შორენა მარსაგიშვილი

რა მოლაპარაკებებს აწარმოებს საქართველოს ხელისუფლება კრემლთან ოკუპირებული აფხაზეთისა და ცხინვალის რეგიონის აღიარების შესახებ? რისი ეშინია ივანიშვილს და რატომ ვერ იღებს საბოლოო გადაწყვეტილებას?

„ქრონიკა+“-ს ესაუბრება დამოუკიდებელი ექსპერტი, მამუკა გვაძაბია:

_ ბატონო მამუკა, საქართველოს ხელისუფლება ყველაფერს აკეთებს, რომ მოსკოვის გული მოიგოს, რაც არ გამოსდის. აქამდე კრემლი თბილისს მოუწოდებდა, რომ აფხაზეთთან და ცხინვალთან დაკავშირებით ახალ რეალობას შეგუებოდა. ახლა კი მოსთხოვა, რომ ოკუპირებულ რეგიონებთან საზღვრების დელიმიტაცია- დემარკაცია მოახდინეთო. თქვენი აზრით, რას ნიშნავს კრემლის ბოლო მითითება? რას უნდა ველოდოთ?

_ ამ თემაზე რუსეთთან მოლაპარაკებები დაწყებულია და ახლაც მიმდინარეობს. დღე ისე არ გავა, ბიძინა ივანიშვილის რომელიმე წარმომადგენელი პუტინის ადმინისტრაციასთან კონტაქტზე რომ არ იყოს. ამ საქმეში ჩარეულები არიან ის ქართველებიც, რომლებიც აფხაზეთიდან არიან წარმოშობით და ახლა მოსკოვში ცხოვრობენ. მოკლედ რომ გითხრათ, ისინი ჩვეულებრივი რაშისტები არიან. რამდენიმე მათგანს პირადად ვიცნობ, მაგრამ ისინი ჩემთვის აღარ არსებობენ, რადგან ყველაფერს აკეთებენ იმისთვის, რომ რუსეთის გავლენა გაზარდონ მთელ საქართველოზე.  მიმდინარეობდა მოლაპარაკებები გალის რაიონში ქართველი დევნილების დაბრუნებაზე. მდინარე ერისწყლამდე უნდა მომხდარიყო დევნილების დაბრუნება და იქ გამშვები პუნქტის მშენებლობაც დაიწყეს. მერე იყო რაღაც აპარტამენტების მშენებლობაზე საუბარი. ეს ყველაფერი ერთი ჯაჭვის რგოლებია. მოკლედ რომ გითხრათ, ეს არის პროცესის ნაწილი. ამ მიმართულებით ძალიან მკვეთრი პოზიცია უკავიათ ნაციონალ-სეპარატისტებს.

_ ისინი სერიოზულად ეწინააღმდეგებიან რუსული გავლენების კიდევ უფრო გაფართოებას ოკუპირებულ აფხაზეთში.

_ ეწინააღმდეგებიან, მაგრამ ყოველთვის ვერ გააქვთ თავისი. სადღაც წელიწად-ნახევრის წინ პირდაპირ მოისყიდეს ისინი. რუსეთს რაღაც კანონის მიღება დასჭირდა და აფხაზეთის პარლამენტის წევრებს ქეშად დაურიგა ფული პარლამენტის შენობაში. დასტა-დასტა არიგებდნენ დოლარებს, ხმები რომ მიეღოთ. ხმა იმათაც კი მისცეს, ვინც წინააღმდეგი იყო. სერიოზული ფული ტრიალებდა. რუსები ასე მოქმედებენ, _ სადაც ძალა არ გადის, ფულით მოისყიდიან და მორჩა.

ახლა დავუბრუნდეთ იმას, თუ რას ნიშნავს ოკუპირებულ რეგიონებთან საზღვრების დემარკაცია. ამ შეკითხვაზე პასუხის გაცემას დიდი ანალიტიკური უნარი და პოლიტოლოგიური ცოდნა არ სჭირდება. ნებისმიერი საღად მოაზროვნე ქართველი გეტყვით, რომ ეს საქართველოს სასიკეთოდ არ არის. რუსეთი ისეთ ნაბიჯს არასდროს გადადგამს, რაც საქართველოსთვის სიკეთის მომტანი იქნება. ეს ყველას უნდა ესმოდეს. მე არ მესმის იმ ადამიანების, რომლებსაც ჯერ კიდევ სჯერათ, რომ რუსეთმა საქართველოს რაიმე სიკეთე შეიძლება გაუკეთოს. ისტორიის ერთი მომენტი დამისახელეთ, როდესაც რუსეთმა საქართველო არ მოატყუა, არ გადააგდო ან ტანკით არ შემოსულა. ამ დამპყრობლური პოლიტიკის ნაწილია, რასაც ახლა რუსები აკეთებენ.

