ირინა მაკარიძე

პოლიტიკური განცხადებების საფუძველზე „ერთიანი ნაციონალური მოძრაობის“ პოლიტსაბჭოს თავმჯდომარე ლევან ხაბეიშვილის დაკავებასა და მისთვის მოხელისთვის ქრთამის დაპირებისა და ხელისუფლების დამხობისკენ მოწოდების ბრალდებით დაპატიმრების შესახებ, ასევე მოსალოდნელ თუ მიმდინარე დაკავებებზე, აქციებსა და სხვა მნიშვნელოვან პოლიტიკურ თემებზე „ქრონიკა+“-ს ესაუბრება ოპოზიციონერი პოლიტიკოსი ბორის ჩელე ყურუა:

_ პოლიტიკოსის დაკავება დაპირებისა და განცხადებების გამო მგონია, რომ აბსურდია. ამ შემთხვევაში, თუ ბიუჯეტის ფულს ჰპირდები ჯილდოს სახით ადამიანებს, ისიც, ხელისუფლებაში მოსვლის შემთხვევაში, ეს შეუძლებელია ქრთამად ჩითვალოს. ეს სხვა არაფერია, თუ არა პოლიტიკური დაპატიმრება და აქ რაიმე სამართლებრივი პროცესი არაფერ შუაშია.

_ თქვენ მოინახულეთ ხაბეიშვილი დაკავების დღესვე, რა თქვა მან?

_ ის მიიჩნევს, რომ დაკავებულია მისი პოლიტიკური პოზიციის გამო, მათ შორის რა განცხადებებიც გააკეთა 4 ოქტომბერთან დაკავშირებით. მითხრა, რომ მის დაკავებას უკავშირებს იმ შიშს, რაც გამოიწვია მის მიერ 4 ოქტომბრის დიდი აქციის დაანონსებამ.

_ თქვენ როგორც პოლიტიკოსი, რას ფიქრობთ, რამდენად არის ეს მართლაც 4 ოქტომბრის შიშით გამოწვეული?

_ ორი ვარიანტია, ერთი _ ადამიანს აკავებ იმისთვის, რომ მას მართლაც აქვს დანაშაული ჩადენილი და მეორე _ სვამ ციხეში იმიტომ, რომ გჭირდება, ციხეში ჩასვა, რადგან ფიქრობ, რომ გარეთ უფრო დიდ ზიანს გაყენებს, ვიდრე მოგაყენებდა ციხიდან. ამ შემთხვევაში, პირველი არ არის, რადგან არ არსებობს დანაშაული, რომლის მომიზეზებითაც ხაბეიშვილი ციხეში გაამწესეს, შესაბამისად, რჩება მეორე, რასაც ხაბეიშვილიც ასახელებს თავის დაკავების მიზეზად, _ ეს არის შიში, რომელიც მან გამოიწვია „ქართულ ოცნებაში“. ამ შემთხვევაში ყველაზე ლოგიკურად მეც ეს ვერსია მეჩვენება.

_ ლევან ხაბეიშვილი მუდმივად საუბრობდა, რომ მას „ქართული ოცნებიდან“ აწვდიდნენ ინფორმაციას. ამის შესახებ „ქართული ოცნების“ პრემიერმა აღნიშნა, რომ „ლევან ხაბეიშვილი არის ერთი სასაცილო კაცი, რომელსაც მეორე სასაცილო კაცი აწვდის მესიჯებს“. ამის შემდეგ ჩვენ ვნახეთ, რომ ხაბეიშვილისა და მურთაზ ზოდელავას დაკავების პარალელურად დააკავეს „ქართული ოცნების“ ყოფილი თავდაცვის მინისტრი ჯუანშერ ბურჭულაძე. ამ განცხადებასა და ამ დაკავებებს შორის რამე კავშირს თუ ხედავთ?

_ ლევან ხაბეიშვილი რა განცხადებებსაც აკეთებდა, იმდენად ახლოს იყო სიმართლესთან, ალბათ, მართლაც შიგნიდან გამოსული ინფორმაცია იყო. ყოფილი თავდაცვის მინისტრი და ღარიბაშვილის გარემოცვის წევრი ამ ინფორმაციას ფიზიკურად ვერ გამოიტანდნენ. შესაბამისად, სასაცილოა, როდესაც ვერ პოულობ ინფორმაციის გამომტანს, „ვირთხას“ საკუთარ გარემოცვაში და სხვა ადამიანს აკავებ.  თითქოს უნდათ, ვინმე დაარწმუნონ, რომ ის ადამიანი იპოვეს, ვინც მოღალატეა თავიანთ რიგებში. ჩემი აზრით, შეუძლებელია, რომ ინფორმაციის გამომტანი იყოს ყოფილი თავდაცვის მინისტრი, რომელიც მათი გარემოცვის წევრი არ არის.

