„ჩვენ ვიხილავთ საკითხს, რომ შეთანხმების შემდგომ შეიძლება შევიდეთ პარლამენტში, რადგან საკონსტიტუციო ცვლილებებიც მისაღებია და ამას ჩვენი მონაწილეობა და მხარდაჭერაც სჭირდება… პლებისციტი იქნება თუ პირდაპირ რიგგარეშე არჩევნები, აირჩიონ ან ერთი ან მეორე ვარიანტი, მისცენ ეს ინფორმაცია ფასილიტატორებს თუ აწ უკვე მოდერატორებს და გავიგებთ ამის შესახებ. 16 მარტის დედლაინი დაუწესეს სწორედ მათ _ მთავრობას, რომ კონკრეტული პროგრესით ჩავიდნენ ბრიუსელში. არ ჩავლენ? _ გაცილებით უფრო მკაცრი და ცუდი იქნება რეაქციები დასავლეთის მხრიდან. ჩვენ ჩამოყალიბებულები ვართ და მარტივ რაღაცას ვამბობთ, პოლიტიკური განსხვავებულობის გამო ხალხი ციხეში არ უნდა იჯდეს და მეორე მთავარი საკითხი არის, რომ ამ ქვეყანას სჭირდება შეთანხმება და ხალხს ვკითხოთ“, _ ამ განცხადების ავტორი „სტრატეგია აღმაშენებლის“ ლიდერი, გიორგი ვაშაძეა, რომელიც „ქრონიკა+“-სთან რამდენიმე მნიშვნელოვან განცხადებას აკეთებს, მათ შორის, იმასაც, რომ მიხეილ სააკაშვილს აშშ-ში არავინ ელაპარაკება:

_ გიორგი, 15 მარტისგან რას ელოდებით?
_ „ქართულ ოცნებას“ დრო აქვს დათქმული, რომ ევროკავშირის წინაშე კონკრეტული წინადადებებით უნდა წარდგეს. ამიტომ ისეთი წინადადებები უნდა მოიფიქროს, რომელიც ოპოზიციისთვის მისაღები იქნება. ფაქტი ისაა, რომ გადაწყვეტილება ექვსივე პუნქტზე, უფრო სწორად, გაფართოებულ ექვსივე პუნქტზე უნდა მიიღონ.
_ „გაფართოებული ექვსივე პუნქტი“ რას ნიშნავს?
_ აქამდე ოთხი პუნქტი არსებობდა, რომელსაც მიშელის ვიზიტის შემდეგ კიდევ ორი დაემატა. მოკლედ, ექვსივე საკითხზე „ოცნებამ“ უნდა გვაჩვენოს გზა, პოლიტიკური კრიზისიდან გამოსვლას როგორ აპირებს.
_ დღევანდელი მოცემულობით, „ოცნება“ არაფრის დათმობას აპირებს. ყოველ შემთხვევაში, მმართველი გუნდის წარმომადგენლები ჯიუტად იმეორებენ, ეს ექვსი პუნქტი შეთანხმებული დოკუმენტი კი არა, მაგიდაზე დადებული მოსაზრებაა და მეტი არაფერიო. ამ ვითარებაში რისი იმედი გაქვთ?
_ მოცემულ ვითარებაში ეს „ოცნების“ მხრიდან წყლის ნაყვა და საკუთარი ამომრჩევლის შეგულიანებაა, თორემ კონკრეტული წინადადებების მოტანა, რა თქმა უნდა, მოუწევს!
სხვათა შორის, ისიც უნდა გვესმოდეს, რომ ეს კომპრომისი ცალმხრივი არ იქნება.
_ ანუ?
_ ევროკავშირის შემთხვევაში, კომპრომისის მოთხოვნა ჩვენთვისაც იქნება, თუმცა ის, რომ ადამიანები ციხეში პოლიტიკური ნიშნით არ უნდა დარჩნენ, ორჯერ ორი ოთხია და ამაში განსაკუთრებულს ვერაფერს ვხედავ.
მოკლედ, ვნახოთ.
