იმ დროს, როცა „ოცნებაზე“ საერთაშორისო წნეხი ძლიერდება, ოპოზიციაში მინისკანდალმა იფეთქა. ყველაფერი კი მას შემდეგ დაიწყო, რაც გრიგოლ ვაშაძემ თქვა, რომ პროპორციულ არჩევნებზე დაპირება ენმ-სა და „გაერთიანებული ოპოზიციის“ მონაპოვარია. ვაშაძის ამ განცხადებას „გირჩის“ ერთ-ერთი ლიდერი, ზურაბ ჯაფარიძე გამოეხმაურა და განაცხადა, რომ „გირჩი“ ოპოზიციის იმ საკონსულტაციო ფორმატში, სადაც ყოფილ ხელისუფლებას პრეზიდენტობის ექსკანდიდატი წარმოადგენს, მონაწილეობას არ მიიღებს.

„გირჩი“ გააგრძელებს კონსულტაციებს „ნაციონალური მოძრაობის“ ადგილობრივ ლიდერებთან ისევე, როგორც სხვა პარტიებთან იმის თაობაზე, თუ როგორ უნდა შევცვალოთ ქვეყანა ივანიშვილის ხელისუფლებიდან წასვლის შემდეგ, ანუ როგორ დავშალოთ სისტემა, როგორ მოვახდინოთ ბოლშევიკების მიერ ჩამორთმეული ქონების რესტიტუცია, მაგრამ ჩვენ არაფერზე დაველაპარაკებით გრიგოლ ვაშაძეს. მათ შორის, ოპოზიციის ერთიანი საკონსულტაციო ფორმატის იმ შეხვედრებში, სადაც ეს ადამიანი იქნება „ნაციონალური მოძრაობის“ წარმომადგენელი და პარტიის პოზიციის გამხმოვანებელი, ჩვენ მონაწილეობას არ მივიღებთ“, – ამბობს ჯაფარიძე.

რატომ გააღიზიანა „გირჩი“ ვაშაძის განცხადებამ და, საერთოდ, რა პრეტენზია აქვს ზურაბ ჯაფარიძის პოლიტიკურ გუნდს პრეზიდენტობის ყოფილ კანდიდატთან? _ ამის თაობაზე „ქრონიკა+“ „გირჩის“ ერთ-ერთ ლიდერ იაგო ხვიჩიას ესაუბრა:

_ ზურაბ ჯაფარიძის განცხადებამ, რომ „გირჩი“ იმ მოლაპარაკებებში, სადაც გრიგოლ ვაშაძე იქნება, მონაწილეობას არ მიიღებს, ოპოზიციაში დიდი აჟიოტაჟი გამოიწვია. იაგო, თქვენ, როგორც „გირჩის“ ერთ-ერთი ლიდერი, ჯაფარიძის ზემოხსენებულ ინიციატივას როგორ განმარტავთ და, საერთოდ, მსგავსი განცხადების იმ დროს გაკეთება, როცა ყველა ერთის, ანუ „ოცნების“ წინააღმდეგ ცდილობს გაერთიანებას, საჭირო იყო?
_ საერთოდ, ნებისმიერი შეხვედრა და საქმიანი მოლაპარაკება შედეგიანი მხოლოდ მაშინაა, როცა ამ შეხვედრის მონაწილეთა ურთიერთობა მინიმალურ პატივისცემაზეა დაფუძნებული.
_ „მინიმალური პატივისცემა“ რას ნიშნავს?
_ „მინიმალური პატივისცემა“ იმას ნიშნავს, რომ საჯაროდ უტიფარ ტყუილს არ ვამბობთ და ამით არც თავს ვიტყუებთ და არც ერთმანეთს ვატყუებთ. თუ ამაზე შეთანხმება არ არსებობს, ერთიანობა არ გამოვა. თუ მოლაპარაკების დროს ადამიანები ერთმანეთს ატყუებენ, ანუ ტყუილის თქმა „მოსულა“ და ეს არაფერია, მაშინ ასეთი შეხვედრა, როგორც გითხარით, ეფექტიანი ვერ იქნება.
