თამარ სანაძე 

გრძელდება თავდასხმები განსხვავებული აზრის მქონე ადამიანებზე, არაპროპორციული, დაუსაბუთებელი ჯარიმები და განთავისუფლებების სერია საჯარო სამსახურებიდან. მერიის ყოფილმა თანამშრომელმა, თამთა კაჭახიძემ,  განაცხადა, რომ გაათავისუფლეს ყველა ის ადამიანი, ვისაც ხელი აქვს მოწერილი განცხადებაზე, რომ ევროპული გზის მომხრეა. ვისაც ამაზე ხელი არ მოუწერია, მათ შტატებს რეორგანოზაცია არ შეხებია.

ოპოზიცია 31 მარტისთვის ემზადება. ოპოზიციონერი პოლიტიკოსები აცხადებენ, რომ საზოგადოების დაკვეთაა მაქსიმალური გაერთიანება.

საქართველოში არსებულ ვითარებაზე, ერთიანობის მნიშვნელობასა და ბოლო დღეებში განვითარებულ მოვლენებზე „ქრონიკა+“-ს ესაუბრება ილიას სახელმწიფო უნივერსიტეტის პროფესორი, გიორგი მუმლაძე:

_ ბატონო გიორგი, 100 დღეზე მეტია, უწყვეტი პროტესტი მიმდინარეობს, ხალხი არ ნებდება, ყოველ საღამოს ვხედავთ, აქციის მონაწილეები როგორ კეტავენ რუსთაველს. როგორ შეაფასებდით ერთი მხრივ ქუჩაში ხალხის უპრეცედენტო აქტიურობას და მეორე მხრივ ხელისუფლების მიერ გადადგმულ ნაბიჯებს?

_ მიმდინარე პროტესტი არის უპრეცედენტო თანამედროვე საქართველოს ისტორიაში, იმიტომ რომ საოკუპაციო რეჟიმმა, რომლის ხელმძღვანელიც ბიძინა ივანიშვილია, გამოიყენა მშვიდობიანი მოქალაქეების მიმართ ყველა რეპრესიული მექაიზმი, რაც კი არსებობს: დარბევა, ცემა, წამება, მხუთავი აირი, დაკავებები, უპრეცედენტო ჯარიმები, რომლებიც სრულიად უკანონოა, მაგრამ ამის მიუხედავად მამაცი ქართველი ხალხი არ ნებდება, არ უშინდება ამ რეპრესიებს. ჩვენ, ქართველებს გვაქვს გენეტიკური კოდი, რადგან ჩვენი მრავალსაუკუნოვანი ისტორია დასაბამიდან ბოლომდე აგებულია უწყვეტ ბრძოლაზე. ყოველთვის ვიბრძოდით დამპყრობლების, იმპერიების წინააღმდეგ და საბედნიეროდ ბევრი იმპერია, რომელიც ჩვენ გვებრძოდა, დღეს აღარ არსებობს. ასეთივე ბედი ელის რუსეთის ბოროტების იმპერიასაც, რომელიც ახლა თავისი საცეცებით მართავს საქართველოს. ჩვენ ყველას გვესმის, რომ ეს არის მორალის, სინდისისა და სამშობლოსთვის ბრძოლა, ამიტომ ეს რეპრესიები არ იქნება შემაკავებელი ფაქტორი ჩვენთვის, რადგან მთავარი მიზანია, რომ მომავალმა თაობამ, ჩვენმა შვილებმა იცხოვრონ სამართლიან, თავისუფალ სახელმწიფოში.

საქართველო უნდა იყოს ერთიანი, თავისუფალი და ამას ჩვენ ვერ მივაღწევთ, თუკი საოკუპაციო რეჟიმი გვეყოლება ხელისუფლებაში. ჯარიმებს რაც შეეხება, სრულიად ალოგიკურია, რომ ათჯერ გაზარდო მისი ოდენობა, როდესაც საქართველოში არის ტოტალური სიღარიბე, 700 ათას ადამიანზე მეტი სოციალურად დაუცველია, ამაზე მეტი პირი კიდევ ითხოვს სოციალურ დახმარებას და ამ ვითარებაში მხოლოდ ივანიშვილთან დაახლოებული პირები და ბიზნესები ფლობენ სიკეთეებს. 