_ ოპოზიცია რა კომპრომისზე წავა, ანუ როგორც განაცხადეთ, თუ შეთანხმება შედგება, პარლამენტში შეხვალთ?
_ დიახ, თუ შეთანხმება შედგება, პარლამენტში შესვლა რაციონალურიც იქნება.
_ დამისაბუთეთ, პარალმენტში შესვლა თუნდაც შეთანხმების შემთხვევაში რაციონალური რატომ იქნება?
_ ეს შეთანხმება საკონსტიტუციო ცვლილებებსაც გულისხმობს, რომლის განსახორციელებლადაც 113 დეპუტატია საჭირო.
_ იმაზე, რომ კომპრომისზე წავიდეს და პარლამენტში თუნდაც საარჩევნო კოდექსის ცვლილების საბაბით შევიდეს, მთელი ოპოზიცია იქნება თანახმა?
_ არ მაინტერესებს.
_ რა არ გაინტერესებთ?
_ ყველაფერ ამას პარტია „სტრატეგია აღმაშენებლის“ სახელით ვსაუბრობ. თუ საგიჟეთში მივდივართ და ხელს ვაწერთ დოკუმენტს, რომელსაც საკონსტიტუციო ცვლილება სჭირდება და ამისთვის პარლამენტში შესაბამისს კვორუმს არ ვქმნით, მაშინ რას ან რატომ ვითხოვთ და, საერთოდ, რა გვინდა?
ეს სერიოზული პროცესია, რომელიც სერიოზულ ანალიზს საჭიროებს.
_ გიორგი, დავაკონკრეტოთ: ამ განცხადებას პარტია „სტრატეგია აღმაშენებლის“ სახელით აკეთებთ თუ კოალიციის?
_ პარტიის, თუმცა არ მგონია, რომ კოალიციაში განსხვავებული პოზიცია იყოს.
_ თუ „ოცნებასთან“ შეთანხმებას დოკუმენტის სახე არ მიეცემა, ხომ რჩება იმის შანსი, რომ მოვლენები 20 ივნისის შემდგომი სცენარით განვითარდეს, როცა ივანიშვილმა სრულად პროპორციული არჩევნების პირობა დადო, თუმცა, როგორც იტყვიან, ბოლო სერიაში „გადაგაგდოთ“ და 31 ოქტომბრის არჩევნები ნახევრად პროპორციულით ჩატარდა?
_ გასაგებია, მაგრამ ამ შემთხვევაში გარანტი ევროკავშირი და პირადად მისი პრეზიდენტი ხდება, რადგან იგი მხოლოდ ფასილიტატორი კი არა, მედიატორიცაა, ანუ ჩვენ მარტო არ ვიქნებით და დასავლეთი მოგვეხმარება!
_ ოპოზიცია მუდმივად ხაზს უსვამს, რომ „ოცნება“ ავტორიტარულ რეჟიმად ყალიბდება. ასეთ რეჟიმებს კი, როგორც წესი, არც ევროპის აზრი აინტერესებთ და არც _ აშშ-ის.
_ თუ არ აინტერესებთ, მაშინ შეთანხმება საერთოდ არ შედგება.
მკვეთრ განცხადებებში ზოგს ბოლომდე ვეთანხმები, ზოგს _ არა, მაგრამ წეღანდელი თქმისა არ იყოს, ეს შეთანხმება ევროკავშირის იძულებით ხდება, ანუ შესაბამისად, „ოცნება“ მას ანგარიშს უწევს და თუ ასე არაა, მაშინ არც შეთანხმება შედგება.
_ გიორგი, გამორიცხავთ, რომ 15 მარტამდე რაღაცები „ოცნების“ შიგნითვე ამოტრიალდეს, აი, მაგალითად, „ნოდარ მელაძის შაბათში“ გასაჯაროებული ფარული ჩანაწერის მერე პრემიერი გადადგეს და მისი ადგილი ისეთმა ხისტმა ადამიანმა დაიკავოს, როგორიც, ვთქვათ, თეა წულუკიანია და რომელიც იტყვის, რა ევროკავშირი და რის შეთანხმება, არც ვადამდელი იქნება და არც პოლიტპატიმრები განთავისუფლდებიანო…
_ ეს სხვა განრიგი იქნება.
