23 წლის პროგრამისტ თამარ ბაჩალიაშვილის იდუმალ გარდაცვალებაზე ძალიან ბევრი ითქვა და დაიწერა, ანუ გაჟღერდა ყველანაირი ვერსია, თუმცა, ამის მიუხედავად, ტრაგედიიდან თითქმის ორი კვირის შემდეგაც, არ არსებობს მეტ-ნაკლებად ამომწურავი პასუხი კითხვაზე, _ რა მოხდა? ისე, საზოგადოების აბსოლუტურ უმრავლესობას ძალოვანი უწყების მიერ გაკეთებული მინიშნების, რომ თამარმა შესაძლოა, თავი მოიკლა, არ სჯერა. ყოველ შემთხვევაში, მოსახლეობა დარწმუნებულია, რომ წარმატებული ახალგაზრდა ქალი ან მოკლეს, ან, მინიმუმ, თვითმკვლელობამდე მიიყვანეს, მაგრამ ვინ მოკლა ან რატომ მიიყვანა გოგონა თვითმკვლელობამდე?
ამ საქმეში კიდევ ერთი რიტორიკული კითხვაა, _ თამარის გარდაცვალებაში სპეცსამსახურების ხელი ხომ არ ურევია? სხვათა შორის, ამ ვერსიას, თავდაპირველად, ბაჩალიაშვილების ოჯახის ადვოკატი, მიხეილ რამიშვილიც არ გამორიცხავდა.

ზოგადად, ბაჩალიაშვილის საქმემ ბევრს გახმაურებული ტელესერიალი „ნიკიტა“ გაახსენა. შეიძლება, რეალობასა და ფილმს შორის ანალოგიები არცთუ რელევანტური იყოს, მაგრამ სანამ გარდაცვალების ზუსტი მიზეზი და ასევე მოტივი მყარი არგუმენტებით არ დადგინდება, არსებობის უფლება ნებისმიერ მოსაზრებას, მათ შორის, იმ ვერსიასაც ექნება, რომ შესაძლოა, კვალი სპეცსამსახურებამდე მივიდეს.
„ქრონიკა+“-სთან საუბრისას სპეცსამსახურების ვერსიას, პირდაპირ თუ ირიბად, სამხედრო კონტრდაზვერვის ყოფილი მაღალჩინოსანი, უსაფრთხოების ექსპერტი, კონსტანტინე ფორჩხიძეც ავითარებს და ამ კონტექსტში მინიშნებას იმ პერიოდზე აკეთებს, როცა თამარ ბაჩალიაშვილი, რამდენიმე თვის განმავლობაში, სასწავლებლად საფრანგეთში იმყოფებოდა.
ამასთან, ჩვენი რესპონდენტი იმასაც გვეუბნება, რომ ფრანგულ და, ზოგადად, განვითარებული ქვეყნების სპეცსამსახურებს ადამიანზე ზემოქმედების დიდი არსენალი აქვთ და ამ კონტექსტში ქართველი სპეცსამსახურელი მახვილს მხოლოდ ჰიპნოზზე კი არა, ქიმიურ ზემოქმედებაზეც სვამს, ანუ კონსტანტინე ფორჩხიძის თქმით, უშიშროების სამსახურებს ხელეწიფებათ, რომ ადამიანი რამდენიმე დღის განმავლობაში გათიშონ, ანუ დააპროგრამონ და შემდეგ ის გააკეთებინონ, რაც სურთ.
სხვათა შორის, ფორჩხიძე არც იმას გამორიცხავს, რომ იგივე ბაჩანა ლობჟანიძეც, რომელიც თამარის შეყვარებულად მოგვევლინა, სპეცსამსახურების ზემოქმედების ქვეშ იყოს, თუმცა ჩვენი რესპონდენტის ყველა მსგავსს განცხადებას მხოლოდ ვერსიის სახე აქვს, ანუ ფორჩხიძე აპრიორი რამეს კი არ ამტკიცებს, არამედ, კონკრეტული ქეისის ფონზე, სპეცსამსახურების მუშაობის სპეციფიკას იმ დოზით გვაცნობს, რა დოზითაც ყველაფერ ამაზე საჯაროდ საუბარია დასაშვები.
