„გავრილოვის კრიზისმა“ თანამედროვე „კომბლეები“ „გადააშენა“ _ ვასაძე და მისი ძალადობრივი ჯგუფები აღარავის აინტერესებს, თან „თბილისი პრაიდმაც“ დაანონსებული „ღირსების მარში“, ქვეყანაში ბოლო დროს განვითარებული მოვლენებიდან გამომდინარე, გადადო, თუმცა ეს იმას არ ნიშნავს, რომ სიძულვილი აღმოიფხვრა და „რაინდის“ მიმდევრები ლგბტქ თემისადმი ლოიალურები გახდნენ. ისე, კარგად თუ დავაკვირდებით, ვასაძის გააქტიურებასა და გავრილოვის თბილისში სტუმრობას შორის შესაძლოა, გარკვეული კავშირები დავინახოთ... თუმცა „ქრონიკა+“ უფლებადამცველ ლია მუხაშავრიას იმის შესახებ ესაუბრა, ამ სახელმწიფოში ვის რა უფლება აქვს და ოფიციალურმა სტრუქტურებმა ყველას თავისუფლება უნდა დაიცვას თუ მხოლოდ კონკრეტული ჯგუფების? ამასთან, კვალიფიციური იურისტი, რომელიც ევროსტრუქტურებს კარგად იცნობს, გვეუბნება, რომ თუ ხელისუფლება ე. წ. სიძულვილის ჯგუფების თარეშს არ აღკვეთს, ამის გამო არათუ საერთაშორისო, არამედ შიდა იზოლაციაშიც აღმოჩნდება. რას ნიშნავს ხელისუფლების „შიდა იზოლაცია“ და როგორ უნდა განეიტრალდეს „კომბლეები“? _ გთავაზობთ ინტერვიუს უფლებადამცველ ლია მუხაშავრიასთან. _ ქალბატონო ლია, რა ხდება _ ლგბტქ თემი რისთვის იბრძვის ან სიძულვილის ჯგუფები რატომ უპირისპირდებიან მას? _ ჩვენს ქვეყანაში დემოკრატიული პროცესი ხდება, ანუ, ერთი მხრივ, უმცირესობა საკუთარი შეკრებისა და მანიფესტაციის _ გამოხატვის თავისუფლების უფლების მოპოვებას ცდილობს, უმრავლესობა კი, თავის მხრივ, ყველაფერ ამას ეწინააღმდეგება. ახლა ძალიან მნიშვნელოვანია, თუ რა პოზიციას დაიკავებს სახელმწიფო _ დემოკრატიულ ბუნებას გამოავლენს და დემოკრატიის ფუნდამენტურ პრინციპებს დაიცავს თუ არა. მოკლედ, ინტერესთა და პოზიციების შეჯახების მომენტია! _ საქართველოს კონსტიტუციით გამოხატვის თავისუფლება ყველა ჯგუფს აქვს, თუმცა უმაღლეს კანონს არ ვემორჩილებით. ეს ორმაგი სტანდარტი იმაზე მიანიშნებს, რომ დემოკრატიისთვის მზად არ ვართ? _ სამწუხაროდ, ალბათ, შეგნება, კულტურა, ცოდნა გვაკლია და ასეც ამიტომ ვიქცევით, ანუ არ გვინდა, რომ სხვების თავისუფლებები და უფლებები ვაღიაროთ, თან გვგონია, რომ უფლებები მხოლოდ ჩვენ გვაქვს, თან ისეთი უფლებები, რომ შეგვიძლია, ვინმეს რამე ძალადობრივად ავუკრძალოთ. არადა, სინამდვილეში, ყველას თანასწორი თავისუფლება გვაქვს, რომ ჩვენი მოსაზრებები, იდეები გამოვხატოთ და შინ თუ გარეთ უიარაღოდ შევიკრიბოთ! არავის აქვს უფლება, მათ შორის, არც სახელმწიფოს, მკაფიოდ გაწერილი შემთხვევების გარდა, რომ ეს თავისუფლება შეზღუდოს! სწორედ ამიტომაც ვამბობ ხაზგასმით, რომ ასეთ ვითარებაში ძალიან მნიშვნელოვანია სახელმწიფოს როლი _ სახელმწიფომ კონსტიტუციითა და ასევე საერთაშორისო