გიგლა ბარამიძე: „თუ ქვეყანა გადაირია და ისევ „ნაცებსა“ და „ქოცებს“ მისცა ხმა, დაღუპულები ვართ!“

მართალია, „დემოკრატიულმა მოძრაობამ“ მაჟორიტარულ პაექრობაზე უარი განაცხადა, მაგრამ „ქრონიკა+“-ის ინფორმაციით, იმ შემთხვევაში, თუ არჩევნების შემდეგ კოალიციური მთავრობა შეიქმნება, აღნიშნული პარტია პრემიერად პარტიის ლიდერ ნინო ბურჯანაძის კანდიდატურას წარადგენს. ეს ინფორმაცია პოლიტიკური ვერტიკალისთვის, განსაკუთრებით კი, ოპოზიციის ე. წ. ლეიბორისტული ერთობისთვის, ალბათ, მოულოდნელი იქნება.

ასევე, შესაძლოა, მოულოდნელი იყოს ის ინფორმაციაც, რომელსაც „დემოკრატიული მოძრაობის“ ერთ-ერთი ხელმძღვანელი, გიგლა ბარამიძე, ჩვენთან ინტერვიუში ამბობს. კერძოდ, ბატონი ბარამიძე იმის ალბათობას უშვებს, რომ ქვეყნის ერთ-ერთ რეგიონში ბურჯანაძის პარტიამ მაჟორიტარობის კანდიდატი დაასახელოს. მართალია, ჯერჯერობით, ეს რეგიონი არ კონკრეტდება, მაგრამ გიგლა ბარამიძის თქმით, ამ რეგიონში მათთან პაექრობას, „ოცნების“ გარდა, ვერავინ გაბედავს.
„ქრონიკა+“ გთავაზობთ ინტერვიუს „დემოკრატიული მოძრაობის“ ერთ-ერთ ლიდერ გიგლა ბარამიძესთან:

_ ბატონო გიგლა, კორონობა როგორ გადაიტანეთ?
_ ძალიან კარგად.
_ არ გეშინოდათ?
_ არა, რადგან ყველა მითითებას ვიცავდი, თან ფეხით სიარული მიყვარს, ცარიელი ქუჩები იყო და დღეში 10-12 კილომეტრს ფეხით დავდიოდი. ამასობაში, რაც წასაკითხი და დასაწერი მქონდა, მოვათავე, კარგ მუსიკას ვუსმენდი, კარგ ფილმებს ვუყურებდი, ჩემი სამეცნიერო ნაშრომებისთვის კარგ სტატიებს ვწერდი და ამაზე მეტი კარგი რაღა უნდა ყოფილიყო?
_ ამ მხრივ პანდემია ადამიანებს, მართლაც, წაადგა, თუმცა არსებობს მოსაზრება, რომ კორონა საქართველოში, გარკვეულწილად, პოლიტიკური მდგენელი გახდა, ანუ ეს „მომაკვდინებელი ვირუსი“ „ოცნების“ მთავარ მოკავშირედ იქცა, მით უმეტეს, არჩევნების წინ. ამ ვერსიაზე რას ფიქრობთ?
_ უდავოდ, ასეა. ჩვენი ხელისუფლება „სამედიცინო სამებას“ ამოეფარა და ერთი სული ჰქონდა, საგანგებო მდგომარეობა გაეგრძელებინა. სხვათა შორის, რომ დასჭირდეს, ახლაც არაა გამორიცხული, პანდემია თუ ეპიდემია ისევ მოიმიზეზოს. ის, რაც საუბრის დასაწყისში გითხარით, ხუმრობით ვთქვი, თორემ, რეალურად, უამრავი პრობლემა შეგვიქმნეს.
_ მაინც?