და კიდევ ერთი: უსაფრთხოების ექსპერტი ყურადსაღებად მიიჩნევს იმ გარემოებასაც, რომ „ბაჩალიაშვილის საქმეში“ სახელმწიფო ინსპექტორის სამსახური ჩაერთო:
„პირად ცხოვრებასთან დაკავშირებული ინფორმაციის გასაჯაროებისას საფრთხე ექმნება პირადი ცხოვრების ხელშეუხებლობის უფლებას, მით უფრო იმ შემთხვევაში, როდესაც ხდება განსაკუთრებული კატეგორიის (სენსიტიური) მონაცემების გასაჯაროება, რომელსაც განეკუთვნება პირის ჯანმრთელობის მდგომარეობასთან, პირისთვის აღკვეთის ღონისძიების შეფარდებასთან, მსხვერპლად აღიარებასთან და დაზარალებულად ცნობასთან დაკავშირებული მონაცემები.
სახელმწიფო ინსპექტორის სამსახურმა დაიწყო შემოწმება მედიასაშუალებებით გავრცელებული დოკუმენტების გამჟღავნების კანონიერებისა და შესაბამის დაწესებულებებში მათი უსაფრთხოებისთვის მიღებული ზომების შესწავლის მიზნით. შემოწმებას დაექვემდებარებიან ის პირები ან/და დაწესებულებები, რომლებსაც შესაძლოა, წვდომა ჰქონდათ ზემოაღნიშნულ დოკუმენტებზე და რომელთა მხრიდან მონაცემთა დამუშავება ექცევა სახელმწიფო ინსპექტორის სამსახურის კომპეტენციაში. შემოწმება წარიმართება შემჭიდროვებულ ვადაში“, _ ვკითხულობთ სახელმწიფო ინსპექტორის მიერ რამდენიმე დღის წინ გავრცელებულ განცხადებაში.

მოკლედ, როგორ ზემოქმედებენ სპეცსამსახურები ადამიანებზე? _ „ქრონიკა+“-ს სამხედრო კონტრდაზვერვის ყოფილი მაღალჩინოსანი, კონსტანტინე ფორჩხიძე ესაუბრა:

_ ბატონო კოტე, პირდაპირ გკითხავთ, 23 წლის პროგრამისტ თამარ ბაჩალიაშვილის იდუმალ გარდაცვალებაში ადგილობრივი ან, სულაც, უცხოური სპეცსამსახურების ხელს ხომ არ ხედავთ?
_ პირდაპირ ვერ ვიტყვი, რომ ამ საქმეში სპეცსამსახურების ხელი ჩანს, მაგრამ ყველაფერი ისე არაა, როგორც თვითმკვლელობას, ასე ვთქვათ, შეეფერება. ყოველ შემთხვევაში, ოჯახისა და ასევე ბაჩალიაშვილის მეგობრის მიერ გასაჯაროებული მასალების მიხედვით, ამ საქმეში ბევრი რამ საეჭვოა.
_ ყველაზე საეჭვოდ მაინც, რა გეჩვენებათ?
_ ძალოვანი უწყებების მოქმედება.
_ ანუ?
_ ძალოვანი უწყებების არაპროფესიონალიზმე რომ აღარაფერი ვთქვათ, ის აჟიოტაჟიც საეჭვოა, რომელიც მომხდარზე შეიქმნა. ცხადია, ისიც საეჭვოა, რომ წარმატებულმა ახალგაზრდა გოგონამ თითქოს თავი მოიკლა. პირადად მე ფსიქოლოგთან მისი ვიზიტებიც საეჭვოდ მეჩვენება და ძალოვანი უწყებების არათანმიმდევრული მოქმედებებიც გარკვეულ ეჭვს აჩენს.
