მთავარი ინტერვიუ გუბაზ სანიკიძე: „ხალხი ქუჩაში მაჩერებს და მეკითხება, _ ამათ სისხლს როდის დაგვალევინებო?!“

გუბაზ სანიკიძე: „ხალხი ქუჩაში მაჩერებს და მეკითხება, _ ამათ სისხლს როდის დაგვალევინებო?!“

701
0
გაზიარება

რადიკალური განცხადებების გაკეთება აქამდეც ახასიათებდა და ამ ჩვევაზე უარი არც მას შემდეგ უთქვამს, რაც დამოუკიდებელი პოლიტიკური და სამოქალაქო აქტივისტის სტატუსი აქვს. ზოგადად, ამბობს, რომ ნებისმიერ პოლიტიკურ პარტიას თავისი დღის წესრიგი აქვს და პარტიის წევრი ვალდებულია, ამ დღის წესრიგს დაემორჩილოს. ზუსტად ამიტომ გადაწყვიტა, ნინო ბურჯანაძის პარტია დაეტოვებინა, თუმცა ეს იმას როდის ნიშნავს, რომ გუბაზ სანიკიძემ პოზიცია შეიცვალა და ბრძოლას აღარ აგრძელებს. პირიქით, გამოცდილი პოლიტიკოსი, მისივე სიტყვებით რომ ვთქვათ, ხალხს ხვდება და ელაპარაკება.
რაზე ესაუბრება ხალხს, რატომ მიიჩნევს, რომ ჩვენი ხელისუფლება არაქართულია და რატომ არის „ოცნება“ რქიანი ქაჯი? _ „ქრონიკა+“ გუბაზ სანიკიძის სკანდალურ ინტერვიუს წარმოგიდგენთ.

_ ბატონო გუბაზ, რამდენიმე დღის წინ, როგორც ცნობილი გახდა, ნინო ბურჯანაძის პარტია დატოვეთ. რატომ? რა ხდება?
_ არაფერი მომხდარა. ამაზე ახსნა უკვე გავაკეთე და კიდევ რამდენჯერ უნდა გავაკეთო?
_ კი ბატონო, ამ თემაზე ისაუბრეთ, მაგრამ ჩვენი გაზეთის მკითხველისთვის მაინც საინტერესო იქნება, კიდევ ერთხელ განმარტოთ, თუ რატომ დატოვეთ ბურჯანაძის პარტია.
_ იმიტომ წამოვედი, რომ ქვეყანაში ძალიან ბევრი ხალხია, რომელსაც დღევანდელი ხელისუფლება არ მოსწონს, მაგრამ არც რომელიმე ოპოზიციურ პარტიაში უნდა შესვლა. ქალბატონ ნინოსთან შეთანხმებით მივიღე გადაწყვეტილება, რომ პარტიიდან წამოვსულიყავი და ახლა, ასე ვთქვათ, საზოგადოებრივი აქტივისტი ვარ.
_ ანუ ფიქრობთ, რომ ქვეყანაში პოლიტიკური პარტიების მიმართ ნიჰილიზმი არსებობს და დამოუკიდებელ პოლიტიკოსს უფრო მეტი ნდობა აქვს?
_ პარტიებს თავიანთი დღის წესრიგი და, გარკვეულწილად, მოქმედებებში შეზღუდვებიც აქვთ. საზოგადოებრივ აქტივისტს კი ასეთი შეზღუდვა არ აქვს.
_ ეს მესმის, მაგრამ ნათქვამია, ძალა ერთობაშიაო.
_ მერე რა?
_ მერე ის, რომ დამოუკიდებლად მოქმედება არ გაგიჭირდებათ?
_ ჩვენ განსხვავებული მოსაზრებები არ გვაქვს. უბრალოდ, ჩემი წამოსვლა ტაქტიკური სვლა იყო.
_ ბატონო გუბაზ, თქვენ, როგორც დამოუკიდებელი სამოქალაქო და პოლიტიკური აქტივისტი, რა ნაბიჯების გადადგმას აპირებთ?