_ მაგალითად, ქუჩაში გამოსვლა აგვიკრძალეს. სამსახურებზე რომ აღარაფერი ვთქვა, მოხუც მშობლებთან მისვლის პრობლემაც შეგვიქმნეს, რასაც ფინანსური სირთულეებიც დაემატა და ეს მაშინ, როცა „ოცნების“ ფავორიტები _ ფარცხალაძიდან დაწყებული სხვებით დამთავრებული, დაშტრიგინებდნენ! საშვებით „ოცნების“ წევრების შვილების მეგობრების ბიძაშვილის საყვარელები დადიოდნენ. მოკლედ, ყველაფერი ეს თვითონ დედის რძესავით შეირგეს, ჩვენ კი, ლამის, სუნთქვაც აგვიკრძალეს. იმაზე აღარაფერს ვამბობ, რომ ვერც ანტიკრიზისული გეგმა შეიმუშავეს და არც დანაპირები შეასრულეს.
_ რა დანაპირებს გულისხმობთ, ბატონო გიგლა?
_ აი, თვითდასაქმებულებისთვის დახმარებების გაცემა ახლა დაიწყეს, ანუ უნდათ, რომ როგორმე არჩევნებს მიუსადაგონ. ერთი სიტყვით, ეშმაკობენ. ხომ იცით, თუთაშხიაში რომაა, ეშმაკობ, ქირიაო. ზუსტად ასე ეშმაკობდა ჩვენი პრემიერ-მინისტრი, როცა რაღაც საკითხებზე ლაპარაკობდა. ორ მაგალითს მოგიყვანთ.
_ კი ბატონო, გისმენთ.
_ გაიძახოდა, მშენებლობების დაწყების უფლებას მივცემთ თავსო. ეს ეშმაკობა და ტყუილი იყო.
_ რატომ?
_ პრესტიჟულ უბნებში მრავალსართულიან სახლებში ბინების 90% „ოცნების“ წარმომადგენლებს აქვთ შეძენილი, მშენებლები კი „ოცნების“ შემომწირველები არიან.
_ ამით რისი თქმა გინდათ?
_ ასეთი მშენებლობები ერთი დღითაც არ შეჩერებულა. აი, მაგალითად, ბარნოვის პირველ ნომერში, მთაწმინდაზე, პეკინზე, გაგარინზე, ორთაჭალაში, ავლაბარსა თუ ტვერელის ეკლესიის მიმდებარედ გაქანებული მშენებლობა მიდიოდა. ამ ფონზე პრემიერი გვეუბნება, ერთ კვირაში ბრძანებას გავცემ და მშენებლობების განახლების უფლება გექნებათო.
რაც შეეხება მეორე ტყუილს, პარლამენტში რომ მიიყვანეს და ფილოსოფოსობდა, თუ რამე იოლი კითხვა იყო, პასუხობდა, მაგრამ როცა პასუხი უჭირდა, მაშინვე „ნაციონალებს“ იშველიებდა, აი, „ნაციონალებიო“.
ისე არ გაიგოთ, რომ „ნაციონალებს“ თითქოს ვექილად ვუდგები, მაგრამ ზუსტად მაშინ, როცა „ნაციონალებს“ ხელს უქნევდა, „ნაციონალების“ ერთ-ერთ აქტიურ წევრს გახარიას გუნდი იუსტიციის საბჭოში მოსამართლედ ამტკიცებდა. ფარისევლები და ყალბები სწორედ ამიტომ არიან!
_ ბატონო გიგლა, რაკი სიტყვა ყოფილ ხელისუფლებაზე ჩამოვარდა, თქვენი პარტიის ლიდერის შვილის სიტყვებს გაგახსენებთ, ანუ რამდენიმე დღის წინ ანზორ ბიწაძემ განაცხადა, როგორ შეიძლება, ჩვენ „ნაცმოძრაობის“ ოპოზიცია ვიყოთო, ამასთან, ე. წ. ლეიბორისტების მაგიდასთან თქვენი პარტია „ნაცების“ გვერდით ზის. ჰოდა, თუ ბურჯანაძეს „ნაციონალების“ გვერდით ყოფნის უფლება აქვს, ეს უფლება იგივე „ოცნებას“ ვინ ჩამოართვა?
