მთავარი ინტერვიუ ნატო ჩხეიძე: „ოცნება“ ლპება, მიინავლება და აღარ იქნება!“

ნატო ჩხეიძე: „ოცნება“ ლპება, მიინავლება და აღარ იქნება!“

296
0
გაზიარება

2020 წლის 13 თებერვალი „ქართული ოცნების“ ბიოგრაფიაში მორიგ წარუმატებელ თარიღად ჩაიწერება, ანუ ზუსტად ამ დღეს ევროპარლამენტში ასოცირების ხელშეკრულებით გათვალისწინებული ერთობლივი რეზოლუცია ჩავარდა, რაც იმას ნიშნავს, რომ რეზოლუციას ევროპარლამენტისა და საქართველოს საკანონმდებლო ორგანოს დეპუტატების უმრავლესობამ მხარი არ დაუჭირა. „ოცნების“ ამ კრახს, ცხადია, ქართველი ოპოზიცონერების შეფასებები უმალ მოყვა. ასე, მაგალითად, „ევროპული საქართველოს“ წარმომადგენელმა, დეპუტატმა ოთო კახიძემ, მომხდარს „უპრეცედენტო შემთხვევა“ უწოდა და განაცხადა, რომ რეზოლუციის ჩავარდნა ივანიშვილისთვის კიდევ ერთი გაფრთხილება იქნება.
ყოფილმა „ქოცმა“, პარლამენტის ყოფილმა ვიცე-სპიკერმა და ამჟამად დამოუკიდებელმა დეპუტატმა თამარ ჩუგოშვილმა კი რეზოლუციის ჩაგდების მიზეზად ის დაასახელა, რომ ევროპარლამენტში საქართველოს, როგორც დასავლური ორიენტაციის მქონე ქვეყანას, იმიჯი შელახული აქვს.

მმართველი გუნდის წარმომადგენლებმა კი ტრადიციას არც ამჯერად უღალატეს და რეზოლუციის ჩაგდება „ნაციონალებს“ დააბრალეს. ყოველ შემთხვევაში, პარლამენტის ვიცე-სპიკერმა, კახა კუჭავამ, საზოგადოებას ამცნო, ევროკავშირ-საქართველოს ასოცირების კომიტეტის რეზოლუციის ძირითად ნაწილს ოპოზიციამ და მისმა მოკავშირე ევროპარლამენტარებმა არ დაუჭირეს მხარიო.
ერთი სიტყვით, ნათელია, რომ „ოცნება“ უწინდებურად სირაქლემის პოზაშია და თავის დამშვიდებას ცდილობს, ანუ არ უნდა, რეალობას თვალი გაუსწოროს. რეალობა კი ისაა, რომ ჩვენი სტრატეგიული პარტნიორები შეშფოთება-აღშფოთებას გასცდნენ და ივანიშვილის გუნდს უკვე ღია ტექსტით მიანიშნებენ, რომ გონს მოვიდეს, თუმცა ყველაფერ ამის ფონზე, ხელისუფლება „გადაბრუნებულ ურემს“ მაინც ვერ ხედავს და სისულელეს სისულელეზე აკეთებს. სისულელეა, აბა, რა არის, როცა ყოველივე ზემოთქმულის ფონზე ოპოზიციის ერთ-ერთ გამოკვეთილ ლიდერს, გიგი უგულავას, მესამედ იჭერს, თან იმ საქმეზე, რომლის გამოც თბილისის ყოფილმა მერმა სასჯელი ერთხელ უკვე მოიხადა.
პარლამენტის დამოუკიდებელი დეპუტატი, ნატო ჩხეიძე, რომელიც ოპოზიციის საკოორდინაციო საბჭოს მუშაობაში აქტიურად მონაწილეობს, „ქრონიკა+“-სთან საუბრისას ამბობს, რომ ყველაფერი ის, რაც საქართველოში ხდება, დიქტატურა კი არა, უზურპაციაა.
