„ოცნება“ ჯერ კიდევ იმედოვნებს, რომ ოპოზიციას როგორმე „შეაბამს“, ანუ პარლამენტში შეიტყუებს და ამით ხელისუფლებას შეინარჩუნებს, თუმცა ყველა, ვინც პოლიტიკურ ალგორითმში მეტ-ნაკლებად ერკვევა, დარწმუნებულია, რომ ივანიშვილის გუნდის სახელისუფლებო დღეები დათვლილია და თუნდაც ახალი არჩევნების დანიშვნა, უბრალოდ, დროის საკითხია. სხვათა შორის, თუ კარგად დავაკვირდებით, მივხვდებით, რომ ბოლო დროს რიხი მხოლოდ ბობოლა კი არა, ე. წ. წვრილფეხა „ქოცებმაც“ დაკარგეს. ყოველივე აქედან გამომდინარე, ჩნდება ლოგიკური კითხვა: „ოცნებამ“ ის ტოტი რატომ მოჭრა, რომელზედაც იჯდა, ანუ არჩევნების არნახულ გაყალბებაზე რატომ წავიდა?

„ივანიშვილს საკმაოდ მძიმე მდგომარეობა აქვს… რუსების დავალებას შეასრულებს თუ არა, როგორც ინფორმაციის მატარებელი, მაინც ცუდად დაამთავრებს, რაც ბევრმა საკუთარ თავზე გამოსცადა. ივანიშვილს წასასვლელი არც რუსეთში აქვს და არც _ დასავლეთში, ამიტომ ხელისუფლებას ბოლომდე ებღაუჭება. ადამიანი, რომელიც ასე იქცევა, ყველაზე ცუდად დაამთავრებს!“ _ ეუბნება „ქრონიკა+“-ს ყოფილი დეპუტატი, პროდასავლური ოპოზიციის აქტიური მხარდამჭერი, შოთა მალაშხია, რომელიც სამხრეთ კავკასიაში ბოლო დროს განვითარებულ მოვლენებსაც მიმოიხილავს და უშვებს ალბათობას, რომ ყველაფერი ის, რაც სომხეთსა და აზერბაიჯანს შორის ხდება, საქართველოს დაკარგული ტერიტორიების _ აფხაზეთისა და სამაჩაბლოს _ დაბრუნების წინაპირობა გახდეს.

_ ბატონო შოთა, თქვენც მიგაჩნიათ, რომ არჩევნები გაყალბდა?
_ რა თქმა უნდა, არჩევნები მხოლოდ არჩევნების დღეს კი არა, ჯერ მანამდე გაყალბდა, მერე _ უბნებსა და ოლქებში, ახლა კი _ ცესკოში. საერთოდ, ასეთი მასშტაბის გაყალბება საქართველოს ისტორიაში არ აღწერილა და ისიც არ მგონია, რომ ამ დონის გაყალბება რომელიმე ქვეყანაში ოდესმე ყოფილიყო.
_ დემოკრატიულ დასავლეთს არჩევნების გაყალბებაზე, როგორც წესი, მძაფრი რეაქცია აქვს ხოლმე. მიუხედავად ამისა, „ოცნება“ გაყალბებაზე მაინც წავიდა და არც იმის შეეშინდა, რომ ხმებმოპარული ადამიანები ქუჩაში გამოვიდოდნენ, ანუ ივანიშვილის გუნდს ცა ქუდად არ მიაჩნია და დედამიწა _ ქალამნად?
_ „ოცნება“ მოტივირებულია, რომ ხელისუფლებაში დარჩეს. ივანიშვილმა თავისი არაფორმალური მმართველობით ხელისუფლების ყველა შტო, პრაქტიკულად, გააუქმა. მეტიც, საქართველოში სასამართლო აღარ არსებობს. მაგალითად, ჩვენს დროს სასამართლო შეიძლება, პოლიტიკურ დავალებებს ასრულებდა, ახლა კი პოლიტიკურ დავალებებსაც ასრულებს და კორუფციაშიცაა ჩართული. ამასთან, ყველანი ვხედავთ, ეკონომიკა რა დღეშიცაა _ განადგურებულია.