_ ჯერ ერთი, ჩვენ არაფერი დაგვვიწყებია და ყველაფერი ვიცით. მეორეც, ეს სიტყვები ტელევიზიით არ გაიშალა, თორემ ამ შემთხვევაში ჩვენ ერთ-ერთი პირველები ვიყავით, ვინც საკონსტიტუციო და საარჩევნო კოდექსის ცვლილებების მოთხოვნა დავაყენეთ, ანუ იმ მაგიდასთან ერთად სწორედ ამ საკითხში ვართ და ამ კუთხით ითქვა, მათი ოპოზიციონერები არ ვიქნებითო. მთელი ოპოზიცია ცდილობს, რომ ეს დიდი საკითხი ბოლომდე მიიყვანოს და ამაში მთელი საერთაშორისო თანამეგობრობა გვიჭერს მხარს.
მოკლედ, ის სიტყვები ამ კონტექსტში ითქვა, თორემ ჩვენსა და „ნაციონალებს“, ჩვენსა და „ევროპულ საქართველოსა“ თუ სხვა პარტიებს შორის სხვაობა ცა და დედამიწასავითაა.
_ შეიძლება, მაგრამ არსებობს ვერსია, რომ ოპოზიციის გაერთიანებულ მაგიდასთან თქვენი პარტია „ევროპულმა საქართველომ“ მიიყვანა. ამაზე რას იტყვით?
_ „ევროპულ საქართველოს“ ჩვენ იქ მისვლას ან არმისვლას ვინ ჰკითხავდა? ყველას მიმართ დიპლომატიურ ეტიკეტს დავიცავ, მაგრამ არავის ვკითხავთ, სად მივალთ და საიდან წამოვალთ. იქ ერთი იდეის გამო მივედით. სხვათა შორის, 20 ივნისის ამბების შემდეგაც არავის ვკითხეთ, როცა რუსთაველზე მივედით. გაიძახიან, რატომ მივიდნენო, მაგრამ რა, რუსთაველი ვინმემ ვინმეს აჩუქა? „ოცნებას“ რუსთაველი, მგონი, ჯერ არ გაუყიდია და რუსთაველის გაყიდვა ვერც „ნაციონალებმა“ მოასწრეს. იქ იმიტომ მივედით, რომ ის მოძრაობა დაწყებულიყო, რომელიც 8 მარტის შეთანხმებამდე მიგვიყვანდა.
_ შარშანდელი 20 ივნისის მოვლენების დროს რუსთაველზე თქვენმა მისვლამ კითხვის ნიშნები იმიტომ გააჩინა, რომ „დემოკრატიული მოძრაობა“ პრორუსულ ძალად მიიჩნევა. მაშინ კი ხალხი ანტისაოკუპაციო აქციებს მართავდა.
_ სხვები მიიჩნევენ, თორემ ჩვენ ასე არ ვფიქრობთ. იყო პერიოდები და, ალბათ, მომავალშიც იქნება, როცა იქ არ ვერთვებოდით და არ ჩავერთვებით, სადაც სხვა ოპოზიციური პარტიების დიდი ნაწილი იკრიბებოდა. ჩვენ შორის თვისობრივად დიდი განსხვავებაა. ყველაფერს თავი რომ დავანებოთ, 2011 წლის 26 მაისს იცით, ზოგი როგორც მოგვექცა, მაგრამ მას შემდეგ, რაც გაჩნდა იდეა, რომ ერთი საკითხის გარშემო დავმსხდარიყავით და მატყუარა და გადამგდები ხელისუფლება გვეიძულებინა, მაჟორიტარული სისტემა გაუქმებულიყო და არჩევნები მხოლოდ პროპორციულად ჩატარებულიყო, ამ კომპრომისზე წავედით.
დიდი გადაგდებ-გადმოგდების მიუხედავად, ამ საკითხის 80%, პრაქტიკულად, მოვაგვარეთ. ამიტომ ჩვენი პოლიტიკური ძალა ამომრჩევლის წინაშე აბსოლუტურად პირნათელია. თუმცა პირადად მე და პარტიის ლიდერიც იძულებული გავხდით, პირადი სიმპათია-ანტიპათია დროებით დაგვეთრგუნა. ეს ძალიან მძიმე იყო, მაგრამ გავაკეთეთ!
