წლევანდელი არჩევნები ერთობ ეკლექტურ გარემოში ტარდება _ გაზრდილ კრიმინალსა და მძიმე სოციალურ-ეკონომიკურ მდგომარეობაზე რომ აღარაფერი ვთქვათ, საქართველოში კოვიდინფიცირებულთა რიცხვი კოსმიური სიჩქარით იზრდება. ზოგი დარწმუნებულია, რომ ამ კოვიდსტატისტიკას ხელისუფლება საარჩევნო მანიპულაციებისთვის იყენებს. შესაძლოა, არც უამისობაა, მით უმეტეს, რომ სხვადასხვა მონაცემით, ოქტომბერს კლინიკებში, კოვიდსასტუმროებსა თუ თვითიზოლაციაში რამდენიმე ათეულ ათასი ადამიანი იქნება. ჰოდა, სწორედ ამ ამომრჩევლებისთვის საარჩევნო ადმინისტრაციამ სპეციალური გეგმა შეიმუშავა, ანუ ცესკო-ს ცნობით, შეიქმნა სპეციალური ჯგუფები, რომლებიც ამომრჩევლებთან გადასატანი ყუთების მიტანას უზრუნველყოფენ.

„საარჩევნო ადმინისტრაცია ამომრჩევლებს სთავაზობს არჩევნებში მიიღონ მონაწილეობა საარჩევნო კომისიის ფუნქციების მქონე სპეციალური ჯგუფების მომსახურებით. კერძოდ, ცესკო მუნიციპალიტეტებში საოლქო საარჩევნო კომისიების მოქმედების საზღვრებში შექმნის არანაკლებ ერთ საარჩევნო უბანს და დააკომპლექტებს სპეციალურ ჯგუფებს.
სპეციალური ჯგუფის წარმომადგენლები უზრუნველყოფენ სტაციონარულ სამკურნალო დაწესებულებებსა და კარანტინში მყოფ მოქალაქეებთან საარჩევნო ყუთის მიტანას. ამასთან, თვითიზოლაციაში მყოფ ამომრჩევლებს, რომელთა მონაცემებიც ოფიციალურად ფიქსირდება მონაცემთა ბაზაში, ექნებათ შესაძლებლობა, საარჩევნო ადმინისტრაციას მიმართონ გადასატანი საარჩევნო ყუთის მომსახურებით.
სპეციალური ჯგუფის ყველა წევრი იქნება აღჭურვილი საჭირო ეკიპირებით, სრულად იქნება დაცული ეპიდემიოლოგების რეკომენდაციები. აღსანიშნავია, რომ სპეციალურ უბნებსა და მის წევრებს არ ექნებათ შეხება ჩვეულებრივ საარჩევნო უბნებთან, რაც უზრუნველყოფს პროცესის დაცულობას, მეტ უსაფრთხოებასა და ჩართული მხარეებისთვის მონაწილეობის შესაძლებლობას.
ხმების დათვლა განხორციელდება არა საკარანტინო სივრცეებსა და სამედიცინო დაწესებულებებში, არამედ ცალკე, სპეციალურად შექმნილ საარჩევნო უბნებში, რაც ხელს შეუწყობს პროცესის მეტ გამჭვირვალობას.
ამასთან, შესაბამისი წესების დაცვით, დამკვირვებლებს, მედიასა და საარჩევნო სუბიექტების წარმომადგენლებს ექნებათ საშუალება, გაყვნენ გადასატან ყუთს და დააკვირდნენ ხმების დათვლის პროცესს“, _ აცხადებენ საარჩევნო ადმინისტრაციაში, თუმცა საარჩევნო სპეციალისტები ამბობენ, რომ ამ გადაწყვეტილებით ცესკო კანონს არღვევს, ანუ კანონით სპეცუბნების შექმნა საარჩევნო ადმინისტრაციის კი არა, საოლქო საარჩევნო კომისიების პრეროგატივაა.