ყველაფერ ამას კოვიდიც დაერთო. სხვათა შორის, ე. წ. პირველი ტალღის დროს, როცა სულ 20 შემთხვევა იყო, ცოლ-ქმარს მანქანაში წინ ჯდომა აუკრძალეს, ახლა კი დღეში 30-40 ადამიანი კვდება, მაგრამ შეღუდვებს მაინც არ აწესებენ.
_ საღამოს ათიდან დილის ხუთ საათამდე ყველა სახის გადაადგილება შეზღუდულია, რასაც ოპოზიცია და სამოქალაქო საზოგადოება ანტიკონსტიტუციურად მიიჩნევს. ჰოდა, ხელისუფლებამ რაღა ქნას, ჭრელი პეპელა ხომ არაა, რომ არც გაფრინდეს და არც მოფრინდეს?
_ დიახ, ეს პოლიტიკური გადაწყვეტილებაა, თორემ ხომ არ შეიძლება, რომ ვირუსი ღამის ათიდან დილის ხუთ საათამდე მოძრაობდეს? _ ეს სრული უაზრობაა! გაზაფხულზე დაწესებულ შეზღუდვებს აზრი მაშინ ექნებოდა, თუკი მთელი სახელმწიფო გადაემზადებოდა, ანუ, მაგალითად, ძველ ექიმებსა და ექთნებს გამოიძახებდნენ, სასუნთქ აპარატებს იყიდდნენ, საწოლებს გაამზადებდნენ და ა. შ., მაგრამ, როგორც გაირკვა, ფულის გარდა არაფერი გააკეთეს და ამ კატასტროფამდე ამიტომაც მივედით!
საერთოდ, როცა გინდა, რომ შენი საკუთარი კბილის ექიმი (სტომატოლოგს შეგნებულად არ ვამბობ!!!) ჯანდაცვის მინისტრად დანიშნო, ამით ექიმებს სახეს აკარგვინებ…
_ უკაცრავად, „ექიმებისთვის სახის დაკარგვაში“ რას გულისხმობთ?
_ ექიმები ამბობენ, ზამთარში ადამიანების ცივი წყლის ჭავლით დასველებაზე ლაპარაკი პოლიტიკური განცხადებააო. ამასთან, ეს ექიმები ხელისუფლების ყველა პოლიტიკურ აქციას ესწრებიან და მას გამართლებას უძებნიან… ივანიშვილს პოლიცია, პრაქტიკულად, საკუთარი დაცვის სამსახურად აქვს გადაკეთებული, ბიზნესის საკითხები კი სარდაფში ირჩევა. აი, ამ სიტუაციაში ხელისუფლების შენარჩუნების ერთადერთი საშუალება არსებობდა _ არჩევნების გაყალბება.
_ ე. ი., „ოცნება“ ვა-ბანკზე წავიდა და იმისიც არ შეეშინდა, რომ არჩევნების გაყალბების შემთხვევაში დასავლეთი სანქციებს დაუწესებდა და ლუკაშენკოს გზაზე დადგებოდა?
_ ეს ხელისუფლება გამოუვალ მდგომარეობაშია, რომელმაც საპრეზიდენტო არჩევნების პირველივე ტურში ნახა, რომ არჩევნები რეალურად წააგო. მას შემდეგ ვითარება კიდევ გაუარესდა. ამიტომ „ოცნებამ“ დაასკვნა, რომ წლევანდელი არჩევნები 2018 წლისაზე მეტად უნდა გაეყალბებინა და ყველანაირი რესურსი _ კრიმინალური, სახელმწიფო თუ ოქმების გადაკეთება _ მაქსიმალურად გამოეყენებინა.
ისე, ივანიშვილს საკმაოდ მძიმე მდგომარეობა აქვს.
_ ანუ?
