თბილისის საქალაქო სასამართლოში ე. წ. ნავთლუღის სპეცოპერაციის საქმეზე პროცესები კარგა ხანია, მიმდინარეობს. მოწმეთა ერთი ნაწილი ამტკიცებს, რომ სპეცოპერაციის ადგილზე კუდ-ის მაშინდელი უფროსი დათა ახალაია პირადად იმყოფებოდა და მან ერთ-ერთი ლიკვიდირებულის მისამართით საკონტროლო გასროლაც განახორციელა, მეორე ნაწილი აცხადებს, რომ ახალაია შემთხვევის ადგილზე ოპერაციის დასრულების შემდეგ მივიდა და ეჭვმიტანილების ლიკვიდაციაც სპეცდანიშნულების რაზმმა მოახდინა.

 

„ქრონიკა+, ამჯერად, კუდ-ის ყოფილი მაღალჩინოსნის, დათო კუხიანიძის ინტერვიუს გთავაზობთ. ის დღესდღეობით საქართველოდან წასულია და უკრაინაში ცხოვრობს.

 

_ დათო სად მუშაობდით და რა შედიოდა თქვენს მოვალეობაში?

 

_ კუდ-ში კონსტიტუციური უსაფრთხოების დეპარტამენტში მე-3 მთავარი სამმართველოს უფროსი ვიყავი. ჩემს მოვალეობაში შედიოდა კორუფციის წინააღმდეგ ბრძოლა; ასევე, ქვეყანაში ეკონომიკური დივერსია რომ არ განხორციელებულიყო, ამის კონტროლი; ტენდერები, რომლებიც ტარდებოდა, იქ რომ რუსული, ან აფხაზური და ოსური ინტერესი არ ყოფილიყო ჩადებული, ამის კონტროლი და დანარჩენი კიდევ საიდუმლოა…

 

_ მაშინ დავიწყოთ ბოლო თემით, ტენდერებით… რა სიტუაცია იყო, იგებდნენ თუ არა ტენდერებს ხელისუფლებასთან დაახლოებული პირები და თქვენ რა ზემოქმედების ბერკეტი გქონდათ იმისათვის, რომ ტენდერების შედეგები შეგეცვალათ?..

 

_ კონტროლი იყო. თუ ოპერატიულ ინფორმაციას მივიღებდით, ვთქვათ, გარიგებული ტენდერები თუ იქნებოდა, ამაზე ვმუშაობდით…

 

_ იყო გარიგებული ტენდერები?

 

_ რამდენიმე ღონისძიება ჩავატარეთ, 2008-ში თუ 2009-ში ეკონომიკის სამინისტროს თანამშრომლები დავიჭირეთ, რკინიგზის დეპარტამენტში გამოვავლინეთ. უამრავი შემთხვევა იყო,  მოსამართლეები და პროკურორები დაგვიჭერია.

 

_ უკანონო დავალებების შესრულება თუ გიხდებოდათ?

 

_ არა, უკანონო არაფერი ისეთი დავალება არ მიმიღია. რომ მიმეღო, მერწმუნეთ, ახლა თავისუფლად არ ვიქნებოდი, ეგრევე დამიჭერდნენ…

 

_ მიუხედავად ამისა ქვეყანაში არ იმყოფებით და სამსახურში არ ხართ და მაშინ რატომ?

 

_ ქვეყნის დატოვების ძირითადი მიზეზი იყო ის, რომ ნავთლუღის ამბებზე სპეცოპერაციასთან დაკავშირებით ჩვენების მიცემას მთხოვდნენ…

 

_ თქვენი გვარი პირველად შალვა თათუხაშვილის ჩვენებაში ვნახე, რომ თქვენ ნავთლუღის სპეცოპერაციის დროს სპეცრაზმთან ერთად შემთხვევის ადგილზე იყავით. ეს სიმართლეა, თუ შალვა თათუხაშვილს ჩვენებაში იმიტომ დააწერინეს, რომ საქმე შეკერილიყო?

