეჟიმის“ შესაცვლელად? _ ჩვენი გამოცემა გთავაზობთ ინტერვიუს ლეიბორისტული პარტიის ერთ-ერთ ლიდერ გიორგი გუგავასთან:

_ ბატონო გიორგი, საუბარი, რა თქმა უნდა, 19 წლის ფეხბურთელის მკვლელობით უნდა დავიწყოთ. თქვენი აზრით, გიორგი შაქარაშვილის სადისტურმა ტრაგედიამ ადამიანებში უსამართლობის განცდა გაზარდა?
_ რა თქმა უნდა, გაზარდა და ამ ტრაგიკულმა და საზარელმა შემთხვევამ კიდევ ერთხელ აჩვენა, როგორი მახინჯი და დანაშაულებრივი სისტემაა შექმნილი, ანუ სახელმწიფო კრიმინალურ სამყაროსთან კოლაბორაციაშია. შესაბამისად, სპორტმენებისგან ზონდერჯგუფებს ქმნის, რომელთაც ისეთი საკუთარი პოლიტიკური მიზნებისთვის იყენებს, როგორიცაა, მაგალითად, არჩევნების გაყალბება, პოლიტიკურ ოპონენტებსა და სხვა არასასურველ პირებთან ძალადობრივი ანგარიშსწორება. ამ კრიმინალურ სამყაროსა და ზონდერჯგუფებს საკუთარი დღის წესრიგიც აქვთ.
_ და ეს „დღის წესრიგი“ რა არის?
_ კრიმინალური ინტერესები. ყველაფერ ამას კი, რა თქმა უნდა, ძალადობა და მკვლელობები მოყვება. ამან უკვე სისტემური ხასიათი მიიღო და იმის ნაცვლად, რომ მოქალაქის უსაფრთხოების მთავარი გარანტორი იყოს, სახელმწიფო კრიმინალურ სამყაროსთან გარიგებულია და, როგორც აღვნიშნე, ზონდერჯგუფებს ქმნის, ანუ საფრთხის შემცველად თავად სახელმწიფო გვევლინება.
_ ყველაფერი ეს გასაგებია, მაგრამ „შაქარაშვილის საქმეში“კრიმინალების მონაწილეობას სახელმწიფო ოფიციალურად არ ადასტურებს. ყოველ შემთხვევაში, შესაბამისი უწყებებიდან მინიშნება გაკეთდა, რომ „კაწრო“ არაფერ შუაშია. აქედან გამომდინარე, რა შეგვიძლია ვთქვათ _ საქმის გაყალბების მიზანი რა არის, ანუ ხელისუფლება ვის აფარებს ხელს?
_ გამოკვეთილია, რომ გამოძიება, რბილად რომ ვთქვათ, არაკვალიფიციურად მიდის. სხვათა შორის, საზოგადოება, განსაკუთრებით, მედია რომ არ ჩარეულიყო და ამასთან, ხელისუფლებას ის გამოცდილება რომ არ ჰქონოდა, რომელიც „სარალიძის საქმის“ დროს მიიღო, დარწმუნებული ვარ, ის შედეგი, რომელიც, ასე თუ ისე, მივიღეთ, არ დადგებოდა, თორემ თავდაპირველად ფარული შავი ხელი მოქმედებდა და სახელმწიფოც ამ საქმეს სწორედ ამიტომ არ იძიებდა. მედიის ჩართულობის შემდეგ კი ხელისუფლება იძულებული გახდა, რაღაც შედეგი დაედო. მართალია, ჯერ განაჩენი არ გამოუტანიათ, მაგრამ ამ საქმის მთავარი მონაწილეები ზონდერჯგუფები არიან!
სხვათა შორის, ზონდერჯგუფების მონაწილეობა პირველი არაა. იგივე კორცხელშიც ე. წ. სადამსჯელო ოპერაცია ზონდერჯგუფებმა ჩაატარეს. ბოლოს და ბოლოს, ჭიდაობის ფედერაციის პრეზიდენტის მიერ ერთ-ერთ სპორტსმენზე განხორციელებული პირდაპირი ძალადობა ვნახეთ, რის გამოც დაზარალებული იძულებული გახდა, საქართველო დაეტოვებინა!
