შორენა მარსაგიშვილი

რატომ არის მნიშვნელოვანი რუსთაველის გადაკეტვა? არის თუ არა ქვეყანაში პოლიტიკური კრიზისი? რატომ არ აქვს აზრი თვითმმართველობის არჩევნებში მონაწილეობას? ივაჭრებს თუ არა ივანიშვილი პოლიტპატიმრებით?

„ქრონიკა+“-ს ესაუბრება პარტია „ახალის“ წევრი, დიმიტრი ბიძინაშვილი:

_ ბატონო დიმიტრი, რუსთაველის გამზირი ისევ ყოველდღიურად იკეტება, მაგრამ ამას არანაირი შედეგი არ მოაქვს. სიტუაცია ჩიხშია შესული. თქვენ, როგორც ამ პროტესტის აქტიური მონაწილე, რას ფიქრობთ ამის შესახებ?

_ ეს აქციები არის ძალიან მნიშვნელოვანი. დღეს აშკარაა, რომ ქვეყანაში შეიქმნა პოლიტიკური კრიზისი და ეს ამ აქციების დამსახურებაა. ამ პროტესტის დამსახურებაა, რომ დღეს საქართველოს პარლამენტი არის ერთპარტიული არ აქვს საერთაშორისო აღიარება, ძალიან ბევრმა საჯარო მოხელემ თანამდებობა დატოვა. თანამდებობიდან წავიდნენ დიპლომატები და მინისტრის მოადგილეები. წნეხის გაზრდა ქვეყნის შიგნით და გარეთ ნიშნავს იმას, რომ ყოველდღე სუსტდება ბიძინა ივანიშვილი და მისი „ქართული ოცნება“.

სანამ ხალხი იდგება რუსთაველზე, არავინ აღიარებს ბიძინა ივანიშვილს და მის პარტიას. მათ არავინ აღიქვამს, როგორც კანონიერ ხელისუფლებას. ყველს ფიქრობს, რომ მათ მიიტაცეს ხელისუფლება. ახლა ყველაფერს აკეთებენ, რომ შეინარჩუნონ ძალაუფლება. ეს არის წარმოუდგენელი.

_ რატომ არის წარმოუდგენელი? აქამდე ხომ შეინარჩუნეს?

_ იმიტომ არის წარმოუდგენელი, რომ პოლიტიკური კრიზისი უკვე შემდგარია და ახლა არის ნიშნები იმისა, რომ ქვეყანაში შეიძლება დაიწყოს ეკონომიკური კრიზისი. ჩვენ ვხედავთ, რომ ეროვნულ ბანკს ყოველდღე უწევს რეზერვების გამოტანა იმისთვის, რომ ლარის კურსი როგორმე დაასტაბილუროს. უცხოური ინვესტიციები, რომლებიც არ შემოდის ქვეყანაში, ესეც მოქმედებს კრიზისზე. ეს კრიზისი კიდევ უფრო გაღრმავდება და იმ ადამიანებსაც შეეხება, რომლებიც ჯერ კიდევ დარჩნენ „ქართულ ოცნებასთან“. ეს ადამიანები ჯერ კიდევ ფიქრობენ, რომ ხელისუფლება არ არის პრორუსული და აქვს საშუალება, საქართველო შეიყვანოს ევროკავშირში. ეს ნამდვილად წარმოუდგენელია.

„ქართული ოცნების“ წევრებს უყვართ ხოლმე თქმა, რომ ევროპაში ორ ფეხზე დამდგრები უნდა შევიდნენ. ეს სასაცილოა, რადგანაც ევროკავშირის არცერთი ქვეყანა მათ არ ელაპარაკება. გამარჯობასაც კი არ ეუბნებიან. მეტსაც გეტყვით: ევროპის მიერ სანქცირებულები არიან. სანქცირებული ადამიანები ვერ მოახერხებენ, რომ ეს ქვეყანა ევროკავშირში შეიყვანონ. ამიტომ როგორმე უნდა გავუძლოთ, პროტესტი უნდა გაგრძელდეს.

_ გაძლება კარგია, მაგრამ როდემდე უნდა გავუძლოთ? აშკარაა, რომ ხელისუფლება დათმობებზე არ მიდის. პროტესტი უსასრულოდ ვერ გაგრძელდება.