ჩვენი მიზანი ძალიან მკაფიო და ნათელია, უნდა გათავისუფლდნენ რეჟიმის ტყვეები, უკლებლივ, რომლებიც არიან მსხვერპლნი იმისა, რომ მათ აქვთ პატრიოტული გრძნობები. ბიძინა ივანიშვილს, ამ რუს ოლიგარქს, საოკუპაციო რეჟიმის ხელმძღვანელს, არ ესმის, რას ნიშნავს პატრიოტიზმი, მას სურს ნებისმიერი პატრიოტული გამოვლინება, ქმედება დაისაჯოს.  „კაგებეს“ მეთოდია ეს, რომ ეროვნული ინტერესების გამტარებელი ყველა ადამიანი დაისაჯოს, რათა ეს არ გავრცელდეს საზოგადოებაში და აღიძრას ადამიანებში ეს სულისკვეთება. ამიტომ მან დილეგში ჩაყარა ტყვეები, უნიჭიერესი ხალხი: სტუდენტები, მსახიობები, ექიმები, ყველას მიადგა პრაქტიკულად იმიტომ, რომ მას სურს, საქართველო აქციოს მონათა თავშესაფრად, სადაც გარკვეულ ბატონთა ჯგუფი გამდიდრდება და „კაგებე“ თავისი მზაკვრული გეგმებით ჩვენს ქვეყანას და ტერიტორიას გამოიყენებს იმისთვის, რომ რუსეთს შეუმსუბუქდეს გარკვეული ეკონომიკური სანქციები და ის ეკონომიკური ზეწოლა, რაც თანამედროვე მსოფლიომ მას დაუწესა.

რაც შეეხება ჩემს ჯარიმებს, მე უკვე მეთორმეტედ დამაჯარიმეს. ბოლო ჯარიმაზე ერთ-ერთმა ფორმიანმა 5 მილიონი დაიწერა. მე მათ პოლიციას არ ვეძახი. ოქმი ისეა შედგენილი, რომ არც ერთი სიტყვა არ იკითხება, ვერაფერს გაიგებ. ეს ნიშნავს იმას, რომ საპოლიციო ძალები თავიდან ბოლომდე გაძეძგილია პარტაქტივით, რათა ერთგულად ემსახურონ რუს ბიძინა ივანიშვილს და არა საქართველოს. ის, რაც მათ აქვთ სლოგანად, „ვემსახურები საქართველოს“, სამწუხაროდ, გადაიქცა ივანიშვილის მონად. მთელი შინაგან საქმეთა სამინისტრო ემსახურება ბიძინა ივანიშვილს. მკვლელობის ფაქტი მოხდა ვაკეში, შუა ქუჩაში ჩაცხრილეს ადამიანი, მაშინ, როცა ასობით პოლიციელი ჩვენთან იდგა აქციაზე და გვიყურებდა, ვინ გადავიდა ქუჩაზე, ვინ გადადგა ფეხი, ჩასაფრებულები იყვნენ, ვინ დაეჯარიმებინათ, ვის ეკეთა ნიღაბი სახეზე. ხომ ყველა ვხვდებით, რისთვის იხარჯება მთელი ეს რესურსი _ იმისთვის, რომ იყოს მართლწესრიგი, ებრძოლონ კრიმინალს და ეს იყოს მთავარი ამოცანა მათი. პოლიციური ძალების მთავარი მიზანია, რომ ბიძინა ივანიშვილმა შეინარჩუნოს ძალაუფლება. ამიტომაც ვართ სავალალო მდგომარეობაში. პირდაპირ გეუბნებით, მე და ჩემი მეგობრები, აქციის მონაწილეები, ამ სულისკვეთებით ვართ, რომ ვერ შეგვაშინებენ, რაც არ უნდა გააკეთონ, რადგან ჩვენ ძალიან ბევრი რეპრესია გადავიტანეთ უკვე. ეს ფინანსური წნეხი არ გვაშინებს, ჩვენ არ ვაპირებთ ამის გადახდას, დაე იწვალონ ამოღებაზე. ძალიან ცოტა დარჩა ამ რეჟიმს, დასრულდება ივანიშვილის დრო ამ ქვეყანაში. აუცილებლად ჩატარდება თავისუფალი და სამართლიანი არჩევნები, ერთხელ და სამუდამოდ დასრულდება პოლიტიკური დევნა ადამიანებისა და მომავალი თაობა ვიცხოვრებთ თავისუფალ, დემოკრატიულ და სამართლიან ქვეყანაში, რომელიც იქნება ევროპული ოჯახის სრულფასოვანი წევრი და მიიღებს იმ სიკეთეებს, რაც ევროკავშირის წევრ ქვეყნებს აქვთ. ესაა ჩვენი სურვილი დღეს.