სხვათა შორის, ცესკო-ს ზემოხსენებული დადგენილება ოპოზიციამ გაასაჩივრა კიდეც, თუმცა ცეკო-ს ყოფილი თავმჯდომარე, ზურაბ ხარატიშვილი, რომელიც „სამოქალაქო ალიანსი თავისუფლებისთვის“ თავმჯდომარე და ამასთან, საარჩევნო ადმინისტრაციაში „ენმ-ძალა ერთობაშიას“ წარმომადგენელია, „ქრონიკა+“-ს ეუბნება, რომ მოსამართლეს კანონში არც ჩაუხედავს, ანუ ყურადღებაც არ მიუქცევია, რომ ჟვანიას უწყებამ ნორმატიული აქტით კანონი დაარღვია.

მოკლედ, როგორ ცდილობს „ოცნება“ არჩევნების გაყალბებას და იმალება თუ არა კორონაშემთხვევების გაზრდილ სტატისტიკაში პოლიტიკური მანიპულაციები? _ გთავაზობთ ინტერვიუს ზურაბ ხარატიშვილთან:

_ ამას წინათ პრემიერმა გახარიამ განაცხადა, წინ ორი ტოქსიკური კვირა გველისო. არჩევნებამდე რამდენიმე დღეღაა დარჩენილი. ბატონო ზურაბ, როგორ ფიქრობთ, პოლიტიკური ტოქსიკურობა დაიკლებს თუ მოიმატებს და, საერთოდ, 31 ოქტომბერს რა მოხდება?
_ ყოველდღე უამრავი რამ ხდება და წინა ამბავი ახალი კატასტროფული ამბით იფარება. საერთოდ, მას შემდეგ, რაც ხელისუფლებაში „ოცნება“ მოვიდა, სულ ასეა, თუმცა ბოლო დღეები, მართლაც, თავბრუდამხვევია. ამიტომ იმის თქმა, არჩევნებამდე დარჩენილ დროში კიდევ რა სიურპრიზები გველის, ძალიან ძნელია.
_ ე. ი., ყველაფერი _ ბანკის ძარცვიდან დაწყებული, გაზრდილი კოვიდსტატისტიკით დამთავრებული _ არჩევნების კონტექსტში უნდა განვიხილოთ?
_ ყველაფერი ეს არჩევნებზე, რა თქმა უნდა, გავლენას ახდენს. აი, მაგალითად, ზუგდიდის მოვლენებს, ვფიქრობ, არჩევნების შედეგებზე საკმაოდ დიდი გავლენა ექნება…
მოკლედ, წინასაარჩევნო კამპანიის ჩატარების სააშუალება, პრაქტიკულად, არაა.
_ რატომ?
_ საინფორმაციო ველი კრიმინალური ამბებითაა დატვირთული და, შესაბამისად, საარჩევნო კამპანიაც სუსტად მიმდინარეობს. სხვათა შორის, საარჩევნო კამპანიას მხოლოდ ოპოზიცია ატარებს. აი, ხელისუფლება კი არაფერს აკეთებს, გარდა იმისა, რომ მაჟორიტარობის კანდიდატებს წარადგენს.
_ მაშასადამე, გაზრდილი კრიმინალი და სხვა ნეგატიური მოვლენები 31 ოქტომბერს ხელისუფლების წისქვილზე დაასხამს წყალს?
_ ძალიან რთული გასაგებია, გავლენას რა რაზე მოახდენს… ერთია კოვიდის თემა _ დაავადებულთა რაოდენობა კატასტროფული სიჩქარით იზრდება; მეორე _ გაზრდილი კრიმინალი; და მესამე _ არჩევნების მოლოდინი. ამიტომ ძალიან რთული საპროგნოზოა, გავლენას რა რაზე ახდენს, თუმცა არ მგონია, ყველაფერი ეს ხელისუფლებისთვის სასარგებლო იყოს.
სხვათა შორის, ასეთი მასშტაბის კრიმინალური მოვლენები 90-იანი წლების შემდეგ, ალბათ, აღარ გვინახავს.