_ მაინც, რა განრიგი?
_ ამ პროცესით ნათელი გახდება, რომ ევროკავშირში ინტეგრაციის გზა საბოლოოდ გადაიკეტა, მაგრამ ასეთი განრიგი ჯერ არ არსებობს. ამიტომ დღეს არსებული ვითარებიდან გამომდინარე უნდა ვიმოქმედოთ და შესაბამისი სვლები გავაკეთოთ.
_ თუ „ოცნება“ იტყვის, პოლიტპატიმრებს ვათავისუფლებ, მაგრამ ვადამდელს არ ან 2022 წლისთვის ვნიშნავო, ეს მოცემულობა ოპოზიციისთვის მისაღები იქნება?
_ ეს ვერ მოხდება.
_ რატომ?
_ შეთანხმება ექვსივე პუნქტზე უნდა იყოს და თუ არჩევნების ჩასატარებლად 2022 წელი დასახელდება, ამაზე ვიმსჯელებთ.
_ 2022 ოპოზიციისთვის მისაღებია?
_ ჯერ არ გვიმსჯელია. პლებისციტს ყველა მხარე უნდა დაეთანხმოს, 2022 წლის თემაზე კი არ გვიმსჯელია.
_ ანუ პირადად თქვენ თანახმა ხართ, რომ პლებისციტით გადაწყდეს, ვადამდელი არჩევნები ჩატარდება თუ არა?
_ დიახ, პირადად მე თანახმა ვარ.
_ უკაცრავად, მაგრამ ვადამდელის გასარკვევად პლებისციტი რა საჭიროა?
_ როცა მხარეები ვერ თანხმდებიან, ხალხს უნდა ვკითხოთ, რგგარეშე არჩევნები უნდა ჩატარდეს თუ _ არა? ამ საზოგადოებაში არც მხოლოდ ოპოზიცია ცხოვრობს და არც მხოლოდ _ „ქართული ოცნება“. შესაბამისად, პლებისციტი იმისთვის არსებობს, რომ ხალხმა საკუთარი აზრი დააფიქსიროს. აბა, თუ ხალხს არ შევეკითხებით, ვის უნდა ვკითხოთ?
_ აქამდე, როგორც მახსოვს, ოპოზიცია ხალხის სახელით საუბრობდა, აი, მოსახლეობამ იცის, რომ 31 ოქტომბრის არჩევნები გაყალბდა და ვადამდელი აუცილებელიაო.
_ ჩვენი მხარდამჭერების სახელით ვსაუბრობდით, მაგრამ არსებობს სხვა ხალხი, რომელსაც სხვა აზრი აქვს. შესაბამისად, როცა ვერ თანხმდები, აზრი ხალხს უნდა ჰკითხო. საერთოდ, პლებისციტი დემოკრატიის ყველაზე მაღალი გამოხატულებაა, რადგან საკუთარ აზრს თითოეული მოქალაქე აფიქსირებს.
ვერ წარმომიდგენია, ვინმე იმის წინააღმდეგი იყოს, რომ ის გავაკეთოთ, რაც ხალხს უნდა!
_ ხალხის აზრი, რა თქმა უნდა, გასათვალისწინებელია, მაგრამ თუ თამარ ჟვანიამ და ცესკო-მ 31 ოქტომბრის არჩევნები გააყალბეს, რატომ გგონიათ, რომ პლებისციტის შედეგებსაც არ გააყალბებენ?
_ ეს ზღაპარი და სისულელეა!
_ უკაცრავად, ზღაპარი და, მით უმეტეს, სისულელე რატომ არის?
_ პლებისციტს იგივე ჟვანია, იგივე ცესკო და იგივე საარჩევნო სისტემა არ ატარებს!
_ აბა, ვინ და რა ატარებს?
