როგორ დამთავრდება „ოცნების“ ნოემბრის კრიზისი? _ ამის თაობაზე სხვადასხვა მოსაზრება არსებობს, ანუ ზოგი ამბობს, რომ ხელისუფლება დათმობაზე წავა, ზოგიც დარწმუნებულია, რომ პლებისციტით გადაწყდება, ქვეყანაში არჩევნები პროპორციული სისტემით უნდა ჩატარდეს, შერეულით თუ, საერთოდ, მხოლოდ მაჟორიტარულით. ასეა თუ ისე, ნათელია, რომ თუ შექმნილი ვითარებიდან გამოსავალი არ მოიძებნა, „ოცნება“ მართვის სადავეებს ვადაზე ადრე დაკარგავს, თუმცა თბილისის საკრებულოს წევრი, „ნაციონალური მოძრაობის“ წარმომადგენელი ლევან ხაბეიშვილი, ამბობს, რომ ივანიშვილის დასასრულის დასაწყისი უკვე სახეზეა. მეტიც: ხაბეიშვილი თითქმის დარწმუნებულია, რომ საერთაშორისო სანქციები გარდაუვალია და „ოცნების“ ლიდერს ყველაზე ძალიან სწორედ ამის ეშინია.

როგორ უნდა დაიბრუნოს ხალხმა მოპარული არჩევნები და შეინარჩუნებს თუ არა ოპოზიცია ერთიანობას? _ „ქრონიკა+“ ლევან ხაბეიშვილს ესაუბრა:

_ ლევან, 14 ნოემბრის შემდეგ მოვლენები დრამატულად ვითარდება, რასაც ყველა ვხედავთ, მაგრამ მაინც, რა მოქმედება, რა ვითარებაა?
_ ის მოქმედება და ვითარებაა, რომ არჩევნები ჩიტმა წაიღო.
_ და ეს არჩევნები ჩიტს როგორ უნდა წავართვათ?
_ ჩიტს ძალაუფლება, პრაქტიკულად, წართმეული აქვს.
_ ეს როგორ?
_ ჩიტი, ანუ, ამ შემთხვევაში, ივანიშვილი, შეშინებულია.
_ ამის თქმის საფუძველს რა გაძლევს?
_ ივანიშვილი კუთხეშია მიმწყვდეული და ამას ისიც მოწმობს, რომ სიტყვა გადათქვა!
საერთოდ, მიჩვეულები ვიყავით, რომ ქართველ ხალხს ატყუებდა. ახლა კი საერთაშორისო თაღლითად ჩამოყალიბდა _ მსოფლიოში ყველაზე დიდი, გაეროს ტრიბუნიდან შეგვპირდა, რომ ქართველ ხალხს პროპორციული არჩევნები გვექნებოდა, მაგრამ პირდაპირი მნიშვნელობით გადაგვაგდო! მოქალაქეებმა უნდა იცოდნენ, რომ პოლიტიკაში ამაზე მეტი ტყუილი არ არსებობს _ წარმოუდგენელია, რომ რომელიმე ქვეყნის მმართველი პარტიის ხელმძღვანელს ბრიფინგზე პირობა დაედოს, მაგრამ მერე მთელი ქვეყანა, მსოფლიო და საერთაშორისო თანამეგობრობა გადაეგდოს, ამის მერე კი იმ ქვეყანაში ცხოვრება ისე გაეგრძელებინოს, თითქოს არაფერი მომხდარა.
ჩვენ თავისუფლების მოყვარე ერი ვართ, შეიძლება, ყველაფერი ავიტანოთ და გავუძლოთ, მაგრამ როცა ხელისუფალი ასე უთავმოყვარეოდ იქცევა, ეს არ შერჩება!
სხვათა შორის, აქამდე ბევრჯერ მითქვამს, ასეთი და ისეთი პრობლემები აქვს-მეთქი, მაგრამ ახლა ივანიშვილი დამთავრებულია, ანუ ყველა სახელმწიფო უწყებას, მათ შორის, პარლამენტსაც, პოლიცია იცავს და ეს ხელისუფლების შენარჩუნების მცდელობაა, ანუ როცა ხელისუფლება საკუთარ მოქალაქეებთან საუბარს სპეცრაზმით იწყებს, ის ხელისუფლება აღარაა და, უბრალოდ, ცდილობს, არსებობა გაიხანგრძლივოს!