_ რუსების დავალებას შეასრულებს თუ არა, როგორც ინფორმაციის მატარებელი, მაინც ცუდად დაამთავრებს, რაც ბევრმა საკუთარ თავზე გამოსცადა. ივანიშვილს წასასვლელი არც რუსეთში აქვს და არც _ დასავლეთში, ამიტომ ხელისუფლებას ბოლომდე ებღაუჭება. ადამიანი, რომელიც ასე იქცევა, ყველაზე ცუდად დაამთავრებს!
_ ბატონო შოთა, ახლანდელი ვითარების 2003 წლის სიტუაციასთან შედარება შეიძლება?
_ მნიშვნელობა არ აქვს, შევარდნაძეს ვაკრიტიკებდი თუ არა, მაგრამ საერთაშორისო დონეზე მისი და ივანიშვილის ცნობადობის, გნებავთ, გამოცდილების შედარებაც არ შეიძლება. ამ მხრივ მათ შორის განსხვავება ცა და დედამიწასავითაა.
_ გეთანხმებით, მაგრამ „ვარდების რევოლუციის“ დროს საქართველოს მოქალაქეები, ჩემი აზრით, უფრო გაბრაზებულები ვიყავით. ამასთან, გრიგოლ ვაშაძის უცნაურმა განცხადებამ სიტუაცია, როგორც იტყვიან, აჭრა. მოკლედ, „ოცნებამ“ არჩევნები, იქნებ, იმ იმედით გააყალბა, რომ ოპოზიციიდან ვინმეს მოისყიდდა ან რაღაც მექანიზმებით გადაიბირებდა?
_ გრიგოლ ვაშაძის განცხადება დიპლომატის განცხადება იყო. გავიხსენოთ, რა თქვა ვაშაძემ…
_ „რუსთავი 2-ისთვის“ მიცემულ ინტერვიუში ვაშაძე-უფროსმა პირდაპირ თქვა, 2017 წლიდან ხალხს ვატყუებთ და დავიღალეო…
_ ვაშაძემ თქვა, პარლამენტში არ შევალთ, ეს არჩევნები არჩევნები არ იყო და ამიტომ ლეგიტიმაცია არ აქვსო. ამასთან, ვაშაძის განცხადებაში იმაზეც იყო საუბარი, რომ ხალხმა ხმა უნდა ამოიღოს, საერთაშორისო საზოგადოება უნდა ჩაერიოს და ხელისუფლებას აუხსნას, რომ ერთპარტიულ პარლამენტს იღებს.
რაც შეეხება პარლამენტში შესვლას, ეს გამორიცხულია! შეიძლება, ადამიანი მოისყიდო და უთხრა, აი, ფულს გაძლევ და ქვეყნიდან წადიო, მაგრამ წარმოუდგენელია, ვინმემ ფული იმისთვის აიღოს, რომ პარლამენტში შევიდეს!
_ სხვათა შორის, კულუარებიდან ვიცი, რომ პარლამენტში შესვლის სანაცვლოდ „ოცნება“ ოპოზიციას, თითქოს, 100 მილიონს სთავაზობს…
_ გამორიცხულია! თანხას არავინ აიღებს! თეორიულად დასაშვებია, რომ ვინმეს თანხა მისცენ და უთხრან, ქვეყნიდან წადიო, მაგრამ ბიძინას უნდა, რომ ეს ადამიანები პარლამენტში შევიდნენ, რაც წეღანდელი თქმისა არ იყოს, გამორიცხულია!
სხვათა შორის, საქართველოში პოლიტიკური სპექტრი ასეთი ერთიანი არასოდეს ყოფილა! იგივე 2003 წელს სხვა თემაა, ვინ მართალი იყო და ვინ _ მტყუანი, მაგრამ ასეთი ერთიანობა არ არსებობდა და, მაგალითად, „ახალი მემარჯვენეები“ პარლამენტში შევიდნენ… ახლა კი ბარიერგადალახულები და არჩევნებში მონაწილეებიც, ანუ სხვადასხვა პოლიტიკური ორიენტაციის ადამიანები, ერთ აზრზე არიან…
კი ბატონო, გასაგებია, რომ ემოციური მუხტი ისეთი არაა, როგორიც 2003-ში იყო, მაგრამ ახლა გადაწყვეტილება უფრო მყარია!