_ ჩვენ ვხედავთ, როგორ ათავისუფლებენ თეატრებიდან მსახიობებს, თბილისის მერიიდან კონტრაქტებს უჩერებენ ათობით ადამიანს. გუშინ მერიის ყოფილმა თანამშრომელმა განაცხადა, რომ გაათავისუფლეს ყველა ის ადამიანი, ვისაც ხელი აქვს მოწერილი განცხადებაზე, რომ ევროპული გზის მომხრეა. ვისაც ამაზე ხელი არ მოუწერია, მათ შტატებს რეორგანიზაცია არ შეხებია. როგორ შეაფასებთ ამ მდგომარეობას?

_ ვახსენე კიდეც, რომ რუსულ საოკუპაციო რეჟიმსა და ბიძინა ივანიშვილს უნდა, რომ ეს ქვეყანა აქციოს მონათა თავშესაფრად, მონათა კონგლომერატად და ვისაც რაიმე განსხვავებული მოსაზრება აქვს, ვისაც თავისუფალი აზრი აქვს, ვისაც უჩნდება და სვამს კითხვებს, ვინც არ ემონება თავის უფროსს, ვინც არ ასრულებს უკანონო ბრძანებებსა და დავლებებს, ისინი არ მოსწონთ, არც იკარებენ გვერდით. მათ ჰგონიათ, რომ ეს ქვეყანა მათი საკუთრებაა, ძალიან სამწუხაროა და უდიდესი ბოროტებაა. სახელმწიფო ყველა ადამიანის საკუთრებაა: ჩემი, თქვენი და ყველა მოქალაქის, ყველამ უნდა მიიღოს სარგებელი. არ აქვს მნიშვნელობა, მე რომელ პარტიას ვგულშემატკივრობ ან ვის ვაძლევ ხმას. თუ მე ვარ პროფესიონალი, ვაკეთებ ჩემს საქმეს, ჩემი პოლიტიკური და მოქალაქეობრივი შეხედულებები რატომ უნდა გახდეს ხელის შემშლელი, რომ ვიშრომო და ბიუჯეტიდან კუთვნილი ხელფასი მივიღო? როგორ, მე ბიუჯეტს ვავსებდე და ამით მხოლოდ კონკრეტული პარტიის წარმომადგენლები სარგებლობდნენ? ეს ხომ ჩვეულებრივი რეჟიმია, შემდგარი დიქტატურაა. ერთი შემთხვევა იყო, რომ მერიიდან გაათავისუფლეს თანამშრომელი. პროპაგანდისტულმა მედიებმა გამოაქვეყნეს მისი ფოტო და დაწერეს, რომ ის იმიტომ განთავისუფლდა, რომ აქციებზე დადიოდა და ოპოზიციის აქტივისტიაო. არც კი მალავენ, რომ პოლიტიკური ნიშნით ათავისუფლებენ ადამიანებს სამსახურებიდან, თითქოს თავიანთი დუქანი იყოს ეს ქვეყანა. ჩვენ ვიბრძვით იმისთვის, რომ მსგავსი უსამართლობები აღრ იყოს. განსხვავებული მოსაზრებები ადამიანის თანდყოლილი თვისებებია, ეს უფალმა მოგვანიჭა ჩვენ. თავისუფალი აზრი და გონება ჩვენ უნდა გვაძლევდეს იმის შესაძლებლობას, რომ ავირჩიოთ რა გვინდა, რა მიგვაჩნია კარგად და რა _ ცუდად. მონური აზროვნებისა და მენტალიტეტის