_ გასაგებია, რომ საერთო საქმისთვის პირად სიმპათია-ანტიპათიაზე უარი თქვით და ისიც გასაგებია, პარტიის საარჩევნო კამპანიას ნინო ბურჯანაძემ რომ უნდა უხელმძღვანელოს. მან მაჟორიტარობაზე უარი ამ მიზეზით თქვა, მაგრამ…
_ მაჟორიტარების დაყენებას მაინცდამაინც არც ვაპირებთ.
_ ეს თემაც განვავრცოთ, თუმცა მანამდე მითხარით: „დემოკრატიულ მოძრაობას“ არ ჰქონდა ამბიცია, რომ თბილისის რომელიმე ოლქში მაჟორიტარობისთვის ებრძოლა?
_ თბილისის ორ რაიონში კანდიდატი არ დასახელებულა და ორივეგან განსხვავებული წარმომადგენლები იქნებიან, თუმცა წეღანდელი თქმისა არ იყოს, ეს მოძრაობა თავიდანვე იმიტომ დაიწყო, რომ მაჟორიტარული სისტემა როგორმე გაგვეუქმებინა.
_ ნაწილობრივ კი გაუქმდა, მაგრამ მომავალ პარლამენტში 30 მაჟორიტარი მაინც იქნება.
_ დიახ და ჩვენი ამოცანაა, მაჟორიტარული ოლქები ხელისუფლების ან ოპოზიციის ერთი რომელიმე პარტიის ხელში არ იყოს. ყველაფერი სწორედ აქეთკენ მიდის, „ნაციონალებმაც“ და სხვებმა თბილისში სულ ორი კანდიდატი წარმოადგინეს.
მოკლედ, ეს მიზანიც მიღწეულია, თან ისიც გავითვალისწინეთ, რომ ფინანსურად ძალიან შეზღუდულები ვართ და მრავალი მიმართულებით ვერ გავიფანტებით. ჩვენი ამოსავალი წერტილი და მიზანი პარტიული სიებია.
_ კეთილი, მაგრამ პირადად მე, მგონია, რომ მაჟორიტარობის ერთიანი კანდიდატები ოპოზიციისთვის წამგებიანია, ანუ უკეთესი იქნებოდა, ამა თუ იმ ოლქში ამომრჩეველს მეტი არჩევანის საშუალება ჰქონოდა და ამით საქმე, მინიმუმ, მეორე ტურამდე მისულიყო. ახლა კი ადამიანებს არჩევნის გაკეთება ისევ „ქოცებსა“ და ნაცებს“ შორის მოუწევთ, რაც ოპოზიციისთვის მთლად მომგებიანი არ უნდა იყოს. არ მეთანხმებით?
_ ასეც გამოდის.
_ როგორ ასე?
_ ოპოზიციის ერთიანი კანდიდატები კი ჰქვიათ, მაგრამ იქ ყველა განსხვავებული პარტიაა.
საერთოდ, „გაერთიანებული“ არასწორი ნათქვამია.
_ რატომ?
_ ოპოზიცია გაერთიანებული ერთი საკითხის გარშემოა და ეს საკონსტიტუციო ცვლილებებია.
_ დიახ, მაგრამ იგივე თბილისში ოპოზიციის მაჟორიტარების კანდიდატების წარდგენამდე გამართულ შეხვედრას ნინო ბურჯანაძე ესწრებოდა.
_ გეტყვით, ოღონდ აზრი არ გამაწყვეტინოთ.
_ გისმენთ.
_ გვინდა, რომ რომელიმე პარტიას არჩევნები საერთო ძალებით არ გავაყალბებინოთ. ნინო ბურჯანაძე ამ შეხვედრას კი ესწრებოდა, მაგრამ არ უთქვამს, რომ ჩვენს კანდიდატურას არ დავაყენებთ ან ყველა კანდიდატს ხმას მივცემთ. არჩევნების მიმდინარეობისას გამოჩნდება.
_ რა გამოჩნდება?
_ ზოგს ხმას მივცემთ, ზოგს _ არა.