_ მე ხალხს ველაპარაკები! ძალიან ბევრი ადამიანი მოდის ჩემთან სასაუბროდ და ვნახოთ, რა იქნება.
_ დღეს სახალხო მოძრაობები ერთობ მოდურია. შესაბამისად, ხომ არ უნდა ველოდოთ, რომ დამოუკიდებელი სამოქალაქო აქტივისტი გუბაზ სანიკიძეს სახალხო მოძრაობას დააფუძნებს?
_ ვნახოთ, შევხედოთ, როგორ და რანაირად იქნება.
_ კარგი, ვნახოთ, თუმცა საპრეზიდენტო არჩევნების მძიმე საერთაშორისო შეფასების მიუხედავად, 19 მაისს „ოცნებამ“ მაინც ის გააკეთა, რაც უნდოდა, ანუ არაფერი შეიცვალა.
_ დიახ, არ შეიცვალა და ასე არც შეიცვლება. თუ ვინმეს ჰგონია, რომ „ქართულ ოცნებაში“ სინდის-ნამუსი გაიღვიძებს, ძალიან ცდება!
_ თუ ასე არა, აბა, როგორ უნდა შეიცვალოს?
_ ხალხის საპროტესტო მუხტით უნდა შეიცვალოს _ ასეთი ხელისუფლებების ცვლილებები ასე ხდება ხოლმე, ანუ თუ არჩევნები გაყალბდება, ეს ძალიან მარტივი სქემაა _ ან უკრაინული ან სომხური ვარიანტი!
_ 19 მაისს, საარჩევნო უბნების დახურვის შემდეგ, სანდრა რულოვსმა, პრინციპში, საპროტესტო აქციები დააანონსა, რასაც არათუ ხელისუფლების, არამედ ოპოზიციის გარკვეული ნაწილის მხრიდან უარყოფითი რეაქცია მოყვა.
_ არ ვიცი, ქალბატონი სანდრა რულოვსი რას და როგორ აპირებს. საერთოდ, „ნაციონალურ მოძრაობას“ თავისი დღის წესრიგი აქვს, ამაზე წარმოდგენა არ მაქვს და ვერაფერს გეტყვით.
_ მესმის, მაგრამ რევოლუციები ხელოვნურად არ ხდება. საამისოდ სიტუაცია ბუნებრივად უნდა მომწიფდეს და ხალხი ქუჩაში გასასვლელად მზად არის?
_ ჯერ შეიძლება, არაა, მაგრამ მალე ხალხი საამისოდ მზად იქნება! როცა ადამიანი გამოსავალს ვერ პოულობს, მერე რადიკალურ ქმედებებზე გადადის.
_ თქვენი აზრით, ელექტორატზე დაშინება მოქმედებს და ყველა არჩევნებში „ოცნება“ ამიტომ იმარჯვებს?
_ დაშინება, პლუს ფული, ასევე ადმინისტრაციული რესურსი. ხომ ნახეთ, მთელი ხელისუფლება ზუგდიდში იყო და დანარჩენ საქართველოში პოლიციელი არ ჭაჭანებდა.
_ ხალხის ქუჩაში ორგანიზებულად გამოსასვლელადაც ხომ ფული იქნება საჭირო?
_ არა, ეგრე არ არის. პროტესტს ფული არ სჭირდება _ როცა ადამიანი გაჭირვებულია, გადაწყვეტილებას თავად იღებს. დაფინანსებული პროტესტი და რევოლუცია სად გინახავთ?
_ თუ მშია და „ოცნება“ ფულს მომცემს, ქუჩაში რატომღა გავალ?
_ თუ „ოცნება“ ფულს მთელ საქართველოს მისცემს, ამას რა სჯობია?
_ ფაქტია, რომ აძლევს.
_ აძლევს, ოღონდ ერთჯერადად _ ოთხ წელიწადში ერთხელ.
