ირინა მაკარიძე
რაზე ამყარებს იმედს მმართველი უმრავლესობა, რომ კიდევ დიდხანს დარჩება ხელისუფლებაში? რატომ მიიჩნევს, რომ კანდიდატის სტატუსს იმსახურებენ და როგორ აპირებს რეკომენდაციების შესრულებას? _ ამ და სხვა საკითხების შესახებ „ქრონიკა+“-ს ესაუბრება საპარლამენტო უმრავლესობის წევრი, „ხალხის ძალის“ ერთ-ერთი ლიდერი, გურამ მაჭარაშვილი:

_ ქართული საზოგადოების უმრავლესობა, მიუხედავად პოლიტიკური გემოვნებისა, ემხრობა დღევანდელი ხელისუფლების პოლიტიკას. საზოგადოებამ დაინახა, რომ ირგვლივ არის ომი, სხვათა შორის, არაერთი, საქართველოზე დიდ ქვეყნებს შორის, რომლის პერსპექტივაც, ჯერჯერობით, სამწუხაროდ, არ ჩანს. ამ დროს საქართველოში საუბარია იმაზე, რამდენი ნიშნით გაიზარდა ეკონომიკა, ხელფასები 10%-ით მოიმატებს თუ 20%-ით. ამას თვითონ ოპოზიცია აღიარებს პარლამენტში, _ ჭარბი შემოსავალი რომ გვაქვს, ანუ აღიარებს, რომ ეკონომიკური ზრდაა. აი, ამას ხედავს ხალხი, შესაბამისად, მხარს უჭერს ხელისუფლების პოლიტიკას.
_ ოპოზიცია იმასაც ამბობს, რომ ეს ჭარბი შემოსავალი დაკავშირებულია 2022 წლის თებერვლის შემდეგ რუსეთიდან ფულისა და ადამიანების შემოსვლასთან და არა ეკონომიკის რეალურ ზრდასთან, ამაზე რას იტყვით?
_ თქვენ იცით, რუსეთიდან ყოველდღიურად რამდენი ფული შედის ევროკავშირიში? მილიარდი ევრო, ყოველდღიურად, ეს არ ეწინააღმდეგება ევროკავშირის ღირებულებებს?! როდესაც საუბარია რუსეთიდან შემოსულ ფულზე, რაც შემოდიოდა ადრე, ის შემოდის ისევ, იმიტომ, რომ ჩვენი მოქალაქეები ცხოვრობენ იქ და შეურაცხყოფას რატომ აყენებთ ჩვენს მოქალაქეებს, რომლებიც თავის ოჯახებს არჩენენ საქართველოში? ბიუჯეტს თუ გადახედავთ, იქ ნახავთ, რომ რუსეთიდან შემოსული ფულის საფუძველზე არ არის ბიუჯეტი გაზრდილი. რუსეთიდან შემოსული თანხები სხვა რამეა და ის, რომ ინვესტიციები არსებობს, რაც მთავარია, მშვიდობაა შენარჩუნებული… როდესაც ქვეყანაში მშვიდობა და უსაფრთხოებაა, იქ არის ზუსტად ეკონომიკური განვითარება. ეს არის ყველაზე მთავარი აქ, რომ 10-11 წელია, ქვეყანას ომი და რევოლუციები არ ჰქონია, ამიტომ ვითარდება. ეს უნდა დაინახოთ და სწორად მიაწოდოთ საზოგადოებას ინფორმაცია. ჩვენ არ ვამბობ იმას, რომ გადაჭარბებულად მოვატყუოთ საზოგადოება, ჩვენ ეს არ გვინდა, განსხვავებით რადიკალური ოპოზიციისგან, რეალობა რაც არის, იმას ვეუბნებით. ამ შემთხვევაში, როდესაც გინდა, რომ ევროპული ღირებულებაც, მათ შორის, დაიცვა, ხელს გიშლიან ამაში და ევროპულ ღირებულებად უნდათ გაასაღონ რუსეთთან კონფლიქტი და „პრაიდის“ ჩატარება, ეს არ არის ევროპული ღირებულება. ჩვენ სწორედ ამას ვებრძვით, _ ანტიევროპულ დეზინფორმაციას. ევროპა ცდილობს, რომ კონფლიქტი არ ჰქონდეს რუსეთთან, ევროპა, რომელსაც აქვს ნატოს ქოლგა, რომელიც ჩვენ არ გვაქვს, და ჩვენც ვცდილობთ, რომ კონფლიქტი არ გვქონდეს და ჩვენ რატომ მოგვიწოდებენ, პირადი სანქციები დაუწესეთ და კონფლიქტში შედით რუსეთთანო? აი, სწორედ იმიტომ, რომ აქ მეორე ფრონტი იყოს.
