„ოცნებაზე“ საერთაშორისო ზეწოლა იზრდება, _ ასეთი შეფასება ოპოზიციამ მას შემდეგ გააკეთა, რაც ცნობილი გახდა, რომ 12-მა გავლენიანმა ევროპარლამენტარმა საქართველოს პრემიერ მამუკა ბახტაძესა და საგარეო ურთიერთობათა საკითხებში ევროკავშირის უმაღლეს წარმომადგენელ ფედერიკა მოგერინის საგანგებო წერილი გაუგზავნა, რომელშიც საპრეზიდენტო არჩევნების დროს გამოვლენილ დარღვევებზე, ასევე ია კერზაიას საქმესა და საარჩევნო სისტემის შეცვლაზეა საუბარი, თუმცა ევროპელების მკაცრი ტონის მიუხედავად, ხელისუფლება უკან დახევას არ აპირებს და ამბობს, რომ საერთაშორისო საზოგადოება ოპოზიციასა და არასამთავრობოებს შეჰყავთ შეცდომაში.

„ნაციონალური მოძრაობის“ წევრი, თავდაცვისა და განათლების ყოფილი მინისტრი, დიმიტრი შაშკინი, „ოცნების“ ამ განცხადებას არაადეკვატურს უწოდებს და „ქრონიკა+“-თან იმის ალბათობასაც უშვებს, რომ მმართველი გუნდის ქმედებების გამო საქართველო საერთაშორისო წნეხის ქვეშ აღმოჩნდეს. ეს წნეხი კი, როგორც შაშკინი განმარტავს, ქართველი ჩინოვნიკებისთვის საბანკო ანგარიშების გაყინვით არ შემოიფარგლება და შესაძლოა, დღის წესრიგში ევროპასთან უვიზო მიმოსვლის გაუქმებაც დადგეს.

_ ათზე მეტმა გავლენიანმა ევროპარლამენტარმა, რომელიც სხვადასხვა პარტიის წევრია, საქართველოს პრემიერ ბახტაძესა და საგარეო ურთიერთობათა საკითხებში ევროკავშირის უმაღლეს წარმომადგენელ ფედერიკა მოგერინის საგანგებო წერილი გაუგზავნა, სადაც საუბარია ჩვენს ქვეყანაში ჩატარებული საპრეზიდენტო არჩევნების დარღვევებზე, ია კერზაიას საქმესა და საარჩევნო სისტემის ცვლილებაზე. ბატონო დიმიტრი, თქვენ ევროსტრუქტურებს კარგად იცნობთ და, როგორ ფიქრობთ, ეს წერილი „ოცნებისთვის“ წითელი ბარათია?
_ 2018 წელს მთელმა მსოფლიომ იმ სამეთვალყურეო მისიების მეშვეობით, რომელიც საპრეზიდენტო არჩევნებზე საქართველოში იმყოფებოდა, დაინახა, რომ ეს არჩევნები არ იყო. ისეთი დასკვნები, როგორიც ამ არჩევნებთან დაკავშირებით დაიდო, 2003 წელსაც არ მახსოვს. ნებისმიერი ქვეყნისთვის ეს უმძიმესი დარტყმაა. ამიტომ აბსოლუტურად ლოგიკური და ბუნებრივია, რომ ევროპარლამენტიდან ასეთი წერილი წამოვიდა. ნურავის ჰგონია, რომ შეუძლია, ევროპა, აშშ და, საერთოდ, მსოფლიო მოატყუოს. ის პროდუქტი, რაც საქართველოში ძალიან მცირე სეგმენტზე იყიდება, ბუნებრივია, აშშ-სა და ევროპაში ვერ გაიყიდება.
_ რას გულისხმობთ?
_ იმ აბსოლუტურად არაადეკვატურ მესიჯებს, რომელსაც მთავრობა ავრცელებს.
_ სხვათა შორის, „ოცნება“ ზემოხსენებულ წერილსაც არ მიიჩნევს საგანგაშოდ და ამბობს, ევროპარლამენტარების ვიწრო ჯგუფის დაწერილიაო.
_ რა თქმა უნდა.
