არჩევნებამდე რამდენიმე დღეა დარჩენილი და, წესითა და რიგით, ახლა საუბრის მთავარი თემა 31 ოქტომბერი უნდა იყოს, მაგრამ კორონის მეორე ტალღამ ადამიანებს არჩევნები კი არა, ლამის, საკუთარი ვინაობაც დაავიწყა. შესაბამისად, ნებისმიერ წრეში მთავარი სალაპარაკო სწორედ პანდემიაა. ამ „ტრენდს“, ცხადია, არც მე ჩამოვრჩი და „ტრადიციონალისტთა კავშირის“ ლიდერს სწორედ კოვიდ 19-ზე ჩამოვუგდე სიტყვა, ანუ შევეცადე, კორონასა და პოლიტიკას შორის გარკვეული პარალელი გამევლო

აკაკი ასათიანი:
_ ვირუსის გავრცელების მზარდი ტენდენციაა და აშკარაა, რომ დაინფიცირებულთა რიცხვი მოიმატებს.
_ ინფექციონისტებიც ზუსტად ამას ამბობენ, თუმცა არსებობს მოსაზრება, რომ გაზრდილ სტატისტიკას „ოცნება“ საარჩევნოდ იყენებს, ანუ ქმნის ფონს, რომ ხალხი შეშინდეს და 31 ოქტომბერს არჩევნებზე არ მივიდეს… ნაკლები აქტივობა კი, ცხადია, გაყალბებისთვის იდეალურია.
_ ამას ვერ გეტყვით, მაგრამ ფაქტია, რომ ხელისუფლება ვირუსზე „ჩაფრენილია“.
_ ანუ?
_ მუდმივად იმას ამბობს, რომ ვირუსს მართავს. შესაბამისად, გამოჩნდება და არ დაიმალება, ამ გარემოებას როგორ გამოიყენებს. ამასთან, ისიც სავსებით მოსალოდნელია, რომ ხალხს შეეშინდეს და არჩევნებზე ნაკლები აქტივობა იყოს.
_ ეს ხელისუფლების წისქვილზე დაასხამს წყალს, არა?
_ ხელისუფლება თავის მომხრეებს დარაზმავს, თუმცა საკუთარი ამომრჩევლის მობილიზებას „ნაციონალებიც“ შეძლებენ. ვირუსი უფრო მომცრო, ანუ ნაკლები რესურსის მქონე პარტიებს შეუშლის ხელს.
_ რატომ?
_ ამომრჩევლის მობილიზებას სახსრები სჭირდება.
_ ე. ი., კორონა „ტრადიციონალისტთა კავშირსაც“ დააზარალებს?
_ დიახ, ჩვენც და ბევრ სხვა პარტიასაც.
_ სხვათა შორის, ვირუსის აფეთქების გამო 31-ში საქართველოში უცხოელი დამკვირვებლები არ ჩამოვლენ. არადემოკრატიული არჩევნების ჩასატარებლად ესეც ხომ ნოყიერ ნიადაგს შექმნის?
_ საერთოდ, ისეთი ვითარებაა, რომ ყველაზე მართებული იქნებოდა არჩევნების გადადება, მაგრამ ახლა ეს საქმე ისეა გაქანებული, რომ გადადება შეუძლებელია.
_ არჩევნების გადადება მხოლოდ იმ შემთხვევაში შეიძლება, თუ ქვეყანაში საგანგებო მდგომარეობაა გამოცხადებული.
_ საგანგებო მდგომარეობა მაშინ გამოაცხადეს, როცა ვირუსი 8 ადამიანს შეეყარა, გარდაცვლილი კი სულ 9 იყო, მაგრამ სავსებით ცხადია, რომ ხელისუფლებას არჩევნების ჩატარება სწორედ ვირუსის პირობებში აწყობს.
_ დამისაბუთეთ, ბატონო კაკო, ამას რის საფუძველზე ამბობთ?
_ სხვა ამომრჩეველი შეიძლება, ნაკლები მოვიდეს, ხელისუფლება კი საკუთარის მობილიზებას შეძლებს, ანუ ეპიდემია მანიპულირების მეტ საშუალებას იძლევა, თუმცა ამას რამდენად გამოიყენებს და იკადრებს, ეს უკვე „ოცნებაზეა“ დამოკიდებული.