მოსკოვს ახლა ძალიან უნდა აფხაზი ნაციონალ-სეპარატისტების გულის მოგება და ამიტომ წამოწია ეს საკითხი. საქართველოს ხელისუფლება ე. წ. საზღვრების დემარკაციის საკითხს დღევანდელ სიტუაციაში არ დათანხმდება. დღეს ამის გაკეთება ბიძინა ივანიშვილს არ აწყობს. დღეს ისეთი არეული სიტუაციაა მსოფლიოში, რომ ვერავინ გააკეთებს სწორ ანალიზს, თუ რა მოხდება. საქართველო ამ უდიდესი გეოპოლიტიკური ველის საყლაპავი მილია. როდესაც ეს გაიჩხირება, ყველასთვის იქნება მტკივნეული. ამიტომ ყველას უნდა, რომ საქართველოში თავისი მარიონეტული რეჟიმი ჰყავდეს. ჩვენ თავი მიგვაჩნია დასავლური ცივილიზაციის ნაწილად. აღმოსავლეთსაც გაუმარჯოს თავის ადგილზე, მაგრამ ჩვენ ვართ დასავლური ცივილიზაციის ნაწილი, კავკასიური აქცენტებით.

დღეს საქართველო, სამწუხაროდ, რუსეთის უკანა ეზო გახდა, რუსეთის უკანა ეზო კი არავისთვის საინტერესო აღარ იქნება. არავინ გაგვიწევს ანგარიშს, არავის ვაინტერესებთ.

_ მთლად ასე არ არის, უკვე გამოჩნდა, რომ საქართველო ჯერ კიდევ აინტერესებს როგორც ევროპას, ასევე ამერიკას.

_ ეს გასაგებია. არის ხალხი, ვისაც ჯერ კიდევ აინტერესებს საქართველო. ისინი ჯერ კიდევ გვიწვდიან ხელს, მაგრამ ამ ხელს ხომ უნდა შეაგებო ხელი. საქართველოს ხელისუფლება ამას არ აკეთებს. ოპოზიცია უწვდის ხელს, მაგრამ ოპოზიციამ რა უნდა ქნას? ოპოზიციას ბევრი პრობლემა აქვს, მათ შორის, ამპარტავნება და ქედმაღლობა ახასიათებს. ეს პოლიტიკაში ძალიან ცუდია. წამყვანი პოლიტიკური პარტიები მიტინგს მიტინგზე თუ არა, ბრიფინგს ბრიფინგზე უნდა მართავდეს აფხაზეთის თემებზე. ვერ დამისახელებთ ვერცერთ ოპოზიციურ პარტიას, რომელმაც ბრიფინგი მიუძღვნა აფხაზეთის თემას. არ მესმის, როგორ არ უნდა იყოს დაკარგული ტერიტორიები დღის წესრიგში? მოსახლეობის განწყობაც შესაბამისად იცვლება და ეს თემა აქტუალობას კარგავს. ოკუპირებულ აფხაზეთში ახლა ძალიან დაძაბული ვითარებაა და მუშაობაა საჭირო. ყოველკვირეული კონტაქტი მაქვს იქ ხალხთან და ვიცი, რაც ხდება. იქაური ოპოზიციაც უკმაყოფილოა და ხალხიც. პარლამენტში სროლა ატყდა და დეპუტატი მოკლეს. ამაზე მეტი რა უნდა მოხდეს?! საჭიროა აფხაზეთის თემაზე მუშაობა, მაგრამ არავის უნდა. გასაკვირია, როგორ უძალიანდებიან აფხაზები რუსებს.

_ ეს მართლა გასაკვირია, რამდენიმე კანონი ჩაუგდეს.