ხომ ვხედავთ, რომ მთავრობას ნებისმიერ კრიტიკაზე იმ ინსტიტუტების მიმართ, რომელზეც დემოკრატია დგას, აბსოლუტურად არაადეკვატური დამოკიდებულება აქვს. მაგალითად, როცა არასამთავრობოები ხელისუფლებას აკრიტიკებენ, „ოცნება“ ამბობს, არასამთავრობო ორგანიზაციები გაიყიდნენ, „ნაციონალური მოძრაობის“ წევრები არიან და დავხუროთო. როცა კრიტიკა ევროპარლამენტარებისგან მოდის, მთავრობის რეაქცია ამ დროსაც ანალოგიურია, ევროპარლამენტარები გაყიდულები არიან, „ნაცმოძრაობამ“ ფული გადაუხადაო.
ისე, ველოდები, გაყიდულს აშშ-ის სახელმწიფო დეპარტამენტს როდის დაუძახებენ, თუმცა ამასთან ახლოს მივიდნენ _ ალბათ, გახსოვთ, რა რეაქცია ჰქონდათ სახელმწიფო დეპარტამენტის ანგარიშზე, ანუ პირდაპირ თქვეს, სახელმწიფო დეპარტამენტი შეცდომაში შეიყვანესო.
სიმართლე გითხრათ, არ ვიცი, ეს მესიჯი ვისზე უნდა გაყიდონ, რომ მსოფლიო პოლიტიკის დომინანტი ქვეყნის სახელმწიფო დეპარტამენტი, თურმე, გარკვეულმა ქართულმა არასამთავრობო ორგანიზაციებმა შეცდომაში შეიყვანა.
არსებობს რაღაც პატარა ჯგუფი, რომელიც დიდი ინტელექტით, რა თქმა უნდა, არ გამოირჩევა და ასეთი მესიჯები შეიძლება, მასზე გაიყიდოს. სხვათა შორის, არსებობს ხალხი, რომელსაც სჯერა, რომ ელვის პრესლი ცოცხალია, ანუ ყოველთვის მოიძებნებიან ადამიანები, ასეთ რაღაცებს რომ დაიჯერებენ.
_ გეთანხმებით, მაგრამ ისევ ევროპარლამენტარების წერილს დავუბრუნდეთ, რომელშიც, ზოგად საარჩევნო დარღვევებთან ერთად, საუაბარი ია კერზაიას საქმეზეც არის.
_ დიახ, ასეა.
_ ჰოდა, როცა დასავლეთი კონკრეტიკაზე გადადის, ეს, მგონი, უბრალო მესიჯი აღარ უნდა იყოს, არა?
_ ეს წერილი ვითარებას ჩვენი სამშობლოსთვის ცვლის და არა _ „ქართული ოცნებისთვის“.
_ ეს როგორ?
_ ყველაფერ იმას, რაზეც მსოფლიო ლაპარაკობს, „ოცნება“ არ და ვერ ხედავს, ანუ სანამ ყველაფერი თავზე დაგვემხობა, მთავრობა ყველაფერს უარყოფს. ასეთი მთავრობა, რომელიც შავზე თეთრს იტყოდა და ტყუილების თქმა ერთი წამითაც არ „გაუტყდებოდა“, საქართველოს არასოდეს ჰყოლია!
_ თქვენი აზრით, „ოცნება“ თავზე ნაცარს რატომ იყრის და სირაქლემასავით რატომ იქცევა?
_ პასუხი არ აქვს და ამის გამო ყველაფერს უარყოფს. „ოცნების“ ერთადერთი ამოცანაა, რომ მთავრობაში, რაც შეიძლება, დიდხანს დარჩეს და, რაც შეიძლება, მეტი ფული მოიპაროს. დიახ, „ოცნებას“ ამის მეტი არაფერი აინტერესებს!
_ ოპოზიციის ერთ-ერთი მთავარი მოთხოვნა, რასაც დასავლეთიც მხარს უჭერს, საარჩევნო სისტემის 2024 წლამდე შეცვლაა, თუმცა როგორც „ოცნების“ ლიდერშიფის განცხადებებით ირკვევა, მმართველი გუნდი საარჩევნო სისტემის შეცვლას არ გეგმავს, ანუ პირდაპირ ამბობს, _ ყველაფერი ისე იქნება, როგორც კონსტიტუციცაში წერიაო. ე. ი., „ოცნება“ უკან დახევას არ აპირებს და, შესაბამისად, დასავლეთის შეშფოთება-აღშფოთებაც წყლის ნაყვაა. ვცდები?