_ ე. ი., იმის შანსი, რომ დემოკრატიის პრინციპი დაირღვეს და ივანიშვილის გუნდი ხელისუფლებაში მესამე ვადითაც დარჩეს, რეალურია, არა?
_ დიახ, შანსი რეალურია, თუმცა ეს დემოკრატიის პრინციპის დარღვევა არ იქნება.
_ რატომ?
_ დემოკრატია სწორედ ეგაა, რომ ხელისუფლებაში ის იყოს, ვინც არჩევნებს მოიგებს, მაგრამ მოგება იმ რაოდენობით, რომ „ოცნებამ“ მყარი უმრავლესობა შეიქმნას, ვფიქრობ, გამორიცხულია!
_ ისე, ხალხში ის განწყობა, რომ ხელისუფლება აუცილებლად უნდა შეიცვალოს, არსებობს თუ საზოგადოება „ოცნების“ შემცვლელს ვერ ხედავს?
_ ცვლილებების მოთხოვნა ნამდვილად არის, თუმცა ზოგი ფიქრობს, რომ ცვლილებას თავად დღევანდელი ხელისუფლება განახორციელებს, ზოგი კი ელოდება, რომ ხელისუფლება შეიცვლება. აქედან რომელი განწყობის ადამიანები უფრო მეტი არიან, 31-ში გაირკვევა. საერთოდ, ნებისმიერი არჩევნები, გარკვეული თვალსაზრისით, რა თქმა უნდა, „რულეტკაა“.
_ მაშასადამე, ოპოზიციის განცხადება, აი, „ოცნება“ ხელისუფლებიდან აუცილებლად მიდისო და ამ აზრს სოციოლოგიური კვლევებითაც ამყარებს, გადამეტებულია?
_ ჯერ ერთი, ყველანი ვატყობთ, რომ ომია. მეორეც, ეს გამოკითხვები რეალური იმდენადაა, რომ ბრძოლა მიდის, რათა „ოცნებამ“ მყარი უმრავლესობის შესაქმნელად საჭირო ხმები ვერ მოიპოვოს. საამისოდ, მინიმუმ, 60 პროცენტი და ამასთან, ოცდაათივე მაჟორიტარული ოლქის მოგებაა აუცილებელი, თუმცა სრული გარანტია ესეც არ იქნება. თუ „ოცნება“ 40-დან 50 პროცენტამდე აიღებს, ჰაერში ჩამოეკიდება.
_ სხვათა შორის, მდინარაძემ განაცხადა, 60 პროცენტს კი არა, უფრო მეტს ავიღებთო.
_ 60-ზე მეტი აიღონ და რა „დახლიც“ დაუჯდებათ, ნახავენ.
_ მდინარაძის ეს განცხადება იმას ხომ არ მოასწავებს, რომ მმართველი გუნდი გაყალბებისთვის ემზადება?
_ არ ვიცი… შეიძლება, „ოცნებას“ მართლა აქვს იმედი, რომ ამდენ პროცენტს აიღებს და თუ ასე მოხდება, მაშინ ეს „ოცნებისთვის“, ვფიქრობ, საბედისწერო შეცდომა იქნება.
_ აი, ამ სიტუაციაში, როცა „ქოცები“ და „ნაცები“ საარჩევნო ხმებზე ნადირობენ, „ტრადიციონალისტთა კავშირს“ რისი იმედი აქვს, ანუ თქვენი ვარაუდით, მეათე მოწვევის პარლამენტში, მაქსიმუმ, რამდენი დეპუტატი გეყოლებათ?
_ არჩევნების მოგებაზე ლაპარაკი ზედმეტია, მაგრამ რეალისტი რომ ვიყო, ახალ პარლამენტში რამდენიმე, დაახლოებით, სამიდან ხუთ მანდატამდე გვექნება.
_ ბატონო კაკო, იმ შემთხვევაში, თუ „ოცნებას“ საპარლამენტო უმრავლესობის შესაქმნელად ხმები დასჭირდება, „ტარდიციონალისტები“ ხელს გაუწვდით?
_ გააჩნია, მთავრობის რა შემადგენლობა იქნება წარმოდგენილი. ხმის ბრმად ვინმესთვის მიცემას და მხარის დაჭერას არ ვაპირებ!