 

_ არა, მე იქ როგორ არ ვიყავი, მაგრამ ბოლოს მივედი, როდესაც უკვე ყველაფერი მორჩენილი იყო და ჩვენებაშიც ვთქვი.

 

_ და რა ხდებოდა ნავთლუღის სპეცოპერაციის დროს, რა ინფორმაციას ფლობთ?

 

_ მე ნავთლუღის სპეცოპერაციის დროს რა ინფორმაციაც მქონდა, თავიდან ბოლომდე, ავსახე ჩვენებაში, არაფერი დამიმალავს და არც დამიმატებია. მანდ ღონისძიება ჩაატარა მე-2 მთავარმა სამმართველომ. უბრალოდ, როგორც დამხმარე ოპერატიული ჯგუფი, იქვე, ახლოს ვიყავით და სროლები რომ გავიგონეთ, მერე შევედით, თორემ არც ღონისძიების დაგეგმარებაში, არც ადგილის შერჩევაში, არც სპეცრაზმის განლაგებაში მონაწილეობა არ მიმიღია.

 

_ დათო, ნავთლუღის საქმესთან დაკავშირებით როდის დაგკითხეს?

 

_ თუ არ ვცდები, პირველად 2013 წელს დამკითხეს.

 

როგორც ვთქვი, ამ საქმესთან დაკავშირებით ჩემთან არც ოპერატიული ინფორმაცია ყოფილა შემოსული, არც დაგეგმარებაში მიმიღია მონაწილეობა. ჩვენთან ასეთი პრაქტიკა იყო: თუკი ღონისძიებას რომელიმე სამმართველო გეგმავდა, თუ პირადი შემადგენლობის რაოდენობა არ ჰყოფნიდა, სხვა სამმართველოებს იხმარდნენ ხოლმე. მეც ვიხმარდი ხოლმე ღონისძიებაზე, როცა ჩემი პირადი შემადგენლობა არ მყოფნიდა. ანალოგიური სიტუაცია იყო აქაც, ჩვენი სამმართველო დაიხმარეს, მანქანით ვიდექით შორიახლოს და ბრძანებას ველოდებოდით. შემდეგ პერიმეტრი გავაკონტროლეთ, რამე ისეთი რომ არ მომხდარიყო…

 

_ თუ შეიძლება, დავაკონკრეტებ: იქ საუბარია იმაზე, რომ დათა ახალაიამ ბოლოს, როცა სპეცოპერაცია დასრულდა, ერთ-ერთი გარდაცვლილის მისამართით საკონტროლო გასროლა განახორციელა. თქვენ რა დროს მიხვედით? თქვით, რომ ბოლო წამს მიხვედით და რა იყო ეს ბოლო?

 

_ თავიდან ყველანი მანქანაში ვისხედით, მარტო სპეცრაზმი იყო ადგილზე შესული. როდესაც სროლები დასრულდა, რამდენიმე წამის ინტერვალში, რაციით იყო თუ ტელეფონით, ზუსტად არ ვიცი, გადავდივართო და ტერიტორიაზე შევედით…

 

_ რა სურათი დაგხვდათ, როცა ტერიტორიაზე შეხვედით?

 

_ ეს მნიშვნელოვანია, რომ ტერიტორიაზე ჩვენი შესვლის ვიდეოც არის გადაღებული: ახალაია, მე, ალანია ერთად შევდივართ და იქ უკვე სამი პიროვნება გვხვდება ლიკვიდირებული. სამი პიროვნების ცხედარი დაგვხვდა, ერთად შევედით, იქ ვნახე დათა ახალაია. მერე არც საკონტროლო გასროლა ყოფილა, ეგ სრული აბსურდია. რასაც პროკურატურა ამბობს, შეთითხნილია. ნებისმიერი ობიექტური გამომძიებელი საიდანაც არ უნდა ჩამოიყვანონ, როცა საქმეს თავიდან ბოლომდე გაეცნობა, იტყვის, რომ ეს ანომალიაა…

 

