შინაგან საქმეთა სამინისტროს კრიმინალური პოლიციის ყოფილმა უფროსმა, ირაკლი ფირცხალავამ, რომელიც სასჯელს ე. წ. მატროსოვის ციხეში იხდის, „ციანიდის საქმის“ მთავარ მოწმესთან დაკავშირებით სკანდალური განცხადება გააკეთა: პროკურატურის ოქროს მოწმე ირაკლი მამალაძე „კუდის“ აგენტი, ჯერ კიდევ, წინა ხელისუფლების დროს გახდა და მისი მეტსახელია „პრესა“. ფირცხალავას განცხადებით, აგენტ პროვოკატორს „კუდი“ ჟურნალისტების, ლგბტ პირებისა და სასულიერო პირების წინააღმდეგ იყენებდა.

„ციანიდის საქმის“ არსებითი განხილვა თბილისის საქალაქო სასამართლოში ამ კვირაშიც გაგრძელდება. ბოლო სხდომაზე სასამართლომ ბრალდების მოწმე ირაკლი მამალაძეს მოუსმინა.

„ქრონიკა+“ მამა გიორგის ადვოკატს, მიხეილ რამიშვილს ესაუბრა:

_ მიშა, გუშინდელი სასამართლო პროცესის შემდეგ, სადაც ბრალდების მთავარი მოწმე ირაკლი მამალაძე დაიკითხა, სხვადასხვაგვარი ინფორმაცია გავრცელდა: პროკურატურა აცხადებს, რომ ირაკლი მამალაძემ დაადასტურა მამა გიორგის ბრალეულობა, თქვენ ამბობთ, რომ ბრალდება ხერხემალში გადატყდა.

_ პროკურატურის ინფორმაციებს რომ დავეყრდნოთ, მოგეხსენებათ, დაკავების დღიდან როგორ ინფორმაციებსაც ავრცელებდნენ, მსხვერპლი ხან მაღალი სასულიერო პირი იყო, შემდეგ შორენაზე გადავიდნენ, მერე _ ვიდეოჩანაწერების გასაჯაროებაზე… რასაც ისინი აცხადებენ, აბსოლუტურად ტყუილია ფაქტია. რა ინფორმაციაც ვნახე, თურმე, მამა გიორგი ადამიანის მოსაკლავად მიდიოდა, ანუ უკვე სუბიექტიც არ არსებობს მათი შეფასებით, იმიტომ, რომ ირაკლი მამალაძეს პასუხი ყველა კითხვაზე, _ ვინ იყო ეს სუბიექტი, უნდა მომხდარიყო თუ არა მკვლელობა? იყო ასეთი: „მე მგონი“, „მე ასე ვგრძნობდი“, „მე ასე ვიფიქრე“. ანუ  ადვოკატებმა რომ დავუსვით შეკითხვა, _ აი, ეს რისთვის იყო და რატომ აკეთებდი ამ ყველაფერს? სულ ასეთი პასუხი ჰქონდა: „მე ასე ვფიქრობდი“. კითხვაც კი დავუსვი, _ ვინ იყო ის პირი, ვისგანაც ციანიდი უნდა შეგეძინა-მეთქი? _ ეგეთი არ არსებობსო. _ აბა, რატომ ამბობ ამას-მეთქი? _ არა, უბრალოდ, აპირებდაო. _ დარწმუნებული ხარ, რომ აპირებდა-მეთქი? _ არ ვიცი, მაგრამ მე ასე ვიფიქრეო. გესმით?! _ მთელი 8 საათი იყო მსგავსი პასუხები. პროკურატურა სულ პროტესტს აცხადებდა. მინდა გითხრათ, რომ მოსამართლემ საკმაოდ ობიექტურად იმოქმედა, ანუ სრულყოფილად მოგვცა დაცვის განხორციელების საშუალება.

_ მიშა, ფიქრობთ თუ არა, რომ ირაკლი მამალაძე დაშანტაჟებულია და ის იძულებული იყო, ამ სცენარში მონაწილეობა მიეღო?

_ არ ვიცი, დაშანტაჟებაზე უფრო დაინტერესებას ვფიქრობ…

_ და რას გულისხმობთ?

