რას ემსახურებოდა პრეზიდენტ ზურაბიშვილის „შაქარაშვილის საქმესთან“ დაკავშირებით გაკეთებული განცხადება? როგორ პასუხობს ოპოზიცია მმართველი გუნდის ბრალდებას, რომ ამ თემას ისინი პოლიტიკური მიზნებისთვის იყენებენ? რა მოლოდინი უნდა გვქონდეს საქმის გამოძიებასთან მიმართებით?
ამ და სხვა პოლიტიკური თემების შესახებ „ქრონიკა+“ „ევროპული საქართველოს“ წევრ ირმა ნადირაშვილს ესაუბრა:

_ ქალბატონო ირმა, რა კითხვები გაქვთ „შაქარაშვილის საქმის“ დეტალებზე და დღევანდელი მოცემულობით რა იკვეთება?
_ სანამ გამოძიება მიმდინარეობს, შესაძლოა, ძალიან ბევრ თემაზე საუბარი სპეკულაცია იყოს. მით უმეტეს, რომ ამ საქმის შესახებ ბევრი ინფორმაციაა და მედია აქტიურად არის ჩართული საქმის გამოძიებაში. ჩვენ ყოველდღე უამრავ ახალ დეტალს ვიგებთ, შესაბამისად, ძნელია გაარკვიო, რა არის მართალი და რა _ ტყუილი. ეს ყველაფერი ერთმანეთშია არეული, მაგრამ მთავარი ის არის, რომ ამ ზედაპირული ინფორმაციითაც კი ნათელი ხდება სამართალდამცველი ორგანოების შესაძლო არაკომპეტენტური მუშაობა. საზოგადოებაში ჩნდება ეჭვი, რომ ამ საქმესთან დაკავშირებით სისტემური დანაშაულია, რადგან საერთოდ არ არსებობს ნდობა არც პროკურატურისა და არც პოლიციის მიმართ. მე დროებითი საგამოძიებო კომისიის წევრი ვიყავი და ვნახე, რამდენი თეთრი ძაფით შეკერილი დეტალი იყო „სარალიძის საქმეში“, როგორ ცდილობდნენ პროკურატურის მაღალჩინოსნები თავიანთი გავლენის გამოყენებას და საქმის მიმართულების შეცვლას. როდესაც პროკურატურა და პოლიცია იარაღია პოლიტიკური პარტიის ხელში, ასეთ შემთხვევაში ნდობა ამ უწყებების მიმართ დაბალია და სწორედ ამით უნდა ავხსნათ, რომ შაქარაშვილის ჯერ კიდევ გამოუძიებელ საქმეზე საზოგადოებას ძალიან ბევრი ეჭვი აქვს.
_ არის ასეთი შეფასება, რომ ხელისუფლებას წინასაარჩევნოდ არ აწყობს ამ საქმის გამოუძიებლობა, აქედან გამომდინარე, საქმეზე ობიექტური ჭეშმარიტიება დადგება. რამდენად იზიარებთ ამ მოსაზრებას და არის თუ არა იმის საშიშროება, რომ „შაქარაშვილის საქმე“ თაროზე შემოიდოს?
_ თუ საზოგადოების რეაქციით ვიმსჯელებთ, რომელიც ძალიან მწვავეა, არ მგონია, რომ „შაქარაშვილის საქმე“ ისევე შემოიდოს თაროზე, როგორც შემოიდო „აფგან მუხთარლის საქმე“. დღემდე არ ვიცით, შუა თბილისიდან როგორ აღმოჩნდა ადამიანი დილით ბაქოში და სანამ ეს ხელისუფლება იქნება, ამის შესახებ ვერც გავიგებთ, რადგან არის ეჭვი ამ საქმეში ხელისუფლების ჩარევასთან დაკავშირებით. საზოგადოების ინტერესი და საზოგადოებრივი აზრის ზეწოლა „შაქარაშვილის საქმესთან“ მიმართებით იმდენად მაღალია, რომ არ ველოდები მის თაროზე შემოდებას. ამ შემთხვევაში არ აქვს მნიშვნელობა, ამ საქმის გამოძიება დაემთხვეოდა თუ არა წინასაარჩევნო პერიოდს. გამოძიება ბოლომდე მივა და დასრულდება, უბრალოდ, რამდენად ადეკვატურად და ობიექტურ ჭეშმარიტებად აღიქვამს საზოგადოება გამოძიების შედეგს, ეს არის მთავარი შეკითხვა, თორემ, რა თქმა უნდა, ხელისუფლება, რაც არ უნდა კორუმპირებული, სისტემურად მოშლილი და სუსტი იყოს, მაინც იძულებული იქნება, დაექვემდებაროს საზოგადოებრივი აზრის ზეწოლას და ეს საქმე რაც შეიძლება სწრაფად დაამთავროს. არ ველოდები ამ საქმის გადადებას, მაგრამ არ ვარ დარწმუნებული, რომ საზოგადოებას არ შეეპარება ეჭვი იმ გამოძიებაში, რომელსაც „ქართული ოცნების“ პოლიტიკური იარაღი, ამ შემთხვევაში, შინაგან საქმეთა სამინისტრო და პროკურატურა ატარებს.