ადამიანი არ შეიძლება იყოს ჩვენი მომავლის განმსაზღვრელი. თავისუფალი აზრი უნდა განსაზღვრავდეს ადამიანის ცხოვრებას. რელიგიური საფუძვლებიც გვიბიძგებს თავისუფლებისკენ და ეს რეჟიმი ეწინააღმდეგება რელიგიასაც, ქრისტიანობასაც, თავისუფლებასაც და იმ მთავარ პრინციპებსაც, რაზედაც დგას ადამიანი, როგორც თავისუფალი არსება. მათ არ სურთ, თავისუფალი ადამიანი ჰყავდეთ გვერდით, მათ უნდათ, რომ ყველაფრის მკადრებელი ადამიანებით იყვნენ გარემოცულნი. მაგალითად, საბჭოთა პერიოდში არსებობდნენ პირები, რომლებიც წერდნენ „დანოსებს“ თავის თანამშრომლებზე, მეზობლებზე, ასეთი ხალხი სჭირდებათ მათ. ღირებულებების არმქონე ხალხი სჭიდებათ მათ. ამას ვებრძვით ჩვენ და ამიტომ ვართ ძლიერები, სიმართლე გვაძლიელებს, მათი ერთადერთი ღირებულება ფული და შემოსავალია. ისინი მარტო მატერიალური სიკეთეებით სარგებლობენ, სხვა არაფერი გააჩნიათ, ჩვენ კი გვაქვს მორალური ღირებულებები, რომელიც ეფუძნება რელიგიურ ღირებულებებს, თავისუფლებას, ამათ კი ეს არ გააჩნიათ. ესენი არიან ბოროტი ადამიანებისგან შემდგარი ჯგუფი, რომლებსაც უნდათ ამ ქვეყნის ქართველებისგან დაცლა. მათი სურვილია, უფრო მეტი ადამიანი წავიდეს ემიგრაციაში, ჩვენ ეს უნდა აღმოვფხვრათ, ამის წინააღმდეგ უნდა ვიბრძოლოთ. მთელი ეს კასკადი, სამსახურებიდან გაშვება, ადამიანების ტყვედ ჩაგდება ციხეებში, ის, რომ ხელებშეკრულ ადამიანებს სცემენ ფორმიანები, ესაა შემდგარი რეჟიმი და საოკუპაციო რეჟიმს სურს ბოლომდე გაგვტეხოს და ფორმალურადაც გააფორმოს რუსეთი აქ. მაგრამ ჩვენ არ ვაპირებთ დანებებას, ვაპირებთ ბოლომდე ბრძოლას და ეს ყოველივე დასრულდება თავისუფალი ქართველი ხალხის გამარჯვებით. ესაა აქციის მონაწილეების გზავნილი რუსი ბიძინა ივანიშილის მიმართ.

_ ბატონო გიორგი, ბოლო დღეებში თითქმის ყველაფერი ვიხილეთ, იუმორისტ ვასო ფხაკაძის ამბავს ვგულისხმობ, მას 12 მარტს დღისით სახლში დაადგა პოლიციის ყოფილი თანამშრომელი, შემდგომ მან გაიგო ვასოს ნომერი და ტელეფონზე რამდენჯერმე დაურეკა, აგინა, დაემუქრა, მოგონილი მიზეზები გაუჟღერა და მთელი დღე სახლთან ელოდა. ამაზე რა განცდა გაქვთ და გააძლიერებს თუ არა მსგავსი შემთხვევები პროტესტს ხალხში?

