წლევანდელი გაზაფხული მთელ „ოცნებას“ თუ არა, პარლამენტის თავმჯდომარეს მძიმედ დაამახსოვრდება, რაც გასაკვირიც არ იქნება _ ირაკლი კობახიძე, რომელიც უმრავლესობის წევრებისთვის „შიდა განაწესის“ დაწერას აპირებს, როგორც ჩანს, შავ დღეშია. ამ ახალგაზრდა კაცის „პოლმესაფლავეობის“ მისია კი შესაძლოა, ნინია კაკაბაძემ შეასრულოს.

ყოველ შემთხვევაში, „საზმაუს“ ბორდის წევრად ნინია კაკაბაძე რომ არ აერჩიათ, მმართველ პარტიაში არსებული შიდა განხეთქილება შესაძლოა, საჯარო არ გამხდარიყო და „ოცნების“ მონოლითურობის ილუზია ცოტა ხანს კიდევ გახანგრძლივებულიყო, მაგრამ დღეს სხვა რეალობაა და, როგორც „ქრონიკა+“-თან ინტერვიუში უმრავლესობის წევრი, ისნის მაჟორიტარი დავით ჭიჭინაძე ამბობს, ამ ადამიანებს, ანუ კობახიძეს და მის რამდენიმე დასაყრდენს, საკუთარ ადგილს მალე აპოვნინებენ. სხვათა შორის, აქამდე დაპირისპირებაში მხოლოდ კობახიძე და მდინარაძე ფიგურირებდნენ. წინამდებარე ინტერვიუში კი დავით ჭიჭინაძე კიდევ ერთ გვარს ახსენებს და ამბობს, რომ ვანო ზარდიაშვილის პარლამენტში ყოფნა სირცხვილია.

მოკლედ, რა ხდება „ოცნებაში“ და რით დამთავრდება პარტიული ომი? _ „ქრონიკა+“ ბოლო დღეების პოლიტიკური სკანდალის ერთ-ერთ მთავარ ფიგურანტს, დავით ჭიჭინაძეს ესაუბრა:

_ ბატონო დავით, ე. წ. ნამდვილებისა და პორტირებულების „განხეთქილების ვაშლად“ ნინია კაკაბაძე იქცა, თუმცა მგონია, რომ „საზმაუს“ ბორდის წევრად ქალბატონი კაკაბაძის არჩევა დაპირისპირების საბაბია და მეტი არაფერი. ამბოხების რეალური მიზეზი რა გახდა?
_ ძველებისა და ახლების ტირაჟირებას ჟურნალისტები ახდენთ, თორემ, სინამდვილეში, ახალი სიკეთეს, ბედნიერებას, იმედსა და მომავალს ნიშნავს.
_ იმის თქმა გინდათ, რომ კობახიძე, თავის გარემოცვიანად, რომელიც, ჯერ კიდევ, ორი წლის წინათ, ანუ 2016 წლის საპარლამენტო არჩევნების დროს „ოცნების“ ახალ სახედ მიიჩნეოდა, იმედთან ასოცირდება?
_ არა!..
_ აბა?
_ ძველი იმას ნიშნავს, რომ აღარავის სჭირდება, მაგრამ სწორედ ძველზე დგას ის, რამაც 2016-ში, ასევე 2017-შიც „ქართულ ოცნებას“ დამაჯერებელი გამარჯვება მოუტანა, მაგრამ, სამწუხაროდ, ვიღაცები ცდილობენ, რომ ეს თავად მიიწერონ. სხვათა შორის, ამას წინათ, ფრინველი გუგული შეგნებულად ვახსენე, რადგან მას აქვს თვისება, სხვის ბუდეში ჩაჯდეს და ყველაფერი სხვისი მიისაკუთროს. იმაში პრობლემას ვერ ვხედავ, რომ წარმატების თანაზიარები იყვნენ, მაგრამ თუ მედიასივრცეს გადავხედავთ, ამ ახალგაზრდა დეპუტატებმა, რომლებიც 2012 წელს არ იყვნენ, გადაკეტეს და მედიაში მხოლოდ თვითონ არიან. შესაბამისად, ისეთი შთაბეჭდილება შეიქმნა, რომ „ქართული ოცნების“ ფუნდამენტური ხედვის მატარებლები თითქოს სწორედ ისინი არიან.