_ საზოგადოებაში ოპოზიციის მიმართ ნიჰილიზმი ამის გამო გაჩნდა თუ სხვა მიზეზიც არსებობს?
_ ოპოზიცია საზოგადოებრივ შეკვეთას ვერ ასრულებს. ქართული ოპოზიციური სპექტრი ცვლილებებისთვის საკმარისი აშკარად არ არის და პოლიტიკური პარტიიდანაც ამიტომ წამოვედი, რომ ამ სიტუაციაზე მიხმარება გარედან მოხდეს.
_ ოპოზიცია ხალხის შეკვეთას, იქნებ, იმიტომ ვერ ასრულებს, რომ მისი ცალკეული წარმომადგენელი ხელისუფლებასთან ფარულად თანამშრომლობს?
_ როგორც ჩანს, ვიღაც-ვიღაცები გარიგებაში არიან, ვიღაც-ვიღაცები კი ელოდებიან, როდის გაურიგდებიან, თუმცა ამას ყველაზე ვერ ვიტყვი…
_ და სანამ პოლიტიკაში დიდი აღებ-მიცემობაა, ამასობაში, შეიძლება, დავითგარეჯა დავკარგოთ. ბატონო გუბაზ, ამ ისტორიულ და საქართველოსთვის ძალიან მნიშვნელოვანი ძეგლის გარშემო, თქვენი ინფორმაციით, რა ხდება?
_ ჩვენი ხელისუფლების მხრიდან უყურადღებობა და ფეხზემკიდიაობა ხდება!
_ სამართლიანობისთვის უნდა ითქვას, რომ დავითგარეჯის პრობლემა ახალი არ არის და წინა ხელისუფლებების დროსაც ასე იყო.
_ დიახ, ახალი პრობლემა არ არის, მაგრამ გაყინული იყო. სალომე ზურაბიშვილის იქ ჩაბრძანებამ და რაღაც სისულელეების როტვამ პროვოცირება გამოიწვია.
_ ამ თემაში, ვფიქრობ, კარგად ერკვევით და ზურაბიშვილის განცხადებები, უბრალოდ, სისულელე იყო თუ მიზანმიმართული პროვოკაცია?
_ ზურაბიშვილმა ამ გაყინული პრობლემის პროვოცირება გააკეთა _ ამ პრობლემის ამოწევას აზერბაიჯანული მხარეც არიდებდა თავს და _ ჩვენიც. ამიტომაც იქ ჩვენი მომლოცველები და ტურისტები უპრობლემოდ ჩადიოდნენ. შესაბამისად, საქმე ისე მიდიოდა, რომ საქართველოსთვის უპირატესი მდგომარეობა იყო. ამ ქალმა კი პროვოცირება ისევე გააკეთა, როგორც ჩვენს ყველა მეზობელთან აკეთებს. დიდი ეჭვი მაქვს, რომ ქვეყნის რუსეთისკენ მიდენა ხდება.
_ ანუ ყველაფერ ამაში რუსული კვალი უნდა დავინახოთ?
_ გარეჯასთან დაკავშირებით რუსული კვალი არ არის, მაგრამ ეს ქალი ან ძალიან სულელია, ან ძალიან დიდი პროვოკატორი, ან ორივე ერთად _ სულელი პროვოკატორი! ამას იმიტომ ვამბობ, რომ ბალტიისპირეთში იყო ჩასული და იქიდან თურქეთს დაარტყა. ახლა ერდოღანს ქვეყნის შიგნით ძალინ უჭირს და პატარა გამარჯვებული ომი სჭირდება. მისთვის ყველაზე სუსტი მეზობელი საქართველოა. ზოგადად, ყველა, ვისაც არ ეზარება, თავში გვიტყაპუნებს, რადგან ასეთი ხელისუფლება გვყავს _ ქვეყანას მაფიოზი მართავს!
_ თურქეთთან ომს პირდაპირი მნიშვნელობით გულისხმობთ თუ გადატანითი?