_ უნდა გვესმოდეს, თუ როგორ მუშაობს საერთაშორისო პოლიტიკა და, საერთოდ, ამა თუ იმ ქვეყანასთან მიმართებით, ასე ვთქვათ, სივრცეს როგორ ავსებენ.
_ როგორ?
_ ერთბაშად არაფერი ხდება, ანუ იმას, რასაც ახლა გეტყვით, საერთაშორისო საკითხებზე მომუშავე ადამიანები დაადასტურებენ: საერთაშორისო რაპორტები და განცხადებები ილექება და როცა სივრცე ერთ ნაწილში შეივსება, მერე უფრო მკაცრი განცხადებები კეთდება და ა. შ. რაღაც წამს მთავრობისთვის ეს რეაქცია, ბუნებრივია, საკმაოდ მტკივნეული იქნება.
ყველაფერი ეს უფრო მარტივი გასაგები რომ იყოს, რუსეთის მაგალითს მოვიყვან:
2008 წელს რუსეთი ჯერ საქართველოში შემოიჭრა, მერე უკრაინას ყირიმი წაართვა და დომბასში ომი დაიწყო. ყველაფერ ამაზე საერთაშორისო რეაქცია ნელ-ნელა უფრო მკაფიო ხდებოდა. ამასობაში, რუსეთმა აშშ-ის საპრეზდენტო არჩევნებში ჩარევა და ზეგავლენის მოხდენა სცადა _ აშშ-ის ინსტიტუციებზე ჰაკერული შეტევები სახელმწიფოს ეგიდით დაიწყო. ყველაფერ აქედან გამომდინარე, ამ წუთისთვის რუსეთის მიმართ მსოფლიო იმ ზღვრამდეა მისული, როცა საუბარია საბანკო სივრცის გათიშვაზე. ეს რუსეთის ეკონომიკის ჩამოშლის ტოლფასი იქნება.
_ ბატონო დიმა, რუსეთის მაგალითი იმიტომ მოგყავთ, რომ საქართველოც, შესაძლოა, მსოფლიო საბანკო ბლოკადაში აღმოჩნდეს?
_ საქართველოს შემთხვევაშიც ეს სივრცე ზუსტად ასე ივსება და რაღაც მომენტში სანქციების დაწესება დაიწყება.
_ და ეს სანქციები რა სახის შეიძლება იყოს?
_ მსოფლიოს სხვადასხვა ბანკში კონკრეტული ჩინოვნიკების ანგარიშების დაყადაღება. იმ შემთხვევაში, თუ „ოცნება“ ხელისუფლებაში დარჩება, შესაძლოა, სხვა სანქციებიც ვნახოთ. „ოცნების“ მავნებლური პოლიტიკა და კორუფცია იზრდება და იზრდება. ყველაფერი ეს ამ ქვეყანას ჭამს და ყველაზე დიდი უბედურება, რაც შეიძლება მოხდეს, ის არის, რომ ყველაფერ ამის გამო, „ოცნების“ კონკრეტულ ლიდერებსა და ჩინოვნიკებთან ერთად, ქვეყანაც დაისჯება.
_ საბანკო ბლოკადის გარდა მსოფლიომ საქართველოს დასასჯელად კიდევ რა ფორმა შეიძლება გამოიყენოს?
_ მაგალითად, უვიზო რეჟიმის გაუქმება, რაც „ოცნებისთვის“ კი არა, მთელი ქვეყნისთვის იქნება ზიანი.
სხვათა შორის, ისიც ქვეყნის ზიანია, რომ აქამდე აშშ-ის ელჩი დანიშნული არ არის და ელჩის მოვალეობის შემსრულებელი მხოლოდ იმის გამო გვყავს, რომ ელჩად ის ადამიანი არ ინიშნება, ვინც აშშ-ის სახელმწიფო დეპარტამენტს უნდოდა. ყველაფერ ამით „ქართული ოცნება“ კი არა, პირველ რიგში, საქართველოს ეკონომიკა ზიანდება.
_ იმას, რომ აშშ-ის ელჩი არ ინიშნება, ეკონომიკასთან რა კავშირი აქვს?
_ როცა, მაგალითად, მსხვილი ამერიკელი ბიზნესმენი ქვეყანაში შემოდის, ყოველთვის უნდა, რომ აშშ-ის ელჩს შეხვდეს და ამით აქვს განცდა, რომ მისი ინვესტიცია აშშ-ის მთავრობის მიერ იქნება დაცული. აშშ-ის მთავრობის წარმომადგენელი კი ელჩია.