_ მმართველი გუნდის წარმომადგენლები აცხადებენ, რომ ამ თემას ოპოზიციური პარტიები პოლიტიკური მიზნებისთვის იყენებენ. რას უპასუხებთ მათ ამ განცხადებას?
_ მათ განცხადებას შემიძლია მხოლოდ ერთი სახელი დავარქვა: ეს არის უტიფრობა, რადგან ჩვენი პოლიტიკური გუნდი, „ევროპული საქართველო“, ყოველთვის თავს იკავებს სპეკულაციისგან. მით უმეტეს, როდესაც ასეთი სენსიტიური საკითხია, რა თქმა უნდა, არ შეიძლება, რომ საკუთარი პოლიტიკური კაპიტალი ასეთ თემაზე ააშენოს პოლიტიკურმა პარტიამ. ჩვენ ამას არ ვაკეთებთ, არც დღეს და არც არასდროს. იმ პოლიტიკური ძალისგან, რომელმაც არჩევნების წინა დღეს თავის ოპონენტებს ბავშვის ქვევრში ჩახრჩობა დააბრალა, შემდეგ ამაზე ააგო პოლიტიკური კამპანია და ამით მიიღო საარჩევნო ხმები, მათგან ყოველგვარი მითითება, რომ ვიღაც სპეკულირებს, ჩვეულებრივად უტიფრობაა. ყოველთვის, მახსენდება მათი პირველი მთავარი პროკურორის, არჩილ კბილაშვილის განცხადება, რომელმაც თქვა: რომ არა გირგვლიანისა და რობაქიძის გარდაცვალება, ჩვენ ხელისუფლებაში ვერ მოვიდოდითო. ჩვენ, „ევროპული საქართველო“, კი ის პოლიტიკური გუნდი არ ვართ, რომელიც ტრაგიკულ ფაქტებზე ცდილობს თავისი პოლიტიკური მომავლის აშენებას. „ქართული ოცნების“ მხრიდან ასეთი წამოძახება უტიფრობაა და სხვა არაფერი. თუ ვინმე სპეკულანტია პოლიტიკური მიმართულებით და არ ითვალისწინებს სახელმწიფო ინტერესებს, ეს არის პირდაპირ „ქართული ოცნება“.
_ პრეზიდენტ ზურაბიშვილის განცხადება „შაქარაშვილის საქმის“ შესახებ, როცა მან თქვა „ვაჟკაცობა მესმის, როდესაც ჩხუბი ერთი ერთზე მიდისო“, ხელს უწყობს თუ არა ძალადობის რომანტიზებას?
_ მაშინ, როცა ვხედავთ, რომ სახელმწიფო ძალადობს თავის მოქალაქეებზე, ოჯახებში, ასევე მოზარდებზე არის ძალადობა და ბოლოდროინდელი შაქარაშვილის ძალიან ტრაგიკული ფაქტი, ამ პირობებში პრეზიდენტის ასეთი განცხადებები, მინიმუმ, უპასუხისმგებლო და გამაღიზიანებელია. სამწუხაროდ, სალომე ზურაბიშვილის არც ერთი გამოსვლა არ მახსენდება, რომელიც გაჯერებული არ იყოს სიბრიყვეებით, შემდეგ კი თავის მართლება უხდება. მისი ყველა განცხადება სახელმწიფო ინტერესებს აზიანებს და პრეზიდენტის ინსტიტუტის დისკრედიტაციაა. ასეა, როდესაც ადამიანები კი არ გირჩევენ, არამედ შენთვის ადგილს ყიდულობენ. ზურაბიშვილი არ არის ღირსეული პრეზიდენტი. მისი არსებობა ამ პოზიციაზე სირცხვილია, არც მიკვირს, როდესაც ის ასეთი სისულელეებით გამოირჩევა. ველოდებოდი კიდევაც მისგან მსგავსს განცხადებებს, _ საარჩევნო კამპანიამაც ასე ჩაიარა, მისი გამონათქვამების „გაპრავებას“ მთელი სახელისუფლებო გუნდი ცდილობდა.