_ ჩვენში დარჩეს და, „ოცნება“ მიანიშნებს, რომ გაზრდილი კრიმინალის უკან შესაძლოა, წინა ხელისუფლება იდგეს. ყოველ შემთხვევაში, ზუგდიდის მოვლენების დროს ე. წ. სახელისუფლებო მედია იმ აზრის კულტივირებას ცდილობდა, რომ ერთ-ერთი მძევალი „ნაცმოძრაობის“ მხარდამჭერია… რაც შეეხება კორონას, ბატონო ზურაბ, ხომ არ გეჩვენებათ, რომ მმართველი გუნდი კოვიდინფიცირებულთა ზრდას პოლიტიკური მანიპულაციისთვის იყენებს? სხვათა შორის, სოციალურ ქსელში პოპულარულია მოსაზრება, რომ არჩევნების შემდეგ, ე. ი., პირველი ნოემბრიდან, ინფიცირებულთა რაოდენობა დაიკლებს…
_ ხელისუფლებისა და მისი საქმიანობის მიმართ უნდობლობა იმდენად დიდია, რომ თანდათან ძნელი გასაგები ხდება, სად უნიათობაა, სად _ მავნებლობა, სად _ წინასწარგანზრახული ქმედება და სად _ სირეგვენე! ერთი სიტყვით, ისეთი ქაოსია, რომ თავსა და ბოლოს ვერაფერს გაუგებ. „ოცნება“ ცდილობს, ყველაფერი მართოს, მაგრამ სხვა საქმეა, ეს მართვა გამოსდის თუ არა.
რაც შეეხება კოვიდს, კოვიდინფიცირებულთა რიცხვის ზრდას მთლად უსაფუძვლოს ვერ დავარქმევ, რადგან დაავადებულთა რაოდენობა მთელ მსოფლიოში იზრდება, მაგრამ იმის გამო, რასაც საარჩევნო ადმინისტრაცია კოვიდთან დაკავშირებით აკეთებს, მექმნება შთაბეჭდილება, რომ ამ სიტუაციის გამოყენება უნდათ.
_ ბატონო ზურაბ, ეს თემა ჩაშალეთ და დეტალურად მითხარით, ცესკო კორონას როგორ და რა მიზნით იყენებს?
_ აი, მაგალითად, ცოტა ხნის წინ, კოვიდთან დაკავშირებით, ცესკო-მ სპეციალური უბნების შექმნაზე რეკომენდაციები მიიღო. ამ სპეციალურ უბნებში, ალბათ, 30-დან 40 ათასამდე ადამიანი მისცემს ხმას.
_ მერე, ამაში ცუდი რა არის?
_ საინტერესო ის გახლავთ, რომ კანონის თანახმად, საქართველოს ტერიტორიაზე სპეცუბნების შექმნის უფლება ცესკო-ს არ აქვს.
_ აბა, ვის აქვს?
_ სპეცუბნებს საოლქო საარჩევნო კომისია ქმნის. ცესკო-ს სპეცუბნების შექმნა მხოლოდ უცხოეთში შეუძლია, მაგრამ ახლა, საქართველოს ტერიტორიაზე, სპეციალური უბნები თვითნებურად შექმნა.
_ ცესკო-მ კანონი შესაძლოა, იმიტომ დაარღვია, რომ კორონის გამო ქვეყანაში ერთგვარი ფორსმაჟორია.
_ მესმის, მაგრამ იგივე ფორსმაჟორის დროს გადაწყვეტილების მიღების სხვა საშუალებებიც არსებობს.
სხვათა შორის, ის კიდევ სხვა თემაა, კორონის გამო შექმნილ სპეცსიებში ადამიანები როგორ მოხვდებიან.
ერთი სიტყვით, მექმნება შთაბეჭდილება, რომ ცდილობენ, მინიმუმ, 30 ათასი ხმით მანიპულირება მოახდინონ.
იცით, კიდევ რა ხდება? _ უბნის დაკომპლექტების წესში, ანუ ექვს წევრს ზემდგომი ოლქი ნიშნავს, დანარჩენს პარტიები და ა. შ., მაგრამ ზემოხსენებული სპეცუბნებისთვის სპეცჯგუფებს თავად ცესკო ქმნის. არადა, კანონით საარჩევნო ადმინისტრაციას ასეთი სპეცჯგუფის შექმნის უფლება მხოლოდ მაშინ აქვს, თუ კომისიის წევრები თავიანთ მოვალეობას ავადმყოფობის ან სხვა რამის გამო ვეღარ ასრულებენ.