_ ე. ი. არსებობს ერთგვარი პარტიული დირექტივა, რომ მედიაში მხოლოდ ეს ახალგაზრდები ჩანდნენ?
_ სულ მონიტორინგს გავიძახით და მედიის მონიტორინგი რომ ჩავატაროთ, საპარლამენტო ცხოვრებას სულ ეს ადამიანები აშუქებენ და ისე გამოჰყავთ, თითქოს სხვები ყრუ-მუნჯთა საზოგადოების წევრები არიან, არც ლაპარაკი შეუძლიათ და არც აზრი აქვთ. არადა, ამ ადამიანებს მოსახლეობისთვის ის დაპირებები არ მიუციათ, რაც 2012 წელს „ქართული ოცნების“ ბირთვმა მისცა. ეს ახალგაზრდები თითქოს იმ დაპირებულ ვალდებულებებს გაურბიან და ხალხს თავიანთ არსებობას ამადლიან!
_ სხვათა შორის, ირაკლი კობახიძე არ უარყოფს, რომ პარლამენტში ოთხი-ხუთი დეპუტატია, ვისთანაც მჭიდრო კომუნიკაცია აქვს…
_ ეს დეპუტატები იერარქიულად ჩამოთვალა, თორემ შეგვიძლია, უფრო ღრმადაც წავიდეთ. პარლამენტიდან „ქართული ოცნების“ სახელით, ძირითადად, ფრაქციის თავმჯდომარე, მისი მოადგილეები და დაახლოებული პირები გამოდიან.
_ გვარები დაასახელეთ.
_ ყველას გვარი არ მახსოვს, სულ ექვსნი თუ შვიდნი არიან. ეს სწორედ ის ხალხია, რომელმაც ეკა ბესელიას ორჯერ დემარში მოუწყო.
_ დემარში რაში გამოიხატებოდა?
_ რაღაც აბსურდული მოთხოვნა ჰქონდათ.
_ კერძოდ?
_ ითხოვდნენ, რომ კომიტეტის სხდომა, რომელზედაც კანონპროექტი განიხილებოდა, დახურულიყო. კანონპროექტის დახურულ სხდომაზე განხილვა როგორ შეიძლება?
_ დემარშის საბაბი რომელი კანონპროექტი გახდა?
_ რომელი და, _ ე. წ. ქურდული სამყაროსი. ჩემი აზრით, ეს „ქურდულ სამყაროსთან“ ბრძოლის ერთ-ერთი წარმატებული კანონი იქნება და დახურვა კი არა, მისი უფრო მეტი აფიშირება და ხალხამდე მიტანა უნდა მოხდეს, რადგან ვიღაცებმა არ თქვან, მავანის უფლებები ირღვევაო.
_ ეს „ინციდენტი“ იმაზე ხომ არ მიანიშნებს, რომ „ოცნების“ ე. წ. ახალგაზრდულ ფრთას „ქურდულ სამყაროსთან“ ფარული კავშირი აქვს?
_ არა, უბრალოდ, არ გვინდოდა, „ქურდული სამყაროს“ წარმომადგენლებს გაეგოთ, რაზე ვლაპარაკობდითო…
_ კანონი იმისაა, რომ მის შესახებ ყველამ იცოდეს და ეს, ცოტა არ იყოს, უსუსური არგუმენტია.
_ დიახ, ალოგიკური არგუმენტია. ეს, უბრალოდ, ახირება და ძალის დემონსტრირების სურვილი იყო. ყოველ შემთხვევაში, მე ასე გავიგე. სხვათა შორის, რუსლან პოღოსიანი ამ კომიტეტში შესვლას ორი თვეა, ცდილობს, მაგრამ კობახიძე ეწინააღმდეგება, რადგან ამ ახალგაზრდებს პოღოსიანის ამ კომიტეტში ყოფნა არ სურთ!
საერთოდ, ბევრი დარღვევაა, რომელიც ნელ-ნელა დაგროვდა. ყველაზე დიდი გამაღიაზიანებელი კი ისაა, რომ ამ ადამიანებმა ვითომ მხარდაჭერა იგრძნეს და რამდენჯერმე პრემიერის საპირისპირო განცხადებაც გააკეთეს.