_ ამ შეთანხმების ერთ-ერთი პუნქტი ფუნდამენტური საარჩევნო რეფორმებია და თუ ვინმე იმას ამბობს, რაც მკითხეთ, ოროსნობა, გაუნათლებლობა და წაუკითხაობაა! პირველი პუნქტიდან მეექვსემდე, ანუ ბოლომდე უნდა წაიკითხო და არა _ მხოლოდ დოკუმენტის ერთი პუნქტი.
_ გასაგებია, მაგრამ ყველაფერი ეს დროში გაიწელება _ სანამ საკონსტიტუციო ცვლილებები განხორციელდება, მერე სანამ პლებისციტი ჩატარდება, მერე _ ვადამდელი არჩევნები და ამასობაში წელიწადზე მეტიც გავა… ჰოდა, ყველაფერ ამას აზრი ექნება?
_ ახლა თქვენს თავს ეწინააღმდეგებით.
_ რატომ?
_ დროში რომ არ გაიწელოს, მაშინ ყველაფერი ჟვანიამ უნდა ჩაატაროს.
_ ასე გამოდის, მაგრამ პლებისციტი რა საჭიროა, არ ჯობია, პირდაპირ ვადამდელი არჩევნები დაინიშნოს?
_ დიახ, მეც ასე მირჩევნია, მაგრამ როცა ვერ თანხმდები, მაშინ პლებისციტია საჭირო, რომ გადაწყვიტო, ხალხს რა უნდა.
_ პლებისციტის იდეას ოპოზიციის ყველა ლიდერი არ ემხრობა…
_ რაში მაინტერესებს, თუ ამ საკითხზე აზრი გაიყოფა?
_ რატომ არ გაინტერესებთ?
_ ნაკლებად მაინტერესებს, შეთანხმების საპირისპირო აზრს ვინ გამოთქვამს და დააფიქსირებს. მან პასუხი ამომრჩევლისგან უნდა მიიღოს, რადგან თამაში არ შეიძლება. ეს სათამაშო კი არა, სახელმწიფოა!
საერთოდ, პოლიტიკური სპექტრის მიმართ უნდობლობა არათანმიმდევრულობითა და ერთი პოზიციიდან მეორეზე მუდმივი ხტომითაა გამოწვეული. მე კი ამას არ ვაპირებ!
_ ხტომა, ცხადია, ცუდია, მაგრამ უკვე ითქვა, „ლელომ“, „სტრატეგია აღმაშენებელმა“ და ელენე ხოშტარიამ შესაძლოა, ახალი ბლოკი შექმნათ. თუ ასე მოხდა, ე. ი., ენმ-სთან არსებული ოპოზიციური ერთობა დაიშლება და ორ ბანაკს მივიღებთ?
_ ეს რა შუაშია?
ჯერ ერთი, დეტალურად არაფერზეა საუბარი. უბრალოდ, ღონისძიებაზე დაგვპატიჟეს და მივედი.
მეორეც, თუ ვინმესთან პარტიულ თანამშრომლობას დავიწყებთ, ამან რამე რატომ უნდა გამოიწვიოს? ამ გაერთიანებაში კოალიციებიც არიან და ცალკეული პარტიებიც…
საერთოდ, არაერთხელ მითქვამს და ახლაც გავიმეორებ, რომ მძლავრი მიზიდულობის ცენტრია ჩამოსაყალიბებელი.
ჩვენი პარტიის მომავალს „ნაციონალურ მოძრაობასთან“ ვერ ვხედავ, რადგან ეს ჩემთვის წაგების გზაა!
_ სხვათა შორის, ოპოზიციის იმ ერთობაში, სადაც დღეს ხართ, ნინო ბურჯანაძეცაა…
_ კოალიციას ვერც ბურჯანაძესთან ერთად ვხედავ.
_ აბა, დღეს ბურჯანაძის გვერდით როგორ ხართ?
_ დღეს თემატური საკითხია.
_ ანუ?
_ სხვადასხვა ოპოზიციური პარტია საკუთარ აზრს აფიქსირებს, რასაც ვერ დავუშლი, თუმცა ეს იმას როდი ნიშნავს, რომ რომელიმესთან კოალიციურ თანამშრომლობას ვაპირებ!