_ ტყუილში ბატონი ვაშაძის იმ განცხადებას გულისხმობთ, რომლის თანახმადაც, პროპორციული სისტემა „ნაციონალური მოძრაობის“ მონაპოვარია?
_ ჯერ ერთი, საერთოდ გაუგებარია, რაზეა ლაპარაკი, რადგან პროპორციული სისტემა არ გვაქვს.
მეორეც, ის, რომ, თავის დროზე, პროპორციულს დაგვპირდნენ, თურმე, „ნაციონალური მოძრაობის“ დამსახურება ყოფილა, მაგრამ ეს სიმართლე არაა.
_ რატომ?
_ ადამიანები, რომლებმაც 20 ივნისის ღამეს ჯანმრთელობის დაზიანება მიიღეს, რის შემდეგაც პროპორციულის დაპირება გაიცა, „ნაციონალურ მოძრაობასთან“ თავს არ აიგივებენ.
ყველაფერ აქედან გამომდინარე, ვაშაძის განცხადება უსამართლო იყო და თუ გვინდა, რომ პროცესი არ დაზიანდეს, ერთმანეთის ნათქვამი უსამართლობებიც უნდა გავაკონტროლოთ, თორემ თუ ყველა ჩვენგანმა ის ილაპარაკა, რაც უნდა და თან ეს ტყუილი იქნება, ამით პროცესი დაზიანდება.
მოკლედ, ჩვენ არ გვინდა, რომ პროცესი დაზიანდეს. გვინდა, ყველაფერი ჯანსაღი იყოს, თუმცა ჯანსაღ პროცესში მონაწილეობა იმას არ ნიშნავს, რომ ვინმეს არ გავაკრიტიკებთ და ამბებს, რომლებიც გასატარებელი არაა, ისე გავატარებთ, თითქოს არაფერი მომხდარა!
_ იაგო, გეთანხმებით, რომ ტყუილის ტირაჟირება არავინ უნდა მოახდინოს, მაგრამ გრიგილ ვაშაძე პარტიის თავმჯდომარეა. შესაბამისად, სავსებით დასაშვებია, რომ მან მთელი თავისი პოლიტიკური გუნდის მოსაზრება გაახმოვანა, თუმცა „გირჩმა“ პიროვნულად პრეზიდენტობის ექს -კანდიდატზე მიიტანა იერიში. რატომ?
_ „ნაციონალური მოძრაობის“ მთელი პოლიტსაბჭო ასე არ ფიქრობს.
_ რა იცით?
_ ამ ხალხთან კონტაქტი პირადადაც გვაქვს და საჯაროდაც.
_ მერე?
_ ამ პოზიციის გახმოვანების შემდეგ თავად ვაშაძემაც, გარკვეული თვალსაზრისით, უკან დაიხია. გარდა ამისა, ზურაბ ჯაფარიძის კრიტიკის პასუხად, „ნაციონალური მოძრაობის“ ლიდერებს არ უთქვამთ, თქვენ მტყუანები ხართო.
_ სხვათა შორის, პოლიტიკურ კულუარებში „ნაციონალებთან“ დაახლოებული პირებისგან ასეთი ვერსია მოვისმინე, გრიგოლ ვაშაძე ნერვებს მხოლოდ „ოცნებას“ კი არა, ოპოზიციის ცალკეულ ლიდერებსაც უშლის და მასზე იერიში ამიტომაც მიიტანესო. ამაზე რა პასუხი გექნებათ?
_ შეიძლება, ვაშაძე ვინმეს ნერვებს უშლის, მაგრამ „გირჩი“ ამ თვალსაზრისით უნერვო ხალხია, ანუ ვინმეს მიმართ, თუ ის პროცესს არ აზიანებს, ემოცია არ გვაქვს.
ისე, ვაშაძეს რატომ ვერ უნდა ვიტანდეთ? მას ისე არ ვუყურებთ, როგორც ასატან ან ვერასატან ფიგურას. მას ისე ვუყურებთ, როგორც მოცემულობას კოლეგა ოპოზიციური პარტიიდან, მაგრამ როცა ეს კოლეგა საერთო პროცესს აზიანებს, ჩვენი, როგორც პასუხისმგებლიანი ოპოზიციის ვალდებულებაა, ვთქვათ, ეს არ მოსულაო.