როგორც ვიცი, ამ სპეცოპერაციას მე-2 მთავარი სამმართველო ატარებდა, ის იყო ამ ღონისძიების დამგეგმავი, ხოლო ადგილზე, სადაც სპეცოპერაცია ჩატარდა, შალვა თათუხაშვილი სპეცრაზმელებთან ერთად შევიდა სპეცოპერაციაზე. ჩვენ რომ ახლო-მახლო ვიყავით და დავდექით, მკაცრად გაგვაფრთხილეს, მანქანიდან არავინ გადმოსულიყო და ტერიტორიას არ მიახლოებოდა, რადგან ტერიტორიაზე სპეცრაზმი იმყოფებოდა.

 

_ როდის მოგთხოვეს ჩვენების შეცვლა და ჩვენების მიცემა? ვინ იყო პირი, ვინც ამაზე გელაპარაკებოდათ?

 

_ პირველად რომ დამკითხეს, ქალაქის პროკურატურაში დამიბარეს. გამომძიებლები იყვნენ ძნელაშვილი და გილაური, თუ გომელაური… საქმის გამომძიებლები ისინი იყვნენ და მთხოვდნენ მეღიარებინა, რომ თითქოს დავინახე, როგორ მოახდინეს ახალაიამ და მაზმიშვილმა გასროლა…

 

_ ასე პირდაპირ გთავაზობდნენ ამას?

 

_ პირდაპირ ასე მკითხეს, _ ხომ ნახე, რომ იყვნენ, რატომ მალავ? მერე შენს თავს დააბრალებ, რაც მოგივა! რის გამო იღუპავ თავს, ცხოვრებას რის გამო და ვის გამო იღუპავ? ხომ იცი, ჩვენ მერე რა შეგვიძლია და ა. შ. დეტალებში აღარ დავკონკრეტდები. მოკლედ რომ ვთქვა, სერიოზული ზეწოლა იყო. ამ პროკურატურაში მარტო ერთხელ არ ვყოფილვარ, რამდენჯერმე ამიყვანეს და ერთსა და იმავეზე ამახვილებდნენ ყურადღებას, რამე პოზიცია ხომ არ შევიცვალე, ხომ არ გადავიფიქრე და ხომ არ ვითანამშრომლებდი პროკურატურასთან? მე პროკურატურასთან ისედაც ვთანამშრომლობდი, იმიტომ, რომ რაც სიმართლე იყო, ის დავწერე და ვილაპარაკე, მაგრამ ეგ პროკურატურისთვის მიუღებელი იყო…

 

_ რა იყო პროკურატურის ამოცანა, _ რა უნდოდათ ნავთლუღის სპეცოპერაციასთან დაკავშირებით?

 

_ რა უნდოდათ და, თითქოს, ამ სამი პიროვნების ლიკვიდაცია რომ მოხდა, შემდეგ ახალაიამ, მაზმიშვილმა (მგონი, ქარდავაზეც იყო საუბარი), თითქოს შემდეგ საკონტროლო გასროლები ამათმა მოახდინეს და თითქოს ეს მე დავინახე. უნდოდათ, საქმე გაემყარებინათ, რაც უფრო ბევრი ადამიანი იტყოდა, რომ დიახ, ნამდვილად ამ პიროვნებებმა მოახდინეს საკონტროლო გასროლა.

 

_ დათო, როგორ ფიქრობთ, ზეწოლის შედეგად მისცა შალვა თათუხაშვილმა ანალოგიური ჩვენება, რასაც თქვენგან ითხოვდნენ?

 

_ რა თქმა უნდა, 100%-ით ვარ დარწმუნებული… მე შალვას ოჯახთანაც მილაპარაკია ამ საკითხზე, შალვა ძალიან სერიოზული ზეწოლის ქვეშ იყო.

 

_ რაიმე ხომ არ იცით შალვა თათუხაშვილის საეჭვო ვითარებაში გარდაცვალებასთან დაკავშირებით?