_ უფრო თავისი ინტერესი ჰქონდა ამ ყველაფერში, ასეთი ფორმულირებით წაიყვანა ეს ყველაფერი. მაშინ ასეთი მომენტია: სადაც დაინტერესებაა, შეიძლება, შანტაჟიდან მოდიოდეს და ინტერესიდან შანტაჟიც მოდიოდეს. ასე კონკრეტულად ნამდვილად ვერ გეტყვით, მაგრამ… ყოველი შემთხვევისთვის, თუ მის სატელევიზიო გამოსვლებს გავითვალისწინებთ, როგორი რიხით ამბობდა, რომ საქართველო გადავარჩინეო, შემდეგ უკვე ცოტა სხვაგვარი პოზიცია იყო, მერე პირად შეურაცხყოფებზე გადმოდიოდა. ტელედებატებში თუ ტელეგადაცემებში კარგად იცით, როგორ იქცეოდა ჩემი მისამართით _ ხან რას მიწოდებდა და ხან _ რას…

_ მამა გიორგის როგორი რეაქცია ჰქონდა, როცა ირაკლი მამალაძის დაკითხვას უსმენდა და დაუსვა თუ არა მას კითხვები?

_ შეკითხვები დაუსვა და შემიძლია გითხრათ, რომ როგორც სასულიერო პირი აბსოლუტურად შემწყნარებელი და მშვიდია. ჩემი შეფასებით, მამა გიორგი არის ინტელექტუალი, განათლებული ადამიანი, აბსოლუტურად ყველანაირად რომ არჩევს გარემოსაც, პირებსაც, სუბიექტებსაც, საკმაოდ მშვიდად იყო. 8 საათი მიდიოდა სასამართლო პროცესი და ირაკლი მამალაძეს შეკითხვებს უსვამდა აგრესიის გარეშე, ძალიან თბილად, როგორც სასულიერო პირს შეეფერება, ახსენებდა და კითხვებში იყო მათი ნათესაური ურთიერთობა და ამ რაკურსით უსვამდა კითხვებს, _ რისგან იყო ეს განპირობებული და რატომ მიიჩნია თავისი შინაგანი შეგრძნებით, რომ ვითომ პატრიარქის მოკვლას აპირებდა? რაზეც მე შემიძლია გითხრათ, რომ პასუხი იყო, მხოლოდ და მხოლოდ, ზოგადი ფრაზა, _ მამალაძე რაღაცაზე ამბობდა: „არ მახსოვს“, რაღაცაზე, _ „არ ვიცი“, რაღაცაზე, _ „შეიძლება“, ხან ამბობდა, _ „მე იმიტომ წავედი პროკურატურაში, რომ დარწმუნებული ვიყავი“, რაღაც მომენტში ამბობდა, რომ „დასაწყისშივე დარწმუნებული იყო“, მერე ამბობდა, _ „ბოლოში დავრწმუნდიო“. მერე როცა კითხვის ფორმატი იცვლებოდა, ამბობდა, „ბოლოში დავრწმუნდი, თავიდან ეჭვი მეპარებოდაო“. ბრალდების მოწმის პოზიცია ყველანაირად არამყარი იყო. მეც შემიძლია ვთქვა, რომ შეიძლება გავფრინდე, ვთქვათ, სადღაც, ან რომელიღაც პლანეტაზე, ხომ?.. აი, რით? როგორ? რანაირად? ვისთან ერთად? _ კითხვებზე კონკრეტული პასუხი ხომ უნდა გავცე? კითხვები იყო, _ ვინ არის დაპირისპირებული მხარე? ამბობს, _ არ ვიცი… ამ დროს, ყველას კარგად გვახსოვს, ახსენებდა, რომ იყო დაპირისპირება, მტრობა და ამდაგვარი, მაგრამ, რატომღაც, გუშინ ყველაფერი დაავიწყდა…

_ რა იყო მთავარი კითხვა, რაც მამა გიორგიმ ირაკლი მამალაძეს დაუსვა? თქვენი, როგორც ადვოკატის შეხედულება როგორია?