სხვათა შორის, თუ საშუალება მიეცა, ოპოზიციაც ძალიან ჭრელ კოალიციას შექმნის, თუმცა მხარი რომ დავუჭიროთ, აქაც გარკვეული პრინციპები და პროგრამული თეზისები უნდა იყოს. ისე, თუ „ოცნება“ ისე გააგრძელებს, როგორც ახლა საქმიანობს, ყველაფერი უპერსექტივოა, თუმცა მეორე მხრიდანაც არაფერი ჩანს.
_ ანუ?
_ გასაგებია, რომ ყველა ოპოზიციურ პარტიას თავისი პროგრამა აქვს, მაგრამ უმეტესად არარეალისტურია. ამიტომ ერთიანი პროგრამის შემუშავებას დრო და დამაჯერებლობა დასჭირდება.
_ შეიძლება, მაგრამ გული ვისკენ უფრო მიგიწევთ _ „ოცნებისკენ“ თუ ოპოზიციის კოალიციისკენ?
_ ქვეყანა მხოლოდ შიგნით კი არაა არეული, გარეთაც, რბილად რომ ვთქვა, ძალიან სერიოზული ამბები ხდება. ამიტომ არ შეიძლება, მთავრობის გარეშე დავრჩეთ. ამასთან, სტაბილურობაც უნდა შევინარჩუნოთ. ჰოდა, მხარს იმას დავუჭერთ, ვინც ყველაფერ ამას შეუწყობს ხელს.
_ „გარე სერიოზულ ამბებში“ სომხეთ-აზერბაიჯანის განახლებულ სამხედრო კონფლიქტს გულისხმობთ?
_ დიახ, ამასთან, აშშ-შიც არჩევნებია და უკრაინაშიც. სხვათა შორის, უკრაინის არჩევნები ძალიან მნიშვნელოვანია. აშშ-ის სარეზიდენტო არჩევნები გადამწყვეტი მხოლოდ ჩვენთვის კი არა, მთელი მსოფლიოსთვისაა.
_ ჩვენთვის უკეთესი ბაიდენის გარეზიდენტებაა თუ ტრამპის დარჩენა?
_ ღირებულებების თვალსაზრისით ტრამპისკენ ვარ, ანუ მიმაჩნია, რომ მისი გაპრეზიდენტება აშშ-ის გადარჩენის შანსი იყო, თუმცა რუსეთთან დამოკიდებულების თვალსაზრისით, შეიძლება, ბაიდენის გაპრეზიდენტება გვაწყობდეს. აი, ასეთი უცნაური ამბავია.
_ სხვათა შორის, რამდენიმე დღის წინ ტრამპმა ბაიდენი რუსეთთან კავშირში დაადანაშაულა და პირდაპირ თქვა, პუტინი აფინანსებსო….
_ რუსეთთან კავშირს ორივე ერთმანეთს აბრალებს და, როგორც ჩანს, ამას ჩვენი ხელისუფლებისა და ოპოზიციისგან სწავლობენ. ამხელა ქვეყანა საქართველოს ერთი ერთში, ასე ვთქვათ, იმეორებს. ჩვენ ჩვენი პრობლემა გვაქვს _ თავზე ამხელა რუსეთი გვადგას და ამიტომ ყველა ყველას რუსეთუმეობას აბრალებს. აი, ის კი ნამდვილად არ მეგონა, თუ მოვესწრებოდი, რომ აშშ-შიც ერთმანეთს რუსეთუმეობას დააბრალებდნენ. არადა, არც ერთს ესმის და არც _ მეორეს, რა სისულელეს ლაპარაკობენ!
_ ბატონო კაკო, სერიოზულად ფიქრობთ, რომ ტრამპი და ბაიდენი საქართველოს ხელისუფლებასა და ოპოზიციას ბაძავენ და ერთმანეთს რუსულ ბრალდებებს ამიტომ უყენებენ?
_ არა, სერიოზულად არ ვფიქრობ, მაგრამ დაკნინებაა, ამხელა ქვეყნის ლიდერები იმაზე რომ კამათობენ, ეს გაუბედურებული რუსეთი მათ არჩევნებზე გავლენას ახდენს თუ არა. ამაზე დამამცირებელი რა უნდა იყოს, მაგრამ ვერავინ ხვდება, რომ ეს კრეტინობა უნდა შეწყვიტონ!
_ რატომ გგონიათ, რომ რუსეთი გაუბედურებულია?