ერთი სიტყვით, ძალიან ბევრი გარემოებაა, რაც იმაზე მიუთითებს, რომ ამ ტრაგედიის ვერსია სრულად ჩამოყალიბებული არაა. არადა, კლასიკურად თუ მივუდგებით, ვერსია ყალიბდება სუბიექტის სუბიექტური მხარისა და ობიექტის ობიექტური მხარის განსაზღვრით. ამ შემთხვევაში კი ნათლად არ ჩანს, რომ საგამოძიებო ორგანოები სწორედ ამ მიმართულებით მოქმედებენ და ყველაზე მარტივი გზა აქვთ არჩეული.
_ კონკრეტულად?
_ თვითმკვლელობაზე მიანიშნებენ, მაგრამ ადამიანები თავს არ იკლავენ, თუ მათ, მინიმუმ, გარკვეული, ფსიქოლოგიური ან ფსიქიკური პრობლემები არ აქვთ.
_ სხვათა შორის, გამოძიებამ თავიდანვე იმაზე დასვა მახვილი, რომ თამარს ფსიქოლოგი ჰყავდა და ამით ირიბად მიანიშნა, რომ მას შესაძლოა, ფსიქოლოგიური პრობლემები ჰქონოდა. თუმცა თქვენ, როგორც პროფესიონალ სპეცსამსახურელს, შეგიძლიათ თუ არა იმის თქმა, რომ ადამიანს გარკვეული პრობლემები უშიშროების სამსახურებმა, ვთქვათ, ულტრაბგერითი ზემოქმედებით შეუქმნან?
_ რა თქმა უნდა, თუმცა ამაზე რომ ვისაუბროთ, ჯერ ის უნდა დადგინდეს, ამ ტრაგედიაში სპეცსამსახურების კვალი იკვეთება თუ არა.
_ ეს კვალი როგორ უნდა დადგინდეს?
_ ერთადერთი, სადაც სპეცსამსახურების კვალი შეიძლება, გამოჩნდეს, თამარ ბაჩლიაშვილის წარსულია.
_ კონკრეტულად?
_ სპეცსამსახურებთან შეხება შესაძლოა, ისე ჰქონოდა, რომ ამაზე თავადაც არაფერი სცოდნოდა.
_ ეს როგორ?
_ ცნობილია, რომ ეს გოგონა საზღვარგარეთ სწავლობდა.
_ დიახ, რამდენიმე სემესტრი საფრანგეთში იმყოფებოდა.
_ საერთოდ, სპეცსამსახურები ხშირად პირდაპირ კი არა, „სხვისი დროშის“ ქვეშ მოქმედებენ.
_ „სხვისი დროშის ქვეშ მოქმედება“ რას ნიშნავს?
_ მან, ვინც სპეცსამსახურების მუშობას იცნობს, იცის, რომ ეს სპეცსამსახურებში ძალიან ცნობილი გამოთქმაა, ანუ სავსებით დასაშვებია, რომ ესა თუ ის სპეცსამსახური თავის საქმიანობას ლეგენდის ქვეშ ახორციელებდეს.
_ და ეს ლეგენდა რას შეიძლება უკავშირდებოდეს?
_ აი, მაგალითად, შეიძლება არსებობდეს რამე შეფუთული ორგანიზაცია, რომლის უკანაც, სინამდვილეში, სპეცსამსახური იდგეს და თავისი ყოველდღიური საქმიანობით მას ემსახურებოდეს.
_ 23 წლის ადამიანი, რომელსაც მაინცდამაინც დიდი ცხოვრებისეული გამოცდილება არ გააჩნია, სპეცსამსახურს რისთვის შეიძლება დასჭირდეს?
_ უბრალოდ, შეიძლება, რიგითი ტექნიკური მუშაკი იყოს და, წეღანდელი თქმისა არ იყოს, არც იცოდეს, რომ სპეცსამსახურის მუშაობაშია ჩათრეული.
_ თუ ადამიანმა არ იცის, რომ სპეცსამსახურის მუშაობაშია ჩათრეული, მაშინ მას ხომ არ მოიცილებენ?