_ ჩემი შეხედულებით, ვისგან და რატომ წამოვიდა ეს და რატომ გაუჩნდა მას ეჭვი, რომ ვითომდა დეკანოზი გიორგი მამალაძე აპირებდა პატრიარქის, ანუ ადამიანის სიცოცხლის მოსპობას, ამაზე შემდეგი პასუხი ჰქონდა: „არ ვიცი, მე ასე ვიფიქრე“. ანუ ხომ უნდა დაასაბუთო, ადამიანი, რომელიც აპირებს რაიმე დანაშაულის ჩადენას, დეტალურად _ როგორ? რატომ? რანაირად? რისი გულისთვის?.. და იცით, როგორი რაღაცაა? იმ კითხვებზე, ვინ იყო ის პიროვნება, ვისგანაც უნდა შეესყიდა ციანიდი და ვისაც უხსენებდა მამა გიორგის ჩანაწერებში, რომ იმან ეს მითხრა… ისეთი შთაბეჭდილება დარჩა… კი არ დარჩა, ეს არ იყო არანაირი ეჭვის საფუძველი, რომ ვითომდა დანაშაულს ჩაიდენდა მამა გიორგი, პირიქით, მამალაძის მხრიდან ეს იყო სპეციალური პროვოცირება, რომ ინფორმაცია მიეღო… აი, ხომ იცით, ორი ადამიანი რომ საუბრობს და შეიძლება ტრაბახის ფორმატში რაღაცა თქვა, მაგრამ რაც არ უნდა ტრაბახა იყოს ადამიანი, ეს ყველაფერი არგუმენტირებულად უნდა გქონდეს დასაბუთებული. რომ შენ მე რაღაცა მთხოვო, შეგეკითხები, _ რისთვის გინდა ეს? რომ მითხრა, რაღაცა მაშოვნინე, შეგეკითხები, _ რისთვის გინდა? კითხვაც კი არ დაუსვამს და მთელი სიტუაცია როგორი არის იცით, რომ ამ თემატიკასთან მიმართებით უფრო მეტად ირაკლი მამალაძე აქტიურობს.

_ მიშა, ჩანაწერებში არის თუ არა საუბარი რაიმე ინტიმურ თემებზე, მაგალითად, გავრცელდა ინფორმაცია, რომ მამა გიორგი საუბრობს მონაზვნისა და მღვდელმთავრის რაღაც პირად ურთიერთობებზე…

_ არა, აქ არის ზოგადი საუბარი პრეცედენტებზე, როდესაც, ვთქვათ, ადამიანს ცუდ რაღაცას მოუწყობენ, მისი პიროვნების დისკრედიტაცია უნდათ. ანალოგიურად ხდებოდა წინა საუკუნეებშიც, _ როდესაც კარგის გაფუჭება უნდათ, ყველა საუკუნეში მოქმედებდა ამგვარი წესი, სულ ესაა კონტექსტი, თორემ ასე დეტალურად ვის ვისთან რა ინტიმური კავშირი აქვს, ან ამდაგვარი რაღაც, არ არის… მაგის დასტურიც მთავარი პროკურორის განცხადებაა, რომელმაც განმარტა, რომ არანაირი ინტიმური ფირი საქმეში არ დევს, არც პირადი ხასიათის ინფორმაცია.

_ მაშინ რატომ დახურეს პროცესი?

_ პირველი: არ უნდათ, რომ საზოგადოებამ აბსურდულ კითხვებზე მოისმინოს პასუხი. საზოგადოება უკვე პირდაპირ დარწმუნდება, რომ „ციანიდის საქმე“ არანაირი დანაშაულის შემცველი არ არის, სპეციალურად დადგმულია, გარკვეული მიზნების მისაღწევად და მე ყოველთვის ვამბობდი: აქ არ არის საპატრიარქოს სისტემა, ჩართულია გარე მტრებიც. ვის რა მიზანი და მოტივაცია აქვს? _ რომ დაანგრიოს და ნგრევის პირას მიიყვანოს ის, რის შენებასაც საუკუნეები დასჭირდა _ ეს არის ჩვენი რწმენა და ჩვენი ეკლესია.  ყველასთვის ცნობილია ერთი რამე, _ არც ერთი მოწმე სასამართლო პროცესზე უკანა შემოსასვლელებიდან არ მოჰყავთ, საიდანაც პატიმრები შემოჰყავთ. ირაკლი მამალაძე კი უკანა შემოსასვლელიდან შემოიყვანეს, რომ ხალხთან შეხება არ ჰქონოდა. ძალიან ბევრი კითხვა აქვთ ჩემს კოლეგებსაც. ეს ისეთი კითხვებია, რომელზეც პასუხები არა მარტო მე მაინტერესებს საქმიდან გამომდინარე, არამედ ხალხსაც აინტერესებს… და ზუსტად იმიტომ არის დახურული, რომ დაზარალებული ქალბატონი შორენა თეთრუაშვილი და ყველა ის სასულიერო პირი, დღეიდან უკვე, 119 ადამიანი იქნება დასაკითხი. არ უნდათ, რომ ამ კითხვებზე პასუხის გაცემას საზოგადოებამ მოუსმინოს. პრინციპი ერთადერთია, _ ამ საქმეს არ აქვს პერსპექტივა იმ თვალსაზრისით, რომ წაყენებული ბრალდება უტყუარ მტკიცებულებებზე დაფუძნებული არ არის.