_ მამუკა მდინარაძის სუს-ის უფროსად დანიშვნის ფაქტს როგორ შეაფასებთ და უკავშირდება თუ არა ეს დაჭერები ამას?

_ ზოგადად, უსაფრთხოების სამსახურის შეფები ასე ხშირად არ იცვლებიან. როგორც ჩანს, ანრი ოხანაშვილი არ იყო მზად იმ პოლიტიკური პასუხისმგებლობისთვის, რასაც საკუთარ თავზე იღებს მამუკა მდინარაძე. უკვე ჩანს, რომ სახელმწიფო უსაფრთხოების სამსახური კიდევ ერთხელ იქნება გამოყენებული პოლიტიკური ანგარიშსწორების ინსტრუმენტად. ამ შემთხვევაში, მგონია, რომ სამშობლოს ღალატის მუხლის გააქტიურება უნდათ და კიდევ შეიძლება ველოდოთ დაკავებებს. სწორედ ამ მისიით დაინიშნა მამუკა მდინარაძე სუს-ის უფროსად. სამწუხაროა, რომ სახელმწიფო უსაფრთხოების სამსახურს, რომელიც ჩვენს უსაფრთხოებას უნდა იცავდეს ასეთ არასტაბილურ გარემოში, ავალია ის, რომ „ქართული ოცნების“ პოლიტიკური ოპონენტების დევნით იყოს დაკავებული.

_ თქვენ ბრძანეთ, რომ დაკავებები გაგრძელდება, რას გულისხმობთ?

_ ამ ქვეყანაში, ვიდრე რეჟიმი არ შეიცვლება, ცხადია, პოლიტიკური დაკავებები  გაგრძელდება. ამ შემთხვევაში, როგორც იკვეთება,  ღარიბაშვილის ირგვლივ ყულფი სულ უფრო ვიწროვდება, არსებობს ინფორმაცია, რომ უნდათ ღარიბაშვილის დაკავება.

_ სახელმწიფო უსაფრთხოების სამსახური აცხადებს, რომ დააკავეს ორი უკრაინელი, რომლებსაც ასაფეთქებელი ნივთიერება „ჰექსოგენი“ შემოჰქონდათ და პარალელურად პროპაგანდისტული მედია ავრცელებს ინფორმაციას ამ ფაქტის 4 ოქტომბრის აქციასა და  ბაჩო ახალაიასთან შესაძლო კავშირზე. რას იტყვით ამაზე და რამდენად რეალური შეიძლება იყოს ეს ინფორმაცია?

_ ჩემი აზრით, არარეალურია, არ ვენდობი პროპაგანდისტულ მედიას და არც სახელმწიფო უსაფრთხოების სამსახურს. ჩემი აზრით, მათ რომ მართლაც რამე მტკიცებულება ჰქონდეთ, ერთი მაინც, უკვე დააკავებდნენ ამ ადამიანების აბსოლუტურ უმრავლესობას, ვისაც ამასთან შეიძლება შეხება ჰქონოდა. თუ ამას არ აკეთებენ, ეს ნიშნავს, რომ მათი განცხადებები ემსახურება იმას, რომ სამომავლოდ ნიადაგი მოამზადონ ვინმეს დაკავებისთვის, ამ შემთხვევაში უნდათ გადაიტანონ ადამიანების ყურადღება, დააშინონ ისინი და ამყოფონ უმოქმედო მდგომარეობაში.

_ ქვეყანაში, ერთი მხრივ, არ წყდება პროტესტი, მეორე მხრივ, ხელისუფლება ემზადება ადგილობრივი არჩევნებისთვის, პარალელურად აგრძელებს დაკავებებს, როგორ შეაფსებთ ამ ვითარებას?