_ ესეც გამოვლინებაა იმისა, რომ საპოლიციო ძალები აქციეს კრიმინალური მენტალობის ადამიანების თავშესაფრად. იქ არ ღებულობენ განათლებულ ადამიანებს, არანაირი ფსიქოლოგიური ტესტი არ არსებობს. ამ უწყებაში რაც უფრო მოძალადეა, რაც უფრო მონაა ადამიანი, მით უფრო მისაღებია ის რეჟიმისთვის, რათა დავალებები უსიტყვოდ შეასრულოს. მათთვის ყველა პრობლემაა: იუმორისტიც, ჟურნალისტიც, პოლიტიკოსიც, ვინც მათი მსახური არ არის. იგივე მოხდა მიშა ანდღულაძის შემთხვევაშიც, _ თავს დაესხნენ, გაბუნიაზე თავდასხმა ვიხილეთ და ვიცითმ ვინც დაესხა. ეს ვაჟკაცობა ჰგონიათ, არადა, ლაჩრობაა, კრიმინალური მენტალობაა, ამ ხალხს არაფერი აქვს საერთო არც სახელმწიფოსთან და არც ქართველობასთან. ესენი არიან რუსული იმპერიალიზმის სელექციის შედეგი. აირჩიეს ეთნიკურად ქართველი ადამიანები, რომელთა ხელითაც უნდათ, რომ საქართველო გაარუსონ.  არასოდეს მოხდება ის, რომ ამათ ვანდალურ ქმედებებს დავუხაროთ თავი.

_ ამერიკის შეერთებული შტატების ელჩი საქართველოში „ქართული ოცნების“ საგარეო საქმეთა მინისტრს შეხვდა. როგორც საელჩოს განცხადებაში ვკითხულობთ, მან ბოჭორიშვილს გააცნო პრეზიდენტ ტრამპისა და სახელმწიფო მდივან რუბიოს მთავარი პრიორიტეტები და ნაბიჯები, რომელიც საქართველოს შეუძლია გადადგას, რათა აჩვენოს ამერიკის შეერთებულ შტატებთან ურთიერთობის გაუმჯობესებისადმი სერიოზული დამოკიდებულება. ეს „ოცნების“ წარმომადგენლებმა სხვანაირად აღიქვეს. თქვენ როგორ შეაფასებდით ამ განცხადებას?

_ ეს შეხვედრა ძალიან მნიშვნელოვანი იყო. საინტერესოა ფოტო, რომელიც შეხვედრის დასრულების შემდეგ გავრცელდა. თუ ვინმეს სხეულის ენა ესმის, ნახავდით, რა განწყობით იყო ამერიკის ელჩი და რა განწყობა ჰქონდა მაკა ბოჭორიშვილს. მეორეა ტექსტი, რომელშიც საელჩო ხაზგასმით აღნიშნავს, რომ დანიგანმა მინისტრს გააცნო ტრამპისა და რუბიოს პრიორიტეტები და ნაბიჯები, რომელიც საქართველოს შეუძლია გადადგას აშშ-სთან ურთიერთობის გასაუმჯობესებლად. მან გარკვეული მოთხოვნები წაუყენა „ქართულ ოცნებას“, გადმოსცა მთავარი გზავნილები, რაც აქვს ტრამპის ადმინისტრაციას. პირდაპირ იკითხება ამ ტექსტში ის, რომ „ქართული ოცნებისა“ და მისი პროპაგანდისტებისთვის არაფერი სასიკეთო არ იყო.

იმ ვითარებაში, რაც ხდება დღეს მსოფლიოში, თუნდაც ჩვენს სამეზობლოში, ზერბაიჯანსა და სომხეთს შორის ურთიერთობას ვგულისხმობ, აქცენტები კეთდება კავკასიის რეგიონზე, ბუნებრივია, რომ საქართველოში საოკუპაციო  რეჟიმი არ უნდა დარჩეს.