_ კეთილი, მაგრამ, ბატონო შოთა, როგორც პროდასავლური ოპოზიციის მხარდამჭერს, უნდა ჩაგეკითხოთ: უცნაურად არ მოგეჩვენათ, რომ სკანდალური განცხადების შემდეგ გრიგოლ ვაშაძემ პირველი ინტერვიუ პროსახელისუფლებო ტელევიზიას, ანუ „რუსთავი 2-ს“ მისცა?
_ ყველამ ინდივიდუალურად უნდა გადაწყვიტოს, ინტერვიუს რომელ ტელევიზიას მისცემს. საერთოდ, პოლიტიკოსმა ნებისმიერი მედიასაშუალება უნდა გამოიყენოს. აი, მაგალითად, პირადად მე, ყველაფერ ამას, თან უფრო მკაცრად, „იმედის“ ეთერშიც გავიმეორებ!
_ გეთანხმებით, რომ პოლიტიკოსმა ხალხთან სალაპარაკოდ ნებისმიერი საშუალება უნდა გამოიყენოს, თუმცა ყურადღება კონტექსტსაც უნდა მიაქციოს. ისე, რაკიღა კონტექსტს შევეხე, აქვე, გკითხავთ: საქართველოში არჩევნები ძალიან საინტერესო საგარეო მოვლენების, ასე ვთქვათ, აკომპანემენტით ჩატარდა. ყველაფერს თავი რომ დავანებოთ, სომხეთ-აზერბაიჯანის ომი ამ უკანასკნელის გამარჯვებით დამთავრდა. მოკლედ, ყველანი ვხვდებით, რომ მხოლოდ სამხრეთ კავკასიის კი არა, მსოფლიოს გადანაწილების ახალი ტალღა დაიწყო. ამასობაში, საქართველომ რუს ე. წ. სამშვიდობოებს საჰაერო სივრცე გაუხსნა. ყველაფერმა ამან ზოგს 1921 წლის მოვლენები გაახსენა. თქვენ რას ფიქრობთ, რა გველის?
_ ამ საკითხზე ყველასგან განსხვავებული პოზიცია მაქვს.
_ კერძოდ?
_ დავიწყოთ იმით, რომ აზერბაიჯანი აქამდე ყარაბაღს ვერ აკონტროლებდა. ახლა კი საქმე ისე მიდის, რომ უახლოეს მომავალში აზერბაიჯანი ყარაბაღის ნახევარს და ასევე მის გარშემო მდებარე შვიდ რაიონს გააკონტროლებს, ანუ, ამ ეტაპზე, ოფიციალური ბაქო, სამხედრო ოპერაციის თვალსაზრისით, საკმაოდ მომგებიან მდგომარეობაშია. აზერბაიჯანს შუშა რომ არ აეღო, შეიძლება, საუბარი იმაზე წასულიყო, ყარაბაღი იურისდიქციის გარეთ ხომ არ დარჩებოდა, მაგრამ რახან შუშაც აღებულია, ყარაბაღზე პრეტენზია, ტერიტორიული კონტროლის თვალსაზრისით, განხორციელებულია.
ამასთან, იმაზეც საუბრობენ, აზერბაიჯანს საომარი მოქმედებები უნდა გაეგრძელებინა თუ არა. საომარი მოქმედებების გაგრძელების შემთხვევაში, სტეფანაკერტში, სადაც მოსახლეობა, მინიმუმ, 50 ათასია, ძალიან დიდი მსხვერპლი იქნებოდა. შესაბამისად, აზერბაიჯანის სამხედრო მიღწევებს საერთაშორისო დონეზე ასეთი შეფასებები აღარ ექნებოდა, ანუ ყველაფერი შესაძლოა, ისე გაფორმებულიყო, როგორც ეთნოწმენდა და გენოციდი.