_ ომი არა, მაგრამ საქართველოს პრეზიდენტი ანტითურქულ განცხადებას რომ აკეთებს, ამაზე რეაგირება ექნებათ. საერთოდ, ომი, მაინცდამაინც, ტანკებით ომს არ ნიშნავს _ შეიძლება, თურქეთში ჩვენს მიგრანტებს ხელი შეუშალონ, სამსახურებიდან გამოყარონ. ჩვენ მოწყვლადი, უპატრონო ქვეყანა ვართ და ამიტომ ყველაფერი შეიძლება!
გაფუჭებული ურთიერთობა გვაქვს აზერბაიჯანთან, ასევე სომხეთთან, თურქეთთან და ვერ ატყობთ, იდეოლოგია რომ წამოვიდა, _ ყველა ჩვენი მტერია და აბა, ვინ გვიშველის? _ აშშ-ს ფეხზე ვკიდივართ, დასავლეთი არ არსებობს და მოდით, ისევ ამ ჩვენს „ძმა“ რუსეთს დაველაპარაკოთო. ვერ ატყობთ, ბოლო დროს ასეთი ტექსტები რომ მომრავლდა?
_ დიახ, ვატყობთ.
_ ჰოდა, საქმეც ეგ არის.
_ ე. ი., პროვოკაციებზე მარტო პრეზიდენტი კი არა, მთელი ხელისუფლება მიზანმიმართულად მიდის?
_ ხელისუფლება პროვოკატორული და მოღალატურია! სერგო ორჯონიკიძეს მეტი კი არაფერი დაუშავებია _ ქართული მიწები გაანიავა.
_ საზოგადოება მზად არის, გარეჯაში ჩავიდეს და იქაურობა დაიცვას. ეს ვითარებას უფრო ხომ არ გაამწვავებს?
_ რა თქმა უნდა, გაამწვავებს. პროტესტი ხელისუფლების წინააღმდეგ უნდა იყოს იმიტომ, რომ საგარეო საქმეთა მინისტრი ამ პრობლემის შესახებ ტელევიზიით იგებს. არადა, საგარეო საქმეთა მინისტრი იმიტომ არის, რომ ის იცოდეს, რაც გარეთ ხდება.
_ ეს პრობლემა საერთაშორისო ორგანიზაციების ჩართვით ხომ არ მოგვარდება?
_ დიახ, იუნესკო და საერთაშორისო ექსპერტები უნდა ჩავრთოთ, რადგან საუბარი კულტურულ ძეგლსა და ეროვნულ მემკვიდრეობაზეა. აზერბაიჯანის ხელისუფლება ღიად და უნამუსოდ გვედავება, რომ ეს თითქოს ალბანური ძეგლი იყოს, არადა, დავითგარეჯას ალბანელებთან არფერი აკავშირებს _ ალბანელების მონათესავე ხალხი დღეს ლეკები არიან. იმ დროს, როცა დავითგარეჯა აშენდა, თურქული მოდგმის ტომები მცირე აზიაში გამოჩენილები საერთოდ არ იყვნენ.
_ პრობლემის მოგვარებაში საერთაშორისო ექსპერტების ჩასართავად სამოქალაქო საზოგადოებამ უფრო ხომ არ უნდა იაქტიუროს?
_ ყველამ უნდა იაქტიუროს, უპირველეს ყოვლისა კი, ხელისუფლებამ, მაგრამ ხელისუფლებამ უნდა დაგვარწმუნოს, თუ რას ჩალიჩობს. ხომ ხედავთ, რას შვრებიან _ იქ ქართველებს არ უშვებენ და რომ შევაფასოთ, ვითარება ასეთია: ჩვენ გაჩერებულები და დადუმებულები ვართ, იმათ კი გზა გაჰყავთ.
_ სხვათა შორის, გავრცელდა ინფორმაცია, რომ დავითგარეჯაში შესაძლოა, ერთობლივი _ ქართულ-აზერბაიჯანული ტურისტული მარშრუტები მოეწყოს. როგორც ვიცი, ოფიციალური ბაქოს ერთ-ერთი მთავარი მოთხოვნა სწორედ ეს იყო.