_ თბილისში დასახელებული მაჟორიტარების კანდიდატებიდან „დემოკრატიული მოძრაობა“ ვის არ მისცემს ხმას?
_ ეს შიდაპარტიული სამუშაოა და როცა გადავწყვეტთ, ჩვენს ამომრჩეველს ეცოდინება, ვის უნდა მისცეს ხმა, ვის _ არა ან, უბრალოდ, თავი შეიკავოს.
_ ბატონო გიგლა, სამცხე-ჯავახეთში მუშაობის დიდი გამოცდილება და, ამასთან, ავტორიტეტიც გაქვთ. ჰოდა, მაჟორიტარობის კანდიდატი ამ მხარეში ხომ არ იქნებით?
_ შემოთავაზება იქიდანაც მქონდა და თბილისიდანაც, ანუ პარტიებიდან _ არა. საზოგადოებამ ძალიან მთხოვა, მაგრამ გადავწყვიტეთ, მაჟორიტარობის შესახებ მთელ რიგ სქემებს ავერიდოთ, რადგან ამდენი რესურსი არ გაგვაჩნია. როგორც გითხარით, მთელ ყურადღებას პარტიულ სიებზე გადავიტანთ. გამონაკლისი შეიძლება, ერთი რეგიონი იყოს, ოღონდ ახლა ნუ მომთხოვთ დავასახელო, რომელ რეგიონს ვგულისხმობ.
_ შეიძლება, ნინო ბურჯანაძემ მაჟორიტარად ქუთაისში იყაროს კენჭი ან იქიდან გამომდინარე, რომ თქვენს პარტიას აჭარაში შედარებით მეტი მხარდამჭერი ჰყავს, მაჟორიტარობის კანდიდატი იქ წარადგინოთ, არა?
_ არა, არა… ამ რეგიონზე ახლა ვმსჯელობთ და თუ გადავწყვეტთ, იქ მეტოქეს, „ოცნების“ გარდა, ვერავინ დაგვიყენებს!
_ დასახელებას არ გთხოვთ, მაგრამ ამ „იქს“ რეგიონს უპირატესობას რატომ ანიჭებთ?
_ იმიტომ, რომ რაღაცები ამოტივტივდება და ეროვნული პოზიციიდან გამომდინარე, ჩვენი კანდიდატის დასახელება შეიძლება, საჭირო იყოს…
_ ბატონო გიგლა, კიდევ ერთ თემას შევეხები, რომელიც, პირდაპირ თუ ირიბად, არჩევნებს უკავშირდება: გიორგი ახვლედიანის ე. წ. სკანდალზე ბევრი ითქვა, მაგრამ კულუარული ინფორმაციით, კვლავ გასაჯაროვდება სია, სადაც „დემოკრატიული მოძრაობის“ კიდევ ერთი წევრი „ოცნების“ ფასიან ე. წ. გარე ექსპერტად იქნება დასახელებული.
_ „ოცნება“ ხელისუფლებაში, ლამის, ჩვენს ხელშია მოსული.
_ ანუ?
_ 26 მაისს ვგულისხმობ, მაგრამ მოვიდა თუ არა, ყველაზე მეტად ჩვენ დაგვაზარალა _ თანხები, პრაქტიკულად, გაგვიყო, ანუ სასამართლოს მეშვეობით ჩვენი თანხები ჩამოგვაწერა და სხვა პარტიას გადასცა.
_ „ქრისტიან-დემოკრატების“ სარჩელს გულისხმობთ, არა?
_ დიახ, ყრილობა სწორი არ იყოო და რაღაც ზღაპრებს მიედ-მოედნენ. არადა, ამ ყრილობას 300 დელეგატი ესწრებოდა. საბოლოო ჯამში, ის კაპიკებიც ჩამოგვაწერა, რაც გვქონდა და იმათ მისცა. მოკლედ, ხელისუფლებას ყველაზე მეტად ჩვენ ვაკრიტიკებთ და ყველაზე დაზარალებულებიც ჩვენ ვართ. ერთადერთი, „ნაციონალები“ არ იყვნენ, თორემ დანარჩენი ყველა პარტია, 2012 წლიდან, „ქართულ ოცნებასთან“ თანამშრომლობდა.