აზერბაიჯანმა ლაჩინის დერეფანს ხელი იმიტომ არ ახლო, რომ მოსახლეობას ტერიტორიის დატოვების საშუალება ჰქონდეს. კერძოდ, ეს ლაჩინის დერეფანი ნახიჭევანისა დ ბაქოს დერეფანში გაიცვალა…
კიდევ ერთი საინტერესო დეტალი: აზერბაიჯანი ამბობს, რომ სამშვიდობო მოლაპარაკებებში თურქეთიც უნდა ჩაერთოს.
_ ეს რეალურად გეჩვენებათ?
_ პუტინსა და ერდოღანს შორის ამაზე სიტყვიერი შეთანხმება რომც არ იყოს, აზერბაიჯანს სრული უფლება აქვს, რომ მის მიერ კონტროლირებად ნებისმიერ ტერიტორიაზე, მაგალითად, შუშაში, თურქული კონტინგენტი შეიყვანოს. ერთი სიტყვით, ამ ზონაში თურქეთი რეალურად შემოდის.
გასაგებია, რომ იქ ე. წ. რუსი სამშვიდობოები, ანუ ოკუპანტებიც იდგებიან, მაგრამ უკვე შესაძლებელია, რომ ყარაბაღის სტატუსთან დაკავშირებით მოლაპარაკებები დაიწყოს, რაც იმ მიმდებარე ტერიტორიებზე, რომელიც აზერბაიჯანმა გაათავისუფლა, დევნილების დაბრუნებას გულისხმობს. ამასთან, შუშაშიც მთლიანად აზერბაიჯანის მოსახლეობას ჩაასახლებს, შემდეგ კი ყარაბაღის ბედს საერთაშორისო კომპონენტით, ასევე რეფერენდუმითა თუ არჩევნებით გადაწყვეტს.
_ ყველაფერი ეს გასაგებია, მაგრამ სომხეთ-აზერბაიჯანის მოვლენები საქართველოზე როგორ აისახება?
_ ამასაც გეტყვით, თუმცა მნიშვნელოვანია, რომ უახლოეს მომავალში სომხეთში ემოციური ტალღა გადაივლის და მიხვდებიან, რომ რუსეთზე ორიენტაცია დამღუპველია.
_ სხვათა შორის, სოციალურ ქსელში ვიდეო გავრცელდა, რომლის თანახმადაც, სომხეთის მოსახლეობა პუტინს უკვე ღიად აგინებს.
_ დიახ, მეც სწორედ ამას ვამბობ, ანუ სომხეთის საგარეო ორიენტაცია შეიცვლება და აზერბაიჯანთან საუბარი საერთაშორისო ენაზე დაიწყება.
რაც შეეხება საქართველოს, თუ ტერიტორიული მთლიანობის აღდგენისკენ ნაბიჯები გადაიდგა და აზერბაიჯანის ტერიტორიული მთლიანობა ყველა საერთაშორისო ნორმის დაცვით აღდგება, ეს ჩვენც გამოგვადგება, რადგან ტერიტორიული პრობლემები საქართველოსაც აქვს.
_ მაშასადამე, ყარაბაღის მოვლენებმა შესაძლოა, აფხაზეთისა და სამაჩაბლოს დაბრუნების წინაპირობა შექმნას?
_ დიახ… სომხეთს სხვა გზა არ აქვს _ საგარეო ორიენტაციას იცვლის. საერთოდ, ეს რუსეთის სტილია.
_ რას გულისხმობთ, ბატონო შოთა?
_ მეფის რუსეთიდან მოყოლებული, მოსკოვი მხოლოდ საქართველოსთან ან სომხეთთან კი არა, ყველა ქვეყანასთან ასე იქცევა.
_ თქვენი ვერსიით, რუსეთმა სომხეთი რატომ გაყიდა, ანუ ოფიციალურ ერევანს ოფიციალური ბაქო რატომ ანაცვალა?