რა განსხვავებაა დიქტატურასა და უზურპაციას შორის, რას მოიტანას ოპოზიციის მიერ 4 აპრილისთვის დაანონსებული ფართომასშტაბიანი აქცია და, საერთოდ, გაქრება თუ არა „ოცნება“ პოლიტიკური რადარებიდან? _ ამ და სხვა აქტუალურ თემებზე ჩვენი გამოცემა კანონმდებელსა და ოპოზიციის ერთ-ერთ ლიდერს, ნატო ჩხეიძეს ესაუბრა:

_ ქალბატონო ნატო, ოპოზიციონერები სხვადასხვა ფორმატში ყოველდღე იკრიბებით და რა დასკვნამდე მიდიხართ, ქვეყანაში დიქტატურაა, ფსევდოდიქტატურა თუ ავტორიტარიზმი, ანუ თქვენი შეფასება როგორია?
_ „ლეიბორისტული პარტიის“ ოფისში ოპოზიციური სპექტრი კი იკიბება, მაგრამ, სიმართლე გითხრათ, არ გამოგვიკითხავს, ტერმინის თვალსაზრისით, დღევანდელი ვითარების შეფასება როგორია, თუმცა პრესაში არსებულ ვითარებას ზოგი დიქტატურად მოიხსენიებს, ზოგი _ ავტორიტარიზმად. პირადად მე კი, მგონია, რომ საქმე უფრო უზურპაციასთან გვაქვს.
_ „ოცნებას“ ხელისუფლება უზურპირებული აქამდეც ჰქონდა. ბოლო დროს კი ამ მხრივ ყველაფერი გაცილებით დრამატულია. არ მეთანხმებით?
_ კი ბატონო, „ოცნებას“ ხელისუფლება უზურპირებული აქამდეც ჰქონდა, მაგრამ ახლა თანდათან ძლიერდება.
_ უფრო კონკრეტულად?
_ საერთოდ, უზურპაცია მაშინაა, როცა ქვეყანას არაკანონიერი ძალა მართავს და კანონებს არაფრად აგდებს. დიქტატურა კი მაშინაა, როცა ფორმალური მმართველი კანონებს არ ემორჩილება;
მოკლედ, როცა პიროვნებას სახელმწიფოებრივი პასუხისმგებლობა არ აქვს და სახელმწიფოს განაგებს, თანაც არა _ კანონებზე დაყრდნობით, აი, სწორედ ესაა უზურპაცია და ამიტომაც ვფიქრობ, რომ ის, რაც დღეს საქართველოში ხდება, უზურპაციაა.
_ უზურპატორი ვინ არის _ მთელი „ოცნება“ თუ ივანიშვილი? ისე, ეს ის შემთხვევა ხომ არაა, როცა „ოცნებასა“ და „ივანიშვილს“ შორის ტოლობის ნიშანი უნდა დავსვათ?
_ ზედაპირზე დევს, „ოცნებას“ ვინც განაგებს, ანუ ბიძინა ივანიშვილი.
ჩვენს ქვეყანაში საბჭოთა სოციალისტური მმართველობაა _ კომუნისტების დროს ქვეყანას პარტიის თავმჯდომარე მართავდა, რომელსაც გენერალური მდივანი ერქვა და ყველას მიაჩნდა, რომ ეს სწორედ ასე უნდა ყოფილიყო, რადგან ერთპარტიულობა იყო, მაგრამ ახლა მრავალპარტიულობაა. ამის მიუხედავად, „ოცნების“ წევრები გვეუბნებიან, ყველაფერი პარტიის თავმჯდომარესთან უნდა შეთანხმდესო. აი, სწორედ ეს _ პარტიის თავმჯდომარის უზენაესობაა ბოლშევიკური და კომუნისტური. ყველაფერი ეს კი იმის ბრალია, რომ ბიძინა ივანიშვილს საბჭოური მენტალობა აქვს!
