თამარ სანაძე

ევროსაბჭოს კონგრესში 101 ხმით საქართველოს შესახებ ქართველი ხალხის მხარდამჭერი რეზოლუცია მიიღეს. კენჭისყრას წინ უძღოდა მწვავე ანგარიში. დოკუმენტში ნათქვამია, რომ „საქართველოს მატარებელი სწრაფი სვლით მიდის, მაგრამ არასწორი მიმართულებით და ეს ყველაფერი „ქართული ოცნების“ პასუხისმგებლობაა“.

ევროსაბჭოს „ოცნების“ მიმართ რამდენიმე მოთხოვნა აქვს: პოლიტპატიმრების განთავისუფლება, მშვიდობიანი დემონსტრანტების წინააღმდეგ ძალადობის შეწყვეტა. დოკუმენტში არის ჩანაწერი ახალი არჩევნების შესახებ.

„ერთიანობა ნაციონალური მოძრაობის“ პოლიტსაბჭოს თავმჯდომარის მოადგილე, თათია ნიკოლაშვილი, ევროსაბჭოს კონგრესზე სიტყვით გამოვიდა, სასტიკად ნაცემი ახალგაზრდების ფოტოები მიიტანა, მან ისაუბრა მზია ამაღლობელზეც.

საქართველოში განვითარებულ მოვლენებზე, ევროპაში არსებულ დამოკიდებულებებსა და განწყობებზე „ქრონიკა+“-ს ესაუბრა თათია ნიკოლაშვილი:

_ ქალბატონო თათია, ევროსაბჭოს კონგრესში ქართველი ხალხის მხარდამჭერი რეზოლუცია მიიღეს. თქვენ კონგრესს სასტიკად ნაცემი ახალგაზრდების, პოლიტიკოსების, აქციის მონაწილეების ფოტოები აჩვენეთ, საუბარი იყო მზია ამაღლობელზე. როგორ შეაფასებთ ევროსაბჭოს რეზოლუციას და როგორი დამოკიდებულებები აქვთ „ქართულ ოცნებასთან“ დაკავშირებით ევროპელ პოლიტიკოსებს?