_ ყველაფერი ეს გასაგებია, მაგრამ, ბატონო დავით, მითხარით, ამ ახალგაზრდებმა „ოცნებაში“ „ვლასტი“ როგორ აიღეს?
_ ვინ გითხრათ, რომ აიღეს? ძალაუფლება არ აუღიათ! ხომ გაგიგიათ, ბრიყვი მიუშვი ნებასაო… მიშვებულები იყვნენ, გვეგონა, რომ რაღაც ზღვარის ნიშნული გაუჩნდებოდათ… ისე, იქ ერთ-ერთი ისეთი ადამიანია, ქუჩაში რომ დადის, სირცხვილია!
_ ვისზე ამბობთ?
_ თუნდაც, ზარდიაშვილი! ეს ქართველი ერის სირცხვილია!
_ თუ ბატონი ზარდიაშვილი ქართველი ერის სირცხვილია, აბა, „ოცნებაში“ როგორ მოხვდა?
_ აი, ესეც სირცხვილია! სულ მაგას ვამბობ: მრცხვენია, ასეთი ადამიანის გვერდით მე არ უნდა ვიჯდე!
_ ბატონო დავით, ისე ლაპარაკობთ, რომ გეგონება, „ოცნების“ დეპუტაცია მე დავაკომპლექტე. სიტყვამ მოიტანა და 2016 წელს საარჩევნო სია ვინ და როგორ შეადგინა?
_ სიის შედგენისას მე არავის დავუპატიჟებივარ.
_ შეიძლება, მაგრამ თუ „რაზბორკებია“, ყველაფერი ხომ უნდა გაარკვიოთ?
_ რა თქმა უნდა, ბოლომდე გავყვებით იმიტომ, რომ ამ ადამიანებმა ქართველი ხალხის აზრს და, პირდაპირ ვიტყვი, ოცნებას დიდი ზიანი მიაყენა! ამიტომ, ვფიქრობ, რომ „ქართული ოცნების“ სახეები კოლექტიური ზარდიაშვილები არ უნდა იყვნენ! დღეს პარლამენტის ბირთვს კოლექტიური ზარდიაშვილები და კოლექტიური ბოკერიები არ უნდა წარმოადგენდნენ. მათი ერთობლივი გადაწყვეტილებები საზოგადოებას აღიზიანებს და შეცდომაში შეჰყავს!
_ ზარდიაშვილი რიგითი დეპუტატი კი არა, კომიტეტის თავმჯდომარის მოადგილეა…
_ დიახ, პირველი მოადგილეა და მაგაზეა საუბარი, რომ ადამიანმა თავისი ადგილი ვერ გაიგო! ამიტომ უნდა ვაჩვენოთ და მივუთითოთ, თუ სად არის მისი ადგილი!
სხვათა შორის, ძალიან კარგი ფილმია „იღბლიანი ჯენტლმენები“, სადაც ერთ-ერთ გმირს თავის ადგილს უთითებენ! თუ ვინმეს დააინტერესებს, შეუძლია, ეს ფილმი ნახოს!
_ სხვათა შორის, ადგილს თქვენც გითითებენ. ყოველ შემთხვევაში, ამბობენ, რომ „ოცნებაში“ ე. წ. ამბოხებულთა „შავი სია“ არსებობს…
_ „შავი სია“ რას ნიშნავს?
_ რას ნიშნავს და, შეიძლება, „ოცნებიდან“ გაგრიცხონ…
_ როგორ უნდა გაგვრიცხონ? ეს აბსურდია! კოლექტიური ზარდიაშვილები სიით მოსულები არიან, ჩვენ კი მაჟორიტარები, ანუ ის ადამიანები ვართ, რომლებსაც ხალხთან გასვლა, თვალებში ჩახედვა და დაპირების მიცემა არ გვერიდებოდა. ახლაც ვცდილობთ, ამ დაპირებებს გავყვეთ. სხვათა შორის, თავის დროზე, ზარდიაშვილის მაჟორიტარად დაყენებას ცდილობდნენ _ უნდოდათ, ისნის ქვედა ზონაში, სადაც დღეს მაჟორიტარი ბექა ნაცვლიშვილია, კენჭი ეყარა. არადა, 2012 წელს იქაურ ამომრჩევლებს, რომლებიც „ქართულ ოცნებას“ უჭერდნენ მხარს, ჯოხითა და თოფით დასდევდა!