_ ვის გულისხმობთ, ოპოზიციას თუ…?
_ ოპოზიციას, ევროპარლამენტარებს, დღესაც გამოაქვეყნა კალიურანდმა განცხადება, მაგრამ, საბედნიეროდ, არავინ ეკითხება ამ ევროპარლამენტარების მცირე ჯგუფს, ევროკომისიამ ჯანსაღად და სწორად შეაფასა ის, რომ საქართველოს თურმე შეუძლია ორივე ფეხზე იდგეს, მშვიდობაც შეინარჩუნოს, კანდიდატის სტატუსიც მიიღოს.
_ რას იტყვით იმ დამატებით დათქმებსა და რეკომენდაციებზე, რომელთა შორის არის დეოლიგარქიზაციის რეკომენდაციაც, რამდენად შეძლებს ხელისუფლება ამის შესრულებას?
_ ეს არის დაბოღმილი პრეზიდენტისა და დაბოღმილი ოპოზიციის რიტორიკა. დათქმები და პირობები ყველა კანდიდატის სტატუსის მქონე ქვეყანას აქვს. ევროპამ დაინახა, რომ საქართველოს ჰყავს ქართული ხელისუფლება, რომელიც მიიწევს ევროინტეგრაციისკენ, ეს თქვა ევროკომისიამ და მისმა პრეზიდენტმა. შესაბამისად, მომავალში დათქმებთან დაკავშირებით, ისევე როგორც წინა პერიოდში, გვექნება კონსულტაციები ევროპასთან.
_ გასულ წელს, როდესაც არ მიენიჭა საქართველოს სტატუსი, იყო საუბარი, თქვენი პოლიტიკური გაერთიანების მხრიდანაც, რომ ევროპა ცდილობს გავლენის მოხდენას, მათ შორის, ბიძინა ივანიშვილზე, რომ მეორე ფრონტი გახსნას საქართველომ. ახლა რა შეიცვალა, რატომ მისცეს საქართველოს დადებითი რეკომენდაცია კანდიდატის სტატუსის მისაღებად? გახსნა საქართველომ მეორე ფრონტი?
_ პირიქით მინდა დავსვა კითხვა. ჯერ ერთი, მინდა გითხრათ, რომ გადაამოწმეთ განცხადებები, ჩვენ არასდროს გვითქვამს, რომ მთლიანად ევროპა ებრძვის საქართველოს. არსებობენ უცხოური ძალები, რომლებიც ებრძვიან. ჩვენ პირიქით, ამ ევროპული ღირებულებების დაცვისკენ ვართ, რომ ხალხს უნდათ შეასაღონ სხვა რამე, იმისგან განსხვავებით, რაც არის ევროპული ღირებულება. პირიქით მინდა ეს კითხვა დავსვა, _ თუ საუბარია დღეს იმაზე, და ოპოზიციაც ამბობს, რომ ხალხს მიეცა მხოლოდ ეს კანდიდატის სტატუსი და არა ხელისუფლებასო, ერთი წლის წინათ ეს ხალხი არ ცხოვრობდა ამ ქვეყანაში? ხელისუფლება არ შეცვლილა, ხალხი არ შეცვლილა, თუ მხოლოდ ხალხს მისცეს, შარშან რატომ არ მისცეს ამ ხალხს? აი, ნახეთ, სად არის ძაღლის თავი დამარხული. ანუ აქ საუბარი იმაზეა, რომ დაინახა ევროპამ, ატყუებდა არასამთავრობო სექტორი, ატყუებდა ზოგიერთი ევროპარლამენტარი, ატყუებდა, რაც მთავარია, რადიკალური ოპოზიცია. თვითონ ოპოზიციამ თქვა, მეტი მტკიცებულება რა გინდათ, რომ დაგვიბარეს ჩვენმა პარტნიორებმა და გვითხრეს, შეთანხმდით, გინდათ თუ არ გინდათო და ჩამოდიან ოპოზიციონერები და გვეუბნებიან, არ მოგვცეთ სტატუსიო? ეს ხომ თვითონ თქვეს? დარწმუნდა ევროკავშირი, რომ ეს ყველაფერი ტყუილი იყო, რომ ქვეყანას ქართული ხელისუფლება და ევროპულად მოაზროვნე ხელისუფლება ჰყავს, ამიტომაც კანდიდატის სტატუსი მისცა ხალხს, რომელიც ირჩევს ევროპასა და ევროპულ ხელისუფლებას. აი, ეს თქვა ევროკომისიამ.