ყველაფერს თავი დავანებოთ და საქართველოს ისტორია გავიხსენოთ _ როცა ჩინოვნიკები სპეცრაზმელებისა და პოლიციელების დასაცავები გამხდარან, იმ ხელისუფლებას თავისი მოღვაწეობა აუცილებლად კრახით დაუსრულებია!
_ ლევან, გეთანხმები, რომ მოვლენები, პირდაპირ თუ ირიბად, „ვარდების რევოლუციის“ სცენარით ვითარდება და ამას ყველა ხვდება.
_ კი ბატონო.
_ ყველაფერ ამის მიუხედავად, საკითხავია, ოპოზიცია რატომ ელოდა, რომ ივანიშვილი საკუთარ სიტყვას შეასრულებდა და საზოგადოებას არ გადააგდებდა?
_ შეიძლება, საზოგადოების გარკვეული ჯგუფი ენდობა, მაგრამ ოპოზიციას ივანიშვილის ნდობა ნაკლებად აქვს, თუმცა ბრიფინგზე განაცხადა და მხოლოდ ჩვენ კი არა, საერთაშორისო საზოგადოებას უთხრა, პროპორციულ სისტემაზე გადავდივართო. მის აფერისტობაში ეჭვი არ მეპარებოდა, მაგრამ თუ ასე მოიქცეოდა, ამას მე კი არა, ძიძიგურიც ვერ წარმოიდგენდა!
ისე, სიმართლე რომ გითხრათ, შინაგანი შიში მქონდა, რომ ასე მოიქცეოდა, მაგრამ ახლა მთელი უმრავლესობა პროპორციულ სისტემაზე გადასვლით ამაყობდა და მეც ვფიქრობდი, ალბათ, მიკერძოებული ვარ-მეთქი.
მოკლედ, მიუხედავად იმისა, რომ მთავრობა მოძალადეა, ოპოზიცია ვამბობდით, თუ მაჟორიტარული იქნება, შეიძლება, რაღაც წაგვართვას, მაგრამ თუ პროპორციული იქნება, გაყალბებას ვერ მოახერხებს, რადგან ნდობა დაკარგული აქვსო.
_ ანუ ოპოზიცია ამ თემებზე მსჯელობდა?
_ დიახ და ის, რაც „ოცნებამ“ 14 ნოემბერს გააკეთა, იმის დასტურია, რომ არჩევნებს ყველა ვარიანტში აგებს და ასეც ამიტომ მოიქცა!
სხვათა შორის, არჩევნების პროპორციულ სისტემაზე გადასვლის კანონპრექტის ჩავარდნას „აირაის“ კვლევა მოყვა, რომლის თანახმადაც, ოპოზიციას 41 პროცენტი აქვს, „ქართულ ოცნებას“ კი _ 23 პროცენტი, ანუ „ოცნების“ მხარდაჭერა ისტორიულად დაბალ ნიშნულზეა და ასევე ივანიშვილის მიმართ ისტორიულად დაბალი ნეგატიური განწყობაა.
_ კი ბატონო, მაგრამ იგივე გახარიას გაპრემიერება, ჩემი აზრით, იმაზე მიანიშნებდა, რომ ივანიშვილი მიცემულ სიტყვას გადავიდოდა. შესაბამისად, ოპოზიცია ამ კუთხით უფრო აქტიური უნდა ყოფილიყო.
_ ამ ქვეყანაში მხოლოდ ხელისუფლება და ოპოზიცია კი არა, მოქალაქეებიც ცხოვრობენ.
_ ვიცი, მაგრამ იმ კითხვასთან, რაც გკითხეთ, ეს რა კავშირშია?
_ გახარიას პრემიერად დანიშვნით ივანიშვილმა კატასტროფა გააკეთა, მაგრამ ამის ერთადერთი გამართლება პროპორციული არჩევნები იყო. გულახდილად გეუბნებით, პროპორციული არჩევნები ერთადერთი გამოსავალი და ნათელი წერტილი იყო, რომლითაც დედას ვუტირებდით და ამ პოლიტიკურ ნაგავს გავიტანდით.