_ „ევროპულმა საქართველომ“ საკონსტიტუციო ცვლილებებს პირველი მოსმენით მხარი დაუჭირა, თუმცა მანამდე აცხადებდით, რომ გიორგი რურუას უკანონო პატიმრობის გამო კენჭისყრაში არ მიიღებდით მონაწილეობას. რით ახსნით თქვენი გუნდის გადაწყვეტილებას?
_ იყო საფრთხე და წარსული გამოცდილება გვკარნახობდა, რომ ივანიშვილს შეუძლია თავისი სიტყვების დარღვევა და ისე მოქცევა, რომ თითქოს დაპირება არ გაუცია. იყო საშიშროება, რომ „ქართულ ოცნებას“ პირველი მოსმენის დროს ჩაეგდო ეს ცვლილებები, რომელიც საზოგადოების დაკვეთაა. საზოგადოებას სურს, რომ მისი მთავრობა იყოს კოალიციური და არა ერთი მმართველის ქვეშ მოქცეული. თავიდან რომ აგვეცილებინა კანონპროქტის ჩაგდების საფრთხე და ივანიშვილს საბაბად არ მოედო, რომ ჩვენი მხარდაჭერის გარეშე ხმები არ ეყოთ, ჩვენ მაშინაც განვმარტეთ, _ სწორედ ამის გამო შევედით პირველ მოსმენაზე და ვთქვით, რომ 8 მარტის შეთანხმება თუ არ შესრულდებოდა, მომდევნო მოსმენებზე აღარ მივცემდით ხმას. შესაბამისად, ივანიშვილს მანევრირების საშუალება ჩაეკეტა, პირველ მოსმენაზე თუ ექნებოდა ხმები, შემდეგ მოსმენაზე ვეღარ იტყოდა, რომ არ ჰყოფნიდა. მას კი ყველაფრის თქმა შეუძლია, მაგრამ ამ შემთხვევაში ეს გაუძნელდებოდა. ამით იყო ჩვენი გადაწყვეტილება განპირობებული.
_ თუმცა თქვენი მხარდაჭერის გარეშეც ჰყოფნიდათ პირველივე მოსმენაზე ხმები.
_ დიახ, მაგრამ ჩვენი კენჭისყრაში მონაწილეობით და ამ საკითხის დაზღვევით რა დაშავდა?! მას შემდეგ, რაც ეს კანონპროექტი გავიდა, დაიწყეს საუბარი, რომ ჩვენ გარეშეც ჰყოფნიდათ ხმები, მაგრამ ჩვენ რომ არ მიგვეღო მონაწილეობა, იყო საშიშროება ეთქვათ, რომ ხმები არ ჰყოფნიდათ. გარდა ამისა, ჩვენ ამ ნაბიჯით ჩვენს პარტნიორებს ვაჩვენეთ, რომ მზად ვიყავით საუბრის გასაგრძელებლად, ნაბიჯი გადავდგით 8 მარტის შეთანხმების შესრულებისკენ და შემდეგ უკვე ბურთი იყო ივანიშვილის მოედანზე რურუას საკითხის შესახებ.
_ საკონსტიტუციო ცვლილებების მიღების შემდეგ მმართველი გუნდი აცხადებდა, რომ ახალი ოპოზიცია აღმოჩნდა კონსტრუქციული. პოლიტოლოგების ნაწილმა მათი განცხადებები მოქმედი ოპოზიციის სატელიტი პარტიებით ჩანაცვლების მცდელობად აღიქვა. თქვენ როგორ გაიგეთ ამ ფრაზის კონტექსტი?