_ არ ფიქრობთ, რომ იმ აქციებმა, რომელიც გაიმართა ევროპული ინტეგრაციის მხარდასაჭერად, მათ შორის, მარტის აქციებმა, იქონია გავლენა ევროპელ პარტნიორებზე?
_ მაგ ზღაპრების პირველკლასელსაც არ სჯერა. შესაბამისად, ეს ზღაპრები მოუყვნენ თავიანთ ოჯახის წევრებს. თვითონ არ სჯერათ ამის. რა უნდა ოპოზიციას თქვას, რომ ერთი წლის წინათ ევროპა არ იცნობდა ქართულ საზოგადოებას და ერთი წლის შემდეგ გაიცნო? ის მარტის აქციებიც ხომ გამოვლინდა. რატომ არ გამოვიდა ახლა ხალხი, მეორე კანონპროექტს რომ დაარქვეს რუსული კანონი? იმიტომ, რომ მიხვდა ხალხი. მაშინ, სამწუხაროდ, შეცდომაში შეიყვანეს. ეს კანონი, რომელიც უკვე დავაინიცირეთ „ხალხის ძალამ“, უკრაინაშიც არის დაინიცირებული, ევროპარლამენტშიც, შესაბამისად, მიხვდა ხალხი, რომ ეს იყო ხაფანგი, ამიტომ არავინ გამოვიდა ამ ე. წ. მეორე რუსულ კანონზე. მიხვდა ხალხი, რომ ეს კანონი, რომელსაც დაარქვეს „რუსული კანონი“, ამერიკაში მოქმედებს მშვენივრად, საიდანაც გავიგეთ, რომ მილიონებია გადახდილი საქართველოს წინააღმდეგ ბრძოლაში.
_ ოპოზიციაში ვინც მიიჩნევს, რომ კანდიდატის სტატუსი არ უნდა მიეღო ქვეყანას ახლა, რადგან ეს მატებს მმართველ ძალას არჩევნებში ქულებს, ისინი ამას ღიადაც ამბობენ, ამას ამბობს „ევროპული საქართველო“, „ლეიბორისტული პარტია“, მაგრამ ხომ არ შეიძლება ოპოზიციის ნაწილის აზრი მთელი ოპოზიციის პოზიციად გასაღდეს?
_ ამბობენ, რომ „ქართულ ოცნებას“ არ უნდა კანდიდატის სტატუსი და ჩვენ გვინდაო, აი, ეს ტყუილი გაჟღერდა, ამას ვამბობ ზუსტად. ისინი ამბობენ, ჩვენ რომ მოვალთ ხელისუფლებაში, მაშინ მოგვეცით, მანამდე „ქართულ ოცნებას“ რომ მისცეთ სტატუსი, მერე ჩვენ რევოლუციას ვეღარ მოვაწყობთო.
_ რაც შეეხება სუსის მიერ დაწყებულ გამოძიებას იმ ადამიანების წინააღმდეგ, რომლებიც ტრენინგზე ღიად საუბრობდნენ საჯარო აქტივობაზე, ფიქრობთ, რომ ეს ხალხი აპირებდა რევოლუციის მოწყობას? წლების განმავლობაში გრძელდება არარსებულ რევოლუციაზე საუბარი, არ ფიქრობთ, რომ ამან დამაჯერებლობა დაკარგა?
_ რომ იტყვიან, ვისაც გვჯერა, გაგვატარეთ. ყველას აქვს უფლება, სჯეროდეს, რომ მზე არ ამოდის აღმოსავლეთიდან. ხომ ვერ შევეწინააღმდეგებით? ბევრი გამოვა და იტყვის, _ არ ამოდის, ბატონო, აღმოსავლეთიდან. მე მჯერა, რომ ამოდის დასავლეთიდან. უმრავლესობა გადაწყვეტს, რომ ეს ადამიანი თავისას „ერეკება“ და ჩვენ გვჯერა, რომ მზე აღმოსავლეთიდან ამოდის, ანუ რეალობა გვჯერა ჩვენ.
_ ანუ თქვენ გჯერათ, რომ ოპოზიცია რევოლუციას გეგმავს? კულტურის სფეროს წარმომადგენლები, რომლებიც დაჰყავთ დაკითხვაზე, რევოლუციას გეგმავდნენ?
_ თქვენ არ მოგისმენიათ ზურა-გირჩის განცხადება? არ მოგისმენიათ ოპოზიციონერების განცხადებები, რომ დიახ, რევოლუციით უნდა გავუშვათ ეს ხელისუფლებაო? მე მეკითხებით ახლა, გჯერათ თუ არაო? ცოტა უხერხულია, მე მგონი.