ხელშეკრულებებით ამ უფლებებისა და თავისუფლების განხორციელება იკისრა. _ და სახელმწიფომ რა უნდა გააკეთოს? _ საგანმანათლებლო ღონისძიებები გაატაროს. ამას გარდა, ინფორმაცია მედიითაც გაავრცელოს და კონფლიქტის შემთხვევაში სწორი პოზიცია დაიკავოს, ანუ ადამიანების ფუნდამენტური თავისუფლებები დაიცვას, რომელიც აღიარა და რომლის დაცვის ვალდებულებაც დაიკისრა! _ სახელმწიფომ ეს ვალდებულება იმიტომ აიღო, რომ დასავლეთის თვალში „კაი ტიპი“ გამოჩენილიყო, თორემ, სინამდვილეში, ადამიანის უფლებები ფეხზე ჰკიდია? _ არა, ეს ის შემთხვევა არაა, როცა ამ ვალდებულებას „კარგი ტიპობის“ გამო იღებ! _ აბა, რა შემთხვევაა? _ თუ გინდა, რომ პროგრესი ნამდვილად გქონდეს, წინ წახვიდე, განვითარდე და ცივილიზებული სამყაროს ნაწილი გახდე, აუცილებელია, რომ თითოეული ადამიანის უფლება აღიარო და მისი უფლებები და თავისუფლებები დაიცვა! ამ ნაკისრი ვალდებულებების კეთილსინდისიერად შესრულებას ის მოყვება, რომ შენი ხალხი და საზოგადოება უკეთ იცხოვრებს და უფრო კარგადაც განვითარდება, მეტად განათლებულიც იქნება და შეგნებულიც! თუ ყველაფერი ეს „კარგი ტიპობაა“, კი ბატონო, იყოს, მაგრამ თვალთმაქცობაა, როცა ერთი ხელით საერთაშორისო ხელშეკრულებებს ხელს აწერ, მეორე ხელით კი ქვეყანაში არსებულ ბნელ ძალებს საშუალებას აძლევ, თავიანთი სიბნელე და ძალადობა გაავრცელონ. მეჩვენება, რომ დღეს ზუსტად ასეთი ვითარება გვაქვს, ანუ საქართველოს ხელისუფლება კი აცხადებს, რომ დემოკრატიის გზაზეა შემდგარი და ევროკავშირსა და ნატოსკენ მიისწრაფის, მაგრამ, ამავდროულად, ბნელი ძალების სრულიად ანტიკონსტიტუციურ და უკანონო ქმედებებს არ აღკვეთს! _ იქნებ, იმიტომ არ აღკვეთს, რომ არ შეუძლია? _ შეძლებით კი შეუძლია, მაგრამ ამის პოლიტიკური ნება, ეტყობა, არ გააჩნია! _ ე. ი., რაღაც თამაშია? _ ეს თვალთმაქცობის თამაშია _ ხელისუფლებას უნდა, ევროპელის თვალში „კაი ტიპი“ გამოჩნდეს, მაგრამ, რეალურად, რუსოფილებს, მოძალადეებს და ბნელ ძალებს უჭერს მხარს! სხვა რით შეიძლება აიხსნას, რომ სეკულარულ სახელმწიფოში უპირატესობა ენიჭება საპატრიარქოს განცხადებებს? არადა, ეს განცხადებები აშკარად ფუნდამენტური უფლებების უკანონოდ შეზღუდვისკენაა მიმართული! თან სახელმწიფო აცხადებს, რომ უმცირესობას _ ერთ მუჭა ადამიანებს ვერ დაიცავს?! სახელმწიფო გადასახადებს თითოეული ჩვენგანი იმიტომ ვიხდით, რომ თუ, ვთქვათ, ლგბტქ თემის წევრი ვარ, პირადი მცველი კი არ ავიყვანო, არამედ სახელმწიფომ უნდა დამიცვას! მე არც „ტაბურეტკით“ უნდა დამდევდნენ, არც _ ჯოხით, არც _ კომბლით და არც _ ქვებით მხოლოდ იმიტომ, რომ ჩემი ცხოვრების წესი არ მოსწონთ! _ ისე, ბოლო დროს განვითარებული მოვლენები, ვფიქრობ, ლგბტქ თემის პრობლემებს