_ ფიქრობს თუ არა მამა გიორგი, რომ მისი დაკავება და მთელი ეს სპექტაკლი მეუფე დიმიტრის წინააღმდეგ მიმართული ქმედება იყო?

_ ამ შემთხვევაში, შემიძლია გითხრათ, რომ, მისი საქმიანობიდან გამომდინარე, ის პასუხისმგებელი იყო, მხოლოდ და მხოლოდ, პატრიარქთან. გარკვეულწილად დაძაბულობა იყო იმ თვალსაზრისით, რომ შეიძლება ინტერესი ჰქონოდათ, მაგრამ ზუსტად მეუფე დიმიტრის მიმართ თუ რომელიმე მეუფის მიმართ, ასე კონკრეტულად ნამდვილად ვერ გეტყვით, იმიტომ, რომ მთლიანობაში სურათი ნათელია და ეს სურათი საზოგადოებაში გამოაქვთ. როდესაც ლაპარაკია, რომ არსებობენ დაპირისპირებული ჯგუფები (თვითონ ამბობენ, დღეს ვინც თავისუფლებაზეა), ეტყობა, რაღაც აზრთა სხვადასხვაობას ვიღაცა დაპირისპირებად და მტრობად ნათლავს…

_ სად წავიდა ის დოკუმენტები, რომელიც მამა გიორგის ჰქონდა  საპატრიარქოს ქონებებთან დაკავშირებით? არის თუ არა დაცული, თუკი მან ყველაფერი პატრიარქს გაუგზავნა?

_ მამა გიორგის უნდოდა, ეს დოკუმენტაცია წმინდა სინოდის სხდომაზე განხილულიყო და, შესაბამისად, გარკვეულ პირებს, მისი თქმით, მამა დავით ჭინჭარაულს, გადასცა, მაგრამ არ გამოვრიცხავ, შესაძლებელია, არსებობდნენ კიდეც მეორე პირები, მაგის დროც მოვა.

_ დავით ჭინჭარაული მამა გიორგის მოწინააღმდეგედ განიხილება, მაგალითად, თორნიკე მამალაძემ პირდაპირ განაცხადა, რომ პატრიარქთან შეხვედრაზე ის აქტიურად აჩერებდა,  უნდოდა, პატრიარქისთვის არ მიეწოდებინა ინფორმაცია. რატომ არჩია მამა გიორგიმ დავით ჭინჭარაული? რატომ არ გადასცა დოკუმენტები  პირადად პატრიარქს? თუ ამის შესაძლებლობა არ მიეცა?

_ როგორც ვიცი, პატრიარქმა დოკუმენტების არსებობა იცოდა, ყოველი შემთხვევისთვის, დოკუმენტაცია უნდა გადაეცა პატრიარქისთვის. მანდ ხომ იცით, იერარქიულად ყველას თავისი ფუნქცია აქვს. ახლა რაც შეეხება დავით ჭინჭარაულს, მას, გარკვეკულწილად, რაღაც ინტერესი შეიძლებოდა ჰქონოდა, არც უარვყოფ და არც ვამტკიცებ, იმიტომ, რომ ამ შეხვედრას არ ვესწრებოდი. შემიძლია გითხრათ, რომ ოჯახის წევრები ითხოვდნენ, ადვოკატებიც ყოფილიყვნენ ამ შეხვედრაზე. ყველაფერი გააკეთეს, ყველანაირი მიზეზი მოძებნეს, რომ ვთქვათ, მე არ ვყოფილიყავი. უკვე ვხედავ, რომ თორნიკე სიმართლეს ამბობს, თორნიკე შეიძლება დავით ჭინჭარაულმა გააჩერა, მაგრამ მე ნამდვილად ვერ გამაჩერებდა…

_ დავით ჭინჭარაული ის პირია, რომელიც 27 ივნისს უნდა შევიდეს მამა გიორგისთან, პატრიარქის დავალებით თუ თხოვნით. ელოდებით, რომ მამა გიორგის მიერ მიწოდებულ ინფორმაციას ის უცვლელად მიიტანს პატრიარქამდე?

_ არ ვიცი, რა ინფორმაციაა. საქმესთან დაკავშირებით თუ რაიმე ინფორმაცია აინტერესებს, უმჯობესია, ჩემთან მოვიდეს, ან მე მიმიღონ მათ.