_ წეღან ბოკერია ახსენეთ, ანუ იმის თქმა გინდათ, რომ კოლექტიურ ზარდიაშვილებსა და ბოკერიას შორის ფარული კომუნიკაციაა, უფრო სწორად, ის, რაც დღეს „ოცნებაში“ ხდება, ბოკერიას ინტერესია?
_ ალბათ, რაღაც ახალი კონფიგურაციის შექმნა უნდათ.
_ კონკრეტულად?
_ დაპირისპირების მიზეზი, მაგალითად, სასამართლო რეფორმაა _ პრემიერმა განაცხადა, მოსამართლეების უვადო დანიშვნისგან, იქნებ, თავი შევიკავოთო და ობსტრუქცია მოუწყვეს, რადგან ეს მათთვის სასიცოცხლო საკითხია და დაინტერესებულები არიან.
ე. ი. ხალხი მოვატყუეთ, მხოლოდ სააკაშვილი გავაგდეთ, სხვებმა კი სახელები გადაირქვეს _ ზოგმა „ევროპული საქართველო“ დაირქვა, ზოგმა _ „ქართული ოცნება“ და ახლიდან ცდილობენ, ბირთვი შეკრან! კოლექტიური ზარდიაშვილები და კოლექტიური მურუსიძეები _ ეს იქნება მომავალი ხელისუფლების ახალი სახე, რასაც ესენი ძერწავენ? არ გამოვა! ჩემი პერსონიდან გამომდინარე უსამართლობას ვერ ვეგუები და სწორედ ამის გამო მივბრუნდი პოლიტიკაში, თორემ იქ დაბრუნების სურვილი არ მქონდა!
_ „ოცნების“ გვერდით 2012 წელსაც იყავით?
_ დიახ, გვერდით რიგითი ჯარისკაცივით ვედექი.
_ მაშინ კობახიძე ან, სულაც, ზარდიაშვილი სად იყვნენ?
_ არ ვიცი, მათი სახელებიც კი არ ვიცოდი…
_ ეს ადამიანები, როგორც „მეოცნებეები“, თქვენს აღქმაში როდის გაჩნდნენ?
_ 2016-ში… სხვათა შორის, ბევრის სახელი პირდაპირ პარლამენტში გავიგე.
_ „ოცნების“ საპარლამენტო სია ვინ შეადგინა?
_ მგონი, პოლიტსაბჭომ… აქამდე ეს საინტერესო არ იყო, ახლა კი ყველაფრის გარკვევას დავიწყებ! საერთოდ, ჩვენ მიმტევებელი ერი ვართ და ყველას ყველაფერი უნდა მივუტევოთ, მაგრამ თუ ვერ პოულობს, ადამიანს თავისი ადგილი უნდა მიუჩინო!
_ ვიდრე უკმაყოფილება საჯარო გახდებოდა, შიდა გარჩევები გქონდათ?
_ არა. ხაზს ვუსვამ: ბოლო წვეთი, რამაც ჩემი აღშფოთება გამოიწვია, ის იყო, რომ ამ ადამიანებმა ანგარიშის გასწორება მასთან მოინდომეს, ვინც „ქართული ოცნების“ გვერდით პირველივე დღეებიდან დგას და გედი ფოფხაძეს პირობები წაუყენეს. ვინ არიან, როგორ შეიძლება, მათ ვინმეს პირობები წაუყენონ?!
_ არ დაგავიწყდეთ და, გედი ფოფხაძე, თავდაპირველად, „თავისუფალი დემოკრატი“ იყო და ოცნებელი მას შემდეგ გახდა, რაც „თავისუფალმა დემოკრატებმა“ კოალიცია დატოვა…
_ სხვათა შორის, თავის დროზე, ხმა დადიოდა, საკონსტიტუციო ცვლილებების მერე უმრავლესობიდან ბევრ დეპუტატს გავუშვებთ, რადგან საჭირო აღარ იქნებიანო და ამის წინააღმდეგიც პრემიერი გამოვიდა. მოკლედ, ამ ჯგუფს ბევრი ჩვენგანი ხელს უშლის!