_ კორცხელის ინციდენტს პოლიტიკური სარჩული ჰქონდა, მაგრამ 19 წლის ფეხბურთელი პოლიტიკურ ნიადაგზე არ მოუკლავთ…
_ მესმის, მაგრამ იცით, ძალადობა ასეთი სისტემატური რატომაა?
_ რატომ?
_ ზონდერჯგუფებს მფარველობენ, ანუ ისინი ხელისუფლებისგან წაქეზებული არიან და იციან, რომ ნებისმიერ შემთხვევაში დაცულები იქნებიან, რადგან არჩევნების დროს ოპონენტებთან ანგარიშსწორებებისას ბინძურ დავალებებს ასრულებენ. არ იცით, რომ არჩევნების დროს კრიმინალურ სამყაროს საკუთარი რაზმები პირდაპირ საარჩევნო უბნებთან ჰყავს განლაგებული ხოლმე?
_ დიახ, ამის შესახებ ბევრს საუბრობენ.
_ კრიმინალის ბუნება ასეთია _ ყაჩაღობა, მკვლელობა, ძარცვა უნდა ჩაიდინოს ან ვინმე დაჩაგროს, მაგრამ ამის გამო პასუხს არავინ სთხოვს, რადგან ხელისუფლებისგან მფარველობას გრძნობს!
კრიმინალური სამყარო სახელმწიფოდ გადაიქცა! ამის ყველაზე ტრაგიკული გამოვლინება გიორგი შაქარაშვილის მკვლელობაა და თუ ეს სისტემა არ ჩამოვშალეთ და დავანგრიეთ, მაშინ მკვლელობები გაგრძელდება!
_ ბატონო გიორგი, ფაქტებით ვიმსჯელოთ, ანუ მართალია, იგივე „კაწროზე“ მედია ბევრს საუბრობს, მაგრამ შაქარაშვილის ტრაგედიაზე გამოძიება მას არაფერს ედავება. შესაბამისად, რის საფუძველზე ამბობთ, რომ „შაქარა“ იმ ზონდერჯგუფებმა იმსხვერპლეს, რომელთაც ხელისუფლება მფარველობს?
_ კონკრეტულ პიროვნებებზე კი არა, ფაქტზე ვსაუბრობ.
_ და ეს ფაქტი რა არის?
_ გამოძიებას, სახელმწიფოს სახელით, შსს ან პროკურატურა ატარებს და ვიღაცის შავი ხელი საქმის ჩაფარცხვას ცდილობს!
_ ჰოდა, ეგ ამიხენით, საქმის ჩაფარცხვის კვალი სად ჩანს?
_ მტკიცებულებების შეგნებულად განადგურებაში, მოწმეებზე ზემოქმედებაში, შემთხვევის ადგილზე ხანძრის გაჩენაში…
_ სხვათა შორის, ამ საქმეში სახელმწიფო მოხელეც, კერძოდ, შსს-ს პრესსამსახურის ხელმძღვანელი და მისი ნათესავი ფიგურირებენ. შესაბამისად, როგორ ფიქრობთ, საქმის ჩაფარცხვის მცდელობაში სახელმწიფო მოხელეების როლი უფრო მნიშვნელოვანია თუ _ კრიმინალური სამყაროსი?
_ რა თქმა უნდა, სახელმწიფოსი, რადგან დანაშაულებრივი სამყაროს წინააღმდეგ ბრძოლა და მართლწესრიგის აღსრულება სახელმწიფოს კონსტიტუციური ვალდებულებაა! თუ მის ინტერესში არ შედის, კრიმინალი სახელმწიფოს ვერაფერს აიძულებს. სწორედ ამიტომ ვამბობ, რომ სახელმწიფოსა და კრიმინალებს შორის კოლაბორაციაა, ანუ ფარულმა ხელმა განკარგულება გასცა და გამოძიებამაც მრუდე გზით სიარული დაიწყო!