_ ნებისმიერ შემთხვევაში კრიზისი სახეზეა. მთავრობას უნდა, შექმნას ილუზია, რომ თითქოს ნორმალიზებულია სიტუაცია და არაფერი განსაკუთრებული არ ხდება, თუმცა ჩვენც ვხედავთ, რომ ძალიან აწუხებთ ის საპროტესტო მუხტი, რომელიც არის ქვეყანაში. საბოლოო ჯამში, არეულია სიტუაცია. ამას „ქართული ოცნების“ ამომრჩევლებიც ამჩნევენ, უნდათ, რომ მათ მიერ მხარდაჭერილმა პარტიამ დაანახოს გამოსავალი, თუმცა ეს ვერ ხდება. მეორე მხარეს არიან ადამიანები, რომლებიც დიდ უსამართლობას აწყდებიან და ერთადერთ გამოსავალს რასაც ხედავენ, არის ის, რომ ხელისუფლება შეიცვალოს მშვიდობიანად. თუმცა ეს პროცესი მარტივი არ არის. ხელისუფლებას უნდა, რომ ისევ თავის კომფორტის ზონაში დაბრუნდეს. ამის გამო მზად არის, უდანაშაულო ადამიანები დასაჯოს და ციხეში გაუშვას. პრევენციულად ადამიანების დასჯა იქით არის მიმართული, რომ ხალხი დააშინონ, რომ მათ რაღაცები აღარ აპროტესტონ.

_ ჩვენ ვნახეთ, რომ მელიქიშვილის გამზირზე აქტივისტებზე თავდასხმის ფაქტზე დაკავებული მოძალადეები გაათავისუფლეს იმ საბაბით, რომ მათ დანაშაული ვერ დაუმტკიცეს, ამის პარალელურად კი ათეულობით აქციის მონაწილე წლობით ციხეში გაუშვეს ისე, რომ დანაშაული ვერ დაუმტკიცეს, რაზედაც კობახიძემ განაცხადა, რომ ათასობით იყო მოძალადე და მხოლოდ 30 ადამიანი დაიჭირეს, ამაზე რას იტყვით?

_ სამწუხაროდ, „ქართული ოცნება“ სასამართლოს იყენებს იმისთვის, რომ პოლიტიკურ ოპონენტებს გაუსწორდეს. სტანდარტი განსხვავებულია იმ ადამიანების შემთხვევაში, ვისი დაკავებაც მათ უნდათ და იმ ადამიანების მიმართ, ვისი დაკავებაც მათ ინტერესებში არ შედის, განსხვავებული მიდგომა არსებობს. მთელმა საქართველომ ნახა ის ძალადობის კადრები, რაც კახა კალაძის საარჩევნო შტაბთან მოხდა. ამგვარი მტკიცებულებები რომ ჰქონოდათ სინდისის პატიმრების შემთხვევაში, ალბათ, ციხეებს დააშენებდნენ ყველას თავზე. ვხედავთ, რომ არ უნდათ თავიანთი მხარდამჭერების დასჯა, „მათიანები“ არიან,  შესაბამისად, დიდად თავი არავის გამოუდევს და დაკავებული ადამიანებიც კი გაათავისუფლეს.

_ თქვენ იყავით „გირჩი-მეტი თავისუფლების“ წევრი, მაგრამ პარტია დატოვეთ ცოტნე კობერიძესთან და სხვა ადამიანებთან ერთად, რადგან გქონდათ განსხვავებული ხედვა პოლიტიკურ პროცესებთან დაკავშირებით. რას ფიქრობთ, როგორ უნდა განვითარდეს ეს პროცესები?

_ ნებისმერ შემთხვევაში უნდა გაიზარდოს იმ ადამიანების რიცხვი, რომელთაც უნდათ, რომ ქვეყანაში ერთმმართველობა აღარ იყოს. პროტესტი უნდა გაიზარდოს და ადამიანები უნდა დაემატნონ. მე რასაც ვუყურებ, პოლიტიკური პარტიები თითქოს ჩამოშორებული არიან ამ პროცესს, ისინი ვერ ახერხებენ იმას, რომ აქ ჩართული ადამიანების რაოდენობა რეალურად გაზარდონ, არიან თოთო-ოროლა პოლიტიკოსები, რომლებიც ამაზე მუშაობენ, მაგრამ, საბოლოო ჯამში, ასე არ ხდება. ვერ ხდება ამ ხალხისთვის იმ მთავარი რწმენის შექმნა, რომ აქ თუ ადამიანები გამარჯვებას მიაღწევენ, საბოლოოდ ამ გამარჯვებისთვის მზად იქნება ოპოზიციური პოლიტიკური სპექტრი. მთავარი, რაც უნდა აჩვენონ პოლიტიკოსებმა, არის ის, რომ: „ხალხო, თქვენ თუ აქ გამარჯვებას მოიპოვებთ და ახალ არჩევნებს გამოვგლიჯავთ ხელისუფლებას იმ პირობებით, რა პირობებითაც ჩვენ გვინდა, ჩვენ  ამ ახალი არჩევნებისთვის მზად ვართ“. ეს არის რწმენა, რომელიც უნდა შექმნას ოპოზიციონერმა სპექტრმა, რომ მოქალაქეებმა უფრო ლაღად და თავდაჯერებულად იგრძნონ თავი. კარგი იქნება, თუ ამას მოვახერხებთ. ოპოზიციასთან ბევრი პრეტენზია არის, მაგრამ „ქართულმა ოცნებამ“ ისე გააკეთა, რომ ოპოზიციონერი პოლიტიკოსები ციხეებში გაუშვა და ისედაც არცთუ კარგ ფორმაში მყოფი ოპოზიციისთვის პრეტენზიების წაყენება თუ იყო მოდაში, ახლა ესეც აღარ არის შესაძლებელი