_ ანუ დღეს ამერიკელ ინვესტორებს, რომლებიც საქართველოში არიან, დაუცველობის განცდა აქვთ?
_ დღეს ჩვენ ელჩის მოვალეობის შემსრულებელი გყვავს. თქვენ რომ ამერიკელი ინვესტორი იყოთ და ინვესტიციის ჩადების სურვილი გქონდეთ, ორ ქვეყანას ნახავთ _ საქართველოს და მონტენეგროს. ორივე ულამაზესი ქვეყანაა. მონტენეგრო ჩვენზე უარესი არაფრითაა _ ევროპის შუაგულშია, იქ დემოკრატიაც არის. აშშ-ის ელჩი და ინსტიტუციებიც მუშაობენ. შესაბამისად, არც კორუფციული პრობლემებია. საქართველოში კი, რომელიც ასევე ულამაზესია, აშშ-ის ელჩი არ არის. თქვენ, როგორც ინვესტორს, ბუნებრივია, გაგიჩნდებათ კითხვა, _ ორი წელია, საელჩო ელჩის გარეშე რატომ არის? ამასთან, სახელმწიფო დეპარტამენტის რაპორტებსაც ნახავთ და გეკითხებით, სად გექნებათ ინვესტიციის დაბანდების სურვილი _ საქართველოში თუ მონტენეგროში?
_ ალბათ, მონტენეგროში.
_ სამწუხაროდ, ჩვენი ეკონომიკა ინვესტიციებზეა დამოკიდებული _ ინვესტიციების გარეშე ვერ განვვითარდებით.
_ კი ბატონო, მაგრამ ინვესტიციები „ოცნებას“ თუნდაც იმიტომ სჭირდება, რომ ხელისუფლებაში დარჩეს და ჩრდილოვანი საქმიანობა გააგრძელოს.
_ თავისთავად, მაგრამ ინვესტიციების მოზიდვა და პარალელურად ბიუჯეტიდან ფულის მოპარვა შეუძლებელია. ასევე შეუძლებელია ინვესტიციების მოზიდვა და არასამთავრობოებისთვის დედის გინება. შეუძლებელია, ინვესტიციების მოზიდვა და, ამავდროულად, პარტნიორი ქვეყნების გინება. ყველაფერი ეს ერთად არ მუშაობს: ან ქვეყანას აშენებ, ან ქვეყნის ხარჯზე შენს კაპიტალს ადიდებ.
_ ყველაფერი ეს გასაგებია, მაგრამ თუ საერთაშორისო იზოლაციაში აღმოჩნდება, ყველაფერს დაკარგავს და „ოცნებას“ არ ურჩევნია, ფასადური დემოკრატია შექმნას და ამით ხელისუფლებაში ყოფნა გაიხანგრძლივოს?
_ თავისთავად, მაგრამ ამათ ჩვენ ბიუჯეტი დავუტოვეთ, რომელსაც იპარავენ. არ ვიცი, მოგეხსენებათ თუ არა, მაგრამ მარტის შუა რიცხვებში საქართველოს აუდიტის სამსახურმა, ანუ სახელმწიფო ორგანომ დასკვნა დადო, რომლის მიხედვითაც, ის ფული, რომელიც ბოლო შვიდი წლის განმავლობაში ე. წ. უფასო ფაკულტეტებზე დაიხარჯა, არამიზნობრივად და გაფლანგულად ჩაითვალა, ანუ საუბარია 120 მილიონ ლარზე, რომელიც განათლების სამინისტრომ გაფლანგა.
ყველაფერი ეს ხდება იმ პირობებში, როცა საქართველოს მესამე პრეზიდენტს ოთხი თუ ხუთი პიჯაკისთვის სდევნიან, ვანო მერაბიშვილი კი ციხეში იმის გამო ზის, რომ დასაქმების პროგრამა შექმნა. ასევე ციხეში ზის დავით კირკიტაძე, რომელმაც ავტობუსს ხელი დაარტყა. ამ ავტობუსს არ ეწერა, რომ პოლიციის იყო. მოკლედ, ყველაფერ ამის ფონზე სახელმწიფო აუდიტი ამბობს, რომ 120 მილიონი არამიზნობრივად დაიხარჯა. როცა სახელმწიფო ფული არამიზნობრივად იხარჯება, ამას იურიდიულ ენაზე გაფლანგვა ჰქვია.