_ თქვენი აზრით, გიორგობიანს იმხელა გავლენა აქვს, რომ მისი დავალებით გამოძიებამ მრუდე გზით სიარული დაიწყო?
_ არ ვამბობ, რომ საქმე გიორგობიანისა და მისი ნათესავიდან გამომდინარეა გამრუდებული.
_ აბა?
_ ყველაფერი უფრო მაღალ იერარქებამდე მიდის!
_ სხვათა შორის, თქვენი ლიდერი, შალვა ნათელაშვილი, ნაძალადევის მაჟორიტარობის კანდიდატია, ანუ პირდაპირ ზემოხსენებულ ზონდერჯგუფებთან მოგიწევთ, ასე ვთქვათ, ურთიერთობა. მათთან გასამკლავებლად რა მექანიზმები გაქვთ?
_ ჩვენი, როგორც პარტიის, ერთადერთი მექანიზმი ამ სისტემის მხილებაა! აბა, ზონდერჯგუფებთან სამოქალაქო ომს ხომ არ გავაჩაღებთ? ისინი იდეოლოგიურად უნდა გავანადგუროთ!
სხვათა შორის, საზოგადოებამ უკვე იცის, რომ გადავწყვიტეთ, საერთაშორისო სპორტულ ფედერაციებს მივმართოთ და მოვთხოვოთ, რომ იმ ადგილობრივ სპორტულ ფედერაციებს, რომელთა სპორტსმენებიც ძალადობრივ ქმედებებსა და კორუფციულ საქმიანობაში არიან ჩართულები, საერთაშორისო ფედერაციების წევრობის სტატუსები შეუჩერდეთ!
გარდა ამისა, ვითხოვთ, რომ სპორტსმენებს, რომლებიც ასეთ საქმიანობაში იქნებიან შემჩნეულნი, მხოლოდ საერთაშორისო ტიტულები კი არ ჩამოერთვათ, არამედ, სპორტული მოღვაწეობა და სამწვრთნელო საქმიანობაც აეკრძალოთ! თუ ასე არ მოვიქცევით, მაშინ ვხედავთ, რომ „თანამოქალაქეების მკვლელთა დაქირავებული რაზმები“ მივიღეთ.
_ სხვათა შორის, შალვა ნათელაშვილი იმასაც ითხოვს, რომ სპორტსმენებს პოლიტიკაში მონაწილეობაც აეკრძალოთ, მაგრამ ეს ინიციატივა, მგონი, დისკრიმინაციულია, რადგან შესაძლოა, ბევრი პატიოსანი სპორტსმენი, რომელსაც პოლიტიკაში წასვლა უნდა, დაზარალდეს…
_ დისკრიმინაცია არაფერ შუაშია!
_ აბა?
_ უბრალოდ, საუბარი იმაზეა, რომ შექმნილი ვითარებიდან გამომდინარე, პარტიებმა კუნთმაგარი ხალხი, რომელიც ძალადობაში იქნება მხილებული, პარტიულ სიაში არ შეიყვანონ!
წეღანდელი თქმისა არ იყოს, ყველაფერ ამას უნდა შევებრძოლოთ! ანგელოზი ბიჭი მხეცურად შეიწირეს, მაგრამ ამის მიუხედავად, სპორტულ ფედერაციებს დაგმობის განცხადებაც კი არ გაუკეთებიათ!
_ სხვათა შორის, რაგბის კავშირმა განაცხადა, რომ დაკავებულ მორაგბეებს მასთან კავშირი არ აქვს, ანუ კლუბი „ასკანელები“, რომლის სათავეშიც ბრალდებული მორაგბეები დგანან, როგორც ირკვევა, რაგბის ფედერაციის წევრი არაა.