_ მე მგონი, საქმე დეტალურად იციან. სინოდის წევრები საუბარში აცხადებდნენ, რომ ისინი იცნობენ ჩანაწერებს, პროკურორი და სხვა ყველა დანარჩენი რიგში იდგნენ საპატრიარქოში მიღებაზე…

_ ჰოდა, მაგას ვამბობ, კანონი ყველასთვის კანონია, აქ არ არსებობს არც სასულიერო პირების პრიორიტეტი, არც მთავრობის პრიორიტეტი და არც დეპუტატების პრიორიტეტი, იმიტომ, რომ სისხლის სამართლის საქმის საპროცესო კოდექსის თანახმად, მხარეებს წარმოადგენს ბრალდებისა და დაცვის მხარე. მაგრამ არც გამიკვირდება, მაგათმა რომ იცოდნენ, მით უმეტეს, თუ კარგად იცნობენ საქმეს, კარგად უნდა ჩახედონ, საერთოდ, ეს საქმე თუ არის ბუნებაში რეალურად არსებული.

_ მამა გიორგიმ გასულ კვირას ძალიან საყურადღებო და სკანდალური განცხადება გააკეთა, რომ ეს საქმე შეკერა სუს-ის მაღალჩინოსანმა სოსო გოგაშვილმა მეუფე იაკობთან და შორენა თეთრუაშვილთან ერთად. რამ მისცა ამის თქმის საფუძველი? ჰქონდა კონკრეტული ინფორმაცია?

_ ამის თაობაზე შემიძლია გითხრათ, რომ თუ ჩვენ საქმის მასალებიდან გამოვალთ, ჯერ პირველი: გარკვეული მოქმედებები, იგივე ვიდეოჩაწერის პრინციპები, არის სუს-ის მიერ ოფიციალურად განხორციელებული, მოსამართლის განჩინების თაობაზე. ახლა ეგ როგორ მოხდა, რა დარღვევები აქვს პროცესუალურად, ამაზე სასამართლოში ვიმსჯელებთ…

_ მიუხედავად იმისა, რომ ჩანაწერში რეალურად ხელმოსაკიდი არაფერია?..

_ აბსოლუტურად არაფერი არ არის. მოგეხსენებათ, აეროპორტში უსაფრთხოების სამსახურია, რომელსაც თავისი ფუნქცია აქვს. მიუხედავად დიდი ბრძოლისა, დღემდე ვერ მოვიპოვეთ და ვერც დაურთეს საქმეს აეროპორტის სათვალთვალო კამერის ჩანაწერები: როგორ მოხდა ჩანთის ამოღება და დალუქვა, ანუ ეს გამქრალია, ბუნებაში, მე მგონი, არ არსებობს, ყველაფერს კადრულობენ… მან ეს ყველაფერი პირდაპირ დაუკავშირა მეუფე იაკობსა და სოსო გოგაშვილს… როგორც ვატყობ, მამა გიორგის ძალიან ბევრი რამ ექნება სათქმელი.

_ მიშა, ჩაგეკითხები, კონკრეტული  ინფორმაცია აქვს და დროს ელოდება, რომ ამ ინფორმაციას გაამჟღავნებს? დასახელდებიან თუ არა სხვა მაღალჩინოსნები?

_ ეს დამოკიდებული იქნება, როგორ წავა მოწმეების დაკითხვის პროცესი და რა კითხვებზე რა პასუხს გასცემენ ის ადამიანები, რომლებიც ამ შემთხვევაში წარმოადგენენ ე. წ. მტკიცებულებებს, რომლითაც უნდათ, მამა გიორგის ბრალი გაამყარონ. აი, მერე უკვე გამოჩნდება ყველაფერი, რა პოზიციაზეც იქნება მამა გიორგი…

_ თანმიმდევრობას მივყვეთ: მამა გიორგი წავიდა აეროპორტში და მერე რა ხდება?

_ ჩვეულებრივად მიდის აეროპორტში, ბარგს აბარებს, სადაზღვევო კონტროლს გადის, ჯდება მინიავტობუსში, რომ თვითმფრინავამდე მივიდეს, იქ ვიღაც გაურკვეველი პირები სხედან (არ იცის ზეპირად, ვინ არიან, ჩათვალა, რომ _ ჩვეულებრივი მგზავრები), კარი იხურება და ეგრევე ერთი ყელში უჭერს, მეორე _ ხელებს უკავებს ისე, რომ არც არაფერს ეუბნებიან, გაჰყავთ აეროპორტიდან…

_ იმავე მანქანით?

_ იმავე მანქანით წაიყვანეს.

_ იცის ის პირები, ვინ არიან? სახელები და გვარები, ამოცნობა შეუძლია?

_ არა, სახელებსა და გვარებს ვერ გეტყვით, მაგრამ პირველივე რაც  უთხრეს, _ ხომ იცი, რისთვის დაგაკავეთ? შენ გინდოდა პატრიარქის მოწამვლა. აი, ეს უთხრეს და წაიყვანეს…

_ სად წაიყვანეს?