სხვათა შორის, ეს მხოლოდ ოპოზიციის კი არა, ხალხის განწყობაც იყო, თორემ იმ პოლიტიკურ ძალას, რომელსაც მე წარმოვადგენ, ივანიშვილის არასოდეს სჯეროდა და არც _ 2012-ში, როცა ივანიშვილს მაღალი საზოგადოებრივი ნდობა ჰქონდა.
ერთი სიტყვით, ასე იყო თუ ისე, სამწუხაროდ, შევცდით და დავუშვით, რომ ივანიშვილს შეიძლება, სიმართლე ეთქვა, თუმცა ვიმეორებ, ეს იმიტომ დავუშვით, რომ მსოფლიოში ყველაზე მაღალი _ გაეროს ტრიბუნიდან თქვა, აი, პროპორციული არჩევნები გვაქვსო.
_ ლევან, თქვენი ვერსიით, ივანიშვილმა სიტყვა რატომ გადათქვა, ანუ საქართველოს მოსახლეობა ჯანდაბას, მაგრამ მსოფლიო რატომ მოატყუა?
_ ამას მარტივი ახსნა აქვს.
_ მაინც, როგორი?
_ ივანიშვილს პოლიტიკური მხარდაჭერა აღარ აქვს, არჩევნებს აგებს და ამიტომ ვა-ბანკზე წავიდა.
სხვათა შორის, „აირაის“ კველევების შესახებ „ოცნებას“ ინფორმაცია წინასწარ ჰქონდა.
_ ანუ „აირაიდან“ ინფორმაციამ გაჟონა?
_ არა.
_ აბა?
_ სანამ „აირაის“ კვლევები საჯარო გახდება, მანამდე პოლიტიკურმა პარტიებმა ვიცით ხოლმე, მაგრამ არსებობს პოლიტიკური შეთანხმება, რომ სანამ ამ კვლევას თავად „აირაი“ არ გამოაქვეყნებს, პოლიტიკური პარტიები კონფიდენციალობას ვიცავთ.
„აირაის“ გარდა, კვლევას თავად „ოცნებაც“ ატარებს და იცის, რომ მხარდაჭერა აღარ აქვს. ჰოდა, პროპორციული სისტემის კანონპროექტის ჩაგდებით ივანიშილმა პირდაპირ გვითხრა, ვეცდები, არჩევნები, ასევე ხელისუფლება მოგპაროთ და დაგაშინოთო
ივანიშვილი კუთხეშია მიმწყვდეული და მორჩა, ანუ იფიქრა, რომ უკან დასახევი გზა აღარ აქვს და ძალადობაზეც ამიტომ გადავიდა!
ივანიშვილი ხელისუფლებაში დემოკრატიის სახელით მოვიდა, აი, მთავარი თავისუფლება და თავისუფალი არჩევანიაო, მაგრამ ყველა ეტაპზე, როგორც კი გაუჭირდა _ საპრეზიდენტო არჩევნები იქნებოდა თუ ზუგდიდის, _ მაშინვე ძალადობაზე გადავიდა!
სხვათა შორის, ეს ძალადობა კორცხელიდან დაიწყო _ მაშინ ჩვენ არჩევნები გურიაში მოვიგეთ, „ოცნება“ კი კორცხელში აგებდა, ამიტომაც ძალადობასა და ტერორზე გადავიდა. მას შემდეგ კი ყველაფერ ამის მასშტაბი გაიზარდა.
_ მაგრამ ბოლოდროინდელ მოვლენებთან დაკავშირებით „ოცნების“ არგუმენტი ასეთია _ ქუჩაში ბევრი ხალხი არ გამოდის, ე. ი., მოსახლეობას სულ არ აინტერესებს, არჩევნები პროპორციული სისტემით ჩატარდება თუ შერეულითო. სიმართლეს თვალი გავუსწოროთ და ვთქვათ, რომ ამ არგუმენტში ლოგიკა არის. ჰოდა, ოპოზიციამ რა უნდა გააკეთოს, პროტესტმა საერთო-სახალხო სახე რომ მიიღოს?