თუ ასე არ მოვიქცევით, მაშინ შესაძლოა, იგივე სხვამაც გააკეთოს და მთელმა ამ პროცესმა სერიოზულობა დაკარგოს.
_ ამერიკელი კონგრესმენების უმწვავესი წერილებისა და ოპოზიციის ზეწოლის მიუხედავად, „ოცნება“ დათმობაზე არ მოდის. შესაბამისად, არ მესმის, იმ პროცესმა, რომლის დაზიანების უფლებასაც, როგორც ამბობთ, არავის მისცემს, რა შედეგი უნდა „დადოს“?
_ ჩვენ ხელისუფლებას არ ველაპარაკებით.
_ აბა, ვის ელაპარაკებით?
_ ხელისუფლებას პროპორციულ საარჩევნო სისტემაზე საერთაშორისო პარტნიორების მეშვეობით ველაპარაკებით, ანუ არსებობს შესაბამისი ფორმატი, სადაც „ქართული ოცნების“ მიერ პირობის შესრულებაზეა საუბარი. ეს პროცესი დინამიკურია.
_ კერძოდ?
_ თავიდან „ოცნება“ არაფერს თმობდა. ახლა კი, როგორც ვიცით, მაგიდაზე 100/50-ზე, ანუ უბარიერო შერეული სისტემა დევს. მოკლედ, ეს პროცესი მდორედ, მაგრამ მიდის. ამასობაში, საქართველოში აშშ-ის ელჩი ჩამოდის. საერთოდ, თუ ვინმეს სიტყვას ამ თვალსაზრისით წონა აქვს, სწორედ აშშ-ის ელჩია. მართალია, მე და ჩემი პოლიტიკური ორგანიზაცია პირდაპირ ჩართულები არ ვართ, მაგრამ ზუსტად ამ ფორმატით ელაპარაკება ოპოზიცია ხელისუფლებას. დანარჩენი სხვა ლაპარაკი კი ოპოზიციის შიგნით იმაზეა, თუ როგორ მოვიპოვოთ პროპორციული არჩევნები და როგორი იქნება ქვეყანა ბიძინა ივანიშვილის შემდეგ. „გირჩის“ მიზანი სწორედ ესაა, ანუ თუ ოპოზიცია ხელისუფლებაში მოსასვლელად სერიოზულად ვემზადებით, მაშინ ამ კითხვაზე პასუხი არ არსებობს და ვცდილობთ, ეს პასუხი სხვებთან ერთად გამოვძერწოთ.
_ როგორი უნდა იყოს ქვეყანა ივანიშვილის მმართველობის შემდეგ? _ ამ კითხვაზე „გირჩს“ სავარაუდო პასუხიც არ აქვს, რომელსაც ოპოზიციას განსახილველად შესთავაზებს?
_ ჩვენ ორი მოთხოვნა გვაქვს.
_ სახელდობრ?
_ ჩვენთან მეგობრობისა და პარტნიორობისთვის საკმარისია, რომ ადამიანები ჩვენნაირად ფიქრობდნენ, ანუ ადამიანები კი არ უნდა დაგვეთანხმონ, ანუ ჩვენნაირად უნდა ფიქრობდნენ.
_ თქვენ, ანუ გირჩელები, როგორ ფიქრობთ?
_ ამ ქვეყანაში მთავარი სახალხო შეკვეთა, რომელსაც პოლიტიკური სპექტრიდან ვერავინ გავექცევით, საბჭოთა მართლმსაჯულების სისტემის დაშლაა. მოკლედ, მესიჯზე კი არა, იდეაზე უნდა შევთანხმდეთ, რომ ეს სისტემა უნდა დაინგრეს!
სხვათა შორის, ამის შანსი 2012 წელსაც გქვონდა და 2013-შიც, მაგრამ ეს შანსი ვერ გამოვიყენეთ. წელს, პოლიტიკური ხელისუფლების ცვლილებით, შანსი კიდევ ერთხელ ჩნდება, რომ საბჭოთა ბოროტების სისტემა დავძლიოთ, რომელიც პოლიციის, პროკურატურის, სასამართლოს, სუს-ისა და რაღაცების სახით გვაქვს. ეს სისტემა, თავისი საშინელი ძალაუფლებით, ხელისუფლებაში მოსულ ნორმალურ ადამიანებს აგიჟებს!