_ არის ორი პარტია ოპოზიციიდან, რომლებიც აპირებენ ადგილობრივ არჩევნებში მონაწილეობას. მათ აქვთ თავიანთი არგუმენტები, მათ შორის, თუნდაც ის, რომ პოლიტიკური პროცესი არ ჩაკვდეს, ხალხთან ჰქონდეთ ურთიერთობა, გამარჯვების რწმენა შექმნან და ა. შ., თავის მხრივ, ამ არგუმენტებსაც აქვს არსებობის უფლება, თუმცა ისინი არიან დიდი კრიტიკის ქვეშ/ თქვენ რა  აზრის ხართ ამ საკითხზე?

_ არ ვიზიარებ მათ არგუმენტებს, ღმერთმა ხელი მოუმართოთ. არის არჩევნებში  მონაწილეობა პოლიტიკური გზა და პოლიტიკურ პარტიას ვერ ეტყვი, რომ არჩევნებში არ მიიღოს მონაწილეობა, მაგრამ უკვე ისეთ პროცესში ვართ, რომ შეუძლებელია ფიზიკურად იმ მიზნის მიღწევა, რაც მათ უნდათ. ერთად რომ გაეკეთებინა ეს ოპოზიციას და დაეწყო არჩევნებისთვის მზადება, შესაძლოა, სხვა შედეგი ჰქონოდა, მაგრამ ახლა ეს გზა, რომელსაც ისინი ადგანან, არსად არ მიდის. ამ შემთხვევაში, ორი პარტიაა და ერთის ლიდერები ცოტა ხნის წინ გამოუშვეს ციხიდან და მეორე პარტიის ლიდერი გაქცეულია, კაცმა არ იცის, სად არის.

_ თქვენ ამბობთ, რომ პოლიტიკური ლიდერები ვერ ახერხებენ ქუჩაში ხალხის საჭირო რაოდენობით მობილიზებას, იქით არჩევნების გზაზე ამბობთ, რომ უშედეგოა. მაშინ, შეიძლება ეს ვითარება წლობით გაგრძელდეს ასე და არაფერი შეიცვალოს?

_ კი, ყველაფერი შეიძლება.

_ რამდენად არის განწყობა საზოგადოებაში თუნდაც იმ „მშვიდობიანი დამხობისთვის“, რაზედაც ხაბეიშვილი საუბრობდა?

_ საზოგადოებაში, რა თქმა უნდა, არის განწყობა, რომ ხელისუფლება შეიცვალოს. შესაძლოა, სხვადახვა ჯგუფში სხვადასხვა მოლოდინია, მაგრამ ჩემ ირგვლივ ვინც არის, მათი განწყობა ასეთია.

_ ეს ადამიანები, რომლებიც სისტემატურად დადიან საპროტესტო აქციებზე, ძალიან დიდი წნეხის ქვეშ არიან, მათ აჯარიმებენ, ფიზიკურად უსწორდებიან, აკავებენ, ამაზე რას იტყვით?

_ იმ ადამიანებმა, რომლებიც პროტესტში არიან ჩართულები, უფრო მეტი მოხერხებულობა უნდა გამოიჩინონ, ჩემი აზრით, და მაქსიმალურად ეცადონ, რომ თავი არ დააჯარიმებინონ, შეინიღბონ... რაც შეეხება ისეთ შემთხვევებს, როცა მოხერხების გამოჩენა ამას ფიზიკურად ვერ შველის, აქ ვერაფერს იზამ, საზოგადოება იმისთვის არსებობს, რომ ამ დროს ადამიანები გვერდით დავუდგეთ ერთმანეთს.