_ სხვათა შორის, გიგი უგულავას მესამედ დაჭერის შემდეგ ზოგიერთმა ოპოზიციონერმა თქვა, 37 წელი დაიწყოო. ელოდებით, რომ ოპოზიციის სხვა ლიდერებსაც დაიჭერენ?
_ 37 წელს ცოტა სხვანაირად იყო და, მადლობა ღმერთს, ყველაფერი მთლად ისე არ არის. ვითარება 37 წლამდე რომ არ მივიდეს, ეს ოპოზიციური გაერთიანება სწორედ ამიტომ არსებობს, თუმცა გამორიცხული არაა, სხვა აქტიურ ლიდერებსაც უგულავას ბედი ჰქონდეთ!
_ დაჭერის გარდა, რეპრესიის სხვა მეთოდებიც არსებობს. შესაბამისად, უშვებთ თუ არა ალბათობას, რომ ოპოზიციის ლიდერებს ხელისუფლებამ სხვადასხვა ფორმით გაუსწოროს ანგარიში?
_ ცხადია, არც ამას გამოვრიცხავ და „ოცნება“ იმას გააკეთებს, ვისთანაც რა შეეძლება.
_ სამართლიანობისთვის უნდა ითქვას, რომ თქვენ და თქვენი ოჯახი „ოცნების“ რეპრესიების პირველი მსხვერპლი ხართ _ ვგულისხმობ „ომეგა ჯგუფის“ გარშემო ორი წლის წინ განვითარებულ მოვლენებს, თუმცა ეს წნეხი, როგორც ჩანს, დღესაც არსებობს _ აი, მაგალითად, რამდენიმე დღის წინ სასამართლომ ტელეკომპანია „იბერიას“, რომელიც „ომეგა ჯგუფის“ წევრია, 30-მდე თანამშრომლისთვის რამდენიმე ათეული ათასის გადახდა დააკისრა.
_ მხოლოდ თქვენ კი არა, ყველას დავეთანხმები, ვინც ფიქრობს, რომ ეს პოლიტიკური გადაწყვეტილებაა.
_ ანუ?
_ თავის დროზე, როცა „იბერიაში“ ე. წ. ოპერატორთა ამბოხი მოხდა, ისიც პოლიტიკურად მოტივირებული იყო და რაკი მიიჩნიეს, რომ ეს საქმე კარგად დააგვირგვინეს, მერე ზუსტად ასეთი „ოპერატორთა ამბოხება“ აჭარის ტელევიზიაშიც გაიმეორეს. ოპერატორებისგან დაწყებული ე. წ. ამბოხება რამდენიმე ჟურნალისტზეც გავრცელდა. ყველაფერ ამაში ერთი-ორი აქტიურად იყო ჩართული, დანარჩენი კი, უბრალოდ, ამყოლი იყო.
მოკლედ, ის, რაც ახლა მოხდა, მაშინდელის მსგავსად, პოლიტიკური გადაწყვეტილებაა, თორემ ყველამ მშვენივრად იცის, ყველაფერ ამას წინ რაც უძღოდა.
_ გეთანხმებით, მაგრამ მიუხედავად იმისა, რომ ყველამ ყველაფერი ვიცით, მგონია, რომ ოპოზიცია რაღაცნაირად პასიურობს, ანუ გასაგებია, რომ 4 აპრილისთვის დიდი აქცია დაანონსდა, მაგრამ მანამდე თითქმის თვე-ნახევარია და ამ ხნის განმავლობაში რას აკეთებთ?
_ როცა 4 აპრილი დაანონსდა, ცხადია, იმაზეც იყო მსჯელობა, რომ საზოგადოებაში ეს გრძელი პერიოდი კითხვის ნიშნებს გააჩენდა, მაგრამ დიდ აქციას მომზადება უნდა. მომზადებას კი დრო სჭირდება.