ორი კვირა გავიდა, რაც სახელმწიფო აუდიტის ეს დასკვნა გამოქვეყნდა, მაგრამ გაგიგიათ, მას რამე რეაქცია მოჰყოლოდა?
_ ტყუილს ვერ გეტყვით: ნამდვილად არ გამიგია, რომ 120 მილიონის გაფლანგვაზე ვინმეს ზერელე კომენტარი მაინც გაეკეთებინოს. ზოგადადად, ხელისუფლებას რეაქცია ბევრ რამეზე არ აქვს…
_ მესმის, რაც მკითხეთ და ამ შეკითხვას არ გავურბივარ. თქვენი შეკითხვა ლოგიკურია, მაგრამ ის ხალხი, ვინც ასე იქცევა, ლოგიკისგან ისევე შორს არის, როგორც საქართველო _ ჩინეთისგან!
დიახ, აბსოლუტურად ლოგიკურია, ვიკითხოთ, რომ იმ საქმეს, რომელიც კანონიერად თუ უკანონოდ გაჭმევს, რატომ აფუჭებ, მაგრამ აფუჭებენ და ბოლო დროს მილიონი მაგალითია, რომელიც ამ გაფუჭებას ადასტურებს!
კიდევ ერთ მაგალითს მოვიყვან: სოფლის მეურნეობაში არსებობს ქიმიური მასალები, რომელთა გამოყენებითაც მოსავლის გაათმაგებაა შესაძლებელი, თუმცა პრობლემა ის არის, რომ 10 თუ 12 წლის განმავლობაში ამ მიწაზე აღარაფერი გაიზრდება. ზოგიერთი ამას აკეთებს, ანუ ურჩევნია, ერთ წელს ათმაგი მოსავალი მიიღოს, შემდეგი ათი წელი კი იმ მიწაზე აღარაფერი გაიზარდოს.
_ ბატონო დიმიტრი, სოფლის მეურნეობაში ამ მეთოდს „ოცნების“ „ტიპები“ იყენებენ?
_ დიახ, რა თქმა უნდა.
აბა, რომელ ნორმალურ ადამიანს, რომელიც ქვეყანასა და მომავალზეა ორიენტირებული, მოუვდოდა აზრად, რომ უფასო ფაკულტეტები შემოეღო? ერთი ფილოსოფოსი ივანიშვილმა ძლივს დაასაქმა და ამის მიუხედავად, შვიდი წელია, ამ უფასო ფაკულტეტებზე ფილოსოფოსებს ვამზადებთ…
_ ყველაფერ ამის მიუხედავად, ხელისუფლება კორუფციას უარყოფს. აი, თუნდაც პარლამენტში მისულმა თავდაცვის მინისტრმა, ლევან იზორიამ, ვენები გადაიხსნა, _ რა კორუფცია, რის კორუფცია, ბინებს ვაქირავებ და თავი ისე გამაქვსო.
_ დიახ, კორუფციას უარყოფენ, მაგრამ ნებისმიერ ქვეყანაში არსებობს შეფარდება, ანუ რამდენი გაქვს შემოსავალი და რამდენს ხარჯავ. ერთი მითხარით, რომელი მინისტრის შემოსავალი და ხარჯია შეფარდებითი?
ისე, საკითხავია, ეს ბინები იზორიამ როგორ აიშენა? ფული, რა, ბაბუამ დაუტოვა?! კარგად მახსოვს, ერთ ყოფილ პრემიერს ფულს მამა რომ ჩუქნიდა და ჩუქნიდა. რა ვიცი, მამაჩემიც მთელი ცხოვრება მუშაობს, მაგრამ არაფერს მჩუქნის. მამათქვენი ყოველწლიურად 100 ათას დოლარს გჩუქნით?
_ სამწუხაროდ, მამაჩემი გარდაცვლილია.
_ ძალიან ცუდია, მაგრამ როცა ცოცხალი იყო, ყოველწლიურად 100 ათას დოლარს გჩუქნიდათ?
_ ცხადია, არა.
_ არც მამაჩემი მჩუქნის. ჩვენს მინისტრებს კი ისეთი მამები ჰყავთ, რომ ყოველ წელს ამდენ ფულს ჩუქნიან!