_ ასეთი სპეცუბანი სულ რამდენია, ბატონო ზურაბ?
_ 127. ეს ცოტა არაა და ნათლად ჩანს, რომ ყველა ასეთი უბანი განსაკუთრებული რისკის ზონა იქნება, ანუ ამ ადგილებში მანიპულირებას შეეცდებიან.
_ როგორც თქვით, კოვიდის გამო შექმნილ სპეცუბნებში, მაქსიმუმ, 40 ათასი ადამიანი მისცემს ხმას. ორმოცი ათასი ხმა, უხეშად რომ ვიანგარიშოთ, ორი საპარლამენტო მანდატია. ჰოდა, რატომ გგონიათ, რომ „ოცნება“ ასე „დახურდავდება“ და ორი მანდატისთვის მანიპულაციებზე წავა?
_ „დახურდავება“ რა შუაშია? კი ბატონო, ეს 40 ათასი ამომრჩეველი შეიძლება, 2-3 პროცენტია, მაგრამ მარტო კოვიდის თემა ხომ არაა? ამას უცხოეთში მყოფი ამომრჩევლებიც უნდა დავამატოთ.
მიუხედავად იმისა, რომ ამ თემით დაინტერესებული ვარ, არ ვიცი, საარჩევნო სიაში უცხოეთში მყოფი რა რაოდენობის ამომრჩეველია. აი, მაგალითად, 2012 წელს ასეთი ამომრჩეველი 300 ათასი იყო. მას მერე 8 წელი გავიდა და, ლოგიკურად რომ ვიმსჯელოთ, ემიგრანტების რიცხვიც გაიზარდა.
მოკლედ, ყველაფერი იმაზე მიუთითებს, რომ „ოცნება“ ეცდება, არჩევნებზე მის ხელთ არსებული ნებისმიერი საშუალება გამოიყენოს, ანუ კოვიდის თემაში 2-3 პროცენტი რომ მოაგვაროს, ეს იმას ნიშნავს, რომ ეს ორი-სამი პროცენტი, რომელიც „ოცნებას“ მოემატება, ოპოზიციას დააკლდება და, საბოლოო ჯამში, შედეგებში, საშუალოდ, 5-პროცენტიანი სხვაობა იქნება. პლუს, ამას, ე. წ. კარუსელებზეც 2-3 პროცენტი მოდის. ასე „ოცნება“ 10 პროცენტამდე მაინც მოაგროვებს, რაც საპარლამენტო არჩევნების დროს, მით უმეტეს, საპარლამენტო რესპუბლიკაში, საკმაოდ მნიშვნელოვანი ფორაა.
_ ე. ი., თუ „ოცნება“ ხელისუფლებაში დარჩა, პირველი ნოემბრიდან კორონა სტატისტიკა დაიკლებს?
_ წარმოდგენა არ მაქვს, რას იზამს, რადგან ამორალობის გარდა საქმე უცოდინარობასა და ქაოსთანაც გვაქვს!
_ ოპოზიციას ან არასამთავრობო სექტორს რა ბერკეტები აქვს, რომ არჩევნების გაყალბება არ დაუშვას, მით უმეტეს, იმ ფონზე, როცა კორონავირუსის გამო უცხოელი დამკვირვებლებიც არ ჩამოდიან?
_ მაქსიმალური გახმაურება, ინფორმირება და პრევენცია. ამის შემდეგ ყველაფერ ამის დეფინიცია და პოლიტიკური შეფასება. ეს პროცესი რაც უფრო შეკრული იქნება და სათქმელს ყველა ერთად იტყვის, წარმატების მეტი შანსი გაჩნდება.