_ არ ვამბობ, ასი ათასი ადამიანი-მეთქი, მაგრამ ქუჩაში იმდენი ხალხი ნამდვილად გამოდის, რამდენიც პარლამენტის ოთხივე კარის პიკეტირებისა თუ მაჟორიტარების ბიუროებთან დისკომფორტის შესაქმნელად საკმარისია!
აქ იმაზე კი არ არის საუბარი, რომ ხელისუფლების შეცვლას ვინმე ძალადობრივი გზით აპირებს.
_ აბა, საუბარი რაზეა?
_ „ოცნება“ სხვა საქართველოში ცხოვრობს და უნდა იცოდეს, რომ ყოველდღე პოლიციით დაცვა მოუწევს! დიახ, ივანიშვილის ამ მონების დისკომფორტი გაგრძელდება და შეუძლებელია, ამას გაუძლონ!
_ რატომ ვერ გაუძლებენ?
_ ამ დისკომფორტისთვის ვერც ერთ ხელისუფლებას გაუძლია და ვერც „ოცნება“ გაუძლებს! პოლიციასთან ერთად როდემდე ივლიან? თქვენც ხედავთ, რომ ყოველდღე პრობლემა აქვთ.
აი, ახლა მე, როგორც პოლიტიკური პარტიის წარმომადეგნელმა, რომ ვთქვა, აქციები ხვალ შეწყდება-მეთქი, ეს ტყუილი იქნება, რადგან აქციები არ და ვერ შეწყდება!
ოპოზიციას თავი რომ გავანებოთ, უამრავი ჯგუფი გამოჩნდა, მათ შორის, ახალგაზრდებიც, რომლებიც აქციებზე არასოდეს მინახავს, მაგრამ ყველაფერი ეს უკვე ყელში ამოვიდა. ეს ახალგაზრდები თავისუფლების მოყვარენი არიან და მათი მთავარი მოთხოვნა თავისუფალი არჩევნებია!
ჩვენ, ყველანი, ვამბობთ, თავისუფალი, სამართლიანი არჩევნები გვინდაო და ამის გამო გვდევნიან! თავისუფალი და სამართლიანი არჩევნები მხოლოდ მე კი არა, ბურჯანაძესაც უნდა, კუკავასაც, „ევროპულ საქართველოსაც“ და სხვებსაც, ანუ ჩვენი მიზანია, რომ ძალაუფლება ხალხს დავუბრუნოთ და მერე ხალხმა გადაწყვიტოს, პარლამენტში რამდენი პარტია უნდა შევიდეს!
_ თავისუფალი არჩევნების მოთხოვნა გასაგებია და იმასაც ვხვდებით, რომ ყველაფერი ეს ნერვების ომია, მაგრამ, ვთქვათ, ხელისუფლებამ რამე გამოსავალი მოიფიქრა, _ პლებისციტი დანიშნა, ანუ სტატუს-კვო გაზაფხულამდე შეინარჩუნა და მხოლოდ გაზაფხულზე დააკმაყოფილა ოპოზიციის მოთხოვნა, მაგრამ მაშინ ვადამდელის დანიშვნას რამე აზრი ექნება?
_ ჯერ ერთი, ხელისუფლება გაზაფხულამდე ვერ გაუძლებს.
მეორეც, ვერავინ შეძლებს, რომ საზოგადოებაში ნიჰილიზმი დათესოს.
_ უკაცრავად, ნიჰილიზმი რა შუაშია?
_ ოპოზიციამ საერთოდ რომ აღარ ამოიღოს ხმა, გამორიცხულია, ეს პროცესი გაჩერდეს, ამიტომ მნიშვნელობა არ აქვს, ხელისუფლება დათმობაზე როდის წამოვა.
დიახ, ყველაფერი ეს „ნერვების ომია“ და ჩვენ ბრძოლას ვაპირებთ.
_ ვინ „თქვენ“, ოპოზიცია?
_ არა მარტო.
_ აბა, კიდევ ვინ?
_ სამოქალო აქტივისტები და ხალხი. ეს არც მხოლოდ პოლიტიკოსების ბრძოლაა და არც _ პარტიული! ეს ჩვენი სამშობლოს მომავლისთვის ბრძოლაა, ანუ ჩვენ იმისთვის არ ვიბრძვით, რომ ესენი წავიდნენ და ხელისუფლებაში ჩვენ მოვიდეთ.