ეს ჩვეულებრივი ცინიზმი და ხალხის დაცინვაა, რაც, ჯერჯერობით, გასდით, მაგრამ რაღაც მომენტში აღარ გაუვათ და გადაწყვეტილებას ხალხი მიიღებს!
_ სანამ ხალხი გადაწყვეტილებას მიიღებს, ხელისუფლებამ შესაძლოა, რიტორიკა შეცვალოს. ყოველ შემთხვევაში, იგივე იზორიამ პარლამენტში განაცხადა: ჩემი პასუხი კითხვაზე, მძინარე ცხინვალი საქართველომ დაბომბა თუ არაო, არის არა. ანუ თავდაცვის მინისტრი პრეზიდენტს ემიჯნება, რომელიც ჯიუტად აცხადებს, რომ ომი საქართველომ დაიწყო.
_ სალომე ზურაბიშვილს საქართველო არ აინტერესებს და არც არასოდეს აინტერესებდა. მას, უბრალოდ, საქართველოს პრეზიდენტის საპენსიო ადგილი და სხვადასხვა ქვეყანაში სიარული უნდა.
_ სხვათა შორის, საფრანგეთიდან ქალბატონი პრეზიდენტი საკმაოდ მაღალ პენსიას იღებს.
_ დიახ, მაგრამ საპრეზიდენტო თვითმფრინავით დაფრინავს, ბოდიში და, ამ ვიზიტებისგან სიამოვნებას იღებს, რომ საქართველოს წარმოადგენს, თუმცა რა დონეზე წარმოადგენს, ეს ყველამ ვნახეთ…
სალომე ზურაბიშვილს ფილოსოფიის დონეზეც არ ესმის, რომ ქვეყნის მთავარსარდალია. იზორიას კი ესმის, რომ თავდაცვის სამინისტროს ხელმძღვანელობს და შესაბამისად, თუ იტყვის, ცხინვალი საქართველომ დაბომბაო, ამით იმ ათასობით ოფიცერს, რომელიც ჯარში მსახურობს, უნდა უთხრას, სამხედრო დამნაშავე ხარო. ტერმინი _ „საქართველომ დაბომბა“ _ არ არსებობს! საქართველოს სახელით ხალხი ომობდა. იზორიამ რომ თქვას, ცხინვალი საქართველომ დაბომბაო, ამით მან გენერალ დევი ჭანკოტაძეს, რომელმაც ოკუპანტ რუსეთს ყველაზე დიდი ზიანი მიაყენა, უნდა უთხრას, დამნაშავე ხარო, მაგრამ ამას თავდაცვის მინისტრი, ბუნებრივია, ვერ გააკეთებს.
_ მესმის, მაგრამ ამ განცხადებით იზორია არც ივანიშვილს გაემიჯნა, რომელიც ომის დაწყებაში, ჯერ კიდევ, ხელისუფლებაში მოსვლამდე საქართველოს ადანაშაულებდა…
_ იზორიამ, უბრალოდ, არ დაივიწყა, რომ თავდაცვის მინისტრია. მას ომის დაწყებაზე სხვა რამე რომ ეთქვა, როგორც თავდაცვის მინისტრი, ჯარისთვის აღარ იარსებებდა! იზორია ჩვეულებრივი პოლიტიკოსი კი არა, თავდაცვის მინისტრია! ამ სიტუაციაში ის, რასაც სალომე ან ბიძინა ამბობს, მეორეხარისხოვანია.
_ სალომე ზურაბიშვილი მთავარსარდალია, ბატონო დიმა.
_ დიახ, მაგრამ წეღანაც გითხარით, მას ფილოსოფიურადაც არ ესმის, რომ უმაღლესი მთავარსარდალია. დამიჯერეთ, მან ტერმინიც არ იცის. სულ ამბობს, მთავარსარდალი ვარო, მაგრამ მთავარსარდალი გაერთიანებული შტაბის ხელმძღვანელია. პრეზიდენტი კი უმაღლესი მთავარსარდალია, მაგრამ ზურაბიშვილმა ესეც არ იცის! არც ისეთი ვინმე ჰყავს, რომელიც ამას ეტყვის.
_ ე. ი., იზორიას საპარლამენტო ანგარიშით უკმაყოფილო ხართ?