_ საერთოდ არანაირად არ აღვიქვამ ამ ფრაზის კონტექსტს! მთავარია, ყველა პოლიტიკოსმა იცოდეს, რომ ძალაუფლების წყარო არის ხალხი და ხალხი ირჩევს, ვინ იქნება ხელისუფლებაში და ვინ _ ოპოზიციაში. ამას არც ირაკლი კობახიძე, არც სოფიო კილაძე და არც მათი „პიარშიკები“ ირჩევენ, რომლებმაც ახლა მესიჯბოქსი შეადგინეს, რომ რადიკალურები და კრიმინალურები გვეძახონ, პარალელურად კი მათი პარტიიდან გუშინ გასული პოლიტიკოსები აქონ. ისინი ვერ გადაწყვეტენ, ვინ იქნება ოპოზიციაში. გავიხსენებ ივანიშვილის განცხადებებს მისი მოსვლის გარიჟრაზე, როცა ის ამბობდა, რომ ოპოზიციაში უნდა ყოფილიყო ნინო ბურჯანაძე, მაგრამ ამას ივანიშვილი ვერ წყვეტს. სამწუხაროდ, მას შეუძლია გადაწყვიტოს, როგორ მოაწყოს აბასთუმანი, შეაერთოს თუ არა მდინარე, ტბა ან მთა. როდესაც ხელისუფლება იწყებს ლაპარაკს, რომ მას უნდა ოპოზიციის შეცვლა და ოპოზიციაში იმ ადამიანების ყოფნა, ვინც მოსწონს, ეს არის სწორედ ავტორიტარიზმისკენ სვლა. კობახიძის მესიჯბოქსზე კი საერთოდ არაფერია დამოკიდებული.
_ „ქართულმა ოცნებამ“ წინასაარჩევნო სამზადისი დაიწყო და საარჩევნო შტაბის უფროსად ირაკლი კობახიძე დანიშნა. რისი მანიშნებელია ეს თქვენთვის?
_ ირაკლი კობახიძე გამოირჩევა პოლიტიკური ოპონენტების მიმართ არაადეკვატური და, მათ შორის, არაკორექტული გამონათქვამებით. შეგახსენებთ, რომ ის ფაშისტებს ეძახის თავის პოლიტიკურ ოპონენტებს, რაც თუნდაც იმას ადასტურებს, რომ მას გააზრებულიც არ აქვს, რამხელა შეურაცხყოფაა საერთოდ საზოგადოებისთვის ასეთი ტერმინების ბრახუნი. კობახიძე გამოირჩევა სიძულვილის ენის ტირაჟირებით. ის იყო ერთ-ერთი მოთავე, როდესაც ბიძინა ივანიშვილმა დაარღვია თავისი კონტრაქტი საზოგადოებასთან და დაარღვია პროპორციული საარჩევნო სისტემის მიღებასთან დაკავშირებით შეთანხმება. მისი საარჩევნო შტაბის ხელმძღვანელად დანიშვნა ნიშნავს, რომ „ქართული ოცნება“ წინასაარჩევნო ბრძოლაში ისევ გამოიყენებს აკრძალულ მეთოდებს. შეიძლება, განმეორდეს კორცხელის ინციდენტი ან ვიხილოთ უარესი შემთხვევებიც, მაგრამ არის მომენტი, როდესაც ხელისუფლებას ვეღარ შველის ვერც საჯარო მოხელეების ჯარი, ვერც ადამიანების მოსყიდვა და ვერც ძალადობა. ოქტომბერში სწორედ ეს წუთი დადგება, როდესაც ამ მეთოდების მიუხედავად ოპოზიცია ერთიანი ძალებით შეძლებს ივანიშვილის ოპოზიციაში გაშვებას.
_ „ფორმულას“ დაკვეთით Eდისონ ღესეარცჰ-ის კვლევებში მმართველი გუნდი 39%-ით ლიდერობს, „ევროპულ საქართველოს“ კი 5% გაქვთ. როგორ გეგმავთ ამ მაჩვენებლის გაზრდას 2020 წლის საპარლამენტო არჩევნებისთვის?
_ ვფიქრობ, რომ კვლევების მიმართ უნდობლობის საფუძველი არ გვაქვს, მათ შორის, არც ჩვენს ნაწილში. მიმაჩნია, რომ კორონა ეპიდემიამ, ზოგადად, ყველა ქვეყნის მთავრობის მიმართ ნდობა გაზარდა და გამონაკლისი არც საქართველოა, მაგრამ ამის მიუხედავად „ქართული ოცნება“ 40%-ზედაც კი არ ასულა. არჩევნებამდე დარჩენილია რამდენიმე თვე, ამ დროის განმავლობაში საარჩევნო კამპანიის ფარგლებში მოსახლეობას უფრო ნათლად ავუხსნით, როგორ ვხედავთ ქვეყნის განვითარებას, ქვეყნის კოალიციური მთავრობით მართვას, რა ნაბიჯები უნდა გადაიდგას, რომ ეკონომიკა ბოლომდე არ გასწორდეს მიწასთან, რასაც დღეს ხელს უწყობს საქართველოს მთავრობა. ვფიქრობთ, მოვახერხებ ჩვენი რეიტინგის გაზრდას და არჩევნებში სასურველი პროცენტის დადებას. რაც შეეხება „ქართულ ოცნებას“, კვლევებმაც აჩვენა, რომ ოპოზიციას ნამდვილად აქვს შესაძლებლობა, „ქართული ოცნება“ ვერ მოხვდეს უმრავლესობაში და ვერ დააკომპლექტოს მთავრობა.