_ აბა, გაბედნიერებულია?
_ ყოველ შემთხვევაში, იმდენი მაინც შეუძლია, რომ სამხრეთ კავკასიაში მიმდინარე მოვლენებზე საკუთარი გავლენა მოახდინოს.
_ ვერ ხედავთ, რომ ყარაბაღის კონფლიქტზე გავლენას ვერ ახდენს? _ ერთი თვეა, დაგა-დუგი მიდის და გარდაცვლილთა რაოდენობა, პუტინის ნათქვამით, ხუთი ათასს გადასცდა. სომხები ძალიან ცუდ მდგომარეობაში აღმოჩნდნენ და ერთ დღესაც ფინანსური, ადამიანური თუ მორალური რესურსი აზერბაიჯანსაც გამოელევა.
სხვათა შორის, აზერბაიჯანს თურქეთი უდგას მხარში. სომხეთი მხოლოდ მსოფლიო საზოგადოებრიობამ კი არა, რუსეთმაც მიატოვა. რუსეთისთვის მთავარია, რომ ფაშინიანი მოიცილოს. ამხელა სახელმწიფო ამ დონეზე რომ დავა, გაუბედურებულია, აბა, მეტი რა უნდა ვთქვა?
საბჭოთა კავშირი დედამიწას აზანზარებდა _ პლანეტის ნახევარი მისი იყო, მაგრამ ისე გაქრა, როგორც შარშანდელი თოვლი, ანუ საკუთარ თავთან ბრძოლაში დამარცხდა. რუსეთიც საკუთარ თავს ზუსტად ისევე ებრძვის. რუსეთი, უბრალოდ, ბაქიბუქობს, თორემ, სინამდვილეში, საკუთარ თავს ებრძვის. ასეთი ბრძოლა კი ყოველთვის კატასტროფით მთავრდება.
ჟანგიანი ბირთვული რაკეტები აქვს, გაისვრის და უკან შეთხრიან. ამიტომ ვერც გაისვრის _ ამდენი ფული იმიტომ აგროვა, რომ ბომბი ისროლოს და მთლიანად ამობუგონ?
სტალინი რაღაცას რომ აკეთებდა, ჩექმა და კიტელი ეცვა. ის ძალაუფლების მანიაკი იყო, ფულის კი _ არა. მისი შთამომავლები თავშესაფრებში გარდაიცვალნენ. ყოველ შემთხვევაში, ქალიშვილი. არც სხვებს ულხინთ.
_ მოკლედ, ბატონო კაკო, ვერ მივხვდი, იზიარებთ თუ არა მოსაზრებას, რომ სომხეთ-აზერბაიჯანის კონფლიქტი კრემლის წაფითილებით განახლდა?
_ რა თქმა უნდა, რუსებმა წააქეზეს და ხელი შეუწყვეს. რუსეთი გრძნობდა, რომ აზერბაიჯანს ამჯერად უპირატესობა ექნებოდა და ახლა ფაშინიანის დაცემას ელოდება.
ჩვენთანაც ძალით შემოიჭრნენ და იმ გადარეული სააკაშვილის დამხობის იმედი ჰქონდათ, მაგრამ ომის დროს ხალხი თავის ლიდერს, როგორი მიუღებელიც უნდა იყოს იგი, არ აუჯანყდება, თორემ ჰიტლერი მოსკოვს რომ მიადგა, რუსებს სტალინი უნდა დაემხოთ. როცა საქმე სამშობლოს ეხება, ხალხი ყველაფერს ითმენს, აი, მერე კი, 2012 წელს, სააკაშვილს უპასუხა _ ხელისუფლებიდან წააბრძანა.
მოკლედ, რუსეთი სომხეთშიც ელოდება, რომ ფაშინიანი წავიდეს. ამასობაში კი მხოლოდ სომხეთს კი არა, აზერბაიჯანსაც კარგავს, რეგიონში თურქეთი ძლიერდება და ძნელი მისახვედრი არაა, რუსეთს სამხრეთ ზოლში რაც ელის.
_ რუსეთი თუ დასუსტდება, ეს, პირველ რიგში, ჩვენთვის იქნება კარგი… ბატონო კაკო, რა ამის პასუხია და, თქვენი აზრით, დავითგარეჯის საქმე სომხეთ-აზერბაიჯანის განახლებულ კონფლიქტს, უბრალოდ, დაემთხვა თუ ყველაფერი უფრო დიდი პოლიტიკური თამაშია?