_ გიორგი, ხომ არ გეჩვენებათ, რომ დღეს არსებულ ოპოზიციის პროტესტში გარკვეული ოპოზიციური ძალები ლოკომოტივის როლის მორგებას და ამით მუხტის დაცემას ცდილობენ, ანუ აქციების გადადებაზე ყველა ლიდერი თანახმა იყავით თუ ეს რომელიმეს ინიციატივით მოხდა?
_ ყველაფერზე ყველა თანახმა არასოდესაა, თუმცა ამაში შეთქმულების თეორიებს ვერ ვხედავ და ამ გადაწყვეტილებაში ლოგიკა არსებობს _ მძლავრი საპროტესტო აქცების დროს „ოცნებამ“ პროვოკაციაზე რომ არ წამოგვაგოს და ის დიდი საგარეო მხარდაჭერა არ დავკარგოთ, რომელიც მოვიპოვეთ…
_ გიორგი, დღევანდელი მოცემულობით, შეგვიძლია, ერთმნიშვნელოვნად ვთქვათ, რომ ბიძინა ივანიშვილისა და სხვა „მეოცნებეებისთვის“ სანქციები გარდაუვალია თუ ეს ერთგვარი ილუზიაა?
_ გარდაუვალი არაფერი არსებობს და ხალხს ილუზიაში ნუ შევიყვანთ! ყველაფერს სერიოზული მუშაობა უნდა. თუ „ქართული ოცნება“ იტყვის, არც ევროკავშირის აზრი მაინტერესებს, არც _ ამერიკელი პარტნიორების, არც _ ოპოზიციის და არც _ საზოგადოების იმ ნაწილის, რომელიც არჩევნებს გაყალბებულად მიიჩნევსო, მაშინ სანქციებიც იქნება და ყველაფერიც.
_ სხვათა შორის, რამდენიმე დღის წინ მიხეილ სააკაშვილმა გვამცნო, _ ზუსტად ვიცი, ივანიშვილს სანქციების პროექტი უკვე წინ დაუდესო…
_ სააკაშვილის ასეთი რაღაცები ნაკლებად მაინტერესებს…
პირდაპირ გეუბნებით: აშშ-ს სააკაშვილთან კონტაქტი არ აქვს _ მას აშშ-ში არ ელაპარაკებიან!
_ რატომ არ ელაპარაკებიან?
_ რიგი მიზეზების გამო…
_ საინტერესოა…
_ მე და ბევრ სხვა ადამიანს გაცილებით მეტი კონტაქტი გვაქვს…
_ ისე, ბოლო დროს მაინცდამაინც აღარ ჩანხართ. როგორც ვიცი, რამდენიმე დღის წინ უკრაინაში იყავით, უფრო ადრე კი _ აშშ-ში…
_ დიახ, უკრაინაში ყოველ კვირას დავდივარ.
_ რისთვის?
_ კოვიდრეგულაციები რომ მოიხსნა, ბევრი აქტივობა დაიწყო _ რამდენიმე პროექტი მაქვს… კი ბატონო, აშშ-შიც ვიყავი.
_ აშშ-დან რა ჩამოიტანეთ?
_ ამერიკელ მეგობრებთან ჩემი და „სტრატეგია აღმაშენებლის“ სტრატეგიული პარტნიორობა.
_ …ვთქვათ, ისე მოხდა, რომ უკან „ოცნებამაც“ დაიხია, ოპოზიციამაც და, შესაბამისად, ვადამდელი არჩევნები დანიშნა. ნებისმიერი არჩევნები დიდ ფულს უკავშირდება და ქვეყნისთვის ხარჯია. ახალ არჩევნებს, მით უმეტეს, მაშინ, როცა თვითმმართველობის არჩევნებიც კარსაა მომდგარი, ქვეყანა გაუძლებს?