_ ერთი სიტყვით, გამორიცხავთ, რომ ახვლედიანის, ასე ვთქვათ, ბედი რომელიმე თქვენმა პარტიელმაც გაიზიაროს?
_ დიახ, ასი პროცენტით გამოვრიცხავ!
_ ისე, ბატონო გიგლა, არჩევნები ხვალ რომ ჩატარდეს, გამარჯვების შანსი „ოცნებას“ უფრო ექნება თუ _ ოპოზიციას?
_ ამის თქმა ძალიან რთულია. ალბათ, 50X50-ზე. ან ოპოზიციას შეიძლება, ცოტა მეტი.
_ სხვათა შორის, ერთ-ერთი ბოლო კვლევით, მოსახლეობის 65% არც ხელისუფლების მხარესაა და არც _ ოპოზიციის, ანუ ხალხს პოლიტიკაში ახალი სახეების ხილვა უნდა.
_ ოპოზიციის გარკვეულ ნაწილს უნდა, რომ ვიღაც ზეციდან ჩამოფრინდეს, მაგრამ თუ ახალი სახეები უნდათ, მაშინ 24 საათი „ფეისბუქში“ ჯდომას თავი დაანებონ, გამოვიდნენ და მონაწილეობა თავად მიიღონ, რა, ვინმე ხელს უშლის? ლოზუნგების სროლა, ტელევიზორში მუშტი-კრივის ყურება და იმის თქმა, პოლიტიკოსები რა ცუდები არიანო, კარგია, არა?! პოლიტიკოსებიც ისეთები არიან, როგორიც საზოგადოებაა. ამიტომ ამ შენიშვნას აღარ ვღებულობ!
საქართველოში გამორჩეული ჟურნალისტი ხართ და ჩემზე კარგად იცით, ილია ჭავჭავაძე რომ გაცოცხლდეს და სადმე სიტყვით გამოვიდეს, ეს კლასტერი, რომელზედაც ვლაპარაკობ, მიწაში ჩადებს და მეორედ მოკლავს მას!
ასეთი ზღაპრების კი არა, ქმედების მჯერა! აგერ, პარტიული სიების უზარმაზარი არჩევანია და ვისაც უნდა, იმას მისცენ ხმა! თუ ქვეყანა გადაირია და ისევ „ნაცებსა“ და „ქოცებს“ მისცა ხმა, დაღუპულები ვართ და ესაა!
_ არჩევნების შემდეგ, ალბათ, კოალიციური მთავრობის შექმნა დადგება დღის წესრიგში. „დემოკრატიული მოძრაობა“ ამბიციებს, მაჟორიტარული არჩევნების მსგავსად, კოალიციური მთავრობის დაკომპლექტების დროსაც დათმობს?
_ არა.
_ აბა?
_ კარგად განგიმარტავთ, როგორც იქნება: საერთოდ, კოალიციურ მთავრობაზე საუბარი ადრეა, მაგრამ, ვთქვათ, ისე მოხდა, რომ „ნაციონალური მოძრაობა“ მაქსიმალურადაა წარმოდგენილი და კოალიციური მთავრობისთვის ჩვენი ხმები სჭირდება, კოალიციურ მთავრობას არც ერთ შემთხვევაში არ შევუქმნით!
ასევე კოალიციურ მთავრობას არც ერთ შემთხვევაში არც „ევროპულ საქართველოს“ შევუქმნით!
_ „ოცნებას“?
_ ალბათ, იმასაც, მაგრამ კოალიციურ მთავრობაში იმ შემთხვევაში ვიქნებით, თუ იქ ყველა პარტია, მეტ-ნაკლებად, თანაბრად იქნება წარმოდგენილი.
_ კოალიციური მთავრობის შექმნაში გასაგებია, რომ არავის დაეხმარებით, მაგრამ მრავალპარტიულ მინისტრთა კაბინეტში თქვენს პარტიას რომელიმე მინისტრის პორტფელზე პრეტენზია არ ექნება?