_ ე. ი., 4 აპრილამდე პერმანენტულ მზადებაში უნდა ვიყოთ?
_ არა, ასე არ იქნება.
_ აბა, როგორ იქნება?
_ მზადება საზოგადოებაში, ანუ რეგიონებში გასვლაა და ისიც შესაძლებელია, რომ ამ ხნის განმავლობაში ერთი-ორი აქცია რეგიონებშიც ჩატარდეს.
_ „ოცნება“ კონგრესმენთა თუ ევროპარლამენტართა უმწვავეს წერილებს არაფრად აგდებს, ანუ ცა ქუდად არ მიაჩნია, დედამიწა _ ქალამნად და რატომ გგონიათ, რომ 4 აპრილის აქციას ანგარიშს გაუწევს? ერთი სიტყვით, პირადად მე, არ ვარ დარწმუნებული, რომ ამ შიდა თუ გარე ზეწოლებით ხელისუფლება უკან თუნდაც ერთი ნაბიჯით მაინც დაიხევს და მინიმალურ დათმობაზე წამოვა. ვცდები?
_ ამ დღეებში ევროსაპარლამენტო ასამბლეაზე საქართველოს შესახებ ის დოკუმენტი ჩავარდა, რომელიც აქამდე ავტომატურად ყოველ წელს მიიღებოდა ხოლმე. ახლა კი ეს ჩავარდნა „ოცნების“ წარმომადგენელთა გარკვეულმა ზემოქმედებამ გამოიწვია.
_ რას გულისხმობთ?
_ მათ არ უნდოდათ, რომ ამ რეზოლუციაში ის ჩაწერილიყო, რისი ჩაწერაც ევროსაპარლამენტო ასამბლეის დელეგატებს აუცილებლად მიაჩნდათ და ყველაფერი ეს „ქართული ოცნების“ სასახელოდ ვერ ჩაითვლებოდა.
_ ეს მესმის, მაგრამ სხვა რამ გკითხეთ, ანუ ოპოზიციას რატომ ჰგონია, რომ „ოცნება“ უკან დაიხევს, ქალბატონო ნატო?
_ ამ ვითარებიდან აშკარად ჩანს, რომ „ქართული ოცნებისთვის“ სახელმწიფოებრივი კი არა, პარტიული ინტერესები უფრო მნიშვნელოვანია! არადა, ზემოხსენებული დოკუმენტის ჩავარდნა საქართველოზე უარყოფითად აისახება!
პარტიის წევრები, რომლებსაც სახელისუფლებო ბერკეტები უჭირავთ, ასეთ გართულებებზეც მიდიან და აი, სწორედ ეს ნიშნავს, რომ აქციის მომზადებას დიდი ძალისხმევა აღარ სჭირდება. საზოგადოება კარგად ხედავს, რომ ხელისუფლება, რომელიც ხალხსა და სახელმწიფოზე უნდა ზრუნავდეს, მხოლოდ საკუთარ კეთილდღეობაზე ზრუნავს. „ოცნების“ წარმომადგენლები ასე იმიტომ იქცევიან რომ მიაჩნიათ, თუკი ხელისუფლებაში აღარ იქნებიან, კეთილდღეობაც აღარ ექნებათ!
_ სახელისუფლებო ბერკეტების დაკარგვასთან ერთად „მეოცნებეები“, ცხადია, კეთილდღეობასაც დაკარგავენ, მაგრამ არ დაგავიწყდეთ, რომ ბოლო დროს საზოგადოებაში პრორუსული განწყობები გაზრდილია. შესაბამისად, მოსახლეობის ამ ნაწილს დიდად არ ანაღვლებს, ევროპარლამენტში საქართველოს შესახებ მომზადებული რეზოლუცია ჩავარდა თუ არა.
_ არა, არ მავიწყდება და ვიცი, რომ სახელმწიფოში ყველანაირი განწყობა არსებობს.
_ მერე?