_ ერთობლივი ტურისტული მარშრუტები რატომ უნდა გაკეთდეს? აზერბაიჯანი დავითგარეჯასთან რა შუაშია? რა, დავითგარეჯაში აზერბაიჯანი მეწილედ უნდა გავიხადოთ? თუ ასეა, მაშინ სვეტიცხოველიც სხვას გავუყოთ, რა პრობლემაა?! აგერ, სომხებს ჯვარზე პრეტენზიები აქვთ და, კი ბატონო, დავუთმოთ _ ჩვენ ხომ ხელგაშლილი, სტუმართმოყვარე და უტვინო ხალხი ვართ!
_ საქართველოს სხვადასხვა რეგიონი ეთნიკური აზერბაიჯანელებით კომპაქტურად არის დასახლებული. დავითგარეჯის ნიადაგზე ქვეყანაში ეთნოკონფლიქტის კერა ხომ არ გაჩნდება?
_ არ მგონია და იმედიც მაქვს, რომ ეს მოხდეს. მხოლოდ საქართველოს კი არა, საქართველო აზერბაიჯანს უფრო სჭირდება, თორემ თავის ნავთობსა და გაზს სად გაყიდის, მაგასაც ვნახავ, რა?!
_ ბატონო გუბაზ, სიმართლეს თვალი გავუსწოროთ და ვაღიაროთ, რომ აზერბაიჯანი საქრთველოსთან ურთიერთობის გამწვავებაზე მიდის!
_ გამწვავებაზე კი არ მიდის, როგორც გითხრით, ალიევს პრობლემები შიგნით აქვს და თავის ხალხს პასუხი ხომ უნდა გასცეს? ამიტომ ცდილობს, პრინციპული პოზიცია გამოიჩინოს, მაგრამ დედამიწა საერთაშორისო ექსპერტებით სავსეა, ჩამოვიყვანოთ და მათ თქვან, ეს ძეგლი, ბოლოს და ბოლოს, ვისია! კედლებზე ქართული წარწერებია და რა ალბანური, რისი აზერბაიჯანული, რა შუაშია? ეს იგივეა, არაბებმა რომ თქვან, პირამიდები ჩვენ ავაშენეთო.
_ საერთო ჯამში, ხელისუფლება ყველა კუთხით უმოქმედოა, არა?
_ დიახ, უმოქმედოა და მთელი ხელისუფლება ფულის კეთებაზეა გადასული. მაფიოზებს საქართველო ფეხზე არ კიდიათ?! ახლა, ბიძინა ივანიშვილმა რა იცის, დავითგარეჯა რა არის?
_ ივანიშვილმა შეიძლება, არ იცის, მაგრამ კულტურის სამინისტრო ხომ გვაქვს და მინისტრმაც არ იცის?
_ რისი სამინისტრო გვაქვს, კულტურის სამინისტრო რომ გვქონდეს?!
_ არ ვიცი, რამდენად მართალია, მაგრამ კულუარებში ამბობენ, თავის დროზე, სააკაშვილმა აზერბაიჯანულ მხარეს უთხრა, დავითგარეჯას მოეშვი და მის ნაცვლად სხვა ტერიტორიებს მოგცემთო.
_ ამის შესახებ არაფერი ვიცი, მაგრამ სააკაშვილი დავითგარეჯასთან დაკავშირებით თავის პოზიციას თუ დააფიქსირებს, კარგს იზამს _ ყველა თემას ეხება, ამასაც შეეხოს და ერთი გვითხრას, რა მოლაპარაკება იყო! როგორც ჩანს, რაღაც ზეპირი შეთანხმება არსებობდა.
_ სააკაშვილის აქტიურობა ბევრს, მათ შორის, „ნაციონალური მოძრაობის“ მხარდამჭერებსაც აღიზიანებს. შესაბამისად, ყოფილმა პრეზიდენტმა ამ თემაზე რამე რომ თქვას, შესაძლოა, უარყოფითი რეზონანსი მოყვეს.