_ კარგი კითხვაა…
თურქეთის არმია, რომელიც აზერბაიჯანს დრონებით ან სხვა ტიპის დახმარებას უწევდა, 21-ე საუკუნის იარაღით იბრძვის. რუსეთი მხოლოდ ფიზიკურად კი არა, მენტალურადაც ჩამორჩენილია და მისი იარაღი ვეღარ ჭრის. შესაბამისად, ამ კონფლიქტში უფრო აქტიურადაც რომ ჩარეულიყო, უარესად დამარცხდებოდა. ამას მიხვდა და ამიტომაც სადაც არა სჯობს, გაცლა სჯობსო და სახე რაღაცნაირად რომ შეენარჩუნებინა, სამხედრო კონტინგენტი შეიყვანა _ რუსეთს სომხეთში ბაზა ისედაც ჰქონდა და ამ ბაზას ორი ათასი სამხედრო დაემატება თუ არა, ამით არაფერი შეიცვლება.
მოკლედ, ყველაფერს ამ კონტექსტში უნდა შევხედოთ და არა _ პინკ-პონკის თამაშით, იმან ეს ქნა, ამან _ ისო.
_ ერთი სიტყვით, ყველაფერი ის, რაც სამხრეთ კავკასიაში ხდება, საქართველოსთვის ცუდი არაა?
_ არა, თუმცა ეს ჩემი პოზიციაა. ექსპერტების უმრავლესობა კი ამ საკითხს სხვანაირად იხილავს. ჩემი არგუმენტები ემოციური კი არა, ფაქტებითაა გამყარებული!..
ვნახავთ, რომ უახლოეს მომავალში ბაქო და ერევანი კეთილს ინებებენ და მოლაპარაკებას საერთაშორისო ნორმების დაცვით დაიწყებენ…
_ სხვათა შორის, სოციალურ ქსელში ვრცელდება ინფორმაცია, რომ ყარაბაღიდან დევნილები რუსეთმა შესაძლოა, ოკუპირებულ აფხაზეთში ჩაასახლოს. ამაზე რას იტყვით?
_ ეს წარმოუდგენელია!
_ რატომ?
_ თუ ამას თეორიულად მაინც დავუშვებთ, ეს კიდევ ერთი დასტური იქნება, რომ აფხაზებისთვის ე. წ. დამოუკიდებლობა სრული კატასტროფაა.
_ ანუ?
_ მხოლოდ აფხაზეთში კი არა, იგივე ჯავახეთშიც რუსეთი სომხურ მოსახლეობას, თავის დროზე, გააზრებულად ასახლებდა. თუ რუსეთი ამ პოლიტიკას გააგრძელებს, ეს ცალკე პრობლემა იქნება. ამიტომაც ვამბობ, რომ ეს ხელისუფლება სწრაფად უნდა შეიცვალოს და ყველა ზემოხსენებული საკითხი საერთაშორისო დონეზე დადგეს.
_ უკაცრავად, ხელისუფლების შეცვლას ხაზს რატომ უსვამთ?
_ იმაზე, რაც თუნდაც აფხაზეთში ხდება, პარლამენტში ამ ხელისუფლების ხმა გაგიგიათ?
_ არ გამიგია…
_ აზერბაიჯანი ახლა ამბობს, რომ საქმეებს საერთაშორისო სასამართლოებში წაიღებს, რათა ყარაბაღში 50 მილიარდი დოლარით დაზარალდა. არ მინდა, ზედმეტად ამბიციურად გამომივიდეს, მაგრამ ჩემი კომისიის თავმჯდომარეობის დროს პარლამეტში სწორედ ეს საკითხები ირჩეოდა, სახლების დაკარგვისა თუ უკანონო პატიმრობის საქმეები საერთაშორისო სასამართლოებში როგორ წაგვეღო.
ერთი სიტყვით, თანდათანობით სამართლებრივი საკითხები იკვეთება და ეს შანსი უნდა გამოვიყენოთ, მით უმეტეს, რომ რუსეთს უამრავი პრობლემა გაუჩნდა _ სირიიდან დაწყებული, ყარაბაღით, უკრაინით, მოლდოვითა და იგივე მოწამვლით დამთავრებული.