_ „ბაჩალიაშვილის საქმეში“ სპეცსამსახურების ვერსიის ნაკლებად მჯერა, მაგრამ კლასიკურად ასე ხდება _ ადამიანს წვდომა შეიძლება, განსაკუთრებული მნიშვნელობის საიდუმლო ინფორმაციაზე ჰქონდეს.
_ ტექნიკურ მუშაკებს ასეთ ინფორმაციაზე ხელი მიუწვდებათ?
_ დიახ, ტექნიკური მუშაკის შესაძლებლობას გააჩნია. მოკლედ, თუ ადამიანს შესაბამისი IQ აქვს, შესაძლოა, სპეცსამსახურების დაინტერესების ობიექტი ადვილად გახდეს!
_ ბატონო კოტე, თუ არის შემთხვევები, როცა სპეცსამსახური ადამიანის გარდაცვალებას გაითამაშებს და ამ გზით საკუთარი კადრი, ასე ვთქვათ, თამაშიდან გაჰყავს, სინამდვილეში კი პიროვნება ჯანმრთელი და საღსალამათია?
_ არა! ასეთი რამეები მხოლოდ ფილმებში ხდება, თორემ რეალობაში სპეცსამსახური ე. წ. ფაზას ყოველთვის ასრულებს ხოლმე.
ისე, თუ „ბაჩალიაშვილის საქმეს“ დავუბრუნდებით, მომხდარს სპეცსამსახურთან კავშირი შეიძლება, არც ჰქონდეს და ტიპური კრიმინალური შემთხვევა იყოს!
_ რა თქმა უნდა, მაგრამ მითხარით, სპეცსამსახურში რა არსენალი არსებობს საიმისოდ, რომ ადამიანზე ფსიქოლოგიური ზეწოლა მოახდინოს?
_ არსენალი ძალიან დიდია.
_ უფრო კონკრეტულად?
_ აი, მაგალითად, პიროვნების ნებელობაზე მუშაობა, ჰიპნოზი ასევე ქიმიური ზემოქმედება. მოკლედ, ათასი საშუალება არსებობს, რაც პიროვნების ფსიქოლოგიურ თუ ფსიქიკურ მოშლას იწვევს.
შეიძლება, ვინმეს უცნაურად მოეჩვენოს, მაგრამ სპეცსამსახურს ისიც შეუძლია, რომ ადამიანის ქვეცნობიერში ისეთი პროგრამა, ასე ვთქვათ, „დააინსტალიროს“, რომლითაც სუბიექტის მართვა გაცილებით ადვილი გახდება!
_ წეღან ქიმიური ზემოქმედება ახსენეთ. დამიკონკრეტეთ, სპეცსამსახური ობიექტზე ქიმიურად როგორ ზემოქმედებს?
_ ყველაფერი იმით იწყება, რომ სპეცსამსახური აქტიურ ღონისძიებაში გამოსაყენებლად პიროვნების შერჩევას იწყებს და ამის შემდეგ შერჩეული პიროვნების შესაბამისი დამუშავება იწყება, ანუ მასზე ჰიპნოზით თუ ქიმიური საშუალებებით ზემოქმედებენ: ვთქვათ, ადამიანს რამდენიმე დღის განმავლობაში თიშავენ.
სიღრმეებში არ ჩავალ, რადგან ეს გარკვეული საიდუმლოა, რომლის გამჟღავნებაც რეკომენდებული არაა.
_ ადამიანზე ზემოქმედების ზემოხსენებულ ხერხებს მხოლოდ განვითარებული ქვეყნების სპეცსამსახურები იყენებენ?
_ დიახ, უმეტესად, განვითარებული ქვეყნების. ამ მხრივ განსაკუთრებით აღსანიშნავია დასავლეთ ევროპული ქვეყნები. აი, მაგალითად, ამ კუთხით ფრანგული სპეცსამსახურები ძალიან გამოირჩევა.