სხვათა შორის, თავის დროზე, სამართლიანი იყო პროკურორის გადადგომის მოთხოვნა, მაგრამ ეს ბრძოლა იმ ბრძოლისგანაც განსხვავდება, რადგან ეს ბრძოლა სამართლიან არჩევნებს, ანუ იმას ეხება, რომ ყველა თანაბარ პირობებში იყოს!
დღეს ბიძინა ივანიშვილს ხელისუფლება უზურპირებული აქვს და ამბობს, არჩევნებით არ წავალ, თქვენზე უნდა ვიძალადო და თავისუფალ არჩევნებს არ მოგცემთო. სწორედ ამიტომ ის, ვინც ამ პროცესებს გაემიჯნება, პოლიტიკურ კარიერას დაამთავრებს!
_ ასე რატომ გგონიათ?
_ იმიტომ მგონია, რომ ხალხი ყველაფერს ხედავს!
მოკლედ, ჩვენ სამართლიანი არჩევნები გვინდა და ეს ყოველდღიური ბრძოლით მიიღწევა. ჩვენ, პოლიტიკოსებს, მეტი რა შესაძლებლობა გვაქვს, გარდა იმისა, რომ საჯარო პროტესტი გამოვხატოთ?
მოქალაქეები, რომლებიც „ფეისბუქში“ სხედან და რაღაც პოსტებს არაკუნებენ, ჯობია, გარეთ გამობრძანდნენ! ეს მხოლოდ ხაბეიშვილის ან რომელიმე პოლიტიკოსის ბრძოლა არაა, ეს არის ბრძოლა თავისუფლებისთვის!
ჩვენ ამ ბრძოლაში ან გავიმარჯვებთ და უზურპატორ ივანიშვილს ხელისუფლებას გამოვტაცებთ, რაც იმას გულისხმობს, რომ სამართლიანი არჩევნები ჩატარდება, ან არადა, მონობაში ვიცხოვრებთ! პირადად მე ქართველ ხალხზე ისეთი წარმოდგენა არ მაქვს, რომ მონობაში ცხოვრება უნდა!
_ ლევან, თუ საერთაშორისო თანამეგობრობა მკვეთრ განცხადებებს არ გააკეთებს, დარწმუნებული ხართ, რომ ხელისუფლება ოპოზიციისა და საზოგადოების პროტესტს ანგარიშს გაუწევს?
_ მეტი მკვეთრი განცხადება რაღა უნდა იყოს? საერთაშორისო თანამეგობრობამ პირდაპირ თქვა, ნდობა იკარგება და ხელისუფლებამ ხალხი მოატყუაო.
_ ეს დიპლომატიური ნათქვამია, რომელსაც „ოცნება“, როგორც ჩანს, არაფრად აგდებს.
_ დიპლომატები მეტს არ იტყვიან. ივანიშვილთან შეხვედრის შემდეგ ევროკომისიის ხელმძღვანელმა პირდაპირ თქვა, ნდობა დაკარგულია და ივანიშვილის სიტყვას ფასი აღარ აქვსო და მეტი რაღა თქვას? დიპლომატი დედის გინებას ხომ ვერ დაიწყებს?
საერთოდ, სხვის ოჯახში ჩარევა არავის უყვარს, ანუ თუ საკუთარი ოჯახის სიწმინდეს თავად არ დაიცავ, მეზობელი არ შემოგივარდება და არ გეტყვის, გინდა თუ არა, დაიცავიო.
ჩხუბში რომ მიდიხართ, რაც უნდა ბევრი ძმაკაცი გყავდეთ, უკაცრავად და თუ ჩაისვრით, ძმაკაცებიც არ გაიგიჟებენ თავს, გინდა თუ არა, უნდა ვიჩხუბოთო, მაგრამ თუ თქვენ გულიანად და ბრძოლისუნარიანად იქნებით, თქვენი უტრა…ო ძმაკაციც იძულებული გახდება, ჩხუბში გამოგყვეთ! ხომ ხვდებით, რაც ხდება?
_ დიახ, ვხვდები, მაგრამ თუ ხელისუფლება ავტორიტარიზმისკენ მიდის, ამ ჩხუბს აზრი მაინც ექნება?