_ არ ვიცი, ვის აღიზიანებს _ ეს ჩემი პრობლემა არ არის, თან აქ საკითხი სააკაშვილის ბედ-იღბალზე კი არა, დავითგარეჯაზეა და თქვას, მისი პრეზიდენტობისას აზერბაიჯანთან რა შეთანხმება იყო.
_ თუ ამ პრობლემის მოგვარებაში საერთაშორისო ექსპერტები არ ჩაერთვებიან, სიტუაცია უფრო გამწვავდება?
_ რა თქმა უნდა, გამწვავდება. ჩვენ დავითგარეჯის დამთმობები არ ვართ!
სხვათა შორის, 1988 წელს ეროვნული მოძრაობა დავითგარეჯით დაიწყო, მაგრამ ამ ხელისუფლებაში ამის შესახებ არავინ არაფერი იცის. ამ ხელისუფლების დემონტაჟიც დავითგარეჯის საკითხით დაიწყება იმიტომ, რომ ღირსეული ხალხი ვართ _ ქართველები რაც უნდა მშივრები იყვნენ, არ გამოვლენ და არ იტყვიან, გვშიაო, მაგრამ დავითგარეჯისთვის, სვეტიცხოვლისა და ხახულის ხატისთვის თავს გაწირავენ!
_ გამორიცხავთ, რომ დავითგარეჯის საკითხი „ოცნებას“ პოლიტიკური ტემპერატურის ასაწევად სჭირდებოდეს? ანუ ხმა დადის, მმართველი გუნდი ხელისუფლებას აბარებსო. მოკლედ, იქნებ, თავად „ოცნებას“ უნდა, რომ მძლავრი საპროტესტო ტალღა აგორდეს, რაც პოლიტიკურ კრიზისში გადაიზრდება და ვითარების განმუხტვის მიზნით, ვადამდელ არჩევნებს დანიშნავს და ხელისუფლებას სხვა პოლიტიკურ ჯგუფს გადააბარებს?
_ ვერ გავიგე, მაზოხისტები არიან? თუ მაზოხისტები არიან, მაშინ არც ამის პრობლემა იქნება. ხალხი ვადამდელ არჩევნებს კი არა, დავითგარეჯის დაცვას ითხოვს, თან ვადამდელი არჩევნები რომ ჩატარდეს, დავითგარეჯა ჩვენს ხელში დარჩება თუ როგორ არის?
_ ზოგადად, იზიარებთ მოსაზრებას, რომ „ოცნება“ ხელისუფლების გადაბარებას ცდილობს და „სტავკას“ თითქოს „ევროპულ საქართველოზე“ აკეთებს?
_ ეს ჭორი დადის და, „დავაი“, აბა, სცადონ.
_ გგონიათ, რომ თუ ეს ჭორი გამართლდა, ხალხი ხელისუფლებაში ბოკერიას გუნდის მოსვლას უარყოფითად შეხვდება?
_ აბა, რა იქნება?!
_ „ევროპული საქართველო“, როგორც ხელისუფლება, „ოცნებაზე“ უარესი იქნება?
_ ჩემთვის ორივე ერთი და იგივეა.
_ შეიძლება, მაგრამ ეს ე. წ. მესამე ძალაც რომ არსად ჩანს?
_ ამ მესამე ძალას თავი დაანებეთ. მესამე ძალა კი არა, აქ ტალღა იქნება, რომელიც ყველასა და ყველაფერს წალეკავს!
_ ეს თქვენი აზრია, „ოცნება“ კი იმედოვნებს, რომ ხელისუფლებაში არათუ 2020-ში, არამედ 2024 წელსაც დარჩება.
_ „ოცნებას“ მოხარშული წაბლი და ფეხების დათბილვაც ხომ არ უნდა?
_ ასეთი პროგნოზი, მგონი, ირაკლი კობახიძემ გაახმოვანა.