_ ჩვენ ქართული დელეგაციიდან, „ნაციონალური მოძრაობის“ წარმომადგენლები, მე და ქალბატონი სევდია უგრეხელიძე, გახლდით დელეგაციის წევრები. ევროპაში ყველამ კარგად იცის ყველაფერი და ამის დასტურია რეზოლუციაც. მათ ყველაფერი იციან: თითოეული ძალადობის ფაქტი, ყველა ის გადაწყვეტილება, რომელიც „ქართულმა ოცნებამ“ მიიღო. ამიტომ უპპასუხეს მათ ასეთი მწვავე რეზოლუციით, სადაც მოთხოვნაა, რომ შეიცვალოს საარჩევნო სისტემა, განთავისუფლდნენ უკანონოდ დაპატიმრებულები. ევროსაბჭოს კონგრესზე პირდაპირ მოითხოვეს მზია ამაღლობელის დაუყოვნებლივ განთავისუფლება. ამასთან დაკავშირებით საკმაოდ დეტალურად ვისაუბრე კონგრესზე ჩემს გამოსვლაში. მქონდა ფოტომასალა წაღებული, დეტალურად მოვუყევი, რა ხდებოდა მზია ამაღლობელთან დაკავშირებით, რომ მისი ტყვეობა არის მესიჯი ყველა ადამიანისთვის, ყველა ქალისთვის, ვინც რუსული ოცნების წინააღმდეგ იბრძვის, რომ ყველა დაისჯება და მათ შორის არც ქალები იქნებიან გამონაკლისი. ამის მაგალითად უახლოესი მოვლენაც შეგვიძლია მოვიყვანოთ და დავასახელოთ ელენე ხოშტარია, რომელიც დააკავეს და ფიზიკური დაზიანებები მიაყენეს. ევროსაბჭოს სესიაზე ყველანაირი ფოტო-მტკიცებულება წარმოვადგინე თუ როგორ ექცევა „ოცნება“ დავით ქაცარავას, ლევან ხაბეიშვილს, რომელიც პირდაპირ ეთერში იყო, როდესაც გაიტაცეს და გაუსწორდნენ დაკავების შემდგომ. ასევე მოვუყევი ხარებასა და იმ ადამიანების შესახებ, რომლებიც სასტიკად უსწორდებოდნენ ადამიანებს და დღემდე არავინ დაუკავებიათ. მინდა გითხრათ, რა ხდებოდა დარბაზში, როცა ამ ყველაფერს ისმენდნენ. ჩვენ ვართ ევროსაბჭოს ადგილობრივი და თვითმმართველობათა მიმართულების წევრები, „ქართული ოცნების“ წარმომადგენლები ჯერჯერობით არიან თვითმმართველობების წარმომადგენლები ევროსაბჭოში. დელეგაციაში „ქართული ოცნების“ სამი წევრია, ისინიც იყვნენ სხდომაზე. ჩემს გამოსვლას, „ოცნების“ ქმედებების მხილებას, დარბაზში ტაში მოჰყვა, ხოლო „ოცნების“ წევრებმა განაცხადეს, რომ მათ ჩვენ პოლიციელები დაგვისახიჩრეს, ესენი კი ტყუიანო. მათ ჰქონდათ ფოტოები, რომელშიც შეუძლებელი იყო ვინმეს ან რაიმეს იდენტიფიცირება. „ოცნების“ წარმომადგენლებს არავინ გამოსარჩლებია, მხოლოდ ერთმანეთს უკრავდნენ ტაშს. სამი წარმომადგენლიდან როდესაც ერთი საუბრობდა, დანარჩენი ორი უკრავდა ტაშს. ყველაზე კომიკური ის იყო, როდესაც განაცხადეს, რომ პარლამენტის ოცი ოთახი დაგვირბიესო. საბოლოოდ ისინი 101-ით 10 დამარცხდნენ, როდესაც ევროსაბჭომ რეზოლუცია მიიღო.

_ ევროსაბჭოს რეზოლუციას მოჰყვა „მეგობარი აქტის“ მიღება, შემდგომ მოვისმინეთ განცხადება „ნაციონალური მოძრაობისა“ და მასთან დაკავშირებული პარტიების აკრძალვის შესახებ. თქვენ როგორ გესმით პარტიების აკრძალვა და როგორც ენმ-ს წარმომადგენელს რა პასუხი გაქვთ ამაზე?

_ თვითონ „ქართული ოცნება“ სრულ გაურკვევლობაშია, იმიტომ რომ ხან აშშ-ში მიმდინარე მოვლენები, ხან სათავისოდ სასარგებლოდ მიაჩნიათ, მერე ხვდებიან, რომ მათ არაფერი შველით და დაბნეულები, ისტერიკულ და ყველანაირად შეუსაბამო განცხადებებს აკეთებენ. მათთვის ყველა „ნაცია“. „ნაციონალურ მოძრაობაზე“ რომ სრული ისტერიკა აქვთ, ამის დადასტურებაა, რაღაც კომისია რომ შექმნეს. მისი თავმჯდომარე არის ადამიანი, რომლის მამა ხვრეტდა. ამ ადამიანს ეს გენებში აქვს. წარმოუდგენელია, როგორ ანთხევს ბოღმას თეა წულუკიანი და ასამართლებს გენერლებს, რომლებიც იბრძოდნენ ომში. ალბათ ანწუხელიძე რომ ცოცხალი იყოს, დიდი სიამოვნებით გაასამართლებდა. ეს ხელისუფლება აკეთებს ყველაფერს რუსეთის საამებლად. რასაც გააკეთებდა რუსი, ზუსტად იმას აკეთებს „ქართული ოცნება“. საკუთარ ქვეყანას ადანაშაულებენ ომის დაწყებაში და რუსეთს ამართლებენ. ამაზე მეტი დადასტურება და ნათელი მაგალითი, რომ ესენი რუსები არიან, არ არსებობს.