გასცდა. ყოველ შემთხვევაში, სიძულვილისა და ფაშისტური ჯგუფები ადამიანებს ლამის სახლში უვარდებიან. აი, მაგალითად, ვიღაცას ცისარტყელასფერებიანი ფარდა ჩამოახსნევინეს, მეტროში კი ბიჭს მხოლოდ იმიტომ სცემეს, რომ საყურე ეკეთა. მართალია, ამ ბოლო ინციდენტის ფიგურანტი მოძალადე სამართალდამცველებმა დააკავეს, მაგრამ ფაქტია: ქვეყანაში სიძულვილი მძვინვარებს! _ უი, ჩემო თავო, აქამდეც მივედით? ღმერთო, რა საშინელებაა! _ დიახ, აქამდეც მივედით და ყველაფერი ეს ხელისუფლებას იმიტომ ხომ არ აწყობს, რომ ამღვრეულ წყალში თევზი ადვილად დაიჭიროს, ანუ არსებობა გაიხანგრძლივოს? _ მგონია, ხელისუფლებაში საკმარისად გონიერი ადამიანები არიან, რომლებიც უნდა ხვდებოდნენ, რომ, ჯერ ერთი, ხელისუფლებაში ასეთი ბნელი ძალებით დარჩენის პერსპექტივას მომავალი არ გააჩნია. მეორეც, შეუძლებელია, საქართველოში ამ ბნელმა ძალებმა წარმატებას მიაღწიონ! _ ამას რის საფუძველზე ამბობთ? _ დარწმუნებული ვარ, რომ ჩვენს საზოგადოებაში პროგრესული, შემწყნარებელი ადამიანი გაცილებით მეტია, რომელიც სხვას თმის ფერის, ჩაცმულობის ან ცხოვრების წესის გამო არ გაეკიდება! ყველაფერი ეს ჭუჭყი და სიბინძურეა, რომელიც ძალიან მცირე რაოდენობითაა, მაგრამ როგორც კი ზედაპირზე გამოჩნდება, ყველასა და ყველაფერს წამლავს! ბოლოს და ბოლოს, ვიცით, რომ ერთი კასრი თაფლის გაფუჭება ერთ წვეთ შხამს შეუძლია! დღესაც, დაახლოებით, ასეთი ვითარებაა და ყველაფერი ეს, რა თქმა უნდა, ჩვენს მტერს, ავს აწყობს და არა იმას _ ვისაც ეს ქვეყანა უყვარს და ამ სახელმწიფოს სიძლიერე უნდა! სხვათა შორის, ისიც კარგად ვიცით, რომ ქართველს მტერი არასოდეს გამოლევია. ვფიქრობ, საზოგადოების ძალიან დიდი უმრავლესობა ამ სურათს ხედავს და ვაი, მას, ვისაც ჰგონია, რომ ამას ვერ დავინახავთ, ვერ შევაფასებთ და სათანადო დასკვნებს არ გავაკეთებთ! ისეთი მოვლენები, როგორიც, მაგალითად, 2014 წლის 17 მაისს იყო, საზოგადოების დამოკიდებულებაზე ადეკვატურად აისახება. ყოველ შემთხვევაში, არ მჯერა, რომ ქვეყანაში ათასობით „კომბლეა“, რომელიც მთავარ „კომბლეს“ _ ვასაძეს გაჰყვება! არც იმის მჯერა, რომ რაღაც რაზმების შიშით ადამიანები საკუთარი აზრებისა და იდეების გამოხატვას ვერ შეძლებენ! _ თქვენი ოპტიმიზმი კარგია, ქალბატონო ლია, მაგრამ ისიც ვთქვათ, რომ საკუთარი უფლებები ადამიანმა მაშინ იცის, როცა განათლებულია. ჩვენი მთავარი პრობლემა, იქნებ, ისაა, რომ ქვეყანაში ტოტალური გაუნათლებლობა მძვინვარებს? შეიძლება, ზოგს განათლების მიღება უნდა, მაგრამ სოციალური და სხვა პრობლემებიდან გამომდინარე, ამის საშუალება არ აქვს! _ რაღა თქმა უნდა! განათლებამ შუა საუკუნეებიდან ევროპა იქამდე მიიყვანა, სადაც დღეს არის. ძალიან მწყინს და გული