_ მგონი, დამთხვევაა. ყოველ შემთხვევაში, მეეჭვება, ჩვენებს ერთი თვით ადრე გამოეცნოთ, რომ აზერბაიჯანი ომს აპირებდა და ამით აზერბაიჯანთან ევაჭრათ.
სხვათა შორის, ამ დოკუმენტებითაც დასტურდება, რომ დავითგარეჯა ჩვენია და ყოველთვის ჩვენი იქნება!
საერთოდ, ეს ომი რომ ჩაცხრება, ჩვენს ორივე მეზობელთან საზღვრების ამბავი უნდა გავარკვიოთ და მერე მეგობრობა უფრო მჭიდრო იქნება და ეგებ, ერთმანეთთან მოვალაპარაკოთ კიდეც.
_ ე. ი., „კარტოგრაფების საქმეში“ რუსულ კვალს გამორიცხავთ?
_ რა რუსული კვალი?
_ აი, ის ბიზნესმენი ხიდაშელი პირდაპირ ამბობს, რომ რუკების ნაწილი მოსკოვის არქივში მოიპოვა.
_ არქივიდან მე და თქვენც ამოვიღებთ.
_ როგორ?
_ ასეთი ტიპის არქივები ღიაა. არის რაღაცები, რასაც აშშ-სა და ინგლისში 50 თუ 100-წლიანი გრიფი ადევს ხოლმე, მაგრამ რუკების გასაიდუმლოება, მით უმეტეს, ჩვენი და აზერბაიჯანის, ვის ედარდება?
ისე, უკვრით, ბუკინისტებში რუკები როგორ იყიდაო, მაგრამ ჯერ კიდევ საბჭოთა კავშირის დროს, როცა ყველაფერი კონტროლდებოდა, ბუკინისტებში ისეთ რამეს გადავწყდომივარ, რომ გაოგნებული დავრჩენილვარ!
ეს რუკები რუსეთიდანაც რომ იყოს, ამით კრემლი რას იგებს? _ ამის გამო აზერბაიჯანს თავს დავესმხებით თუ ეს საქმე როგორ იქნება?
_ თავს არ დავესხმებით, მაგრამ თუ მიწები ვინმემ გაყიდა, ე. ი., ვიღაცამ იყიდა, შესაბამისად, უკანონო ვაჭრობაში ოფიციალურ ბაქოს ბრალს ირიბად ვდებთ. ასე არაა?
_ ეგ ამბები სააკაშვილმა ჩამოკაკლა და მას უნდა მოეკითხოს.
_ სააკაშვილმა რა ჩამოკაკლა?
_ პირდაპირ თქვა, რომ ამ საქმის გარემოებები იცის…
საერთოდ, იმ კაცისგან, რომელმაც ცხინვალის რეგიონზე თქვა, რა მოხდა მერე, ასი სოფელი დავკარგეთო, ყველაფერი ეს რა გასაკვირია? დანარჩენი კი ძიების პროცესში გამოჩნდება.
_ მოკლედ, ბატონო კაკო, უშვებთ ალბათობას, რომ მელაშვილი და ილიჩევა დამნაშავეები არიან?
_ დამნაშავე ისაა, ვინც ასეთი მითითება მისცა.
_ როგორი მითითება?
_ ფაქტია, რომ დოკუმენტები არ უძებნიათ!
_ შეიძლება, მაგრამ დავითგარეჯის საქმე „ოცნებისთვის“, როგორც მამა კირიონი იტყოდა, წინასაარჩევნო ჯოკერია, არა?
_ რა თქმა უნდა.
სხვათა შორის, საქართველოსა და აზერბაიჯანს შორის ხელშეკრულება 1920 წელს დაიდო, რომლის თანახმადაც, საზღვარი მტკვრის კალაპოტზე გადიოდა, მაგრამ ქართველი ბოლშევიკები არამზადების ხროვა იყო და მათი მემკვიდრეები დღესაც ბევრს ლაპარაკობენ, ზოგი სახელისუფლების წრეებშიცაა გამძვრალი. ეს ჩვენი უბედურებაა, რომლისგანაც საბოლოოდ უნდა გავთავისუფლდეთ! საინგილოსა და ალავერდზე ლაპარაკიც აღარ მინდა.