_ საზოგადოებაში არის განცდა, რომ არავის უნდა მიეღო სერიოზულად „ქართული ოცნების“ კომისია და არ უნდა წარმდგარიყვნენ წულუკიანის წინაშე. როგორია თქვენი შეფასება საზოგადოების ნაწილის ამ დამოკიდებულებაზე?

_ არ არის სწორი, რომ პოლიტიკოსი გამოცხადდეს კომისიაზე. თუმცა როდესაც იქ ბატონი ყურაშვილი და ბატონი გოგავა მივიდნენ, ისინი არ არიან პოლიტიკოსები, მათ „ნაციონალური მოძრაობა“ იმის გამო დატოვეს, რომ პასუხი გაეცათ ამ ადამიანისთვის, როგორც სამხედროებს და როგორც მებრძოლებს. როდესაც რაღაც მნიშვნელოვანი ხდება, თუნდაც „მეგობარი აქტის“ მიღება, თუნდაც ევროკავშირის რეზოლუცია, ამ ყველაფრის საპირწონედ ქმნიან თავიანთ ამბავს, პრობლემას და მერე ვითომ ამ ყველაფრის მოსაგვარებლად რაღაც ზომებს მიმართავენ და რაღაცას აკეთებენ. ეს ყოველივე ხდება, მაშინ როდესაც ყველა მხრიდან სერიოზული გამოწვევებია და ისინი ამ მნიშვნელოვან თემებს გადაფარავენ ხოლმე თავისი საკითხებით _ ამის დასამალად, დასაფარად კი საკუთარ მოქალაქეებს, პატრიოტ ადამიანებს ასამართლებენ.

_ ჩვენ ვხედავთ კომისიის მიმდინარეობის პარალელურად გააქტიურებულ ახალგაზრდებს. მათი მთავარი მესიჯია, რომ ანწუხელიძე გმირია, უკვდავია. როგორ ფიქრობთ, „ოცნების“ მიერ ჩატარებული ეს ქმედებები, რასაც ახლა პარლამენტში ვხედავთ, გადაიყვანს პროტესტს ახალ ფაზაში?

_ ვეღარაფერი შეაჩერებს პროტესტს, საქართველო არ შეეგუება რუსულ გავლენას. გამორიცხულია, ეს ყველაფერი ქართველმა ხალხმა აიტანოს. რამდენი რამ აქვს გადატანილი ჩვენს სამშობლოს, არასოდეს შევგუებივართ რუსეთის გავლენას, ეს არასოდეს მომხდარა და არც ახლა მოხდება. ბრძოლა, პროტესტი ახალ ფაზაში უნდა გადავიდეს. „ანწუხელიძე უკვდავია“ _ ამ პლაკატის გამო დაიჭირეს გოგონა აქციაზე. ამის რომ გეშინია და ამ ბანერის გაქრობა რომ გინდა, ნათელია, რა სურს „ოცნებას“, ამიტომ მათ არ უნდა მივცეთ ახალგაზრდების დაჭერის უფლება. როდესაც „ქართული ოცნების“ პოლიცია მისდევს ადამიანებს დასაჭერად იმის გამო, რომ პლაკატი უჭირავთ, ეს სამარცხვინოა. ამიტომ როდესაც „ომონი“ გამოეკიდება აქციაზე მდგომ ახალგაზრდებს, უნდა გამოვიჩინოთ მოხერხება და არ გავატანოთ ისინი, არ დავაჭერინოთ. ჩვენ ვნახეთ კადრებიც, როგორ იცავდნენ ახალგაზრდები ერთმანეთს პოლიციისგან. ჩვენ უნდა გავაგრძელოთ პროტესტი, გავძლიერდეთ მორალურად, ახალ ეტაპზე უნდა გადავიდეთ, რათა ჩვენმა ბრძოლამ შედეგი გამოიღოს.