_ პროტესტი უსასრულოდ, რა თქმა უნდა, ვერ გაგრძელდება. „ქართულ ოცნებას“ მოუწევს იმის აღიარება, რომ მათ მიიტაცეს ძალაუფლება და იძულებული იქნება, ახალი არჩევნები ჩანიშნოს. ასევე მოუწევთ პოლიტიკური პატიმრების განთავისუფლებაც. წარმოუდგენელია ვინმე ფიქრობდეს არჩევნებზე მაშინ, როცა ქვეყანაში პოლიტიკური პატიმრები გვყავს. ასევე წარმოუდგენელია არჩევნებზე ფიქრი მაშინ, როცა ცესკოს მართავს ბიძინა ივანიშვილი.

_ თვითმმართველობის არჩევნებს გულისხმობთ, რომელიც ამ შემოდგომაზე უნდა გაიმართოს?

_ ნებისმიერ არჩევნებს. ამ ვითარებაში ქვეყანაში ნებისმიერ არჩევნებში მონაწილეობა არის წარმოუდგენელი. რაღაც თუ არ შეიცვალა, არჩევნებში მონაწილეობას აზრი აქვს დაკარგული. ის სადავეები თუ არ წავართვით „ქართულ ოცნებას“, რითაც ის არჩევნებს მართავს, ნებისმიერ არჩევნებში მონაწილეობას აზრი ეკარგება. ამ მოცემულობაში არა მგონია, რომელიმე პოლიტიკური პარტია ფიქრობდეს არჩევნებში შესვლაზე. რა იქნება მომავალში, ამას ვნახავთ. მაგრამ ერთ რამეში ვარ დარწმუნებული, „ქართულ ოცნებას“ დათმობაზე მოუწევს წასვლა და ამაში ლომის წვლილს შეიტანს რუსთაველზე მიმდინარე პროტესტი. იმასაც ვიტყვი, რომ „ქართული ოცნების“ სიტყვაზე ნდობა არ შეიძლება. მათ უნდა იცოდნენ, რომ პროტესტი არ შეწყდება მანამ, სანამ ისინი არ აღასრულებენ ქართველი ხალხის ნებას და არ დააკმაყოფილებენ იმ მოთხოვნებს, რომელიც არის რუსთაველის გამზირზე.

_ ვთქვათ, მოხდა ისე, რომ ხელისუფლება წავიდა დათმობაზე და ჩანიშნა ვადამდელი საპარლამენტო არჩევნები. ოპოზიცია მზად არის ამ არჩევნებისთვის? ბევრი ექსპერტი და პოლიტიკოსი აღიარებს, რომ 2024 წლის არჩევნები რომ გაყალბდა, ეს დიდწილად ოპოზიციის პასიურობის ბრალი იყო.

_ ამას ვერ დავეთანხმები. ოპოზიცია პასიური არ ყოფილა. თავად ვიყავი ჩართული ამ პროცესებში. გაყალბება რომ არა, ოპოზიცია აუცილებლად მოიგებდა ამ არჩევნებს. ყველა კვლევამ აჩვენა, გაყალბება რომ არა, ოპოზიცია კოალიციურად ხელისუფლებაში იყო მოსული. ხელისუფლებამ არჩევნები მხოლოდ კი არ გააყალბა, არამედ უბრალოდ დაწერა ციფრები და შემდეგ ამ ციფრებს ასწორებდა. იმდენად ბევრი მოუვიდათ ზოგან, რომ მაგრად გაიჭედნენ. სამართლიან გარემოში თუ ტარდება არჩევნები, „ქართული ოცნება“ აგებს.

„ქართულ ოცნებას“ ეგონა, რომ ამ არჩევნების გაყალბებაც ისევე შერჩებოდა, როგორც აქამდე შერჩა. მაგრამ ხალხმა დაინახა, რომ აქ მხოლოდ ხელისუფლების ცვლაზე არ არის საუბარი. ახლა საქართველოს მომავალს შეექმნა საფრთხე. ახლა დღის წესრიგში ასე დგას საკითხი _ საქართველოს ვექტორი გადაიხრება რუსეთისკენ, თუ დარჩება დასავლეთისკენ და ჩვენი მიზანი, ევროკავშირში გაწევრიანება, აღსრულდება. ჩვენ აუცილებლად უნდა შევინარჩუნოთ ის მუხტი, რაც არის. ამინდის გამოსვლის შემდეგ მუხტი კიდევ უფრო აიწევა. დარწმუნებილი ვარ, რომ საჯარო მოხელეებიც შემოგვიერთდებიან. ეს ხალხი წლები მუშაობდა იმაზე, რომ საქართველო ევროპის ნაწილი გამხდარიყო. უცბად მოვიდა ძალა და ეუბნება, რომ რაც თქვენ ეს წლები აკეთეთ, ეს უნდა დაივიწყოთ და შეცვალოთ კურსი. რუსეთისკენ გეზის აღებას საქართველოში არავინ შეეგუება.