მაშინ დაბადებული არ ვიყავი, თორემ ერთს მაინც როგორ ვერ მოვკლავდი _ ორჯონიკიძეს ან ორახელაშვილს ან რომელიმე სხვა გარეწარს.
_ დღეს ვის მოკლავთ, ბატონო კაკო?
_ რაღა დროს მოკვლაა _ ამათ არ გადაუციათ, ყველაფერი იმათ ქნეს!
_ თუ „კარტოგრაფების საქმე“ საარჩევნო ჯოკერი იყო, ამან ამომრჩევლის ნაციონალურ გრძნობებზე იმოქმედა?
_ რასაც მე ვატყობ, დიახ, იმოქმედა. ყოველ შემთხვევაში, ხალხის უმრავლესობას სჯერა, რომ „ნაციონალებმა“ ეს ტერიტორიები შეგნებულად გაყიდეს, უფრო სწორად, ვერ მოასწრეს, თორემ აპირებდნენ. მოკლედ, ამან ხალხის დიდ რაოდენობაზე გაჭრა.
_ ხალხს დღეს მიწები უფრო აღელვებს თუ შიმშილი და გაზრდილი კრიმინალი?
_ ზოგი ამბობს, აფხაზეთი და ცხინვალი, ანუ ტერიტორიული მთლიანობა აქტუალური აღარააო, მაგრამ, რეალურად, ეს თემა სამეულიდან არ გადის, ანუ უმუშევრობა და სიღარიბე, პრაქტიკულად, ერთია.
მოკლედ, იმის თქმა მინდა, რომ ხალხს სამშობლო, საბედნიეროდ, არ ავიწყდება. ვიღაცები კი ამბობენ, რა დროს სამშობლოა, როცა მე თანამდებობაზე ჯდომა მინდაო… ხალხი ასეთი რომ არ ყოფილიყო, ეს ქვეყანა დამოუკიდებლობას ვერ მოიპოვებდა!..
_ ერთი სიტყვით, 31 ოქტომბერს ქართულ პოლიტიკაში ორპოლუსიანობა დამთავრდება თუ ისევ „ნაც-ქოცური“ მეინსტრიმით ვიცხოვრებთ?
_ მგონია, რომ დამთავრდება. იმას არ ვამბობ, რომ „ოცნება“ ან „ნაცები“ გაქრებიან, მაგრამ ვითარება ნებისმიერ შემთხვევაში შეიცვლება.
_ ანუ, ე. წ. შუაშისტური პარტიები გააქტიურდებიან?
_ პარლამენტში გაცილებით მეტი პარტია იქნება.
_ ისე, თუ არჩევნები გაყალბდება, ბელარუსის სცენარი ხომ არ განმეორდება?
_ არა.
_ რატომ?
_ ბელარუსში განსხვავებული ტიპის ხალხია. ხომ ხედავთ, ლიდერებიც კი არ არიან, მაგრამ მოსახლეობა ქუჩაში მაინც გამოდის. ტიხანოვსკაია სიმპათიური ქალია, მაგრამ რა ლიდერია, კაცო?! სხვები საზღვარგარეთ გაცვივდნენ.
სხვათა შორის, ზვიად გამსახურდიას მონანიებას რომ აბრალებენ, არ უქნია, მაგრამ რაც ქნა, მხოლოდ იმიტომ, რომ არ გაესახლებინათ, დარჩენილიყო და აქ ბრძოლა გაეგრძელებინა…
ერთი სიტყვით, საქართველო ბელარუსი არაა, ჩვენი ხალხი ასე არ აურევს და აუცილებელიც არ არის! ამ რეგიონში ასეთი ამბავი ჩვენთვის დამღუპველი იქნება, მაგრამ სხვა ფორმა მოიძებნება.
_ ბოლოს, ბატონო აკაკი, ხალხისთვის სათქმელი რა გაქვთ?
_ დარწმუნებული ვარ, საქართველოში ბევრი გონიერი ადამიანია და მიხვდება, ხმა ვის უნდა მისცეს. ჰოდა, იმდენი კი მოგროვდება, რომ „ტრადიციონალისტებს“ შანსი მოგვცენ და ჩვენც არ გავაწბილებთ!

გიორგი აბაშიძე