_ კობახიძე ალექსანდრე მაკედონელია და ყველაფერი ისე იქნება, რასაც იტყვის!
_ მოკლედ, მთელ კავკასიაში ყველაზე ცუდ მდგომარეობაში საქართველოა, არა?
_ დიახ, ჩვენ ხომ უთავო ქვეყანა ვართ!
_ უთავობას ისიც ემატება, რომ საზოგადოებაში ნიჰილიზმი სჭარბობს და ამის შესახებ საუბრის დასაწყისში თქვენც აღნიშნეთ, ბატონო გუბაზ.
_ ნიჰილიზმი ყველგან არის, მაგრამ ნიჰილიზმის მერე გამძვინვარებაა და ვითარება უკვე ამ სტადიაში გადადის _ ხალხი ქუჩაში მაჩერებს და მეკითხება, _ ამათ სისხლს როდის დაგვალევინებო?! მეტი რაღა გითხრათ? გუშინ ტაქსი გაჩერდა, მძღოლი გადმოვიდა და მეუბნება, _ გლდანელი ვარ და თქვით, ქუჩაში როდის გამოვიდეთო? ხალხი გამძვინვარებულია. მას კი, ვისაც სძინავს, სულ ეძინება, მაგრამ ამ ერს ჯანმრთელი სხეული მაინც შერჩა. ხახვსა და კარტოფილზე გაყიდული ხალხი არასოდეს არაფერს მოახდენს, მაგრამ ერის ძირითადი ნაწილი ბრძოლისუნარიანია!
_ ადამიანებს ის კითხვაც აქვთ, _ აი, დასავლეთი ამ მძიმე სიტუაციიდან გამოსვლაში რატომ არ გვეხმარებაო? ამაზე რა პასუხი გაქვთ?
_ ეს ცრუ მოლოდინის ბრალია
_ ანუ?
_ ევროპას ჩვენი რამე ვალი აქვს? თუ ხელს ჩვენ თვითონ არ გავანძრევთ, ვინ მოგვეხმარება, კაცო? მარტო მებრძოლ ერებს ეხმარებიან, მონებს კი არავინ ეხმარება! ნახეთ, უკრაინელებმა რა ქნეს _ მთელი გეოპოლიტიკა ააყირავეს. სომხეთშიც არავინ არაფერს ელოდებოდა, მაგრამ სომხებმაც თავისი გააკეთეს და აქაც ასე მოხდება!
_ რაკი უკრაინა ახსენეთ, რეპლიკის სახით, ერთ რამეს ვიტყვი, _ „ქოცები“ აღფრთოვანებას ვერ მალავენ, ზელენკის ინაუგურაციაზე მთელი დარბაზი სალომე ზურაბიშვილს ფეხზე წამოუდგაო.
_ უიმე, დედა, ეს „ოცნება“ რა გოიმი და რქიანი ქაჯია, რა ეშველება! ნეტავ, სალომე ზურაბიშვილი რას ფიქრობდა, ზელენსკიმ რომ თქვა, ჩემი სურათები დაკიდებული არსად დავინახოო? იქ ფეხზე ყველას აუდგნენ და ახლა, ზურაბიშვილს დედას ხომ არ შეაგინებდნენ? გეუბნებით, ქაჯები და გოიმები არიან, ორღობე!
_ თქვენ ორღობეს ეძახით, მაგრამ ფაქტია: „ოცნება“ ახალ სახეებს ეძებს.
_ ბიძინა ივანიშვილი იმ ოცნებით არის დაავადებული, რომ აქ ადამიანების ინკუბატორი გააკეთოს და ხალხი თავის ჭკუაზე გაზარდოს, მაგრამ „2030“ როგორ გამოუვიდა, ესეც ისე გამოუვა! მიმინოშვილის ქალმა პოლიტიკისა რა იცის, რამე რომ გააკეთოს? _ ვერ გავიგე, პოლიტიკაში უნდა ამეცადინოს თუ რა უნდა ქნას?