 

_ არა, არა, მართლა არ ვიცი, ეგ ძალიან ბურუსით მოცულია, შალვას მკვლელობა ძალიან ბურუსით მოცულია… სიკვდილი თუ მკვლელობა ეგეც საკითხავია.

 

_ რა ინფორმაციას ფლობთ, _ სხვა ადამიანებსაც თუ სთხოვდნენ ანალოგიური ჩვენების მიცემას?

 

_ როგორც ვიცი, გიორგი მაზმიშვილი მსხვერპლია, რომ ანალოგიური ჩვენება არ მისცა, რასაც მე მთხოვდნენ.

 

_ გიორგი მაზმიშვილი დღეს დაკავებულია?

 

_ გიორგი დღეს ნავთლუღის სპეცოპერაციის საქმეზეა დაკავებული და, თუ შეიძლება ასე ითქვას, მისი ბრალი ის არის, რომ პროკურატურასთან არ ითანამშრომლა…

 

_ და ახალაიასა და დანარჩენ სხვებზე არ მისცა ანალოგიური ჩვენება…

 

_ კი…

 

_ დათო, თქვენ როდის დატოვეთ საქართველო?

 

_ სასამართლომდე ქვეყნიდან არ მიშვებდნენ. სასამართლოზე გამოვედი და პროკურატურას ვუთხარი, რომ იმ ჩვენებას მივცემდი, რაც მათ უნდოდათ, თავი რომ დამეღწია მათგან. მერე სასამართლოზე სიმართლე ვილაპარაკე, რომ ეგეთ რამ არ ყოფილა და სასამართლოს მერე, სამ თუ ხუთ დღეში, უკვე ქვეყანა დავტოვე.

 

_ იმის მერე პროკურატურიდან რაიმე კონტაქტი თუ ყოფილა, ან შემოთვლები? თქვენზე ძებნა გამოცხადებულია თუ არა?

 

_ არა, ძებნა გამოცხადებული არ არის, მაგრამ ოჯახში რამდენჯერმე დარეკეს: შინაგან საქმეთა სამინისტროდან ვართ, პროკურატურიდან ვართ… მერე როდესაც ადვოკატებს ვუთხარი, გაერკვიათ, რატომ რეკავდნენ და რა უნდოდათ, თქვეს, აი, გასაუბრება გვინდა, რაღაც ორწუთიანი საქმე გვაქვსო. ერთი წლის განმავლობაში ეს იყო სისტემატური ხასიათის, მერე ცოტა მიწყნარდა… როცა ქვეყნიდან გამოვდიოდი, კონტროლზე ვიყავი დაყენებული. სარფის საბაჟოზე წავედი, არც ბარგი წამიღია და არც არაფერი, არ მინდოდა ეფიქრათ, რომ ქვეყნიდან გავრბოდი. საზღვარზე ერთი-ორი საათი გამაჩერეს. ეგრევე დამირეკა პროკურორმა, გამომძიებელმა მელაშვილმა, _ დავით, სად მიდიხარ, რატომ მიდიხარ? მერე საზღვრიდან გადავურეკე, რომ საზღვარზე დაკავებული ვიყავი. გამაფრთხილეს, რომ უნდა დავბრუნებულიყავი, თორემ ძალიან ცუდად წავიდოდა ჩემი საქმე. მე ვუთხარი, _ ოჯახის საქმე მაქვს, ერთი-ორი დღით მივდივარ, არც ტანსაცმელი მიმაქვს და არც არაფერი, ხომ ხედავთ, გადავალ და დავბრუნდები-მეთქი. ეგ იყო და ეგ… გამიშვეს და, ღმერთის წყალობით, მაგათ კლანჭებს თავი დავაღწიე…

 

ჩემთან ადვოკატი ჩამოვიდა, სადაც ვიდეომიმართვა ჩავწერეთ. პროკურატურაში განცხადება შეიტანეს, რომ ჩემზე ზეწოლა ხორციელდებოდა. ამ განცხადებას არანაირი რეაგირება, იოტისოდენაც კი, არ მოჰყოლია.