_ არჩევნების ჩატარებაზე უარს ვერ ვიტყვით, თან ეკონომიკური კრიზისიდან გამოსვლის ერთადერთი სწორი გზა სწორედ ხელისუფლების არჩევნების გზით შეცვლა მგონია, თორემ ამ ხელისუფლების პირობებში, ეკონომიკური თვალსაზრისით, სამწუხაროდ, არაფერი იცვლება და არც შეიცვლება, რადგან მთლიანად ფულის კეთებაზე არიან გადასულები და ეკონომიკა საერთოდ არ აღელვებთ!
_ გიორგი, წეღან სანქციებზე რომ ვსაუბრობდით, უნდა მეკითხა და დამავიწყდა: პიროვნული სანქციები ქვეყანასაც შეეხება?
_ თუ სანქცირებული პირები ხელისუფლებაში იქნებიან, ეს ქვეყანასაც დააზიანებს, რადგან როცა ნახავს, რომ ხელისუფლების სათავეში მყოფები სანქცირებული არიან, ქვეყანაში ერთი ინვესტორიც არ შემოვა!
_ თქვენი აზრით, ივანიშვილმა პრემიერად მაინცდამაინც ღარიბაშვილი რატომ დააბრუნა?
_ ვფიქრობ, დააბალანსა, ანუ საშუალება არ მისცა, რომ ძალაუფლება მთლიანად ერთ ჯგუფს აეღო.
_ რომელ ჯგუფს გულისხმობთ?
_ კობახიძე-თალაკვაძე-კალაძეს.
_ ხმა დადის, რომ კალაძე შესაძლოა, „ოცნებას“ გაემიჯნოს. თუ ასე მოხდა, ე. ი., მმართველ გუნდში დიდი ორომტრიალი დაიწყება, არა?
_ თუ კალაძე გადადგება, ეს „ქართული ოცნებისთვის“, რა თქმა უნდა, ძალიან სერიოზული დარტყმა იქნება _ დაასუსტებს!
_ გახარიას პოლიტიკაში დაბრუნება „ოცნებისთვის“ როგორი იქნება?
_ გახარიას პოლიტიკაში შემოსვლა საინტერესო იქნება, მაგრამ ვნახოთ, ეყოფა თუ არა გამბედაობა, რომ ეს ნაბიჯი გადადგას!
საერთოდ, პოლიტიკაში შემოსვლა და დამოუკიდებელი აქტივობა მარტივი არ არის!
_ ბოლოს, გიორგი, იმ შემთხვევაში, თუ 6-პუნქტიანი შეთანხმება შედგება და პარლამენტში შეხვალთ, ალბათ, პოლიტიკური ბულინგის მსხვერპლი გახდებით…
_ ჯერ ერთი, ამ საკითხებზე დათანხმება-შეთანხმებას „სტრატეგია აღმაშენებელი“ ცალკე არ იხილავს.
მეორეც, არც ბულინგი მაინტერესებს და არც _ არაფერი. ჩვენ გადაწყვეტილებას ყოველთვის დამოუკიდებლად ვიღებთ იქიდან გამომდინარე, ქვეყნისთვის კარგი და სწორი რა არის და არა იქიდან _ რომელი პარტიისა თუ პოლიტიკური ფიგურისთვის.
მოკლედ, შეთანხმების შემთხვევაში პარლამენტში არშესვლა ნებისმიერი პოლიტიკური ძალის მხრიდან, უბრალოდ, არაადეკვატურ ნაბიჯად მიმაჩნია! საგიჟეთში არ ვცხოვრობთ, გვინდა, ქვეყანა ავაშენოთ, გიჟებისთვის კი გზა ხსნილია!
_ ჩვენში დარჩეს და, ქართულ პოლიტიკაში გიჟი ძალიან ბევრია…
_ ადეკვატურობა არავინ უნდა დაკარგოს. ჩემთვის მნიშვნელოვანია, რომ ისეთი ფუნდამეტი შევქმნათ, რომელზედაც ნორმალურ სახელმწიფოს ავაშენებთ და მგონია, რომ ახლა, ჩვენი დასავლელი პარტნიორების მხარდაჭერით, ამის შესაძლებლობების ფანჯარა გვაქვს!

ვანო პავლიაშვილი