_ იზორიასა თუ სხვა რომელიმე მინისტრისგან მე, როგორც ამ ქვეყნის რიგითი მოქალაქე, იმ ხედვის წარმოდგენას ველოდები, თუ როგორ შეიძლება იყოს დაცული ჩემი ქვეყნის უსაფრთხოება. იზორიას გამოსვლიდან ეს გაიგეთ?
_ დიახ, იზორიამ თქვა, თუ მტერი შემოგვესევა, საქართველოს თავის დაცვა შეუძლიაო.
_ იზორიამ ისიც თქვა, ვინ შემოგვესევა?
_ არა, ეს არ დაუკონკრეტებია.
_ ნებისმიერ პოლიტიკურ ან სამხედრო სკოლაში, როცა სამხედრო მენეჯმენტს ასწავლიან და თავდაცვაზეა საუბარი, თავდაპირველად ეუბნებიან, შეიარაღებული ძალები იქმნება და ვითარდებაო, ანუ შეიარაღებული ძალების ამოცანა იმ გამოწვევებით არის განპირობებული, რომელიც ქვეყნის წინაშე დგას. მაგალითად, აშშ-ს შეიარაღებულ ძალებში იციან, რომ მათი სახელმწიფოს მოწინააღმდეგე სახელმწიფოს საზღვრებთან ახლოს არ არის, ანუ სამხედრო პრობლემების შექმნას არც მექსიკისგან ელოდებიან და არც _ კანადისგან. მოკლედ, იმ კონტინენტზე, რომელზედაც აშშ მდებარეობს, მისი მოწინააღმდეგე არ არსებობს. სწორედ ამის გამო, მე-20 საუკუნიდან, აშშ-ს სამხედრო თავდაცვითი დოქტრინა ავიამზიდებზეა აგებული, ე. ი., ამერიკული ჯარის მთავარი დამრტყმელი ძალა და რესურსი ავიამზიდებია, რადგან აშშ-მ იცის, მისი მტერი სხვა კონტინენტზეა.
დიდი ბრიტანეთის სამხედრო დოქტრინა კი, რომელსაც პირადად ვსწავლობდი, ძირითადად, იმითაა განპირობებული, რომ კუნძულზეა. აქედან გამომდინარე, ძირითადი ჰაერსაწინააღმდეგო დანადგარები გემებზეა განთავსებული.
საფრანგეთის სამხედრო დოქტრინა ასევე იმ გამოწვევებით არის განპირობებული, რაც ქვეყნის წინაშე დგას.
საქართველოს სამხედრო დოქტრინა და სამხედრო ძალების მშენებლობა, ყველა წესითა და ლოგიკით, ქვეყნის წინაშე არსებულ გამოწვევებზე უნდა იყოს აგებული. ეს მთავარი გამოწვევა კი რუსეთია. თუ ვინმე კითხვას დასვამს, _ რუსეთი მტერია თუ არაო? პასუხობენ, _ დიახ, არისო. მაგრამ თუ რუსეთი მტერია, მაინტერესებს, ჩვენი თავდაცვის სამინისტრო რას აკეთებს, რომ ქვეყანა ამ მტრისგან დაიცვას?
_ რას უნდა აკეთებდეს?
_ ასევე მაინტერსებს, შვიდი წელი გაჩერებული რატომ არის თბილისის თავდაცვის წრის მშენებლობა? _ ყველაფერი, რაც გაკეთებული იყო, განადგურდა. გარდა ამისა, მაინტერესებს, რატომ არავინ ზრუნავს სამხედრო გადამზიდავი ვერტმფრენების ჩამოყვანაზე? _ ჩვენი რელიეფიდან გამომდინარე, ერთი წერტილიდან მეორეში სამხედრო შენაერთების სწრაფად გადასროლა არ შეგვიძლია. მაგალითად, მთა-თუშეთში ზაფხულში რომ ახვიდეთ, ზამთრის პერიოდზე აღარაფერს ვამბობ, 6-7 საათია ამისთვის საჭირო. ირაკლი ალასანიამ ამერიკულ სატვირთო ვერტმფრენებზე, რომელსაც გვჩუქნიდნენ, უარი თქვაო, მაგრამ მას შემდეგ რატომ არაფერი გავაკეთეთ, რომ ის ვერტმფრენები გვქონდეს, რომლითაც, საჭიროების შემთხვევაში, შენაერთებს ერთი წერტილიდან მეორეში გადავისვრით?
_ სამაგიეროდ, როგორც იზორიამ თქვა, „ჯაველინები“ უკვე საქართველოშია.