 

_ ეს მხოლოდ ერთი გახმაურებული საქმე იყო, როცა ჩვენების მიცემას გთხოვდნენ, თუ პროკურატურას რაიმე სხვა წინადადებებიც ჰქონდა?

 

_ პროკურატურას წინადადება ჰქონდა, ახალაიას ირგვლივ დანაშაულებრივი საქმე თუ რამე ვიცოდი, პროკურატურისთვის ინფორმაცია მიმეცა და ჩემზე ზეწოლა მყისიერად შეწყდებოდა, სამსახურში დამტოვებდნენ, რა თქმა უნდა, იმ თანამდებობაზე არა, მაგრამ თავს გამანებებდნენ და ნორმალური ცხოვრების საშუალებას მომცემდნენ. ჩემგან უნდოდათ დათა და ბაჩო ახალაიებზე, ვანო მერაბიშვილზე ინფორმაციის აღება.

 

_ ბაჩო ახალაია ხომ თქვენი უშუალო უფროსი არ იყო, მასზე რას ითხოვდნენ?

 

_ ბაჩო ახალაია ჩემი უშუალო უფროსი არ ყოფილა, მაგრამ მეგობრული ურთიერთობა მაკავშირებდა, უნივერსიტეტში ერთად ვსწავლობდით, დასამალი ამაში არც არაფერია. პირიქით, ვამაყობ, რომ ბაჩო ჩემი მეგობარი იყო და დღემდე ჩემი მეგობარია. ეგ იყო მიზეზი…

 

_ სხვა გახმაურებულ ამბებზე რას გვეტყოდით, რამე ხომ არ იცით?

 

_ მუხროვანის ამბოხის საქმეზე დამკითხეს; ემზარ კვიციანთან დაკავშირებით ვიყავი დაზარალებულად ცნობილი და მაგ საქმეზეც სასამართლოზე მომიწია გამოსვლა, კლოუნადა რომ ჩაატარეს კვიციანთან მიმართებით. რა ვიცი, რა ხდება ქვეყანაში, კვიციანი დაგვასვეს თავზე…

 

_ კვიციანის რომელ საქმეზე იყავით დაზარალებული?

 

_ კოდორის საქმეზე: როცა ჩვენ შვედით, ალყაში მოგვაქციეს. მაგის კადრებიც არსებობს. მანდ ფეხი დავიზიანე და დაზარალებულად მცნეს…

 

დღეს ემზარ კვიციანი საქართველოს პარლამენტის დეპუტატია… ეს ანომალიაა! არ ვიცი, ჩვენი ქვეყანა საითკენ მიექანება, არ ვიცი! კაცი პირდაპირ თანამშრომლობდა რუსულ სპეცებთან, დავალებებს იღებდა, აფხაზეთის ტერიტორიიდან დატოვა საქართველო, დისშვილი „კანონიერი ქურდია“. არ ვიცი, ამ ხალხს რა სჭირს, ვერ გავიგე! მეტი რა მტკიცებულება უნდა დაუდო და მეტი რა ინფორმაცია უნდა მიაწოდო, რომ ეგეთი შეცდომები არ დაუშვას?! კობალაძე, კვიციანი, ან ტრისტან წითელაშვილი როგორ შეიძლება, რომ ეს პიროვნებები გარეთ თავისუფლად დადიოდნენ და ჭკუას გვარიგებდნენ, ტელევიზიით გვმოძღვრავდნენ?! ქვეყნის სირცხვილია, რა!..

 

_ „კოდორი 2007“-ის მონაწილე სპეცრაზმელების ნაწილი ძალიან საეჭვო ვითარებაში დაიღუპა და ჩვენ ვიცით, რამდენიმე მათგანი ციხეშიც ზის, შამათავა და სხვები… უკავშირებთ თუ არა თქვენ ამას რუსულ სპეცსამსახურებს?