_ გეთანხმებით, მაგრამ ოპოზიცია ხომ ორ ფრონტზე იბრძვის, ანუ მხოლოდ „ოცნებას“ კი არ უპირისპირდება, არამედ სხვადასხვა ოპოზიციური პარტია ანგარიშის გასწორებას ერთმანეთთანაც ცდილობს. ეს ხომ გამარჯვების შანსს ამცირებს, ზურაბ ბატონო?
_ ოპოზიცია ერთ აზრზე, რა თქმა უნდა, ვერ იქნება და არც უნდა იყოს, თუმცა რასაც დღეს ვუყურებ, თანამშრომლობის უპრეცედენტო ფორმატია.
_ ოპოზიციის თანამშრომლობა რაში გამოიხატება?
_ აი, მაგალითად, ხმების გაყალბების საწინააღმდეგო ჯგუფი მუშაობს. გარდა ამისა, ლეიბორისტული პარტიის ინტერპარტიული ფორმატიც არსებობს, სადაც გარკვეული საკითხების კორდინაცია ხდება. სხვათა შორის, თუ 30-წლიან ისტორიას გავითვალისწინებთ, ასეთი პრეცედენტი არ ყოფილა. გასაგებია, რომ ოპოზიციური პარტიები ერთმანეთის კონკურენტები არიან, მაგრამ მიუხედავად ამისა, ვფიქრობ, რომ მათი თანამშრომლობა მაღალ დონეზეა. ურთიერთკრიტიკა არის და უნდა იყოს კიდეც, მაგრამ თუ „ოცნებამ“ გაყალბების მთელი მექანიზმები აამუშავა, განსაკუთრებით არჩევნების დღეს, ეს კონსოლიდაციის ხარისხი კიდევ უფრო გაიზრდება.
_ ღმერთმა ქნას, ასე მოხდეს, მაგრამ ჩემზე კარგად იცით, რომ არჩევნები უშუალოდ ხმის მიცემისას კი არა, მანამდე ყალბდება…
_ რა თქმა უნდა, მაგრამ ფაქტები მერე ჩანს, ანუ სიების, უბნების თემა თუ სხვა დეტალები ნელ-ნელა გროვდება და საბოლოო შედეგს არჩევნების დღეს იძლევა.
სხვათა შორის, რამდენიმე დღის წინ სრულიად სამარცხვინო სასამართლო სხდომა გაიმართა.
_ რაზე?
_ ცესკო-ს ზემოხსენებული ნორმატიული აქტი გავასაჩივრეთ. მართალია, კანონში შავით თეთრზე წერია, რომ ცესკო-ს სპეცუბნების შექმნა მხოლოდ უცხოეთში შეუძლია, მაგრამ მიუხედავად იმისა, რომ ცესკო-მ სპეცუბნები საქართველოშიც შექმნა, მოსამართლემ კანონში არსებული ჩანაწერი ვერ „დაინახა“.
მოკლედ, ძალიან სამარცხვინო ვითარებაა და თუ არჩევნებზე ყველაფერი ეს არ შევცვალეთ, მაშინ დიდი ხნით ძალიან ღრმა ჭაობში ჩავეფლობით, რომელიც დღეს არსებულ ჩამყაყებაზე უარესი იქნება! „ოცნებისგან“ კარგს აღარავინ ელოდება. ყველასთვის ყველაფერი თვალსაჩინოა. „ოცნების“ მომხრეებად ის ადამიანები დარჩნენ, რომლებიც ხელისუფლებაზე პირადი ინტერესებით არიან მიბმულნი და იციან, რომ იმ პრივილეგიებს, რაც აქვთ, სხვა ხელისუფლების მოსვლის შემდეგ ვერ შეინარჩუნებენ. ამას ემატება ადმინისტრაციული და ფინანსური რესურსებიც. მეორე მხარეს კი ქართველი ხალხი დგას, რომელსაც „ოცნების“ ხელისუფლებაში დარჩენა არ უნდა. ერთი მინიმალური ლოგიკური არგუმენტიც კი არ არსებობს, რომ რიგითმა ამომრჩეველმა „ოცნებას“ მხარი დაუჭიროს.
_ ვნახოთ, ხალხი რა გადაწყვეტილებას მიიღებს… ისე, ბატონო ზურაბ, „ენმ-ძალა ერთობაშიას“ პროპორციულ სიაში ხართ?