მტკივა, რომ საქართველოში, თუნდაც ერთი მუჭა ადამიანების სახით, რაღაც შუა საუკუნეების მსგავსი სიბნელის ეპოქა დავინახე! ყველაფერი ეს ქართული მენტალობისა და ჩვენი განვითარების დონისთვის სრულიად მიუღებელია! არ მგონია, რომ ყველაფერ ამის უკან პოლიტიკური ძალა და პოლიტიკური ნება იდგეს. მგონია, რომ ეს მტრის ინსპირირებული პროექტია, რომელსაც წარმატება ვერ ექნება, თუმცა ამ პროექტის ჩავარდნის პროცესში ერთი ადამიანიც რომ დაზარალდეს, ძალიან გულსატკენი იქნება და ამით მძიმე სურათი შეიქმნება! ყველაფერ ამის მიუხედავად, დარწმუნებული ვარ, რომ ამას მასშტაბური სახე არ მიეცემა! _ კიდევ ერთი პრობლემა, რომელიც ბოლო დღეებში გამოჩნდა, ის იყო, რომ „კომბლეები“ არათუ განსხვავებულ ადამიანებს, არამედ ევროპელ ელჩებსაც ემუქრებოდნენ. სხვათა შორის, ზოგმა ვასაძის რაზმები „მხედრიონს“ შეადარა, მაგრამ „მხედრიონი“, პირიქით, ცდილობდა, დიპლომატიურ კორპუსთან კარგი ურთიერთობა ჰქონოდა და თუ გახსოვთ, აშშ-ის მაშინდელ სახელმწიფო მდივანს საპატიო „მხედრიონის“ ტიტულიც უბოძა. მოკლედ, მოცემულ ვითარებაში მსოფლიოს ცივილიზებულმა საზოგადოებამ როგორი პოზიცია უნდა დაიჭიროს _ საქართველოში მიმდინარე მოვლენებში აქტიურად უნდა ჩაერთოს თუ დამკვირვებლის როლი მოირგოს და რუსეთთან ტეტ-ა-ტეტ დაგვტოვოს? _ ეჭვიც არ მეპარება, რომ ამ მოვლენების ყველა დეტალი საერთაშორისო ორგანიზაციების ანგარიშებში აისახება, რასაც შესაბამისი დასკვნები და რეკომენდაციები მოყვება. ამას გარდა, ყველაფერი ეს ჩვენი ხელისუფლების საერთაშორისო ვიზიტებშიც სათანადოდ აისახება _ ჩვენი პრემიერი უცხოეთში რომ დასეირნობს და იქაურ პირველ პირებს ხვდება, ამაზე პირდაპირ მიუთითებენ. უბრალოდ, სხვა სიტყვებს არ ვიყენებ და არ ვამბობ, ამისთვის ყურს აუწევენ და თავში ჩაუკაკუნებენ-მეთქი. მოკლედ, საქართველოში ბოლო დროს განვითარებულ მოვლენებს აშკარა უკუშედეგი ექნება. ყველაფერს თავი რომ დავანებოთ, იმ ადამიანს, რომელიც თქვენთვის უზნეო და მიუღებელია, ხომ არ ესალმებით? _ ბუნებრივია, არ ვესალმები, მაგრამ თუ მთელი მსოფლიო აღარ მოგვესალმება, ეს ხომ იმას ნიშნავს, რომ რუსეთთან პირისპირ მარტო აღმოვჩნდებით? _ ასე არაა! _ აბა, როგორ არის? ქალბატონო ლია, არც ის უნდა გამოვრიცხოთ, რომ ხელისუფლებამ საერთაშორისო დასკვნები და „ყურის აწევა“ არ გაითვალისწინოს. ამის თქმის საფუძველს კი თუნდაც აშშ-ს სახელმწიფო მდივნის ღია გზავნილი იძლევა _ პომპეომ ბახტაძეს პირდაპირ უთხრა, საარჩევნო სისტემა უნდა შეცვალოთო, მაგრამ „ოცნება“ მაინც სირაქლემის პოზაშია. _ რეკომენდაციებს არ გაითვალისწინებს და ამ ხელისუფლებას არანაირი საერთაშორისო მხარდაჭერა აღარ ექნება. ამას კი ის მოჰყვება, რომ აღარც შიდა მხარდაჭერა