_ თქვენ აღნიშნეთ, რომ მოახერხებთ არჩევნებში სასურველი შედეგის დადებას, როგორია თქვენთვის სასურველი შედეგი?
_ ჩვენი პარტია და, რა თქმა უნდა, ყველა პოლიტიკური ჯგუფი მოტივირებულია, რომ მას ჰქონდეს ისეთი პოლიტიკის გატარების საშუალება, როგორიც წარმოუდგენია და რა გზითაც ქვეყანა უნდა მიდიოდეს, მაგრამ ეს არ არის ჩვენი გადასაწყვეტი, თუ რა დოზით მიიღებს „ევროპული საქართველო“ ქვეყნის მართვაში მონაწილეობას, ამას გადაწყვეტს ხალხი არჩევნებზე. ყველა პოლიტიკური პარტია ვალდებულია, რომ ხალხის არჩევანს დაემორჩილოს. დღეს სკეპტიკოსებისგან მესმის, რომ ივანიშვილი ხელისუფლებიდან არ წავა. ეს ჩემთვის უბრალოდ სასაცილოა, რადგან როცა ხალხი გადაწყვეტს, რომ ის აღარ იყოს ხელისუფლებაში, ასეთ შემთხვევაში ხელისუფლების შენარჩუნებას ვერც ივანიშვილი და ვერც ვერავინ მოახერხებს.
_ ყველა არჩევნებზე „ევროპული საქართველო“ ცდილობს, საზოგადოებას დაანახოს სხვაობა მასსა და „ნაციონალურ მოძრაობას“ შორის. ეს იქნება თუ არა თქვენს საარჩევნო კამპანიაში წინა პლანზე წამოწეული?
_ ჩვენი პრობლემა არის ბიძინა ივანიშვილი და ჩვენი კამპანიის წარმოებისას კონცენტირებული ვიქნებით სწორედ იმ პრობლემების წარმოჩენით, რომელსაც ბიძინა ივანიშვილი უქმნის ქვეყანას. მთელი ოპოზიციის ვალი და მიმართულებაც უნდა იყოს ივანიშვილის ხელისუფლებიდან ჩამოცილება. „ევროპულმა საქართველომ“ ამისთვის ძალიან ბევრი გააკეთა, მაგალითად, როდესაც თბილისში ვიმუშავეთ ერთიანი კანდიდატების დასახელებაზე, ამ ნაწილში ჩვენი პოლიტიკური ჯგუფის როლი ძალიან დიდია. რაც შეეხება განსხვავებას სხვა ოპოზიციურ ჯგუფებთან, რა თქმა უნდა, მათგან განვსხვავდებით და მაგიტომაც ვართ ცალკე პოლიტიკური პარტია, თორემ ვიქნებოდით სხვებთან ერთად წარმოდგენილი. „ევროპული საქართველოს“ მთავარი ხაზია, ადამიანებს გავაგებინოთ, რა სიკეთე შეიძლება ჰქონდეთ თავისუფალი სასამართლოს პირობებში და იმ შემთხვევაში, როცა შინაგან საქმეთა სამინისტრო, საქართველოს სახელმწიფო უსაფრთხოების სამსახური და პროკურატურა არ არიან პოლიტიკური იარაღები რომელიმე პოლიტიკური ჯგუფის ხელში. რაც შეეხება წინააარჩევნო სტრატეგიას, ძალიან მალე გვექნება ჩვენი პროგრამის პრეზენტაცია და ჩვენს მაჟორიტარებს დავასახელებთ. ასევე ჩვენს ამომრჩეველს ავუხსნით, როგორ ვაპირებთ ამ კამპანიის ჩატარებას.

ნენე ინჯგია