მოკლედ, ეს სისტემა უნდა დავშალოთ და ვცდილობთ, რომ ოპოზიციური სპექტრი ამაზე დავითანხმოთ! ის, ვინც ამაზე, ანუ სისტემის დაშლაზე არ დაგვთანხმდება, სანდო არ იქნება და მასთან ერთად ბრძოლა არ მინდა.
სისტემის დაშლის მოთხოვნა, პირადად ჩემთვის, შეთანხმებას ნიშნავს, რომ პოლიტიკოსები ერთმანეთს ლაპარაკის გამო ისე არ ვიჭერთ, როგორც, სამწუხაროდ, ყველა ხელისუფლება იქცეოდა.
ერთი სიტყვით, მოლაპარაკების პროცესში ჩვენ ამ წინადადებას ვაყენებთ. არ ვიცი, საქართველოს გარეთ ვინ რას ფიქრობს, მაგრამ საქართველოში ამ იდეის წინააღმდეგი ადამიანი ჯერ არ შემხვედრია!
_ შეთანხმება გასაგებია, მაგრამ თქვენი იდეის ხორცშესხმას მხოლოდ შეთანხმება კი არა, ქმედითი ნაბიჯების გადადგმა სჭირდება. სხვათა შორის, მსგავსი შეთანხმება 2012 წლის საპარლამენტო არჩევნების წინაც არსებობდა. ყოველ შემთხვევაში, მაშინ „ოცნება“ ამბობდა, რომ პოლიტიკური ნიშნით არავის დაიჭერდა, მაგრამ ეს დაპირება დაპირებად დარჩა.
_ არა, მაშინ ასე არ იყო.
_ აბა, როგორ იყო?
_ 2012 წელს ყველაფერი ეს სადღეგრძელოს დონეზე იყო. ახლა კი გვინდა, მხოლოდ იდეაზე კი არა, იმაზე მოხდეს შეთანხმება, თუ როგორ ვანგრევთ სისტემას.
მოკლედ, ოპოზიციას ვეუბნებით: ხომ ყველას გვჯერა, რომ ამ „გადაგდების“ შემდეგ ბიძინა ივანიშვილი პოლიტიკურად დამთავრებულია და თუ ეს მართლა გვჯერა, მაშინ ხელისუფლებაში მოსასვლელად უნდა მოვემზადოთ. ჰოდა, თუ ხელისუფლებაში მოსასვლელად რეალურად ვემზადებით, მაშინ უნდა ვთქვათ, თუ როგორი უნდა იყოს მართლმსაჯულების სისტემა. ამ მხრივ ჩვენ, ანუ „გირჩს“, ჩვენი გეგმა გვაქვს, მაგრამ გვაინტერესებს, დანარჩენი ოპოზიცია რას აკეთებს, ანუ ოქტომბრის ბოლოს ხელისუფლებაში რომ მოვალთ, ახლად დანიშნულ მთავარ პროკურორს რას ვუშვრებით ან რას ვუშვრებით უვადოდ არჩეულ მოსამართლეებს, რომლებიც მთელმა სამყარომ იცის, რომ კლანმა ბიძინა ივანიშვილის დავალებების შესასრულებლად დანიშნა? ერთი სიტყვით, უნდა გავარკვიოთ, ამ ადამიანებს რას ვუშვრებით _ ვტოვებთ და მათ ვინმეს ვასამართლებინებთ?
ასევე საინტერესოა, რას ვუშვრებით პოლიციელებს, რომელთა გამოც ხალხი ფანჯრებიდან ხტება? სხვათა შორის, ისიც საინტერესოა, რომ პოლიცია ცრუ მოწმეებითაა სავსე და რამე ამ მხრივაც გვაქვს მოსაფიქრებელი.
დღეს ისეთ ვითარებაში ვიმყოფებით, რომ არც ერთ ორგანოსა და ადამიანს ერთმანეთის მიმართ ნდობა არ გააჩნია. პირადად მე მართლმსაჯულების სისტემის მოწყობაში, ჩემი პარტიის გარდა, არავის ვენდობი! სხვებიც ასევე არიან.