სხვათა შორის, სწორედ ფრანგული სპეცსამსახურების მიერაა დანერგილი ე. წ. ძიების სისტემა.
_ ანუ?
_ ვგულისხმობ სპეციალურ კომპიუტერულ პროგრამას, რომელიც გარკვეულ სახელებსა და სიტყვებზე რეაგირებს.
_ ეს როგორ?
_ აი, მაგალითად, თუ ადამიანი სიტყვა „პრეზიდენტს“ ან „ტერორისტს“ ახსენებს, ეს შესაძლოა, სპეცსამსახურების ყურადღების ქვეშ მოხვდეს…
ფრანგული სპეცსამსახურების მიერ შემუშავებულ ამ მეთოდს ამერიკელებიც იყენებენ, ბრიტანელებიც და, სხვათა შორის, გერმანელებიც.
_ ამ პროგრამას რუსული ან, სულაც, ქართული სპეცსამსახურებიც იყენებენ?
_ დიახ. საქართველოში ეს სისტემა „ნაციონალების“ დროს დაინერგა. რევოლუციამდე კი, ძირითადად, საბჭოთა პერიოდის ტექნიკითა და ტექნოლოგიებით ვმუშაობდით.
_ ერთი სიტყვით, ბატონო კონსტანტინე, უშვებთ ალბათობას, რომ თამარ ბაჩალიაშვილი სპეცსამსახურების ყურადღების ქვეშ, შესაძლოა, საფრანგეთში სწავლის დროს მოექცა?
_ ამას ვერ ვიტყვი, თუმცა ერთი რამ ნათელია.
_ კერძოდ?
_ რაკი ფსიქოლოგი დასჭირდა, შესაძლოა, მასზე გარკვეული სახის ფსიქოლოგიური ზეწოლა მიმდინარეობდა. სხვათა შორის, ფსიქოლოგი ამბობს, რომ მას ჯანმრთელობის პრობლემები არ ჰქონდა, ამიტომ შესაძლოა, ზეწოლას განიცდიდა გარკვეული პირის, პიროვნებების ან სტრუქტურების მხრიდან.
ცხადია, არ ვამბობ, რომ ასი პროცენტით ასე იქნებოდა, მაგრამ ფსიქოლოგი დასჭირდა, არადა, წეღანდელი თქმისა არ იყოს, ფსიქოლოგი ამბობს, რომ ჯანმრთელობის პრობლემები არ ჰქონდა.
ამასთან, საგულისხმოა, რომ თამარ ბაჩალიაშვილი შეშინებული იყო.
_ ამას რის საფუძველზე ასკვნით?
_ სხვანაირად მამას ელექტროშოკის შეძენას არ სთხოვდა.
_ თამარი, როგორც ირკვევა, 40 კილოგრამს იწონიდა, მიუხედავად ამისა, გასახდომ ჩაის მოიხმარდა, ანუ, ბატონო კოტე, შესაძლოა, დავუშვათ, რომ სიმსუქნის კომპლექსი 23 წლის გოგონას სპეცსამსახურებმა „ჩაუნერგა“?
_ შესაძლებელია. საერთოდ, იმ გარემოს შესწავლაა საჭირო, სადაც მას ყოფნა უხდებოდა, თუმცა ამ შემთხვევაში ოჯახს არ ვგულისხმობ.
სხვათა შორის, ისიც საინტერესოა, თამარის ნატურა საფრანგეთში გამგზავრებამდე და იქიდან დაბრუნების შემდეგ როგორი იყო, ანუ შეიცვალა თუ არა?
ზოგადად, ბევრი კრიტერიუმია, რომელიც პირადად ჩემთვის, უცნობია და ამიტომ დასკვნის გაკეთების საშუალება არ მაქვს, რა ხდება.
_ ბატონო კოტე, გასაგებია, რომ ბევრი რამ არ ვიცით და ამიტომ დასკვნის გაკეთება ჭირს, მაგრამ იმ მასალების მიხედვით, რაც არსებობს, რას ფიქრობთ _ ბაჩალიაშვილის სიკვდილი დანაშაულია თუ არა?