ექნება! მერწმუნეთ, ამ ხელისუფლებას, იზოლაციაზე მეტად, ყოფნა-არყოფნის საშიშროება დაემუქრება, თორემ დასავლეთში ძალიან კარგად იციან და საერთაშორისო ფორუმებზე პირადად მეც მომისმენია, რომ ჩვენი ასეთი ძლიერი მხარდაჭერა საზოგადოების დემოკრატიული სულისკვეთების გამო ხდება და არა იმიტომ, რომ საუკეთესო მთავრობა გვყავს! ამას ხაზი არაერთხელ გაესვა. ამიტომაც ყველაფერ ამის შედეგი იზოლაცია არ იქნება, რომელიც რუსეთს ძალიან უნდა. უბრალოდ, იმ ადამიანებს, რომლებსაც ჰგონიათ, რომ წყალს აამღვრევენ და ამ ამღვრეულ წყალში თევზს დაიჭერენ, საზოგადოება საკადრის ადგილს მიუჩენს! _ როგორ? _ თუნდაც არჩევნებით! სხვათა შორის, ვასაძემ და სხვა „მეკომბლეებმა“, ჩემი აზრით, სიტუაცია დატესტეს, საზოგადოებაში დასაყრდენს იპოვიდნენ თუ ვერა. დღეს უკვე დარწმუნებულები არიან, რომ ეს არ გამოუვიდათ და მათ სცენარსაც ყავლი გაუვიდა! _ ქალბატონო ლია, ბოლომდე არ გეთანხმებით, რადგან აგრესიულ ბრბოსთან, როგორი მცირერიცხოვანიც უნდა იყოს, ძალიან რთულია ურთიერთობა. ანუ ისევ ხელისუფლებამდე მივდივართ _ სამართალდამცველები შეცდომას ხომ არ უშვებენ, რომ „კომბლეებს“ საკადრისად არ სჯიან და მხოლოდ მათი გამოკითხვით შემოიფარგლებიან? _ როგორც ჩანს, ხელისუფლებასაც ტესტის რეჟიმი აქვს ჩართული _ ხელისუფლებაც ინტერესით ადევნებს თვალყურს, რუსულ სცენარზე საზოგადოების რეაქცია როგორი იქნება, მაგრამ ხელისუფლებაც მალე დარწმუნდება, რომ ამ რუსულ სცენარს შედეგი არ მოჰყვება! _ რუსული სცენარი გასაგებია და ისიც კარგია, თუ ამ სცენარს ყავლი გაუვიდა, მაგრამ მედალს ორი მხარე აქვს. შესაბამისად, ქალბატონო ლია, თქვენ, როგორც უფლებადამცველი, ხომ ვერ უარყოფთ, რომ უფლებები აგრესიულ ჯგუფებსაც აქვთ, რომლებიც თავიანთ მოქმედებას ქრისტეს სახელით ამართლებენ? _ მორწმუნეთა უფლებები რით ილახება? _ აი, მაგალითად, ფალავანდიშვილმა განაცხადა, „თბილისი პრაიდი“ რომ ჩატარდეს, ყველანი გეები გავხდებით და ამით ჩვენი უფლებები შეილახებაო. _ არ ვიცი, ამ პრაიდით ფალავანდიშვილი გეი გახდება თუ არა, მაგრამ დამერწმუნეთ, გეი სხვა ნამდვილად არ გახდება! ხუმრობა იქით იყოს და, წეღან განათლებაზე ვსაუბრობდით და ამ შემთხვევაში ძალიან მნიშვნელოვანი სწორედ განათლებაა _ განათლებული ადამიანი ფალავანდიშვილის ამ გამონათქვამზე მხოლოდ გაიცინებს იმიტომ, რომ ძალიან დიდი ხანია, დამტკიცებულია, პროპაგანდით და აგიტაციით სექსუალურ ორიენტაციას არავინ იცვლის! სხვათა შორის, ადამიანები ორიენტაციას მაშინაც კი არ იცვლიან, როცა ორი დედის ან ორი მამის ოჯახში იზრდებიან! ამიტომ, როცა ადამიანები ინფორმირებულები არიან, ასეთი მოწოდებები, რა თქმა უნდა, ნიადაგს ვერ იპოვის. ვფქირობ, ჩვენი საზოგადოება ამ კუთხით