_ ტრენინგის მონაწილეებს იბარებენ და არა ზურა-გირჩი ჯაფარიძეს…
_ რატომ უნდა ჩამოვიდეს უცხოეთიდან მასწავლებელი და ასწავლიდეს, როგორ უნდა ჩამოიქცეს აქ ხელისუფლება?! სხვათა შორის, იმ ორგანიზაციის ქართველმა დირექტორმაც აღიარა, გამოვიდა ის ქალბატონი და პირდაპირ თქვა, რომ ვასწავლით, აქციაზე როგორ უნდა შევეწინააღმდეგოთ და მერე როგორ უნდა ჩამოვშალოთ ეს სისტემაო. აღიარა და თქვენ მეკითხებით ამაზე, გჯერათ თუ არაო, ამაზე ჩემი პასუხია, ვისაც გვჯერა, გაგვატარეთ.
_ ქალბატონ პრეზიდენტზე გკითხავთ. სალომე ზურაბიშვილმა საფრანგეთში, France 24-თან ინტერვიუში, განაცხადა, რომ აქვს მოლოდინი, 2024 წლის არჩევნებზე ვიხილოთ ევოლუცია, რომელიც, მიგვიყვანს კოალიციურ მთავრობასთან, ამაზე რას იტყვით?
_ სალომე ზურაბიშვილთან დაკავშირებით არ მგონია, სერიოზული კომენტარები კიდევ უნდა გაკეთდეს მას მერე, რაც მან, პრაქტიკულად, უარი თქვა თავისი ფუნქციების შესრულებაზე, კონფლიქტში შევიდა კონსტიტუციასთან, საკონსტიტუციო სასამართლოსთან, საკუთარ ამომრჩეველთან, საკუთარ სახელმწიფოსთან. ამიტომ ახლა ის რას იტყვის, სად წავა, რას გააკეთებს, არავითარი მნიშვნელობა ამას უკვე აღარ გააჩნია არც ქართული სახელმწიფოსთვის და, რეალურად, არც საზოგადოებისთვის. არავის საქმე არ არის, მათ შორის, არც ზურაბიშვილის, რომელიც არ ასრულებს უკვე პრეზიდენტის მოვალეობას, ხალხი რას იზამს. ეს არის შესაღება, თითქოს ეს არის ევროპული ღირებულება. არადა, არის პირიქით, ხალხს არავინ უნდა უკარნახოს, ვის აირჩევს, კოალიციურ მთავრობას მოიყვანს, 2 პარტიას, 10 პარტიას, თუ რამდენ პარტიას მოიყვანს პარლამენტში, ეს არის ხალხის გადასაწყვეტი და მეტის არავის, ეს არის სწორედ ევროპული ღირებულება. როცა საუბარია ევროპული ღირებულების დეზინფორმაციის წინააღმდეგ ბრძოლაზე, ამას ვაკეთებთ ზუსტად. ეს არის ევროპული ღირებულების წინაააღმდეგ ბრძოლა. ხოლო როდესაც ხალხს ეუბნები, რამდენი და როგორ უნდა აირჩიონ მომავალ პარლამენტში, ეს არ არის ევროპული ღირებულება…
_ ირაკლი კობახიძემაც განაცხადა, რომ 2024 წლის და შემდგომ 2028 წლის არჩევნებში გაიმარჯვებს „ქართული ოცნება“, ამაზე რას იტყვით?
_ თუ გადავხედავთ პროცესებს, ისე იქცევა ოპოზიცია, სამწუხაროდ, რომ თავისი პატრონებიც კი უარს იტყვიან ცოტა ხანში მათ პატრონობაზე უცხოეთიდან. იმიტომ, რომ არა მარტო არაქართულად იქცევიან, ანტისახელმწიფოებრივადაც იქცევიან, უკვე უნიჭოდ იქცევიან და ლანძღავენ საკუთარ ქვეყანას, არღვევენ პარლამენტის ფიცს, შესაბამისად, ასეთ პოლიტიკოსებს ქართველი ხალხი კი არა, აღარც უცხოური ძალები დაუჭერენ მხარს.
_ რაც შეეხება „ხალხის ძალას“, რა ფორმით მიიღებთ არჩევნებში მონაწილეობას?
_ ჩვენ არაერთელ ვთქვით, რომ დავაკვირდებით მოვლენებს და უახლოესი თვეების განმავლობაში ვნახავთ, რა ფორმით და როგორ გამოვალთ არჩევნებზე.