_ იაგო, საკუთარ პარტიას რატომ ენდობით? რა, არ შეიძლება, მერკანტილური ინტერესები ვინმეს „გირჩშიც“ გაუჩნდეს?
_ „გირჩში“ იმიტომ ვარ, რომ მეგობრებს ვენდობი, მაგრამ ეს იმას არ ნიშნავს, რომ სხვა ვინმეც მენდობა.
როცა არავის არავის ნდობა არ აქვს, როცა არც ერთი ინსტიტუცია არ მუშაობს, როცა წმინდა არაფერია და ვერავის ავარჩევინებთ, მაგალითად, მოსამართლეს, რომელსაც ჩვენი დაჭერის უფლება ექნება, მაშინ ერთადერთი გზა არსებობს.
_ და ეს რა გზაა?
_ ამერიკული, როცა ყველას _ მოსამართლეს, პოლიციის შერიფსა და პროკურორს ვირჩევთ! თუ ჩვენ არჩეული პოლიციის რაიონული უფროსი, მოსამართლე და პროკურორი გვეყოლება, მაშინ ჩვენზე იქნება დამოკიდებული, თუ როგორ სისტემას შევქმნით! არც ერთ არჩეულ ადამიანს ზემდგომი არ ეყოლება, რაც ამ თანამდებობის პირების დამოუკიდებლობას ამყარებს!
მოკლედ, ერთხელ და სამუდამოდ იმაზე უნდა გადავიდეთ, რომ მოსამართლე, პროკურორი და პოლიციელიც ადამიანებმა აირჩიონ, რადგან ეს არის სისტემა, რომელსაც ნდობა ყველაზე მეტად სჭირდება. ისეთი საყოველთაო უნდობლობის პირობებში, რომელშიც ახლა ჩვენ ვიყოფებით, ერთადერთი გამოსავალი, საიდანაც შეიძლება, ნდობა დაიბადოს, ზემოხსენებული თანამდებობის პირები რიგითმა ადამიანებმა უნდა აირჩიონ!
_ სისტემის შეცვლის ამერიკული მოდელი, რომლისკენაც „გირჩი“ იხრება, ოპოზიციაში ვინმესთვის მიუღებელია?
_ ოპოზიცია ბევრნაირია.
_ დიახ, ვიცი, მაგრამ ამას ხაზს რატომ უსვამთ?
_ ჩვენ ამაზე საუბარი დავიწყეთ. რაღაცებთან დაკავშირებით ზოგს განსხვავებული მოსაზრება აქვს, მაგრამ პრინციპულ საკითხთან დაკავშირებით, რომ ამ წუთას არ არსებობს ხალხზე უფრო სანდო ორგანო ან პირი, შეჯერებული ვართ. არ ვიცი, აქედან შეთანხმებამდე რამდენი ნაბიჯი დაგვჭირდება, მაგრამ, ჯერჯერობით, დრო გვაქვს და არჩევნებამდე ამ თემაზე საუბარი სულ იქნება.
ფაქტია: ამ წუთას პოლიტიკაში ერთი ადამიანიც არ არსებობს, რომელიც ამბობს, სისტემის თავზე მოჯდომა მინდაო.
მოკლედ, სისტემის დაშლაზე მთელი ოპოზიცია თანახმაა, მაგრამ საკმარისი მხოლოდ ეს არ არის. მე უნდა მჯეროდეს, რომ ის ნაბიჯები, რაზედაც შევთანხმდებით და რის შესახებაც ამომრჩეველს მოვუყვებით, სისტემას ნამდვილად დაშლის!
სხვათა შორის, საბჭოთა მმართველობა მაშინ დაინგრევა, როცა პირადი მოტივებიდან გამომდინარე ვინმე ვერც მიხეილ სააკაშვილს დაიჭერს და ვერც _ ბიძინა ივანიშვილს!