_ რა მნიშვნელობა აქვს, წევრია თუ არა? ბოლოს და ბოლოს, ღირსების კოდექსი არსებობს. აი, მაგალითად, იაპონიაში სუმოისტმა თავისი ძალა ტატამს მიღმა რომ გამოიყენოს, როგორ წარმოგიდგენიათ, ამ სფეროში კიდევ გააჩერებენ? _ გამორიცხულია! როცა სპორტსმენები კრიმინალურ დაკვეთებს მასობრივად ასრულებენ, ეს ძალიან შემაშფოთებელია და ყველაფერ ამის წინააღმდეგ მხოლოდ იდეოლოგიური კი არა, რეგულაციური ბრძოლაა საჭირო!
_ ისე, ბატონო გიორგი, „შაქარაშვილის საქმემ“ პოლიტიკური თემები გადაფარა, მათ შორის, ე. წ. ქალთა კვოტირებაც აღარავის ახსოვს. არადა, როცა ამის შესახებ შევიტყვეთ, თქვენმა პარტიულმა ლიდერმა რიტორიკულად იკითხა, _ ვერ გავიგე, დეპუტატებს ვირჩევთ თუ სასქესო ორგანოებსო? მოკლედ, გენდერულ კვოტირებაზე ლეიბორისტებს ასეთი მძაფრი რეაქცია იმიტომ გქონდათ, რომ ქალები, რომელთაც საარჩევნო სიაში ჩაწერთ, არ გყავთ?
_ ეს არაფერ შუაშია.
_ აბა?
_ ასეთი სავალდებულო კვოტირების დაწესება ჩვენი ერის, ისტორიის, კულტურისა და მხოლოდ ქალების კი არა, მამაკაცების შეურაცხყოფაცაა!
_ რატომ?
_ აი, მაგალითად, როცა ექიმი გჭირდებათ, სქესის მიხედვით არჩევთ ხოლმე, თუ პროფესიონალიზმის?
_ ცხადია, პროფესიონალიზმის, მაგრამ ეს რა შუაშია?
_ პარლამენტი სახელმწიფო მმართველობის მთავარი ორგანოა, მით უმეტეს, საპარლამენტო რესპუბლიკაში და მისი ფორმირება იმის მიხედვით უნდა განხორციელდეს, ვინ რომელი სქესის წარმომადგენელია? ანუ ყველაფერი ეს სასქესო ორგანოებზე უნდა დავიყვანოთ და ამით პრობლემა რამენაირად მოგვარდება?
არ მინდა, სადღეგრძელოსავით გამომივიდეს, მაგრამ მე-12 საუკუნეში მეფე-ქალი გყვავდა და „ლეკვი ლომისა სწორია“ სწორედ მაშინ დაიწერა.
სხვათა შორის, საქართველოში, განსაკუთრებით მთაში, გვარების უმეტესობა ქალთა სახელებიდან მოდის იმიტომ, რომ მატრიარქალური მმართველობის ფორმებიც არსებობდა და ჩვენს ისტორიაში ქალებს უდიდესი მნიშვნელობა ჰქონდათ! ეს რა არის, რა უბედურებაა?! საკითხის ასე ხელოვნურად განსაზღვრა პრობლემას აგვარებს?
ქალებზე ძალადობა აბსოლუტურად სხვა თემაა, რომელსაც განსაკუთრებული მოგვარება სჭირდება.
_ ქალთა კვოტირების ინიციატივით „ოცნება“, არ მგონია, ქალებზე ძალადობის აღმოფხვრის გამო გამოსულიყო. ამ იდეას, ალბათ, უფრო სხვა პოლიტიკური მიზნები აქვს. ვცდები?
_ არ ვიცი, „ოცნებას“ რა მიზანი აქვს, მაგრამ პარლამენტის წევრთა ასეთი ხელოვნური კვოტირება, როგორც გითხარით, ჩვენი კულტურის, ისტორიის, საზოგადოების, ქალის, მამაკაცისა და საერთოდ, ყველასა და ყველაფრის შეურაცხყოფაა!
_ და ზუსტად მაშინ, როცა „ოცნება“ ზონდერჯგუფებს მფარველობს და ქალთა კვოტირებას აკანონებს, ოპოზიციის ერთიანობის მითი იმსხვრევა. ყოველ შემთხვევაში, ხმა დადის, რომ მაგალითად, „ძალა ერთობაშია“, შესაძლოა, დაიშალოს…
_ ასე არაა.