საკმარისად ინფორმირებულია. _ შეიძლება, მაგრამ განსხვავებული სექსუალური ორიენტაცია მართლმადიდებლური ლოგიკით ცოდვაა. კი ბატონო, საქართველო სეკულარული სახელმწიფოა, მაგრამ ამ ქვეყნის მოსახლეობის აბსოლუტური უმრავლესობა მართლმადიდებელია. შესაბამისად, ჩაგეძიებით, მორწმუნე საზოგადოებასაც ხომ აქვს უფლება, პრაიდი ან სხვა სახის ლგბტქ აქტივობა გააპროტესტოს? _ ეს ლოგიკა არ არის. _ უკაცრავად, რატომ არ არის? _ ლოგიკა ის არის, რომ ყველას უფლება თანაბრად უნდა იყოს დაცული. აი, მაგალითად, ჩემი პრაქტიკიდან ერთ კონკრეტულ ამბავს მოგიყვებით: თავის დროზე, ევანგელისტური მრევლის წარმომადგენლები ე. წ. მამა ბასილის მრევლისა და ასევე პოლიციის თავდასხმის მსხვერპლები გახდნენ. სასამართლოში მათ უფლებებს ვიცავდი და მახსოვს, პროცესებზე ე. წ. მამა ბასილი მრევლთან ერთად დადიოდა. ერთი დღე მომისმინეს და მერე მითხრეს, _ ჩვენ რომ პოლიცია გვარბევდა, რატომ არ დაგვიცავიო?! _ ამ მაგალითის მოყვანით რისი თქმა გინდათ, ქალბატონო ლია? _ ე. წ. მამა ბასილის მრევლმაც გააცნობიერა, რომ აქვს უფლება, თავისი მოსაზრება ქუჩაში, საჯაროდ გამოხატოს და არავის აქვს უფლება, ეს შეზღუდოს! მოკლედ, შეურაცხყოფას კი არ ვაყენებ, არამედ, ქმედების მიხედვით ვაფასებ _ ამ ბნელმა მრევლმაც, როცა ჩემი დაცვის არგუმენტებს ისმენდა, გააცნობიერა, რომ სახელმწიფოს ვალდებულებაა, ყველას გამოხატვის, შეკრებისა და მანიფესტაციის თავისუფლება უზრუნველყოს! სავალდებულო არ არის, რომ ყველას ყველაფერი მოსწონდეს, მაგრამ ჯერ აქცია არსებობს და შემდეგ _ კონტრაქცია. როცა ჯერ აქცია არ ჩატარებულა და უკვე კონტრაქცია ტარდება, აქ აშკარად იკვეთება, რომ ყველაფერი ეს ვიღაცის მიერ არის ინსპირირებული და ინსპირატორი სახელმწიფო რომც არ იყოს, პასუხისმგებლობა მაინც მას ეკისრება! ამიტომ სახელმწიფოს ინტერესებშია, რომ ყველა ღონისძიება გაატაროს, რათა კონტრაქციის საფუძველი არ შეიქმნას, მაგრამ თუ კონტრაქცია მაინც გაიმართება, სახელმწიფო სტრუქტურებმა ყველაფერი უნდა გააკეთონ, რომ კონტრაქციის მონაწილეების ქმედებებმა ძალადობრივი სახე არ მიიღოს! იმ შემთხვევაში კი, თუ ეს ქმედებები ძალადობრივ სახეს მაინც მიიღებს, მაშინ სახელმწიფომ ნებისმიერი პირი, რომელიც ძალადობაში იქნება ჩართული, დასაჯაოს და, მათ შორის, სისხლის სამართლებრივი წესითაც! ასე რომ, ყველაფერი ეს სახელმწიფოს მოვალეობაა. შესაბამისად, შსს-მ ყველა პირი, ვინც ქუჩებში ინდივიდუალურად თუ ჯგუფურად დაძრწის და ვინმეს ერჩის, უნდა დააპატიმროს და გამოძიების დასრულების შემდეგ სასამართლოში მიაბრძანოს! წინააღმდეგ შემთხვევაში, ყველაფერი ეს საერთაშორისო ორგანიზაციების ანგარიშებში აისახება, თან არ დაგავიწყდეთ, რომ საქართველომ ერთი ასეთი