ყველაფერ ამის გამო საერთაშორისო ასპარეზზე პუტინს სახე დაკარგული აქვს. ლავროვის მიერ ორი დღის წინ გაკეთებული განცხადება კი უკვე ფსიქიატრიის კომპეტენციაა.
_ რომელ განცხადებას გულისხმობთ?
_ გერმანიას ბრალი დასდო, რომ შეიძლება, ნავალნი გერმანიაში მოწამლეს. ეს ბოდვა კი არა, უკვე ჰალუცინაციაა!
_ დიახ, ასეა, მაგრამ ზოგი ამბობს, რომ საქართველოს მომავალი იმაზეა დამოკიდებული, აშშ-ის საპრეზიდენტო არჩევნები როგორ დამთავრდება, ანუ საბოლოო გამარჯვებულად ბაიდენი გამოცხადდება თუ სასამართლო პრეზიდენტობას ისევ ტრამპს მიაკუთვნებს.
_ ეს საკითხი გადაწყვეტილია _ ბაიდენი გამარჯვებულია.
_ ტრამპი ამტკიცებს, რომ ხმები მოპარეს და სასამართლოში ჩივის…
_ ტრამპს ამის იურიდიული ვადები აქვს, მაგრამ 14 დეკემბრისთვის ეს საკითხი ამოწურული იქნება.
ცუდი ისაა, რომ ჩვენი საკითხი პრეზიდენტის დონეზე არ დგას.
_ აბა, ვის დონეზე დგას?
_ ე. წ. დათბობის პოლიტიკის გამო, აი, რუსეთს არ ვაწყენინოთ და საერთაშორისო რადარებიდან გავქრეთო, ქვედა დონეზე ვართ ჩამოწეულები, თუმცა აშშ-ის ადმინისტრაციაში ყველა განცხადებას, რომელიც საქართველოს მისამართით კეთდება, ყოველთვის ორპარტიული მხარდაჭერა აქვს. ამიტომ ჩვენი საკითხი ყოველთვის გავა.
_ ანუ ჩვენთვის მნიშვნელობა არ აქვს, საბოლოო გამარჯვებულად ბაიდენი გამოცხადდება თუ თეთრ სახლში ისევ ტრამპი დარჩება?
_ ვიცი, რომ აშშ-ის ახალი პრეზიდენტი ბაიდენი იქნება, თუმცა ამას ჩვენთვის მნიშვნელბა არ აქვს.
_ ისე, ყველა მართლმორწმუნე „ქოცი“ ტრამპის ფანია…
_ ტრამპის მხარეს „ნაციონალების“ ნაწილიცაა, მაგრამ ეს აშშ-ის შიდა პოლიტიკაა და ამას ჩვენთვის ნაკლები მნიშვნელობა აქვს, თუმცა წეღანდელი თქმისა არ იყოს, ვიცი, რომ ბაიდენი იმარჯვებს!
_ ბოლოს, ბატონო შოთა, გული რას გიგრძნობთ, „ოცნება“ წავა?
_ აუცილებლად.
_ ახალი არჩევნებით თუ რევოლუციით?
_ ეკონომიკური კრიზისისა და კოვიდის ფონზე ხელისუფლების შენარჩუნების ერთადერთი გზა ისაა, რომ ჩრდილო კორეაში მოვხვდეთ. დასავლეთისგან დახმარება გვინდა, მაგრამ ესენი ამ დახმარებას ვერ მიიღებენ, ეს გამორიცხულია. ამასთან, სახელმწიფოს კრიმინალური მართვის რესურსიც ამოეწურა, ანუ ეს ხელისუფლება აღარავის უნდა.
ერთადერთი, რაც კარგი მოხდა, ისაა, რომ ამ არჩევნებზე ადამიანებმა საკუთარი ხმების პატივისცემა ისწავლეს და შესაბამისად, აწი არჩევნებს ვერავინ გააყალბებს და ამ კუთხით ჩვენ თვისობრივად სხვა საქართველოში გავიღვიძეთ!

გიორგი აბაშიძე