_ ერთი იყო აგენტების კანონი, მეორე _ აპარტამენტების, რომელშიც ივანიშვილიც მონაწილეობდა. ივანიშვილი ამას საქართველოს გასამთლიანებლად რომ აკეთებდეს, გამიხარდებოდა. რა მნიშვნელობა აქვს, ამას ვინ გააკეთებს, ივანიშვილი თუ შვანგირაძე. სამწუხარო ისაა, რომ ივანიშვილს საქართველო ერთიან პოლიტიკურ სივრცედ არ წარმოუდგენია. დამფუძნებელ შეხვედრაზე ივანიშვილმა პირველი რაც უთხრა თავისიანებს, დაივიწყეთ აფხაზეთიო.

_ ეს როდის თქვა?

_ პოლიტიკაში რომ შემოვიდა. ივანიშვილი როცა პოლიტიკაში შემოვიდა, მაშინ ვთქვი, უცხო ქვეყნიდან შემოსული პოლიტიზებული ფული ცდილობს საქართველოს საგარეო ორიენტაციის შეცვლას-მეთქი.  სამწუხაროდ, ეს გამართლდა. ყოველდღე გადმოაქვთ საზღვრები აქეთ და ივანიშვილი ამბობს, მე არ მჯერა, რომ რუსეთს მეზობელი ქვეყნების დაპყრობა უნდაო. ასეთი კაცი გვიზის მმართველად. კომუნისტები რას გაბედავდნენ, ესენი რომ ბედავენ. რას წარმოვიდგენდი ოდესმე, თემურ ლენგის საფლავზე თუ მივიდოდა ქართველი.

_ ეს, მგონი, თემურ ლენგსაც გაუკვირდა.

_ მართლა ვერ წარმოიდგენდა.  ეს არის საშინელება. ისევე როგორც ის, რომ ნელ-ნელა პატარავდება ჩვენი ქვეყანა და ამაზე ხელისუფლება ხმას არ იღებს. რუსეთის ახალი მოთხოვნაც ამის გამყარებაა. მიტაცებულის დაკანონება უნდა მოსკოვს. ივანიშვილს ქართველი ხალხის რისხვის რომ არ ეშინოდეს, კარგა ხნის წინ გააკეთებდა ამას. ივანიშვილმა ძალიან კარგად დაინახა, თუ რას ნიშნავს ქართველი ხალხის რისხვა და ამის ძალიან ეშინია. მაგის მდგომარეობაში ყოფილოყოს ჩემი მტერი. ის არის ფულიანი ღატაკი. კაცი გარეთ ვერ გამოდის და თუ გამოდის, იმის ეშინია, ვინმემ რაკეტა არ ესროლოს. ასეთი შეშინებული ადამიანი ადეკვატურ გადაწყვეტილებას ვერ მიიღებს. და რაც მთავარია, ეს კაცი მტრული ქვეყნის ფულით არის ფეხმოდგმული საქართველოში. მისთვის საქართველო არის მხოლოდ ტერიტორია, სადაც თავად უნდა იბატონოს და იმეფოს. ქართველი ხალხის რომ არ ეშინოდეს, ის ოკუპირებულ ტერიტორიებს დღესვე აღიარებდა. ამ თემაზე მოლაპარაკებები მიდის. აბა, რატომ გვთავაზობენ სხვადასხვა ვარიანტს, ხან კონფედერაცია შემოგვთავაზეს. კონფედერაციულ მოწყობას თუ დავთანხმდით, ჩათვალეთ, რომ საქართველო დასრულებულია. ამას შეეწირა ზვიად გამსახურდია. ამ მოწყობას არ მოაწერა ხელი და... იმ კაცმა სიცოცხლე გადადო. ივანიშვილი სიცოცხლეს კი არა, ასი დოლარი რომ ასესხოს ვინმეს, იმაზე პროცენტებს თხოულობს. ვიმეორებ: ქართველი ერის რისხვის შიშით ის ვერ ბედავს ოკუპირებული რეგიონების აღიარებას. ისე, ძალიან აქტიურად განიხილება ეს საკითხი რუსეთში მყოფი ქართველების დახმარებით. ამ თემაზე თითქმის ყოველდღე საუბრობენ. კარგად ვიცი, რა ხალხიც მონაწილეობს ამ მოლაპარაკებებში რუსებთან. ისინი ყოველდღიურ კონტაქტზე არიან კრემლთან. ქართველი ხალხი ამას არ დაუშვებს და ივანიშვილი თუ ამაზე წავა, დიდი რისხვა დაატყდება თავს.