_ პროკურატურაში…

_ და იყო თუ არა მასზე ზეწოლა, დანაშაული ეღიარებინა?

_ კი…

_ გზაში თუ პროკურატურაში უკვე?

_ გზაშიც და პროკურატურაშიც.

_ ბარგი როდის გამოჩნდა?

_ ბარგი მისი დაკავებიდან 9 საათის შემდეგ გამოჩნდა.

_ რა უცნაურია…

_ უცნაური კი არა, ეტყობა, მსჯელობდნენ, სად, როგორ, რანაირი ფორმით ჩაედოთ ეს ციანიდი ჩემოდანში! _ ჩემოდანში, რომლის გახსნაც და დაკეტვაც თავისუფლად შეუძლია ნებისმიერ პირს…

_ არანაირ სიძნელეს არ წარმოადგენს… და კადრებს რატომ არ განახებენ, აეროპორტში ძალიან ბევრი კამერაა, სადაც, შესვლაც და გამოსვლაც, ყველაფერი ფიქსირდება…

_ აეროპორტის ადმინისტრაციიდან ჯერ ჩანაწერები მოვითხოვეთ და იმათმა გადაგვამისამართეს, მერე სასამართლოს მივმართეთ. პირველი ინსტანცია ამბობდა, რომ ვერ ვხედავ ამის საჭიროებას, ვიდეომასალით რამე დასტურდებოდესო. აპელაციამ თქვა, რომ იქ შეიძლება მესამე პირებიც გამოჩნდნენო… იმდენად აბსურდული პასუხები იყო, რომ, შემიძლია გითხრათ, სასამართლოც და პროკურატურაც, ეტყობა, დასაწყისში, რაღაცა მეთოდით, ერთად მოქმედებდნენ თავის სუს-თან ერთად…

_ ედიშერ ქარჩავაზე მინდა გკითხოთ: საპატრიარქოს იურისტი სისხლის სამართლის საქმეზე, რომლის არსებობაც ჩვენ სულ ახლახან შევიტყეთ, უზენაესმა სასამართლომ გაამართლა. მესმის, რომ თქვენ ადვოკატი ხართ და კოლეგაზე შეიძლება, არ გინდოდეთ ლაპარაკი, მაგრამ ნიშნავს თუ არა ეს იმას, რომ მან წარმატებით შეასრულა თავისი როლი იმ შავი პიარის საქმეში, რასაც ადგილი ჰქონდა მამა გიორგის, მეუფე პეტრესა და მისი დამცველების წინააღმდეგ, სამაგიეროდ კი მან თავისუფლება მიიღო?

_ ედიშერ ქარჩავას არ გამოუვიდა შავი პიარის აგორება არც მამა გიორგის, არც მისი ადვოკატების წინააღმდეგ. ქარჩავას საქმის მასალებს არ ვიცნობ, აქედან გამომდინარე, ვერ ვიტყვი, საჩუქრი გაუკეთეს თუ სამართლიანად იმოქმედა უზანაესმა სასამართლომ. ფაქტია, ედიშერ ქარჩავა პირადად ჩემ მიმართ შავ პიარს აგორებდა: ხან რაღაც შეთქმულთა ჯგუფის წევრად მომიხსენიებდა, ხან აქეთ მიწოდებდა შავი პიარის ამგორებელს საპატრიარქოს წინააღმდეგ, ხან დაქირავებული ვიყავი, ხან მამაო მივუგზავნე, _ ენა გააჩუმე, თორემ, დაგამტვრევ და ა. შ. რამდენად გამოუვიდა, ფაქტი სახეზეა.

_ მიშა, ელოდებით თუ არა, რომ სასამართლო გაამართლებს მამა გიორგის? პირდაპირ გეუბნებით, რაღაც მეეჭვება, რადგან აქ ძალიან მკაფიოდ ჩანს სახელმწიფო უწყებების დაინტერესება.