_ ჩვენში დარჩეს და, ამ კონტექსტში „ევროპული საქართველოს“ ინიციატივა გამახსენდა, რომლითაც ის რამდენიმე თვის წინ გამოვიდა და „ნაციონალურ მოძრაობას“ მოუწოდა, მემორანდუმი გავაფორმოთ, რომლის თანახმადაც, მას შემდეგ, რაც მმართველობაში მოვალთ, ყოფილი ხელისუფლების მაღალი თანამდებობის პირებს ხელშეუხებლობის გარანტიას მივცემთო. ამაზე „გირჩის“ მოსაზრება როგორია?
_ ვიღაცის კეთილ ნებას ვერ ვენდობი.
_ ანუ?
_ მე სისტემის ისეთი დაშლა მჭირდება, რომ მისი ვინმეს ხელში პოლიტიკური და სამართლებრივი ძალაუფლების სრული თავმოყრა შეუძლებელი გახდეს! თუ ეს ძალაუფლება ბევრ სხვადასხვა ადამიანზე გადანაწილდება, ეს ობიექტური განხილვის შესაძლებლობას მოგვცემს. ასეთ შემთხვევაში, ვფიქრობ, საერთოდ არ დავდგებით მასეთი დილემის წინაშე, ანუ ძალაუფლების ცენტრი აღარ იარსებებს, _ ვინაიდან სისტემა დაქუცმაცებული იქნება, გავლენებით მართვას ვეღარავინ მოახერხებს! კანონით მართვის საიდუმლო სწორედ ამაშია, რომ გავლენიანი ბრძანების გამცემი არ არსებობს. აი, ასეთ დროს დღის წესრიგში დგება კანონით მართვის შესაძლებლობა, თორემ დღევანდელი ჩვენი ძალოვანი უწყება კანონს არ კითხულობს და იმაზეა აწყობილი, პატივცემული ზემდგომი რას იტყვის!
_ იაგო, სიმართლეს თვალი რომ გავუსწოროთ, „გირჩი“, უმეტესად, იმ ადამიანებითაა დაკომპლექტებული, რომლებიც ხელისუფლებაში არასოდეს ყოფილან. დანარჩენი ოპოზიცია კი ყოფილი ჩინოვნიკების ერთგვარი თავშესაფარია, ანუ იმის თქმა მინდა, რომ ამ ადამიანებმა ძალაუფლებით ტკბობის ფასი იციან და ამასთან, ზემდგომისგან დავალების მიცემაც სისხლსა და ხორცში აქვთ გამჯდარი. აქედან გამომდინარე, სისტემის დაშლა შესაძლოა, ბევრს არც აწყობდეს. ჰოდა, იქნებ, დროა, მთელი პოლიტიკური სპექტრი შეიცვალოს და თავიდან ბოლომდე ახალგაზრდებით, ანუ იმ თაობით დაკომპლექტდეს, რომელსაც მართვის საბჭოთა სისტემაზე წარმოდგენაც არ აქვს?
_ გეთანხმებით, მაგრამ არსებობს რაღაც ფაქტორები, რომლებსაც ვერ შევცვლით.
_ რატომ ვერ შევცვლით?
_ ოპოზიცია ისეთია, როგორიც არის და ახალი არავინ გამოიჩეკება, ანუ პირადად მე არ ველოდები, რომ ახალი ოპოზიციონერები გამოიჩეკებიან ან ციდან ჩამოცვივდებიან. დღევანდელ ოპოზიციურ სპექტრში ის ადამიანები არიან, რომელთაც პოლიტიკაში ყოფნა ყველაზე მეტად უნდოდათ. გასაგებია, ზოგიერთი მათგანი ხელისუფლებაში იყო, ზოგიც ცუდ პოლიტიკურ პროცესებში მონაწილეობდა, მაგრამ იმ პროცესმა, რაც ქვეყანაში ბიძინა ივანიშვილის გადაგდების მერე დაიწყო, შანსი მოგვცა, რომ რაღაცები თავიდან გავიაზროთ. კი ბატონო, ეს ადამიანები შესაძლოა, თავის დროზე, სისტემის ნაწილები იყვნენ, მაგრამ გადააზრების საშუალება მათაც აქვთ, რათა ამომრჩეველს ამის შემდეგ მოაწონონ თავი, თუმცა არ ვიცი, ამ შანსს როგორ გამოიყენებენ.