 

_ რუსული სპეცსამსახურების წინააღმდეგ მაგ მიმართულებით ვმუშაობდით. რომ გითხრათ, კოდორის საქმეზე რაიმე მონაწილეობა მაქვს მიღებული-მეთქი, არა… რაც შეეხება მუხროვანის ამბოხს, მანდ თავიდან ბოლომდე ვფლობ ინფორმაციას, თუ რა მოხდა. საქმეს კონტრდაზვერვა ამუშავებდა, მაგრამ ინფორმაციას ვფლობ, რომ ოთანაძე, წკრიალაშვილი, ამირიძე პირდაპირ რუსული სპეცსამსახურებისგან იღებდნენ დავალებებს. ეგ იყო დასაბუთებული. აუდიო და ვიდეოჩანაწერები არსებობდა. სად გააქრეს ეგ ყველაფერი? ოთანაძე გაამართლეს და გვმოძღვრავს, რომელიც პირდაპირ „ფსბ“-ს დავალებით მოქმედებდა. დღეს საქართველოში რუსული „ფსბ“ ზის პარლამენტსა და მთავრობაში… რუსული სპეცსამსახურები ჩვენი მთავრობის სახით ლეგალიზებული არიან…

 

_ რა იყო მუხროვანის ამბოხის უკან? გარდა იმ ხალხისა, რომელიც ჩვენ ვიცით, სახელები და გვარები არსებობს. რაიმე კონკრეტული ხომ არ შეგიძლიათ გვითხრათ, იმ ვიდეოჩანაწერებში რა იყო?

 

_ გეგმა იყო… მე მგონი, ფართო საზოგადოებისთვის ეს არ არის თავიდან ბოლომდე ცნობილი…

 

_ არ არის ცნობილი და ამიტომ გეკითხებით…

 

_ დიახ, რა განვრცობა უნდა მოჰყოლოდა მუხროვანის ამბოხს: ამ ამბოხის მთავარი მიზანი ის იყო, რომ ნაწილები გამოსულიყვნენ, თბილისის შემოსასვლელები დილით გადაკეტილიყო, მოეხდინათ შინაგან საქმეთა და თავდაცვის მინისტრის ლიკვიდირება, ან დაეკავებინათ… ალყაში უნდა მოექციათ პრეზიდენტის სასახლე და უნდა აეღოთ ტელევიზია. გაქვთ თუ არა ინფორმაცია არ ვიცი, მაგრამ მერე უნდა წამოსულიყო რუსეთის ნაწილები აფხაზეთიდან და ოსეთიდან, ვინაიდან საქართველოში არეულობა დაიწყო და რუსეთის მოქალაქეები უნდა „დაეცვათ“. ყოველივე ამის შემდეგ ასპარეზზე გამოდიოდა ნინო ბურჯანაძე, რომელიც რუსულ ტანკებს წინ გადაუდგებოდა, გააჩერებდა და მესიად მოგვევლინებოდა. ამის შემდეგ უნდა შექმნილიყო დროებითი სამხედრო საბჭო, რომელიც ვადამდელ საპარლამენტო არჩევნებს დანიშნავდა, ბურჯანაძე მოიგებდა და ქვეყნის სათავეში მისი მომხრეები მოვიდოდნენ. ეს იყო თავიდან ბოლომდე რუსული სპეცსამსახურების გაწერილი გეგმა.

 

_ ამის აუდიო და ვიდეოჩანაწერები არსებობდა?

 

_ კი, კი, როგორც ვიცი, ამის ჩანაწერები არსებობდა, სადაც „ზამპალიტა“, ოთანაძე საუბრობენ ამ ყველაფერზე…

 

_ და სად წავიდა ეს მტკიცებულებები?

 

_ არ ვიცი, სად წავიდა ეგ მტკიცებულებები, ნამდვილად არ მაქვს წარმოდგენა, მაგრამ ეს მტკიცებულებები რომ იყო, 100%-ით შემიძლია დაგიდასტუროთ. მოვა დრო, ქართველი ერი, საზოგადოება გამოფხიზლდება! დადგება დრო და, ალბათ, ყველა ეს ჩანაწერი გამოჩნდება და დღის სინათლეს იხილავს.