_ კოალიციურ მთავრობაში პრემიერ-მინისტრის კანდიდატურად, რა თქმა უნდა, ჩვენს ლიდერ ნინო ბურჯანაძეს წარვადგენთ, მაგრამ ამაზე საუბარი ჯერ ადრეა.
_ შეიძლება, მაგრამ ნათქვამია, ხვნაში გარიგებას მკაში გარიგება სჯობსო. ჰოდა, კოალიციურ მთავრობაში გიგლა ბარამიძე შს მინისტრობის კანდიდატი ხომ არ იქნება?
_ არ ვიცი, თუმცა ზედმეტი თავმდაბლობის გარეშე რომ გითხრათ, ყველა ამათ ვაჯობებდი და წესრიგს, მართლაც, დავამყარებდი, თან თქვენც იცით, რომ ამას სუფთა ხელებით გავაკეთებდი, მაგრამ ეს საკითხი ახლა დღის წესრიგში არ დგას და ჰიპოთეტურად საუბარი ნაადრევია!
_ ბოლოს, ბატონო გიგლა, თქვენი აზრით, გიორგი გაბუნიას შესაძლო ლიკვიდაციის საბაბ-მიზანი რა იყო ან სააკაშვილ-ადეიშვილის იმ ფარული ჩანაწერის თუ გჯერათ, სადაც ეს თემა განიხილება?
_ ბევრი სიბინძურე იყრება… სიმართლე გითხრათ, მაინცდამაინც, ამ საქმისაც არ მჯერა.
_ ანუ გგონიათ, რომ გაბუნიას მოკვლა არ იგეგმებოდა?
_ სპეცსამსახურების მუშაობას ვეცნობი _ თეორიული მასალა ხელმისაწვდომია და მგონია, რომ ასე უხეშად არ მუშაობენ!
ისე, ჯერ ჟურნალისტებმა თქვეს, მერე კი სუსი გამოვიდა და დაადასტურა. ასე იყო ბათუმის მოვლენების დროს და ასევე ჩატაევის საქმეზეც. მოკლედ, არ მჯერა, მაგრამ იმიტომ კი არა, რომ ისინი, ვისკენაც ხელს იშვერენ, ამას არ იზამდნენ. უბრალოდ, ასეთ ბინძურ საქმეებს უფრო სხვა მასშტაბითა და პროფესიონალიზმით აკეთებენ.
_ ე. ი., იმის თქმა გინდათ, რომ ჟურნალისტის შესაძლო ლიკვიდაციის ქეისი შიდა მოხმარებისთვისაა გათვლილი?
_ არ ვიცი, ვერ გავიგე… როგორც „ციანიდის საქმე“ აზილეს ხელისუფლების უტვინობით, „გაბუნიას შესაძლო ლიკვიდაციასაც“ ასე აზილავენ. არ გამოვრიცხავ, რომ გაბუნიას რაღაც ემუქრება და ფრთხილად უნდა იყოს და დაცვა სჭირდება, თუმცა არც იმას უარვყოფ, რომ მისი საქციელი ძალიან ცუდი იყო _ ასეთი სიტყვებით ჟურნალისტი არ უნდა მეტყველებდეს!
_ პუტინი, მგონი, უარესსაც იმსახურებს!
_ მნიშვნელობა არ აქვს, ჩინგიზ ყაენიც რომ იყოს, მის მიმართ ჟურნალისტი ასე არ უნდა მეტყველებდეს! ის კაცი პოლიტიკურად, ჟურნალისტური გამოიძიებით მოკალი, თორემ დედის ერთი ადგილის გინება რა საქციელია? მგონი, სპეცსამსახური უნდა გამოვიდეს და თქვას, რეალობა რაცაა, მაგრამ დარწმუნებული ვარ, როგორც ყოველთვის, ქართული სპეცსამსახური, არც მწვადს დაწვამს, არც _ შამფურს და მედიამ თავზე რომ არ დაახუროს, ისევ რაღაცას მიკიბ-მოკიბავს და ყველაფერ ამისგან ნედლი შედეგი დარჩება.

გიორგი აბაშიძე