_ ოპოზიციას სწორედ ეს უნდა, რომ პარლამენტში საზოგადოებაში არსებული განწყობები აისახოს. აი, ესაა მნიშვნელოვანი და თუკი სამართლიანი და გამჭვირვალე არჩევნები იქნება, აი, ასეთ შემთხვევაში გამოჩნდება, ქვეყნის მოსახლეობის ორიენტირი როგორია. „ქართულ ოცნებას“ საზოგადოების განწყობები არ ანაღვლებს და სწორედ ამიტომ უცხოელები, ანუ ჩვენი პარტნიორები, ხელისუფლებას მოუწოდებენ, რომ სამართლიანი არჩევნები ჩაატაროს. ეს წერილებიც სწორედ აქეთკენაა მიმართული.
_ ე. ი., ოპოზიციის მთავარი მიზანი სამართლიანი არჩევნებია და არა _ „ოცნების“ ხელისუფლებიდან თუნდაც რევოლუციური ელემენტებით გაშვება, არა?
_ დიახ, ოპოზიციის მიზანი სამართლიანი არჩევნების მიღწევაა, რადგან „ქართულ ოცნებას“ ხელისუფლებიდან სწორედ სამართლიანი არჩევნები გაუშვებს!
_ უკაცრავად, მაგრამ რატომ ხართ დარწმუნებული, რომ სამართლიანი არჩევნების შემთხვევაში „ოცნება“ ხელისუფლებიდან წავა? შეიძლება, უმრავლესობა აღარ ჰქონდეს, მაგრამ მგონია, რომ „მოქკავშირივით“ არ გაქრება.
_ თუ ვერ გაიმარჯვებს, დიახ, „ოცნება“ გაქრება იმიტომ, რომ ამ პარტიას იდეოლოგია არ გააჩნია!
საერთოდ, პარტიას, რომელსაც იდეოლოგია არ გააჩნია, რა თქმა უნდა, ლპება! „ოცნებაც“ მიინავლება, ჩაკვდება და აღარ იქნება!
_ ისე, თუ საქმე იდეოლოგიაზე მიდგება, ამ მხრივ გარკვეული პრობლემები ოპოზიციასაც აქვს. ყოველ შემთხვევაში, ბევრისთვის გაუგებარია, რადიკალურად განსხვავებული პოლიტიკური შეხედულების სახეები ერთ მაგიდასთან როგორ სხედან? გასაგებია, რომ ყველას ერთი მიზანი, ანუ პროპორციული არჩევნები გაქვთ, მაგრამ ხმა დადის, რომ ოპოზიციის ლიდერებს შორის თითქოს დაპირისპირებაა. გარკვეული კითხვის ნიშნები მიხეილ სააკაშვილის მიერ კერძო შტაბის შექმნასაც მოყვა. ამ შტაბის მუშაობაში, პირადად თქვენ, ქალბატონო ნატო, მონაწილეობას მიიღებთ?
_ ჯერ იმაზე გიპასუხებთ, ოპოზიციის ლიდერებს შორის რამე დაპირისპირება არის თუ არა.
_ კეთილი, მიპასუხეთ.
_ ვინც იქ არ არის, შესაძლოა, უფრო მეტს ხედავს და გრძნობს, მაგრამ მე, იმ მაგიდასთან მჯდომი, დაპირისპირებას ვერ ვხედავ. სამართლიანი და გამჭვირვალე არჩევნების მისაღწევად ერთსულოვნებაა საჭირო. სხვა შემთხვევაში კი ყველა, რა თქმა უნდა, თავის იდეოლოგიაზე რჩება და ასეც უნდა იყოს, ანუ პარტიულობის თვალსაზრისით გაერთიანებას არავინ ფიქრობს, თუმცა არჩევნები არსებული საარჩევნო სისტემითაც რომ ჩატარდეს, გაერთიანება მაჟორიტარ კანდიდატებზე მოხდება.