_ ეს ძალიან კარგია, თუმცა „ჯაველინები“ არც იზორიას დამსახურებაა და არც _ ამ მთავრობის. მაინტერესებს: რას აკეთებს თავდაცვის სამინისტრო ანტისაჰაერო დაცვითი სისტემების შესაძენად? თუ ვინმეს ჰგონია, რომ პროფესიონალებს იმით მოატყუებს, რაც საფრანგეთიდან ძალიან ძვირად იყიდეს, სასაცილოა!
_ საფრანგეთიდან რა ვიყიდეთ?
_ რადარები, რაც ძალიან კარგია, ანუ რადარზე დავინახავ, რუსული თვითმფრინავი საქართველოს როგორ ბომბავს. ასევე ჩამოიტანეს ანტისაჰაერო თავდაცვითი რაკეტები, რომელიც „სპინგერების“ ანალოგია. „სპინგერი“ ძალიან მოკლე მანძილზე მუშაობს. ეს იგივეა, რომ კურდღელზე გათვლილი საფანტი დათვს ვესროლო.
_ ანუ საქართველო დაუცველია?
_ პირადად მე მაინტერესებს, როგორ უნდა იყოს ქვეყანა რუსული აგრესიისგან დაცული ჰაერიდან და მიწიდან, მაგრამ ამაზე იზორიასგან ვერაფერი მოვისმინე.
_ ამაზე კითხვა თავდაცვის მინისტრისთვის ოპოზიციასაც არ დაუსვამს.
_ არ ვიცი, ეს კითხვა დაისვა თუ არა.
ზოგადად, აქ რამე სამხედრო საიდუმლოებაზე არის საუბარი. შესაბამისად, უნდა ვიცოდეთ, ქვეყნის დაცვას ხელისუფლება როგორ აპირებს. მართალია, სამხედრო საქმის დიდი პროფესიონალი არ ვარ, მაგრამ იმის გამო, რომ თავდაცვის მინისტრი ვიყავი, რაღაც მესმის. შესაბამისად, მაქვს უნარი, შევადარო, რუსული თვითმფრინავი და ის ფრანგული რაკეტა, რომელიც საქართველომ შეიძინა, რა სიმაღლეზე მუშაობს. მოკლედ, იმის თქმა მინდა, რომ ამ რაკეტით რუსულ თვითმფრინავს ვერანაირად ჩამოვაგდებთ!
_ ბოლოს, ბატონო დიმა, საუბარს სანამ მოვრჩებით, უკრაინის არჩევნებსაც შევეხოთ: იმ შემთხვევაში, თუ მეორე ტურში ზელენსკი პოროშენკოს დაამარცხებს და პრეზიდენტი გახდება, ამით საქართველოსთვის რა შეიცვლება?
_ ეს ძალიან ბევრ რამეს შეცვლის იმიტომ, რომ საქართველო და უკარიანა გადაჯაჭვულები არიან. უკრაინა ამ წუთს ჩვენი ყველაზე მნიშვნელოვანი სტრატეგიული პარტნიორია _ ჩვენ საერთო მტერი გვყავს და ეს მტერი რუსეთია. უკრაინას აქვს შესაძლებლობა, რომ პოსტსაბჭოურ ქვეყნებში პოლიტიკური ლანდშაფტი მთლიანად შეცვალოს. საქართველოს ამის გაკეთება უჭირს, რადგან პატარაა, უკრაინა კი დიდი ქვეყანაა, რომელსაც დიდი სამხედრო და ეკონომიკური პოტენციალი აქვს.
_ სოციალურ მედიაში დაიწერა, რომ ზელენსკის გაპრეზიდენტების შემთხვევაში სააკაშვილი შესაძლოა, უკრაინის პრეზიდენტი გახდეს. ამაზე იცით რამე?
_ არა, ამაზე ინფორმაცია არ მაქვს, თუმცა ზელენსკი ღიად საუბრობს იმ წარმატებებზე, რომელიც საქართველოს ჰქონდა და ყველა ეს წარმატება სააკაშვილს უკავშირდება.
_ „ოცნებისთვის“ ესეც მესიჯია?
_ ასეთი მესიჯების გაგებას განათლება და ლოგიკა სჭირდება. „ოცნებას“ მესიჯების კი არა, იმის ესმის, ფული როგორ მოიპაროს!