_ არა, არ ვარ. ცესკო-ში წარმომადგენელი ვარ.
_ უცნაურია, რომ სიის მიღმა აღმოჩნდით…
_ გარკვეულწილად, შიდა შეთანხმებები იყო.
_ რაზე?
_ ვინ რა პოზიციას დაიკავებდა. იქიდან გამომდინარე, რომ არჩევნებში გამარჯვებისა და სხვადასხვა ოპოზიციურ პარტიასთან ერთად კოალიციური ხელისუფლების ჩამოყალიბების იმედი გვაქვს, ინტერესებს მერე გავითვალისწინებთ.
_ მაშასადამე, კოალიციურ მთავრობაში შესაძლოა, რომელიმე მინისტრის სავარძელი მიიღოთ?
_ ყველა პოლიტიკოსი პარლამენტში კი არ მიდის…
_ ისე, ბატონო ზურაბ, ენმ-ს პროპორციულ სიას გამარჯვების სიად თვლით?
_ სიაზე ბევრი კრიტიკა არსებობს და მეც ამ კრიტიკოსების მხარეს ვარ, მაგრამ ახლა მთავარი ისაა, რომ „ოცნება“, რომელიც ქვეყანას შლის და ანგრევს, ხელისუფლებიდან გავუშვათ. ამის ფონზე ყველაფერი, მათ შორის, სიაც, მეორეხარისხოვანია. „ოცნებას“ ხელისუფლებიდან რომ გავუშვებთ, სიასა და სხვა საკითხებს მერე მივუბრუნდებით!
_ ისიც მეორეხარისხოვანია, 9-სუბიექტიან „ძალა ერთობაშიაში“ არჩევნების წინ მხოლოდ ხუთი სუბიექტიღა რომ დარჩა?
_ ეს სხვა თემაა.
_ ანუ?
_ რაც მოხდა, ლოგიკურიც იყო. პოლიტიკური კოალიცია, სადაც 10 სუბიექტია, ისევ არსებობს. საარჩევნო ბლოკში კი, საარჩევნო კანონმდებლობიდან გამომდინარე, ხუთ წევრზე მეტი მიზანშეწონილი არაა. ამიტომაც იგივე პოლიტიკური პარტია, რომელსაც მე წარმოვადგენ, საარჩევნო კოალიციაში აღარ შევიყვანეთ.
_ ბატონო ზურაბ, მგონი, ხვდებით, რომ გულუბრყვილო არ ვარ.
_ დიახ.
_ ჰოდა, თუ საარჩევნო ბლოკში ხუთ წევრზე მეტის ყოფნა მიზანშეწონილი არაა, აბა, 2018 წელს, როცა „ძალა ერთობაშია“ შეიქმნა, რატომ მიიღეთ საჯარო მემორანდუმი და პირობაც დადეთ, რომ საპარლამენტო არჩევნებში ეს მრავალსუბიექტიანი გაერთიანება ერთიანი სიით გამოვიდოდა?
_ მას მერე კანონმდებლობა შეიცვალა.
_ მესმის, მაგრამ შეცვლილ კანონმდებლობაში არსად წერია, რომ საარჩევნო ბლოკში ხუთ სუბიექტზე მეტი არ უნდა იყოს…
_ დიახ, კანონით, საარჩევნო ბლოკის წევრთა რაოდენობა განსაზღვრული არაა, მაგრამ ქართული კანონმდებლობა ისეთია, რომ თუ საარჩევნო ბლოკში ბევრი წევრია, თითოეული წევრი სუსტდება. ამიტომ ოპტიმალური ოთხ-ხუთწევრიანი საარჩევნო ბლოკია.
სხვათა შორის, ბოლო დროს „ოცნებამ“ კანონი ისე შეცვალა, რომ ბლოკის შესაქმნელად მოტივაცია ნაკლებია. სწორედ ამიტომაც წლევანდელ არჩევნებში ბევრი სუბიექტია, ბლოკი კი მხოლოდ _ ორი, ჩვენი და გიორგი ვაშაძისა და თამარ ჩარკვიანის.