_ სხვათა შორის, „საზმაუს“ სამეურვეო საბჭოს წევრობაზე ნინია კაკაბაძეს, როგორც ვიცი, მამუკა მდინარაძემ არ მისცა ხმა. ესეც რამე თამაშია, ბატონო დავით?
_ გედი ფოფხაძეს წინა დღეს პირობა მისცეს, რომ ნინია კაკაბაძეს ისევე არ დაუჭერდნენ მხარს, როგორც წინა კენჭისყრაზე.
_ ანუ არსებობდა შეთანხმება, რომ უმრავლესობის არც ერთ წევრს ნინია კაკაბაძისთვის ხმა არ უნდა მიეცა?
_ კი, მაგრამ ძალიან ცუდი როლი იმ მონიტორმა ითამაშა, რომელზედაც წვდომა პარლამენტის ხელმძღვანელობას აქვს და ხედავს, ხმას ვინ აძლევს და ვინ _ არა, ანუ რომ დაინახეს, საკმარისი ხმა იყო მოგროვილი და ბევრი კოლეგა თხოვნით შეცდომაში შეიყვანეს, თავი დაიზღვიეს და თვითონ აღარ მისცეს ხმა.
შეთანხმებების დარღვევის უფლება არავის აქვს, თორემ შეუთანხმებელზე ვინმემ რამე თქვა?
_ პრემიერიც საქმის კურსში იყო, რომ უმრავლესობას ნინია კაკაბაძისთვის მხარი არ უნდა დაეჭირა?
_ პრემიერი ასეთ პრიმიტიულ რაღაცებში არ ერევა და ამიტომაც ვიღაცებს ჰგონიათ, რომ ამ ქვეყანას თავიანთ ჭკუაზე ატარებენ! ზოგიერთი ჩემი კოლეგის გულუბრყვილობის გამო ცდილობენ, ვიღაც-ვიღაცებს დაანახვონ, რომ ისინი ამ ქვეყანაში გავლენის მატარებლები არიან.
_ ე. ი. უნდათ, ივანიშვილს დაანახვონ, რომ გავლენა აქვთ?
_ არა, პრემიერს. ივანიშვილი რა შუაშია? მთავარი მიზანი, რაც „ქართულ ოცნებას“ ჰქონდა _ „ნაციონალური მოძრაობის“ ხელისუფლებიდან გაშვება, ბატონმა ბიძინამ შეასრულა. 2013 წლის მერე ბიძინა ივანიშვილი პოლიტიკაში აღარ არის, ესენი კი შემოიპარნენ… ის მიზანი, რის გამოც ბიძინა ივანიშვილმა „ქართული ოცნება“ გააერთიანა, შესრულებულია _ „ნაცმოძრაობა“ ხელისუფლებაში აღარ არის!
_ იქიდან გამომდინარე, რასაც თქვენ ყვებით, არ მგონია, მიზანი შესრულებულად ჩაითვალოს!
_ ერთი წამით, რა! ამათ ძალიან მალე მოევლებათ! ვიმეორებ: ამ ადამიანებმა თავიანთი ადგილი ვერ იპოვეს და მივეხმარებით, რომ იპოვონ! ზოგს ჰგონია, რომ ყველაფერს მხოლოდ ლაპარაკად დავტოვებთ და მიაჩნიათ, რომ რაღაცას დააძველებენ და გადაატარებენ, მაგრამ არა, ეს ძალიან აქტუალური და მნიშვნელოვანი საკითხია!
პლებისციტის ჩატარებაც რომ დაგვჭირდეს, „ქართულ ოცნებაში“ მათი ყოფნა უფრო მნიშვნელოვანია თუ, ვთქვათ, ჩემი, გედის, ზაზა პაპუაშვილის? ჩავატარებთ და ხალხის აზრის „დავდებთ“!
_ სხვათა შორის, ამბობენ, რომ 65 დეპუტატს სუსი აკონტროლებს. მართლა ასეა? საერთოდ, ამ დაპირისპირებაში სუსი ვის მხარესაა?
_ ვინ დათვალა? რატომ 65 და არა _ 70? სუსი ჩვენი ქვეყნის უსაფრთხოებას იცავს და დეპუტატების მასთან თანამშრომლობაში, ვფიქრობ, ცუდი არაფერია. ჩვენ, დეპუტატები, ვალდებულნი ვართ, ვიზრუნოთ როგორც ჩვენი ქვეყნის უსაფრთხოებაზე, ასევე, თუ შევნიშნავთ, რომ რომელიმე ჩინოვნიკი ხელმრუდია, ამის შესახებ ინფორმაცია სუსს მივაწოდოთ!