_ ანუ?
_ იმასთან დაკავშირებით, რომ არსებული ოლიგარქიული რეჟიმი უნდა შეიცვალოს, ოპოზიციას ერთიანი სტრატეგია აქვს.
_ და ეს სტრატეგია როგორია, ოპოზიცია ოლიგარქიული რეჟიმის შეცვლას როგორ აპირებს?
_ საერთოდ, არჩევნების წინა პერიოდში, როცა სია და მაჟორიტარები განისაზღვრება, ასეთი დუღილი ჩვეულებრივი მოვლენაა. აი, მაგალითად, როცა აშშ-ში საპრეზიდენტო არჩევნები იწყება ხოლმე, საპრეზიდენტო კანდიდატის გამოსავლენად პარტიებში პრაიმერები ტარდება და, ალბათ, იცით, ამ დროს რა დაპირისპირებები ხდება ხოლმე, თუმცა ეს იმას არ ნიშნავს, რომ პარტიას საერთო სტრატეგია არ გააჩნია.
მოკლედ, ოპოზიციას აქვს ერთიანი სტრატეგია, რომ არსებული რეჟიმი შეცვალოს, კოალიციური მთავრობა შექმნას და ქვეყანა განვითარების ახალ გზაზე გაიყვანოს.
_ ღმერთმა ქნას, ოპოზიციის სტრატეგიამ გაამართლოს, მაგრამ ამასობაში, აშშ-მ, შესაძლოა, სანქციები დაგვიწესოს. ყოველ შემთხვევაში, კონგრესმა დახმარებების 15 პროცენტის გაყინვაზე გადაწყვეტილება პირველი მოსმენით უკვე მიიღო. ზოგიერთი ამბობს, რომ ამ კუთხით საბოლოო გადაწყვეტილება ოქტომბრამდე არ მიიღება, მაგრამ თუ არჩევნებში ისევ „ოცნება“ გაიმარჯვებს, მერე რა გველის?
_ ვინ გითხრათ, რომ ოქტომბრამდე არ იქნება? ეფექტიანი სანქციები, პრაქტიკულად, ამოქმედდა.
_ ეს ეფექტიანობა სად გამოიხატა?
_ ასიგნირების კომიტეტმა სასანქციო პაკეტი დაამტკიცა. გადაწყვეტილება კი კომიტეტმა და შემდეგ სენატმა უნდა მიიღოს. საერთოდ, ასეთი გადაწყვეტილებები, როგორც წესი, მტკიცდება ხოლმე.
ერთი სიტყვით, ეს სანქციები უკვე ამოქმედებულია და აწი საუბარი ივანიშვილისა და მისი გარემოცვის პერსონალურ სანქცირებაზე იქნება! ფაქტები დაიდება და თუ ივანიშვილი მშვიდობიანი, სამართლიანი არჩევნების ჩატარებას ან ხელისუფლების სამართლიანი გზით გადაბარებას არ უზრუნველყოფს, მერე ნახეთ, თავს რაც დაატყდება!
_ რა დაატყდება?
_ პიროვნული უბედურება!
_ უფრო კონკრეტულად?
_ მისი ანგარიშები და აქტივები გაიყინება, ცარიელ-ტარიელი დარჩება და შეიძლება, ჭორვილამდე წასასვლელი ფულიც არ ჰქონდეს!
_ თქვენი აზრით, ყველაფერ ამას ივანიშვილი ვერ ხვდება?
_ საკუთარი განაჩენი თავად დაწერა და თუ ასე მოიქცევა, მაშინ ამ განაჩენს დაიმძიმებს! ის, ალბათ, ფიქრობს, რომ მისთვის ვერავინ მოიცლის და გაძვრება, მაგრამ ეს სტრატეგია მცდარია.
_ ამას რის საფუძველზე ამბობთ?