ხელისუფლებაც გრძნობს, რომ პროტესტი უფრო გაძლიერდება და ამიტომაც სჩადის იმ სისულელეებს. ქვეყანაში, სადაც 700 000-ზე მეტი მოქალაქე სიღარიბის ზღვარს დაბლა ცხოვრობს, ჯარიმა 5000 ლარამდე გაზარდეს. ასევე გაზარდეს პატიმრობის ვადები. წარმოუდგენელ რამეებს აკეთებენ. ამაზე იმიტომ წავიდნენ, რომ ქვეყანაში არის პროტესტი, რომელიც კიდევ უფრო გაიზრდება.

_ თქვენ ჯარიმების გაზრდა ახსენეთ, მაგრამ აშკარაა, რომ ვერ გაჭრა ამან, ხალხი ისევ დგას რუსთაველზე. კიდევ ხომ არ გაზრდიან ჯარიმებს?

_ გამორიცხული არ არის. ვერც ჯარიმის გაზრდა და ვერც დარბევები ვეღარ გაჭრის. ჩვენ სულ სხვა ერი ვართ. ჩვენი გონება სულ სხვანაირად არის მოწყობილი. საქართველო არ არის არც ბელარუსი და არც რუსეთი, სადაც ძალმომრეობას ემორჩილებიან. ჩვენ გვინახავს ამ ქვეყანაში მსგავსი რაღაცები, რაც ყოველთვის მთავრდებოდა ქართველი ხალხის გამარჯვებით. ჩვენ ვართ ხალხი, რომელიც ვერ ეგუება უსამართლობასა და დიქტატს. ამიტომ რაც არ უნდა მოხდეს, „ქართული ოცნება“ მაინც დამარცხდება. ეს მხოლოდ დროის საკითხია. ისიც კარგად მესმის, რომ ივანიშვილი ძალაუფლებას იოლად არ დათმობს. ყველაფერს გააკეთებს, რომ ეს დრო რამენაირად გაწელოს. შეეცდება, შეანელოს საპროტესტო განწყობა. მისთვის მოლაპარაკებების გამართვა უფრო მარტივი იქნება, თუ გარეთ პროტესტი შეწყდება.

_ ვისთან იქნება მარტივი მოლაპარაკებები, ოპოზიციასთან?

_ პირველ რიგში, ჩვენს დასავლელ პარტნიორებთან. ივანიშვილი მათ ეტყვის, პროტესტი აღარ არის და ხალხი არაა უკმაყოფილო. არ არის გამორიცხული, პოლიტიკური პატიმრებითაც ივაჭროს.

_ მას პოლიტპატიმრებით არაერთხელ უვაჭრია.

_ კი ბატონო. პოლიტპატიმრებით ვაჭრობა ჩვევაში აქვს გადასაული. ის და მისი პარტია ადამიანების თავისუფლებით ვაჭრობენ. ჩვეულებრივი ვაჭრები არიან. ამიტომ ძალიან მნიშვნელოვანია ის პროცესი, რაც მიმდინარეობს. ღრმად ვარ დარწმუნებუილი, რომ „ქართული ოცნება“ დამარცხდება. დამარცხდება იმიტომ, რომ უბრალოდ დაიღლება.

_ აქციის მონაწილეები არ დაიღლებით? თავად თქვით, რომ ივანიშვილი დროს გაწელავსო.

_ ჩვენ დაღლის უფლება არ გვაქვს. „ქართულ ოცნებას“ მხოლოდ ძალაუფლება და ფული აქვს დასაკარგი. ჩვენ თუ დავიღალეთ, სამშობლოს დავკარგავთ. ჩვენ კი ამას არ დავუშვებთ. არ დავიღლებით და ვაიძულებთ „ქართულ ოცნებას“, დათმობაზე წავიდეს. დარწმუნებული ვარ, მათ ახალი არჩევნების ჩანიშვნა მოუწევთ. მანამდე უნდა განთავისუფლდნენ პოლიტპატიმრები, შეიცვალოს ცესკო, არჩევნების მართვის სადავეები თუ ისევ ივანიშვილს ექნება, მაშინ ყველანაირი არჩევნები უაზრობაა.