_ სახელმწიფო უწყებების დაინტერესება ჩანს, მაგრამ ფაქტია, რომ ბოლო დროს ტონიც შეარბილეს. გიორგი ანდრიაძემ ერთხელ უკვე გააჟღერა: შეკერილი საქმეა და გამორიცხული არ არის, მამა გიორგის მიმართ გამამართლებელი განაჩენი გამოვიდესო. თუ, ვთქვათ, საქართველოში არ გამოვიდა, სტრასბურგი აუცილებლად გაამართლებსო… ეს იმას ნიშნავს, რომ ამ შემთხვევაში, როდესაც ასეთ განცხადებას აკეთებ, გარკვეულწილად, დამოუკიდებლად ვერ გააკეთებ. შეიძლება, თავისი წრე ჰყავს და იმათთან განიხილეს. ვინ არიან, რა არიან, ამას მომავალი გვაჩვენებს და არ მიყვარს არავისზე ჭორებით ლაპარაკი. ფაქტია, რომ ისე მყარად ვერ არიან ახლა, განტევების ვაცს ეძებენ, ვინ შეიძლება იყოს ამ შემთხვევაში…

_ პატრიარქის ჩანაწერშიც გამოჩნდა, რომ მისთვის ძალიან მოულოდნელი იყო მამა გიორგის დაპატიმრების ამბავი და მას მთლად პირდაპირ არ უთქვამს, რომ არ სჯერა, მაგრამ მაინც შინაარსი და კონტექსტი ის იყო, რომ არ სჯერა მამა გიორგის დანაშაულის.

_ ჩანაწერის შინაარსი არ ვიცი, მაგრამ როდესაც პატრიარქი გერმანიიდან ჩამობრძანდა, დაახლოებით 22 თუ 23 თებერვალი იყო, ნამდვილად არ მახსოვს ზუსტი რიცხვი, ჩემს კოლეგებთან ერთად პატრიარქთან ვიყავით ამ საკითხთან დაკავშირებით, დაახლოებით, 8 წუთი, მაქსიმუმ, 10 წუთი, _ ახალი ნაოპერაციები იყო და დიდი დრო არ წაგვირთმევია. საკმაოდ ისეთი საუბარი მოვისმინე პატრიარქისგან, _ მამა გიორგი ჯერ მოიკითხა, ისე როგორც მამა შვილისთვის იღწვის და საუბრობს. ძალიან კარგად მახსოვს, სადაც პატრიარქი ბრძანდებოდა, რამდენიმე მეტრის მოშორებით იდგა სასულიერო პირი, მერე გავიგეთ, რომ ეს ყოფილა მამა დავით ჭინჭარაული. გარკვეული საუბრის შემდეგ პატრიარქმა მითითება მისცა რაღაცის მოსატანად, ასე რომ ვთქვათ, ოთახიდან გაუშვა და დავრჩით მარტო ჩვენ. საკმაოდ გახსნილად ვისაუბრეთ. პატრიარქის პოზიციაც იყო, რომ ის მზად გახლდათ ყველაფრისთვის. გვეკითხებოდა, იურიდიულად რისი გაკეთება შეეძლო მამა გიორგისთვის. იმედია, ახლა ამაზე არ დაიწყებენ, რომ ეს არის სიცრუე. ჯერ ერთი, სიმართლეა. ახლა თუ თორნიკე ჩაწერეს ერთხელ და მამა გიორგის ოჯახის წევრებისა და პატრიარქის შეხვედრა,  გამორიცხული არ არის, რომ ჩვენი შეხვედრაც ჰქონდეთ ჩაწერილი და გაასაჯაროონ… დიახაც, გაუშვა დავით ჭინჭარაული და ჩვენ სამნი დავრჩით _ ზუსტად მაშინ მითხრა, რომ რა შემიძლია იურიდიულად, რა და როგორც სჯობს, ისე გავაკეთოთო… მოგვეფერა და სულ მამა გიორგიზე ლაპარაკობდა, _ ჩემთვის ეს წარმოუდგენელია, ვერასოდეს დავიჯერებ, რომ მამა გიორგის ჩემი მოკვლა უნდოდაო.