_ პლახატნიუკის მაგალითზე. სხვა დიქტატორების მაგალითებიც ვიცით. ასე რომ, ძალიან მძიმედ დაამთავრებს და ამ სიტუაციიდან გამოსავალს როგორც უნდა ეძებდეს, გზები მოჭრილი აქვს! ერთადერთი, რითაც განაჩენის შემსუბუქება შეუძლია ისაა, რომ ხელისუფლება მშვიდობიანი და არჩევნების გზით გადააბაროს. უფრო სწორად, სამართლიანი, თავისუფალი და დემოკრატიული არჩევნები უნდა უზრუნველყოს!
_ სამართლიანი არჩევნების ერთ-ერთი გარანტი საერთაშორისო სადამკვირვებლო მისიებია, მაგრამ იმ დროს, როცა სზღვრები ჩაკეტილია და არსებობს მოლოდინი, რომ ოქტომბრის შუა რიცხვებამდე შესაძლოა, არც გაიხსნას, ეს არჩევნების გაყალბების წინაპირობა ხომ არ გახდება?
_ ხელისუფლებამ საზღვრები რაც უნდა გადაკეტოს, საერთაშორისო დამკვირვებლების ჩამოსვლას მაინც ვერ შეაფერხებს!
_ რატომ?
_ საერთოდ, საზღვრების ჩაკეტვას ორი მიზანი აქვს _ პოლიტიკური და ეკონომიკური (ბიზნესი).
_ ანუ?
_ ქვეყანა რაც უფრო ხანგრძლივად იქნება ჩაკეტილი, მისი კომპანიები მონოპოლიურად დიდხანს იმოქმედებენ და ეს საშუალებას მისცემს, მეტი ფული გააკეთოს.
რაც შეეხება პოლიტიკურ მიზანს, ამზადებს, რომ ქვეყანა გამოკეტოს და რაღაც პანდემიური აფერა გაათამაშოს, რათა არჩევნებზე სასურველი შედეგი დადოს, მაგრამ ეს ორივე სცენარი მარცხისთვისაა განწირული!
_ სხვათა შორის, სარალიძის საქმეზე გვახსოვს, ხალხი ქუჩაში გამოვიდა და მაშინ „ოცნებამ“ კრიზისის გადაგორება ძლივს მოახერხა. გამორიცხავთ, „შაქარაშვილის საქმით“ აღშფოთებული მოსახლეობა ქუჩაში რომ არ გამოვიდეს, ხელისუფლებამ სისხლიანი დაბადების დღის საქმე ობიექტურად გამოიძიოს და 19 წლის ბიჭის რეალური მკვლელები დასაჯოს?
_ ეს ხელისუფლების ვალდებულებაა და თუ ასე არ მოიქცევა, საზოგადოებამ, რომელიც დამუხტულია, შესაძლოა, იგი წალეკოს!
სამწუხაროდ, მკვლელი ქუჩაში დადის და ამიტომ ეს სისტემა უნდა ჩამოიშალოს!
_ ბატონო გიორგი, თქვენი აზრით, „ოცნებისთვის“ რა უფრო მნიშვნელოვანია _ საკუთარი ძლევამოსილების ხაზგასმა თუ ის, რომ ხალხი ქუჩაში არ გამოვიდეს და არჩევნების წინ მეტ-ნაკლები სტაბილურობა შეინარჩუნოს?
_ ერთი მხრივ, „ოცნებას“ არ უნდა, რომ თავისი ზონდერები გაანაწყენოს და არც ის უნდა, კრიმინალურ სინდიკატთან გაფორმებულ ხელშეკრულებას გადახედოს, რადგან ყველაფერი ეს არჩევნებისთვის სჭირდება.
მეორე მხრივ კი, თუ მკვლელები არ დაისაჯნენ და „შაქარაშვილის საქმეზე“ რეალური მართლმსაჯულება არ დადგა, „ოცნება“ ხალხის წინააღმდეგობის წარმოუდგენელ ტალღას მიიღებს!
_ მოკლედ, უცხელესი საარჩევნო კამპანია და, შესაბამისად, არჩევნები გველოდება, არა?
_ რა თქმა უნდა!!!

გიორგი აბაშიძე