საერთოდ, ყველანაირი კვლევა იმაზე მიანიშნებს, რომ ქვეყანაში ოპოზიციური განწყობა „ოცნების“ მომხრეთა რაოდენობას აჭარბებს! ამ მოცემულობაში მაჟორიტარ კანდიდატებზე ერთსულოვნება ძალიან მნიშვნელოვანი და გარდამტეხია _ ამით „ქართული ოცნება“ დამარცხდება!
_ ქალბატონო ნატო, სანამ კითხვის მეორე ნაწილზე მიპასუხებთ, რეპლიკის სახით გეტყვით: თაკო ჩარკვიანმა ოპოზიციის ე. წ. საკოორდინაციო ფორმატი დატოვა და ყველას მოგიწოდებთ, რომ პრორუსულ პარტიებს გაემიჯნოთ.
_ დიახ, თაკო ჩარკვიანმა ეს განცხადება გააკეთა და გარკვეული ხნით ეს საკოორდინაციო ფორმატიც დატოვა, მაგრამ ამას წინათ დავინახე, რომ ჩვენს მაგიდასთან იჯდა.
_ როდის იჯდა?
_ აი, წინა შეკრებაზე. თაკო ჩარკვიანსაც მიაჩნია, რომ სამართლიანი და გამჭვირვალე არჩევნები უნდა იყოს. ის კი, რატომაც ეს მაგიდა დატოვა, სწორედ იდეოლოგიური შეუთანხმებლობაა და კიდევ ვიმეორებ _ თავის იდეოლოგიას ყველა პარტია ინარჩუნებს!
ისე, შეუთანხმებლობა ზოგიერთი პარტიის თავმჯდომარის მიერ ზოგჯერ, შეიძლება, ძალიან ემოციურად გამოიხატოს, ზოგიერთისგან კი _ უფრო შემწყნარებლურად. მთავარში, ანუ სამართლიან არჩევნებში კი ყველა ერთსულოვანია და ეს თაკო ჩარკვიანმა მაშინვე თქვა!
რაც შეეხება მიხეილ სააკაშვილის შტაბს, ჯერჯერობით, არაფერი ჩამოყალიბებულა. ეს მხოლოდ იდეაა. იდეის დონეზე გაჟღერებულ თემაზე კი იმ მაგიდასთან მსხდომებიც არ დაფიქრებულან. ამიტომ, მაინცდამაინც, მე ნუ მომთხოვთ, რომ ყველას გადავუსწრო და ჩემი შესაძლო მოქმედება ახლავე გავამჟღავნო.
_ ეს იდეა, პრაქტიკულად, ხორცშესხმულია. ყოველ შემთხვევაში, სააკაშვილმა თქვა, რომ შტაბს დიმიტრი შაშკინი უხელმძღვანელებს. ასევე დადის ხმა, რომ ამ შტაბის მუშაობაში გუბაზ სანიკიძეც აქტიურად ჩაერთვება.
_ შეიძლება, მაგრამ ეს ჯერ მაინც იდეაა, რადგან არავინ არსად დამჯდარა და თქვენ მიერ დასახელებულ პიროვნებებს განცხადებები არ გაუკეთებიათ.
_ არ გეკამათებით, მაგრამ ზემოხსენებულ მაგიდასთან ის ადამიანებიც სხედან, რომლებმაც „ოცნების“ რეჟიმის შექმნაში გარკვეული წვლილი შეიტანეს. აი, მაგალითად, ეკა ბესელია. ამომრჩევლის უმეტესობას მისი აღდგენილი სამართლიანობის არ სჯერა. მოკლედ, მსგავსი ნიუანსები გარკვეულ უხერხულობას არ გიქმნით?
_ იმის სურვილი, რომ სამართლიანი არჩევნები იყოს, ყველას აქვს. ის კი სხვა საკითხია, სამართლიანი არჩევნების ჩატარების შემდეგ ვინ უფრო ზევით მოექცევა და ამ სახელმწიფო ბერკეტებს რა დატვირთვას მისცემს. როგორც ვხვდები, თქვენ ეჭვი სწორედ ამ დატვირთვაზე გაქვთ.