 

როდესაც „ქართული ოცნება“ ხელისუფლებაში მოვიდა, სპეცსამსახურების ყველა თანამშრომელს სათითაოდ იბარებდნენ, თუ ვინმეს ისეთი თანამდებობა ეკავა, ყველასთან კონკრეტულად მიდიოდა გასაუბრება, _ ან ითანამშრომლებდნენ და ინფორმაციებს მისცემდნენ, წინა მთავრობასთან დაკავშირებით იმუშავებდნენ მათ წინააღმდეგ, ან დატოვებდნენ სამსახურებს და მათზე სისხლის სამართლის საქმე აღიძრებოდა.

 

_ ეს თანამშრომლობა რით გამოიხატებოდა?

 

_ იმით, რომ ინფორმაციები უნდა მიმეტანა ახალაიების, მერაბიშვილის, ან მთავრობის რომელიმე წევრის საწინააღმდეგოდ. რაიმე ფარული ჩანაწერები უნდა გამეკეთებინა, ან თუ რამე მქონდა, მიმეტანა. აი, როგორც ლელუაშვილმა ითანამშრომლა და ძალიან ბევრმა დღეს კი ციხეშია…

 

ყველა გადაყარეს! „ქართულმა ოცნებამ“ ხალხიც მოატყუა და ვინც მათთან ითანამშრომლა, ისინიც მოატყუა.

 

_ სამეგრელოში კასრებში აღმოჩენილ ფირებზე რას მეტყვით?

 

_ სამეგრელოს კასრებთან დაკავშირებით მართლაც წარმოდგენა არ მაქვს, რა ინახებოდა მანდ, მაგრამ თუ რამე გადაღება კეთდებოდა, არ ვიცი. რაც მე შემეხება და ჩემს ირგვლივ ვინც იყო, თუ რამე გადაღებას ვახორციელებდით, ეს გახლდათ ყველანაირად კანონიერი, მიმართული და ჩაწერილი იყო ქვეყნის საკეთილდღეოდ და სასიკეთოდ…

 

_ მათ შორის პირადი ცხოვრების ფირების გადაღებასაც ახორციელებდით?

 

_ სპეცსამსახურის თვითმიზანი არასდროს ყოფილა, რომ გადაგვეღო ვისთან ვინ იწვა. მარტო საქართველოში კი არა, მსოფლიოს ნებისმიერ ქვეყანაში, როდესაც ინტერესის ობიექტი გამოიკვეთება, მას 24-საათიან რეჟიმში აკვირდებიან, მიმდინარეობს ჩაწერა… ამ 24-საათიანი თვალთვალის პერიოდში შეიძლება იქ პირადი ცხოვრებაც იყოს, შეიძლება საინტერესო ინფორმაციაც იყოს, რის გამოც მას უთვალთვალებ, შეიძლება საერთოდ არაფერი იყოს. მიზანი ყოველთვის არის ინფორმაციის გაშიფრვა. საქმესთან დაკავშირებით შენთვის საინტერესო ინფორმაციას იტოვებ. მე პირად კადრებთან შეხება არ მქონია. რაზეც ვმუშაობდი, საქმესთან დაკავშირებით იყო. მანდ რა კადრები იყო შენახული, მართლა არ ვიცი, ვერ გეტყვი.

 

_ ისევ რუსული სპეცსამსახურების თემას რომ დავუბრუნდეთ, ინფორმაცია მაქვს, რომ მას შემდეგ, რაც „ქართული ოცნება“ ხელისუფლებაში მოვიდა, ღარიბაშვილის ნათესავებმა გავლენები შს სამინისტროზე მოიპოვეს. ძალიან ბევრი თქვენ მიერ მოპოვებული „გრიფით საიდუმლო“ დოკუმენტი გადაეცა რუსულ სპეცსამსახურებს. თუ გაქვთ ანალოგიური ინფორმაცია, რომ ეს მასალები საქართველოდან გატანილია?