არსებულ სიტუაციაში ჩვენი მხრიდანაც გარკვეული კომპრომისი იყო, რომ ხუთწევრიანი საარჩევნო ბლოკი შევქმენით. ვიმედოვნებ, ამ ხელისუფლების შეცვლის შემდეგ კანონში არსებულ ხარვეზებს გავასწორებთ.
_ ბატონო ზურაბ, მართალია, დარწმუნებული ხართ, რომ 31 ოქტომბერს ხელისუფლება აუცილებლად შეიცვლება, მაგრამ ვთქვათ, ისე მოხდა, რომ „ოცნებამ“ დემოკრატიის ყველა წესი თუ პირობა დაარღვია და ხელისუფლების სათავეში მესამედაც დარჩა, აი, ასეთ შემთხვევაში რა მოხდება?
_ გააჩნია, როგორ დარჩება.
_ კერძოდ?
_ თუ მოიგო, პრობლემებით, მაგრამ მაინც დარჩება, მაგრამ თუ იძალადა და არჩევნები დაშინებით, ცემა-ტყეპითა და გაყალბებით მოიგო, ამას, რა თქმა უნდა, არავინ მოითმენს და ამის მაგალითები ძალიან ბევრი გვაქვს.
მოკლედ, პროტესტი იქნება, თუმცა რა ფორმით და რა მასშტაბით, ამაზე დღეს ვერავინ ილაპარაკებს.
_ ე. ი., ფიქრობთ, რომ საზოგადოება იგივე კორონას არ შეუშინდება და საპროტესტოდ ქუჩაში გამოვა?
_ კორონა ბელარუსშიცაა, მაგრამ 9 აგვისტოდან დღემდე, ყოველ შაბათსა თუ კვირას, 50, 100 ან 200-ათასიანი მიტინგი იმართება, თუმცა არ გამიგია, რომ ბელარუსში კორონა მაინცდამაინც აფეთქებულიყო.
_ სხვათა შორის, ლუკაშენკომ მკაცრი ზომები არც პირველი ტალღის დროს გაატარა…
_ დიახ და ჩვენს ინფექციონისტებს რომ დავუჯეროთ, ბელარუსში ხალხი ქუჩაში უნდა ეყაროს, ანუ გამწყდარიყო, მაგრამ ამ ქვეყანას საამისო არაფერი ეტყობა.
ისე, ლუკაშენკოზე შეიძლება, ბევრი რამ ვთქვათ, მაგრამ კორონის თემას, „ოცნებისგან“ განსხვავებით, პროტესტანტების წინააღმდეგ არ იყენებს!
_ გამორიცხავთ, რომ „ოცნებამ“ პირველ ნოემბერს საგანგებო მდგომარეობა გამოაცხადოს და ხალხის ქუჩაში გამოსვლას ხელი ასე შეუშალოს?
_ არ მგონია, საქმე აქამდე მივიდეს, თუმცა „ოცნებას“ მორალი შეაწუხებს, ზნეობა თუ ჭკუა დაუშლის ან, როგორც იტყვიან, თანამდებობა?!
_ ერთი სიტყვით, ყველაფრის მიუხედავად, ოპტიმისტურად ხართ განწყობილი და დარწმუნებული ბრძანდებით, რომ 31 ოქტომბერს ცვლილებები გარდაუვალია, არა?
_ რა თქმა უნდა.
საერთოდ, ყველასთვის ცხადია, რომ „ოცნებამ“ მთლიანად ამოწურა თავი და მასზე დადებითს ტროლ-ბოტების გარდა, რომლებიც „ფეისბუქში“ ბევრნი არიან, აღარავინ ამბობს, თუმცა ამ განწყობის საარჩევნო ყუთებში ტრანსფორმაცია აბსოლუტურად სხვა თემაა. 31 ოქტომბერს გადამწყვეტი ფაქტორიც სწორედ ეს იქნება.
_ გმადლობთ, ბატონი ზურაბ და წარმატებებს გისურვებთ!

გიორგი აბაშიძე