_ დიახ და ჩემი ეჭვი სავსებით საფუძვლიანია, რადგან ეს ადამიანები ქვეყნის სათავეში 2012 წლიდან იყვნენ და შარშანდლამდე, მიუხედავად იმისა, რომ ამ ხნის განმავლობაში არაერთი უსამართლობა მოხდა, პირში წყალი ჰქონდათ ჩაგუბებული!
_ ვერ გეტყვით, ვის ვისი და რისი სჯერა, მაგრამ პირადად მეც ზოგის მჯერა და ზოგის _ არა. ახლა მთავარია, რომ გამჭვირვალე და სამართლიანი არჩევნები ჩატარდეს.
_ და ჩატარდება?
_ ვფიქრობ, ამდენი წერილი სწორედ ამის საწინდარია, ანუ ჩვენი სტრატეგიული პარტნიორები არჩევნებს ძალიან მძაფრად და ყურადღებით დააკვირდებიან და თუკი წინა არჩევნებზე გარკვეულ დარღვევებზე თავს იკავებდნენ, ახლა ნამდვილად აღარ შეიკავებენ თავს და თუ „ქართული ოცნება“ გაყალბებას მოინდომებს, ამას პირუთვნელად იტყვიან!
_ ვნახოთ, რა და როგორ იქნება.
სხვათა შორის, ქალბატონო ნატო, გასული წლის მიწურულს, ინტერვიუში გკითხეთ, პარტიის შექმნას ხომ არ აპირებთ-მეთქი? მაშინ ამ კითხვაზე ერთმნიშვნელოვნად არ მიპასუხეთ. ვინაიდან არჩევნები კარსაა მომდგარი, ისევ გეკითხებით: ნატო ჩხეიძე პარტიას ხომ არ შექმნის, თუ რომელიმე პარტიის სიაში ან მაჟორიტარობის კანდიდატი იქნებით?
_ მაშინდელი საუბრის შემდეგ გარკვეული ნაბიჯები გადადგმულია და არცთუ ძალიან გვიან, გეტყვით, რა და როგორ იქნება.
_ ე. ი., პარტის შექმნის საკითხი, როგორც იტყვიან, 50/50-ზეა?
_ 60/40-ზეა.
_ 60/40-ზე პარტიის შექმნის სასარგებლოდაა?
_ ნუ დავაკონკრეტებთ.
_ კარგი, მაგრამ მაინც ჩაგეკითხებით: თუ პარტიას შექმნით, თქვენი გუნდის წევრები ვინ იქნებიან?
_ ნუ დავაკონკრეტებთ. როგორც კი საშუალება იქნება, რომ ამის შესახებ საჯაროდ ითქვას, აუცილებლად ვიტყვი!
_ ბოლოს, ქალბატონო ნატო, რეზიუმე რომ გავაკეთოთ, დარწმუნებული ხართ, რომ ეს ბრძოლა ოპოზიციისა და საზოგადოების დიდი ნაწილის გამარჯვებით დასრულდება?
_ პროცესების ბუნებრივი მდინარების იმედი მაქვს.
_ „პროცესების ბუნებრივი მდინარება“ რა არის?
_ იმის იმედი მაქვს, რომ აქაც ისე მოხდება, როგორც დემოკრატიულ ქვეყნებში ხდება ხოლმე.
_ ანუ?
_ ხელისუფლება, განსაკუთრებით მეორე ვადის შემდეგ, იცვლება ხოლმე. ამ ქვეყანას დემოკრატიული განვითარება სურს და იმის იმედიც მაქვს, რომ ჩვენი სტრატეგიული პარტნიორები დემოკრატიის განვითარებაში გვეხმარებიან!

გიორგი აბაშიძე

დატოვეთ კომენტარი