სუსის უფროსის მოადგილე, გიორგი ლილუაშვილი, ჩვენი კოლეგა იყო და მასთან ყველას მეგობრული ურთიერთობა გვაქვს. მისი იქ დანიშვნა იმიტომ გაგვიხარდა, რომ შეგვიძლია, პირდაპირ მივაწვდინოთ ხმა.
_ „ოცნებაში“ შიდა დაპირისპირება მაშინაც იყო, სანამ ლილუაშვილი პარლამენტიდან სუსში გადავიდოდა?
_ იცით, რა ხდება? ჩვენ ალალად, კეთილი განწყობით მივედით, რომ საქმე ერთად გვეკეთებინა და მთავრობასთან უნისონში გვემუშავა. პირველი დაპირისპირება და აზრთა სხვადასხვაობა კონსტიტუციამ გამოიწვია _ მაჟორიტარების, მიწის გასხვისების საკითხები, მაგრამ ნელ-ნელა შევჯერდით და კონსტიტუცია მივიღეთ…
ისე, ჩემი პირველი აღშფოთება ფილარმონიაში მომხდარმა ინციდენტმა გამოიწვია.
_ იმას გულისხმობთ, კობახიძემ დარბაზი რომ დატოვა?
_ არ შეიძლება, ხალხს გაექცე, შენი აზრი რაც უნდა მიუღებელი იყოს. დიახ, მან (კობახიძემ) თანაგუნდელები მიატოვა! განსხვავებული აზრის მოსმენა სერიოზულ დისკომფორტს უქმნის! როცა პარლამენტის თავმჯდომარე ხარ და გინდა, ლიდერი იყო, ხუთი კაცის კი არა, ქვეყნის ლიდერობაზე უნდა გქონდეს პრეტენზია და ადამიანების აზრის გათვალისწინების თუ არა, მოსმენის უნარი მაინც უნდა გქონდეს!
_ ბატონო დავით, ირაკლი კობახიძე დამოუკიდებელი მოთამაშეა თუ ვინმეს აზრებს ახმოვანებს?
_ თუ კობახიძე ვინმეს აზრების გამხმოვანებელია, სხვადასხვა არხი არსებობს და ჩვენამდე მოვიდოდა აზრი, აი, კობახიძე ზოგჯერ პრემიერის საპირისპირო აზრს რომ ახმოვანებს, ეს თქვენც უნდა გაიზიაროთო…
_ ბატონო დავით, პოლიტიკაში მესიჯების ენას დიდი მნიშვნელობა აქვს. სწორედ მაშინ, როცა „ოცნებაში“ დაპირისპირება კულმინაციას აღწევს, არენაზე ფინანსთა მინისტრი, მამუკა ბახტაძე ჩნდება და პოლიტიკურ განცხადებებთან ერთად იერიში ბანკებზეც მიაქვს. ბანკების წინააღმდეგ დიდი ხანია, თქვენ ილაშქრებთ. გამოდის, რომ ამ განცხადებით ბახტაძემ, რომელიც ბიძინა ივანიშვილთან დაახლოებულად მიიჩნევა, „პადძერშკა“ მოგცათ?
_ ეს არ ვიცი, მაგრამ ფინანსთა მინისტრი ახალგაზრდა კაცია და ახალგაზრდა სწორედ ისეთი უნდა იყოს, როგორიც ბახტაძეა! მისი ყველა ინიციატივა ხალხის საკეთილდღეოდ არის მიმართული და იმ პრობლემასაც ზუსტად ჩასწვდა, რასაც ბანკები ქმნიან და რაზედაც საარჩევნო კამპანიიდან მოყოლებული ვამბობ, რომ ბანკებსაც თავიანთი ადგილი უნდა ჰქონდეს!
ბანკების სიხარბემ ყველა ზღვარს გადააჭარბა და არ შეიძლება, ასეთ ღარიბ ქვეყანაში მილიარდების მოგების სურვილი გქონდეს! თუ ქართველები ქვეყნის გარეთ მილიარდერები ხდებიან, ამას მივესალმები, მაგრამ თუ ამ ქვეყანაში მილიარდის მფლობელი გახდები, ეს ნიშნავს, რომ ქვეყანა გაძარცვო!