_ დიახ, დანაშაულია.
_ დამისაბუთეთ, რატომ?
_ ადამიანი, მით უმეტეს, თუ ის დაპროგრამებულია, თავის მოსაკლავად ადგილის ძებნას არ დაიწყებს.
_ ამით რისი თქმა გინდათ?
_ თუ ადამიანს სუიციდი აქვს გადაწყვეტილი, მაშინ ის ნებისმიერ ადგილას მოიკლავს თავს!
მოკლედ, ყველაფერ აქედან ჩანს, რომ ამ ადამიანზე გარკვეული ფსიქოლოგიური ზემოქმედების ელემენტები იყო, თუმცა ამ ზემოქმედებას პირი ახდენდა, პირთა ჯგუფი თუ უწყებები, ეს საგამოძიებო ორგანოებმა უნდა გამოიკვლიონ. მაგრამ იმას, რასაც ვუყურებ, ოპერატიული საქმიანობა არ ჰქვია.
_ აბა, რა ჰქვია?
_ ანალოგიური დანაშაული მაშინ რომ მომხდარიყო, როცა მე უშიშროების ორგანოებში ვმუშაობდი, გამოძიებას მთელი მარშრუტის შესწავლით დავიწყებდით.
_ თამარის მარშრუტი გაუჩინარების დღესვე შეისწავლეს და სწორედ ასე დაადგინა პოლიციამ, რომ ბოლოს ე. წ. ჭკვიანმა კამერამ ის სოფელ ხაიშთან დააფიქსირა.
_ მარშრუტის შესწავლა მხოლოდ ვიდეოკამერის ჩანაწერების შესწავლა არ არის.
ოპერატიული-სამძებრო საქმიანობაში მთელი აგენტურულ-ოპერატიული ღონისძიებები უნდა ჩაერთოს, ანუ შესაბამისი აგენტურულ-ოპერატიული ინფორმაციით, შესაძლოა, ვიდეოკამერების ჩანაწერების გარეშეც დადგინდეს, თამარი სად გადაადგილდებოდა.
_ ბატონო კოტე, თქვენი გამოცდილებიდან გამომდინარე, რას ფიქრობთ, თამარზე დაკვირვება დიდი ხნის განმავლობაში მიმდინარეობდა და იგივე ე. წ. შეყვარებული თუ მეგობარიც მიუგზავნეს, თუ ყველაფერი სპონტანურად მოხდა?
_ არა, ყველაფერი დიდი ხნის ზემოქმედების შედეგია. ზოგადად, ზემოქმედება ერთ დღეში შეუძლებელია, ანუ ადამიანზე ზემოქმედება ერთხელ რომ მოახდინოს, იგი მეორე დღესვე ფსიქოლოგთან არ გაიქცევა.
_ ე. ი., უშვებთ, რომ ბაჩანა ლობჟანიძე თუნდაც თვეების თუ წლების წინათ მიზანმიმართულად მიუგზავნეს?
_ ეს კვლევის საგანია, თუმცა ყველაფერი დასაშვებია.
სხვათა შორის, „მთავარზე“ ბაჩანა ლობჟანიძისა და მიშა რამიშვილის გამოსვლა ვნახე და შემიძლია, გითხრათ, რომ ეს ბიჭი ძალიან არაადეკვატურია.
_ რატომ?
_ ეს პიროვნება სპეცსამსახურებისთვის ძალიან ადვილად მოწყვლადია და იმის დაშვებაც შეიძლება, რომ იგი გარკვეული ზემოქმედების ქვეშაა.
_ ამას რის საფუძველზე ამბობთ?
_ ჯერ ერთი, თემიდან თემაზე გადახტება ხოლმე.
_ ასე „გადახტომებით“ ძალიან ბევრი ადამიანი საუბრობს.
_ კი ბატონო, მაგრამ სპეცსამსახურებში სპეციალურად ასწავლიან, რომ ადამიანმა ბევრ რამეზე ილაპარაკოს, მაგრამ ამ ლაპარაკიდან, საერთო ჯამში, ვერავინ ვერაფერი უნდა გაიგოს.