პოლიტიკოსს ხალხი, დროება, გამარჯვებები, დამარცხებები და ბიოგრაფიები ქმნის. ეგრე, ინკუბატორის პირველი თაობა ხომ ჰყავს, კომკავშირელი ყვინჩილები, მაგრამ რისი გამკეთებლები არიან, რომელ კრიზისს გაუძლებენ? საერთოდ, კობახიძე ვინ არის, ვის დაჰკარგვია?
_ ისე, კობახიძისნაირი კარიერისტების პოვნა ივანიშვილს არ გაუჭირდება.
_ კი ბატონო, მაგრამ ვნახავთ, კონკურენციას როგორ გაუძლებენ. ივანიშვილს პოლიტიკოსები დაამარცხებენ და არა _ არასამთავრობოები. ამიტომაც მას ვერანაირი ინკუბატორი ვერ უშველის!
_ ბოლოს, ორი სიტყვით მთაწმინდის არჩევნების მეორე ტურსც შევეხოთ _ როგორ ფიქრობთ, მთელმა ოპოზიციამ შავგულიძეს უნდა დაუჭიროს მხარი, თუ არადა, ზოგადად, მთაწმინდაზე ოპოზიციონერის გამარჯვებით პოლიტიკური სურათი შეიცვლება?
_ არაფერი შეიცვლება და შავგულიძეს არჩევნებს წაგებინებენ, რადგან შავგულიძე ხონთქრის პირად მტრად ითვლება. ისე, შავგულიძეს ოფიციალურად ტელევიზიით დავუჭირე მხარი, მაგრამ მისი ხმების დასაცავად საარჩევნო უბანში ვერ დავდგები!
_ ბატონო გუბაზ, დავითგარეჯის პარალელურად ვითარება სამცხე-ჯავახეთშიც ხომ არ დაიძაბება?
_ არ მგონია, რადგან ოფიციალური ერევანი საქართველოსთან კონფლიქტს ყველანაირად თავს არიდებს.
_ მესმის, მაგრამ საპრეზიდენტო არჩევნების წინ ზურაბიშვილმა, თუ გახსოვთ, სამცხე-ჯავახეთის სომხურ მოსახლეობას ორმაგ მოქალაქეობაზე ჩამოუგდო სიტყვა და აღნიშნა, _ აი, სააკაშვილმა თურქებს მისცა ორმაგი მოქალაქეობა და თქვენ _ არაო.
_ ზურაბიშვილი სასაცილოა! ერთი იკითხეთ, სომხეთში ზურაბიშვილზე როგორი წარმოდგენა აქვთ. ეს უნამუსო ადამიანია და ოღონდ თავისი ცხოვრება მოიწყოს და ყველაფერი ფეხზე კიდია. ადრე პრეზიდენტის ერთი სასახლე იყო, ეს კი ორ სასახლეში ცხოვრობს და არ გამოდის!
სიტუაცია არ გავართულოთ და დიაგნოზი დავსვათ: ეს დიაგნოზი კი ის არის, რომ ქვეყანას არაქართული ხელისუფლება ჰყავს! მორჩა და გათავდა!
_ წლებია, მაგას ვამბობთ, რომ არაქართული ხელისუფლებები გვმართავს. მთავრობის სათავეში ქართული ხელისუფლებები რატომ ვერ მოგვყავს? ამაში დამნაშავე საზოგადოებაა?
_ გარკვეულწილად _ კი. ქართულ საზოგადოებას სტოკჰოლმის სინდრომი სჭირს! ყველა ხელისუფლება კი საზოგადოების შედეგია! ჩვენი მოსახლეობის ერთ ნაწილს ტვინი არ აქვს, თუმცა უმრავლესობა ადეკვატური და ჯანსაღია!
_ ყველაფერ აქედან გამომდინარე, ამ ზაფხულს ვითარების რადიკალიზაციას ელოდებით?
_ დიახ, ძალიან ცხელი ზაფხული იქნება!

გიორგი აბაშიძე

 

დატოვეთ კომენტარი