მე მხოლოდ ის ვიცი, რომ კოალიციამ, სადაც ვიქნები, ძალაუფლება ხელში ერთპიროვნულად ვერ უნდა ჩაიგდოს! შესაბამისად, ჩემი ყველა ნაბიჯი, რომელსაც ამ მოლაპარაკებისას ვდგამ, იქითკენაა მიმართული, რომ რაღაცნაირად ძალაუფლების დეკონცენტრაცია მოვახდინო! თუ დავინახავ, რომ ეს ძალაუფლება ვინმეს ხელში ერთპიროვნულად ვარდება, ვიყვირებ, _ არა, ასე არ შეიძლება, რადგან ეს უარესს შედეგს მოგვიტანს-მეთქი!
ერთი სიტყვით, 2020 წელს ქვეყანაში საბჭოთა უშიშროებისა და ძალოვნების ბოგინი უნდა დავამთავროთ! ეს სისტემა 30 წლით უკან გვექაჩება, მაგრამ ხელფასს მაინც ვუხდით, რაც სირცხვილია!
სხვათა შორის, ივანიშვილის გადაგდებამდე ოპოზიცია ერთმანეთს არ ველაპარაკებოდით, მაგრამ ახლა შესაძლებელია, რომ ვილაპარაკოთ და ეს პროცესი დაწყებულია. ამიტომ მჯერა, ჩვენ გონიერი არსებები ვართ და გარკვეულ შეთანხმებამდე მივალთ! შეიძლება, ეს შეთანხმება ისეთი იდეალური არ იყოს, როგორიც მინდა, მაგრამ ყველა ვარიანტში დღეს არსებულ სისტემაზე უკეთესი იქნება. ამ შეთანხმებაში ჩემთვის წითელი ხაზი იქ გადის, რომ მართლმსაჯულების არსებული სისტემა უნდა დაინგრეს და იმის გამო, რომ ასე გვსურს, ვინმეს დაჭერა არ უნდა შეგვეძლოს! დაჭერა მხოლოდ მოძალადეების უნდა შეიძლებოდეს, ისიც მაშინ, როცა მათ ძალადობა დაუმტკიცდებათ!
_ ჩემი აზრით კი კანონი ყველასთვის კანონი უნდა იყოს და შერჩევითი მართლმსაჯულება არ უნდა არსებობდეს!
_ დიახ, რასაკვირველია!
_ იაგო, კიდევ ერთი თემა, რომელზედაც მინდა, გკითხოთ, ე. წ. 100/50-ზე საარჩევნო სისტემაა, რომელსაც „ოცნება“ ოპოზიციას სთავაზობს. გამორიცხავთ, რომ ოპოზიციის გარკვეული ნაწილი ამ გარიგებაზე წავიდეს?
_ ამას არ ვუშვებ.
_ რატომ?
_ ამ ადამიანებთან კომუნიკაცია მაქვს და ოპოზიციის აზრით, „ოცნების“ მიერ შემოთავაზებული ვარიანტი, უბრალოდ, არასერიოზულია. შესაბამისად, ამ შემთხვევაში ოპოზიციის დარღვევას გამოვრიცხავ. ის კი, ვინც ამ შემოთავაზებაზე დათანხმდება, მნიშვნელოვან პოლიტიკურ ფიგურას ისედაც არ წარმოადგენს და ამიტომ ერთიან ოპოზიციურ ფრონტს ვერ დააზიანებს. აქედან გამომდინარე, ხელისუფლებას სხვა შეთავაზებაზე წამოსვლა მოუწევს!
ისე, ოპოზიციაში არსებობს კომპრომისი, რომ „ქართული ოცნება“ სანდო არაა და მასთან რამეზე შეთანხმება თუ დათანხმება საკმაოდ რთული იქნება! მოკლედ, ოპოზიციის გასახლეჩად გადმოგდებული ინიციატივები ოპოზიციას ვერ გახლეჩს! თუ რეალური ცვლილება იქნება, ჩვენც ეს გვინდა და ამ შემთხვევაში რამე გახლეჩაზე საუბარი არ იქნება!

გიორგი აბაშიძე