საქმე ევროსასამართლოში უკვე წააგო. _ 2014 წლის 17 მაისის მოვლენებთან დაკავშირებულ საქმეს გულისხმობთ? _ დიახ, ამ საქმეზე არსებობს ევროსასამართლოს სახელით გამოტანილი დადგენილება, სადაც ნათქვამია, რომ ჩვენმა სახელმწიფომ უმცირესობების უფლებათა დაცვა ვერ უზრუნველყო და თუ ამ გადაწყვეტილების შემდეგ ამ ქვეყანაში მსგავსი მოვლენები კიდევ განმეორდება, ეს ხელისუფლებისთვის ძალიან სახიფათო იქნება! _ ბოლოს, ქალბატონო ლია, თქვენი, როგორც იურისტის შეფასებით, ლევან ვასაძის განცხადებებში სახელმწიფო გადატრიალების ნიშნები იკვეთება თუ არა? _ დიახ, აბსოლუტურად. ეს განცხადებები, მინიმუმ, უკანონო დაჯგუფების შექმნასა და ძალადობრივი ქმედებისკენ მოწოდებაა, რაც ანტიკონსტიტუციური და კანონსაწინააღმდეგოა. ყველაფერ ამისთვის ვასაძეს პასუხი უნდა მოეთხოვოს, მაგრამ თუ დაუსჯელი დარჩება, ეს ხელისუფლებისთვის პიდაპირი იარლიყი იქნება, რომ ძალადობრივი პოლიტიკის მომხრეა, ფუნდამენტურ უფლებებსა და თავისუფლებებს პატივს არ სცემს და ხელს უწყობს „კომბლეებს“, ამ ქვეყანაში იპარპაშონ! თუ ხელისუფლება ვასაძეს არ დასჯის, მას ძალიან ცუდი შეფასება ექნება როგორც ქვეყნის გარეთ, ასევე ქვეყნის შიგნით და ეს შეფასება ჩვენ შეგვიძლია, არჩევნებზე გამოვხატოთ. საერთაშორისო საზოგადოება კი იმ დახმარებებსა და მხარდაჭერებზე იტყვის უარს, რომლითაც „ოცნება“ ასე ამაყობს! _ ანუ თუ ვასაძე არ დაისჯება, დასავლეთმა შესაძლოა, გრანტები და სხვა ეკონომიკური დახმარებები აღარ მოგვცეს? _ არა მხოლოდ. ვგულისხმობ დიპლომატიურ მხარდაჭერასაც. დასავლეთი იმ ზომებს გამოიყენებს, რაც უფრო ქმედითია, რათა მთავრობა გონს მოეგოს! _ ვასაძის დაჭერა ვითარებას ხომ არ დაძაბავს? _ დღეს მისი დაკავება, შესაძლოა, გონივრული არ იყოს, მაგრამ პასუხი აუცილებლად უნდა მოეთხოვოს! ადვოკატი ვარ და მთელი ცხოვრება ადამიანების პატიმრობისგან განთავისუფლებისთვის ვმოღვაწეობ, მაგრამ ახლა ვითხოვ, რომ ვასაძე სამაგალითოდ დაისაჯოს, რათა მომავალში არავინ ისე აღარ გადიდგულდეს, რომ „კომბლეობა“ ისევ მოუნდეს! _ ქალბატონო ლია, ამ ხმამაღალი განცხადებების გამო ამ ქვეყანაში თავს დაცულად გრძნობთ? _ ლანჩხუთის რაიონის სოფელ შუხუთში ვცხოვობ! თუ ვინმე მოვა და რამეს დამიპირებს, საკადრის პასუხს მეც გავცემ, თან პატრულსა და ყველა ჩემს მეგობარს გამოვიძახებ! აქვე მინდა, ყველას ვუთხრა, რომ არ შეეშინდეთ და როგორც კი საფრთხეს იგრძნობთ, იმ შემთხვაშიც კი, თუ დარწმუნებულები არ იქნებით, რომ საფრთხე რეალურია, პატრული გამოიძახეთ და დაცვა მოსთხოვეთ! სხვათა შორის, პოლიციამ ძალიან კარგად იცის, ასეთი ჯგუფების თარეში და მათი აღვირახსნილი ქმედებები როგორი საშიშია. ამიტომაც უმოქმედო არ იქნება!

გიორგი აბაშიძე