სხვათა შორის, იმასაც მივაქციე ყურადღება, რომ ეს ახალგაზრდა ყმაწვილი ხშირად იცინოდა.
_ მერე?
_ იმ დროს, როცა ადამიანი გარკვეულ კითხვებზე პასუხს გაურბის, იცინის ხოლმე. ამ „შეყვარებულს“ კი საუბრისას მუდმივად ეღიმება, რაც, მინიმუმ, არაადეკვატურია.
_ არაადექვატური რატომაა?
_ ეს ბიჭი, როგორც ამბობს, შეყვარებულია და დიდი ტრავმა გადაიტანა _ კლასიკურად ასეა: როცა საყვარელი ადამიანი ამ ქვეყნიდან მიდის, მით უმეტეს, გაურკვეველ ვითარებაში, ცხადია, ეს შენზეც ზემოქმედებს, მაგრამ ამ პიროვნებას ეს არ ეტყობა.
მოკლედ, ჩემი, როგორც პროფესიონალის აზრით, არათუ ძალიან საინტერესო, არამედ, უშუალოდ ამ პიროვნების კონტაქტებიც შესასწავლია.
ამას გარდა, გამოძიებამ ყველა ის კონტაქტიც უნდა შეისწავლოს, ვისთანაც უშუალოდ თამარს ჰქონდა ურთიერთობა. მინიმუმ, ამ კონტაქტების ტელეფონები სატელეფონო ანძებით უნდა შემოწმდეს.
_ ეს გამოძიებას რას მისცემს?
_ ხომ შეიძლება, ზუსტად იმ მომენტში, სადაც ბოლოს ბაჩალიაშვილი იმყოფებოდა, ვინმეს კვალი აღმოჩნდეს?..
_ ე. ი., თქვენ რომ ხელგეწიფებოდეთ, ბატონო კოტე, თამარ ბაჩალიაშვილის ყველა ნაცნობს შეამოწმებდით და შეისწავლიდით?
_ ყოველ შემთხვევაში, ახლო კონტაქტები აუცილებლად შესასწავლია.
_ და ეს კონტაქტები დროის რა ინტერვალში უნდა შემოწმდეს?
_ მინიმუმ, ბოლო ერთი თვის ვადაში…
_ ისე, თქვენი აზრით, ამ საქმეში აშშ-ის ფედერალური ბიუროს ჩართვა რამეს შეცვლის?
_ დიახ, ბევრ რამეს.
_ სახელდობრ?
_ ალბათ, მიაქციეთ ყურადღება, რომ ბაჩალიაშვილის საქმის გამოძიებაში სახელმწიფო ინსპექტორი ჩაერთო.
_ დიახ, მაგრამ ამაზე ყურადღებას რატომ ამახვილებთ?
_ იცით, გამოძიებაში სახელმწიფო ინსპექტორის ჩართვა რას ნიშნავს?
_ რას?
_ სახელმწიფო ინსპექტორის სამსახური იმიტომ შეიქმნა, რომ სამოხელეო დანაშაული და გადაცდომები შეისწავლოს, ანუ ეს, პრაქტიკულად, გენერალური ინსპექციაა. როცა საქმეში გენერალური ინსპექცია ერთვება, ე. ი., ეს იმას ნიშნავს, რომ გამოძიება ისე არ მიდის, როგორც საჭიროა, თუმცა არ მგონია, რომ შედეგი ამ სამსახურმა მაინც დადოს.
_ რატომ?
_ სახელმწიფო ინსპექტორის სამსახურს ის სტრუქტურები არ აქვს, რომლითაც სამძებრო საქმიანობას განახორციელებს.
ისე, ვიმედოვნებ, რომ ძალოვან უწყებაში ძველი კადრები არიან დარჩენილები, რომლებიც ამ საქმეს ბოლომდე მიიყვანენ!

გიორგი აბაშიძე