_ დიახ, ხელისუფლება ავტორიტარიზმისკენ მიდის.
ისე, საერთაშორისო მედიას გადახედეთ და ნახეთ, რა განცხადებები კეთდება. ჩვენ გვინდა, რომ ჩვენი ოჯახური პრობლემა სხვამ გადაწყვიტოს, მაგრამ ასე არ გამოვა. თუ ამერიკელი დაინახავს, რომ ჩვენი ხელისუფლება, ბოდიში და, თავზე ისაქმავს და ჩვენ ხმას არ ვიღებთ, ჩვენთან მეგობრობა აღარ ენდომება.
_ რატომ?
_ იმიტომ, რომ ერთი ადგილი ჯერ თვითონვე უნდა გავანძრიოთ!
_ კი ბატონო, საჯდომს ვანძრევთ, მაგრამ ყველაფერ ამას დასავლეთისგან ადეკვატური რეაქცია ხომ უნდა მოყვეს? ანუ ხომ არ ელოდებით, რომ ივანიშვილს სანქციებს დაუწესებენ?
_ დიახ, ივანიშვილს სანქციები ნამდვილად ემუქრება, მათ შორის, ქონებასთან დაკავშირებით! ამიტომ ახლა მას ყველაზე ძალიან ქვეყნის ბედი კი არა, ის ანერვიულებს, რომ მის წინააღმდეგ შეიძლება, სანქცია სანქციაზე დაწესდეს, მათ შორის, ბიტკოინებზე.
სხვათა შორის, ფულის გათეთრებასთან დაკავშირებით საერთაშორისო გამოძიება უკვე მიმდინარეობს. მოკლედ, ივანიშვილს უამრავი სამართლებრივი პრობლემა აქვს და, რა თქმა უნდა, სანქციების შესაძლებლობა არსებობს, მაგრამ სანქციები რომც დაწესდეს, ჩვენი ბრძოლა მაინც აუცილებელია, თან მხოლოდ პოლიტიკურმა პარტიებმა კი არა, საზოგადოებამაც უნდა იბრძოლოს, რადგან კიდევ ვიმეორებ: ეს პარტიული ბრძოლა არაა.
ისე, პირადად მე პოლიტიკაში კი არ დავბადებულვარ _ მე ჩემი ქვეყნის პატრიოტი და ერთი რიგითი აქტივისტი ვარ, რომელიც ყოველდღიურ რეჟიმსა და იმ შესაძლებლობების ფარგლებში, რაც მაქვს, ამ ხელისუფლებას ვამხელ! ეს ყველა მოქალაქის ვალია!
შეიძლება, ვინმეს არ მოვწონვარ, მაგრამ გამოვიდეს და თავისუფალი არჩევნები მოითხოვოს და მერე მას მისცეს ხმა, ვინც მოსწონს!
_ ლევან, წეღან „ვარდების რევოლუცია“ ვახსენეთ და ისე ხომ არ მოხდება, როგორც 2003 წლის ნოემბერში _ ოპოზიციამ ივანიშვილს ერთგვარი გარანტიები მისცეს და მთელი ეს ბაკქანალია ამით დასრულდეს, ანუ გარანტიების სანაცვლოდ ივანიშვილმა ოპოზიციის მოთხოვნები დააკმაყოფლოს?
_ ერთ რამეზე უნდა შევთანხმდეთ: თუ ვინმე ამ გარანტიებს გასცემს, ეს ქართველი ხალხის ღალატი იქნება, რასაც იგი არავის აპატიებს!
_ ანუ ივანიშვილს გადარჩენის შანსი არ აქვს?
_ აქვს.
_ ეს როგორ?
_ თუ გონს ოდნავ მაინც მოეგება და პროცესებს ჩაოშორდება, ექნება შესაძლებლობა, რომ ქართველმა ხალხმა, მინიმუმ, მის დაპატიმრებაზე უარი თქვას!
რაც შეეხება მოპარულის უკან დაბრუნებას, ამაზე საერთაშორისო მსჯელობა იქნება, თუმცა მას შეუძლია, პოლიტიკური გარანტიები მიიღოს, რომ თუ სამართლიან არჩევნებს ჩაატარებს, ციხეში არ წავა!