დაველოდოთ, როგორ განვითარდება მოვლენები. ვფიქრობ, შეხვედრა დანიგანსა და ბოჭორიშვილს შორის არის იმედისმომცემი. კონკრეტული გზავნილებია უკვე გადაცემული ბიძინა ივანიშვილის მიმართ. ახლა ვნახოთ რა გამოჩნდება გზადაგზა. სავარაუდიდ, ეს გზავნილები დეტალურად გაჟღერდება და მერე ვნახავთ, რამდენად ნაყოფიერი იყო ის შეხვედრა, რომელიც აშშ-ს საელჩოში შედგა.

ჩემთვის მთავარია, რომ ქართველი ხალხის ინტერესები იყოს დაცული. არაფერი სასიკეთო არ იკითხებოდა ელჩისა და ბოჭორიშვილის შეხვედრაში „ქართული ოცნებისთვის“. მე მგონია, რომ ქართველი ხალხისთვის უფრო სიკეთის მომტანი იქნება ეს შეხვედრა. ახლა უკვე ჩაინიშნა 27 მარტს მეგობარი აქტის განხილვა და ეს კიდევ ერთხელ ხაზს უსვამს იმას, რომ ძალიან სერიოზულადაა ჩვენი ისტორიული პარტნიორი კავკასიის რეგიონითა და საქართველოთი დაინტერესებული.

_ სწორედ ამაზე ვაპირებდი მეკითხა, რადგან საინტერესოა თქვენი შეფასება.

შეერთბული შტატების სენატის საგარეო ურთიერთობათა კომიტეტს MEGOBARI ACT-ი („მეგობარი აქტი“) მარტში უნდა განეხილა, თუმცა გადაიდო. „ქართული ოცნების“ წარმომადგენლები ვარაუდობდნენ, რომ არც არასდროს განიხილავდა კომიტეტი ამას. რას ნიშნავს ქვეყნისთვის ის, რომ უკვე თვის ბოლოს სენატში „მეგობარი აქტი“ განიხილება?

_ რა თქმა უნდა, გასაკვირი არ არის „ოცნების“ წარმომადგენლებისგან მსგავსი განცხადებები, რადგან ესენი მედროვეთა სექტაა და თუ შერჩებათ ნაძარცვი ფული, ყველაფერზე წავლენ.

ისინი მზად არიან, დღეს ლანძღონ ევროპა, ამერიკა და ხვალ ისე შემოატრიალონ ყველაფერი, რომ თითქოს მათ არაფერი უთქვამთ. თუ დასჭირდებათ, იტყვიან რომ ამერიკა ცუდია თუ დასჭირდებათ, _ კარგია. ასეთი ღირებულებების არმქონე ხალხია ესენი, ამიტომ ჩვენ მათ პროპაგანდას არ უნდა ავყვეთ. მოთმინებით, აქციაზე ყოველდღე წასვლით, ცივი გონებით უნდა მივუდგეთ და ვუპასუხოთ მათ განცხადებებს.

რეჟიმი გამოფიტულია და აუცილებლად დამარცხდება. გავიხსენოთ რა მოხდა თეატრალურ უნივერსიტეტში, პირდაპირ სუს-ის დავალება შეასრულა შალუტაშვილმა და შემდგომ პროტესტის გამო უკან დაიხია. გუშინ ვერც კი მივიდა დებატებზე სტუდენტებთან საზმაუს ეთერში. როდესაც ჩვენ არ ვჩერდებით, მაშინ რეჟიმი ყველაზე სუსტია.

„ოცნება“ და მისი პროპაგანდისტები თუნდაც „მეგობარ აქტთან“ დაკავშირებით გაკეთებული განცხადებებით, პროტესტის დაკნინებითა და დამცინავი რიტორიკით, ნაკლები ანალიტიკის უნარის მქონე ამომრჩეველზე ახდენენ გავლენას და ამხნევებენ მათ.