_ ბატონო დავით, ამ ფონზე, ბახტაძის განცხადება, პრაქტიკულად, თქვენი მხარდაჭერაა, რაც შეიძლება, პოლიტიკურ მესიჯად აღვიქვათ?
_ მე ასე არ ვუყურებ… მას შემდეგ, რაც ფინანსთა მინისტრმა ბანკებზე განცხადება გააკეთა, ყველას, ვინც აქამდე მეუბნებოდა, ბანკები ჩამოიშლებიანო, უცებ „გადაუტრიალდათ“…
_ ჩვენში დარჩეს და, „ამბოხება“ მაჟორიტარებმა დაიწყეთ, ანუ მაჟორიტარებს უფრო მეტი თავისუფლება გაქვთ და პარტიულ კონიუნქტურას არ ემორჩილებით?
_ თავისუფლება კი არა, ჩვენ უფრო მეტი ვალდებულება გვაქვს. ამათმა პინგ-პონგმა უკვე ყველას ყელში ამოუყვანა: აქეთ „ევრონაცი“, იქით _ „ნაცი“ თუ გადაღებილი „ქართული ოცნებისტი“, ხალხი დაანევროზეს და გააგიჟეს! ამიტომ ჩვენ უნდა ვილაპარაკოთ, ვისაც ხალხთან გვაქვს პირადი ურთიერთობა!
_ ეს ომი რით დამთავრდება?
_ ეს ომი არ არის.
_ აბა, რა არის?
_ ეს არის ის, რაც ქვეყანასა და ხალხს სჭირდება. ძალაუფლების მთავარი წყარო ხალხის მხარდაჭერაა, ამიტომ ვისაც ხალხის მხარდაჭერა ექნება, დანარჩენიც მის გვერდით დადგება!
ამ პარტიაში პარტიის თავმჯდომარისა და გენერალური მდივნის _ გიორგი კვირიკაშვილისა და კახა კალაძის მიერ ვარ მიღებული. უბრალოდ, კალაძე დღეს თბილისის მერიაში მუშაობს, სადაც ასევე დიდი ცვლილებები მიდის, რადგან ჭაობი იქაც შეიქმნა. შიდა განახლებას უნდა მივყოთ ხელი, რადგან 2016 წლის არჩევნებიდან დღემდე საქართველოს პარლამენტს რეიტინგი არ მოემატა. კულუარებში რაც უნდა ვილაპარაკოთ, მერე გამოდიან და საკითხებს მასის მეშვეობით წყვეტენ, ეს „ქართულ ოცნებას“ მხოლოდ აზიანებს!
მაგათ ასაკში რომ ვიყავი, სხვა გასართობი მქონდა, რაც მაგ ასაკის ადამიანს ბუნებრივად უნდა ჰქონდეს! ეგეც გადახრაა, 30 წლის ასაკში კაცს პოლიტიკოსობა რომ გინდა! გახედე, რა სილამაზეა, იცხოვრე, დატკბი და როცა რაღაც ცხოვრებისეული გამოცდილება მოგივა, დაჯექი და პოლიტიკოსი მერე იყავი! შენ თვითონ არაფერი იცი და ვის რა უნდა ასწავლო?
_ ბატონო დავით, რეზიუმე რომ გავაკეთოთ, კობახიძეების, ზარდიაშვილებისა და სხვების პოლიტიკური დასამარება გარდაუვალია?
_ კი, ამაში დარწმუნებული ვარ! მდგომარეობა, რომელიც ღმერთმა აჩუქა, ვერ შეირგეს!
_ ღმერთმა აჩუქა თუ ვინმე გავლენიანმა ადამიანმა?
_ ღმერთმა. ამ ქვეყანაზე ყველაფერი თხოვნითაა. ალბათ, ჩვენზე მაგრად თხოულობდნენ, მაგრამ თხოვნის მექანიზმს ჩვენც ჩავრთავთ და ჩვენც მივიღებთ!
_ ეს „ღმერთი“ ივანიშვილი ხომ არ არის?
_ კარგი, რა! ამ მკრეხელობას თავი დაანებეთ!

გიორგი აბაშიძე