_ და ამის მერე თქვენი კომუნიკაცია პატრიარქთან უკვე გაძნელდა…

_ გაძნელდა კი არა, შეწყდა… შეწყდა! გაძნელდა კარგი სიტყვაა. მაგალითად, არ იცი ბობოყვათის ამბავი? (იცინის) ახლავე გეტყვი, _ რა რიცხვი იყო? წარმოიდგინეთ, წინა კვირა?! დაახლოებით ეგეთი რაღაცა, 9-ის ნახევარია, გარდაბანში ვარ და მირეკავს თორნიკე მამალაძე, _ პატრიარქი არის ბობოყვათში, დამირეკესო. გაცხადებული იყო, რომ ოჯახის წევრებს უნდათ პატრიარქთან შეხვედრა. დამირეკეს და მითხრეს, რომ ხვალე 11 საათზე პატრიარქთან ბობოყვათში შეხვედრაა და პატრიარქი გელოდებათო. ამ ბიჭმა მთხოვა, თუ შეგიძლია, რომ წამოხვიდეო. მე ვუთხარი, _ თორნიკე, კი წამოვალ, რომც არ შემომიშვან, იქ ვიქნები გარეთ და თუ ჩათვლის პატრიარქი საჭიროდ, რაზეა ლაპარაკი-მეთქი და თანხმობა მივეცი. ეს იყო საღამოს 9-ის ნახევარი. მანქანით ვერ წავიდოდი, გავიგე, მატარებელი არ დადის, ორთაჭალაში რომ ავტობუსები დადიან, ფეშენავტობუსებს რომ ეძახიან, 12 საათზე გადიოდა და ღამის 2 საათზე დავრეკე, გზაში რომ ვიყავი, გარდაბნიდან რომ მოვდიოდი, ბილეთი დავჯავშნე, რომ 2-ის ნახევარზე მოვალ და ავტობუსით წავალ. თორნიკეს შევატყობინე, რომ წამოვალ-მეთქი და იმან მითხრა, _ დილის 8 საათზე იქნება ჩვენთან და დაგხვდებიო. წამოვედი გარდაბნიდან, დროს ველოდები, 10 საათზე უკვე თბილისში ვიყავი, 12 გახდა და პირველის წუთები იყო დაწყებული, თორნიკე მირეკავს და მეუბნება, _ ახლა დამირეკეს, მამა დავით ჭინჭარაულმა შემომითვალა, რომ პატრიარქი შეუძლოდ გახდაო. მე ვუთხარი, _ რომელი ექიმი ბრძანდება მამა დავით ჭინჭარაული, რა იცის, ჯერ რით არის შეუძლოდ და რა იცის, რომ მეორე დღესაც შეუძლოდ იქნება-მეთქი (ღმერთმა დაგვიფაროს, კარგად იყოს ყოველთვის)? ჩემს ტელეფონს ხომ ისმენენ, მაგაზე ხომ ორი აზრი არ არის… ეტყობა, ეგ ინფორმაციები გადააწოდეს: ადვოკატი რამიშვილი აპირებს ჩამოსვლასო. ჩათვალეს, რომ არ უნდა მომხდარიყო შეხვედრა. მერე უკვე მე ვუთხარი ოჯახის წევრებსა და თორნიკეს, _ ვატყობ, როგორც ადვოკატი პრობლემას წარმოვადგენ შეხვედრაზე და ამიტომ მიბრძანდით, თქვენ თვითონ იცით, რა უნდა ესაუბროთ პატრიარქს-მეთქი.

_ მიშა, როგორ პირობებშია მამა გიორგი „მატროსოვზე“, ემუქრება თუ არა საფრთხე, თქვათ მის სიცოცხლეს?

_ არა, შემიძლია გითხრათ, მაგასთან დაკავშირებით, არანაირი საფრთხე არ არსებობს. არაერთხელ შევხვდი თვითონ საპატიმროს დირექტორს, საკმაოდ ნორმალურად და ყურადღების ქვეშ არის…

ექიმებიც არიან… მოგეხსენებათ, მამა გიორგის ჯანმრთელობის მდგომარეობა არ აქვს კარგად, ნაოპერაციებია, გულთან დაკავშირებული პრობლემები ჰქონდა და აბსოლუტურად ექიმების კონტროლის ქვეშ არის, საკმაოდ ნორმალური პირობებია წინასწარი პატიმრობისთვის, ასე რომ ვთქვათ, საპატიმროს ხელმძღვანელობის მხრიდან.

_ როდის უნდა ველოდოთ მამა გიორგის სკანდალურ განცხადებებს გოგაშვილსა და სხვა მაღალჩინოსნებზე დეტალების დაზუსტებით?

_ აი, ეს გამოჩნდება, როდესაც უკვე იმ ადამიანების დაკითხვა დაიწყება, რომელთა მიმართაც, უკვე, ადგილზე იქნება მამა გიორგის კითხვები…

_ სწორედ ამიტომაც არის, ალბათ, პროცესი დახურული, რომ ჩვენ ხელი არ მიგვიწვდებოდეს მსგავს ინფორმაციაზე.

_ რა თქმა უნდა, ეს პროცესი მაგიტომ არის დახურული, მამა გიორგი ბევრ ისეთ თემას შეეხება, რომელიც დისკომფორტი იქნება „ციანიდის საქმის“ დამგეგმავებისთვის და შემსრულებლებისთვის.

_ ანუ ჩვენ იმედს ვიტოვებთ, რომ თქვენი მეშვეობით დეტალებს მაინც გავიგებთ…

ელისო კილაძე