 

_ კი, მაქვს ეგ ინფორმაცია, რომ  ძალიან ბევრი მასალა აგენტურის შესახებ, კადრები, ჩანაწერები, უამრავი ინფორმაცია საქართველოდან გატანილია. შეიძლება ითქვას, რუსულ მხარესთან მყისიერად მოხდა ვაჭრობა, რომ ბიზნესები დაელაგებინათ, ღვინო, ვაშლი, მანდარინი გაეტანათ… ღარიბაშვილის ნათესავებმა და ჩვენმა მთავრობამ მანდარინზე, ღვინოსა და ვაშლზე გაცვალეს ქვეყნის უსაფრთხოება. ეგ არის მწარე სიმართლე!..

 

_ ახლა საუბარია, რომ „ენვერი“ და ხურჩის ტერაქტი დადგმული იყო, გორის ტერაქტი რუსებს არ მოუწყვიათ. ამ ფაქტებზე რას მეტყვით?

 

_ თუ შეიძლება, თქვენს კითხვას კითხვითვე ვუპასუხებ, _ როდესაც ახლად არჩეული მთავრობა ქვეყნის სტრატეგიულ ობიექტებს, ქვეყნის გრიფით საიდუმლო ინფორმაციას თვითონ აწვდის რუსულ სპეცსამსახურებს, რა თქმა უნდა, ამ ჩატარებულ ღონისძიებებზე, რომელიც რუსულ სპეცსამსახურებს უკავშირდებოდა, როგორ შეიძლება თქვან, რომ ობიექტურად ჩატარებული იყო? რა თქმა უნდა, იტყვიან, რომ შეთითხნილია. ეგ არის სუფთა რუსული ხელწერა, თითქოს რუსებს საქართველოსთვის საზიანო არაფერი გაუკეთებიათ, თითქოს რუსეთი ჩვენი მეგობარია და თითქოს ჩვენ ვიგონებდით რაღაც-რაღაცებს, რომ რუსეთის წინააღმდეგ მიგვემართა ხალხის აზრი, რაც არის აბსურდი. რა თქმა უნდა, ამ ყველაფერს რუსები ატარებდნენ. უამრავი ტერაქტი აღმოვფხვერით და უამრავი განსაცდელი ავაცილეთ ქვეყანას, რაც არ ითქმება და არ ილაპარაკება.

 

_ რომან შამათავაზე რას მეტყვით? ინფორმაცია მაქვს, რომ სწორედ რუსული სპეცსამსახურების დაკვეთით ზის დღეს ის ციხეში…

 

_ რა თქმა უნდა… რომან შამათავა ქვეყნის უანგარო პატრიოტია, მთელი თავისი შეგნებული ცხოვრება ქვეყნის ტერიტორიულ მთლიანობას, ქვეყნის ერთიანობას შეალია და მისი „დანაშაულიც“ ეგ არის. ეს არ შედიოდა ჩვენი ხელისუფლების ინტერესებში და ამიტომ გამოკეტეს ციხეში. რა თქმა უნდა, დავალება პირდაპირ რუსეთიდან მოდიოდა… საერთოდ, პირდაპირ რუსეთიდან მოდის დავალება, _ ეს პიროვნება მოსაშორებელია, ეს პიროვნება არ შედის ჩვენს ინტერესებში, ეს პიროვნება საშიშია, ეს პიროვნება აქ გავუშვათ, ეს პიროვნება გავაქციოთ, ეს პიროვნება დავიჭიროთ… პირდაპირ „ფსბ“-ს „ლუბიანკა“ იძლევა მითითებებს… ეს მთავრობა არის „ფსბ“-ს განყოფილება! შეგიძლიათ, ასე დაწეროთ: საქართველოს დღევანდელი მთავრობა არის „ფსბ“-ს თბილისის განყოფილება…

 

მე არსად ვიმალები, არსად გავრბივარ, დადგება დრო და საქართველოში დავბრუნდები, მერე კიდევ უფრო დეტალურად ვისაუბრებ ამ ხელისუფლების მავნებლურ პოლიტიკაზე…

 

 

 

ელისო კილაძე