იმასაც გეტყვით, რომ ივანიშვილის ციხეში ყოფნა საერთოდ არ მაინტერესებს, თუმცა ის ქონება, რომელიც მან ქართველი ხალხისგან მიიტაცა, უნდა დააბრუნოს და ეს ნამდვილად მაინტერესებს!
_ ლევან, ქონების უკან დაბრუნების შემთხვევაში ციხეში მარტო ივანიშვილი არ უნდა წავიდეს, თუ ეს მთელ მის გარემოცვასაც ეხება?
_ ივანიშვილმა პოლიტიკური გადაწყვეტილება უნდა მიიღოს.
_ ანუ?
_ თუ ფიქრობს, რომ არაფერი მიუტაცებია, ეს უნდა დაამტკიცოს, მაგრამ ხაბეიშვილის, სააკაშვილის ან უსუფაშვილის სასამართლოსა თუ პროკურატურასთან კი არა, უცხოელ მოსამართლეებსა და იმ პროკურატურასთან, რომელიც იუსტიციის სამინისტროს საერთოდ გამოეყოფა და ყველაზე მაღალი ნდობა ექნება, თორემ თუ ამ ბრძოლაში შემოვა, ანუ ძალადობას ვგულისხმობ, ძალიან მძიმედ დაამთავრებს!
მოკლედ, ივანიშვილს ხელშეუხებლობის გარანტიას ვერავინ მისცემს და მისი გარანტია თავისუფალი სასამართლო იქნება!
_ ისე, ლევან, თქვენი აზრით, ოპოზიცია ერთიანობას შეინარჩუნებს თუ ამ გაერთიანებიდან ივანიშვილი რომელიმეს გადმობირებას მოახერხებს?
_ ხელისუფლება ამას, რა თქმა უნდა, ეცდება, თუმცა ნებისმიერი მოთამაშე, რომელიც იტყვის, რომ ამ პროცესიდან გადის, საზოგადოებისთვის ყველაფერი გასაგები იქნება. მემარცხენე და მემარჯვენე ოპოზიციას თავისუფალი არჩევნების მოთხოვნა აიერთიანებს და თუ პოლიტიკოსი თავისუფალ არჩევანს არ ითხოვს და ამბობს, ეს პროცესი არ მომწონსო, გასაგებია, რომ ის ივანიშვილის ისეთივე მონა იქნება, როგორიც თალაკვაძე, ვოლსკი თუ მდინარაძეა!
თავისუფალი არჩევნების მოთხოვნაში ყველანი უნდა გავერთიანდეთ, ამის იქით, კი ბატონო, ვიყოთ ოპონენტები!
_ სიტუაციის უფრო მეტად ასაფეთქებლად საჭირო ხომ არაა, რომ მიხეილ სააკაშვილი საქართველოში ჩამოვიდეს? სხვათა შორის, „ნაცმოძრაობის“ ცალკეული აქტივისტები ამ მოთხოვნით, როგორც ვიცი, ხელმოწერებსაც აგროვებენ.
_ ჩემი აზრი თუ გაინტერესებთ, პროცესებისთვის კარგი იქნებოდა, მიშა აქ რომ იყოს, მაგრამ სხვა რეალობაა. ივანიშვილს ყველაზე მეტად სააკაშვილის ეშინია და ყველაფერში ის ელანდება.
მოკლედ, ამ ქვეყანაში სააკაშვილი ერთადერთი თუ არა, ერთ-ერთი მძიმეწონიანი პოლიტიკური ფიგურაა და, შესაბამისად, ამ პროცესებში მიშას ჩართვა ივანიშვილის დასასრულის დასაწყისს ნიშნავს. ამიტომ ლოგიკურია, რომ მისი საქართველოში ყოფნა პროცესებს დააჩქარებს.
_ ჰოდა, ხომ არ უნდა ველოდოთ, რომ უცებ ჩამოვიდეს?
_ ყველამ კარგად ვიცით, რომ მიშა საკმაოდ არაპროგნოზირებადი და ექსცენტრიკული პოლიტიკოსია, ქარიზმაც აქვს, თუმცა არ ვიცი, როგორ გადაწყვეტილებას მიიღებს. ასე რომ, მოვლენათა განვითარებას დაველოდოთ.

გიორგი აბაშიძე