_ მართალია, პროტესტი არ წყდება, ხალხი მტკიცედ დგას რუსთაველზე. რა იქნება ის გადამწყვეტი ფაქტორი, რის გამოც „ოცნება“ დათმობებზე წავა?

_ ეს არის კომპლექსური ბრძოლა. ჩვენ ვებრვით რუსეთის იმპერიას, რომელიც წლების განმავლობაში საფუძვლებს უყრიდა იმას, რომ მოესპო თავისუფალი აზრი საქართველოში, ამიტომ ეს საკმაოდ მძიმე ბრძოლაა და ადვილი არ არის გამარჯვება.

გამარჯვების მზა რეცეპტია მუდმივი წინააღმდეგობა, ბრძოლა უდა გაგრელდეს იქამდე, სადამდეც საჭიროა, მაგრამ რაც ბოლო პერიოდში ხდება გვაჩვენებს იმას, რომ ბევრად უფრო სუსტია საოკუპაციო რეჟიმი დღეს, ვიდრე იყო ორი-სამი თვის წინ. რაც უფრო მეტ ადამიანს დააჯარიმებენ, რაც უფრო მეტ ადამიანს გაუშვებენ სამსახურიდან, რაც უფრო მეტ სტუდენტს ან  ჟურნალისტს მოექცევიან ცუდად, ეს ყველაფერი ბუმერანგივით დაუბრუნდებათ უკან. ეს გაზაფხული იქნება გადამწყვეტი და კრიტიკულად მნიშვნელოვანი საქართველოსთვის და ივანიშვილის „ოცნებისთვის“. ბიძინა ივანიშვილის რეჟიმისთვის ეს იქნება ბოლო გაზაფხული ხელისუფლებაში.

_ 31 მარტს ოპოზიციამ მასშტაბური აქცია დააანონსა. ნამდვილად გვაქვს შესაძლებლობა, რომ 31 მარტი გამოვიყენოთ ერთიანობის გასაჟღერებლად - თუ გაერთიანება არ შედგება, უნდა დასახელდნენ კონკრეტული აქტორები, რომლებიც ეწინააღმდეგებიან ამ გაერთიანებას.

_ 1991 წლის 31 მარტს საქართველოში ჩატარდა რეფერენდუმი, რომელშიც მთელმა საქართველომ მიიღო მონაწილეობა და მოსახლეობის 99%-მა თქვა, რომ სურდა დამოუკიდებელ, თავისუფალ საქართველოში ცხოვრება.

ჩვენ თავისუფლებისვის ვიბრძვით მთელი ეს პერიოდი. 1783 წლიდან, გეორგიევსკის ტრაქტატის დადებიდან, მანამდეც იყო ბრძოლები, მაგრამ ფორმალურად სწორედ აქედან დაიწყო და დღემდე გრელდება ეს ბროლა.

ამიტომ მნიშვნელოვანი თარიღი მოდის. ჩვენ პატივი უნდა ვცეთ 31 მარტის რეფერენდუმს, ამიტომ სიმბოლურად, ძალიან ბევრნი უნდა გავიდეთ ქუჩაში, ვაჩვენოთ რუსულ საოკუპაციო რეჟიმს, რომ ჩვენია ეს ქვეყანა და არ ვაპირებთ, რუსულ რეჟიმს დავუთმოთ რაიმე. ასეთ კრიტიკულ მომენტში ერთიანობა არის გადამწყვეტი. ახლა არის ჰიბრიდული ომის აქტიური ფაზა, რომელიც რუსეთის მხრიდან საქართველოში მიმდინარეობს და ამ ომში თანამებრძოლების დამუნათება, მიზეზების ძიება, რომ მათ გვერდით არ დავდგები, ეს არის რეჟიმთან კოლაბორაცია. ერთიანობისთვის ყველაფერია გასაკეთებელი და წყენებიც დასავიწყებელია.